老Blue日記

四年前後

2009-04-19T21:13:00.003+08:00

2009年4月19日
己丑年三月廿四
夜

〈攝影〉
公司終於公佈有關員工「無薪假期」嘅事項，
結果比想像「損失」輕，
不幸中之大幸，
繼續開工、繼續娛樂。

開工嘅嘢就無謂講嘞，
但係娛樂方面就相當充實。
呢個幾月我老Blue不停咁同班影友去映相，
從唔同年齡及映齡嘅映友一齊映相又有另一種體驗。
自四年多前自己開始由傳統菲林相機轉至現今相當普及嘅數碼相機，
公司裡面由最初兩、三位映友到今日多到十「九」幾友。
其間多次同呢班工友去映相，
每次都感覺樂趣無窮。

呢班映友好多平均為中年朋友，
但係近呢一年多咗好多年青映友加入，
故勿論中年還是年青一群，
雖然映齡尚淺，
但係對攝影相當有熱誠。
不過，身為過來人的我，
感覺到兩個年齡嘅新映友對攝影態度。
先講中年新映友玩攝影，
每次外映佢地事必做足功夫，
地點、時間及聯絡等等....，
呢班朋友映相會好識揾主題，
最後佢地一定要食餐好嘅。
之於一班年青影友每次出去映相係講即慶，
但係佢地映相嘅時候會不斷發問攝影技巧嘅問題，
攝影角度有佢地個人嘅觀點，
好多時過於投入，
連飯都唔記得食....。

我老Blue玩咗咁多年攝影，
好高興到今時今日身邊仲有咁多朋友一齊映相，
似乎自己係最大收獲嘅一個！

Blueman

三月回憶

2009-04-10T01:16:00.003+08:00

2009年4月10日
己丑年三月十五
凌晨

〈三月〉
整整一個月我老Blue無再寫過blog囉，
唔係因為無乜嘢寫，
而係自己忙到唔得閒寫，
不論或公或私都係.....。
以為金融海嘯，
公司起勢咁cut人手，
但係呢個月感覺工作仲忙咗！？
終於趁今晚有時間寫下呢個三月份自己點樣無事忙？

〈關西〉
自總結三月PMA之後幾日，
我老Blue同幾位工友去咗日本關西玩咗幾日，
其實關西自己今次係第二次去，
今次目的主要映相，
上次大約八、九年前仲用緊菲林機，
加上當時天氣欠佳，
成日就住就住，個次老實講映得唔夠痛快！！
今次隨著科技進步，
可以即晚起酒店上網睇天氣決定攝影目的地外，
更重要係今次用咗DSLR，
成功率比起上次有天淵之別，
呢次大大話映咗接近20GB相，
自己都有啲驚.....。

〈花展〉
去完關西之後幾日，
相都未執完又同班映友相約到維園映花展，
呢個係我地亦係香港地眾多映友嘅「例行公事」，
所以有網友笑稱：維園花展＝大型相機展？
今年花展首日已經比去年仲多人入場，
無他嘅真係多咗好多朋友玩攝影嘛！
今次我同朋友都成十個咁多一齊參與，
你帶一個玩攝影，佢又帶一個，
你話唔多人玩就假囉！！
再加上首日大家其實映得唔係咁暢快，
原因係除咗映友、嘗花人之外，
更加上有一大班小學生圍圈玩「寫生」，
成班映友睇到O哂咀！！
結果，各自各擇日「重賽」，
吹漲！！

〈新人〉
除咗工作呢排多咗啲同事學新岡位外，
起攝影上我地圍內亦多咗好多新映友加入，
有核心成員好熱心用網絡形式攪咗非公開私募「映會」，
志在交流下攝影上嘅心得外，
亦有聯誼作用。
我老Blue亦參與其中，
仲唔怕醜幫手起咗個Logo，
都幾過癮下！！
至於多咗幾位新成員，
希望佢地對攝影嘅熱誠可以保持耐啲啦！
始終攝影唔係遊戲機，
唔係求過版了事，
而係對自己及技術嘅長期磨練。

〈包場〉
咪以為我老Blue同班映友映完花展，
呢個三月嘅攝影就咁結束喎，
映咗咁多相淨係執都有X排執啦！！
結果混埋自己幾晚起屋企猛咁揀相、執相，
重複又重複對住個「芒」仲慘過返工咁。
好啦到咗月中終於清哂手頭上嘅「舊相」，
又有老友摟映女嘞，去囉！！
今次映女又玩包場，
因為之前都講過包場不論溝通或自由度都大過「單頭跟隊」嘛！！
呢次映女又俾我撞番好多年玩菲林嘅師兄，
有師兄坐陣梗係唔放過跟佢學嘢啦！！
於是一路學set燈一路映，
有同行映友第一次玩映燈光人像，
大呼過癮，好希望快啲再攪喎！！
睇怕嚟緊呢個四月又唔得閒....。

〈裝著〉
呢個三月除咗映相外，
起攝影裝備上我老Blue亦添置咗少少新嘢，
就係終於的起心肝買咗支O記嘅平價版Ultra-wide鏡09-18mm，
呢枝又輕又實用嘅廣⻆鏡，
不論玩風景、街頭snap甚至乎近攝模型同樣咁有用！！
另外，跟咗我十幾年嘅Gitzo零號合金腳亦係時候退役，
經朋友及網友介紹Trade-in咗支Slik嘅零號Size嘅Pro 614CF碳纖腳，
用嚟去旅行或旁身都好方便。
隨著氣温續漸回暖，
又唔想出街映相帶咁多裝備上身，
最近買咗個相機腰帶及「槍袋」用，
前日同班工友去咗海洋公園玩，
首日試用效果顯著，
一機兩鏡夠哂機動！！
家陣自己出門配搭如下：
一機一鏡-Billingham相機側孭袋，
一機兩鏡-ThinkTankPhoto相機腰帶加槍袋，
一機三鏡配腳架-Newswear相機背心，
全裝備-ThinkTankPhoto背囊。
經個呢個月反覆測試後，
以後出門再唔駛煩帶啲乜嘢出街嘞，So good！！

〈動畫〉
最後值得一提嘅係追咗接近成年嘅Gundam OO終於上個月完結，
好滿意個結局，
兼且咁多套非UC系嘅Gundam片種，
我老Blue最滿意呢套，
完全突破以往舊有UC影子外，
更加入好多新嘅元素，
尤其去到最後決戰，
感覺好玩嘢，
「大奸角」最後用「鐳射大砲」對撼主角機OO，
跟住「鐳射大砲」玩雙面人，
另一面居然係新型高達，
最後同OO打到兩敗俱傷不得至，
最後決戰大玩GN-01 Exia鬥元祖GN-0 Gundam（RX-78-2？），
仲要係最元始嘅隻抽，
簡直有首尾呼應嘅感覺，
真係睇到O哂咀？？
佢鹵味ending交待哂嘅人物去向後，
以為就咁完啦，
突然last幾秒話俾人知2010年有劇場版，
唔係咁激下，
咁快就信心出劇場版？
我老Blue真係好想快啲睇下劇場版玩啲乜嘢囉！！

一口氣寫咗咁多嘢，
老實講對手有啲攰.....　^_^!

Blueman

平淡、驚喜的PMA09

2009-03-05T11:59:00.005+08:00

2009年3月5日
己丑年二月初九（驚蟄）
早

〈相機〉
於美國拉斯維加斯舉行嘅Photo Marketing Association Annual Show（簡稱PMA）於今月3號至5號為期3日已經舉行。
我老Blue從網上各有關網站消息睇到之後，
感覺今屆PMA各廠家展出有關新產品乏善足陳，
無乜驚喜.....。

「C記」只集中推介佢旗下最新個兩枝「天價」移軸鏡：
TS-E 24mm f/3.5L II
TS-E 17mm f/4L
「鴨腎」無厘頭居然出部R-D1新版-R-D1xG，
遺憾呢部機舊版新瓶，依舊APS-C size及六百萬像素，
俾人有種不合時宜嘅落後感....。
「富記」今年PMA依舊對「蛇五」後繼機無任何聲氣，
唔通因為FF機關係，大有事不與我，
還是遲啲平地一聲雷突然彈部「蛇六FF機」出嚟都未定！？
「奶記」繼續推出旗下M系新鏡：
Super-Elmar-M 18mm f/3.8 ASPH
「N記」亦無乜驚喜，只係擺枝最新DX入門鏡：
AF-S DX Nikkor 35mm F1.8G
「P記」亦按之前計劃公佈咗最新嘅DCLR：
LUMIX DMC-GH1「高清版」及兩枝新鏡﹣
LUMIX G Vario HD14-140mm
LUMIX G Vario 7-14mm
「賓記」估唔到對DA系餅鏡不遺餘力，繼續出新鏡：
DA 15mm F4 ED AL Limited
「S記」一口氣推出咗幾枝新鏡：
50mm F1.8
30mm F2.8 Macro
DT 18-55 F3.5-5.6
DT 55-200 F4.5-8
28-75 F2.8

DSLR最有驚喜數O記事先張揚嘅E-620新一代入門級DSLR，
呢部入門級比起之前所推出嘅入門級有「突破性」發展，
點解？因為呢部E-620差唔多將O記最強及最新功能放哂落去咁劑！
入門級已經有應有嘅除塵及少巧特徵外，
新加入4級內置放手震系統、E-3嘅反轉「芒」、七點十字型對焦點、E-30內置濾鏡效果、內置無線閃燈功能及終於入門級可配備直度電池手柄。
揕稱O記最強入門機，
由於功能強勁，更被網友O記粉絲笑謔為「自己人打自己人」，
雖然暫時睇到O記出咗部入門新機，
亦有O記網友同我老Blue有另外一個諗法就係入門級已經咁強？
中檔位亦出咗第一部E-30，
咁頂級機會有乜改進呢？
呢個問題先至有趣！！
我相信下一代E-3後繼機將會帶俾一眾O記用戶有驚喜，
大家等消息吧！！
不過不知何年何月，
我老Blue都係專心玩我部E-3吧！！

Blueman

為「雙爐頭」樂曲瘋狂

2009-02-23T03:12:00.005+08:00

2009年2月23日
己丑年正月廿九
凌晨

〈音樂〉
隨著Gundam OO第二季進入尾聲，
劇力依然強勁，
到此為止感覺呢套OO完全突破已往Gundam框框，
我老Blue就好buy今套高達啦！
不單只劇情、機設，
連帶配樂、主題曲都同好另類，
好多以輕快、搖滾味好重吓，
跟住第二季劇情開始「愛情戲」重咗，
樂曲亦隨之轉變，
尾場曲「Prototype」及最新嘅「trust you」特別搶耳，
從youtube瀏覧次數就可知道！！
噚晚夜深我老Blue好努力咁終於「收集」哂呢兩季咁多隻OO主題曲及插曲，
當然最多朋友「渴求」梗係最新個隻尾場曲由歌手「伊藤由奈」主唱嘅「trust you」，
歌詞𥚃副歌不斷唱出「I love you，I trust you .......」
配合今集#20尾段嘅故事，
我老Blue真係有啲感動......。

希望隨著OO完結，
原聲歌曲CD快啲出啦！！

Blueman

點滴分享

2009-02-15T20:57:00.005+08:00

Album-Valerie第三次夥拍朋友包場拍攝。

Album-Leanna第二次獨自包場，首次學習set燈。

Album-Angela雖然以單頭身份參與活動，但開始對色彩及單色調控有初步掌握。

Album-Ling自己首次以包場形式拍攝Studio人像，感覺好新鮮！！

Album-Boo09年第一輯人像作品，經過一年實戰，對自身攝影器材完全信賴及滿意。

街頭攝影「Life 2009 Part 5」

Life 2009 Part 4

Life 2009 Part 3

Life 2009 Part 2

Life 2009 Part 1

2009年2月15日
己丑年正月廿一
夜

〈攝影〉
踏入09年市道仍然低迷、經濟不振嘅環境下，
工作明顯比去年清閒咗，
我老Blue呢兩個月亦多咗時間去映相。

講開攝影自己除咗鐘意映街頭相外，
亦好喜歡映人像。
映咗咁耐影會活動，最近終於鼓起勇氣學人「包場」映人像，
呢兩個月玩咗三次包場，
感覺真係好唔同，
除咗唔駛同啲三唔識七嘅影友「跟隊」例影外，
亦可考驗自己映「人」嘅功力，
點樣事前set燈、點樣同model溝通擺post？
經過三次包場後，
拍攝經驗及效果一次比一次有所得益，
雖然包場比單頭出席活動費用「重皮」，
但係收穫比以前單頭入座嚟得豐富，
最近個次「包場」更聯同兩位朋友參與，
佢地雖然第一次玩studio人像攝影，
已經感受到其中樂趣。
相信嚟緊嘅日子，我老Blue都會以咁嘅形式參與呢類「包場攝影」！

題外話，除咗事前攝影嘅功夫外，
自己拍攝人像後，
亦嘗試參考日系寫真風格玩「後制」，
開始迷上單色黑白人像，
攝影呢科嘢隨著科技進步真係學無止境，
努力中........。

以上十輯劣作係我老Blue近呢兩個月嘅攝影分享，
有興趣嘅朋友歡迎抽空瀏覧，謝謝！！

Blueman

第七日

2009-02-10T22:01:00.003+08:00

2009年2月10日
己丑年正月十六
夜

〈攝影〉
噚日係農曆正月十五，即所謂“元宵佳節”。
我老Blue同埋班工友去咗映市政局攪嘅元宵花燈，
為期三日。
查實呢個花燈晚會有三個場地，
我老Blue因為返工緣故，
祇能去到荃灣沙咀道球場同埋噚晚位於土瓜灣嘅高山劇場，
另外位於大埔海濱公園就去唔到囉！！

由於噚晚係「正日」嘅關係，
人潮比預期仲要多，
我老Blue同其他朋友映得一、兩位之後，
好無癮咁就完成呢個攝影項目，
好彩之前去呢個荃灣因為係球場關係兼且係第一日，
映得比較暢快。
呢兩次映花燈自己最大目的係繼續玩HDR攝影，
原來夜間玩HDR係好高難度，
夜間光度配合花燈顯得光差好大，
好惡攪.....。

〈影視〉
最近自己除咗忙於攝影、油下模型外，
亦會抽時間「煲劇」，
當然係我老Blue至愛「Gundam OO」啦！
呢套以現實AD年代為背景嘅高達，
越睇越有味道，
編劇「黑田洋介」真係有啲料到，
劇力越推越緊，掂！！
另外，除咗動畫外終於等到Fox皇牌美劇「24」第七季，
呢季唔再有CTU，發生地點亦唔再係L.A.而係起華盛頓，
感覺比較新鮮，
主角Jack Bauer一樣咁燥狂咁做嘢，
繼續咁癲，好正！！
雖然呢套戲劇情其實每季都係發生一日廿四小時，
一日𥚃面點可以發生咁多事呀？
但係自己唔知點解一日廿四小時都唔係好夠用咁？

Blueman

高度寬容

2009-02-05T19:18:00.005+08:00

2009年2月5日
己丑年二月十一
夜

〈攝影〉
雖然踏入2月市道依然低迷，
但係我老Blue一樣無事忙，
唔俾自己得閒....。

平時自己上網除咗睇下新聞外，
亦會抽時間睇下其他攝影高手嘅作品，
通常會去Photo.net及Flickr.com呢兩個攝影交流網站，
近日見到有海外Olympus E-1用家啲作品好正，
相片曝光及細緻好高！
我老Blue正疑惑以E-1能耐邊有可能映咁高「寬容度」嘅相片呢？
睇多幾幅就發覺呢批相旁邊個Tag注明為「HDR」呢三個英文字，
好奇之下上Google揾到「HDR」原來係解作「High Dynamic Range」即高度寬容度相片，
用嘅方法就係利用一個叫Photomatix Pro嘅軟件，
呢個軟件係由一間法國嘅軟件公司叫HDRsoft開發，
從官方網頁所介紹呢個軟件用法係當拍攝某個場景時，
遇到光差好大嘅時候，
某個情況曝光可能會光位及暗位相差2級E.V.咁大，
起呢多時候曝光好難取捨，
亦都係攝影最考工夫嘅時候.....。

但係有咗呢個軟件之後，
問題相對簡單好多囉！！
只要拍攝嘅時候用包圍式曝光，
正、負及正常各映幾張之後，
跟住全部交哂俾呢個軟件，
自行運算曝光值嘅變化，
合併成為一張HDR（高寬容度影像），
隨後更可作細微數值調教及作不同形式輸出，
比起用PS用Quick Mask嚟得簡單易用，
只不過彈子之間花分零鐘就完成！！

其實呢個「高寬容相片」概念並唔係新鮮事物，
起「遠古」黑白攝影年代，
已故攝影大師Ansel Adam已經發明呢個叫Zone System攝影方法，
尋找最利想嘅曝光拍攝。
但係隨著攝影及軟件科技發展一日千里，
已往好多時大師或要資源嘅攝影方法，
家陣一般「平民」玩家都可以享受到。
如果有興趣嘅攝影玩家都可以嘗試玩下呢個軟件，
藉此提升相片質素或拍攝以往平時忽略嘅影像，
Frickr.com網站已經有好多玩家作品上載，
只要用「HDR pool」呢個字眼就可以Search到過萬張呢類作品參考！！

Blueman

己丑年開年第一篇

2009-01-27T23:44:00.003+08:00

2009年1月27日
己丑年正月初二
夜

首先我老Blue同咁多位blog友及網友講聲恭喜發財及身體健康！！

〈模型〉
踏入己丑牛年，我老Blue有幸初一、初二放假。
除咗同親友拜下年之外，
天寒地凍最好起屋企砌模型，
不過，我老Blue並唔係開盒砌新模型，
而係延續去年計劃，
繼續為「MS倉庫」上色，
花咗大半日時間都係上咗三分一部件，
可能太耐無砌模型或者油模型嘞，
油都咁上下已經腰酸背痛.....。
不過，呢個始終係今年2009年大project，
一日未完成都唔駛旨意再起個「迷你倉」搬啲新模型出嚟砌囉！！

＊＊註：我老Blue見最新MG模型「新安州」實在太吸引，又搬咗返屋企......。

自製精裝版

2009-01-18T22:16:00.006+08:00

2009年1月18日
戊子年十二月廿三
夜

〈雜誌〉
每隔一排我老blue間房又堆滿無謂雜物，
多數係過期雜誌、漫畫或宣傳品之類嘅「無謂嘢」！
所以到咁上下時候，
我老Blue就會出手要「毀滅」呢堆雜物啦。
唯獨「DENGEKI HOBBY」電擊模型雜誌，
我就一直留起到。
不過，隨著時間不斷咁過，
「電擊」儲存量亦不斷咁增加，
已經去到間房嘅「存量臨界點」！！
於是，最近的起心肝買咗兩個活頁式檔案夾，
將呢兩年幾買落嘅「電擊」嘅精華內容剪出嚟，
做成一本極高參考價值嘅「電擊」個人精裝版，
可以隨時攞出嚟揾有關高達嘅資料，
呢個方法自己覺得幾好用。

Blueman

2009年序章

2009-01-10T02:32:00.004+08:00

2009年1月10日
戊子年十二月十五
凌晨

〈投資〉
雖然踏入09年已經十日，
但係我老Blue好似Blog界蒸發咗咁無寫好多日，
又係因為無事忙個隻囉！！
2007年係我老Blue嘅「投資年」，
興幸自己有少少斬獲，
及時見好就收叫做避過一劫，
08年生活並未構成影響。
總結08年投資小注怡情，
不過都係輸多贏少......，
09年估計個市唔會好得去邊，
都係少做少錯，唔做唔錯策略比較好啲！

〈攝影〉
繼07年係投資年之後，
2008年可以講話係我老Blue嘅「攝影年」，
玩咗咁耐攝影十幾年，
從未試過好似呢一年咁活躍，
除咗將07年投資嘅成果用嚟買攝影器材之外，
08年係我咁多攝影以嚟，
映相最多嘅一年。
不單之咁，呢一年亦係自己最多朋友加入攝影呢個活動嘅一年，
大大話都有十幾個朋友玩DSLR，
其間更不時約埋出去映相，
非常咁熱鬧！！
估計呢股攝影風氣會起09年延續落去。
之於攝影器材已經起08年買夠啦，
幾乎連唔應該買嘅都買埋嘞.....！
最大代價莫過於枝「豬嫂」二號腳，
若然真係要再上就會上中片幅數碼，
慶幸自己並未有勇氣及財力上呢一步，哈哈！！

〈模型〉
隨著金融海嘯之下，
經濟及就業轉差，
對於打工仔嚟講凍薪、裁員或放無薪假已經唔再係乜嘢新聞？
相反係其中一瓣幾時輪到自己咁解！
估計嚟緊一年工作量隨著外圍影響，
會清閒好多，
自己起到諗只要仲有份工就無有怕！
預計呢一年空閒嘅時間會比去年多的話，
手頭上嘅高達模型應該會可以繼續砌落去囉！
下個月MG模型連GM「吉姆」都出埋Ver 2.0，
自己手頭上連初版1.0都未攪好，真失敗！！
希望今年除咗有時間之餘，
仲可以騰到時間出嚟砌模型及映模型啦！！

Blueman

08年最後兵器-超迷利腳架

2008-12-31T20:57:00.004+08:00

2008年12月31日（大除夕）
戊子年十二月初五
夜

〈腳架〉
今日係2008年最後一日，
呢一年雖然股市低迷，
慶幸自己未被波及！
不過呢一年我老Blue玩物喪志，
為攝影添置咗唔少器材.....。

到咗08年最後一日，
未知驚唔識死咁繼續喪買。
呢排upgrade咗枝2號腳，
出外映相頻頻用「腳」映相，
的確對拍攝帶嚟唔少幫助，
對腳架應用有增無減！
但係仍有不足之處，
就係平時想起屋企映下Table Shot或者模型仔咁細微嘢，
如果下下開啲大機大腳就好大工程兼花時間。
好多年自己買落一枝「豬嫂」舊版“零”號腳，
就係隨時起屋企好方便咁映嘢，
但係唔知幾時開始不翼而飛......。
呢一年已經「荷包」大放血，
叫我老Blue再買過枝新版“零”號要俾成二千幾銀碳版，
幾乎唔可能（原來「豬嫂」腳真係會升值....）！

呢兩日我老Blue逛街個陣，
無意俾我睇到「金鐘」有隻超迷利腳架好過癮，
得個幾寸高最適合映啲table shot，
問價六條魚有找成交！
Velbon呢款迷你腳型號為ULTRA MAXI mini，
淨腳架摺合時為12.5cm，
五段式加中軸全開時為41.2cm，
最低高度僅有7.1cm，
仲可倒裝中軸，
淨重400g，
官方話最高負重為1.5kg。
本身腳架跟一個QHD-51波頭仔，
但係對自己作為唔大，
因為買呢枝矮腳最大好處可以配頭，
於是買咗之後第一件事攞返個NOVOFLEX MagicBall mini配落去，
感覺相當平衡及匹配，
外觀仲相當有趣㖭！！

裝好之後立刻實拍，
加埋先排買咗件RRS微距架，
搭部入門DSLR E-300或E-420感覺相當穩陣，
跟住揾啲BB高達模型擺起枱面就咁映，
實在好方便，好過癮！！
以後又多樣小巧「兵器」傍身囉！！

Blueman

負重14磅的街頭行者

2008-12-26T02:18:00.004+08:00

2008年12月26日
戊子年十一月廿九
凌晨

〈背包〉
上次起Blog我老Blue都提過因為upgrade咗枝2號腳架，
諗緊買個相機背囊方便出街映相。
一直以來無用開相機背囊原因係雖然背囊可以裝到好多嘢，
但係映相個陣想換鏡頭會極度唔方便，
加上之前枝腳架重量平衡問題，
非必要真係唔會攞支腳出街用囉，
所以相機背囊一直無考慮過.......。

但係家陣換咗枝咁輕巧嘅靚腳之後，
覺得係時候買個相機背囊用啦！
不過，家陣除咗DSLR大行其道外，
連帶週邊產品亦多咗好多又新又多功能嘅相機袋品牌應運而生，
唔再係以前（十多年前學映相個陣）比較有「朵」嘅「Tenba」、「Domke」或者「Lowepro」等等專美。
比較新嘅品牌有特色相機袋品牌有英國品牌「Billingham」、澳洲品牌「Crumpler」、以色列品牌「Kata」及美國品牌「Thinktank」、「Newswear」等出現。
雖然品牌眾多但係要揀一個合乎自己器材及身材嘅相機背囊絕對唔係一件易事，
呢排我老Blue頻頻走上網及入鋪頭睇相機袋嘞，
最後啱自己器材要求嘅只得兩款﹣Lowepro backpacks Flipside 400AW及ThinkTank backpacks Street Walker Pro。
兩款設計及大小相若，
但係上網睇過佢嘅尺寸、重量之後，
Street Walker Pro-Volume為18144cm、淨重2.6磅；
Flipside 400AW-Volume為17212.5cm、淨重3.5磅，
發覺Street Walker Pro內籠比Flipside 400AW容量大及輕。
結果.....孭過上身之後揀咗Think Tank呢隻Street Walker Pro「街頭行者」！

噚晚，應楊工友要求陪佢出去買相機背囊，
順道試相機袋及映下夜景咁。
楊工友因「筆直」所限，
決心入Lowepro Flipside 400AW不作他選，
而自己為咗用背囊個陣可以方便換鏡，
亦配多條專用Belt帶及外置鏡筒。
就係咁兩兜友孭住個相機背囊掛住枝新腳架趁呢個聖誕夜去咗中環映夜景兼試「袋」嘞！！

既然係要試「袋」呢一晚出嚟映相，
特登裝咗比平時映相仲要多嘅器材入去，
經計算之下成個背囊足有14磅之多，
考驗一下呢個背囊及自己嘅承受程度.....！？
結果孭咗五個鐘，
感覺相當舒適，成個背囊力點分散平均唔覺有「聚」嘅感覺。
最緊要係配咗條Belt帶後可以掛個鏡筒做側袋，
成枝ZD 50-200mm長鏡都放得落，
換鏡唔成問題，
解決為用背囊最大嘅煩惱。
呢個相機背囊繼Newswear之後，
今年自己買咁多樣嘢用得最滿意最開心嘅產品！！

Blueman

1.94千克的終極平衡

2008-12-15T17:14:00.004+08:00

2009年12月15日
戊子年十一月十八
下午

〈腳架〉
上次我老Blue起Blog（02/12）提過個塵年Ball頭換咗個新底板，
雖然成個頭好用咗、穩定咗，
比起之前用開又重又大嘅「萬記」 488RC4中型波頭梗係輕巧好多啦。
不過，配落沿用嘅「豬嫂」G1127 Mk-II三節碳腳又出現頭輕腳浮現象，
呢個配搭對於承載入門級DSLR加枝Kit鏡，
基本上無乜問題，
但係一上咗中型或專業級嘅DSLR加大光圈Zoom鏡，
就會出現力不從心嘅感覺，
為此對於現有腳架嘅配搭改善都幾頭痕.......。

對於呢個問題，
自己走訪好多店鋪或網站研究相關腳架嘅配搭，
其中攝影配件美國品牌「RRS」及「豬嫂」網站都有提供咗有關腳架選擇嘅資料，
集合兩者意見之後，
選擇一支組合式（腳、頭及底版）應該以現有相機配備最大重量為基數外，
波頭號數不應超過腳架號數，
最理想計算方法為腳架重量祇少為波頭1.5倍（以流行嘅碳纖腳為單位。），
例如入門級DSLR加kit鏡應配零號頭配零號腳或零號頭配一號腳，
高階機種配中長距大光圈zoom應配1號腳＋1號頭或2號腳＋1號頭等等如似類推計法。
結果，我老Blue經過反覆思量後購入一生中最貴嘅腳架組合：
RRS B150-B Macro Focusing Rail （微距路軋架托）、
RRS MC-L-Universal L Plate（L形相機通用波頭底板）、
RRS BH-40 Pro II （RRS中型夾架型波頭）、
Gitzo G2541（碳纖2號四節腳）。
全部組合總重量為1.94kg/4.26lbs，
配合自己現有相機組合重量極之平衡及機動。

現階段自己相機配備自覺相當完善，
不過，經過今年投資咗咁多器材之後，
開始發覺如果要帶大量器材及腳架出街映相嘅話，
現有嘅相機袋就不勝負荷，
似乎係時候買一個相機背囊先至夠用囉......。

Blueman

藍色誘惑

2008-12-02T21:06:00.005+08:00

2008年12月2日
戊子年十一月初五
夜

〈雲台〉
今日我老Blue出咗去相機鋪為一個好多年無用嘅腳架波頭配番個專用雲台。
呢個Novoflex mini MagicBall波頭其實自己買咗好多年，
但係個陣唔知點解淨係買咗個頭而無買雲台？
繼而轉咗Manfrotto波頭及三維頭，
但係呢一兩年用落Manfrotto頭配自己支使用多年嘅Gito G1127mk2舊版炭纖腳，
出街用嘅時候有頭重腳輕嘅感覺，
攪到好唔平衡好唔就手咁....。
呢個月起櫃底摷番呢個好多年「無見」嘅Novoflex波頭，
試下裝落去支Gitzo炭腳到，
咦！？一拎上手非常咁平衡喎！！
攪到我老Blue心思思又想買番個雲台，
經過最近呢一、兩次同影友出外映夜景之後，
更加的起心肝今日出去買番個專用雲台，
組裝之後拿拿臨使用，
發覺原來呢個波頭配合專用雲台後，
結構雖比一般波頭設計簡單，
但係操作異常輕鬆、穩定！
有工友話美國品牌RRS出咗好多DSLR嘅L型雲台底版，
當中更有O記E-3專用「L」底版，
配埋呢個底版以後不論映橫度或直度相都好方便，
希望呢個「L」型底版快啲到貨啦！！

Blueman

久違了的12人聯誼

2008-11-30T18:58:00.003+08:00

2008年11月30日
戊子年十一月初三
夜

〈攝影〉
前幾晚25/11我老Blue出席工友聯誼。
計埋自己有成12位朋友及工友出席，
不過今次有啲特別嘅係並唔係一般食飯、睇戲咁普通...。
而係咁多人扲部相機出嚟去夜景！
目的地係尖沙咀聖誕燈飾。

之前起Blog自己都提過公司越嚟越多朋友加入攝影行列，
直至呢排累積人數多達十幾廿人，
於是公司有工友﹣阿良發起今次攝影活動，
起初同佢諗因為大家各有各忙，
可能只有五、六友參與，
結果最後有成12位朋友出席，
單係呢個數字已經令在場咁多位朋友有驚喜！
雖然咁多位影友影齡及年紀都有差別，
但係大家起短短個幾兩個鐘入面都好投入拍攝。
事後相約到大角咀晚饍食小菜飯局，
氣氛相當熱鬧！！

講真我老Blue好耐無同朋友工友咁大棚人有咁嘅活動囉，
雖然下次唔知係幾時？
但係呢次好值得紀念！
攝影除咗可以將認為值得留念嘅時刻紀錄落嚟之外，
原來仲可以聯誼，
有啲不可思議.......。

Blueman

23L的温暖

2008-11-20T21:30:00.002+08:00

2008年11月20日
戊子年十月廿三
夜

〈洗澡〉
踏入十一月天氣近日先至開始轉涼，
「地球先生」病得好嚴重下.....。

天氣轉涼，呢兩日一早一晚温差好大下，
加上我老Blue居住市區工作郊區，
一日温度上落可以有成六、七度咁大！
以往一早起身有沖涼嘅習慣，
因為沖完涼有種頭腦清醒，
成個人都精神啲嘅感覺！！
不過，每逢入冬呢種習慣就變成苦事，
無他嘅！因為我老Blue屋企行緊電熱水爐，
由於呢款舊式熱水爐，
蓄熱水需時兼且容量細，
每逢冬天沖熱水涼嘅時候，
只可維持嘅時間相對比夏天快得多好多.....。
每每朝早沖涼正當個人開始清醒嘅時候就係熱水將快用完之時，
就好細個個陣睇「鹹蛋超人」打打下出紅燈一樣，
要儘快埋尾......。

但係以上惡夢般的經歷，
今日已經終於改變，
因為今年年中嘅時候用咗成十年嘅可惡終於退役，
由我發版決定入貨，
於是揀咗個大容量有成23L嘅德國牌子嘅電熱水爐，
呢排天氣凍咗即刻可以考驗呢個新爐嘅能耐！
果然不付所託，呢兩日沖熱水涼沖完都仲有熱水剩，掂！！
完全解決咗我老Blue多年要返早嘅噩夢，
希望遲啲天氣再凍啲呢個新熱水爐都頂得住啦.....。

Blueman

521克的新玩具

2008-11-12T23:17:00.004+08:00

2008年11月12日
戊子年十月十五
夜

〈相機〉
一直以來我老Blue都好想要一部輕便又有質素嘅隨身相機，
試過用儍瓜機又試過用返部E-300配「餅鏡」，
都覺得未如理想....。
但係先兩日我老Blue見部O記E-420落到心目中嘅目標價，
齍Body賣$2800於是郁手！
呢部被喻為2008年最細最薄最輕嘅DSLR，
配O記支Pencake lenses ZD 25mm（餅鏡）加埋舊電池，
總重量只不過521g，
拎上手超輕巧，
比起用開嘅主役機E-3完全唔覺拎住部DSLR起手，
超過癮！！
由於揀呢部機主要配輕巧嘅定焦鏡-ZD 25mm Pencake作隨身機之用，
試用咗兩日之後，
雖然係入門機對焦都好爽下，
兼且機背嘅2.7"嘅LCD比起上一代E-410好好多，
配合「餅鏡」可以玩Live View「人面對焦」，
呢個功能玩起上嚟都幾過癮！
當然入門機始終入門機，
好多方面都唔可以同旗艦機E-3作比較，
但係作為一部隨身機或後備機嚟講，
以呢部機嘅入購價同熱門同價嘅高檔儍瓜機，
及「樂聲」最新部「微四三﹣豬温」一機一鏡賣六千幾銀作比較
我就覺得呢部E-420就實際好多囉！！
有問點解我老Blue唔等埋O記部微四三機種？
以O記出機速度無番一年半載都出唔到，
再加埋價格回落，
相信自己真係有興趣都已經係一年後嘅事囉！
希望呢部新玩具會為我拍更多作品可以大家分享啦。

Blueman

回歸原點

2008-11-09T03:43:00.007+08:00

2008年11月9日
戊子年十月十二
凌晨

〈工作〉
我老Blue先個輪放完個大假之後返工到依家，
約隱約現感受到呢個「金融海嘯」嘅威力，
工作量明顯比以往靜咗....。

〈攝影〉
呢排返工同工友傾得最多嘅話題不外乎攝影。
無他嘅，公司呢一年的確多咗好多工友加入DSLR行列嘛！
最近呢個月都已經有三幾位工友買咗新機或upgrade咗部DSLR，
我起公司撈咗咁耐真係未見同一時期有咁多朋友玩攝影，
簡直同呢個「金融海嘯」百年難得一遇嘅情況有得比.....。

多咗咁多朋友玩攝影梗係好事啦！
之不過由於好多朋友之前未玩過DSLR或SLR嘅關係，
好多時會有啲新嘅「影友」前來詢問或討論有關攝影、器材嘅問題？
雖然我老Blue算係「上一代」影友，
其實只屬三腳猫功夫，
有時有啲問題都被佢地問到口啞啞.....。
原因係自己以前跟攝影老師學習嘅時候仲未有DSLR、Photoshop，
呢幾年轉玩DSLR都係摸索階段，
好多時對於DSLR前期或後期制作都係估估吓，
完全未有理據支持。
變咗有新影友問我嘢，
我都唔敢俾答案，
驚俾咗朋友一個錯誤嘅訊色就大件事嘞！

就係咁自己發覺對DSLR應用有不足之處，
決定要回歸原點，作第三次學習（第一次為十多年前上平面設計課程有教授相關攝影課題，
第二次十年前同朋友一齊報讀有關一年制校外攝影課程。），
於是自己買咗幾本有關對應數碼攝影嘅人像攝嘅參考書，
點解揀人像？好簡單，自己對人像攝影最有興趣，
睇書如果揀啲無興趣嘅課題我老Blue對住本書好快瞓著嘛......（笑）。
呢幾日一口氣睇咗兩本日系台版嘅攝影師﹣魚住誠一嘅人像攝影參考書，
發覺內容都有值得參考嘅地方，
唯獨是對相關嘅軟件相片後制嘅地方著力唔夠。
於是噚日俾我老Blue揾到一本由老外﹣Lee Varis寫嘅攝影參考書叫「skin」，
呢本於2006年十月初版，厚達432頁嘅參考書，
內容詳細講解數碼人像攝影、燈光、人像膚色及肢體後期PS編輯嘅運用，
起書店睇咗一陣發覺極度有參考價值，
因為坊間好少有呢本書講得咁全面及實用，
希望自己睇過之後，
可以日後用得返出嚟啦！！

Blueman

3+4的假期

2008-11-02T21:32:00.004+08:00

2008年11月2日
戊子年十月初五
夜

〈假期〉
我諗大多數城市人都會同我老Blue有同一個諗法，
就係工作嘅時間覺得好漫長；
放假嘅時間覺得好快....。
話咁快我老Blue今年最後一個長假已經今日結束咗啦！
雖然如上一回Blog所留言咁講，
今個假期無作出門嘅打算，
但係並不是閒坐家中發吽呌，
相反比平時返工仲要充實㖭！！
如期3+4計畫進行順利，
即3日砌模型，嚴格上應該係3日呆呆地咁噴「壽屋格納庫」，
成個做三行個隻油漆工人起間房猛咁開油....。

〈攝影〉
假期最後4日，計埋今日連映四日相，聽日仲有一場Studio人像活動，
即連續五日去映相，
絕對破哂自己映相紀錄！！
未計聽日嘅映相項目，
兩日風景、兩日人像行程前所未有咁豊富。
其中風景同埋啲工友去咗自己未去過嘅流浮山入面嘅下白泥，
呢處話起香港映日落好正喎，
咁就去咗嘞！
另外，第二日又同工友們去咗大埔嘅嘉道理農場，
呢撻地方細細個就聽得多嘞，
估唔到今時今日自己幾廿歲人先至到訪，
真係有啲失禮。
不過，遲去總好個唔去，
除咗映相之外當係一次本地旅行都係一個唔錯嘅節目。

最後兩日人像攝影，
其中起噚日舉行嘅活動主辦單位揀咗起酒店房進行拍攝，
由於一直映人像大多數唔係studio就係外影，
今躺玩酒店房我老Blue都係第一次，
攪手建議會員自備閃燈進行拍攝，
因為現場只會得一支1000W白光燈咁大把。
死啦，自己得盞細燈仔（Olympus FL-36）心諗唔知夠唔夠力㖭㗎？
唔理啦，去到問下其他師兄教路啦！！
由於係傍晚無得玩日光，見在場好多師兄已經起到set傢生，
個個都隊支閃燈出嚟，仲要係支支GN-50火力，
但係見間房同model距離又唔係遠？
心諗自己支細燈勉強夠啩？
最正係問啲師兄，原來好多都係同我老Blue一樣都係第一次玩酒店房人像攝影....（滴汗中），
換句話說即係要打天才波，執生！
時間一到，開波！
結果頭十五分鐘唔係同model溝通，
而係自己猛咁試setting。
終於試啱setting，基於唔駛共享閃燈之下，
又加上時間有限，唯有追落後好好把握剩餘拍攝時間，
因為發覺地方距離有限兼樓底婑，
閃燈雖作反射式出光，
發現閃燈都可以作-0.7輸出仲夠光，
可以做到回電極快而model受光量平均效果。
其間其他師兄亦有自己相同問題，
大家互相研究之下，
拍攝氣氛非常滆洽。
至於今日Studio人像亦有嘢玩喎！
由於今次活動有好幾位會員遲到，
而攪手話準時開波，
見我第一個報到，俾我發辦揀背景紙，
兼且趁人少（計埋model個陣得三個人），
我老Blue把握機會玩包場只可以做嘅事-set燈，
膽粗粗由世界光轉咗6/4及7/3比例，
效果自己同另一位師兄都好滿意！

呢幾日拍攝習作如下：
The Color Of Life 08 Part 6
嘉道理農場
Portrait - Cassie
歡迎各位朋友抽空瀏覧及留言。
謝謝！！

Blueman

MS倉庫施工進度（二）

2008-10-29T00:10:00.001+08:00

2008年10月28日
戊子年九月三十
夜

〈假期〉
今個禮拜我老Blue放大假，
不過無諗住出門喎。
家陣咁嘅時勢，留返個錢旁身好啲！
雖然放假留返起香港，
但係唔等於我老Blue會得閒。
難得有七日假期，
老早諗定砌模型同埋映相嘞，
可惜....呢兩個計畫遇到挫折。

〈模型〉
講咗好耐嘅MS倉庫，
我老Blue親呢幾日假期係時候攪埋佢嘞！
之前呢set MS倉庫只係上灰，
呢幾日拿拿冧開始上色，
雖然每塊部件四四方方，
但係大大話話都有廿幾三十塊，
噴噴下又要洗噴槍，
噴噴下又發覺啲「孖星」原來可以去得好快，
又走落街買過，
跟住到今日晏晝終於噴到一隻色最後一塊部件嘅時候，
又發覺聽到「吱」、「吱」聲，
唔係咁黑呀？玩漏氣！！
結果發現兩條接駁喉真係漏氣，
死死地氣又走出去買過條！
就係咁到今日為止，
呢set MS倉庫只係上咗一半色....。

〈攝影〉
本來擬定好今個假期，
除咗砌模型之外，
另外Book咗兩日去映女像攝影活動，
雖不知臨時臨急兩個影會活動都取消，
知道之後當堂無X哂Mood！！
唯有Book咗緊住個幾日啦。
希望唔好再Cancel就好囉！！

〈股市〉
雖然我老Blue起股市一早清貨觀戰，
但係見啲兩日個市發上發落，
恆指郁下都千幾點，
破哂單日升、跌幅，
呢場「金融海潚」咪話唔嚇人！
自問就無咁嘅膽量落海玩啦，
因為股市走在經濟之前，
對未來下年度企業盈利及就業反而擔心過個市.....。

Blueman

突破四千關口

2008-10-22T21:59:00.004+08:00

2008年10月22日
戊子年九月廿四
夜

〈相簿〉
今日我老Blue日記嘅標題叫「突破四千關口」，
大家唔好誤會我老Blue起度講緊股市喎！
而係好高興我嘅個人網上相簿Blueman Photo Album，
入面上載嘅爛相已經終於突破四千張關口，
累積總數達到4006張！！
自己對呢個相簿有一份感情起度，
雖然呢個相簿建立嘅時間只有三年幾，
但係記載咗我老Blue呢19年嘅爛相記錄。
一生人唯一保持最耐嘅興趣就係攝影，
儘管自知攝影上功力有限，
但係每次攝影後見到作品嘅成功感或挫敗感，
不論街頭相、女像相、旅行相或者同朋友歡聚嘅相片記錄，
事後睇返或隔一排睇番都其樂無窮，
我諗呢樣就係我到依家咁鐘意映相嘅原因。

起呢十九幾年映相嘅歷程中，
亦體會唔少香港影友嘅心態及相機發展嘅高低潮，
其中早年嘅時候買一部單鏡機真係唔容易，
我等低下層平民要儲好耐先至買到一部二手單鏡機，
同今日DSLR普及化不可同日語囉！
所以養成一種每次映相都會好好珍惜拍攝機會。
但係今日時代唔同囉，
家陣我老Blue呢套對攝影嘅體會，
可能俾時下嘅年青人取笑為「老套」都未定！？
亦試過有一期相機由菲林相機開始走到極限，
而數碼相機又未成氣侯，
身邊真係揾唔到一個映相嘅影友，好孤獨。
到近年又多咗好多好多影友加入，
呢份心情絕對非筆墨所能形容！

最近公司多咗好多工友加入DSLR行列，
當中唔同年紀都有，
不過，有個共通點係新加入嘅中坑新影友，
拍攝心態往住比年青嘅工友積極同投入。
呢班中年工友玩攝影佢地會不斷練習拍攝，
事後亦會問人意見，
係一個好嘅開始！
相反某部分年青工友初玩攝影，
一開始接觸DSLR往往會問點樣一開始映到靚相？
我答：無！映多幾百張再問吧！
興趣係培養出嚟，
一旦行㨗徑就會無哂趣味，
更何況攝影何來㨗徑呢？

Blueman

雜文

2008-10-20T19:32:00.003+08:00

2008年10月20日
戊子年九月廿二
夜

〈工作〉
我老Blue轉咗新嘅工作崗位到依家為止，
每日返工都係咁忙，
因為新工作開始唔等於舊工作唔駛做，
不過起今時今日有工開仲好過無工開....。

〈經濟〉
自年初自己唔係咁睇好個股市，
老早清貨離場，埋單計數輸少當贏。
但係「雷曼」、「迷債」事件所引發嘅後遺症，
本港嘅「佑威」、「泰林」倒閉，
感覺呢次「海潚」真正嘅災難依家先至開始....。

〈影視〉
最近又再煲劇、煲動畫，
攪到自己好忙咁！！
但係睇咗三集Gundam OO第二季，
確實好好睇，節奏及劇情相當明快，
希望可以保持落去！
仲有最喜愛嘅「美劇」﹣Heroes亦有第三季，
劇情好鬼攪嘢，希望唔會走火入魔啦！！

〈攝影〉
呢一年其中一樣令我老Blue高興嘅事係多咗好多工友或朋友加入DSLR用家行列，
相對同朋友又多咗一個共同話題或聚會。
人到中年好多朋友已經有自己嘅生活，
今日偶以透過攝影可以同朋友聚舊或聯誼，
實屬一種福氣或運氣。
獨樂樂不如與眾同樂.....。

〈模型〉
提到模型，今年成績徹底失敗。
同年頭預計嘅成果完全成反比，
主要原因係一直堅持要完成呢個「MS倉庫」先至動手砌其他MG，
可惜時至今日都未攪掂，
仲有兩個月2008年就過去，
但係累積未砌嘅模型就越買越多，
自己開始有病啦.....。

Blueman

一行九人

2008-10-18T12:02:00.003+08:00

2008年10月18日
戊子年九月二十
中午

〈攝影〉
噚晚，工友阿良發起攝影活動上香港山頂映相。
居然可以有七個工人出席，
前前後後一行九人上山頂映相，
實屬難得！！
不經不覺呢一年起公司玩DSLR嘅工友大大話話已經有成廿幾友咁多，
我老Blue起公司咁耐都未見有咁多工友參與呢項活動！
查實上山頂映香港夜景，
自己計埋今次都係映過兩次咁大把，
不過今次咁多朋友一齊，
感覺氣氛好玩好多！
上次上山頂映夜景已經係2001年嘅事，
果陣時仲拎部Contax G2，
時隔多時香港嘅夜景一樣咁迷人，
不過今次自己換咗部DSLR，
用LiveView拍攝構圖超級方便。
玩咗個幾鐘大伙兒由山頂出咗去佐敦食飯。
間唔中同工友攪呢啲活動的確幾過癮下！！

Blueman

天使再臨

2008-10-06T15:39:00.005+08:00

2008年10月6日
戊子年九月初八
下午

〈動畫〉
噚日我老Blue等咗好幾個月嘅Gundam OO第二季終於上映。
收工急不及待返到屋企睇，
第一集「天使再臨」節奏已經好快，
例牌頭一集劇情唔會交待得太多，
留咗好多尾俾觀眾追落去。
但係今季或者係呢套Double O嘅真正主角機﹣GN-0000已經早一排起網上曝光，
起初覺得造型又玩返「大河原」風格比較寡下，
但係最近見「笨大」出呢隻新主角機「四個零」嘅HCM Pro-complete set，
呢隻「四個零」原來起造型方面仲有「後著」，
除咗齍「波D」外仲有隻O-Riser嘅戰鬥機孭上身，
合體咗之後成隻「四個零」猛咗好多，
機體設計方面同之前SEED個種「華麗感」好唔同，
呢次OO起機設方面感覺好前衛好另類及多一份實戰感！
超期待呢隻「四個零」出MG版！

除咗Double O之外，
我老Blue同時又追緊另一套SF新作﹣鉄のラインバレル（Linebarrel 武裝機甲），
一般格鬥機械人片種大致分三種：
實戰派（例子：Gundam、裝甲騎兵）、熱血派（例子：勇者王、天元突破）及奇幻派（例子：ZEGAPAIN、最終兵器彼女 Saikano），
今次呢套鉄のラインバレル故仔走奇幻格鬥機機人類別，
第一集臨尾就話男主角其實已經死咗，
咁佢呢個實體又究竟係乜呢？
兼且呢套嘢啲機設幾另類下，
感覺似日本江戶時代嘅浪人feel。
機設方面我就覺得好破格嘞！
值得追看！

Blueman

久違了的人像外影活動

2008-09-29T21:42:00.005+08:00

＊＊維園中秋綵燈＊＊

＊＊大坑火龍＊＊

＊＊The Color of Life 05＊＊

＊＊Portrait-Miyoko＊＊

＊＊Portrait-Kity＊＊

＊＊Portrait-Sansu＊＊

2008年9月29日
戊子年九月初一
夜

〈攝影〉
不經不覺已經踏入農曆九月，
香港天氣一早一晚泛起陣陣涼意。
但係日頭仲係好熱下！！

就好似噚日咁，中午氣温都仲有成31度咁熱。
適逢我老Blue有成年幾兩年都無玩過嘅人像外影活動就呢日出動嘞！
好耐無玩嘅原因不外乎呢啲活動大多起星期日舉行，
偏偏自己份工唔係咁多時候撞到星期日放假個下弊嘛。
今次可以出到去玩，
個天唔打風唔落雨就已經好好彩，
呢日仲陽光普照，熱啲都無所謂囉！！

仲記得先排起個blog都提過，
早幾年香港好多網上影會都攪好多呢類型女像外影活動，
但係各樣因素關係導致買少見少。
時至今日女像外影活動雖然無以前咁活躍，
但形式及人數方面好多影會相反有節制及改善咗好多！
就好似今次出會咁人數方面每組限制8人，
比較合理。
所以儘管天氣炎熱，但係會員及Model合作都好開心下，
祇少大家多咗空間映相，
唔駛大家爭位或發生不必要誤會。

今次我老Blue出會，
亦見到好多新影友加入，
佢地大多數起波會用入門級DSLR，
閒談間知道佢地會好理性咁選擇相機及器材，
唔會一下子捱麵包買啲超勁嘅器材，
一切由低玩起（不過，遲啲唔敢包....）。
至於Model方面表現亦好有合格，
有個更加好主動擺post或表情俾會員映，
家陣揾食艱難，主動啲襟撈啲！

映咗幾個鐘頭後，
自己望下部相機不經不覺都映咗8GB爛相咁多，
太耐無出會映相有種搏哂命嘅感覺！
除咗依樣嘢外，
今次同以往唔同嘅係裝備！
由於用咗件攝影背心（Newswear Vest）帶咗一機三鏡，
除咗雙腳比較攰之外（因為連續幾個鐘拎住部相機又企又跪），
全程映相邊映邊換鏡頭都好輕鬆，
機動性好強，的確為我今次外拍帶嚟唔少方便！！
家陣再叫我老Blue用番啲斜孭相機袋，
真係要諗過先.....。

除咗呢次外拍女像外，
其實呢個月發覺自己映相都幾密下，
以下係呢個月所拍下嘅習作想同大家分享：

15-09維園中秋綵燈
15-09大坑火龍
27-09 The Color of Life 05
Portrait-Miyoko
Portrait-Yvonne
Portrait-Kity
Portrait-Sansu

有興趣嘅朋友不妨抽空瀏覧及留言，
謝謝！！

Blueman

「朋友」降臨！！

2008-09-27T19:22:00.003+08:00

2008年9月27日
戊子年八月廿八
夜

〈動畫〉
Macross Froniter終於起前日隨著第25話正式完結。
我老Blue睇完之後覺得呢套動畫投入嘅資源都好大吓！
有CG嘅空戰、華麗嘅角式造型、精密嘅機械設定及超多嘅原創歌曲，
理應好滿足到我呢亭動畫迷。
但係唔知點解睇完成套動畫其實唔係太欣賞，
可能係故事去到中後期，
發展到兩個女主角大玩「紅白歌唱」比拼，
自己有啲投入唔到....。
不過點到好啦，一齣完咗又到下一齣，
跟住落嚟我老Blue要追嘅動畫就係「Gundam OO」第二季啦！！
超期待......！！

〈電影〉
前日我老Blue同朋友去咗睇「20世紀少年」電影版第一集-「降臨」。
由於自己的確好喜歡呢本原著漫畫，
所以上畫第一日就去睇！
以往好多由漫畫改編成電影嘅例子，
太多數同原著某程度有若干出入，
所以今次入場自己唔會抱好大期望，
只係因為我係呢本漫畫「粉絲」關係罷了！！
日本電影公司「東寶」諭為55週年紀念作，
呢套話係日本電影史上最大投資、演員超過三百位咁誇張嘅宣傳，
更分三集上映！
令我未入場更加驚呢套嘢會拍得唔好....。

結果，雖然套戲有成兩個幾鐘咁長，
但係出乎意料套戲不論故事、人物造型、對白、場口百分百跟足原著，
係我老Blue睇咁多漫畫改編電影當中，
唯一一套係跟原著拍攝嘅電影，
其中最欣賞係人物造型，
除咗演員同原著漫畫神似外，
最難得係咁多個⻆式連童年版及中年版選角都同原著極之接近，
呢樣嘢係唔係電影公司或導演可以隨意用錢或特技做出嚟！
而係用心去挑選演員個份執著。
不過，由於電影時間所限，
會令到故事人物個性表達唔夠，
只能夠盡力跟原著交待劇情，
感覺有點單薄，
呢樣係改編漫畫唯一的失色嘅地方。
如果問我老Blue對呢套滿唔滿意？
對睇過原著嘅我嚟講就好滿意，
但係如果未睇過原著嘅朋友入場就恐怕對複雜嘅劇情難以消化。
我就好期待呢套戲出年上映嘅第二、三集，
仲有有興趣入場嘅朋友，
記得要睇到尾！
因為除咗有「健次之歌」外，
更有下一集精彩預告！！

Blueman

Photokina08下的怪物、夢想

2008-09-23T17:34:00.004+08:00

2008年9月23日
戊子年八月廿四
下午

〈個人〉
轉咗新崗位後，我老Blue工作一直都未停過咁滯，
每日都係瞓得個幾個鐘，
今晚返通宵所以可以好放肆咁瞓咗十個鐘，
成個人都精神哂！！
不過接近傍晚天文台話將會發出八號風球喎，
真係天有不測之風雲囉！

〈相機〉
萬眾相機迷近排期待開幕嘅Photokina德國相機展，
終於今日開幕嘞！
呢個月嚟眾多相機品牌亦趁呢個展覧，
向外公佈咗其下多款新產品。
今屆Photokina對我老Blue嚟講可謂最精彩嘅一年，
因為從今屆嘅展品睇到數碼相機發展已經相當成熟，
絕對可以代替傳統膠片；
兼且各品牌發展方向亦唔會再單一，
真係乜類型嘅新機都有，
相當精彩！！

現將有關DSLR新產品作一個小總結及自己意見如下：
Canon﹣EOS 5D Mark II, EOS 50D, EF 24mm F1.4LII
C記終於推出C記粉絲期待以久嘅5D MarkII，
從網上見到眾多C記朋友反應正面兼雀躍，
相信會為C記帶來強烈換機潮，
因為太多C記朋友等呢部機太耐啦！！

Fujifilm
今屆並無出現傳說嘅S6 Pro喎，
不過就公佈咗最新嘅sensor-Super CCD EXR,
規格近以Foveon以三合一為基礎，強調可獲得更大嘅解像、敏感度及更佳嘅DR，
不過就唔知會出現起邊部新機囉？

Leica-S2, M8.2
L記事前無聲無色咁起展覧破天荒推出一部全新S系嘅DSLR-S2，
呢部配搭「柯記」最新30X45mm高達37.5百萬像嘅AF DSLR，
比市面高唱嘅Full Frame Size DSLR，
Sensor 面積仲要高出一倍，
更一口氣公佈多枝有關嘅鏡頭。
呢部S2絕對搶咗我老Blue注視，
簡直係今年最強嘅怪物DSLR！
當然L記今次決心推出S2，
檔次當然係以專業市場為目標，
大家唔會期望佢定價會平民化啦！
估計齍「波地」都要接近十幾萬啩....？

Nikon-D90，Nikon 18-105mm F3.5-5.6G VR, Nikon AF-S 50mm F1.4G
由於N記早前已推出D700呢部第二部Full Frame Size嘅DSLR，
所以我老Blue對佢推出D90一啲都無意外，
因為D80計spec亦係時候推出新版，
今次加入Live View及HD標清動畫拍攝，
相信可以為N記DSLR中下檔次搶佔一定分額！

Olympus- E-1A prototype, Micro Four-Thirds Camera prototype
O記終於起展覧亮相佢宣傳已久嘅E-1A及「微四三」相機嘅樣板機，
我老Blue睇完之後E-1A完全覺得係一部縮水膠版嘅E-3，
如果有朋友未入E-3的話，
呢部會係O記E系最佳選擇！
至於「微四三」部樣版機，
簡直係我老Blue夢想嘅儍瓜機模樣，
設計小巧簡結兼可換鏡頭，
已經係我老Blue今年最期待嘅便攝相機產品！
不過希望實版會有多色選擇就好囉，
因為見樣版隻香濱色好「娘」下...。

Pansonic-DMC G-1
樂聲呢部係首部「微四三」發佈嘅新機，
之前我老Blue都起blog講過，
無乜嘢再講，
因為見到個樣唔想再講....。

Pentax-KM
一直起DSLR界浮浮沉沉嘅P記，
終於趁展覧推出新機，
不過係一部超平又平平無奇奇嘅入門機，
相信以咁五千唔過一機兩機咁進取嘅價格，
會為入門級機種市場帶來一定沖擊！！
但係一味靠平而技術又究破唔到相機品牌，
前景都幾令人擔心....。

Sigma-SD15, DP2
「死馬」呢個品牌好老實起我老Blue心目中無乜地位，
一直以來自己真係無朋友講過或起街見過有人用嘞！
今次推出SD15感覺陪跑居多！

Sony-Alpha 900
呢部係S記第一部full frame size嘅DSLR，
睇過spec的確係幾勁，
呢部像素高達二千四百萬像、內置防震、除塵系統，
更配上多枝Zeiss AF ZA鏡，
會否為S記打開高階DSLR市場要受市場考驗嘞！

Zeiss-Didtagon T*21mm F2.8, ZE- Planar T*50mm F1.4, ZE Planar T*85mm F1.4
比諭為世界最高級鏡頭之一嘅「菜記」，
亦都推出最新嘅ZE mount鏡頭俾C記用戶，
亦為C記朋友可分享到除咗傳統L鏡之外，
另一優質鏡頭選擇！

睇完成個Photokina網上消息後，
我老Blue感覺最有驚喜莫過於「奶記」部S-2及O記個部「微四三」樣版機。
唔知咁多各位影友對今次Photokina又點睇呢？

Blueman

首部「微四三」出台

2008-09-12T21:48:00.003+08:00

2008年9月12日
戊子年八月十三
夜

〈相機〉
呢幾日我老Blue除咗忙於工作外，
亦都好留意下有關新相機嘅新聞。
因為過多十零日就係起德國-Cologne舉行嘅Photokina相機展，
家陣好多相機都會趁呢類展覧向外公佈其下新產品。

呢排已公佈嘅新相機如下：
1)26AUG Canon-EOS 50D (APS DSLR)
2)27AUG Nikon D90 (APS DSLR)
3)09SEP Sony A900 (Sony終於推出其下Full Frame Size Sensor嘅旗艦級DSLR)
4)10SEP Leaf AFi-II 10,7 & 6（中片幅級DSLR，sensor面積達56x36mm嘅怪物)
5)12SEP Pansonic Lumix G1(第一台以Micro Four Third制式推出嘅實時數碼可換鏡頭式相機

雖然暫時為止都出咗五部新相機，
但係已經睇到數碼相機競爭幾咁激烈，
品種、片幅及功能之豐富為相機近年罕見，
簡直做到百花齊放嘅地步！
不過，今日我老Blue最想講嘅係「樂聲」第一部「微四三」相機，
呢部傳聞已久嘅「微四三」起「四三」界講咗好耐，
今日見到之真身之後，
感覺有啲呆，因為呢部新機叫G1（日本官方網站解作為「女性一眼」Girl One），
雖然標榜以女性用家使用，
但係以機論機的確令我有點失望，
原因係體積並唔係宣傳咁細部咋喎，
祇不過比O記E-420細好少少....，
另外機身設計個人覺得以一個新系統以言太保守啦，
又似S記又似C記咁，
反而之前出個部L-1仲有味道及個性得多嘞！！
起網上已經好多「四三」友對呢G１評價一般，
反而更加期待O記推出「微四三」新機，
以O記一向我行我素嘅作風我諗應該會有啲突破啩？

期待今年Photokina！

Blueman

MG版模型以外的驚喜

2008-09-07T21:12:00.004+08:00

2008年9月7日
戊子年八月初八（白露）
夜

〈模型〉
我老Blue最大最大嘅劣根性就係砌模型方面，
其實正確嚟講係起買模型方面就真.....！
明知無乜時間砌模型但係死忍唔到手走去買。

講開模型好多高達模型玩家都知道「笨大」最揾錢嘅模型就係「MG」（Master Grade）系列，
睇近一兩年猛咁推U.C.系列Ver.2.0或重新包裝「MSV」就知啦！
不過，正當好多玩家以為「笨大」又食老本，
了無新意之際，
其實佢都開發咗「MG」以外好多超精密嘅科為幻模型系列，
不過叫好不叫座咁解，
就好似以懷舊機械人做主題嘅「R3」系列；
一改以往MG化模型結構嘅「裝甲騎兵」系列；
及以超精密鑄模結構嘅「EXmodel」。
最近「笨大」除了主打「MG」公佈會出我老Blue好期待嘅Seed入面名機種﹣Infinite Justice Gundam外，
更一口氣起呢三條比較「冷門」嘅路線發力，
先後推出新品，
繼前個排「R3」推出「戰鬥機械」1/100 Walker Gallia模型外，
更有近期大熱嘅Macross Froniter𥚃面主角機﹣VF-25，
估唔到會以「EXmodel」系列推出，
上網睇過試版真係好吸引，
除咗維持「EXmodel」超精密鑄模外，
仲可以做埋變型㖭，簡直不得了！！
仲有我一直都好喜愛但係落唔手嘅「騎狗」系列，
總於繼OVA-Pailsen Files完結推出有關新版，
今次「笨大」終於有良心咁出完整版啦，
因為之前個啲版本竟然無背囊提供，
實在太離譜啦！
今次呢個「Pailsen Files Version」跟足OVA，
全裝備感覺「正」好多！！

睇完呢三款新模型，
睇怕自己又走唔甩囉.....！

Blueman

MS倉庫施工進度（一）

2008-09-02T19:57:00.004+08:00

2008年9月2日
戊子年八月初三
夜

〈模型〉
今日我老Blue放假，
順利展開「MS倉庫」工程。
一口氣拎哂之前瘋狂咁買落十八盒「壽屋MSG格納庫」出嚟，
先揀選不同型號嘅「格納庫」組合一次，
睇下規格及型態有否合乎心目中嘅組合數目（其實係預多咗）？
由地台、牆壁及天花完全再「假組」一次後，
加上每盒「格納庫」附加小道具，
擺埋其中一個己完成嘅MG模型度下尺寸啱唔啱？
結果成個「假組」模樣效果異常匹配！！

跟住拿拿冧開工，
拆哂咁多盒嘅包裝袋一口氣上灰，
今次上灰嘅噴劑棄用咗以往用開嘅「孖星」嘅SUPFACE PRIMER噴罐「筆地」，
改用咗MR.Hobby嘅Mr.Base White1000號噴罐「筆地」，
原因係上次砌1/60 Exia嘅時候發覺呢隻「筆地」更易上色，
效果幾理想。
噴咗廿幾三十塊部件之後，
隻手指攰到有啲唔聽駛.....！
家陣等咁多個部件完全乾透後，
咁就可以跟「試辦」咁上色嘞！！

Blueman

MS倉庫試辦（二）

2008-08-31T17:50:00.004+08:00

2008年8月31日
戊子年八月初一
下午

〈模型〉
今日我老Blue見有時間，
繼續我呢個MS倉庫試辦最後功序，
經過上黑線、細節上色及舊化一輪功夫後，
終於完成咗呢個試辦，
感覺同理想嘅模式頗為接近，
總算收貨。
因為呢壇嘢始終攪咗好耐，
心感唔可以一拖再拖，
需要加緊時間儘快完成，
如果唔係堆積如山嘅模型睇怕今年都砌唔到幾多副囉.....？

試品完成後，
往後十多副「壽屋﹣MSG格納庫」就會根據呢個色彩設定做落去，
希望預算嚟緊呢個九月可以完成成個組合啦！！

Blueman

不可錯過的漫畫

2008-08-30T23:17:00.004+08:00

2008年8月30日
戊子年七月三十
夜

〈漫畫〉
之前我老Blue經常聽到有朋友高度讚賞一本叫「20世紀少年」，
作者為我喜愛嘅日本漫畫家浦沢直樹。
因為聽過呢本為長篇漫畫，
有成廿幾集嘅關係自己遲遲抽唔到時間睇。
最近知道呢套漫畫嘅電影版終於今日日本上映，
呢幾日好好奇終於睇番呢本大師級嘅巨著，
當睇過頭兩集就好似食咗白粉咁，
就已經欲罷不能，
因為實在太好睇！！
故事相信好多朋友都聽過，
呢本由1999年到2006年起日本連載，
計埋後加嘅新結局篇「21世紀少年」，
足足寫咗8年，
一個編排精密、畫功獨特、劇情緊湊集一身，
不愧為近十年最佳日本漫畫！！

睇完漫畫之後，上網睇下電影嘅資料，
呢套改篇漫畫嘅電影，
會以三集推出，更話呢套電影係日本電影史上最貴嘅電影喎！
不覺電影版好多演員造型同漫畫極之神似（除咗男女主角太靚之外）！
唔知香港幾時會有得上映呢？

Blueman

MS倉庫試辦（一）

2008-08-24T21:14:00.003+08:00

＊＊初期倉庫色彩設定＊＊

＊＊最後倉庫色彩設定＊＊

2008年8月24日
戊子年七月廿四
夜

〈模型〉
自月初我老Blue轉咗新嘅工作崗位後，
經過一輪地獄式訓練後，
近日總算將心情平復落嚟，
可以抽時間攪下持續咗好耐嘅「MS倉庫」嘞！

噚日開始為試辦上色，
今次我老Blue棄用咗沿用開嘅西班牙模型油「VJ Color」，
而改用日本「孖星﹣TAMIYA」模型油，
因為成組倉庫差唔多十幾個咁多，
如果用VJ Color都幾重皮下！！

上色方面自己都諗咗好耐，
究竟呢個倉庫用乜嘢色調好呢？
之前亦都參考過好多有關軍事雜誌，
發覺好多現代真實軍事倉庫大多偏向淺色調，
於是牆壁選用咗XF-54 Dark Sea Grey，
而地台就用XF-69 NATO Black。
不過，上色之後發覺色調比想像中深咗....，
於是今日繼續上過色，
今次就用淺色少少嘅XF-19 Sky Grey代替咗，
而地台就轉用XF-24 Dark Grey。
完成之後發覺效果唔錯，
好接近心目中嘅色調！

不過上完色之後，
跟住落嚟係做埋後期上高色調警示線及一啲上黑線、舊化工序先叫完全完成，
又一番工夫等住做，
希望自己會抽到時間啦！！

Blueman

九號風球下...

2008-08-22T23:58:00.002+08:00

2008年8月22日
戊子年七月廿二
夜

〈天氣〉
噚日天文台已經講咗有個大風暴叫「鸚鵡」集結香港外圍。
今朝好快咁天文台就掛上8號，
由於自己工作關係，
個風打成點只要共公交通工具有開都要返工.....！
就係咁今日我老Blue冒住狂風暴雨返工嘞。
當然打風落雨工作相對少好多好多，
因為通常打完風工作先至最混亂....。
最後，打到九號風球之後，
公司提早放人，
因為再唔收工，
有機會連「地鐵」都無得搭囉，
咁就被迫留起公司過夜嘞！！
不過，收工亦唔見得好事？
因為收工嘅時候，
風勢仲好大，由地鐵徒步返屋企都有一段路要行，
結果同「鸚鵡」搏鬥咗三幾個字先至返到屋企，
相當刺激....（可一不可再嘅感覺）。

Blueman

奧運馬術比賽一遊

2008-08-16T23:23:00.006+08:00

2008年8月16日
戊子年七月十六
夜

〈奧運〉
我老Blue先個幾日（8月13日晚），
有工友於個月前發起去睇奧運香港區馬術比賽，
大家其實貪高興多過欣嘗。
是次入場賽事屬於眾多馬術比賽當中比較靜態嘅「盛裝舞步賽」，
簡單啲講即騎師要控制隻馬玩跳舞....。
一行七人帶足「傢生」（相機）跟足大會指引預鬆時間入場，
感覺會場保安同機場差唔多，
唔算太過麻煩，意料之內。

入到會場覺得人頭湧湧，
天氣帶點悶熱，不過能見度就極之良好，
對戶外攝影好有幫助，
至於會場氣氛，
感覺似去嘉年華多過似睇比賽咁。
至於場地搭建實屬不過不實，
由於是次場次屬於夜間進行，
現場燈光仍十分充足，
對於進行拍攝無太大問題。
最有趣嘅係原本門票位置近乎「山頂」，
時間去到個零鐘到，
已經見到有觀眾開始離場，
可能比賽太靜態唔係咁啱香港人口味啩？
於是...我老Blue同某朋友開始進行「潛行」到較前坐位，
跟住再過一陣又見前排坐位有空位，
繼續「潛行」....。
就係咁一班朋友由「山頂」坐位潛落「山腳」咁映嘞！
大概映咗兩個零鐘之後，
大家又餓又攰，映夠就離場囉！

事後大家去咗大圍食飯，
我老Blue開完工跟住嚟映相，
坐低之後覺得成個人散哂咁....！

是次攝影圖輯已收錄於個人相簿：
奧運馬術比賽
歡迎各位抽空瀏覧及留言。

Blueman

壽屋格納庫動工

2008-08-10T19:56:00.004+08:00

2008年8月10日
戊子年七月初十
夜

〈模型〉
自兩年多前我老Blue無啦啦挑起條根，
開多瓣興趣，臨老學人砌模型（見本Blog買了第一副MG），
跟住起06年4月頭砌咗第一副高達模型MG版後（見本Blog首個MG始動），
自覺不能自拔，興趣排行榜中直逼第一位嘅「攝影」...！
隨著砌咗一個又一個模型之後，
於07年4月，心想攪個模型情景﹣MS倉庫，
結合攝影同各同好分享（見本Blog重戰機L.Gaim MK-II初現，
可惜自己眼高手底，屢試不果，
灰心之際赫然上網見到模型品牌「壽屋Kotobukiya」推出「MSG格納庫」，
直頭係我老Blue心目中嘅模樣（見本BlogMSG格納庫），
跟住嚟近嘅日子，壽屋嘅格納庫推陳出新，
出完一款又一款不同格式嘅格納庫，
至今已經出咗10款咁多，
兼且推出配合格納庫嘅配件﹣工程車等等。
唔需要花太多力量自己攪，
實屬好消息！！

先個排我老Blue終於買咗個「鴨記牌」嘅商品攝影燈set嚟玩模型攝影後，
亦開始為呢set壽屋格納庫動工嘞！
其實呢set格納庫自己都買咗好多合盒下，
今日抽起幾款唔同嘅格納庫嚟睇，
發覺原來可以好多變化（上下左右嘅組合模式），
加上每款格納庫搭載唔同嘅配件，
將會令呢個「模型情景攝影」增添好多元素及效果，
之前託工友﹣阿廖買咗個「老翻」壽屋格納庫，
發覺呢set「老翻」表面上睇同「正版」差唔多，
但係一夾埋就發覺組合唔同，
尺寸差少少就係差少少....！
如今唯有用呢個「老翻」做「試版」，
作為跟住嘅色彩參考。
不過，原本打算用比較「真實」嘅白色做塗裝色彩，
可惜用呢個老翻做「試版」後，
發覺攝影時會好反光下，
同埋出嚟效果比較「黐地」，
可能要轉用較深嘅深灰色彩作塗裝！
希望呢個月會順利完成啦。

Blueman

中國奧運強勢開幕

2008-08-09T21:04:00.004+08:00

2008年8月9日
戊子年七月初九
夜

〈奧運〉
相信好多朋友都會好似我老Blue咁噚晚睇北京奧運開幕典禮。
自己一向對運動無乜興趣，
不過話哂今次起祖國攪，
點都睇一睇個開幕。
未開幕前我老Blue除咗對新建成嘅鳥巢及水立方場館有特色外，
完全對個開幕無乜期望喎！
點知由開幕玩倒數個一刻，
已經覺得場面及安排好不得了，
最後李寧「超人」一般咁點聖火為止，
覺得中國咁大玩「人海戰術」，
個個環節都有幾千人出嚟「做嘢」，
尤其係頭個幕二千幾人撃缶（正方形的撃鼓樂器），
個股氣勢直頭超震撼！！
何指本身作為中國人覺得激動外，
相信連老外會睇到呆x咗，
事後新聞報導下屆英國奧運主辦單位話睇完北京奧運開幕後，
對佢地攪開幕構成一定壓力喎！？

不過點都好相信好多朋友睇完呢次開幕，
一致讚好，今日我老Blue都好多工友都談論呢次典禮嘅出色！
呢次我國傾盡人力物力攪呢次奧運，
亦都感覺祖國力量及氣勢展演，
東方力量開始抬頭之兆....。

站起中國人嘅立場，
當然樂於見到祖國強大，
但起投資嘅立場覺得係咪大牛市就快到呢？
我老Blue就剛剛相反喎！
因為仲見到國內股民損手下對政府有期望救市，
證明股民仲未絕望，
一個大牛市往往建基於大熊市之後重建，
我老Blue等的就是一個入市機會.....。

Blueman

夢想成真-MICRO FOUR THIRDS

2008-08-05T20:46:00.007+08:00

2008年8月5日
戊子年七月初五
夜

〈相機〉
儘管我老Blue近日面對新工作崗位疲於奔命，
需要一段時間先至可以完全適應。
但係今日上網一個消息令我老Blue火熱起來！！
就係Olympus及松下兩間相機品牌共同宣佈推出新相機系統-MICRO FOUR THIRDS（迷你版4/3），
簡單而言就係將現有嘅4/3系統再縮小化，
但係sensor面積則維持不變，
抽起咗反光鏡及光學觀景器，
即係唔再係4/3 DSLR，
係一部近似換得鏡頭嘅DC仔！！
呢個概念同我老Blue起呢個Blog於5月7日餅乾相機數碼化？不謀而合！！
證明當時自己覺得O記出枝“餅鏡”邊有咁簡單呀？
O記今時今日可以起C記及N記兩大強豪手底下繼續生存，
在於O記知道自己位置及方向，
明知同人鬥「大」無勝算，
倒不如起鬥「細」市場做阿大總有機會搏過新市場有勝算得多！
雖然到今日為止，
所知嘅都係官方單方面發佈嘅概念消息，
仲未有任何「樣版機」或其他有關資料圖片？
不過，我老Blue對O記出部60年代嘅Pen F（附圖為O記1968年出產的Pen F） RF digital 版就好高興啦！
一直以來真係好希望有部Leica M機或Contax G機嘅digital版出現，
今次仲要係O記出梗係有期望啦，
官方仲講到體積會比現役機種E420/E520仲要細喎，
兼且只要加上adpater可用番現有4/3鏡，
咁就梗加不得了......!!
呢個絕對係我老Blue今年最嚴重關注嘅攝影系統！

Blueman

重組生活

2008-07-29T20:50:00.005+08:00

2008年7月29日
戊子年六月廿七
夜

〈生活〉
唔知點解我老Blue生活𥚃頭一年總有一排比較混亂。
總要係一次個湧埋嚟個隻，
教人措手不及嘅感覺，
好似呢個星期咁，
就有好多瑣碎事要面對及解決....。

〈工作〉
由於配合公司新制度，
公司好多舊人工作需要重新分配，
我老Blue都唔例外，
重新分配到一個新嘅工作崗位及工種，
雖然自己並唔係抗拒新事物及新環境，
不過，由以往有成十多年嘅工種，
一下子要重新適應，
咪話無難度，
唯有努力邊做邊學，
希望儘早適應啦！！

〈電腦〉
唔知點解用緊部「鋼版」iMac，
早幾日發神經，個OS-X好唔穩定，
有啲功能突然失靈！
連帶自己最常用嘅執相程式都用唔到，
好唔妥個隻，
由於原因不明兼且手頭上仲有一堆相等住處理，
決定把心一橫，
重裝過OS-X算吧！！
好奇怪經過重裝之後，
發覺係手頭上嘅Logitech mouse程式唔夾個新OS-X版本，
用番原裝keyborad及mouse反而無哂事？
唔係咁化學呀！？
仲有跟機一直無用過嘅原裝嘅keyborad、mouse原來都幾好用，
因為呢啲硬件有好多按紐有好多實用嘅功能鍵。

除咗keyboard及mouse外，
由於呢次重裝OS之後，
有部份軟件亦一併更新，
發現一直用緊嘅iTunes，
原來新update可以同我老Blue經常用開嘅G-mail作同步，
每次同iPhone同步亦可以一次過同G-mail入面嘅通訊錄作同步，
咁就非常咁方便囉！！

〈家具〉
除咗上述所講嘅小煩腦外，
同時間屋企個電熱水爐「同步」壞埋，
真係吹漲！！
唯有急急腳落去買個新爐，
不過要一、兩日等水電師父嚟裝爐先至用得！
好彩呢排香港天氣勁酷熱，
氣温仲熱過泰國曼谷！
上yahoo睇到日日都有三十幾度咁濟。
原來沖凍水涼都幾過癮....！

Blueman

舊區留影

2008-07-28T02:37:00.004+08:00

續7月28日

〈舊區〉
我老Blue除咗努力砌模型外，
第二樣無事忙就係映相。

踏入七月中香港天氣由六月綿綿不絕嘅下雨天，
轉為陽光普照嘅日子，
自己一有時間就帶部相機出街揾嘢映嘞！
近排好喜歡溜連九龍一啲舊區拍攝，
心感再唔去映嘅話，
以香港咁急促嘅城市步伐，
唔知過多一兩年會變成點囉？
就係咁自己最近又完成咗新一輯作品﹣The Color Of Life 08 Part 4，
主要圍繞身邊熟識嘅建築物及環境作主題，
有興趣嘅朋友不妨瀏覧及留言。

Blueman

我的1/60 Gundam Exia 完工！！

2008-07-28T01:58:00.006+08:00

2008年7月28日
戊子年六月廿六
凌晨

〈模型〉
我老Blue好耐無起到呢到寫Blog，
唔係因為無嘢寫，
而係小弟無事忙嘅劣根性所致....。
先講第一單嘢，
就係我老Blue砌咗好耐嘅高達模型1/60 Gundam Exia終於先個日完全砌好哂！！
呢隻1/60 Exia係我老Blue第一隻砌咁大比例嘅高達模型，
老實真係用咗好心機攪呢隻嘢，
不枉自己花咗唔少時間落去，
砌完之後確實幾高興下！

於是趁噚日屋企無人，
拿拿聲出咗去深水埗鴨竂街專賣國貨攝影用品嘅鋪頭，
執咗一套拍商品攝影嘅簡便套裝，
趁隻模型仲係fresh嘅時候，
即刻映底佢！
由於自己未正式玩過「商品攝影」，
Set燈試燈都攪咗我老Blue個幾鐘先至摸到點玩套燈，
映完之後又過返落部到腦睇下效果如何？
結果都好滿意，
當然同真正商業攝影梗係差十萬九千里，
但係自己以映模型計比起之前嘅效果已經好滿足囉！！
有興趣嘅朋友，
不妨抽空瀏覧1/60 Gundam Exia

Blueman

都是Poker惹的禍....

2008-07-19T18:54:00.003+08:00

2008年7月19日
戊子年六月十七
傍晚

〈遊戲〉
上個禮拜我老Blue放咗一個星期大假，
由於連日落雨無乜出過街，
唯有留起屋企砌下模型、上網咁，
上facebook見到有好友玩「美式沙蟹」牌局好過癮，
就係咁呢個星期跟班朋友上網玩「沙蟹」，
雖然係網上遊戲兼唔係真錢，
但係都玩得好投入，
可能我老Blue好少玩on-line game，
但係今次呢種牌局嘅on-line game某程度係一種賭搏，
同抄股票大玩EQ類同，
正好訓練自己起EQ不足之處，好玩！！

不過，就係因為咁好玩，
原本有影會活動都因為噚晚玩得太投入，
結果瞓過籠白白錯失咗今日攝影活動，
絕對係自己貪玩之過，抵死！！

今次去唔到影會唯有報過下一輪活動，
但係如果係返工就好大鑊囉，
引以為戒。

Blueman

我的1/60 Exia制作進度３

2008-07-12T00:08:00.004+08:00

2008年7月12日
戊子年六月初十
凌晨

〈模型〉
踏入凌晨，我老Blue終於將手頭上嘅1/60 Gundam Exia，
整體完成咗70%，
現階段只餘下武器及修飾工序，
第一次砌咁大比例嘅高達模型，
初步感覺真係好大件下，
撇除模型精細度不能同MG系模型比較外，
以兩舊幾水嘅貨仔算係幾抵玩，
祗少我老Blue俾佢玩咗成個用咁濟....。
希望嚟緊呢個星期可以完成哂佢啦！！

Blueman

牛一

2008-07-11T17:51:00.004+08:00

2008年7月11日
戊子年六月初九
下午

〈生日〉
噚日係小弟牛一，
好高興可以再同一班好朋友食餐便飯。
不經不覺我老Blue已經步入中年，
到呢一刻生活尚算滿足，
暫時仍以「財政自由」為人生目標，
路是漫長，仍要繼續走！

Blueman

我的1/60 Exia制作進度２

2008-07-07T21:53:00.004+08:00

2008年7月7日
戊子年六月初五（小暑）
夜

〈模型〉
今日係我老Blue第二日大假，
可惜天色未盡人意，
繼續斷斷續續咁落下雨，
唯有打消出外映相，
如期留起屋企砌下模型，
經過一番苦鬥自己砌咗好耐嘅1/60 Gundam Exia，
終於砌咗一半，
完成咗雙手囉！
不過遺憾嘅係制作過程，
不慎整斷咗其中一隻手指，
令到呢隻手指「永久」喪失活動.....。
家陣勉強叫做「黐」得返，
希望佢唔會跌出嚟啦！！
明日輪到砌雙腳囉。

Blueman

假期在風雨下展開...。

2008-07-06T23:18:00.003+08:00

2008年7月6日
戊子年六月初四
夜

〈假期〉
呢日開始係我老Blue今年第二個長假期。
由於美元弱勢港元掛勾下，
今個假期無打算出埠玩囉，
而係打算留港消費。

自己又乜計劃呢？
有！希望可以砌埋攪咗好耐嘅1/60 Gunam Exia。
呢隻嘢真係氹咗好耐都未完成，
始終比例系列同MG系列組立精密度及簡易度都仲有一段距離....。

至於攝影，好不幸第一日假期就已經落大雨，
希望嚟緊嘅天氣會好轉啦！
可以出去映返幾轉相都好吖。

〈眼鏡〉
噚日，我老Blue終於換咗新鏡片，
點解唔配過副新鏡架？
原因自己好喜歡上一副舊鏡架勝在夠輕，
對於工作及娛樂都長期面對個電腦「芒」，
一副輕嘅鏡架都好大影響！
不過，今次配鏡片相熟嘅視光師同我老Blue講話我近視無加無減，
都係咁上下度數喎！
好事。
家陣載咗呢副舊鏡新片，
又輕又舒服！

Blueman

生活模式改變中....

2008-07-04T11:50:00.004+08:00

2008年7月4日
戊子年六月初二
上午

〈閱報〉
噚日為「信得過報」報慶三十五週年，
亦係其網上版登場日子，
我老Blue呢幾年都係其讀者，
梗係第一時間登記做付費會員，
原因無他....新會員收費有優惠價，
圍埋每日個二銀錢比出街買仲要抵嘛！！

當自己由買報紙嘅習慣變做上網睇報紙，
處理財務唔駛再去銀行，
上Facebook聯絡舊朋友，
亦可以自己起個Blog舒發自己嘅感受等等！
不得不承認電腦或網絡已經完全進入好多都市人嘅日常生活....。
世事常變幻！
咁嘅生活模式究竟係好事定壞事真係攪唔清楚，
或者根本無嘢係好定壞？
只要接受或抗拒！
我老Blue性格唔太抗拒新事物，
反而對新事物好有興趣就真！

不過，家陣自己生活不經不覺對電腦或網絡越嚟越依賴就真，
是但一樣有問題我諗個日都幾麻煩下！
情況就好似最近我老Blue有位老「朋」咁，
佢老哥對電腦基本知識唔算太高，
無奈部腦得閒無事就玩佢一嘢（可能係部腦中毒太深唔為意），
上上下網有時「呆」咗起度，
連佢都呆咗起度，
可惜我老Blue用Mac機幫佢唔到.....。
攪到呢位老哥對呢亭認為係「高科技」有抗拒嘅心態！

世界不斷改變，
做人亦只能跟住潮流改變....。

Blueman

初嘗「餅鏡」

2008-07-03T21:17:00.004+08:00

2008年7月3日
戊子年六月初一
夜

〈鏡頭〉
今日出MK見到O記枝Pencake鏡返貨，
呢枝我老Blue心儀咗好耐嘅鏡頭ZD 25mm f2.8終於有機會入手，
正好今日有時間可以試鏡，
二話不說返屋企攞機同枝「開光」！
不過，今勻自己並唔係用至愛嘅E-3，
反而係另一部好耐無用嘅E-300，
貪佢機身輕巧，
配呢枝僅重95g嘅鏡頭，
簡直係絕配！

今日下晝四點幾，
天氣非常咁靚，
仲要係藍天白雲個隻，
絕對係試機試鏡好日子，
撞到撞唔啱，好！
跟手出咗去尖咀，
無乜目的咁拍，
由於呢枝「餅鏡」25mm相等於135mm片幅嘅50mm標準鏡，
加上重量輕便，
一路行一路映、用標準鏡構圖，
重拾個種好多年前初玩攝影嘅感覺！
至於呢枝鏡對焦就算用落「古董機」E-300，
自動對焦都好靈敏、好爽快，
有點意外.....！
可能同鏡身結構簡單兼對焦行程超短有關係啩？

起尖咀打咗個白鴿轉之後，
拿拿林返屋企睇吓呢枝「餅鏡」嘅質素！
唔知係咪所謂坊間話齍：定焦無狗頭！
呢枝又輕又薄嘅「餅鏡」質素同價錢，
俾我老Blue感覺係無話可說，
雖未講得話超值，
但係已經好滿意！
家陣機連鏡咁輕巧，
可以日常攜帶都好方便下！！

Blueman

Nikon的殺人武器-D700

2008-07-01T17:10:00.004+08:00

2008年7月1日
戊子年五月廿八日（香港回歸紀念日）
下午

〈相機〉
是日香港回歸紀念日，公眾假期。
今日我老Blue咁啱放假，
起屋企無無聊聊上網之際，
赫然見到呢幾個禮拜傳聞嘅Nikon D700「平價版FF DSLR」真有其事！
上DPreivew已經見到hands-on preview㖭。
估唔到今鋪N記嘅宣傳學埋C記咁樣玩「網上外漏消息」，
先引起網友noise，
及後發真料俾大家知。

講返呢部N記粉絲引頸而待嘅N記第二部「平價」FF機，
睇完個Spec同埋對比資料，
覺得會死好多人。
因為佢呢個spec就咁睇，
如果對FF有「需要」或「情意結」嘅用家嚟講，
應該會滿足到佢地嘅訴求，
不過呢部定價都唔平價，
定價都要港銀$25000.....。
至於C記跟住會有乜嘢回應呢？
會唔會亦都好快發佈5D後繼機呢？
天知道....。
不過，好明顯N記呢期個勢真係好勁！
上、中、下三路俾佢玩哂咁劑。

對我老Blue嚟講Full Frame format唔係好太大關係，
反而我好想知N記呢部新機用咗FX format，
起影像邊沿像質有無影響比較關注啲？
因為若然有改善的話，
我都幾有興趣，
原因係可以配到心儀嘅Zeiss ZF mount 鏡嘛！！
全度直出再無crop factor限制，
用足Zeiss ZF鏡嘅威力！

Blueman

Nakabayashi相簿

2008-06-24T17:47:00.009+08:00

2008年6月24日
戊子年五月廿一
下午
（是日天文台發出三號風球）

〈相簿〉
呢排我老Blue除咗返工之外，
其餘時間都係攪攝影有關嘅項目，
繼早前買咗部E-3之後，
自己不斷喪映之外，
跟住就係不停咁玩Lightroom執相，
先至開始明白RAW後制嘅變化及Color Space嘅關係。
今日終於輪到玩曬大相嘞！
一直以來我老Blue好少曬大相，
原因以前用菲林機梗係覺得用135機放相，
微粒因菲林細放大之後，
相片夥粒會好粗下！
舊底讀過啲攝影班都玩過下黑房沖曬，
最盡試過放過16"X20"之後，
覺得效果麻麻，
自己技術差亦好有關係啦！
結果可一不可再.....。
（如果用4"X5"尺寸嘅菲林另計。）

時至今日DSLR技術及質素不可同日語囉！
今時今日家下連入門級DSLR都有成過千萬像素，
出8"X10"視為等閒事。
早幾日我老Blue花咗唔時間揀咗啲相之後，
走出去常去嘅曬相鋪問過有關尺寸及規格後，
以8R為例最佳設定係sRGB色彩設定、PPI 300及save as Jpeg就可以。
今日試咗兩個檔案拎出去曬8R(8"X10")，
由於E-3像素比例屬於4:3，
原相比例接近4:3，
所以出相唔會太過裁剪，
收相個陣睇返覺得效果都好滿意。
可能我老Blue比較傳統啩？
梗係覺得一張大相擺起面前比起電腦「芒」好睇好多！

既然曬咗自己滿意嘅大相之後，
當然要好好整理下啦！
跟住走去一啲大書局買咗日本品牌Nakabayashi嘅精美相簿，
同類相簿之中售價屬於偏貴，
不過，之前keep細相都係用呢個品牌，
今次見到呢個品牌出咗新款A4相簿，
舊款外觀為多色布面嘅高級包裝，
新款外觀為膠質幼席紋編織面，
表面會因唔同光源產生唔同嘅光暗變化，
賣相非常討好！
兼且強調相簿入面可加淢嘅活頁「台紙」（黏貼透明膠紙）可以保存一百年（唔知點解日本人梗係啲字句好誇張）....？
係咪keep到一百年我老Blue就唔敢肯定嘞？
不過，啲相擺落去緊貼度及膠面嘅透光度就比起用過嘅平價國產相簿好好多。
遲啲再揀多幾張再曬8R擺入呢本新簿作珍藏！

Blueman

「色設」大混亂

2008-06-18T14:32:00.004+08:00

＊＊原圖重新的正確色彩設定＊＊

＊＊此圖為之前的錯誤色彩設定＊＊

2008年6月18日
戊子年五月十五
下午

〈色彩〉
我老Blue慣常都會每次映相有新作都好喜歡上網同人分享，
一來滿足自己，
二來可以同網友互相交流攝影心得，
呢個舉動今日又得到證實！
最近有新嘅人像習作起網得到網友指正自己啲相有問題？
發覺我老Blue呢啲相color-setting有好大出入，
緊住聽佢講睇吓邊到出問題？
先至發覺自己執相嘅work-flow「爆鑊」，
原來自己起Lightroom執完相轉出去PS嘅時候無意click咗Adobe RGB，
跟住又起PS Edit完之後，
唔知點解PS color setting 係CYMK，
自己雖然個「芒」係做過Color Cal.調整，
但係一轉咗Jpeg上網睇完全唔同哂，
未必跟得返原色，
就係咁一條龍式錯落去都唔知？
咁最近個批相即係全部錯哂囉！！
唉！！好彩有高人指正，
家陣呢幾日唯有重新做過哂啲擺返落相簿先至見得人囉！
呢鑊嘢真係大劑.....。

Blueman

OM的Wallpaper

2008-06-16T21:50:00.004+08:00

2008年6月16日
戊子年五月十三
夜

〈壁紙〉
今日我老Blue上有關O記相機嘅網頁，
見到O記日本官網又有新OM Camera Wallpaper下載，
梗係第一時間下載啦！
雖然唔知呢個網站幾時開始供網友下載Wallpaper？
但係之幾個月前開始有網友講開呢個網站，
上去睇下覺得去咗一個相機博物館咁，
因為日本網站做得好有心思，
將整個OM咁多年歷史大大小小嘅相機型號映咗做成Wallpaper，
兼且畫質及意念表達都好高質素，
絕對係O記友值得「珍藏」！
就算唔係唔係O記粉絲都值得去睇下日本咁多年嘅相機發展史，
有啲相機我老Blue玩咁耐相機真係未見過！

到今日為止自己已經蓄咗大約百幾張呢啲「原版」OM Wallpaper嘞，
部iMac仲設定為每次開機隨意派發唔同嘅OM Wallpaper㖭，
都幾過癮！！
當中以附圖最為喜愛，
因為係O記最具代表性嘅機種嘛！！

Blueman

攝影上「五個第一次」

2008-06-10T21:46:00.004+08:00

2008年6月10日
戊子年五月初七
夜

〈攝影〉
先兩日（6月8日）雖然經歷過前一晚黑兩雷暴，
但係無損我老Blue同埋一眾好友相約出外映相嘅節目。
話說早幾日工友﹣阿良發起端午節去映龍舟事項，
好不幸出發前一晚黑雨，
眾好友議定如果聽朝起身唔見有雨就當無事，
如期進行喎！！
第二朝起身真係無雨....咁咪攞機出門口囉！
撞鬼佢地呀，一行六人返工都無咁準時？
出奇地個鬼個出席，兼且無人遲到㖭！

同上次去「濕地公園」一樣，由於天氣唔係咁穩定，
或者時間太早關係？
地點沙田城門河唔係咁多人聚集，
六條友仔好順利咁企到靚位取景。
就係咁映下映下，天色乍晴乍雨、時光時暗，
好蝦人映下，
相機曝光iso可以由100去到640咁誇！
兼且自己都係第一次映龍舟競渡呢個項目，
又要兼顧曝光又要睇住對焦位，
真係幾「擒」下....！
時間就係咁嘅環境下好快咁過咗，
映到完場一眾人到酒樓食飯唞唞先，
因為食完飯繼續下一場節目﹣到附近沙田馬場映賽馬嘛！！

其實自己咁多年人未入過馬場，
一直都好想入去映相，
可惜未遇到朋友一齊入去咁解！
今次適逢其會實屬難得。
入到去沙田馬場先知道原來都有好多映友入去映相，
亦有唔少女性映友拎住DSLR落枝長鏡映馬㖭！
我老Blue同埋朋友好似大鄉里咁週圍行，
因為好意外無一個係馬迷，
大家都唔知場地又唔知跑馬嘅過程等等？
大概玩咗個幾兩個鐘就映完，
因為大家都趕住返工或者返屋企做節嘛！！
不過，最主要原因係大家都好攰下，
大大話話都「企」咗成七個鐘咁濟，都幾係嘢！

今次攝影活動咁成功，
唔多唔少大家開始對攝影培養出一份熱誠，
希望呢份熱誠可以保持落去，
唔會因為好似一啲映友為相機去買相機。
同埋今次活動亦創下我老Blue映相以來「五個第一次」：
第一次去映龍舟競渡；
第一次去馬場映相；
第一次落大雨都繼續映相（E-3防雨水果然厲害）；
第一次映相單日打咗接近10GB CF卡（當然大部份係垃圾啦）；
第一次出外映相跌咗個遮光罩，
事緣係好不幸自己企起城門河欄杆換鏡嘅時候，
兩秒間一眾人眼光光睇住自己個Hood甩咗出嚟，
話咁快「碌」咗城門河，
兼且「撲...通」一聲沉咗落黑壓壓嘅城門河下面，
完全無仇報個隻.....，
眾人都「O」哂咀問：乜個遮光罩會沉嘅咩？？
攪到今日我老Blue去O記「荷打」返個Hood，
仲要成三舊幾水㖭...好鬼唔抵！

是次兩輯作品如下，
有興趣嘅朋友不妨抽空瀏覧及留言，謝謝！！
沙田區龍舟競渡
沙田馬場

Blueman

我的1/60 Exia制作進度

2008-06-05T23:09:00.004+08:00

2008年6月5日
戊子年五月初二（芒種）
夜

〈模型〉
上個月24號我老Blue都提過自己買咗盒1/60 Gundam Exia，
到依家已經有成個幾兩個禮拜囉！
由於呢件模型屬於放大版1/100系列，
設計無MG版模型咁緻細，
制作及上色唔可以好似MG咁假組完再分工上色，
係要一路剪一路上色，
跟住說明書逐Part逐Part嵌返上去。
但係發覺呢種砌法又好又唔好！
好嘅係逐Part逐Part做，
時間相對好似快咗，
可以每日抽到一、兩個鐘砌都得！
唔好處係上色次數多咗，
唔可以好似之前一次過開泵噴哂所有部件，
呢樣嘢就要時間適應啦！

到今日為止我老Blue用上述嘅砌法已經完成咗30%，
即頭及上身。
雖然淨係砌完咗上身，
但係已經俾我老Blue感受到1/60呢個比例嘅震撼，
真係好大件下！！

希望可以起呢個月完成整個模型啦！
期待......。

Blueman

二十八年後的高達模型

2008-06-04T23:49:00.004+08:00

2008年6月4日
戊子年五月初一
夜

〈模型〉
不經不過又過咗半年，
自己學習攝影之路已經有十九年；
「六四事件」亦都過咗十九年.....，
RX-78-2高達亦隨著不同嘅技術進步，
亦都踏入二十八年！

今日我老Blue上去TD（玩具日報），
終於見到官方發佈正式嘅RX-78-2高達 MG Ver. 2.0官圖，
唔知點解雖然高達呢隻元祖型號MG版已經出到第六代，
但係都係好多UC老鬼心目中嘅經典型號，
可能佢每隔一排出一款，
唔多唔少代表咗「笨大」每一段時間嘅技術演進，
今次Ver. 2.0大玩1980年1/100系原點造型，
但係配以「笨大」當今MG或Gunpla最高技術含量，
包括追加超可動性嘅腰間設計，
媲美PG嘅內骨架，
核戰機變形時回轉式駕駛倉，
分件式組合嘅付屬武器等等進化，
令我老Blue睇完官圖後不其然產生擁有慾望.....。

Gundam MG Ver. 2.0我等你！！

Blueman

走訪「濕地公園」及人像習作

2008-06-01T21:05:00.005+08:00

2008年6月1日
戊子年四月廿八
夜

〈攝影〉
噚日朝早十點幾我老Blue俾工友F「抄」醒咗，
工友F來電話約咗工友E去新界北嘅「香港濕地公園」，
見今日天氣咁唔穩定又風又雨都咁有熱情話去映相，
一於跟隊去矣.....。

查實呢個「濕地公園」起咗咁耐，
聽就聽得多，淨係知道起新界天水圍附近咁多印象，
都好想見識一下！
於是執咗一機兩鏡，
著咗見攝影背心行人。
由市區搭港鐵西鐵線轉輕鐵好快脆就到，
真係好享受香港公共交通網絡嘅好處，
以前細個個陣去新界好似去旅行咁去，
家陣唔駛八、九字時間就到，勁方便！！

雖然天色並唔係咁理想，
不過，難得放假同朋友出外映相，
毛毛細雨又算得係乜呢？
（其實因為部E-3同啲鏡頭防雨水先至咁大膽咋！）
去到公園門口覺得觀感唔錯喎，
場館設計好現代化，
大量採用天幕玻璃設計用作照明，
又環保又舒適。

經過場館進入主題﹣天然濕地及各項花、蟲、鳥主題景區，
二話不說一行三人入到景區火速拍攝，
唯恐天色由細雨變雷雨就不妙.....。
話雖如此，但係呢個公園因地形而設計，
都唔係想像細少，
三人邊行邊映都用咗個幾兩個鐘先走畢全程，
可喜係天雨關係，
遊人唔多先至容易游走當中。
玩到接近關門時間我地先至離開，
計下計下都映咗幾「激」相先至罷休，哈哈！！

其實呢個禮拜我老Blue都映咗唔少相，
其中有喜宴相、人像相及最新呢輯風景相，
題材都好雜下，
不過映相始終係自己最大興趣就真！
買咗部E-3短短個幾兩個月已經映咗接近二千張咁劑囉。

最新人像習作：Mevis
濕地公園
歡迎各位朋友瀏覧及留言。

Blueman

網路相簿

2008-05-28T22:39:00.003+08:00

2008年5月28日
戊子年四月廿四
夜

〈相簿〉
前晚，為慶賀工友﹣何人晉升「掃把」，
多為工友為佢設宴到賀，
我老Blue亦帶埋部E-3去高興。
今躺飯局有成三十幾人，
其中有啲朋友好耐無「蒲頭」，
顯得特別高興！
自己亦映得不亦樂乎，
係咁依都映咗3「激」RAW File.....。

噚晚終於有時間整理呢輯相，
從一堆檔案中揀完相之後，
重新「執」一「執」就照舊隊上現有嘅網路相簿「Fotki」，
方便一眾工友及好友欣賞。
講開呢個相簿其實都用咗好耐，
時間比「老Blue日記」仲要耐！
自己用落Fotki唔轉嘅原因，
除咗佢有多元化及個人選項功能外，
最緊要係夠穩定！
之前試過其他「相簿」唔係功能太過簡單，
就係網站管理不善，其間發生「冧」站唔少....。

不過，最近有朋友用緊Google入面嘅Picasa，
覺得介面設計唔錯，
管理及上傳速度都好理想，
最好係只要係Gmail用戶就即可使用1Gb容量！
話雖唔錯，
但相對Fotki能為用戶提供不同為個別相簿設立密碼功能，
及以其他軟件為原身相片加入keyword檔後，
Picasa相簿則有限度顯示Exif，
相片原身Tag檔資料則無法顯示原身keyword！？
其他如介面未能個人化、唔容許「外人」加評語等等。
既然仲有咁多缺點，
咁點解我老Blue仲要介紹呢舊嘢呢？
因為睇好Google對Web Application嘅前景，
家陣以Google起網絡咁強嘅優勢，
以上Fotki有嘅功能，
隨著用戶不斷增加，
只會不斷改善或會推出比Fotki更好嘅付費服務都未定？
大家拭目以待！！

Blueman

OM平民五寶

2008-05-25T19:41:00.003+08:00

2008年5月25日
戊子年四月廿一
夜

〈模型〉
今晚返通宵班，
有時間繼續砌模型，
開始為第1part Body上色，
雖然有好幾個月無用枝噴筆，
好彩仲未生疏到！

〈相機〉
近日O記隨新機E-420上市及公佈最新E-510後繼機﹣E-520，
同時亦宣佈推出一眾O記粉絲渴望以久嘅平民Ultra-Wide Zoom-ZD 9-18mm F4~5.6，
呢枝列入Standard Grade，
雖然未有定價，
但係我老Blue相信貴極有個譜啩（相對Top Pro個枝ZD 7-14mm)?
就依家O記所分配嘅鏡頭群組睇，
O記攪咗咁耐嘅4/3系列，
終於叫做齊章囉！
唔好計頂級貴鏡，
單係最入門嘅Standard Grade Lenses，
以經提供咗五枝最常用兼且價格極具競爭力嘅鏡頭群組：
ZD ED 9-18mm F4-5.6
ZD ED 14-42mm F3.5-5.6
ZD ED 70-300mm F4.0-5.6
ZD 25mm F2.8 Pancake
ZD 35mm F3.5 Macro
全部計計埋埋真係一萬鬆啲有交易，
真係幾抵玩！
唔好再話O記無平民鏡囉！
E-420/E520輕巧機身，
配合上述鏡頭群組，
真正發揮4/3小而美嘅理念，
如果O記早啲出呢批鏡，
相信更早搶佔DSLR入門用家市場.....。
自己早幾日亦摸過E-420上手，
真係好鬼細部兼好玩，
好有衝動入手當日常隨身機.....。

Blueman

初嘗1/60高達Exia

2008-05-24T23:51:00.004+08:00

2008年5月24日
戊子年四月二十
夜

〈模型〉
今日放假，
我老Blue見樓下玩具鋪擺咗盒1/60嘅Gundam Exia，
賣6算價錢，相當吸引。
於是入咗立即開工，
查實自己砌開1/100比例嘅MG版，
今次算係第一次製作咁大比例嘅高達模型！
（模型全高約為30.5cm）
打開盒睇番說明書，
發覺除咗比例大啲之外，
單計Runner其實得個十幾塊咁大罷，
不過，份說明書就出奇地有驚喜，
因為成份說明書係全彩印刷。
至於模型制作方面，
算係放大版嘅1/100模式，
唔講得上精密，
直頭係簡單設計，
但係唯一可取係隻手掌嘅分工設計，唔錯！

雖然模型已經分哂色，
但係唔似MG版可以先「假組」後分件上色咁方便。
要跟說足明書咁逐Part剪落嚟，
跟住上色然後再組合先得。
另外有驚喜係呢個1/60，
需要作「無縫」制作嘅左右合併嘅組件唔多，
只得四件咁大把，比預期少。
預計唔會太難攪啩！？

今次嘗試唔用傳統嘅「雙星」上灰「打底」，
改用Mr.Hobby嘅Mr.Base White 1000白「噴筆地」作底色，
因為呢個Exia會沿用原色，
試吓會唔對上色速度會有改善，
希望聽日可以順利做起第1 Part-Body。
如果效果好嘅話，
以後上原色嘅MG可以咁樣上色囉！！

Blueman

我看Indiana Jones 4（水晶骷髏國）

2008-05-23T16:40:00.003+08:00

2008年5月23日
戊子年四月十九
下午

〈電影〉
噚晚，我老Blue去咗睇Indian Jones and the Kingdom of the Crystal Skull（港譯：奪寶奇兵之水晶骷髏國），
繼上次睇「Iron Man」今次又一班朋友去睇戲後，
不過今次一行十一人比上次仲誇張，
有啲似小學去旅行咁熱鬧。
呢次入戲院有朋友建議去位於西九龍嘅「圓方戲院」，
話想試下呢間新戲院音效如何喎？

講番套戲查實之前三集自己都有入戲院捧場，
不過事隔十幾年之後出第四集，
都好想睇下有乜新嘢玩？
故事年份為1954年，
開場劇情穿插咗好多嗰個年份美國當時政治環境，
都玩得幾有趣，
跟住交待哂人物關係之後開始入主題﹣探險尋寶！
唔知係咪情意結，
硬係史匹堡拍呢類「尋寶戲」先至係專家，
雖然係第四集玩來玩去都係古代機關、片車、蛇蟲鼠蟻等等元素，
但係佢拍出嚟就特別過癮，
兼且配合佐治魯卡斯，
玩特技都出神入化。
成套戲百二分鐘亳無冷場，
極高娛樂性！！
配合「圓方戲院」每張座椅下面都玩埋音效，
啲重低音配合劇情推動，
例如劇中大型機關開動個下感覺好強烈，正！！
所以有興趣睇呢套戲嘅朋友，
建議揀間音效好嘅戲院入場。

Blueman

RX78-02 MG 2.0

2008-05-16T17:38:00.004+08:00

2008年5月16日
戊子年四月十二
下午

〈模型〉
早幾日上TD（玩具日報）網站，
見到第47th靜岡模型展嘅速報，
其中最受矚目莫過於傳聞已久嘅RX78-02 MG版Ver. 2.0有實版現身於會場啦！
不經不覺原來呢隻經典模型起MG版咁多年到依家出下出下已經出咗6款咁多，
玩到家陣Ver. 2.0仲可以有乜嘢新「花臣」呢？
睇到TD嘅報導見到呢隻2.0個型玩返TV版嘅造型！
即係肥仔頭勁齍嘅線條，
一齊由原點為基礎。
就咁睇我老Blue覺得好齍下喎？
點知睇落去原來「內有乾坤」，
大賣PG版嘅骨格及新嘅Ver. 2.0超可動關節！！
唔但之咁會場發佈話會首次出MG版G Armor（G戰機）及Guntank（太空坦克）㖭，
組成世紀傳說嘅MG版V作戰！
咪住.....咁擂射大砲會唔會出Ver. 2.0版先？
呢個係好多MG迷同我老Blue心目有著同一個問題？
自己買咗咁多MG但係到依家都唔入擂射大砲都係等2.0版，
因為早期擂射大砲MG版真係好「肉」下，
入唔到手.....。
講完V作戰外，另外「笨大」又俾驚喜我老Blue，
就係一年戰爭嘅MSV MG化，
將會出埋MS-06K ZAKU CANNON及MS-06V ZAKU TANK，
就咁睇試版已經好吸引下，
尤其隻MS0-6V作業用渣古坦克比大河原設定仲細緻！！
除咗「一年戰爭」系嘅MG版消息外，
亦睇到最新嘅MG Force Impulse Gundam、MG版真武者頑駄無嘅實版及Box Art，
一樣好吸引！
睇嚟今年起模型方面自己又要有一筆預算囉。

Blueman

我的第一個『山口式』

2008-05-15T06:18:00.004+08:00

2008年5月15日
戊子年四月十一
上午

〈玩具〉
噚日上網知道期待嘅「山口式」可動人偶（天元突破）紅蓮之眼終於派貨。
我老Blue第一時間仆出去MK信和𥄫下啦！
起初以為舊零水有交易，
雖不知呢隻「天元」人氣太勁，
好多鋪頭都升水賣到$13X.....！
唯有去返屋村商場睇下有無入貨？
好彩有貨仲俾MK平咁都無咁嬲。

呢隻係我老Blue第一隻「山口式」玩具，
第一次攞起手感覺幾聚手下，
關節活動比想像好，
兼且都幾緊下，扭落「卡」「卡」聲！
唔似「笨大」其下嘅HCM Pro扭兩嘢會鬆哂咁，
都算可以隨意擺出劇中名場面姿勢及動作；
呢隻紅蓮上色都算係咁，
光油及啞油上色幾協調！
至於配件方面都幾多花款，
有幾隻唔同變化嘅手掌外，
亦配有兩個表情嘅面相供配搭，
及最抵死有劇中1:1嘅鑽頭鎖匙及大回力鏢等武器。
不過，呢次「海洋堂」出「天元」呢個系列都幾陰毒下，
原因係呢次「紅蓮」係地下篇，
無飛行翼配埋，
想要咩？得！嚟緊出嗰喳「天元系」每款跟一個部件，
集齊咁多個部件就砌番成架飛行翼！！
呢招都好毒囉......。
聽講遲啲會出全身「鑽頭版」，
到時買好定唔買好囉！？

哈哈！不過以「山口式」嘅造功，
我老Blue都幾想儲齊一套「紅蓮兵團」擺起屋企！

Blueman

久違了的熱血﹣天元突破

2008-05-13T04:10:00.004+08:00

2008年5月13日
戊子年四月初九
凌晨

〈動畫〉
先個幾日我老Blue都起個Blog到提過煲緊套動畫﹣「天元突破﹣紅蓮之眼」。
自己用咗三晚時間，
一口氣睇哂一共27集！
好耐無睇過一套咁熱血咁破格嘅機械人格鬥動畫，
可能呢排「跟」開個幾套Gundam OO、裝甲騎兵前傳及Macross Frontier，
故事比較嚴肅及寫實，
突然睇番呢類「熱血系」感覺好唔同。
雖然係「熱血系」但係故事及制作好認真，
一啲都唔馬虎，
尤其第8集「永別吧，兄弟！」，
編劇夠膽整死其中一名男主角，
起「熱血系」動畫實屬罕見，
玩到最後連女主角都唔放過，
真係夠哂「突破」！！
至於格鬥場面亦好正，
咪睇機設個樣個個Q版頭咁，
動作超凌厲兼誇張，
誇張格鬥程度及機體巨大化情度凌駕於心目中嘅經典動畫「真。三一萬能俠」！
另外，值得一提嘅係好少機械人動畫好少一套過講主角由小童講到老年，
連心態及成長可以分幾個層次：地盤童工＞人民英雄＞政治領袖＞監獄死囚＞人類救星＞退隱江湖，
如果撇除科幻及熱血嘅包裝，
以為睇緊江湖武俠劇㖭？
呢套嘢由去年2007年4月1日至9月30日起日本播出，
由於大獲好評，
今年會相繼推出兩套「劇場版」，
不過，未知係新著還是原裝「濃縮版」？
之於呢套「天元」幕後班底亦好冷門下，
監督 - 今石洋之、編劇﹣中島一基、機械設計 - 吉成曜，
我老Blue就無乜認識啦！
至少上網亦都揾唔到以上幾位出至何方？
淨係知道呢套嘢係GAINAX制作咁大把！
有興趣熱血系動畫嘅朋友，
呢套「天元突破」千祈唔好錯過！！

〈玩具〉
既然我老Blue對呢套「天元突破」咁有好感，
好自然相關產品唔會放過啦！
本來想揾吓有關「天元」嘅模型玩吓，
誰不知上網見到模型版權原來俾咗「壽屋」，
睇完覺得品質麻麻地，
完全提唔起意欲入貨！
及後睇咗今期「電撃Hobby」中文版，
有介紹「海洋堂」其下熱門產品REVOLTECH「山口式」可動玩偶，
三週年第50號「山口式」就係「天元突破」主⻆機﹣紅蓮之眼，
連可動結構亦由以往最高45個追加至54個關節，
可調校好多劇中名場面動作，
超吸引！！
由於高人氣度關係，
「天元」會以一個系列形式推出，
即係好有機會成隊「紅蓮兵團」會出哂？（究竟係好事定壞事呢？）
因為大大話話計劇中活躍度嘅機體都有成十零隻噃....
點都好啦！
呢隻「GURREN LAGANN紅蓮之眼」好有可能會成為我老Blue第一隻「山口式」玩具囉。
5月15日發售，
仲有兩日！！
(又開多個一條「不歸路」）

Blueman

陳年硬盤

2008-05-11T21:04:00.005+08:00

2008年5月11日
戊子年四月初七（母親節）
夜

是日母親節，
慶幸今日我老Blue返早，
趕及回家同家母食飯。

〈硬盤〉
噚日我老Blue放假，
無無聊聊咁起櫃底「抄」到兩個好舊好舊嘅Hard Disk，
好奇咁揾個舊HD case裝番上去睇吓入面有仲有啲乜嘢啦？
一個已經清空咗，
但係另外一個60GB嘅HD，
原來存放咗我老Blue好耐好耐之前早年scan落嘅舊相底檔案，
除咗有我早年嘅攝影劣作外，
仲有一啲朋友嘅舊相，
睇返真係諗番起當年嘅唔少趣事，
的確幾有趣！
呢啲咁珍貴嘅記錄，
當然第一時間抄返落去個新HD，
等待燒DVD作備份。

巧合嘅係當中有啲朋友，
噚晚出嚟食飯聚舊亦有出席，
我老Blue除咗攝影保持咗十幾年不厭外，
呢班朋友亦十幾年都無變，
人生樂事也！！

Blueman

初看「天元突破」

2008-05-09T00:41:00.005+08:00

2008年5月9日
戊子年四月初五
凌晨

〈動畫〉
呢半年我老Blue身處公司嘅部門，
因員工制度改變關係，
嚟咗好多好後生嘅新同事。
前幾日其中一位新同事抄咗套最近好hit嘅動畫俾我老Blue，
呢套叫「天元突破﹣紅蓮之眼」屬於機械人格鬥類別，
起初見到啲機設個個心口成塊面掛咗上去，
覺得好攪笑，
無乜理會.....。
及後睇咗頭三集，
咦？好熱血兼劇情都幾攪嘢下，
動作及機械人格鬥幾利落幾另類，
好有新鮮感，
有追劇嘅味道！！
不過，唔知我老Blue睇完之後會唔會喜愛咗呢套嘢嘅機設，
繼而入番幾盒有關「天元」嘅模型玩呢？
唔講咁多等我又煲多幾集先訓覺，
哈哈.....！

Blueman

餅乾相機數碼化？

2008-05-07T03:40:00.006+08:00

2008年5月7日
戊子年四月初三
凌晨

〈相機〉
我老Blue同幾位工友週不時都會起工餘時間就講映機或者攝影，
唔知係咪DSLR真係普及咗，
還是耳濡目染影響底下，
呢排亦多咗同事相繼加入DSLR行列，
實屬「好」事！

雖然論攝影器材，
我老Blue確實再無添加嘅必要，
不過，仍然有枝心水鏡頭都依家都好想擁有，
就係O記新出嘅「餅乾鏡」ZD 25mm f/2.8，
呢枝鏡由公佈至有用家報告，
人氣度都好高，
自己亦一直留意有關資料。
由於呢枝鏡係O記起4/3系統第一枝標準鏡（視角相等於135mm 50mm標準鏡），
亦係首枝以Pencake鏡形式推出，
加上售價合理（$19XX），
上個月尾香港第一水到貨，
好快已經sold out，
據聞今個月15號連同新機E-420一齊返貨，
勢必再掀O記友搶貨潮！
呢水如果有貨剩的話，
自己入貨嘅機會都會好大，
因為外型及性價比實在太吸引.....。

可能有朋友會問：點解O記枝4/3標準鏡會以Pencake鏡出現呢？
呢個問題我都有諗過！
無錯！其實做一枝標準大光圈，
理論上應該唔難做呀？
點解要出Pencake呢？
我老Blue最近為咗呢個問題，
睇咗好多有關呢枝鏡嘅資料及新聞，
其中以國內PChome訪問O記上海信息統括室室長﹣大浦康達，
編輯徐嘉問到O記會否推出類似「死馬」DP-1產品意向（即4/3版嘅DC）？
大浦先生就話....僅僅一個鏡頭是不夠的（其中一句可圈可圈點的說話），
跟住例牌講O記會密切留意DP-1或類似產品發展等等.....。

自己睇完之後，
即時聯想到O記好耐好耐之前，
大約45年前（1963年）O記推出過一部相當經典嘅菲林相機-Pen F，
呢部嘢上網睇番資料先至知道當時Pen F原設計者-Yoshihisa Maitani （谷村吉久）先生，
受當時O記落「柯打」話要做一部平價非SLR相機打市場，
於是谷村先生做咗第一部半格菲林嘅（以現今DSLR計算，即APS Size DSLR尺寸）Rangefinder相機兼可換鏡頭嘅量產機出嚟！！
不過據資料出處見Olympus Pen F：史上第一台半格單眼相機，
話由於歐美對半格菲林唔係咁buy，
所以出咗三個型號，維持十年生產線最後結束O記半格「餅乾相機」嘅命運囉.....。

講咗咁耐其實我老Blue想講啲乜呢？
O記出番單反咁耐，
一直強調4/3小而優則美呢個設計概念，
雖然有唔少人提出論點質疑及反對，
但係我老Blue覺得O記一直有一套同市場期望嘅路不相符嘅堅持，
直至出咗E-410/E-510終於將4/3小則美呢個概念發揮出嚟。
今次出呢枝ZD 25mm Pencake低階標準鏡，
令我覺得O記想用枝餅鏡測試市場反應，
繼而會有重出Pen F數碼化計劃。
當然呢個純綷係個人推測及主觀願望啦，
因為以現有條件及技術，
O記做一部類似Pen F嘅4/3版Rangefinder一啲都唔難呀，
問題係市場接唔接受到咁解？
早期E-300外型跟本就似足Pen F設計，
不過體型未夠「瘦身」而已，
若然O記做到一部好似當年Pen F咁「纖巧」可換多枝平價「餅鏡」嘅DSLR，
即類似Contax G系及Leica M系平價版，
配合現有技術﹣LiveView及防手震系統，
我估計可以為O記起DSLR市場打開一個缺口，
令用家提供「更輕巧」嘅選擇！

Blueman

三週年＋人像習作

2008-05-05T04:02:00.006+08:00

2008年5月5日
戊子年四月初一（立夏）
凌晨

〈三年〉
今日我老Blue睇返部腦個記事曆，
先記得原來前日（5月3日）係自己寫Blog三週年紀念日。
估唔到自己寫Blog呢個習慣不經不覺維持咗咁耐，
有點不可思議......。
Anyway，雖然自己寫咗好多垃圾文章，
但係都好感謝咁多年一直咁撐場嘅好友﹣恆仔及blog友﹣P Cheung兄、火鳥兄、大雄及占兄，
及其他新Blog友，
容許我老套啲講聲：多謝咁多位支持！！

〈習作〉
前兩日我老Blue又走咗去參與啲影樓閃燈人像活動，
今次參與嘅Model﹣Ceres，
同之前映𠴱幾個Model氣質好唔同，
好重少女味，加上神態舉止完全散發著青春氣息。
其實經過呢幾次影樓活動，
接觸過唔少影友，
當然清一色係男性，年紀由後生仔至中坑都有，
由於過程每場時間僅僅個零鐘，
基本上一入場就要各自揾位「做嘢」，
唔會攪乜嘢自我介紹，
完全香港即食文化﹣即乜嘢都趕頭命。
基本好多影友都係斯文人，
同場嘅時候除咗映相之外，
亦會交流一下攝影心得或者講下「相機經」咁，
不過，當中有次就最深印象.....
個次大家都係本住同一個目的入場，
幾個人同埋model迫埋一個幾廿呎嘅影樓入面，
淨係聽到「察」、「察」嘅連環不絕機械式快門聲，
連續十幾廿分之後，
先至聽到Model問：我換第二套衫好唔好呀？
跟住dead air咗幾秒先至有人開聲：「好呀！」，
而開聲個就係小弟我，
因為實在頂唔順咁死寂嘅氣氛......！
發覺乜原來家陣影人像係咁樣㗎？
唔知以為幾個陌生人一齊同緊個「人形木偶」映product shot㖭？
簡直大開眼界！！
不過，我老Blue抱著趁熱鬧嘅心態去玩，
等玩多幾次嘅時候，
覺得技巧成熟就包場就另一回事啦！
是次習作人像習作﹣Ceres已收錄於在下網上相簿，
歡迎抽空瀏覧及留言。

Blueman

新相機袋

2008-05-03T18:30:00.003+08:00

續2008年5月3日

〈相機袋〉
先個幾日我老Blue無無聊聊咁上網二手區，
見到有個幾的式嘅相機袋-f.64 X Sunbrella品牌FMCT相機袋，
覺得幾特別，
個款完全唔似相機袋，
噚日同貨主以$4xx成交咗！

講到相機袋，好老實講自己都唔少，
當中以海軍藍色嘅美國老牌相機袋Domke F-5XB Shoulder/Belt最為喜愛，
原因係設計小巧簡潔，外觀似手提包多過相機袋，
內籠可放一機兩鏡，
自己由菲林機Contax N-1年代用到依家，
大大話話都用咗七、八年，
亦都係個人咁多相機袋之中最襟用嘅一個；
另外一個係英國品牌Billingham（白金漢）其下嘅Hadley original型號相機袋，
呢個入咗兩年多，
亦都係用得最多嘅相機袋，
原因係呢個相機袋外型似公事包，
基本上可放一機、三鏡外，
日常生活亦可放一台15"手提電腦出街，
另外呢個Hadley最主要用途係當返工、行街，
內袋可經常擺份報紙或幾本港式漫畫都好輕鬆！

但係自己梗係耐唔耐想換個新款個下衰....。
今次入呢個美國 f.64+Sunbrella玩crossover日版相機袋原因係想揾個比較細Size，
可以放到一機一鏡出街就可以。
可惜睇咗好耐，
家陣啲相機袋設計千遍一律，
有時出街映相同一場合撞袋嘅機會好大，
感覺好似制服咁....。
成交之後返屋企即刻試袋啦！
好大膽咁攞部E-3加枝ZD 12-60mm放落去，
居然無問題，實在太理想！！
家陣出街用袋又多個選擇。
Newswear-Chestvest，一機三鏡機動游擊型
Billingham-Hadley oringial，一機三鏡／返工休閑型
Domke-F-5XB，一機兩鏡／旅行首選型
Sunbella-FMCT，一機一鏡／行街休閑型

Blueman

我看IRON MAN

2008-05-03T01:39:00.006+08:00

2008年5月3日
戊子年三月廿八
凌晨

〈電影〉
噚晚我老Blue同一眾工友相約去咗睇期待咗好耐嘅電影﹣IRON MAN（鐵甲奇俠）。
耐唔耐我老Blue遇到一啲覺好高娛樂性嘅電影都會約埋幾個朋友一齊入戲院睇，
始終起戲院睇氣氛好好多！

就好似對上幾次睇Transformer（變形金剛）一樣，
如果一個人睇同一班人一齊睇，
感受會無咁過癮！
呢齣IRON MAN全長126分鐘亳無冷場，
娛樂性極之豐富，
兼且有啲笑位都幾抵死，
例如測試腳底噴射器及叫佢條女幫佢「徒手」換心呢兩場。
至於動作及特技好超班，
簡直目不暇及，好精彩！
尤其機設一流，
單係IRON MAN套戰甲已經分Mark-I、II、III咁多，
最後Mark-III出場真型都爆，
至於Ending奸角個件戰甲Project 16機設俾我感覺仲好日本「蘋果核戰記」feel；
據聞呢套IRON MAN係Marvel其下嘅Marvel Studio電影創業作，
首部自資開拍，版權無批俾其他電影公司，
鬼咩！眼見之前Spider-man及X-Men大收旺場，
今鋪一於肥水不留別人田。
完場嘅時候見字幕叫觀眾唔好咁快離場，
原來已經有第二集嘅小小預告，
仲有新人物登場！！
上網睇番嚟緊個套The Incredible Hulk（變形俠醫2），
IRON MAN（同一個男演員及角式）會有份客串㖭！
不過成套戲雖然好好睇，
但係好多演員都好陌生下，
唯獨女主角居然揾金像影后﹣Gwyneth Paltrow（桂莉芙柏德露），
有點意外.....！
因為個角式都幾花瓶下？
點都好啦！
我老Blue就好期待下一集嘞。

Blueman

檔案補完計畫３

2008-04-29T21:39:00.004+08:00

2008年4月29日
戊子年三月廿四
夜

〈檔案〉
兩個月前，
我老Blue曾經起Blog到提過有關將過去嘅重要檔案作備份，
近日終於的起心肝做嘢嘞！
自己玩咗電腦咁耐，
都換過好幾部電腦，
但係所積落嘅檔案數目亦相繼加大，
淨係分先後次序燒DVD做備份諗起頭都大埋！！
於是，唔理三七廿一由最重要嘅檔案燒，
我諗呢個方法係最直接、最理想。
由於我老Blue都幾重視自己過往咁多年所映落嘅劣作，
所以有部份不惜工本選用「柯記」嘅24K Gold DVD-R作備份，
呢隻金碟據聞係同級之中，
質量最有保證，
極之適合作數據或重要資料備份。
如前文（2008年2月20日一文）所講，
RAW檔加上早年嘅Film Scan檔案大大話話都有成100GB咁多，
即係最少都要燒成廿隻DVD-R碟咁劑.....。
希望嚟緊呢兩個禮拜可以完工啦！
（哈哈！我老Blue無事忙嘅性格又發作。）

Blueman

八個月的等待﹣GODKERON究極合神

2008-04-28T04:29:00.005+08:00

2008年4月28日
戊子年三月廿三
凌晨

〈模型〉
好耐都無起個Blog度講模型囉，
無他嘅最近我老Blue真係無事忙，
仲未有時間「打理」啲模型存貨.....。
不過，小弟其中一個壞習慣﹣戒砌唔戒買又嚟過！
前幾日又巡視樓下間玩具鋪，
俾我見到心儀咗好X耐嘅KeroroRobo Mk-II Box set-“GODKERON究極合神”返二輪貨，
價錢仲好吸引，開價日元五算！
呢盒K66 Robo Mk-II好耐之前（見本Blog去年8月28日﹣K66 Mk-II大合體一文）都提過，
初出散裝嘅時候都已經有買嘅衝動，
及後從網友得知原來集齊五款可以玩大合體，
咁老虎蟹都等Boxset出啦！
雖然自己都好耐無跟進K66動畫，
但係上網睇過K66第203集，
K66Robo MK-II出場就更加想入貨，
就係咁一等就等足八個月，
呢排先至郁手嘞。
呢盒Boxset雖然無咗上一次咁「送」紙皮情境，
不過追加咗兩柄「激光劍」、膠被肩及Action Stand，
好過無啦！
但係睇返說明書，
好似合體咗之後，
一定要用個action stand先至企得穩嗰喎？
唔知有無朋友砌過，
係咪咁呢？

Blueman

熱昇華打印機

2008-04-23T03:21:00.005+08:00

2008年4月23日
戊子年四月十八
凌晨

〈印相〉
噚日，我老Blue同好友恆仔出MK，
兩條友見「百記」擺咗部C記出4R嘅熱昇華打印機CP740，
見個價錢賣緊$5XX幾抵玩，
一人托咗一盒各自返屋企。
點解會買呢？
因為發覺好多時起屋企想即興Print張相，
但我無咁好心機等一次過十幾廿張先至攞出去哂相，
於是見部機幾舊水打印每張成本為到$1.5，
價錢都可以接受！
返屋企即刻開盒玩呢舊新玩具，
安裝過程都算簡單，
跟住開幾張相打印睇下出嚟效果如何先？
試咗幾張之後揾啱自己最佳嘅色彩設定，
發覺效果比即場試機效果出乎咁理想，
可能係熱昇華打印嘅關係，
比用同價位家用嘅InkJet打印機效果好，
無咗一般InkJet嘅墨點存在，
只要色彩設定正確可接近街鋪曬相效果！
但係由於過程全權操控，
免除咗街鋪不穩定嘅色彩因素，
加上相紙兼具防褪色、防指模、塵粒及水點功能，
咁嘅價錢都算抵玩嘅玩具，
有興趣嘅朋友不妨買部玩下！

Blueman

「浣熊」風球下的影會活動

2008-04-22T01:42:00.003+08:00

2008年4月22日
戊子年三月十七
凌晨

〈攝影〉
前兩日颱風「浣熊」罕有地四月時份起香港出現，
雖然無打到八號咁誇，
但係換嚟大風大雨出街都好麻煩。
就咁啱我老Blue呢日有影樓活動，
因室內關係如期舉行....。
Model亦都好準時出席，
但係因天氣關係，有影友甩底，
亦有影友要早走，
結果因人少反而仲好映咗，
因為相對自己多咗時間映嘛！

呢個月去咗兩三次呢啲影樓活動，
發覺對玩人像攝影有好有唔好，
好嘅當然係操下機、識多啲新朋友；
唔好嘅當然係現場環境好局限咗攝影嘅創作啦！
不過，話分兩頭俾舊零水仲要求啲乜呀？
所以當練習就不實為過。

不過，由於唔係包場，
玩過幾場都見到家陣好多影友唔同嘅攝影態度。
真係乜野人都有，
好彩呢幾次遇到係斯文人居多，
都幾過癮下！
是次活動Portrait- Meggie、Vicky已收錄於小弟個人相簿，
歡迎抽空瀏覧及留言。

Blueman

影會活動

2008-04-14T14:29:00.004+08:00

2008年4月14日
戊子年三月初九
下午

〈影會〉
早幾日好友恆仔彈咗個e-mail俾我老Blue，
內容係有關一啲網上嘅影會活動嘅推介。
關於影會活動有映開人像嘅影友一定唔會陌生，
呢類影會起源於早期本地互聯網開始普及，
各類型興趣及活動借互聯網開始誕生大大小小嘅相關非商業論壇。
若於七、八年前香港出現咗第一個有關攝影及器材有關forum，
我老Blue亦起個時做咗會員。
由於呢類攝影網站嘅活躍，
大多數攝影參與者多為年青人，
其中大多數為男性，
均對映人像有濃烈興趣，
加上建站成本低，
被業餘及無業人仕視為一個商機....。
有見及此亦誕生咗好多由幾個業餘同好組成帶有商業性質嘅攝影網站，
提供人像攝影團收費服務。
連帶坊間都出現咗好多攝影刋物提供有關資訊，
依我記憶好似三、四年前為呢類網站嘅高峰期，
有攝影刋物報導熱門而提供而上服務大約有六、七十個咁誇張，
其中曾有ST.XXXG網站有一次外影人像活動參與人數達七、八十人記錄，
亦有網站組團上賭船映人像等創舉！

網站眾多但好女難求呢個市場供不應求嘅定律之下，
連帶一啲業餘靚Model價錢自然水漲船高，
一啲網站好多時服務定價進取或成本增加；
亦為求收支平衡提高參加人數希望減低成本，
而上因素結果導致參與人數唔夠而取消活動。
自己早期都好活躍參於呢類影會，
一來收費合理，
二來提供好多練習人像嘅機會，
可惜基於以上因素自己覺得收費及質素開始不合理，
當時我老Blue仲係用緊菲林機，
每次出影會成本都要二、三百蚊都幾重皮，
於是若於兩、三年開始淡出影會活動囉，
而相關網站亦相繼起呢一兩年起網海湮沒.....。

最近因好友恆仔一個電郵，
令我老Blue又再對網上影會活動關注起嚟！
於是早幾日上網揾到相關網站有影樓活動，
收費都係百零蚊，每次參於人數局限於六人，
加上依家自己轉用數碼機，
覺得價錢都算合理。
前日收通宵之後，
下晝參加咗一個影樓活動，
地方無要求，參與人數可接受大家雖然陌生但好禮讓，
Model好專業，好識擺「甫士」，
感覺唔錯！
以下係我老Blue今次影樓活動嘅習作，見笑！
人像習作S.Ling

Blueman

藍天白雲的一天

2008-04-11T13:32:00.004+08:00

2008年4月11日
戊子年三月初六
下午

〈攝影〉
我老Blue先個輪由曼谷返嚟香港之後，
香港天氣唔係大霧就有煙霞，
令到公司一眾影友想趁假期出去外影大嘆無癮。
先個幾日（4月7日）自己同工友放食飯嘅時候，
抬頭驚見藍天白雲，
於是隨手攞起部iPhone映底咗。

食完飯返到公司，有工友兼新晉影友A見狀，
就話第二日希望都係咁好天嘅話就出去映相喎！
可惜第二日香港天氣又回複灰暗嘅天色....。
夜晚返工見到工友A，
佢話今日放棄咗映相，
但係帶哂架生返公司希望第二朝收工嘅時候，
天色會好轉.....。
可惜，事與願違！

所以起香港玩攝影，
如果係外拍不論有錢人或窮等人，
天氣唔多唔少好影響自己嘅拍攝心情。
唯有訓練自己不論任何天氣下（打風落雨另計），
不斷尋找拍攝題材。
因為起香港生活，
假期變得好妗貴！
或者週不時帶備隨身便攝相機，
唔會放過任何拍攝機會。

Blueman

喪映13「激」

2008-04-07T03:02:00.005+08:00

2008年4月7日
戊子年三月初二
凌晨

〈車展〉
上次起Blog到提過，
上個禮拜我老Blue同朋友J趁有幾日大假，
走咗轉曼谷。
重點節目係有朋友H話俾我地知當地有車展，
但係朋友J跟我老Blue「實習」咗一日DSLR之後，
原來孭住袋相機四圍走並不是樂事，
再加上朋友H早我地一日去咗呢個車展，
佢話啲「蒲霉」妹質素麻麻喎，
攪到朋友J想打退堂鼓.....。
但係第二日經我老Blue一再堅持之下，
話唔嚟到嚟咗曼谷，
點都去一去先心息，
覺得無嘢映至多蝕車錢同埋入場費啫！
兩條友取得公悉之後，
懷著平常心入場......。

入到去之後會場設計及佈置並唔係想像咁差喎！
眼見好多車廠都有好多「蒲霉妹」企哂起到，
朋友J心情即時360度大轉變，
仲同我老Blue講好懷疑朋友H嘅審美眼光喎？
我話當然質素嘅嘢，
觀點與角度，各花入各眼啦！

由於我地準時入場，
入場人數並唔多，
兩條友即時「立」架生各自揾食，
好快朋友J已經唔見咗人.....。
經過一輪撕殺之後，
大約映咗兩個鐘，
自己慶幸唔怕麻煩帶埋支長炮 ZD 50~200mm SWD出動，
呢次車展自己都映咗六百幾張相咁誇張！
朋友J亦好高興今次用DSLR映車展，
效果當然比以佢往用DC仔好好多啦！

事後朋友J搭的士途中，
不斷回味緊自己用DSLR映嘅相，
話呢張好得個張好唔得，
所以數碼相機的確令好多朋友多玩咗攝影㗎！

〈佛寺〉
唔知點解今轉去曼谷完全唔係休閒，
反而有啲似開工，
應該話忙過開工就真！
可能今次多咗朋友J，
兩條中坑拎部相機週街逛，
四圍揾嘢映感覺啲時間好快過，
今次仲第三日相約去埋「大皇宮」及「臥佛寺」呢啲好耐無去過嘅旅遊境點㖭！
不過，由於部新玩具「E-3」提供高質素高ISO選擇及防手震系統，
令以往起室內低光度嘅地方拍攝困難，家陣揮灑自如，
結果短短四日我老Blue一共喪映13「激」CF嘅RAW file，
而朋友J亦超出預期映咗2「激」Jpg相咁多！
雖然每日都烈日當空，
但難得出外映相都係值得嘅！
不過朋友J經過咗呢四日之後，
大哎以後出門映相唔駛預佢喎，
因為對佢嚟講出門映相實在太辛苦啦！

值得一提嘅係全賴好友恆仔推介攝記背心Newswear Chestvest，
今轉自己映相放棄用傳統相機，
淨係著呢件Chestvest裝住一機兩鏡，
令到咁酷熱嘅氣温下拍攝十分方便。

返到香港經過連日嚟篩選之後，
今轉曼谷見得吓街坊嘅相亦已經上載到我老Blue嘅個人相簿，
有興趣嘅朋友可click入以下連結瀏覧及留言。
Bangkok 2008

Blueman

曼谷四日三夜

2008-04-04T19:59:00.007+08:00

2008年4月4日
戊子年二月廿八（清明）
夜

〈清明〉
是日清明，
自己好少可起清明正日放假，
適逢呢個禮拜放大假，
可以同屋企人正日祭祖。
以往係正日前後抽時間去，
不過，見過今日之後好似同全香港人做同一件事，
感覺閒日去的確舒服好多，
祇少唔會難為老人家頻撲....。

〈曼谷〉
我老Blue前個幾日趁有大假，
同朋友J去咗曼谷幾日玩。
原本打算休休閒閒就算，
雖不知同行朋友J話呢幾日曼谷有車展，
叫我借部「士啤」DSLR俾佢一齊去映相喎！
出發前上網睇過當地氣温會好熱，
仲要係每日氣温高達三十幾度，日日勁猛太陽曬到暈咁劑！
同行朋友並唔算係攝影發燒友，
所以叫佢到步第一日跟我出去映吓相，
順便熟習吓部DSLR點用都好，
第二日先至去車展映比較理想。
但係對佢嚟講咁熱嘅氣温之下週街映相，
的確係有點折磨.....。
朋友J跟我老Blue第一日行咗一個下晝映相，
已經有啲頂唔順，
話映完相之後雙腳好似唔係佢喎，
想放棄第二日拍攝車展咁劑！

但係自己第一日映相就幾滿意嘞！
因為我老Blue帶咗新玩具E-3去映相嘛，
效果及心情都靈舍唔同。
呢一日嘅攝影劣作已上載於個人相簿Bangkok Snap內，
有興趣嘅朋友可click入，歡迎瀏覧及留言。

究竟朋友J有無跟我老Blue去咗車展及再去其他地方映相？
待續....。

Blueman

布魯圖＋Double O

2008-03-31T00:34:00.006+08:00

2008年3月31日
戊子年二月廿四
凌晨

〈漫畫〉
最近我老Blue好奇睇咗日漫PLUTO（布魯圖）第一集，
呢本漫畫係日本漫畫大師﹣浦沢直樹嘅新作，
靈感來至好多年已故日本漫畫巨匠﹣手塚治蟲嘅作品「小飛俠﹣地上最強的機械人」。
雖然只係睇咗第一集，
但係已經覺得故事好吸引，
好耐無出現過嘅追漫畫嘅興趣。
不過依浦沢先生嘅精密編寫作風，
睇怕單行本無十零廿集都未必收到手囉！

〈動畫〉
接近播出半年嘅新高達動畫「GUNDAM OO」終於完結。
一直都聽傳聞話呢套OO只係得25集咁多，
故事睇到後半段感覺好似少眾紛爭多個全球紛爭，
睇咗咁耐天人個邊玩來玩去都係幾丁友，
開頭天人個四隻MS以無敵姿態出現，
結局大作戰形勢逆轉，
最後俾十幾隻國聯軍嘅GN-X打到變落水狗咁？
睇到最後個集（即第25話﹣殺那）半場，
幾乎「冚家鏟」咁劑，
咁「天人」班友打咁耐為乜先得㗎？
心諗監制水島精二同埋編劇黑田洋介第一次合作唔係俾啲咁嘅戲呀？
但係後半場先至到原來呢25集係Season 1，
亦都係Double O嘅序章，
咁又幾反傳統喎！
如果只係得呢25集，
我老Blue會覺對呢部Double O好失望！
但係攪咁多嘢原來係引發下一季嘅故事咁就唔同睇法囉，。
最後尾個十分鐘故事去到四年之後，
三個主角仲未知係咪死咗？
但係最後尾出現嘅始原GN-00高達同埋天人新機體就好吸引嘞！
究竟三個主角係咪就咁die咗？
抑話會破格玩中途出新主角呢？
天人係咪表面話「武力介入，根絕戰爭」呢套咁自相矛盾嘅意義為目標咁無謂呢？
還是編劇黑田先生留有一手起第二季發展呢？
點樣到好，今次Double O對我老Blue嚟講已經比Seed好破格，
起碼最基本嘅MS作戰場面，
集集都有兼且快上快落、節奏明快，
打得精彩！
希望好快會睇到新一季嘅Double O啦。

Blueman

告別回南天

2008-03-30T19:53:00.006+08:00

2008年3月30日
戊子年二月廿三
夜

〈防潮〉
踏入三月之後，香港天氣亦開始回暖，
代表又濕又熱嘅夏天好快出現！
以往呢個月份自己開始為放攝影器材嘅防潮膠箱更換傳統嘅藍色防潮珠，
由於屋企環境到咗夏天，濕氣勁重！
試過菲林時代因一季忘記更換防潮珠，
導致多枝鏡頭有發霉跡像甚為心痛.....。

好多攝影朋友今時今日都問我老Blue點解唔用電子式嘅防潮箱？
的確家陣電子防潮箱/櫃價格已經比多年前平咗唔少，
但係自己一直都未打算買，
原因並唔係價格而係尺寸先至係最大問題？
尺寸大屋企又未必放得落，
尺寸細器材又未必裝得哂？
所以容量先至係選擇防潮箱最緊要嘅條件。

其實我老Blue入咗套E-3新機及新鏡之後，
攝影器材亦累積唔少數目，
計下計下咁多年積落都有三機九鏡，
亦係時候由防潮膠箱轉用電子式防潮箱好好保護不易得來嘅攝影器材，
一來安心防潮，二來存取都比較方便。
就係咁呢個月不斷上網及走訪多個商鋪了解多種電子防潮箱嘅分別。
最後前幾日終於睇中咗一款台灣出品嘅電子防潮箱，
價格及容量及質量都合乎自己要求，
二話不說自攜拎咗返屋企嘞！

今日天氣平均24c，濕度達88%，
回南天終於來了。
但係run-in咗兩日嘅電子防潮箱就維持濕度50%極佳狀態，
以後唔駛擔心大量器材受潮再次發生唔記得更換防潮珠引致發霉嘅煩惱囉！！

Blueman

二十年後的暴力-Rambo

2008-03-25T19:53:00.005+08:00

2008年3月25日
戊子年二月十八
夜

〈電影〉
由去年有消息話史泰龍會再拍“Rambo”，
起初以為講笑，龍哥話哂成六十歲人，
咁大年紀唔係仲要揸刀揸槍揾食呀？

今日終於睇到史泰龍親自操刀嘅第一滴血第四集，
正名唔再叫乜鬼First Blood，
跟Rocky一樣叫番主角名-「JOHN RAMBO」，
距離上一集足足有成廿年咁耐！
早幾日有工友阿達睇咗話套戲好血腥好暴力，
一面冷峻嘅面容略帶冷血嘅語氣推介俾我老Blue睇呢套戲，
跟住仲自言自語咁話好耐無落廣華街睇氣槍......。

套戲個半鐘頭，
睇完之後，感覺非常暴力，血肉橫飛，
效果有啲似港產江湖漫畫，
但係唔知點解自己一路睇一路好興奮喎，
都好懷疑自己係咪變態？
成套戲無乜劇情可言，
大概係講Rambo救人同埋殺人，
唔知係咪好耐無睇過呢類「Rambo」式動作片，
史泰龍式少說話多殺人，
以動作片嚟講好過癮，
或者之前太多動作片為咗豐富劇情，
加入太多政治、懸疑、科技元素，
睇番Rambo好有一種簡單直接嘅港產式動作劇情，
一氣呵成講求「打」嘅簡單元素。
不過，好老實講如果唔係史泰龍掛住Rambo呢個名，
第二個拍完全係爛片一套，
但係史泰龍拍番，見佢成六十歲人起個山跑來跑去，
好多場面親身落場比起好多動作片用鏡頭借位嚟得實在。
可能由First Blood第一集1982年到依家第四集Rambo 2008，
有成26年咁耐歷史，
好多好似我老Blue呢亭中年男人，
求學時期都係睇史泰龍長大，
Rocky及Rambo好多經典場面入哂腦，
最記得自己中四個陣，
正值上映咗First Blood 2，
有個同學成日扮Rambo，
有意無意起同學面前苦埋口面戙高隻腳綁鞋帶；
有啲同學就鐘意條「幼」頸扮Rambo纜個玉繞都實一實等等模枋動作。
有啲同學由膠尺轉用鐵尺，成日塊面懶陰沉咁拿住把12寸鐵尺當「虎牙刀」扮Rambo，
起學校張木台到起勢咁𠝹等等不尋常嘅連鎖反應.....。
因為呢啲情意結，
家陣睇番第四集都好應該由史泰龍有生之年將佢寫個完結篇！

套戲最正居然係ending拍番第一集opening嘅情境，
完全同第一集有首尾呼應，
效果好正。
睇到呢到知道覺得Rambo應該係最後一集,
亦都係Rambo粉絲集體回憶嘅終結.....。

Blueman

幻想中的第三部DSLR

2008-03-24T16:13:00.004+08:00

2008年3月24日
戊子年二月十七
中午

〈相機〉
雖然我老Blue買咗部E-3，
亦好滿意呢部機器嘅表現。
不過，自己不竟係入世凡人一個，
凡人係有好多慾念....。

自己統計過原來平均三年會有買相機嘅意慾，
噚日好奇怪咁諗三年後會買乜嘢DSLR呢？
上網見到有人講Leica（下稱L記）可能下一部R系將會加入4/3陣營？
於是好奇咁起Google打咗Leica R10呢個字眼。
結果，出咗好多有關R10嘅搜尋結果！！

有會咁啱原來早兩日德國傳媒（德國報章Welt及雜誌German Fotomagazin）有報導L記嘅業績，
講L記上年度財政年度業續有驚人嘅71%增長，
營業收入達1億4500萬美元，
我老Blue真係估唔到呢間相機老鋪到今時今日德國營商環境（工人福利勁好）仲有賺錢能力？
咁同時諗相機龍頭C記及N記咪賺得仲緊要？
唔怪得C記可以擲咁大舊錢出嚟賣廣告啦！！
不過，同時間諗起P記俾Hoya食咗、M記又俾S記食咗....。
商場如戰場又一證明！

L記呢間老鋪除咗報盈喜之外，
亦同時會開發三部新機（呢個係未經證實嘅消息），
呢兩日外界估計係M9、R10及幾乎俾人遺忘咗嘅CL系，
由於資料有限，外界估計L記應該會起主場今年8月嘅Photokina公佈有關細節。
我老Blue作為業餘攝影發燒友，
梗係希望有更多更新相機面世啦！
今次出呢個L記新機消息，
又可以俾大家玩「估燈謎」無奬有遊戲嘞！
照牌面計L記唔會反高潮三部新機玩返菲林咁「超現實」啩？
M9估計順理成章將現有M8 fine tune或加大像數就算，
堅持大玩手動M鏡，唔會有乜嘢驚喜俾大家？
R10外界話會係一部純數碼化嘅AF DSLR喎，
即係話唔會好似R8、R9咁騎牆加個數碼背就當係DSLR。
如果係咁就奇乸怪嘞？
以L記無出開AF DSLR嘅經驗，
出部R系咁專業級數嘅機種係AF DSLR就有啲不可思議.....，
除非如傳聞佢呢部R10係4/3 DSLR啦！
好有機會係L記揾O記合作出一部話係「自己」嘅機身，
外型走R9原有風格，但係個「膽」好有可能係O記E-3嘅改版，
情況同其下嘅DIGILUX 3一樣。
緊住再揾Kodak做sensor（Kodak一直係L記sensor供應商），
然後用自己label揾樂聲合作出AF鏡，
大出變種大光圈定焦AF鏡搶錢，
好似樂聲枝LEICA D SUMMILUX 25MM f1.4 ASPH.已經係一個好例子，
聽聞呢枝日系奶鏡日本好賣到客戶訂貨先至有咁誇張！
祇少香港未見過有行貨啦。
如果真係嘅出得成嘅話，
相信呢部真係4/3最強嘅機種囉！（但唔代表係當時世上最強嘅DSLR機種。）
以L記開發嘅速度，
兩年左右可以問世，
點解會咁快？因為佢淨係出資金，
現有技術好多起人度，
一年左右個價應該可以回落，
因為實在太貴，逼住降價情況同M8一樣後期玩現金回贈（香港區），
但都係成為少眾玩具，
咁就係我老Blue出機嘅時候（又起度發夢）......。

至於另外一部CL系嘅數碼機，
功能就唔估嘞！
但應該會係世上最貴嘅DC仔囉，
如果真係咁點解唔揀O記部E-420配餅鏡呢？

自己對L記總有啲「情意結」，
可能乜牌子SLR都玩過，
唯獨L記未敢品嘗......。

Blueman

雙「吉」出海

2008-03-23T23:40:00.004+08:00

2008年3月23日
戊子年二月十六
夜

〈模型〉
自安頓好部新電腦及新相機之後，
今日我老Blue終於玩番模型，
上月一口氣開咗兩盒MG模型-元祖吉姆及陸戰型吉姆。
陸戰型吉姆已經買咗好耐，
至於個盒元祖吉姆其實想買好耐，
直至上個月途經旺角卒之見到，即入！
上個月隻陸戰吉姆已經素組完成，
只待上灰程序，
另外新砌隻元祖吉姆就砌咗一半，
無計啦！呢隻元祖吉姆話哂1999年產品，
呢類早年MG特點組件簡單，
但夾口勁多！
磨夾口磨到咁上下就要抖抖....。
希望聽日可以完成埋佢啦！

不過，自己實在買咗太多未砌嘅模型囉！！

Blueman

談攝影產品目錄

2008-03-21T16:44:00.006+08:00

2008年3月21日
戊子年二月十四
中午

〈目錄〉
今日我老Blue話題延續講相機，
無計，新玩具效應仲未降温嘛！哈哈！！
不過，講嘅並唔係相機、鏡頭喎，
而係有關攝影產品嘅目錄印刷品。

事緣由E-3推出到降價入手都好幾個月，
直至噚日途經旺角相機鋪先至見到O記份E-3目錄派發，
連電視廣告及香港多個巴士站都見到E-3廣告，
時至今day先有目錄派街，
有點不可思疑？

點解我老Blue對產品有咁大反應呢？
查實我呢亭老牌攝影玩家有鋪睇相機catalogue癮，
想當年菲林時代，電腦及網絡無咁普及，
想知有關新產品無話好似家下話上網即時閱覧咁方便，
好多時想知道有關新相機資料都係得兩個途經，
一係就定期睇本地老牌攝影雜誌官方鱔稿，
一係走專登走上代理攞有關目錄，參考其規格作比較。
個陣自己年少嘅時候多做跑腿嘅工作，
對攝影好有興趣無奈初出茅蘆（即係連申請信用卡都無資格個隻），
買一部相機往往要考慮好耐兼蓄好耐錢先至成事。
由於呢個原因經常上行或相機展收集有關目錄啦！
到依家雖然各大相機都已有其完善網站提供其下產品資料及目錄download，
但係感覺同報紙一樣，
呢亭嘢硬係揸上手先至有「味道」.....。

至於目錄「味道」方面，唔同品牌連目錄方面編排都好唔同，
以我老Blue「品嚐」過大大少少嘅目錄，
以下係自己少少對各大品牌目錄嘅個人評價（排名以字母定序）：
CANON，目錄風格偏向絃麗，參考圖片選材中庸，資料中規中距。
CONTAX，目錄紙材優質，風格予人有高級感，參考圖片選材表達力強，資料比較簡單。
MINOLTA（SONY DSLR 品牌前身），目錄風格相對比較簡單，吸引度一般，參考圖片少，資料一般。
HASSELBLAD，目錄風格偏向工業味，字少圖少，編排呆板，但參考圖片貴精不貴多，極之吸引。
LEICA，目錄成本最高，往往介紹一部相機嘅目錄好似本書咁，紙質、印刷及編排上乘之選，參考圖片及資料為同類最好。
MAMIYA，目錄質素同類最差，有關資料少得可憐，有時連參考圖片欠奉，失敗！
NIKON，目錄風格比較務實單調，圖片精彩，資料齊全（機身物料或軟件介紹）。
OLYMPUS，有時日版同港版風格及印刷度偏差都幾大，日版編排水準頗高，參考圖片吸引，資料齊備；相反港版略遜。
PENTAX，目錄情況亦同O記一樣，日版同港版水準差異度頗大，以日版計水準中上，資料足夠；港版不堪入目。
ROLLEI，老牌德系相機，目錄風格承襲德國產業工業味，參考圖片少，但資料規格齊全。
SONY，接手Minolta DSLR業務後，目錄風格同前身分別極大，感覺有強烈S記家電宣傳風格，參考圖片、資料性不足，有待改善。

至於今次呢份遲來的E-3目錄，
雖然唔知道有無分港版或日版，
但係封面設計俾我覺得簡潔有力，
編排及圖片內容充實及上乘，
質素比之前進步不少。一讚！

Blueman

花展、戰衣

2008-03-19T21:42:00.005+08:00

2008年3月19日
戊子年二月十二
夜

〈花展〉
呢幾日我老Blue無寫blog，
原因都係為咗玩新玩具（E-3）。
前兩日17日自己同幾個朋友約咗去維園睇花展，
同上年比較呢日雖然係閒日，
但係感覺都好墟冚吓，
唔似去咗花展似去咗花市多啲.....。
入咗場之後由於好多好多人，
好快就同啲朋友失散咗，
各自做自己嘢啦！
唔知係咪人多關係，
攪到無乜mood去映咁，
兜咗個圈大約行咗兩粒鐘左右，
映咗要映嘅就散band囉！

今次花展以奧運為主題，
擺設咗好多同奧運有關嘅擺設。
除此以外我老Blue亦留意到擠擁嘅人群當中，
今年揸DSLR入場亦比去年多咗好多，
當中不乏女性用家，
論攝影裝備一啲都唔輸蝕一眾男性用家，
手持DSLR加長鏡（小小白、小黑）或微距鏡，
落哂腳架相當認真吓！
同時有唔少耆英團，
其中亦見到有位阿婆揸部DC映花㖭。
唔怪得咁多相機廠呢一年都力攻女性用家市場，
男性市場的確有點飽和，
反而DSLR起女性用戶好似新興市場一樣，
潛力無限！！

是次花展已收錄於個人嘅相簿
香港花卉展覧2008
歡迎各位朋友到訪瀏覧及留言。

〈戰衣〉
雖然手上新入嘅DSLR 「E-3」係我老Blue第二部嘅DSLR，
但係體型屬DSLR Pro機「哂士」，
加上新入嘅兩枝鏡，
出街一機三鏡份量一點都唔輕鬆。
最弊嘅係原有嘅相機袋配合唔到，
攪到要買個新嘅相機單邊斜孭背包（Lowepro SlingShot 300 AW）就佢，
揀呢個斜孭背包原因係眾多背包之中，
唯一佢可以放哂需要嘅器材兼且機動性強、換機換鏡快捷！
先個幾日及花展都係用呢個新背包出去映相，
唔知係太耐無用過咁重嘅器材出街，還是年紀大？
孭住呢個背包好唔慣咁，
有啲辛苦嘅感覺㖭！
呢幾次我老Blue出去玩呢部新機，
同行好友恆仔都一齊，
佢見狀就好自豪咁推介佢身上用緊嘅「攝記背心」NewsWear-Chestvest俾我老Blue嘞！
跟住自己見呢位老友盛意拳拳，
於是將自己啲「架生」擺上去試著上身，
咦？真係無介紹錯喎！
一機三鏡放咗入背心前面個四個袋到，
感覺啲重力四邊卸開去咁，
唔再好似背包咁集中一個卸力點聚住咁吃力,
機動性更勝背包，
前掛或後掛都好方便！
於是去完花展之後，
噚晚忍唔住入咗恆仔介紹呢隻Chestvest。
至於呢個新嘅背包有種得物無所用，
唯有揾買家轉讓，
無謂擺起屋企咁浪費......。

Blueman

完美組合-一機三鏡

2008-03-14T01:27:00.006+08:00

2008年3月14日
戊子年二月初七
凌晨

〈相機〉
我老Blue自三月頭入手咗部E-3之後，
經過過幾禮拜嘅測試及操練後，
感覺自己考慮咗咁耐決定揀E-3係無錯嘅！
每個相機品牌都有佢優點及缺點，
而毎部相機亦都有佢獨特嘅操控及其「個性」，
無話天下無敵，
反而最大嘅敵人就係自己，
個人心得一部幾勁嘅相機，
自己唔去用心摸熟佢嘅「個性」，
又點可以將部相機發揮得最好呢？

自己未買呢部E-3之前，
亦都上網了解呢部嘅優點及缺點，
所以入咗之後自覺好快上手。
拍攝之後嘅成像比想像還要理想！
家陣成套架生一機三鏡：
Olympus E-3
ZD 12-60mm F2.8~4 ED SWD
ZD 50-200mm F2.8~3.5 ED SWD
ZD 50mm F2.0 ED Marco
（附圖可Click入觀看原大尺寸，中間人像相鳴謝好友恆仔測試鏡頭作品）
已經係我最滿意及最常用嘅相機組合，
而鏡頭焦段完全網羅風景、人像及微距題材，
相信有排唔駛諗為添置器材而煩惱囉！
加上配合Lightroom呢個Camera RAW Developer軟件，
理論上可將拍攝後嘅成像發揮得最好，
希望嚟緊嘅日子我老Blue可以善用手頭上呢sets組合映多啲相同大家分享啦！！

Blueman

流感肆虐

2008-03-08T22:00:00.004+08:00

2008年3月8日
戊子年二月初一
夜

〈流感〉
呢個幾禮拜我老Blue飽受流感纏身，
日子絕不好過。
自己先後睇咗兩次門診，
啲醫生都係好行貨咁開咗啲抗生素、咳藥水之類俾我食，
但係食咗兩劑都無見好轉，
相反比之前咳得仲要厲害，
心諗呢隻感冒菌真係惡毒！
起公司寫字樓已經好多工友相繼瀨嘢，
返工唔係你咳就係我咳，
環境極之不妙。

再係咁咳法都唔係辦法喎？
於是自己轉睇中醫，
揾番之前睇開個位相熟醫師問個究竟？
呢位中醫師話我惹咗近年變種嘅感冒菌，
仲話呢隻菌好鬼古惑，
當你以為好返啲嘅時候，
其實呢種菌潛服起呼吸管道，
當天氣一轉又走返出嚟咁衰格。
醫師同我講，話家陣呢隻菌已經影響咗我氣管三分一運作咁嚴重，
唔怪得自己咳到有氣無定透咁啦，
有時嚴重到講嘢及吞口水都好辛苦！

佢同我開劑中藥反其道而行，
飲完之後仲要我咳多啲咁話，
目的要將啲病毒引返出嚟喎！
半信半疑....。
但係飲咗佢兩劑中藥之後，
今日開始覺得見效，
氣管無之前咁窒住咁，
雖然仲有幾聲咳，
但係已經無之前咳得咁誇張，
希望呢兩日飲多佢兩劑藥，
嚟近呢幾日完全清底啦！！

Blueman

手袋𥚃的戰爭Olympus E-420

2008-03-06T02:17:00.005+08:00

2008年3月6日
戊子年正月廿九
凌晨

〈相機〉
我老Blue原本打算今晚早啲訓教，
點不知好友恆仔來電叫我上dpreview，
話O記出新機喎？
咁快！？上網見到O記出咗部E-410嘅後繼機E-420，
更號稱世上最細嘅DSLR，
睇資料呢部E-420真係好Q細呀，
淨重量只不過380g，
如果老外嘅身形我諗真係放得入裇衫袋喎？
今次O記出部咁細嘅DSLR，
目標好明顯係針對女性市場，
我老Blue無讀過乜乜市場調查，
但係好多時落相機鋪都開始發覺越嚟越多女性開始玩DSLR，
我觀察到部機越細個「芒」越大，
就越受女性歡迎。
初期最受女性注目嘅機種會係P記嘅DSLR，
及後O記出咗部E410後，
的確起相機鋪吸引到女性嘅眼球注意。
今次O記起部E-420加入LiveView功能，
相信會為O記起女性用家市場提高唔少市場囉！
不過，唯一缺點未加入最新I.S.防手震系統，
可能留返俾E-510後繼機啩？
但家陣N記及C記新機都配備防手震入門Kit鏡，
會唔會起市場競爭方面有啲蝕章呢？

另外，O記同時發佈咗一枝O記粉絲渴望咗好耐嘅4/3標準鏡同期發賣，
呢枝標準鏡為Zuiko Digital 25 mm 1:2.8 Pancake，
真係估佢唔到標準鏡玩「餅鏡」喎，
呢鋪真係吸引我嘅眼球囉，
呢枝「餅鏡」有幾重呢？
睇完嚇我一跳，只係得95克咁輕！！

講咗咁耐以上呢壇嘢做咩價呢？
據報E-420齍機定價5舊水美金。
之於期待嘅「餅鏡」則定價二百美金左右啦！
話四月中發售喎！！

Blueman

低位撈貨的E-3

2008-03-02T21:40:00.005+08:00

2008年3月2日
戊子年正月廿五
夜

〈相機〉
買玩具或模型唔多唔少好似買股票一樣，
要等時機，切忌高追。
不過今次呢個時機一等就等咗三年....。
今日我老Blue終於入咗等咗三年嘅O記旗艦機 E-3！！
自己由買E-300個陣覺得O記呢個品牌幾啱自己嘅要求之後，
呢兩、三年一直都留意E-3嘅最新消息，
其間亦有兩次「轉會」嘅內心掙扎。
包括E-3出機時間一拖再拖；
及E-3出後又出現一籮籮小問題，
心諗等咗咁耐，
唔係真係要放棄呀？
最後，等派貨、等firmware出update、等到噚日出優惠價，
比預期嘅目標價仲要底，
亦比初出平咗二、三千銀出機，
唔買實在對唔住自己囉
兼且有種「低位撈貨」嘅快感！

入手之後，
第一件事當然係update最新嘅firmware1.1，
fix咗之前好多用家出現嘅小問題；
跟住連隨枝新鏡12-60mm對serial＃睇吓係咪出事個批「問題鏡」？
好彩機、鏡順利無問題，
拿拿林入咗粒半滿嘅電池，
急急走出去試機，
無理會到個本厚達154頁嘅說明書。
其時已經接近黃昏五、六點，
係一個理想嘅時間。
點解？因為可以一試渴望咗好耐嘅「夜間無腳快感」防手震拍攝！
結果同傳聞一樣，
IS(Image Stabilization)系統的確好強，
如圖（可Click入看原大）一幅夜景快門低至1/2秒手持，
映完之後有一種感動.......，
心諗以後唔駛下下拎腳架出街映相囉！

財散人安樂，
如期今年第一季順利更新咗部電腦同埋套相機，
相信跟住落嚟要努力揾錢至得囉！！

Blueman

戒口

2008-02-29T02:07:00.003+08:00

2008年2月29日
戊子年正月廿三
凌晨

〈健康〉
常言道：健康就係財富。
我老Blue以為先個幾日感冒好返哂，
就好安心出街玩。
誰不知噚日啲感冒又突襲我老Blue，
攪到今日頭暈暈咁開工。
仲要兼且喉嚨發炎個隻，
食乜都無哂胃口不得旨，
最愛嘅薯片、朱古力、吉列豬扒一律免問......。
聽啲「有經驗」嘅工友講喉嚨發炎可大可小，
輕則要三、五、七日，
重則有工友試過成個月先至好返喎！！
唔好嚇我，
家陣年紀唔細自覺抵抗力真係無「後生」個陣咁易復原囉！
感覺啲「財富」越嚟越唔見駛。

Blueman

初嘗「數位黑房」

2008-02-25T03:22:00.007+08:00

＊＊呢張係正本＊＊

＊＊呢張係經Lightroom修改＊＊

2008年2月25日
戊子年正月十九
凌晨

〈電腦〉
我老Blue兩年幾前買落嘅「藍芽無線鍵盤」因換咗部新iMac，
再度「醒覺」又再活躍起嚟啦！
原因之前用Mac OS-X 10.4個陣，
呢個爛芽keyboard時得時唔得，
攪到自己要用返最最最傳統嘅IBM大掣keyboard。
家陣轉咗10.5.2希望呢個好駛好打嘅無線keyboard穩穩定定就好囉！！

〈軟件〉
呢幾日除咗好忙碌咁重新整理過啲檔案及icon外，
亦好努力咁睇緊早幾日提過嘅Photoshop Lightroom參考書，
睇咗一半之後對呢個軟件認識好多，
感覺正如blog友占兄所講：Lightroom我也有用，簡直強得過份!
玩咗咁耐DSLR終於有一個軟件可以完全將RAW檔演譯得淋漓盡致，
初步跟書去玩幾張相已經覺得比用PS「執相」更加得心應手，
感覺用PS只可做Photo Editing，
執RAW developing一定要留返俾LR攪至得！
用咗幾日之後我老Blue返到公司馬上推介俾有攝影嘅工友知呢個軟件，
經過一輪介紹後，
大家對呢個軟件十分好奇，
希望借呢個機會大家可以分享一下攝影「後製」嘅樂趣！
以上兩張分別為original RAW>Jpeg及經LR>Jpeg嘅效果，
透過LR好輕易咁改變人像嘅膚色而不失細節（可點選圖片click入原大作比較），
不過，現階段都仲係好初步咁試呢個極之強大嘅軟件，
以後仲要向占兄多多學習至得囉！

另外，如果有興趣玩LR嘅朋友，
個人覺得部腦最理想Ram有2GB咁多就會行得好輰順。

Blueman

檔案補完計畫２

2008-02-20T03:15:00.004+08:00

2008年2月20日
戊子年正月十四
凌晨

〈名人〉
傍晚時分，睇新聞知道藝人肥姐己經去咗，
感覺香港有份量嘅藝人越來越少....。

〈檔案〉
我老Blue換咗部新iMac，
由於威力比以往個部Mac Mini強得多，
感覺好多嘢以前起Mini行唔到嘅軟件，
家陣部iMac勝任有餘！！
亦都因為咁首要任務係未有新檔案之前，
務必重新整理以往嘅舊檔案，
以免死埋硬碟就無仇報囉！
但係點樣維護檔案亦各師各法，
問咗好多朋友及網友，
大家不若而同都話家陣硬碟好燒DVD做Back up又好，
都因為市下電腦產品質素無乜保障，
壽命一般三幾年就拜拜。
綜合咁多用家想完全保護其下「珍貴資料」，
唯一係用雙重Back up，
整理好所有相片檔案嘅中繼資料後，
除咗儲存於外置HD外，
亦同時揾隻好啲嘅DVD-R燒埋做備份，
雖然係花工夫啲，
但係對日後資料搜尋及檔案維護都值得！！

不過，我老Blue計過單係DSLR嘅RAW檔都有成七十幾GB，
要全部做哂以上嘅整理，
睇怕都要用一頭半個月先至攪掂！

天啊！我的高達模型幾時再有時間玩呢？？？

Blueman

檔案補完計畫

2008-02-17T01:17:00.004+08:00

2008年2月17日
戊子年正月十一
凌晨

〈小病〉
話咁快到咗二月中旬，
但係家陣香港地天文台仲出緊“寒冷天氣警告”，
我老Blue好唔彩「領」嘢，一個唔小心冷親，
攞咗一日病假，
食咗藥訓咗大半日，
稍為見好，開機寫blog！

〈檔案〉
用咗部新iMac幾日，
初步覺得部機規格好理想，
做嘢唔再好似以前咁就住就住，
唯一最唔慣係個超薄keyboard，
打字要好細力就住就住，
無咁爽。
由於部機效能比以往強咗唔少，
家陣推好多新軟件都好夠力。
呢兩日走去腦場update吓有乜新軟件嘅參考書，
主要都係睇番最新嘅CS3 Photoshop及Lightroom個類嘅參考書。
起腦場睇咗一輪，
前後每個軟件都揀咗一本，
其中最值得提嘅一本由Gotop碁峯出版叫「Lightroom流光顯影」嘅參考書，
呢本書嘅作者Martin Evening係英國當值專業師，
佢亦有份參與呢個Lightroom開發計劃其中一名顧問攝影師，
同其他攝影師一樣，
提供咗好多身為專業師有關攝影工作流程嘅意見。
呢本參考書由於作者以專業師嘅流程及角度去講解點樣去運用呢個Lightroom軟體，
其中對呢個軟體嘅評語係：不合理嘅簡單！

雖然呢本參考書嘅作者係老外，
Gotop出版社將譯成中文版本，
但係內容編排算係深入淺出，
精確扼要咁講咗使用呢個軟件嘅要點。
我老Blue睇咗頭一、兩個章節，
作者Martin好強調要為自己其下嘅檔案做備份及metadata（中繼資料），
原因係家陣做攝影好玩攝影也好，
圖片檔案數量隨著電腦及相機發展速度提昇而相應高速增長，
數量少嘅圖片檔案以電腦基本嘅樹狀管理還可以，
但日後過百上千張圖片出出入入或做搜尋、編輯一張圖片，
咁就唔易「抄」到出嚟！
睇完呢個章節，
我老Blue有感而發，
因為先個排都係File越嚟多，
先至加多個HD放檔案，
但係有時想起個千張圖片揾番某啲相的確唔係易事喎！
所以佢提倡用Lightroom之類嘅軟件，
將每當有新嘅圖片檔案匯入𠴱陣，
最好親新鮮輸入有關圖片嘅資料，
呢個就係佢所講嘅metadata（中繼資料），
情況好比自己用iTunes由CD轉MP3/4一樣，
事前入哂相關嘅資料，
以後揾歌、聽歌都易攪好多！

認同咗作者Martin嘅講法，
自己都開始重新執吓HD入面嘅圖庫囉，
執完之後最可靠睇怕要DVD燒起佢做Back-up！
唔駛一旦死HD，
乜鬼嘢心血毁於一旦，
不過，DVD碟都有分靚同唔靚？
依家仲上網睇緊有邊隻DVD碟最適合做back-up碟！

Blueman

鋼版iMac新體驗

2008-02-15T02:41:00.004+08:00

2008年2月15日
戊子年正月十五
凌晨

〈電腦〉
我老Blue用咗部新iMac 24"兩日，
新屎坑梗係例牌沉迷啦，
之前開咗個兩盒新MG模型都已經放埋一二邊囉......。

呢兩日用對部新iMac嘅規格好滿意，
由於跟機已經預裝咗最新嘅OS-X 10.5 Leopard，
相對上一個版本10.4的確有唔少改變，
例如finder嘅操作簡直係iTunes介面嘅翻版，
好玩又易用！
但係10.4有些少command就轉咗，
改為用跟機嘅「薄版」keyboard上面嘅key buttons，
呢「塊」keyboard無錯同部iMac一體成形，
外觀無疑一絕，
不過我老Blue用慣超大型大大粒掣嘅舊式keyboard，
對於「扁踢踢」手感就有啲距離，
初用嘅時候由於啲掣太淺成日用唔慣度力，
其實呢隻keyboard用好少力已經好到位。
另外唔知點解10.5入面嘅倉頡輸入法，
提示功能同上一個版本有少許唔同，
我諗以上兩點要花啲時間適應囉！
仲有隨機送嘅Front Row搖控器雖然功能簡單，
但係配上24"畫面聽歌及睇相都好方便，
而且聽歌方面輸出比Mac Mini有力好多。

至於新加功能Spaces桌面擴展功能值得一讚，
當開咗好多程式或檔案嘅時候，
Spaces為用戶提供四個desktop，
用戶可以好自由咁分配空間，
用熱點或切換鍵轉換空間好駛好用！

講完系統及硬件後，跟住要提吓軟件，
尤於對上個部宣佈退役嘅Mac Mini及仍然服役嘅PowerBook G4，
計落自己都用咗三至四年，
一直用開嗰啲軟件查實因為規格問題已經好耐無用新嘅版本，
諗住會有好多software要重新裝過而懊惱之際，
發覺自己其實用來用去不外乎三幾個軟件最常用，
兼且跟機嘅iLife08其實好好用，
只不過係裝番個Photoshop及最新玩Raw workflow嘅Lightroom咁大把！
講開iLife08上網先知道原來香港及好多亞洲區份已經支援經iPhoto08印製攝影集，
簡直天大嘅喜訊，
呢樣嘢我老Blue渴望咗好耐，
希望將自己嘅MG劣作映埋之後做本私人珍藏嘅相集，
check過價錢都算合理，
計埋郵費一本A4左右嘅Size嘅相集大約三百零蚊。
不過幾時整就後話啦！

暫時玩咗部iMac咁耐，
總結用好玩、暢順形容，
唔錯！

Blueman

超速快感

2008-02-13T21:30:00.005+08:00

2008年2月13日
戊子年正月初七
夜

〈電腦〉
過年前我老Blue都有提過屋企部Mac Mini已經昏迷咗，
自己quote過價之後亦無再打算延續「佢」嘅生命囉.....。
呢幾日終於上網落咗order入咗部「鋼版」iMac 24"，
今朝有速遞送到屋企門口，
於是好快脆咁set-up部機，
跟住拿拿林落旺電買Ram嘞！
因為有朋友家陣啲Ram好鬼平，
建議如果係玩相嘅話最好打盡佢咁喎！
的確見腦場啲Ram真係平得好過份，
自己買咗兩條2GB Ram埋單都唔駛七舊水。
返到屋企小心奕奕咁拆咗條Ram蓋，
裝咗4GB Ram落去。

跟住最期待嘅事嚟啦，
就開Photoshop及Lightroom試吓佢Intel 2.4G Core 2 Duo+4Gb ram有幾快先？
開咗幾張Raw玩咗之後，
開張15MB嘅Raw File幾乎直出無delay咁濟，
好玩到停唔到手，
速度實在比想像中更理想，
當然啦！上一部Mac Mini及PowerBook仲行緊G4，
速度及規格都差成條街。

仲有想講嘅係個OS-X 10.5 Leopard比起上代10.4真係好玩好多！
視覺及功能有好多改進嘅地方，
個人覺得係Mac友值得up-grade嘅System！！

Blueman

壽屋格納庫第四彈

2008-02-08T01:48:00.000+08:00

2008年2月8日
戊子年正月初二
凌晨

〈模型〉
估唔到踏入戊子年，
大年初一我老Blue開工居然仲忙過平時，離譜！！

不過，並唔係無好消息嘅！
就好似啱啱先上網見到「壽屋」繼早前宣佈其下M.S.G.格納庫5月推出第三彈007~008後，
跟住就話出第四彈009~010，
睇完之後自己無後悔上年「止蝕」繼續落手落攪埋個MS倉庫咋，
因為睇到壽屋出到009~010實在太正啦！
尤其個隻機械臂，太感動.......。

預期自己計埋過年前買咗004~006四盒，
都入咗十幾盒咁，
如果加埋嚟緊008~010，
砌埋都幾大陣扙吓，超正！！
但係壽屋咁出法，
唔淨之出格納庫，
砌下砌下隨時攪到成個堡壘都得喎！！

Blueman

戊子新春

2008-02-07T12:18:00.000+08:00

2008年2月7日
戊子年正月初一
中午

〈春節〉
今日乃戊子年正月初一，
亦都係送豬迎鼠第一日，
我老Blue起度同咁多位朋友拜年。
同大家講聲恭喜發財！！！
心想事成，
萬事如意，
身體健康，
波馬亨通，
股壇得意，
一本萬利！！！

Blueman

辦年貨﹣壽屋格納庫第2彈

2008-02-06T15:11:00.000+08:00

2008年2月6日
丁亥年十二月三十
下午

〈模型〉
時日年三十，可惜我老Blue仍然要開工，
仲要係返夜班.....。

今日中午除咗慣性上網睇下個股市外，
亦睇到TD（玩具日報）有網友講「壽屋」格納庫第二彈004~006見街，
的確係豬年最後一日嘅好消息！
有睇我個blog都知呢part嘢我等咗好耐囉，
跟住打電話問有關商鋪有無貨？答曰：有現貨！
於是趁今日返夜，計過仲有時間，
即刻飛落去紅磡「其脆」辦年貨啦。
好好彩仲有好多貨上架，
拿拿淋「蠟」咗四盒俾錢。
點解我老Blue咁心急呢sets第二彈呢？
因為呢sets第二彈可以同對上第一彈左右合併，
形成一個倉庫情景，
對於拍攝模型情景有莫大幫助！！
不過，呢啲都係我老Blue拍攝高達模型嘅第一步......。

Blueman

我看PMA2008

2008-02-05T21:21:00.000+08:00

2008年2月5日
丁亥年十二月廿九
夜

〈相機〉
PMA2008已經早兩日完滿結束，
相信好多攝影愛好者及相機發燒友亦都從多方面嘅渠道知道詳情。

我老Blue睇完DPreview嘅介紹之後，
覺得今次PMA眾多廠家好似留力咁，
中、高檔DSLR機種欠奉，
相反DC仔就好豐富，
難聽啲𠴱句阿豬阿狗都隊部出嚟咁濟？
以新DSLR嚟講，就淨喺得N記D60、P記K20D & K200D、
C記EOS 450D及S記一口氣推出兩部入門級A300 & A350等等。
唯一令人有驚喜嘅係S記第四家（註：第一家為Contax嘅 N-Digital)宣佈加入Full Frame俱樂部，
擺咗部A900嘅pototype出嚟曬吓咁！
呢個消息的確令到好多網友重申關注S家，
至於會唔會因為推Full Frame而令到一部分玩家轉會，
咁就後話啦！

不過，正因為S記本身做開Sensor，
已經有其優勢發展DSLR，
加上夥拍名宿Zeiss做戰略性夥伴，
牌面上的確有機會打破N記及C記壟斷DSLR市場局面。
呢鋪S記話玩二千幾萬Full Frame，
又令到玩家對Full Frame需要性呢個話題再到爭議！

我老Blue自言係上一代菲林玩家開始玩攝影，
個陣時一樣有啲咁嘅話題，
不過係135機及120機嘅分別？
對我嚟講各有各好，
好似以前玩135底咁，一筒菲林可以玩到36張，
如果玩120底大約一卷可以玩10~15張，視乎相機片幅而定？
玩中底的確有點燒銀紙嘅感覺㗎！
家陣雖然科技發達，
數碼相機已經落戶好多家庭係平常不過。
但係一講追科技就好睇個人財力囉，
一部大Sensor超高像素嘅Pro機如哈記H系，
入門祇少十多萬，仲未計鏡頭等等，
俾你有幸玩到呢機，
都未必係好事？
因為如果咁上下規格嘅DSLR，
檔案可以大到好誇，閒閒地可以爆成六、七十MB一張RAW，
試問有幾多朋友屋企有Mac Pro呢類專業電腦好輕鬆咁開大File呢？
講咗咁耐其實我老Blue想講家陣玩DSLR係同部腦有莫大關係，
一部好嘅DSLR係要配一台相等速度嘅電腦，
先至發揮出應有水準。

點解我老Blue原本講開PMA，
又會無啦啦講電腦呢？
因為.......自己部Mac Mini放棄生存權利，
真係捱唔到年關！
家陣用緊部老爺PowerBook打Blog咋，
過咗年之後，睇怕都要出手囉............。

Blueman

老Mac温暖，iPhone解困

2008-02-03T21:32:00.000+08:00

2008年2月3日
丁亥年十二月廿七
夜

〈電腦〉
踏入08年第二個月頭，
我老Blue就遇到最唔想嘅事......死機！
話說今朝收完通宵，
拿拿淋趕返屋企download最新一集Gundam OO，
由於近排OO劇情進入高潮，
所以睇得特別肉緊，
正當睇到一半之際部Mac Mini突然hang咗！！
跟住抆哂所以電源重申插過，
又「著」番喎！
跟住如常咁睇番套OO，
點知睇完之後，上上吓網又死過！

既然最唔想嘅事都發生咗囉，
由於今日係禮拜，
唯有聽日先至拎部Mini去整啦！
希望死機原因係壞火牛....，
查實睇返記錄，
原來呢部Mini都用咗成兩年半有多囉，
捱到今時今日都算係咁。

不過，過幾日就係農曆新年，
睇怕拎咗去整都無咁快返？
好彩我老Blue仲有一部比Mini仲要舊嘅機器﹣PowerBook G4版keep住，
先個輪有朋友叫我出讓，
我話留返做「士啤機」，
估唔到今日有用兵之日。

另外值得一提嘅係以往所做嘅防禦措施，
總於發揮作用，
一直以來自己每月定期有關資料做備份，
同埋所有資料都係save哂入外置HD，
今次死咗部Mini，
但係轉返用部老爺PB，
只要將部腦駁番哂外置HD，
即時用番哂啲資料。
不過，起過渡嘅時候出現咗小問題，
就係對上一次save上網bookmark嘅時候，
唔小心删除咗最新個，
反而留底2005年𠴱個.......弊！

跟住正當update番個iTunes嘅時候，
先至諗起可以用部iPhone將現有記錄過番落部舊PB到，
估唔到部iPhone仲有呢用途，好正！！

不過，今次死機經驗令我覺得原來無咗部腦用，
會覺得生活影響幾大，
例如無得寫Blog啦，
撞啱今日股市無開，如果唔係都麻煩，
另外依家乜費物費都要上網check，
及所以一切資訊好似斷絕哂，
包括至愛嘅高達動畫及近期乜乜「臘腸」「鮑魚」相等等.....。

但係用番部PB覺得真係勁慢，
連iPhone過歌都好慢，因為佢仲係行緊USB 1.0..........。
睇相還可以，執相就好抆邊啦。
仲有呢部PB個G4 CPU好熱吓，
但係近日得過7、8度，
反而一路用覺得雙手好暖吓.........。

Blueman

PMA 2008 前奏2

2008-01-30T01:40:00.000+08:00

2008年1月30日
丁亥年十二月廿三
夜

〈天氣〉
呢幾日香港持續寒冷，氣温持續十一、二度。
但係相比起國內華南地區嘅近五十年罕見嘅雪災，
從新聞見到廣州車站因雪災而有家歸不得嘅民工，
心情絕不好過.....。
感覺自己確實太幸運。

〈相機〉
仲有一日PMA就快揭幕，
今日我老Blue上Dpreview見到N記終於出手嘞！
一口氣推出一機三鏡，
分別係入門級D40後繼機﹣D60，
特點係像素打到一千萬像及加入除塵系統。
另外推出三枝新鏡，
分別係AF-S DX Nikkor 16-85mm f/3.5-5.6G ED VR、
AF-S Micro Nikkor 60mm f/2.8G ED、
PC-E Nikkor 24mm f/3.5D ED移軸鏡。
其中60mm Micro及24mm移軸鏡更用上N記引而自豪嘅Nano Crystal Coat（納米晶體塗層）技術，
凡係用上Nano身價非凡，
單係呢枝新移軸鏡24mm定價1642歐羅......。
仲有係呢枝係第一枝N記PC-E系移軸鏡，
跟住話會出埋45mm及90mm喎！！

講完N記，跟住講吓我老Blue比較關心嘅O記嘞，
到今日為止仲未見O記有乜新嘢出噃？
不過，就公佈咗有關E-3及E-510firmware update，
睇番網友講有關update解決咗好多之前有E-3用家出現嘅小問題，
如直度電池手柄認唔電等等，
另外提到除咗bug-fix之外，
更起firmware到加入非4/3鏡，
可自行輸入焦距資料，達至防手震功能，
咁神奇？係有真係好喜訊！！
呢個firmware令我對E-3嘅入貨指數大大提高，
等我解決咗部老爺電腦問題，
E-3入手嘅機會希望今年第一季達成啦！！

Blueman