婚宴．賓客

2007年12月17日
丁亥年十一月初八
夜

〈婚宴〉
噚日（12月16日），
公司有同事「公主」于歸之喜，
嫁得好人家，公司同事紛紛興賀。
其實我老Blue起公司咁多年，
有關嘅飲宴不下十幾廿次，
不過，今次去飲俾我感覺開始有啲轉變。
點解咁講呢？
事關以往公司有飲宴，好多同事或朋友除咗慶賀當事人外，
餘慶不離隊酒及賭博之類表面好似好應該嘅活動。
但係今次去飲好罕有地開席前好少有打牌，
入席以往有同事唔理主人家講話，你有你講我有我玩十三張，
有啲唔尊重主人家，
仲覺得好應該咁.....。

今次唔同囉！
居然無同事或工友入席後，
再無人玩十三張之類嘅玩意，
反而好多朋友帶咗相機賀慶，
連一直以打牌為首項興趣嘅工友﹣阿良亦「轉型」玩相機，
攪到入席之後，一邊食一邊映相相當有氣氛！
而我老Blue雖然無帶相機入場，
但係都用咗部iPhone映咗唔少相，
仲即時俾工友分享瀏覧，
娛己娛人一樂也！

Blueman