三月回憶

2009年4月10日
己丑年三月十五
凌晨

〈三月〉
整整一個月我老Blue無再寫過blog囉，
唔係因為無乜嘢寫，
而係自己忙到唔得閒寫，
不論或公或私都係.....。
以為金融海嘯，
公司起勢咁cut人手，
但係呢個月感覺工作仲忙咗！？
終於趁今晚有時間寫下呢個三月份自己點樣無事忙？

〈關西〉
自總結三月PMA之後幾日，
我老Blue同幾位工友去咗日本關西玩咗幾日，
其實關西自己今次係第二次去，
今次目的主要映相，
上次大約八、九年前仲用緊菲林機，
加上當時天氣欠佳，
成日就住就住，個次老實講映得唔夠痛快！！
今次隨著科技進步，
可以即晚起酒店上網睇天氣決定攝影目的地外，
更重要係今次用咗DSLR，
成功率比起上次有天淵之別，
呢次大大話映咗接近20GB相，
自己都有啲驚.....。

〈花展〉
去完關西之後幾日，
相都未執完又同班映友相約到維園映花展，
呢個係我地亦係香港地眾多映友嘅「例行公事」，
所以有網友笑稱：維園花展＝大型相機展？
今年花展首日已經比去年仲多人入場，
無他嘅真係多咗好多朋友玩攝影嘛！
今次我同朋友都成十個咁多一齊參與，
你帶一個玩攝影，佢又帶一個，
你話唔多人玩就假囉！！
再加上首日大家其實映得唔係咁暢快，
原因係除咗映友、嘗花人之外，
更加上有一大班小學生圍圈玩「寫生」，
成班映友睇到O哂咀！！
結果，各自各擇日「重賽」，
吹漲！！

〈新人〉
除咗工作呢排多咗啲同事學新岡位外，
起攝影上我地圍內亦多咗好多新映友加入，
有核心成員好熱心用網絡形式攪咗非公開私募「映會」，
志在交流下攝影上嘅心得外，
亦有聯誼作用。
我老Blue亦參與其中，
仲唔怕醜幫手起咗個Logo，
都幾過癮下！！
至於多咗幾位新成員，
希望佢地對攝影嘅熱誠可以保持耐啲啦！
始終攝影唔係遊戲機，
唔係求過版了事，
而係對自己及技術嘅長期磨練。

〈包場〉
咪以為我老Blue同班映友映完花展，
呢個三月嘅攝影就咁結束喎，
映咗咁多相淨係執都有X排執啦！！
結果混埋自己幾晚起屋企猛咁揀相、執相，
重複又重複對住個「芒」仲慘過返工咁。
好啦到咗月中終於清哂手頭上嘅「舊相」，
又有老友摟映女嘞，去囉！！
今次映女又玩包場，
因為之前都講過包場不論溝通或自由度都大過「單頭跟隊」嘛！！
呢次映女又俾我撞番好多年玩菲林嘅師兄，
有師兄坐陣梗係唔放過跟佢學嘢啦！！
於是一路學set燈一路映，
有同行映友第一次玩映燈光人像，
大呼過癮，好希望快啲再攪喎！！
睇怕嚟緊呢個四月又唔得閒....。

〈裝著〉
呢個三月除咗映相外，
起攝影裝備上我老Blue亦添置咗少少新嘢，
就係終於的起心肝買咗支O記嘅平價版Ultra-wide鏡09-18mm，
呢枝又輕又實用嘅廣⻆鏡，
不論玩風景、街頭snap甚至乎近攝模型同樣咁有用！！
另外，跟咗我十幾年嘅Gitzo零號合金腳亦係時候退役，
經朋友及網友介紹Trade-in咗支Slik嘅零號Size嘅Pro 614CF碳纖腳，
用嚟去旅行或旁身都好方便。
隨著氣温續漸回暖，
又唔想出街映相帶咁多裝備上身，
最近買咗個相機腰帶及「槍袋」用，
前日同班工友去咗海洋公園玩，
首日試用效果顯著，
一機兩鏡夠哂機動！！
家陣自己出門配搭如下：
一機一鏡-Billingham相機側孭袋，
一機兩鏡-ThinkTankPhoto相機腰帶加槍袋，
一機三鏡配腳架-Newswear相機背心，
全裝備-ThinkTankPhoto背囊。
經個呢個月反覆測試後，
以後出門再唔駛煩帶啲乜嘢出街嘞，So good！！

〈動畫〉
最後值得一提嘅係追咗接近成年嘅Gundam OO終於上個月完結，
好滿意個結局，
兼且咁多套非UC系嘅Gundam片種，
我老Blue最滿意呢套，
完全突破以往舊有UC影子外，
更加入好多新嘅元素，
尤其去到最後決戰，
感覺好玩嘢，
「大奸角」最後用「鐳射大砲」對撼主角機OO，
跟住「鐳射大砲」玩雙面人，
另一面居然係新型高達，
最後同OO打到兩敗俱傷不得至，
最後決戰大玩GN-01 Exia鬥元祖GN-0 Gundam（RX-78-2？），
仲要係最元始嘅隻抽，
簡直有首尾呼應嘅感覺，
真係睇到O哂咀？？
佢鹵味ending交待哂嘅人物去向後，
以為就咁完啦，
突然last幾秒話俾人知2010年有劇場版，
唔係咁激下，
咁快就信心出劇場版？
我老Blue真係好想快啲睇下劇場版玩啲乜嘢囉！！

一口氣寫咗咁多嘢，
老實講對手有啲攰.....　^_^!

Blueman

23L的温暖

2008年11月20日
戊子年十月廿三
夜

〈洗澡〉
踏入十一月天氣近日先至開始轉涼，
「地球先生」病得好嚴重下.....。

天氣轉涼，呢兩日一早一晚温差好大下，
加上我老Blue居住市區工作郊區，
一日温度上落可以有成六、七度咁大！
以往一早起身有沖涼嘅習慣，
因為沖完涼有種頭腦清醒，
成個人都精神啲嘅感覺！！
不過，每逢入冬呢種習慣就變成苦事，
無他嘅！因為我老Blue屋企行緊電熱水爐，
由於呢款舊式熱水爐，
蓄熱水需時兼且容量細，
每逢冬天沖熱水涼嘅時候，
只可維持嘅時間相對比夏天快得多好多.....。
每每朝早沖涼正當個人開始清醒嘅時候就係熱水將快用完之時，
就好細個個陣睇「鹹蛋超人」打打下出紅燈一樣，
要儘快埋尾......。

但係以上惡夢般的經歷，
今日已經終於改變，
因為今年年中嘅時候用咗成十年嘅可惡終於退役，
由我發版決定入貨，
於是揀咗個大容量有成23L嘅德國牌子嘅電熱水爐，
呢排天氣凍咗即刻可以考驗呢個新爐嘅能耐！
果然不付所託，呢兩日沖熱水涼沖完都仲有熱水剩，掂！！
完全解決咗我老Blue多年要返早嘅噩夢，
希望遲啲天氣再凍啲呢個新熱水爐都頂得住啦.....。

Blueman

重組生活

2008年7月29日
戊子年六月廿七
夜

〈生活〉
唔知點解我老Blue生活𥚃頭一年總有一排比較混亂。
總要係一次個湧埋嚟個隻，
教人措手不及嘅感覺，
好似呢個星期咁，
就有好多瑣碎事要面對及解決....。

〈工作〉
由於配合公司新制度，
公司好多舊人工作需要重新分配，
我老Blue都唔例外，
重新分配到一個新嘅工作崗位及工種，
雖然自己並唔係抗拒新事物及新環境，
不過，由以往有成十多年嘅工種，
一下子要重新適應，
咪話無難度，
唯有努力邊做邊學，
希望儘早適應啦！！

〈電腦〉
唔知點解用緊部「鋼版」iMac，
早幾日發神經，個OS-X好唔穩定，
有啲功能突然失靈！
連帶自己最常用嘅執相程式都用唔到，
好唔妥個隻，
由於原因不明兼且手頭上仲有一堆相等住處理，
決定把心一橫，
重裝過OS-X算吧！！
好奇怪經過重裝之後，
發覺係手頭上嘅Logitech mouse程式唔夾個新OS-X版本，
用番原裝keyborad及mouse反而無哂事？
唔係咁化學呀！？
仲有跟機一直無用過嘅原裝嘅keyborad、mouse原來都幾好用，
因為呢啲硬件有好多按紐有好多實用嘅功能鍵。

除咗keyboard及mouse外，
由於呢次重裝OS之後，
有部份軟件亦一併更新，
發現一直用緊嘅iTunes，
原來新update可以同我老Blue經常用開嘅G-mail作同步，
每次同iPhone同步亦可以一次過同G-mail入面嘅通訊錄作同步，
咁就非常咁方便囉！！

〈家具〉
除咗上述所講嘅小煩腦外，
同時間屋企個電熱水爐「同步」壞埋，
真係吹漲！！
唯有急急腳落去買個新爐，
不過要一、兩日等水電師父嚟裝爐先至用得！
好彩呢排香港天氣勁酷熱，
氣温仲熱過泰國曼谷！
上yahoo睇到日日都有三十幾度咁濟。
原來沖凍水涼都幾過癮....！

Blueman

牛一

2008年7月11日
戊子年六月初九
下午

〈生日〉
噚日係小弟牛一，
好高興可以再同一班好朋友食餐便飯。
不經不覺我老Blue已經步入中年，
到呢一刻生活尚算滿足，
暫時仍以「財政自由」為人生目標，
路是漫長，仍要繼續走！

Blueman

陳年硬盤

2008年5月11日
戊子年四月初七（母親節）
夜

是日母親節，
慶幸今日我老Blue返早，
趕及回家同家母食飯。

〈硬盤〉
噚日我老Blue放假，
無無聊聊咁起櫃底「抄」到兩個好舊好舊嘅Hard Disk，
好奇咁揾個舊HD case裝番上去睇吓入面有仲有啲乜嘢啦？
一個已經清空咗，
但係另外一個60GB嘅HD，
原來存放咗我老Blue好耐好耐之前早年scan落嘅舊相底檔案，
除咗有我早年嘅攝影劣作外，
仲有一啲朋友嘅舊相，
睇返真係諗番起當年嘅唔少趣事，
的確幾有趣！
呢啲咁珍貴嘅記錄，
當然第一時間抄返落去個新HD，
等待燒DVD作備份。

巧合嘅係當中有啲朋友，
噚晚出嚟食飯聚舊亦有出席，
我老Blue除咗攝影保持咗十幾年不厭外，
呢班朋友亦十幾年都無變，
人生樂事也！！

Blueman

三週年＋人像習作

2008年5月5日
戊子年四月初一（立夏）
凌晨

〈三年〉
今日我老Blue睇返部腦個記事曆，
先記得原來前日（5月3日）係自己寫Blog三週年紀念日。
估唔到自己寫Blog呢個習慣不經不覺維持咗咁耐，
有點不可思議......。
Anyway，雖然自己寫咗好多垃圾文章，
但係都好感謝咁多年一直咁撐場嘅好友﹣恆仔及blog友﹣P Cheung兄、火鳥兄、大雄及占兄，
及其他新Blog友，
容許我老套啲講聲：多謝咁多位支持！！

〈習作〉
前兩日我老Blue又走咗去參與啲影樓閃燈人像活動，
今次參與嘅Model﹣Ceres，
同之前映𠴱幾個Model氣質好唔同，
好重少女味，加上神態舉止完全散發著青春氣息。
其實經過呢幾次影樓活動，
接觸過唔少影友，
當然清一色係男性，年紀由後生仔至中坑都有，
由於過程每場時間僅僅個零鐘，
基本上一入場就要各自揾位「做嘢」，
唔會攪乜嘢自我介紹，
完全香港即食文化﹣即乜嘢都趕頭命。
基本好多影友都係斯文人，
同場嘅時候除咗映相之外，
亦會交流一下攝影心得或者講下「相機經」咁，
不過，當中有次就最深印象.....
個次大家都係本住同一個目的入場，
幾個人同埋model迫埋一個幾廿呎嘅影樓入面，
淨係聽到「察」、「察」嘅連環不絕機械式快門聲，
連續十幾廿分之後，
先至聽到Model問：我換第二套衫好唔好呀？
跟住dead air咗幾秒先至有人開聲：「好呀！」，
而開聲個就係小弟我，
因為實在頂唔順咁死寂嘅氣氛......！
發覺乜原來家陣影人像係咁樣㗎？
唔知以為幾個陌生人一齊同緊個「人形木偶」映product shot㖭？
簡直大開眼界！！
不過，我老Blue抱著趁熱鬧嘅心態去玩，
等玩多幾次嘅時候，
覺得技巧成熟就包場就另一回事啦！
是次習作人像習作﹣Ceres已收錄於在下網上相簿，
歡迎抽空瀏覧及留言。

Blueman

戒口

2008年2月29日
戊子年正月廿三
凌晨

〈健康〉
常言道：健康就係財富。
我老Blue以為先個幾日感冒好返哂，
就好安心出街玩。
誰不知噚日啲感冒又突襲我老Blue，
攪到今日頭暈暈咁開工。
仲要兼且喉嚨發炎個隻，
食乜都無哂胃口不得旨，
最愛嘅薯片、朱古力、吉列豬扒一律免問......。
聽啲「有經驗」嘅工友講喉嚨發炎可大可小，
輕則要三、五、七日，
重則有工友試過成個月先至好返喎！！
唔好嚇我，
家陣年紀唔細自覺抵抗力真係無「後生」個陣咁易復原囉！
感覺啲「財富」越嚟越唔見駛。

Blueman

檔案補完計畫

2008年2月17日
戊子年正月十一
凌晨

〈小病〉
話咁快到咗二月中旬，
但係家陣香港地天文台仲出緊“寒冷天氣警告”，
我老Blue好唔彩「領」嘢，一個唔小心冷親，
攞咗一日病假，
食咗藥訓咗大半日，
稍為見好，開機寫blog！

〈檔案〉
用咗部新iMac幾日，
初步覺得部機規格好理想，
做嘢唔再好似以前咁就住就住，
唯一最唔慣係個超薄keyboard，
打字要好細力就住就住，
無咁爽。
由於部機效能比以往強咗唔少，
家陣推好多新軟件都好夠力。
呢兩日走去腦場update吓有乜新軟件嘅參考書，
主要都係睇番最新嘅CS3 Photoshop及Lightroom個類嘅參考書。
起腦場睇咗一輪，
前後每個軟件都揀咗一本，
其中最值得提嘅一本由Gotop碁峯出版叫「Lightroom流光顯影」嘅參考書，
呢本書嘅作者Martin Evening係英國當值專業師，
佢亦有份參與呢個Lightroom開發計劃其中一名顧問攝影師，
同其他攝影師一樣，
提供咗好多身為專業師有關攝影工作流程嘅意見。
呢本參考書由於作者以專業師嘅流程及角度去講解點樣去運用呢個Lightroom軟體，
其中對呢個軟體嘅評語係：不合理嘅簡單！

雖然呢本參考書嘅作者係老外，
Gotop出版社將譯成中文版本，
但係內容編排算係深入淺出，
精確扼要咁講咗使用呢個軟件嘅要點。
我老Blue睇咗頭一、兩個章節，
作者Martin好強調要為自己其下嘅檔案做備份及metadata（中繼資料），
原因係家陣做攝影好玩攝影也好，
圖片檔案數量隨著電腦及相機發展速度提昇而相應高速增長，
數量少嘅圖片檔案以電腦基本嘅樹狀管理還可以，
但日後過百上千張圖片出出入入或做搜尋、編輯一張圖片，
咁就唔易「抄」到出嚟！
睇完呢個章節，
我老Blue有感而發，
因為先個排都係File越嚟多，
先至加多個HD放檔案，
但係有時想起個千張圖片揾番某啲相的確唔係易事喎！
所以佢提倡用Lightroom之類嘅軟件，
將每當有新嘅圖片檔案匯入𠴱陣，
最好親新鮮輸入有關圖片嘅資料，
呢個就係佢所講嘅metadata（中繼資料），
情況好比自己用iTunes由CD轉MP3/4一樣，
事前入哂相關嘅資料，
以後揾歌、聽歌都易攪好多！

認同咗作者Martin嘅講法，
自己都開始重新執吓HD入面嘅圖庫囉，
執完之後最可靠睇怕要DVD燒起佢做Back-up！
唔駛一旦死HD，
乜鬼嘢心血毁於一旦，
不過，DVD碟都有分靚同唔靚？
依家仲上網睇緊有邊隻DVD碟最適合做back-up碟！

Blueman

電腦二合一

2008年1月6日
丁亥年十一月廿八（小寒）
凌晨

〈計畫〉
踏入08年第一個月份，
雖然我老Blue都提過自己去年定下嘅目標只係完成咗一半，
但係呢幾日都為自己出咗個好簡單嘅08計畫。
就係去年成日掛起口邊要upgrade兩樣嘢-電腦同埋相機，
另外一樣當然係投資啦，
好多財經評論都話今年股市將有好大波動，
自己不竟係散戶新丁，
自然策略上要比去年嚟得謹慎，
堅持「止蝕不止賺」為首要規條！

〈電腦〉
正當自己都諗住夠錢嘅話，
電腦應該會揀最新嘅「鋼之iMac」。
不過，呢兩日上老地方冰果室（著名中文Mac機資訊網站），
有「江湖傳聞」話嚟緊今個月14日嘅San Francisco MacWorld會有新嘢出，
其中吹得最「恆」嘅會係Mac會出部超薄新Notebook，
本來唔覺得一回事，
但係有外國網站傳到話呢部超薄Notebook，
會配搭一個叫做「Integrated Monitor and Docking Station」，
睇幻想模擬圖見到會係將成部Notebook「兜」嘢打側插入一個近似「iMac」嘅物體入面，
而呢個近似「iMac」只不過係一個有埋「芒」嘅Station，
但係當部Notebook插咗入去後，
佢就變身成為一部「iMac」！！！

我老Blue睇完之後，
覺得個「哎啲呀」好正！
完全附合我貪心嘅要求，
出街又可以係輕身嘅Notebook，
起屋企又可以係有大「芒」嘅desktop，
真係一舉兩得！
不過，呢啲都「江湖傳聞」，
信不信由你？
期待14號嘅MacWorld！！

Blueman

大除夕﹣回顧07展望08

2007年12月31日
丁亥年十一月廿二
夜

〈個人〉
真係話咁快一年，
睇番07年自己起Blog度寫嘅垃圾文章，
從中定下嘅07計劃，
只有一半實現....，
展望08我老Blue已經唔再定下乜嘢大計囉！

〈理財〉
可喜嘅係07年定下嘅理財目標，
幸運地順利達標，
可能定嘅目標唔高啦！
不過，睇呢幾日財經專欄提到來年股市將會繼續波動，
睇怕08年唔易做到，
一句講哂揾錢真係唔易㗎！！

〈模型〉
我最喜愛嘅高達模型，
今年預算一個月完成二盒，
呢個目標完全粉碎，
今年只係砌咗三幾副罷了，失敗！！
呢兩日自己仲趁靚價入咗副期待已久嘅MG Unicorn Gundam及EX Albion（高達0083主⻆艦﹣阿拉巴漢），
好不幸入貨指數已經累積咗到63盒，
但係完成嘅只得十幾盒.....。
自己都覺得好恐佈吓！
希望08年可以抽多時間出嚟砌多啲啦。

〈相機〉
起呢個月終於見到期望咗好耐嘅O記旗艦機﹣E-3上架，
不過，好快俾好多有錢嘅香港人掃哂貨。
但係我老Blue一直跟進有關E-3嘅新機文章，
唔知係新機問題定抑或有關QC問題，
久唔久見到有e-3用家話電池手柄認唔到電，
跟住又話「走焦」、Sensor有塵除唔到呢啲小問題？
攪到我原本熾熱嘅購買欲跌咗唔少.......。
睇怕無番兩三個月fix bug，
都唔會貿貿然入貨，
如果E-3嘅Bug情況無改善的話，
唔排除轉過去N記囉！！

〈攝影〉
今年我老Blue真係映少咗好多相，
無他工作關係，
有時間都留返喺屋企休息好過，
不過隨著公司不斷有新同事加入，
估計08年加班情況無今年咁惡劣啩？
應該可以出去映多啲相嘅！！
另一樣值得高興嘅事係公司呢一年多咗唔少工友買咗DSLR，
相對玩攝影嘅朋友多咗，
實屬好事！

〈影音〉
另一件今年我老Blue覺得高興嘅事係屋企套Hi-Fi（膽機仔組合），
upgrade咗（換咗CD Desk、喇叭線及訊號線）之後當堂唔同哂！
家陣起屋企聽歌非常之咁enjoy。
不過，自己就因為咁樣買多咗好多CD囉........！
至於今年自己最鐘意嘅電影，
緊係Transformer（變形金剛）啦，超正！

〈動漫〉
原本有所期待嘅動畫﹣Gundam OO，
故事發展到而家感覺一般，
可能講到啲高達太強，無哂對手咁，
失去咗平衡咁，希望唔好爛尾收場。
但係年尾又俾我老Blue驚喜嘅係見到Macross25年新作-Macross Frontier，
呢套全新科幻大作由機設大師-河森正治親自操刀，
睇過第一集，氣勢及劇力迫人，
可跟進！

〈手電〉
亳無疑問，今年自己最高興嘅玩具一定係iPhone，
呢部手機雖然入手係水貨，
但係佢「內置」嘅中文化已經滿足到我老Blue對手機嘅要求，
加上有好多有心人上載咗唔少實用嘅軟件，
令呢部iPhone大大超出其本身價值！

Blueman

婚宴．賓客

2007年12月17日
丁亥年十一月初八
夜

〈婚宴〉
噚日（12月16日），
公司有同事「公主」于歸之喜，
嫁得好人家，公司同事紛紛興賀。
其實我老Blue起公司咁多年，
有關嘅飲宴不下十幾廿次，
不過，今次去飲俾我感覺開始有啲轉變。
點解咁講呢？
事關以往公司有飲宴，好多同事或朋友除咗慶賀當事人外，
餘慶不離隊酒及賭博之類表面好似好應該嘅活動。
但係今次去飲好罕有地開席前好少有打牌，
入席以往有同事唔理主人家講話，你有你講我有我玩十三張，
有啲唔尊重主人家，
仲覺得好應該咁.....。

今次唔同囉！
居然無同事或工友入席後，
再無人玩十三張之類嘅玩意，
反而好多朋友帶咗相機賀慶，
連一直以打牌為首項興趣嘅工友﹣阿良亦「轉型」玩相機，
攪到入席之後，一邊食一邊映相相當有氣氛！
而我老Blue雖然無帶相機入場，
但係都用咗部iPhone映咗唔少相，
仲即時俾工友分享瀏覧，
娛己娛人一樂也！

Blueman

入場、離場

2007年11月9日
丁亥年九月三十
夜

〈同事〉
各位見到今日個標題唔好誤會我老Blue又起到講股市噃！
其實係想起度講吓公司同事咁。
呢幾日起公司最大嘅新聞莫過於有關有新同事及舊工友，
先講新同事，隨著工作中嘅部門規模日益擴大，
不斷有新同事加入，
呢個星期仲一口氣嚟咗十個新同事，
分別揾咗幾個「老兵」帶呢批「新兵」，
好「不幸」我老Blue係其中一個.....。
正如剛才咁講，部門擴大因為工作量多咗，
所以先至請咁多新人，
希望他日完成訓練，上到戰場能夠保存性命已經好夠，
祝大家好運！！

另外，有新兵加入，亦有老兵退役。
一位我老Blue識咗差唔多有十年嘅工友，
突然遞信辭職，
令到好多識佢好多年嘅工友及同事都好諤然！
雖然身為老友，
我老Blue當日都有「訪問」下佢有乜打算？
呢位老友大略講咗佢嘅原因後，
作為朋友無反對亦無贊同，
之係尊重佢嘅決定，
有時做朋友唔需要知得太清楚或者作出意見、批評，
只能夠希望佢今後發展如意，更勝從前！

今日部門大老細講公司營業額破記錄，
請員工食蛋榚賀一賀咁話，
最後，大家見到盒蛋榚有點發呆，
因為每一件蛋榚只有姆指咁大咋.............。

Blueman

股市．煲劇

2007年10月25日
丁亥年九月十五
凌晨

〈股市〉
呢一年我老Blue定下嘅投資目標，
憑著8月17日嘅升市，
到先個幾日終於達標。
眼見當下股市火熱，週遭好多朋友亦對股市有入市衝動.....。
連講開電腦嘅雜誌都有提睇股工具云云，
有見及此，自己亦開始進行減持行動，
鎖定利潤只留下三成資金運作罷了，
風險及壓力相對之下大大減低！

〈影視〉
隨著手上投資減持，
唔駛再花咁多時間日日留意住個市之後，
不過近排我老Blue亦唔得閒得去邊喎！
原因係除咗新一輯高達動畫「Double OO」上映外，
先個輪人氣美劇「Heroes」亦開始咗Season 2，
作為Heroes粉絲梗係唔會錯過啦！
加上無記半夜推番一套國內劇集﹣「走向共和」，
睇下睇下又覺得幾好睇咁喎，弊！！
結果呢排除咗返工之外，
煲劇成為咗我老Blue熱門節目囉！！

Blueman

綠色惡夢來臨

2007年8月3日
丁亥年六月廿一
下午

〈稅務〉
前晚，我老Blue收工返屋企，
赫然發現檯面擺咗自己最唔想見嘅綠信封起面前.....。
稅務局可以講話香港政府最高效率嘅部門，
前後個幾月，報完稅無耐咁快就出信俾人，如果其他部門都好似稅局咁，
咁就係香港市民之福囉！
經過今年稅制有「限度」調整之後，
計埋所謂「下年度預繳」，
今年我老Blue仍要交一個月入息嘅三成幾俾政府。
幅度上並未構成壓力，仲有半年時間準備，
萬幸！
不過，公司有啲工友上年度都幾搏命O.T.，
睇怕今個年度要有準備迎接呢個「綠色惡夢」囉！！

Blueman

07年第二個長假

2007年7月8日
丁亥年五月廿四
夜

〈個人〉
我老Blue今日開始連續七日，
展開今年第二個長假。
暫時無打算出外旅行，
只作留港休息。

〈模型〉
既然放大假，天氣又熱，
自己當然留起屋企噴模型。
模型繼續係個隻MG-ZZ Gundam，
講起呢隻嘢真係有啲勞氣，
由於講過呢隻ZZ屬於早期MG，
好多組件素組之後，
唔可以好似2000年打後個啲MG咁容易分件上色，
預計今日上完主色之後，
會有好多部件要用人手上色囉！！

除咗砌模型之外，
呢排亦有留意我最期待嘅「壽屋」出嘅「MSG格納庫」，
可惜大貨仲未到港....。
不過，先個排「笨大」出嘅R3系列行貨大冧價，
仲要係3.5算計，我老Blue見到個價眼到突X埋！！
唔知係咪呢個R3系列太老餅，
唔係咁得玩家歡心，
所以太劈價賤賣啩？
不過，希望唔會影響到呢個系列就咁玩完啦？
因為我老Blue都期待佢出「聖戰士﹣翼覇」！
但係另外「笨大」繼R3後，
最新機械人模型系列﹣「裝甲騎兵」，
聽講銷情幾理想咁喎。
自己對呢個系列興趣就麻麻地嘞，
等佢出多幾款先至決定入唔入！

Blueman

十年

2007年7月1日
丁亥年五月十七
凌晨

〈個人〉
話咁快香港回歸祖國十年。
同十年前一樣，噚日一樣咁大雨，
我老Blue返工個陣雖然擔住把遮，
但係一樣由頭濕到落腳.......。

呢十年香港經歷咗好多事，
雖然生活無乜大變動，
但係有兩樣嘢開始重視，
第一係健康、第二係理財。
我老Blue已經唔係十八、廿二，
體力同十年前比較梗係無咁fit啦，
十年前開工或者去玩十幾個鐘，
訓幾粒鐘可以再嚟過；
家陣唔呌返八、九鐘都唔夠精神囉！！
所以想有更好生活，
一切從健康開始！

第二樣關於理財，
呢十年我老Blue覺得香港經濟轉型，
但係唔轉得好咗，
真正受惠嘅老百姓唔多。
加上體會到乜嘢叫做「由窮入奢易、由奢入窮難」，
家陣香港地有幾多打工仔敢話自己份工穩陣呀。
唯有自求多福，
越早學習理財，
祇少對日後生活多一點保障！

如果我老Blue十年之後仲繼續喺到寫Blog嘅話，
希望自已再睇番，
上述呢兩樣嘢做到財政自由、無病無痛咁就最好囉！！

在此祝願香港回歸十年，
再創高峰，日日是好日！

Blueman

好友、港股

2007年6月19日
丁亥年五月初五
夜

〈個人〉
是日端午節，我老Blue慶幸今日唔駛返工，
可以起同屋企人做節！

6月16日，相識多年嘅好友兼同事K5呢日係佢老哥起呢個部門最後一日，
跟住佢會轉投另一個部門，
展開佢工作新一頁，
在此祝願佢老哥事業順境、步步高昇！

〈港股〉
如果大家有留意新聞，都知道噚日香港股市創下多項新記錄，
包括恒指、國企、紅籌、港股市值、單日總成交及窩輪交易均創新高等等！
表面風光明湄，公司無玩股票嘅工友單睇新聞以為抄股票好易發達，
並唔了解家陣股市玩緊上落市，
資金流向可以做成一隻股票做成好大波動！！
唔做吓功課，莫講話賺唔到錢，
分分鐘死咗都唔知點解？
就如今日「生果日報」港聞所講，
雖然創下好多港股記錄，
但係另一邊廂，先個排抄到㷫烚烚嘅「蠔股」、「細價股」噚日情況剛好相反，
1306隻上市港股中，
居然有689隻（53%）係下跌，
真係有升到嘅只有426隻，
如果有朋友仲揸住一堆細嘢過節的話，
希望過咗今日，佢地聽日可以收復失地唔駛坐龍舟啦！
自己就噚日朝開市，
好努力咁花一輪功夫先平穩過度，執身彩贏少少，
如果後市趨勢繼續向上，希望再溝番少少入倉。

Blueman

出出入入

2007年6月8日
丁亥年四月廿三
下午

〈模型〉
呢排我老Blue有時間除咗砌返模型外，
由於自己開咗個「迷利倉」，
又買多咗模型嘞！
不過，就要走入倉嘅時間就會頻密咗囉，
入咗啲新模型，出返啲舊模型拎返一、兩盒舊模型返屋砌。
好彩個倉離屋企唔算太遠，幾方便吖！

〈工作〉
近排公司有好多相識多年嘅同事相繼離開，
但同時亦有好多新同事加入，
呢班新同事有一個共同點，
就係年青力壯。
腐水不流，新舊交替為公司帶來一番新氣象。

〈股市〉
呢排天氣陰晴不定，
一時曬死狗，一時落水狗，出街都好唔暢快。
股市亦一樣，自年頭恆指由高位回落到今日，
長期維持上落市格局，股價個別發展，
好多朋友呢半年，經常起股海出出入入；
成績上上落落。
自己就揸咗少量貨，賬面算叫做有少少升幅，
但係對後市就無乜期望喎？

呢半年自己覺得生活各方面都好平穩吓，
都唔知好事定壞事囉？

Blueman

我是大叔？

2007年5月22日
丁亥年四月初六
深夜

〈工作〉
今日「邊荒集」話事人首次舉行「鐘樓演講」。
大概講下最近公司發展近況，
俾「荒人」們一個了解下，
唔駛估估下喎！
各人有各人環境及諗法，
但我老Blue身為「荒人」心裡早已有盤算，
一日「邊荒集」環境未過自己警戒線，
都無乜好擔心亦唔到自己話事，
現階段無乜意見！

〈模型〉
由於先個幾日，執清咗自己間柴房嘅雜物，
今日再度砌番自己喜愛嘅MG模型，
好順利咁素組咗副“MG老虎特裝型“兩手兩腳。
有種講唔出嘅樂趣！

先個幾日睇咗最新一期6月號「電擊Hobby」中文版，
今期除咗例牌推廣最新嘅MG版綠渣2.0外，
亦有篇文章叫“第12年的座談會“，
文章收錄咗四位講者對12年嚟有關MG嘅感覺，
四位講者包括：笨大營業部經理﹣川口克己、MAX Factory模型師﹣MAX渡邊、笨大企業開發組組長﹣岸山博文及「電擊Hobby」前編輯長﹣佐藤忠博等人。
除咗講解MG渣古第一代型到現今第二代嘅開發故事外，
文章最令我老Blue心刻係講者之一嘅佐藤，
站起模型業界嘅觀點講因為依家娛樂多咗，
玩模型嘅人雖然仲有，
但係新玩家明顯少咗！
而新玩家仲係新加入嘅「大叔」玩家，
唔講都唔知原來我老Blue係其中之一。
就係呢個原因，
文章內容講笨大要點樣諗計吸納新玩家，
綠渣2.0係一個開始，
點樣調低模型製作新玩家門檻，
但又可以經過簡單過程而效果美觀！
就係咁文章講到呢隻綠渣2.0笨大話用咗兩年時間開發咁誇張喎！！

睇完之後，雖然當中有滲水成份。
不過，有一點無錯係家陣玩MG的確好多我亭「大叔」們囉！！！
加油吧！各位玩MG的「大叔」，
迎接人生不完的挑戰！！！

Blueman

MG NO.100揭盅

2007年5月21日
丁亥年四月初五（小滿）
早

〈工作〉
我老Blue無寫Blog成個禮拜原因係除咗要搬哂啲模型入倉外，
更重要係放假之後，
不停咁開工........。
最近，公司有關改組變動嘅傳言言之不絕，
形勢有啲似黃易筆下嘅「邊荒傳說」入面嘅「邊荒集」咁，
孰好孰壞，見仁見智，
自己只作好最壞打算迎接改公司改動，
但梗係覺得今次可能「危中有機」咁.....（未諗到！？）

〈模型〉
模型迷萬眾期待嘅MG No.100終於今個月17日起日本第42屆靜岡模型展揭盅！
答案係WD-M01 Turn A Gundam.........。
真係令好多MG迷跌哂眼鏡，
仲要係通街都係𠴱隻！
呢個MG 100 countdown宣傳由去年尾到今個月17號，
攪咗都有半年咁多，
答案咁出人意表，真係有啲「反高潮」，
起好多本地有關嘅討論區亦惹嚟好多激烈嘅「聲音」。
故勿論呢隻Turn A MG版點解要用咁多時間鋪排，
真係等笨大遲啲起有關雜誌作解說囉！
至於我老Blue點睇呢隻Turn A？
好老實講，Turn A連動畫好耐好耐之前睇過幾集之後，
無乜興趣再追落去，
某程度係因為隻高達多撇鬚唔知想點咁？睇唔慣！！

好啦！模型鐵定100號係呢隻Turn A嘞，
咁呢鋪係咪又唔跟先？
咁我老Blue又好難講喎！
因為計造型的確唔係我杯茶，
不過，笨大為咗呢隻Turn A攪咁多嘢，
我老Blue反而好有興趣想知呢隻MG會有乜嘢咁特別「分唇」喎？
因為呢隻Turn A MG網上傳到索價八千幾日元，
係咪咁誇呀？
睇吓點......。

Blueman