MG卡碧尼

2006年7月12日
丙戌年六月十七
深夜

〈模型〉
尋日，我老Blue雖然仲係放緊假，
但係身體同意志完全分離，
本想早D起床，結果訓到晏晝四點鐘先捨得起身.....！

白白浪費左大半個下晝，
於是急急忙追番D時間，
即刻處理每日睇下金融市況及收下電郵呢D例牌野之後，
開始為隻MG卡碧尼趕工。

初頭以為呢隻卡碧尼無乜武器，
諗住一味大件就應該好易砌！
點不知原來組合過程都唔兒戲，
每一個關節及組合都幾細緻。
單係腳掌已經有成12個組件咁多！
不過，尋日已經砌左一大半，
應該今日（12號）可以假組完成。

其實自己買左咁多MG模型，
至於點樣分先後來定完成次序？
除左以本身模型製作難度外，
另一條件係出廠年期，
自從完成左8個MG之後，
發覺越早期MG同越後期MG起水準方面真係有好大距離，
尤其起夾口位、內骨架以及關節接駁位都有好大改進。
自己一路砌唔同MG好似睇緊BANDAI MG模型進化史咁，
相當有趣既經歷，
由砌MG從中亦開始學會及磨練點樣計畫一件事及用幾多時間或最好方法得到成果！

現階段自己只係由最早期既95“年既MG渣古砌到最新既01"年卡碧尼，
模型存貨仲有好多盒，
希望今年尾可以追到06"年既MG模型啦！
等我感受下最新MG去到乜野水準！

其實模型同攝影一樣，成果係一點一滴累積返來。
我老Blue覺得呢種係樂趣！

Blueman