新噴筆

2006年9月27日
丙戌年八月初六
夜

〈模型〉
踏入農曆八月，日頭日晚天氣明顯涼左。
前幾日我老Blue為隻MG-GP01噴油，
發覺「窄窄地」，點解枝筆出氣弱左咁多？
心知不妙，應該係上次用完，洗筆唔夠徹底，結果塞塞地，
最後，落左旺角買過枝新既0.3mm既國貨噴筆。
都只不過三舊水唔駛！

其實除左呢個原因之外，
上一枝0.2mm國貨噴筆其實個咀太幼，
噴一D比較大既部件好多範圍唔夠?，噴得好吃力。
用左枝新噴筆，加上口徑大左，
爽快左好多，時間上慳左唔少！
呢兩晚用左三幾個鐘已經噴哂隻GP01所有部件，
成績唔錯！
希望呢次呢枝新噴筆唔好咁快打柴啦。

有工友﹣嘉良從我相簿得知我老Blue有砌開高達模型，
而呢位工友亦都係高達粉絲，
但係呢位大佬已經無砌模型好耐，
無乜心機再砌，但係同好多朋友一樣，
都好想擺番一、兩件模型起屋企做擺設。
起公司見親我都問我老Blue幾時有時間幫佢老哥砌番隻，
就算收錢都值得喎！
聽完乜咁抬舉我呀！！
我都好想幫佢砌隻，
不過無奈砌一隻MG大大話話都花我老Blue好幾工作天。
只能勸佢自己試下砌一隻玩下先，
再唔得先至找我老Blue啦！！

＊＊註：（自己其實都仲有成十幾廿盒MG都未砌啊........。）

Blueman