8．17大時代日

2007年8月19日
丁亥年七月初七
夜

〈股市〉
相信好多香港股民好似我老Blue咁，
「有幸」經歷上個星期五香港股市嘅「大時代」日子。
開市由20761暴跌到下午開市40分鐘後最低位19386，
足足有成千二點咁離譜，
跟住又可以短短一個鐘頭之內急升返千一點，
收市報20387，
全日下跌285點，但時日波幅有成千三點，
完全係電視劇「大時代」嘅劇情，現實出現咗！
呢次美國次按加上日圓利差交易效應下，
唔知有幾多股民損手或坐艇？
我老Blue此等小股民亦唔例外，
賬面亦蒸發咗唔少！
不過，可能早前訂下嘅項目好多係中、長線發展，
未因呢次跌市而改變策略，
除非後市有比現況更差嘅消息或基本因素轉變另計。
其實個市由七月尾高位二萬三跌落現水平二萬邊，
足足有成三千點咁多，
身邊有好多朋友對後市意見不一，
有好有淡，而觀望亦佔唔少。
相信唔少朋友經歷過呢期大時代日子，
喺投資策略上面可能會有另一番體會。

Blueman