2009年序章

2009年1月10日
戊子年十二月十五
凌晨

〈投資〉
雖然踏入09年已經十日，
但係我老Blue好似Blog界蒸發咗咁無寫好多日，
又係因為無事忙個隻囉！！
2007年係我老Blue嘅「投資年」，
興幸自己有少少斬獲，
及時見好就收叫做避過一劫，
08年生活並未構成影響。
總結08年投資小注怡情，
不過都係輸多贏少......，
09年估計個市唔會好得去邊，
都係少做少錯，唔做唔錯策略比較好啲！

〈攝影〉
繼07年係投資年之後，
2008年可以講話係我老Blue嘅「攝影年」，
玩咗咁耐攝影十幾年，
從未試過好似呢一年咁活躍，
除咗將07年投資嘅成果用嚟買攝影器材之外，
08年係我咁多攝影以嚟，
映相最多嘅一年。
不單之咁，呢一年亦係自己最多朋友加入攝影呢個活動嘅一年，
大大話都有十幾個朋友玩DSLR，
其間更不時約埋出去映相，
非常咁熱鬧！！
估計呢股攝影風氣會起09年延續落去。
之於攝影器材已經起08年買夠啦，
幾乎連唔應該買嘅都買埋嘞.....！
最大代價莫過於枝「豬嫂」二號腳，
若然真係要再上就會上中片幅數碼，
慶幸自己並未有勇氣及財力上呢一步，哈哈！！

〈模型〉
隨著金融海嘯之下，
經濟及就業轉差，
對於打工仔嚟講凍薪、裁員或放無薪假已經唔再係乜嘢新聞？
相反係其中一瓣幾時輪到自己咁解！
估計嚟緊一年工作量隨著外圍影響，
會清閒好多，
自己起到諗只要仲有份工就無有怕！
預計呢一年空閒嘅時間會比去年多的話，
手頭上嘅高達模型應該會可以繼續砌落去囉！
下個月MG模型連GM「吉姆」都出埋Ver 2.0，
自己手頭上連初版1.0都未攪好，真失敗！！
希望今年除咗有時間之餘，
仲可以騰到時間出嚟砌模型及映模型啦！！

Blueman

MS倉庫施工進度（二）

2008年10月28日
戊子年九月三十
夜

〈假期〉
今個禮拜我老Blue放大假，
不過無諗住出門喎。
家陣咁嘅時勢，留返個錢旁身好啲！
雖然放假留返起香港，
但係唔等於我老Blue會得閒。
難得有七日假期，
老早諗定砌模型同埋映相嘞，
可惜....呢兩個計畫遇到挫折。

〈模型〉
講咗好耐嘅MS倉庫，
我老Blue親呢幾日假期係時候攪埋佢嘞！
之前呢set MS倉庫只係上灰，
呢幾日拿拿冧開始上色，
雖然每塊部件四四方方，
但係大大話話都有廿幾三十塊，
噴噴下又要洗噴槍，
噴噴下又發覺啲「孖星」原來可以去得好快，
又走落街買過，
跟住到今日晏晝終於噴到一隻色最後一塊部件嘅時候，
又發覺聽到「吱」、「吱」聲，
唔係咁黑呀？玩漏氣！！
結果發現兩條接駁喉真係漏氣，
死死地氣又走出去買過條！
就係咁到今日為止，
呢set MS倉庫只係上咗一半色....。

〈攝影〉
本來擬定好今個假期，
除咗砌模型之外，
另外Book咗兩日去映女像攝影活動，
雖不知臨時臨急兩個影會活動都取消，
知道之後當堂無X哂Mood！！
唯有Book咗緊住個幾日啦。
希望唔好再Cancel就好囉！！

〈股市〉
雖然我老Blue起股市一早清貨觀戰，
但係見啲兩日個市發上發落，
恆指郁下都千幾點，
破哂單日升、跌幅，
呢場「金融海潚」咪話唔嚇人！
自問就無咁嘅膽量落海玩啦，
因為股市走在經濟之前，
對未來下年度企業盈利及就業反而擔心過個市.....。

Blueman

中國奧運強勢開幕

2008年8月9日
戊子年七月初九
夜

〈奧運〉
相信好多朋友都會好似我老Blue咁噚晚睇北京奧運開幕典禮。
自己一向對運動無乜興趣，
不過話哂今次起祖國攪，
點都睇一睇個開幕。
未開幕前我老Blue除咗對新建成嘅鳥巢及水立方場館有特色外，
完全對個開幕無乜期望喎！
點知由開幕玩倒數個一刻，
已經覺得場面及安排好不得了，
最後李寧「超人」一般咁點聖火為止，
覺得中國咁大玩「人海戰術」，
個個環節都有幾千人出嚟「做嘢」，
尤其係頭個幕二千幾人撃缶（正方形的撃鼓樂器），
個股氣勢直頭超震撼！！
何指本身作為中國人覺得激動外，
相信連老外會睇到呆x咗，
事後新聞報導下屆英國奧運主辦單位話睇完北京奧運開幕後，
對佢地攪開幕構成一定壓力喎！？

不過點都好相信好多朋友睇完呢次開幕，
一致讚好，今日我老Blue都好多工友都談論呢次典禮嘅出色！
呢次我國傾盡人力物力攪呢次奧運，
亦都感覺祖國力量及氣勢展演，
東方力量開始抬頭之兆....。

站起中國人嘅立場，
當然樂於見到祖國強大，
但起投資嘅立場覺得係咪大牛市就快到呢？
我老Blue就剛剛相反喎！
因為仲見到國內股民損手下對政府有期望救市，
證明股民仲未絕望，
一個大牛市往往建基於大熊市之後重建，
我老Blue等的就是一個入市機會.....。

Blueman

PMA 2008前奏

2008年1月25日
丁亥年十二月十八
夜

〈股市〉
呢幾日不論天氣或股市都有一種令人無所適從嘅感覺.....。
天氣噚日急降至十一、二度；
股市令一眾散戶體會乜嘢叫做「過山車」，
整個一月市況比去年8月更加動盪飄忽，指數或股價一日之間「發」上「發」落，
我老Blue有幸「體會」及「欣賞」，
不枉過！

〈相機〉
仲有幾日（31/01~02/02）遠在美國Las Vegas舉行嘅PMA 2008（Photo Marketing Association Annual Show）開幕，
實為眾多相機迷期待新相機出爐嘅日子，
眾多相機品牌都會起每屆PMA或Photokina宣佈推出新產品亮相，
據dpreview最新報道DSLR方面，
首先出閘嘅居然係P記，
出招嘅係其下K10D及K100D嘅後繼機﹣K20D及K200D。
比較有睇頭嘅係呢部P記中階機種K20D，
主要特點及新加入嘅規格有：
配搭自家製14.6百萬像CMOS sensor，
除塵系統加入Dust alert，
感光度可擴展至ISO 6400，
LCD顯示屏擴展到2.7" TFT LCD，備有Tune色功能，
及跟隨潮流加入Live View功能等等新項目。

除咗P記外，C記亦出手，
宣佈推出低檔機種EOS 400D後繼機﹣EOS 450D！
雖然係低檔機種，
但係我老Blue睇完個spec就覺得今次C記落重葯咁，
450D主要加強以下功能如下：
Sensor 為12.2百萬像素 CMOS sensor，
千二萬頓然成為低階機入門級08年新基準？
RAW檔提升到14-bit處理，
處理器亦升級到最新嘅DIGIC III，
加入一個十字對焦為中間對焦點內，
C記入門級「終於」有重點測光嘞，
觀景器放大比為0.87倍及高視點為19mm，
觀景器亦加強咗唔少拍攝資料，
LCD顯示屏加大至3.0" TFT LCD，
不媲O記多讓，亦首次為入門級機種提供Live View功能，
同N記一樣，新入門機儲存改用SD卡，
及新嘅直度電池手柄同機身一樣有雙指令轉盤。

入門及中階機頭炮已經打得咁激烈，
唔知跟住其他廠會有乜嘢抗衡呢？
N記會唔出傳聞嘅D90打呢場「入門之戰」呢？
面對P記都出K20D中階機搶灘，
咁O記又會唔會如網上傳聞咁講出E-XX爭市場呢？
遺忘咗嘅S記，佢部Alpha 900係咪真係Full Frame規格呢？

十分期待嘅PMA 2008......。

Blueman

2061

2008年1月22日
丁亥年十二月十五
夜

〈股市〉
今日無論你有無投資起股市，
相信無不對今日港股受外圍連環急挫而勁跌2061點而驚訝！！
恆指今日收市21757點，
成為恆指近十年嚟最大單日跌幅。
收市不論大藍籌、細價股大部份慘淡收場，
其中3988中國銀行更跌到接近當初招股價3.08元，
而388港交所更差唔到回到去年港府入市時嘅價位，收報156元，
單日港股市值蒸發一萬五千億，
真係跌到好離譜.....！

慶幸自己勇於止蝕，
呢兩日仲算避過一劫，
但係會唔會好似上年817咁嚟一個大反彈？
咁就睇啱啱杜指開市前聯儲局急減聯邦基金利率四分三厘之後，
會唔會令投資者對後市投信心一票？

我老Blue短期抱觀望態度.....。

Blueman

止蝕

2008年1月18日
丁亥年十二月十一
夜

〈投資〉
近日港股及外圍因素欠佳，
連日大瀉。
自己亦難幸免，
手上有一、兩隻貨遭洗倉式股價下滑，
基於嚴守投資規條：「止蝕不止賺」下，
迫令自己行使止蝕，
避免虧損繼續擴大.....。
呢次止蝕都令我老Blue短期內唔可以諗E-3啦，
咪話唔甘！
希望保留資金等待機會再戰江湖.......！

E-3等下啦！！
（話唔定遲啲買會平好多....... ﹀＿﹀！發夢中）

Blueman

小偷的故事

2007年11月18日
丁亥年十月初九
夜

〈故事〉
呢個係一個關於小偷嘅故仔。

好耐之前，有條友仔嘅職業係做賊，佢有一個仔。
有一日賊兒子同賊爸爸講：「老豆，我都好想好似你咁以偷嘢為理想職業呀！你快啲教我偷嘢啦！！」
賊爸爸知道佢呢個仔同佢一樣，
性格一樣好逸惡勞，好食懶飛，
若果唔跟佢學偷嘢，
遲早餓死街頭，
於是答應賊兒子嘅要求嘞！

有一晚，賊父子去到一家人跡罕見嘅大屋門口，
兩父子好努力咁起牆下面挖咗個大窿，
潛入呢間大屋裡面。
賊爸爸用好純熟嘅身法帶住佢賊兒子咁好快入到大廳，
跟住摸到去儲物室出面，
然後用熟練嘅技巧開咗儲物室度門，
細聲咁吩咐叫佢賊兒子去儲物室偷啲貴重嘢！
賊兒子眼見過程輕鬆容易，
一個興奮嘅心情就咁鼠入去儲物室做嘢嘞！
當呢個賊兒子入咗去之後，
賊爸爸突然鎖埋儲物室度門，
跟住跑到去天井大叫有賊喎！！
就係咁嘈法嘈醒哂大屋入面呢家人，
而呢個賊爸爸亦趁呢個時候由大牆個窿閃咗.......。

呢間大屋嘅人知道話有賊入咗嚟，
走出天井睇到有個窿，
返入屋又唔見其他人，
以為個賊已經走咗，
大屋嘅主人就好緊張咁叫僕人點蠟燭走圍睇吓有無唔見嘢！
正當賊兒子起儲物室好努力起心入面咁咀咒佢𠴱個咁大整蠱嘅無良老豆嘅時候，
聽到話有人入嚟儲物室，
當堂嚇都心都離埋，鼻哥窿都無肉咁劑......。
於是驚到縮埋起門後面，
其中一個老僕人攞住爉燭開儲物室度門，
呢個時候賊兒子一手推開老僕人，
同時吹熄咗僕人手上嘅爉燭，
趁屋裡面其他人未為意，
死人尋舊路，急急腳由入嚟嘅牆窿了返出去。
同時，大屋主人帶同其下孔武有力嘅僕人們由大門追出去，
賊兒子聽到有人追自己，
發哂茅咁一支箭咁有路就跑，
跑到池塘附近，靈機一觸執起地下一舊大石頭，
趁大屋啲人追近，賊兒子攞起舊石頭拋落池塘，
仲刻意留底一隻鞋起塘邊，
扮到失足跌咗落池塘咁！
自己則由池塘另一面山林走咗。
由於夜黑大屋嘅人聽到池塘邊有聲，
連忙圍住個池塘睇吓個賊仔喺咪浸死咗？
呢個時候，賊兒子已經一隻腳板爆哂缸咁跑咗返屋企嘞！

正當賊兒子想用生平最惡毒嘅粗口責問佢呢位咁「慈愛」嘅父親嘅時候，
賊爸爸先開口咁問佢個仔：
「仔，話俾老豆聽你點樣返嚟？」
佢個仔梗係勞X氣氣咁對住佢老豆講咗甩身嘅過程，
賊爸爸好有耐性聽完之後，
就同佢仔咁講：
「仔，家陣你已經學識點樣去偷嘢嘞！！」
賊兒子即時侊然大悟！！

呢個故事想講嘅係小偷最大嘅本事並唔係佢可以偷幾多或偷幾大？
而係偷唔到嘅危急時候可唔可以順利逃走？
「留得青山在，那怕無柴燒」
我老Blue無咁嘅本事作故仔，
故事取之今期「資本一週」入面「飛花摘葉」一文提到嘅故事，
覺得好有意思，藉此同大家分享！
呢個故仔想提醒自己及各位近日起股海裡面揾食嘅散戶，
時刻要有止蝕或徹退嘅準備。
近日，我老Blue亦見好多朋友有入咗股海，
希望大家都可以起咁大起大落嘅股海，
平安啟航！

Blueman

股市．煲劇

2007年10月25日
丁亥年九月十五
凌晨

〈股市〉
呢一年我老Blue定下嘅投資目標，
憑著8月17日嘅升市，
到先個幾日終於達標。
眼見當下股市火熱，週遭好多朋友亦對股市有入市衝動.....。
連講開電腦嘅雜誌都有提睇股工具云云，
有見及此，自己亦開始進行減持行動，
鎖定利潤只留下三成資金運作罷了，
風險及壓力相對之下大大減低！

〈影視〉
隨著手上投資減持，
唔駛再花咁多時間日日留意住個市之後，
不過近排我老Blue亦唔得閒得去邊喎！
原因係除咗新一輯高達動畫「Double OO」上映外，
先個輪人氣美劇「Heroes」亦開始咗Season 2，
作為Heroes粉絲梗係唔會錯過啦！
加上無記半夜推番一套國內劇集﹣「走向共和」，
睇下睇下又覺得幾好睇咁喎，弊！！
結果呢排除咗返工之外，
煲劇成為咗我老Blue熱門節目囉！！

Blueman

唐十五寶藏的啟示

2007年9月28日
丁亥年八月十八
夜

〈投資〉
話咁快就過咗中秋。
呢一年環球股市十分波動，財富依然站起少數人手𥚃面。
家陣好多人都有「理財」習慣，
不過賺定蝕就個別發展囉！

講開理財個個朋友都因性格及認知唔同，成績亦不大相同。
我十分認同性格決定命運呢個理論。
剛巧睇到今期港產漫畫「四大名捕」，
話說超級大奸角唐十五因上一役與正派高手大決戰，
最後大敗，眾叛親離，落荒而逃。
正當人人為呢位奸角所留低嘅寶藏所在地你爭我奪之際，
刻意留有伏筆嘅最後根據地﹣大觀園。
故事發展後尾，唐十五負傷死都死返去已經夷為平地嘅總壇舊址而非大觀園。
原來一直所謂寶藏因為唐十五疑心重，
根本從來無將寶藏移走過，
仲要大膽到不設防就咁擺起遺址地牢入面，
同時亦留有一直隱藏嘅部眾作最後防線，
呢批寶藏及部眾成為佢東山再起嘅最後資本。

睇到呢到令我老Blue亦都好多時俾股市嘅波動迷失咗方向。
但係呢段故仔令我覺得要手上嘅有限嘅彈葯有重新分配嘅需要，
劃定死線將部份彈葯定為「最後防線」，
賺蝕局限於可規限嘅資金上面，
作戰嘅心態大大改變，可以輕鬆好多囉！

Blueman

8．17大時代日

2007年8月19日
丁亥年七月初七
夜

〈股市〉
相信好多香港股民好似我老Blue咁，
「有幸」經歷上個星期五香港股市嘅「大時代」日子。
開市由20761暴跌到下午開市40分鐘後最低位19386，
足足有成千二點咁離譜，
跟住又可以短短一個鐘頭之內急升返千一點，
收市報20387，
全日下跌285點，但時日波幅有成千三點，
完全係電視劇「大時代」嘅劇情，現實出現咗！
呢次美國次按加上日圓利差交易效應下，
唔知有幾多股民損手或坐艇？
我老Blue此等小股民亦唔例外，
賬面亦蒸發咗唔少！
不過，可能早前訂下嘅項目好多係中、長線發展，
未因呢次跌市而改變策略，
除非後市有比現況更差嘅消息或基本因素轉變另計。
其實個市由七月尾高位二萬三跌落現水平二萬邊，
足足有成三千點咁多，
身邊有好多朋友對後市意見不一，
有好有淡，而觀望亦佔唔少。
相信唔少朋友經歷過呢期大時代日子，
喺投資策略上面可能會有另一番體會。

Blueman

M.S.Warehouse Ver.3.0始動

2007年7月24日
丁亥年六月十一
早

〈倉庫〉
我老Blue自年頭計劃起個MS倉庫嘅情景組合，
因為「壽屋」出咗個現成嘅「M.S.G.格納庫」，
成個計劃即刻hold住。
等下又等，終於近日買咗四套「格納庫」，
雖然呢套「格納車」成品質素已經好高，
不過，呢set模型淨係得底板同埋一面牆，
如果要合乎模型攝影嘅要求（包括廣角、低抄、俯視等等角度），
咁就要再加工，起埋個天花板及加多面牆。
由於現成品尺寸唔同咗，
加上重新計劃過天花及加牆，
原本嘅設計草圖已經唔啱用囉！
嚟緊幾日焗住再起過新嘅草圖Ver.3.0。
希望今次係我老Blue最後一個草圖啦！！

〈模型〉
終於見到笨大MG#99「紅勇」價格稍為回落，
我老Blue都入咗貨。
上網見到新MG#101係乜啦！
就係SD系嘅ZGMF-X42S DESTINY GUNDAM命運高達，
呢隻嘢自己都好有興趣，
不過據報導呢盒繼「突擊自由」之後又出兩個版本，
一個普通版賣5040日元（定價有啲貴...），
另一個係「光之翼」特別版，賣7350日元（感覺仲X貴）。
不過如果呢個特別版真係做到「光」之翼效果，
到時唔知買唔買好囉？

〈股市〉
自己先個排重新調整個投資組合及策略，
希望往後日子會付合預期啦！
不過，今日見美元對日元高見120，
打後又唔知會唔會對日元利差交易有平倉效應？
密切留意.....。

Blueman

MG MS-14S+RX-78-2 OYW Anime Ver登場

2007年7月19日
丁亥年六月初六
夜

〈模型〉
笨大最新MG模型#99 MS-14S Char's Gelgoog Ver.2.0，
今日我老Blue終於見到有貨，
不過，我見到頭水價之後（日元六算計）唔打算郁手住，因為唔急住砌，
可以等下先。
加上近排新品模型貨價插水幅度好快下（以R3為例），
唔係好有興趣嘅品種可以等高價回落先郁手都未遲！

除咗呢隻14S-2.0之外，
嚟緊有隻翻抄新品上市，
就係MG版RX-78-2 OYW Anime version，
呢隻野PS版我老Blue早前都買咗，
不過，到依家未砌。
但係今水翻出，最大分別係用番TV版顏色設定，
模型本身無任何改動。
不過想講係封面真係好正好吸引，
如果將MS-14S同呢盒RX-78-2拼埋一齊，
形成好大對比！

〈投資〉
近排我老Blue身邊好多朋友對個大市睇法不一，
有好友亦有淡友，
自己就無分好、淡，
睇住個市個方向做嘢。
不過，近日開始要做多啲功課，
重新部署投資策略，
亦調整短、中、長項目，
希望嚟緊下半年進賬會有突破啦........。

Blueman

第17隻MG-ZZ Gundam完成+恆指創新高

2007年7月13日
丁亥年五月廿九
夜

〈模型〉
幾經辛苦，我老Blue今日終於完成自己第17隻MG-ZZ Gundam。
不過，自己對於呢隻ZZ完成並無任何滿足感，
相反，係俾自己一種解脫就真！
點解講到咁悲？
無他嘅！呢隻ZZ我老Blue都講過屬於99年第24號，
早期模型設計勁多夾口，
亦唔同家陣啲MG，組件分色噴油並唔理想，
最大問題係呢隻屬於變型MS，
試過素組完之後，玩變型結果玩死自己。
經過一輪功夫之後，
變咗隻G-fortress覺得好核突！
唔變好過變。
就係上屬原因，完成時間比之前花咗好多時間，
差唔多頭搭尾用咗成個月時間先至攪掂佢！
不過，經過點算2000年及之前出品嘅MG模型存貨，
只係剩番隻MG-Sazabi（沙煞比）未砌.......。

〈股市〉
今日港股一開市恆指已經好快咁創咗新高，
亦都比預期咁到咗23000點。
收市23099，全日升咗290點，
但係成交量縮番去八百幾億。
恆指短短由六月到依家用咗個零月已經彈到咗成二千點，
咪話唔誇張！
後市點睇？升咗咁多短期點都會回吓啩？
唔係年尾點繼續上呀！

Blueman

好友、港股

2007年6月19日
丁亥年五月初五
夜

〈個人〉
是日端午節，我老Blue慶幸今日唔駛返工，
可以起同屋企人做節！

6月16日，相識多年嘅好友兼同事K5呢日係佢老哥起呢個部門最後一日，
跟住佢會轉投另一個部門，
展開佢工作新一頁，
在此祝願佢老哥事業順境、步步高昇！

〈港股〉
如果大家有留意新聞，都知道噚日香港股市創下多項新記錄，
包括恒指、國企、紅籌、港股市值、單日總成交及窩輪交易均創新高等等！
表面風光明湄，公司無玩股票嘅工友單睇新聞以為抄股票好易發達，
並唔了解家陣股市玩緊上落市，
資金流向可以做成一隻股票做成好大波動！！
唔做吓功課，莫講話賺唔到錢，
分分鐘死咗都唔知點解？
就如今日「生果日報」港聞所講，
雖然創下好多港股記錄，
但係另一邊廂，先個排抄到㷫烚烚嘅「蠔股」、「細價股」噚日情況剛好相反，
1306隻上市港股中，
居然有689隻（53%）係下跌，
真係有升到嘅只有426隻，
如果有朋友仲揸住一堆細嘢過節的話，
希望過咗今日，佢地聽日可以收復失地唔駛坐龍舟啦！
自己就噚日朝開市，
好努力咁花一輪功夫先平穩過度，執身彩贏少少，
如果後市趨勢繼續向上，希望再溝番少少入倉。

Blueman

出出入入

2007年6月8日
丁亥年四月廿三
下午

〈模型〉
呢排我老Blue有時間除咗砌返模型外，
由於自己開咗個「迷利倉」，
又買多咗模型嘞！
不過，就要走入倉嘅時間就會頻密咗囉，
入咗啲新模型，出返啲舊模型拎返一、兩盒舊模型返屋砌。
好彩個倉離屋企唔算太遠，幾方便吖！

〈工作〉
近排公司有好多相識多年嘅同事相繼離開，
但同時亦有好多新同事加入，
呢班新同事有一個共同點，
就係年青力壯。
腐水不流，新舊交替為公司帶來一番新氣象。

〈股市〉
呢排天氣陰晴不定，
一時曬死狗，一時落水狗，出街都好唔暢快。
股市亦一樣，自年頭恆指由高位回落到今日，
長期維持上落市格局，股價個別發展，
好多朋友呢半年，經常起股海出出入入；
成績上上落落。
自己就揸咗少量貨，賬面算叫做有少少升幅，
但係對後市就無乜期望喎？

呢半年自己覺得生活各方面都好平穩吓，
都唔知好事定壞事囉？

Blueman

QDII阿爺排洪

2007年5月14日
丁亥年三月廿八
下午

〈股市〉
星期五晚，阿爺宣佈推出QDII細則，
可以俾國內同胞買下港股，
希望舒緩一下國內熾熱嘅投資氣氛。

今日，港股亦因為QDII消息恆指咁就升咗511.03點，
全日總成交亦創新高達950億，咪話唔誇張！
我老Blue今日搬模型入倉嘅途中，
亦見到好多阿公阿「蟬」起有證劵賣買嘅銀行「𠵱𠵱嘩嘩」......。

不過，查實呢個QDII提到每年只不過每年批1150億出嚟玩港股，
相對家陣港股每日成交量閒閒地都五、六百億真係濕濕碎咋！
更可況依家大陸A股咁刺激，
乜春股份都可以狂升，
相對港股咁「理智」，
有幾多同胞有興趣成疑問囉？
呢排如果無心水嘅話，
都係當睇吓戲好囉！

Blueman

等待

2007年4月12日
丁亥年二月廿五
下午

〈個人〉
因為工作問題，
清明祭祖事項延至今日有半日假先至可以實行。
公司終於有四個新血加入（如果D新血頂得順的話....），
希望有助可進一步減輕工作量，
大家都可以有假放下啦！！
等放假.....。

〈投資〉
睇過Blog友火鳥兄近日佢老哥對股市既睇法下，
不約而同，最近身邊亦有幾位一向對投資無乜興趣既工友，
亦開始有興趣入市或已經入市。
我老Blue自年頭港股高位後，
已經再無貨及入市意慾。
因為自己膽細，感覺呢幾個月市況好唔穩定而產生「不安」，
保本為上；
唯有等機會再決定入市.....。

〈相機〉
自O記宣佈推出E-410/510之後，
一眾O記友如我都好期待E-1後繼機既任何消息，
初步睇到E-410既樣板相，
無錯計Noise控制方面係好左好多，
但係色調方面始終無柯達咁濃厚。
不過，唔等都等左咁耐，
唔㬹在等埋E-X出左個Spec先再評論....。

〈電腦〉
期待而久既CS3軟件終於上市，
同預期一樣，可順利於新既Intel-Mac上運行，
兼且好快Apple會公佈OS-X 10.5新系統推出，
我老Blue部Mac Mini G4終於有望up-grade囉，
不過，又係等Apple到時又有乜新攪作？

〈模型〉
前幾日返工，決定走去模型鋪買材料，
因為我老Blue個「M.S. Warehouse」實在拖得太耐，
至今為左呢個project，
攪到一盒MG都未砌過，
自己都覺得有點過份！
希望買左材料之後，
可以逼自己早日完成佢啦！！

今個月出MG版渣古Ver. 2.0添架，弊........。

Blueman

最快的後繼機-D40x

＊＊M.S.倉庫製作中＊＊


＊＊事隔四個多月，D40又出新版！＊＊


2007年3月6日
丁亥年正月十七（驚蟄）
夜

〈模型〉
我老Blue計劃既「M.S.Warehouse」，
由於早前草圖有修改，
加上又買唔到所需用既Lego底板，
攪到呢個倉庫製作進度唔上唔落，好弊吓！
又經過一輪修改，家陣仲未度掂兩邊牆壁點樣做好？
今日一於好少理，
做左可以做既工夫先，如果唔係淨掛住攪呢個倉庫，
其他MG睇怕今年都砌唔到一隻仲大件事！

於是，今日終於由地板著手，
開始度位劃線，
因為一共要做四塊約20X20cm既膠片，
每塊膠片又一模一樣加要分左右咁再細分廿六塊唔同大細既膠片，
淨係畫線都畫左我好幾個鐘囉，
真係畫到眼都花埋！！
透吓氣一陣先至再𠝹埋佢。

〈相機〉
趁呢段回氣時間，
上網睇吓有無有關PMA2007前夕既最新戰況？
有呀！Nikon終於有野發表啦！
估唔到，真係估唔估！？
今鋪N記居然宣佈新既DSLR-D40x，
喂？D40出左無耐至喎？咁快有後繼機！
睇翻資料部D40無錯係去年2006年11月16日宣佈，
距離呢部D40x只不過四個月到，
咁咪仲短命過O記部E-400（宣佈日期為2006年9月14日），
估唔到家陣連入門級DSLR亦開始成為一眾DC仔既宿命﹣週期勁短。

睇完我老Blue以為呢部D40會停產？
原來有網友繼後話官方網有提到D40/D40x會同時發賣，
話俾客仔多D選擇喎！
如果你打算買D40，
你會揀邊部呢？

〈股市〉
今日好多報章大大篇幅咁報導尋日大跌市既新聞，
尋日恆指一共跌左777點，為港股有史以來第五大單日跌幅。
自己好彩無貨在手，避過一劫。
雖然今日大市顯著反彈，
但係暫時都係靜觀其變，
等待上升軋形成先再入市都未遲！

〈電腦〉
絕對對我老Blue係一個好消息！
因為終於知道Adobe起3月27日會宣佈推出期待以久既CS3雙平台版本。
自從MAC機轉左新機行Intel-Mac之後，
我老Blue都係用緊部行G4既Mac Mini到依家，
原因用緊既主力軟件係CS2居多，
但係CS2如果起Intel-Mac到行，知道唔會快得去邊，
所以攪到我遲遲到唔敢up-grade部Mac，
家陣可以等CS3出左之後，等D有關報告先睇下有幾好，
配合埋夏季Mac推出OS-X 10.5，
先至決定出機！

Blueman

流言「四」散

＊＊今日以靚價入左呢盒R3＊＊




2007年3月3日
丁亥年正月十四
夜

〈投資〉
估唔到踏入三月份，
我老Blue覺得月頭就成為「流言之月」。
第一件事係呢個星期全球股市紛紛下挫，
本港恆指由星期一20520點開市到星期五收市19442點，
共跌左1078點，是次調整會否繼續向下，無人會知？
不過，已經好多財經專欄估大市仍會向下尋底喎？
大家又睇下如果係既話，支持位會去到邊？
自己就無貨，繼續睇戲.....。

〈相機〉
第二件事係：
自從Canon宣佈左第三代機王EOS-1D Mark-III之後，
一眾C記粉絲高興都黎唔切，
已經好期待咁諗EOS-5D後繼機會如何如何，
會唔會加入除塵、14bit color、有無Live View等等「新元素」落去？
而另一邊廂N記真係無哂動靜喎？
今年PMA2007唔通真係無任何有關DSLR既新野話俾人聽？
我諗唔會卦？
上網已經有好多N記粉絲好期望有D3既出現！
自從DSLR出現已來，
仲有好多人為全幅面機種（我指係sensor尺寸係1:1-24X36mm個隻）有爭議。
呢個爭議我老Blue唔識答，
不過，我認為有爭議即係有需求啦！
咁Canon呢方面真係好識做生意，
只要有市場就有貨賣，仲要係做Lead個個。
咁大家又睇下N記會唔會好似C記咁可以開咁多條戰線（1X-1.3X-1.6X）對打啦！

〈模型〉
第三件事就關於模型囉！
今日終於起避過頭水高位唔入，
等到二輪水靚價（低於三百）入左R3版重戰機﹣L.Gaim Mark-II模型！
另外網上有關模型既莫過於有人發表左日本笨大呢排好大力咁宣傳佢既MG模型No.100倒數。
呢個話題其實已經早起去年尾發表MG-Strike Freedom Gundam既時候，
已經有網友留意到會場有提示到呢樣野，
不過，今次有關呢隻100號會用特集形式宣傳，
先至再度引起大家關注，
當然，好多網友包括我老Blue估九成九都係會以RX-78-2推出，
雖然已經之前推出過好多版本，
甚至之前推出既MG-一年戰爭版廣受好評，
始終RX-78-2係笨大既靈魂、神主牌，
No.100應該會係佢做代表先至似樣卦？
不過問題今次呢隻100號會唔會個價高過Ni-Nu 7500日元呢？
No.100 MG賣過萬日元？
因為呢排笨大出D新野都幾高水下！！

〈工作〉
最後要提既係公司踏入三月，
工作量好快咁回復正常，
不過好多工友關心係傳公司將會有花紅分喎？
呢個傳言可信性有幾高？我老Blue就唔敢估囉！
因為希望遇大，失望遇大嘛！！
總之上述傳聞、流言，
相信經過三月就好快得到證實。

“股市無斬穫，
相機無著落，
模型未砌哂，
返工見頻撲！“

Blueman

創新高

2007年1月22日
丙戌年十二月初四
夜

〈股市〉
港股連升四日，
今日終於創歷史新高，收報20772.22勁升四百幾點，
非常巴閉！
但係我老Blue無貨起手，睇戲罷了。

〈模型〉
呢排笨大好癲下，
出親D新產品有趨勢係越賣越貴。
繼MG版“突擊自由高達“分普通及豪華版之後，
下一隻好多玩家都期待既MG版"Hi-Nu Gundam“，
傳聞去到七千幾日元！
都未算，二月中發售既1/350既“宇宙戰艦﹣大和號“賣四萬幾日元，
都幾誇張！！
原來除左港股創新高之外，
估唔到連模型價格都創新高？
唔通模型真係多人玩返？

除左隻Hi-Nu我老Blue有興趣之外，
緊住會出既重戰機﹣L.Gaim MK II及U.C. Hard Graph No.3-08小隊既氣墊車，
呢兩款自己興趣多過Hi-Nu！！

自己連續個多月砌緊既MG-Nu Gundam，
終於接近完成階段，
家陣只欠武器未攪掂，
但係重組後，整體感覺都唔錯！

Blueman