長假期例牌事務

2007年5月11日
丁亥年三月廿五
夜

〈雜物〉
每逢長假期我老Blue如果唔係出門的話，
留起屋企有一樣嘢必定會做，
就係執房。
我諗香港地好多朋友都好似自己一樣，
平日因為工作問題，
未必會每日咁有規律咁每日清理屋企多餘嘅雜物，
就自己而言屋企已經唔係大唔再講，
但係「定時定候」啲雜物就好似細菌咁掃之不盡，
當然同自己生活習慣好有關係啦！
平時得閒無無謂謂買吓嘢，
加上近年學人玩埋模型，
情況每況愈下，
久而久之就堆積如山，
自己都好驚好似香港先排有單新聞咁有個賣衫嘅老小販因為整理房間啲貨，
俾啲舊衫責死好幾日先有人發現！
家陣自己間房啲未砌嘅模型已經冧到上天花板，
都仲未計其他無謂嘢㖭！
我老Blue就唔想因為俾一堆未砌嘅模型責死而見報咁肉酸囉......。

今日，同朋友R通電話嘅時候，
言談間佢老哥都有過咁嘅情況，
最後佢話起出面租咗個迷利倉，
就係咁為佢解決咗好多又阻定又唔捨得丟嘅雜物。
聽落服務及價錢都幾公道，
似乎自己都可以考慮租番個倉擺下啲模型存貨及漫畫書刋之類唔等駛嘅雜物都好喎！
咁樣今日計下計下原來可以騰出好多空間擺模型，
一舉兩得，有得諗！！

Blueman