自製精裝版

2009年1月18日
戊子年十二月廿三
夜

〈雜誌〉
每隔一排我老blue間房又堆滿無謂雜物，
多數係過期雜誌、漫畫或宣傳品之類嘅「無謂嘢」！
所以到咁上下時候，
我老Blue就會出手要「毀滅」呢堆雜物啦。
唯獨「DENGEKI HOBBY」電擊模型雜誌，
我就一直留起到。
不過，隨著時間不斷咁過，
「電擊」儲存量亦不斷咁增加，
已經去到間房嘅「存量臨界點」！！
於是，最近的起心肝買咗兩個活頁式檔案夾，
將呢兩年幾買落嘅「電擊」嘅精華內容剪出嚟，
做成一本極高參考價值嘅「電擊」個人精裝版，
可以隨時攞出嚟揾有關高達嘅資料，
呢個方法自己覺得幾好用。

Blueman

23L的温暖

2008年11月20日
戊子年十月廿三
夜

〈洗澡〉
踏入十一月天氣近日先至開始轉涼，
「地球先生」病得好嚴重下.....。

天氣轉涼，呢兩日一早一晚温差好大下，
加上我老Blue居住市區工作郊區，
一日温度上落可以有成六、七度咁大！
以往一早起身有沖涼嘅習慣，
因為沖完涼有種頭腦清醒，
成個人都精神啲嘅感覺！！
不過，每逢入冬呢種習慣就變成苦事，
無他嘅！因為我老Blue屋企行緊電熱水爐，
由於呢款舊式熱水爐，
蓄熱水需時兼且容量細，
每逢冬天沖熱水涼嘅時候，
只可維持嘅時間相對比夏天快得多好多.....。
每每朝早沖涼正當個人開始清醒嘅時候就係熱水將快用完之時，
就好細個個陣睇「鹹蛋超人」打打下出紅燈一樣，
要儘快埋尾......。

但係以上惡夢般的經歷，
今日已經終於改變，
因為今年年中嘅時候用咗成十年嘅可惡終於退役，
由我發版決定入貨，
於是揀咗個大容量有成23L嘅德國牌子嘅電熱水爐，
呢排天氣凍咗即刻可以考驗呢個新爐嘅能耐！
果然不付所託，呢兩日沖熱水涼沖完都仲有熱水剩，掂！！
完全解決咗我老Blue多年要返早嘅噩夢，
希望遲啲天氣再凍啲呢個新熱水爐都頂得住啦.....。

Blueman

雜文

2008年10月20日
戊子年九月廿二
夜

〈工作〉
我老Blue轉咗新嘅工作崗位到依家為止，
每日返工都係咁忙，
因為新工作開始唔等於舊工作唔駛做，
不過起今時今日有工開仲好過無工開....。

〈經濟〉
自年初自己唔係咁睇好個股市，
老早清貨離場，埋單計數輸少當贏。
但係「雷曼」、「迷債」事件所引發嘅後遺症，
本港嘅「佑威」、「泰林」倒閉，
感覺呢次「海潚」真正嘅災難依家先至開始....。

〈影視〉
最近又再煲劇、煲動畫，
攪到自己好忙咁！！
但係睇咗三集Gundam OO第二季，
確實好好睇，節奏及劇情相當明快，
希望可以保持落去！
仲有最喜愛嘅「美劇」﹣Heroes亦有第三季，
劇情好鬼攪嘢，希望唔會走火入魔啦！！

〈攝影〉
呢一年其中一樣令我老Blue高興嘅事係多咗好多工友或朋友加入DSLR用家行列，
相對同朋友又多咗一個共同話題或聚會。
人到中年好多朋友已經有自己嘅生活，
今日偶以透過攝影可以同朋友聚舊或聯誼，
實屬一種福氣或運氣。
獨樂樂不如與眾同樂.....。

〈模型〉
提到模型，今年成績徹底失敗。
同年頭預計嘅成果完全成反比，
主要原因係一直堅持要完成呢個「MS倉庫」先至動手砌其他MG，
可惜時至今日都未攪掂，
仲有兩個月2008年就過去，
但係累積未砌嘅模型就越買越多，
自己開始有病啦.....。

Blueman

入場、離場

2007年11月9日
丁亥年九月三十
夜

〈同事〉
各位見到今日個標題唔好誤會我老Blue又起到講股市噃！
其實係想起度講吓公司同事咁。
呢幾日起公司最大嘅新聞莫過於有關有新同事及舊工友，
先講新同事，隨著工作中嘅部門規模日益擴大，
不斷有新同事加入，
呢個星期仲一口氣嚟咗十個新同事，
分別揾咗幾個「老兵」帶呢批「新兵」，
好「不幸」我老Blue係其中一個.....。
正如剛才咁講，部門擴大因為工作量多咗，
所以先至請咁多新人，
希望他日完成訓練，上到戰場能夠保存性命已經好夠，
祝大家好運！！

另外，有新兵加入，亦有老兵退役。
一位我老Blue識咗差唔多有十年嘅工友，
突然遞信辭職，
令到好多識佢好多年嘅工友及同事都好諤然！
雖然身為老友，
我老Blue當日都有「訪問」下佢有乜打算？
呢位老友大略講咗佢嘅原因後，
作為朋友無反對亦無贊同，
之係尊重佢嘅決定，
有時做朋友唔需要知得太清楚或者作出意見、批評，
只能夠希望佢今後發展如意，更勝從前！

今日部門大老細講公司營業額破記錄，
請員工食蛋榚賀一賀咁話，
最後，大家見到盒蛋榚有點發呆，
因為每一件蛋榚只有姆指咁大咋.............。

Blueman

心平氣和

2007年9月24日
丁亥年八月十四
夜

〈無題〉
雖然工作量不斷增加，
慶幸自己火爆脾氣續漸收斂。
呢一年到今日為止，關於工作上只喺5月中發過一次脾氣，
希望係今年底都係維持呢個數字就好囉！

心平氣和，諸事皆順。
事近中秋，小弟在此祝各位看官中秋節快樂！

Blueman

電擊Hobby中文版變異

＊＊電擊8月號封面＊＊


2007年7月21日
丁亥年六月初八
夜

〈雜誌〉
我老Blue自年幾兩年前開始學人玩返模型之後，
亦同時開始睇「電擊Hobby」中文版，
吸受一下日本達人嘅模型技巧。
不過，今期中文版8月號對內文有點疑惑，
甚至有點不滿......。
原因係當中文版8月號見街買咗之後，
發覺有啲唔妥？
一向中文版同日文版最大分別係語文及廣告唔同外，
基本上內文大致相同。
但係今期玩同書唔同文？
封面日文版係介紹新品「裝甲騎兵」做主題，
而今期中文版封面竟然變咗BB戰士「三國傳」做封面？
再揭內文仲離譜，
主力特集變咗高達派軍武嘅情景模型？
封面嘅「三國傳」只係得一版介紹咁大把！
而最期待嘅新品「裝甲騎兵」內文，就一個字都無提過，
好奇怪？「裝甲騎兵」乜唔係笨大最新Line咩？
香港亦有大貨熱買，無理由唔講下喎！？
因為今個月「電擊」已經出咗網站-DENGEKI HOBBY，
先知內文兩者有極大出入。
真係好想知香港版點解要咁做？
咁攪法會令我老Blue唔知好唔好繼續買中文版落去？
唔知有無朋友會好似我老Blue有一樣嘅睇法呢？

Blueman

塑膠十蚊紙

2007年7月9日
丁亥年五月廿五
夜

〈銀紙〉
睇新聞先至知道今日可以到銀行兌換新嘅十元紙，
更引起一眾港人排隊兌換。
呢隻新「花蟹」有乜特點？
無他嘅！新十蚊最大賣點係用塑膠做，
又有透明窗口仔兼用上雷射漸變絲帶圖案。
攪咁多嘢呢張「花蟹」成本咪好貴？
報稱呢張十蚊，成本係以往嘅銀紙四倍！

我老Blue就對新「花蟹」就無乜意見嘞。
因為香港自從有「八達通」之後，
基本上自己已經好少用「散紙」。
不過，有啲奇怪係既然咁重本出得咁高科技嘅新銀紙，
點解先個排出現大量偽鈔嘅金牛一千蚊紙又唔出呢？
家陣好多「櫃員機」已經絕少㩒到一千蚊囉！
不過，講開又講好似無用一千蚊紙咁耐又好似唔覺唔方便喎？
唔通自己慳咗定窮咗......！？

Blueman

環保定宣傳？

2007年7月6日
丁亥年五月廿二
傍晚

〈品牌〉
啱啱我老Blue睇電視新聞，
見到英國品牌A.H.起香港及台灣推出一款限量版平價環保袋，
引至一眾「粉絲」瘋狂搶購！
起香港分店更出現人龍圍住置地排隊，
最後當然好多人買唔到大感不滿；
而台灣分店更加厲害，
人龍更出現人踏人事件。

呢款環保袋用帆布做，
印上“I'm not a plastic bag“，簡簡單單嘅環保信息。
問題係如果要做到環保概念，
又可需限量發售呢？
事件更做成新聞，
好明顯係宣傳多過環保。
高招！！

我老Blue都有用環保袋，
不過係用相機袋出街，
貪佢又襟用嘛！

Blueman

十年

2007年7月1日
丁亥年五月十七
凌晨

〈個人〉
話咁快香港回歸祖國十年。
同十年前一樣，噚日一樣咁大雨，
我老Blue返工個陣雖然擔住把遮，
但係一樣由頭濕到落腳.......。

呢十年香港經歷咗好多事，
雖然生活無乜大變動，
但係有兩樣嘢開始重視，
第一係健康、第二係理財。
我老Blue已經唔係十八、廿二，
體力同十年前比較梗係無咁fit啦，
十年前開工或者去玩十幾個鐘，
訓幾粒鐘可以再嚟過；
家陣唔呌返八、九鐘都唔夠精神囉！！
所以想有更好生活，
一切從健康開始！

第二樣關於理財，
呢十年我老Blue覺得香港經濟轉型，
但係唔轉得好咗，
真正受惠嘅老百姓唔多。
加上體會到乜嘢叫做「由窮入奢易、由奢入窮難」，
家陣香港地有幾多打工仔敢話自己份工穩陣呀。
唯有自求多福，
越早學習理財，
祇少對日後生活多一點保障！

如果我老Blue十年之後仲繼續喺到寫Blog嘅話，
希望自已再睇番，
上述呢兩樣嘢做到財政自由、無病無痛咁就最好囉！！

在此祝願香港回歸十年，
再創高峰，日日是好日！

Blueman

出出入入

2007年6月8日
丁亥年四月廿三
下午

〈模型〉
呢排我老Blue有時間除咗砌返模型外，
由於自己開咗個「迷利倉」，
又買多咗模型嘞！
不過，就要走入倉嘅時間就會頻密咗囉，
入咗啲新模型，出返啲舊模型拎返一、兩盒舊模型返屋砌。
好彩個倉離屋企唔算太遠，幾方便吖！

〈工作〉
近排公司有好多相識多年嘅同事相繼離開，
但同時亦有好多新同事加入，
呢班新同事有一個共同點，
就係年青力壯。
腐水不流，新舊交替為公司帶來一番新氣象。

〈股市〉
呢排天氣陰晴不定，
一時曬死狗，一時落水狗，出街都好唔暢快。
股市亦一樣，自年頭恆指由高位回落到今日，
長期維持上落市格局，股價個別發展，
好多朋友呢半年，經常起股海出出入入；
成績上上落落。
自己就揸咗少量貨，賬面算叫做有少少升幅，
但係對後市就無乜期望喎？

呢半年自己覺得生活各方面都好平穩吓，
都唔知好事定壞事囉？

Blueman

長假期例牌事務

2007年5月11日
丁亥年三月廿五
夜

〈雜物〉
每逢長假期我老Blue如果唔係出門的話，
留起屋企有一樣嘢必定會做，
就係執房。
我諗香港地好多朋友都好似自己一樣，
平日因為工作問題，
未必會每日咁有規律咁每日清理屋企多餘嘅雜物，
就自己而言屋企已經唔係大唔再講，
但係「定時定候」啲雜物就好似細菌咁掃之不盡，
當然同自己生活習慣好有關係啦！
平時得閒無無謂謂買吓嘢，
加上近年學人玩埋模型，
情況每況愈下，
久而久之就堆積如山，
自己都好驚好似香港先排有單新聞咁有個賣衫嘅老小販因為整理房間啲貨，
俾啲舊衫責死好幾日先有人發現！
家陣自己間房啲未砌嘅模型已經冧到上天花板，
都仲未計其他無謂嘢㖭！
我老Blue就唔想因為俾一堆未砌嘅模型責死而見報咁肉酸囉......。

今日，同朋友R通電話嘅時候，
言談間佢老哥都有過咁嘅情況，
最後佢話起出面租咗個迷利倉，
就係咁為佢解決咗好多又阻定又唔捨得丟嘅雜物。
聽落服務及價錢都幾公道，
似乎自己都可以考慮租番個倉擺下啲模型存貨及漫畫書刋之類唔等駛嘅雜物都好喎！
咁樣今日計下計下原來可以騰出好多空間擺模型，
一舉兩得，有得諗！！

Blueman

百年逢「七」

2007年4月27日
丁亥年三月十一
凌晨

〈歷史〉
早排同朋友K茶記吹水，
佢聽人講每逢年份有「七」必有大事發生，
呢樣涉及「玄學」，我老Blue無再深究，
都係聽咗就算。

不過，今日睇「信得過報」，
見「商心國是﹣張立」專欄有寫到有關事項，
提及逢「七」有乜嘢仲要事情影響中國及香港。
我老Blue覺得幾有趣，
遂簡述如下：
1907，清廷廢除科制度。
1917，俄國爆發革命，引發共產主義運動。
1927，國共分裂，開始第一次國共內戰。
1937，七七盧溝橋事變，開始八年抗戰。
1947，國共全面內戰爆發。
1957，毛澤東發動反右鬥爭。
1967，文化大革命席捲全國。
1977，鄧小平出山，開始改革開放。
1987，全球股災，香港經濟受到嚴重打擊。
1997，香港回歸，金融風暴醖釀中。
2007.....unknown。

今年會唔會有乜大事發生？
家陣先至四月尾，
無人會知道？一切就等我地作見證吧！

Blueman

平常道

2007年3月31日
丁亥年二月十三
凌晨

〈個人〉
呢幾日無寫Blog。
並唔係無話題，相反係太多事想寫但係唔知點解落唔到手，
或者係呆左起“芒“面前，大腦完全停左咁，好奇怪？
簡單D講係呢幾日大事、小事、好事及壞事一下子湧埋黎，
有點招架唔住.......。

有朋友話EQ比IQ更為重要，我相信！
因為起EQ低既人作出錯誤決定比IQ低既人作出決定後果會更差，
自己以前亦好多時犯上前者既錯誤，
不過，碰得釘多自然會吸取唔少教訓囉！
近呢兩年開始時刻提醒自己好多時候以平常心待之，
小小心理改變原來發覺對人對事睇法都好唔同？
不過知易行難，最初幾個月只係得三、幾個禮拜做到，
久而久之，每個月都可以keep住，
但係要時時刻刻都心境都可以保持就太難囉！！！

除左練習運用平常心之外，
呢幾日更發覺有樣比平常心更重要既係﹣「理解」！
用平常心看待一件事之後，
再理解事情因果，思路又會更加清𥇦。

“萬法皆空、因果不空“，慢慢開始睇會到........。
呢幾日原來全部都係平常事，何足掛齒呢？

Blueman

裝飾佈置

2007年2月13日
丙戌年十二月廿六
夜

〈時節〉
今日晏晝我老Blue繼續為左個「M.S.倉庫」出去買D模型素材。
因為一D特別原因須要去海運一躺，
好耐無經過呢處地方，
見到好多農曆新年既佈置，
原來過多幾日就係大年初一。
自己自出來打工就已經要返D輪班工作，
好多時大時大節都要開工，
十幾廿年彷彿節日同我老Blue無乜關係咁？
有唔同既係今年公司罕有咁貼左好多揮春，
話俾D工友知農曆新年就到啦！！

〈倉庫〉
今日我老Blue走左好多地方買模型素材，
發覺除左地台及格骨材料比較易買到之外，
好多細節情景模型要合比例（1:100）就唔係咁易買到，
起旺角見到有間賣模型火車，
D情景組合好合用，但係呢D模型郁下都過百銀一set，
買盒MG都無咁貴！
好失望咁問完就走左，
唯有遲D攪好哂個地基先再打算需唔需要自己親手做啦！
基本地基材料已經買哂，
問題係自己可唔可以緊著草圖一步一步做到？
緊張.......。

Blueman

新一年的藍天白雲

2007年1月1日
丙戌年十一月十三
夜

〈網絡〉
自斷電纜後第六日，
我老Blue終於起Blogger.com上到Blog啦。
雖然係慢D，但好過上唔到啊！！
不過，睇新聞紙講由於連派出海整電纜既維修船，
途中都壞埋，
報稱維修工程修復唔係短期可以做到喎！
咁弊！？

〈天氣〉
今日自己好慶幸元旦日放假，
大大話我老Blue都有成好多年元旦無放假囉。
所以今日好早起左身，
噴左一陣模型油之後，
出左去買D模型油，
出到街驚見天朗氣清，仲有我最喜愛既藍天白雲添，好正！！
有一種新一年新氣像既感覺。

〈影視〉
前兩晚開工個陣，
有工友同我講連續劇“24“，
今個月起美國會播出新一季，
睇過Trailer覺得好精彩兼好落本，
唔知香港幾時會有得睇呢？

〈模型〉
今日元旦日，
我老Blue都係好積極咁砌緊隻MG RX-93 Nu GUNDAM。
雖然天氣乾燥，
極之適合噴模型油。
不過，呢隻RX-93都幾大隻下，
兼且白色、黃色既地方都幾多下，
要花好時間上好多層至好睇。
希望呢個禮拜可以完成哂啦！

Blueman