迷利倉

＊＊存倉的地點，附近居然有座好有特色嘅懷舊建築物。＊＊


2007年5月12日
丁亥年三月廿六
夜

〈存倉〉
今日係我老Blue第一個長假最後一日，
但係自己覺得無浪費到咁「寶貴」嘅假期。
自己都經常起個Blog到提過自己間房既空間已經嚴重過咗「警戒線」，
最弊係近啲幾個月工作超忙，
已經無時間可以好「積極」咁享受砌模型嘅樂趣，
但眼見啲MG越出越吸引，
又忍唔到手，結果唔買又買......。

經朋友R推介下揾啲「迷利倉」租位擺下嘢，
噚晚上網發現香港有好多呢類型嘅服務提供，
「抄」咗一輪俾我發現屋企𠴱頭都有呢類型嘅「迷利倉」，
隨即撥個輪問個詳情如何如何？
今日下晝「貢」咗上去開倉，
查實好聽啲就叫倉，難聽啲只不過儲物櫃一大個，
由於好多呢類型服務大多數起啲工廠大廈，
所以收費尚算可以，長短租都可以，
最啱我呢亭模型玩家，又無時間砌死要買，
但屋企又無位擺；
最後揀咗中亭size嘅儲物櫃。

就係咁拿拿啉返屋企，
用個大Size嘅紅白藍袋pack起啲未砌嘅模型，
跟住來回兩轉入倉，
即係前前後後自己走咗三轉，
雖然個倉起屋企附近，
腳程需要半粒鐘左右，
但係又Pack袋又要遇著今日星期六，
條街鬼死咁多人。
走到最後一轉返到屋企又啲想死嘅感覺......。

可惜嘅係今日只係搬咗15盒模型入倉咋，
可想而知啲MG模型個packing幾咁大盒！！
應該仲要走多一轉先至入哂倉囉。

Blueman