老Blue日記

星期四, 9月 29, 2005

西班牙模型油

2005年9月29日
乙酉年八月廿六
凌晨

〈相機〉
9月28日,BenQ 推出三部DC仔﹣DC X600, C500, C800。
對於呢類OEM機種,我老Blue覺得有一種人出我出既感覺。
無乜好講。

〈模型〉
之前我老Blue油個件模型覺得太核突。
尋日起公司問工友「艦長」有關油模型既心得。
經佢推介一隻西班牙牌子AV(ACRYLICOS VALLEJO)既模型﹣MODEL COLOR,
上色比日本牌子容易、穩定。
兼且就咁可以用水稀釋,仲有成220種MODEL COLOR加埋60種GAME COLOR咁多選擇。
唔駛下下自己溝色咁煩!
不過,有咁多優點價錢自然唔平,差唔多係日本牌子兩倍!
同埋香港都唔係好多模型鋪有得賣。

今日(28日),落左灣仔專賣呢隻油既專門店。
揀左幾隻顏色,值得一讚既係呢間鋪頭既員工除左做推銷外,
仲幫顧客解答有關油模型既技巧!

夜晚,食過飯後拿拿臨開工,
經過一輪上色之後,雖然淨係上主色,
但效果的確比日本仔油理想,
又一次証明一分價錢一分貨。

不過,尤於今次只係買左模型主色關係,
其他細節顏色又要再去買過!
希望快D可以完成第二件作品啦!

Blueman

星期三, 9月 28, 2005

我的新興趣

2005年9月28日
乙酉年八月廿五
凌晨

〈相機〉
9月26日,O記終於宣佈其下最新DSLR E-500。
公佈規格同早前網上流傳大同小異,對我老Blue來講無乜驚喜,
因為意料之內,問題係呢部新機可唔可以吸納到新用?加入O記咁解?
我就希望快D有E-1後繼機消息啦!

〈模型〉
呢幾日我老Blue又忙埋D無謂野,
自從睇完田島久照個本高達寫真集,
心想一試。
一次過可以滿足三個興趣﹣模型、攝影、電腦。
諗落幾過癮咁!
但係心諗一來自己砌模型又唔叻個隻,
二來實在自己真係邊有咁多時間砌先得家!?

心念一?,
自己買埋咁多HCM Pro 高達模型,計下計下有成十幾隻咁多。
但係見模型色水因為膠得滯,好唔好重新上過油呢?
於是就係咁去左模型鋪買左D模型油、油筆之類。
自童年至今都成廿年未掂過呢科野,
一時間悲喜交集,
悲,係因為成廿年無掂過,成日油到過哂界,勞勞氣氣咁!
喜,係因為好有挑戰感,好新鮮。
經過兩日兩夜耕苦奮鬥之後,
雖然效果同理想相距甚遠,
但滿足感真係好大!

第二個作品正努力進行中!

Blueman

星期日, 9月 25, 2005

GUNDAM SEED 閱後感

2005年9月25日
乙酉年八月廿二
三號風球的晚上

〈動畫〉
呢幾日無寫到日誌,因為我老Blue實在太忙。
原因好簡單,自己用左三日三夜「煲碟」。
Gundam Seed共50集的超人氣動畫!

呢幾年已經無乜動畫可以令我老Blue咁著迷!
對上個幾套係“真.三一萬能俠“、“無限之Ryvius"及“Space Cowboy"等等。
呢套Seed故事都幾峰迴路轉,主線大多以多位主角對戰爭的態度。
人物豐富,角式立場變化、愛情線多、友情親情對決等等,
都令劇情豐富起來。

機動戰士決鬥亦都好精彩,
由最初四集高達兩個派系發展到後期打到十集高達三個派別大混戰!
結尾兩大勢力宇宙核武大決戰,描寫有點歇斯底理,大玩世界末日feel,
主角派系分秒必爭阻止,幾有劇集「24」戲味!

期待續編﹣GUNDAM SEED DESTINY!!

Blueman

星期二, 9月 20, 2005

GUNDAM SEED


2005年9月20日
乙酉年八月十七
中午

〈相機〉
是日並無新機發表。

〈動畫〉
尋日卒之的起心肝走去攪左套DVD﹣GUNDAM SEED。
呢套2002作品,近年被人談論為以高達牌頭的翻身大熱之作。
之前無線都有播過,
但係礙於時間關係錯過左。

睇左頭幾集,故事幾好,人物幾豐富,
描寫軍旅生涯幾實在,畫功以TV版來講算唔錯!
除左以高達個名之外,可以當一套新戲咁睇!
不過,我暫時最唔滿意係人物設定!
D男角畫到全部女仔樣,不男不女咁。
可能我老Blue比較傳統,有D睇唔慣!

希望遲D睇完,
自己接受到啦!

Blueman

星期一, 9月 19, 2005

高達寫真集 GUNDAM PHOTOGRAPHY


2005年9月19日
乙酉年八月十六


〈相機〉
是日並無任何新機發表。

〈攝影〉
尋日,我老Blue買左本寫真集,
不過並唔係一般人像影集,而係模型。
被諭為首本高達模型寫真集。
GUNDAM PHOTOGRAPHY
由日本攝影家﹣田島照久 操刀。
此君乃從事商業攝影,加上豐富想像力,
令本是平平無奇的高達加上電腦合成技術,
將模型融入現實環境,
變得疑幻似真!
極之新穎攝影手法。

喜愛高達模型又喜愛攝影的朋友,
不可錯過!
(** 小弟買的是國內版,幾十蚊有交易!)

Blueman

星期日, 9月 18, 2005

中秋的風雨

2005年9月18日
乙酉年八月十五 中秋
凌晨

〈相機〉
是日並無新相機發表。

〈個人〉
今日中秋節,
剛剛收工,尋日下晝橫風橫雨,
天文台又掛埋一號風球,
半夜返到屋企,月光就睇唔到囉!聽到電台講今日可能風力可能會轉強,
隨時會改掛三號喎!

咁多年,我老Blue都無乜節日氣氛。
可能同工作關係,因為需要輪班,好多時假日都要開工,
加上自己好怕假日起街同人迫。(其實我老Blue少朋友 ...... >_<)

可笑既係十幾廿歲個陣,寧願同D工友返工都唔想放假!
今時今日,我老Blue對節日已經無哂感覺。
呢一刻淨係想靜靜咁過..........

唔知係咪天氣影響心情,
哈哈,外在影響內在,
修為不夠,修為不夠!
Blueman

星期六, 9月 17, 2005

購物習慣

2005年9月17日
乙酉年八月十四 迎月
凌晨

〈相機〉
Ricoh宣佈推出新相機 ﹣Caplio RR530
我老Blue覺得係一部超低階OEM DC仔,
無乜特別。

〈個人〉
我老Blue都今時今日,
都仲係用緊部O記E-300,
雖然,系統負擔唔算多。
亦都唔打算轉其他品牌!
可能自己同用野習慣有關係卦!點解?

一向以來,
我老Blue如果決定要買一樣野,
第一,價錢當然首要條件!
負擔唔來,講乜都無用!
第二,問朋友、上網做資料搜集,呢樣好多朋友都會,
而且,買錯野機會少好多!
第三,產品基本功能穩定性最緊要,
花巧功能最唔實際。
亦都到頭來,後悔既主因。

呢D可能係我老Blue長久以來買野既心得。
大把閒錢另計!

Blueman

星期五, 9月 16, 2005

神經俠侶

2005年9月16日
乙酉年八月十三
凌晨

〈相機〉
是日並無任何新機提供。
不過,DCHome.net個Server死左幾日,
尋晚終於起翻,大家又可以繼續上去吹水囉!

〈電影〉
今日見有時間,
煲左隻VCD-神經俠?。
呢隻碟我老Blue聽人講呢套係好野,200x年既「滄海遺珠」咁話喎!
自己擺左一二邊好耐,終於睇翻!

呢套戲我老Blue覺得有D野,重覺得幾好睇添!
並非一般無腦喜劇,反而講左好多香港時下問題,
教人會心微笑個隻!
其中,吳鎮宇演技一流,演出拍案叫絕!
當中有?老、中、青三個階段的打工仔心態劇情描寫,更是一絕。
令我老Blue有所體會。

Blueman

星期四, 9月 15, 2005

玩具集中地


2005年9月15日
乙酉年八月十二


〈相機〉
是日並無任何新相機公佈。

〈玩具〉
近排唔知我老Blue發乜野神經,
迷上左“超合金“,
上網睇左唔少有關款式。
不過,自己之前都起呢個日記提過,
總係覺得變形、合體類別過癮D!
亦都因為「過癮」D,
相對亦賣貴D!

但有幾貴?原來“超合金“系列有別於"HCM PRO",
唔係十幾廿蚊上落咁少,有老友“5號“玩開呢科野,
佢話可以上落成百幾銀喎!
今日,我老Blue得閒,好無聊咁走左出去賣玩具最具人氣個幾個商場睇過!
就以"合金魂﹣無敵超人 珍寶3號“為例,同一個場,
可以問到有$1400、$1500、$1700三個價錢,相差成三舊水咁多?
當然已經唔計「個 」D絕版貨、搶手貨啦,個D直頭係天價「添」!

玩具真係可以好貴,
豈至童年夢想,直頭係成人幻想!

我的“Aquarion",鋪頭話月尾有貨喎!
*~*

Blueman

星期三, 9月 14, 2005

Ricoh經典?瓜數碼化


2005年9月14日
乙酉年八月十一
凌晨

〈相機〉
剛剛上左dpreview.com見到又有新相機發佈。
SONY Cyber-shot M2 and RICOH GR Digital

Sony M2,我老Blue覺得呢類騎呢型DC,有一定捧場客。
上代M1已心受「潮人」一族歡迎。
呢類玩家唔太著重甚麼質素、功能,
最緊要個款要夠過癮、夠特別,呢條戰線不嬲覺得SONY玩得好叻!
今次又睇下可唔再誘惑到一班「潮人一族」?

RICOH GR Digital,
菲林時代已經係經典之作,小巧、高質已經代表一齊。
加上定焦高質鏡頭,至今仍有一定支持者。
物轉星移,時代變遷,今次推出數碼版,
仍然保留廣角定焦鏡設計(相等於28mm F2.4),強調高質解像。
可加converter去到21mm添!
最鬼馬係可以附加一個光學觀景器,好濃厚菲林機玩snap feel!
喜歡GR機既朋友絕對值得期待。
Ricoh GR Digital offical site

Blueman

星期二, 9月 13, 2005

全球最輕的DSLR?


2005年9月13日
乙酉年八月初十
中午

〈相機〉
是日並無新相機發表。

不過,有香港O記網友尋日話響歐洲官方網頁有傳聞中的E-500內容。
但今日係條link已經去唔到!

個look,如果係真的話,我老Blue覺得正常過E-300添!^_^
據有心人capture返來既spec.,
大概同E-300差不多。
不過,個「芒」大左,用2.5" 廿二萬色。
亦只有435g,有網友話應該係全球最輕勒!
除左有新機「不幸」外漏,
亦有不少新既平鏡俾網友睇到!
有枝新kit lens-17-45mm,35mm F3.5 marco, 18-180mm 10x Zoom 咁啦!
咪話O記淨係識出貴鏡啦!
不過,枝35mm F3.5 marco個樣有幾分似14-45mm,
會唔會又係大陸做呢?

E-300依家個價已經咁低,
咁E-500可以去到幾低呢?

相機D野,高處未算高,低處未算低!

Blueman

星期一, 9月 12, 2005

玩具發燒友

2005年9月12日
乙酉年八月初九


〈相機>
是日並無新相機發表。

〈玩具〉
今日,上網?到一D有關玩具既玩具發燒友網頁。
睇到好多香港朋友都同我一樣,都好鐘意玩模型、玩具,
大家心態一樣,細個無錢買,依家有工作能力,可以重拾童年夢想。
但係,今時今日D玩具一D都唔平!
打工仔銀兩不足、屋企地方又細,
大家買玩具都要心思屬濾、又上網週圍問人邊度平咁?
真係唔明依家D細佬邊有咁多錢買玩具?

〈超合金魂〉
自從知道“創神合體“月尾到貨之後,
開始留意呢一個系列。
不過,我比較喜愛「合體、變型 」類別。
覺得可玩性較大,無咁單調。
除左“創神“之外,GX-28 "戰鬥機械“一樣月尾到貨。
主打多類形「合體+變型」。
另外, “合金魂“前作:GX-23 無敵超人、GX-13 超獸機神、GX-04S 巨靈神、GX-03 超力電磁俠。
都想買翻,
不過,件件都唔平..............有D弊!
*_*!

Blueman

星期日, 9月 11, 2005

創聖之Aquarion



2005年9月11日
乙酉年八月初八


〈相機>
是日並無任何新相機發表。

〈動畫〉
由於我老Blue對Bandai月尾推出最終究極超弩級「超合金」﹣
「創聖之Aquarion」機械天使,產生極大興趣的關係。
尋晚,為左了解更多有關呢舊「超合金」,
起屋企煲碟。

煲左八集,呢套動畫由機械設定起家﹣河森正治親自監督、腳本及拿手的機械設定。
成套野可謂集現今成功動畫大成,
包括有“真三一“的節奏,“新世紀“的橋段,“勇者王“的熱血,“青之6號“的CG等原素。
尤其,每集機械格鬥極有心思,
其中第六集,主角機打出“月面拳“,將對方由地球一拳打到月球!幾過癮!

不過,人物設定我老Blue就覺得麻麻地。

Blueman

星期六, 9月 10, 2005

HCM PRO 18-DESTINY GUNDAM


2005年9月10日
乙酉年八月初七


〈相機〉
9月1日,Leaf & Mamiya向外宣佈推出最新數碼背。
Leaf Mamiya ProDigital II
我老Blue唔識呢D咁高階、咁專業既器材。
睇完個spec,淨係覺得好厲害。
唔知D Pro佬點睇呢?

〈模型〉
我老Blue一直都有玩開Bandai HCM PRO系列。
最新第18款﹣ZGMF-X42S DESTINY GUNDAM,
評論為最多配件,雕工最細緻。
奇怪"高達Seed“系列同“一年戰爭"系列有所不同。
“Seed"系塗裝無左“一年“系暗紋。
不過,今次DESTINY GUNDAM亦屬上乘之作。

另外,Bandai另一吸人血系列﹣「超合金」,
9月尾會推出史上最究極、超大型作品﹣“創聖合體﹣Aquarion"。
三架機體,三種合體形態,彷如三一萬能俠設計,
但係唔駛另加任何附件都已經可以變形,全高約40cm,
兩個字形容:勁、買...............

Blueman

星期五, 9月 09, 2005

中港台三地攝影論壇


2005年9月9日
乙酉年八月初六


〈相機〉
9月8日
Sony推出新DC-CyberShot DSC-R1
全球首部配上APS-Size CMOS非SLR型DC機種。
我老Blue點睇?R-1外觀騎呢,鏡頭強勁(Carl-Zeiss T* Vario-Sonnar 24-120mm)。
趨勢係DC機開始向大型sensor發展,
DSLR會否加快走向全片幅之路?

〈攝影〉
我老Blue大約幾年前買左第一部DC仔﹣SONY DSC-S70之後,
亦同時開始上網接觸網上論壇。
不經不覺,呢幾年論壇變化好大,
由一小撮網友演化為一小社區,
再由多個小社區演化為一大社區,
有D更成為商業網站。

以瀏覽量計,數中、港、台三地華人攝影網站,
中國站:色映無忌xitek.com,會員強調上圖就是硬這理!
香港站:DChome.net,會員多討論影會人像及新產品討論。
台灣站:攝影家手扎photosharp.com.tw,會員多討論器材。
三地攝影文化各異,各有特色。

〈個人〉
我老Blue個人相簿﹣Turkey 1999 Part Two,
已經上載,歡迎各影友瀏覽及批評、指教。

Blueman

星期二, 9月 06, 2005

DSLR 的維修問題

2005年9月6日
乙酉年八月初三
凌晨

〈相機〉
自從用左DSLR之後,
我老Blue一直有諗過DSLR會唔會比較易壞呢?
近日,網上論壇見到好多朋友post有關死DSLR經歷。
其實,不論全機械又好、電子菲林機又好都有壞既一日。
更可況全電子操作既DSLR呢?
因為可以俾各下亂咁映,
使用率比菲林機仲高既關係..........
更加快死!

相機壞左,維修在所難免。
問題係貴唔貴。據有網友講,全架相機維修最貴係CCD部份,
動輒收幾千不等,Canon 1Ds更加唔至呢個數卦?
其次,非Olmypus E-Series相機,
入行清潔CCD都要收你幾舊水一次。
咪話唔柑頂!

不過,玩得DSLR就要有心理準備,不知幾時部機會'hang'機?
除非你有「士啤」機或者有部Nikon FM2 or Leica M6啦!

不過有例外,
香港人玩機出名換機快,
部機未run-in已經抵受唔住引誘,
用左無耐有話upgrade!

Blueman

星期四, 9月 01, 2005

土耳其相片Part 1上載


2000年9月1日
乙酉年七月廿八


〈個人〉
Blogger.com終於支援圖片上載服務!

呢幾日,我老Blue終於忙完一堆拍於1999年起土耳其的舊相片。
自從用左DSLR後,已經無掂菲林呢家野好耐。
睇番舊底經film scanner做檔案,感覺好唔同咁!

今次上載數量比較多,
分成三輯?出,以供朋友、影友分段欣賞、批評。
除左時間用起揀選相片外,亦嘗試為每張相片加插註腳文字。
不過,最頭痕係我老Blue打字又慢,有時又執筆忘字兼俗氣。
應驗左書到用時方恨少。

請各位朋友看小弟相簿多多見諒。

Blueman