GUNDAM THE ORIGIN 14

2007年4月29日
丁亥年三月十三
夜

〈漫畫〉
今日我老Blue收工途經書報攤，
終於見到新一期「機動戰士Gundam The Origin-14」出咗！
唔覺唔覺呢本嘢對上一期已經好幾個月嘅事，
日本漫畫始終唔同港產漫畫以快行先，
佢地文化喜歡慢工出細貨。

睇完今期，故事亦都回顧到「主角」馬沙（從呢本新著，作者﹣安彥良和，好刻意寫馬沙多過阿寶咁）既0079前既故事將會告一段落，
一段原著動畫無交待既補完劇情，
下期應該入返故事應有嘅後半部，
睇到第14期，覺得大師級既安彥良和手底下既原著高達故事更加有血有肉，
或者重新修定關係啩？
覺得呢個故仔幾大時代，
不過，唔知漫畫完咗之後，
Sunrise及笨大會唔會出過套新著動畫呢？
感覺可能性好高......。
（潮流興翻抄嘛！）

Blueman

壽屋模型﹣MSG格納庫

2007年4月28日
丁亥年三月十二
凌晨

〈模型〉
請容許我用悲憤又沉重嘅心情寫呢篇Blog，
都唔知好事定壞事囉！？
真係無語問蒼天，點解要俾我老Blue上網睇到呢單新聞呢？
自己亦都一再上網求證，係千真萬確！！
乜嘢料令我老Blue有咁大打擊？
就係出開機戰模型個間「壽屋Kotobukiya」，
將會6月會出MSG格納庫，
即係近似我老Blue喺1月30日提過既「M.S. Warehouse」計劃，
壽屋居然出呢SET情景模型，仲要係同我計劃差唔多，
一樣係組合式可作無限擴充嗰隻，
不過，人地又平又正過自己做個吓抵死嘛！！！
一共三SET，每SET只不過賣900日元，
睇完之後，白痴先會有興趣自己做咋！
咁，白白浪費咗好幾個月工餘時間都砌唔成嘅「倉庫」.....。
天呀！！

希望呢SET快啲到貨，
我實買番十個八個，做大佢！！

Blueman

百年逢「七」

2007年4月27日
丁亥年三月十一
凌晨

〈歷史〉
早排同朋友K茶記吹水，
佢聽人講每逢年份有「七」必有大事發生，
呢樣涉及「玄學」，我老Blue無再深究，
都係聽咗就算。

不過，今日睇「信得過報」，
見「商心國是﹣張立」專欄有寫到有關事項，
提及逢「七」有乜嘢仲要事情影響中國及香港。
我老Blue覺得幾有趣，
遂簡述如下：
1907，清廷廢除科制度。
1917，俄國爆發革命，引發共產主義運動。
1927，國共分裂，開始第一次國共內戰。
1937，七七盧溝橋事變，開始八年抗戰。
1947，國共全面內戰爆發。
1957，毛澤東發動反右鬥爭。
1967，文化大革命席捲全國。
1977，鄧小平出山，開始改革開放。
1987，全球股災，香港經濟受到嚴重打擊。
1997，香港回歸，金融風暴醖釀中。
2007.....unknown。

今年會唔會有乜大事發生？
家陣先至四月尾，
無人會知道？一切就等我地作見證吧！

Blueman

E GOES TO WONDER update

2007年4月25日
丁亥年三月初九
中午

〈相機〉
早前3月16日，我老Blue起個Blog到都提過日本O記為左配合「第二章」既E系列相機，
起日本官網攪咗個叫E GOES TO WORLD宣傳網站。
今日有O記友話呢個網站已經update咗，
我老Blue走咗上去睇過，
發覺呢個網站包裝得好正吓，
站喺相機官網嚟講，呢類網上宣傳都算少有，
睇嚟日本O記宣傳班底好似開始醒覺！
聽路邊社講呢個網站遲啲仲會有新攪作，
就係O記用家可以上傳相片（當然係用O記機及官方會作揀選）一齊開發呢個網站喎！
未知會唔會淨係受日本本土用家玩？

除左O記有新攪作外，
另一邊P記亦有新聞，不過係負面新聞.....。
據知原本Hoya同埋P記去年公佈十月打算合併，
點知起今年5月30日合併之前，
唔知乜春理由P記單方面反口，
攪到Hoya相當無癮，
於是前兩日Hoya同外界講，
話呢鑊食硬P記，講到明如果P記5月30日唔跟之前合併協議，
就以每股770yen收購P記咁講喎！！
呢鋪有戲睇囉，又睇吓繼M記變身S記之後，
跟住呢鑊P記又會變成點？
祝P記好運！
至於O記，聽牙痕友講O記市值同N記差唔多喎（乜O記有咁大咩？）！？
如果有「大豪客」要揀都揀N記喎......。

Blueman

偷閒一小時

2007年4月24日
丁亥年三月初八
夜

〈咖啡〉
自從今年農曆新年，我老Blue屋企樓下開左間「大X活」快餐之後，
已經絕少幫襯附近去開個間茶餐廳囉！
因為「大X活」賣既即磨咖啡又平又合我口味，
加上以前去個間街坊茶餐廳，
入面好多茶客多數係D老街坊，
佢地入去並唔係歎茶，
而係想同D街坊聚舊或者打下牙較咁......。
如果想收集下街坊有乜八卦、波馬情報，
無錯，你揾啱地方嘞！
但係，如果好似我老Blue咁，
一訓醒之後，想靜靜地咁歎杯提神咖啡兼且歎下一個鐘頭報紙嘅話（下午飯市另計），
家陣樓下間「大X活」反而俾到我要嘅要求喎！
可能D老人家唔多Like走年青人路線既快餐店卦？

呢個係我老Blue最近其中好享受既樂事。
本想仲有其他閒話想再起到講下、分享下，
不過，由於時間關係，
希望第日可以有機會起到再談。

Blueman

新動畫﹣機神大戰〔巨型方程式〕

2007年4月21日
丁亥年三月初五
中午

〈動畫〉
終於睇過早排提過既新著「鋼鐵神（金剛飛天鑽）」第二話，
好有「真．三一」feel，
相當熱血明快，可以跟進。

除左呢套鋼鐵神外，
近日上網我老Blue亦睇左一套新動畫﹣「機神大戰〔巨型方程式〕」，
呢套野一睇個片名就知又係巨型機械人片種，
今次大玩全球大國派出代表該國既機械人決戰，
第一話就係日本遭受中國挑戰，
似乎有點日本右翼意識？
睇完覺得呢套野製作好認真下，
畫功好出色，設定好細緻；
劇情推進都算可以，唔太悶。
我老Blue最怕睇到D對白多得黎其實對劇情無關係既悶蛋動畫！
呢套野既監制叫後藤圭二，睇翻資料呢套野係佢第三套作品，
之前以美少女遊戲做人設及動畫原畫參與工作而走紅。
所以呢套機戰人物都好正下、做型走向寫實化，唔錯！

不過，故事睇完第一集，
唔知點解其中一小部份唔起眼既劇情，
講一對母子遭到襲擊，個老母不醒人事，
戰鬥完左之後，男主角見到個位老母若無其事咁企番起到？
呢段戲會唔會有乜玄機呢？
俾我感覺好似先個輪睇個既「ZEGAPAIN」咁，
大玩「虛擬世界」，主角既世界根本唔存在呢？
留待故事往後既發展.....。

Blueman

網上相簿

2007年4月17日
丁亥年三月初一
凌晨

〈攝影〉
呢個月我老Blue好多認識既朋友、blog友，
不約而同咁趁假期去左日本旅行，
好高興睇到佢地放起網上相簿既精彩回憶！

講起網上相簿，我老Blue覺得係現代人既福音。
點解咁講呢？
現代都市人生活緊張，工作繁忙，
諗起以前未有互聯網、DC個陣，
如果有朋友去完旅行返來，
用菲林映左一大堆相，
由於數量會幾多下，一本一本既3R/4R既相簿攜帶其實極之唔方便，
通常會約埋一日，一次過俾咁多住親朋戚友睇，
基於呢個原因，好多時唔係咁多親友有緣欣賞（莫講話遠方既親友）。

但係自從互聯網、數碼相機普及之後，
大家睇相既習慣隨之而有所改變.....。
好多朋友已經起網上申請左自己既網上相簿，
加上用左數碼相機，
攝影模式亦唔會因為菲林既束縛，
肆無忌彈咁映相，唔會錯過任可機會，
效果往往有意外驚喜！！
就係咁好多時映完相同朋友們分享，
個日即時上傳去自己相簿跟住E-mail俾朋友知，
朋友們可以隨時上網分享及留言，
比起「遠古」齍睇相簿更過癮！！
當然有理想作品，放大相（16"X20"）睇感覺又另計。

如果閣下喜愛攝影而未有建立個人網上相簿的話，
嘗試為自己登記一個，
將閣下既作品同大家分享吧！！

來吧，同全世界接觸可以好簡單。

Blueman

電腦要求

＊＊老Blue的Cheap Cheap膽機特寫＊＊


2007年4月15日
丁亥年二月廿八
早

〈電腦〉
先個幾日我老Blue都提過CS3已經推出，
其中PS（Photoshop）更係自己一直好常用既軟件，
推出新版固然歡喜，
不過，以我部Mini想行得暢順就唔係咁易囉！！
除左CS3之外，另外Apple有個叫Aperture既玩RAW既軟件，
要求比CS3仲要高，祇少要G5 or Intel Core Duo CPU、1GB Ram、Intel GMA 950 graphic card。
舊款Mini G4想玩無可能！
似乎真係要等Apple出左OS-X 10.5，
睇下有無新款Mini up-grade先至用到囉！！
因為我老Blue覺得電腦今時今日，
唔駛咁落本，過多一、兩年又過時，
夠用就算，唔夠用先至更新都未遲！！

〈倉庫〉
自己計劃既「M.S. Warehouse」，
一拖再拖之下，今朝早起身繼續展開，
經過一輪思索，
倉庫兩邊牆壁既設定及細節亦都順利完成，
至於所需既模型素材亦準備得七七八八，
希望月底前可以完成一面牆就理想囉！

〈音响〉
早排房入面套Cheap雞音响組合，
加左部CD機及換左條新喇叭線，
經過一段時間煲後，
音色亦已穩定落黎，
聽返好多舊CD感覺好唔同，好多細節野出番黎，
尤其我老Blue好多年前買落好多舊既泰文CD。

現階段套組合只欠一對分析力比較好既訊號線及一組電源線，
咁就「功德完滿」，基本組合完成！
（因為上屬兩野到依家都係用緊原裝野，好弱雞下....）
不過， 音响呢家野急唔黎，
加上「筆直」有限；
慢慢加上去，
慢慢有體會先至過癮嘛！
（希望年底前可以完成......）

Blueman

新著「金剛飛天鑽」再臨

2007年4月14日
丁亥年二月廿七
夜

〈動畫〉
記得我老Blue細細個個陣，
香港曾經出現第三間電視台﹣「佳視」，
最令我著迷係當時佳視逢星期六下午，
開創動畫時段，一口氣播放四套動畫，
因為太耐唔係好記得有邊幾套？
不過，印象最深莫過於「永井豪」套「鋼鐵神（港譯﹣金剛飛天鑽）」，
點解咁有印象？
當時以大型機械人片種，
未見過用屎忽向天，捲埋一舊咁就變左個頭，
跟住一堆手手腳腳由架戰機射出黎結合。
起當時來講概念好特別.....！

時隔廿幾三十年，
近年唔知係機械人動畫題材江郎才盡，
還是由早幾年一套「真。三一萬能俠」興起，
好多“中古“動畫紛紛有新著，
包括鐵甲萬能俠、宇宙飛龍及勇者雷登等等，
不過，口碑及成績均在真三一之下！
今日終於見到上文所講既金鋼飛鑽新著，
拿拿臨「攞」左返黎睇。

睇完第一集，覺得.....唔錯！
設定有少許改動，
變身已經唔再屎忽向天，而改由駕駛員揸電單車變型。
節奏明快，動作流暢，好熱血唔廢話造作，
故事設定原作五十年後發生，未知同原作有無關係？
雖然畫功細緻，但仍保留永井豪個份狂野、豪邁風格，
好有真三一味道，未知係咪同一班底，
期待故事出現「半人馬飛天鑽」呢個經典造型！！

Blueman

等待

2007年4月12日
丁亥年二月廿五
下午

〈個人〉
因為工作問題，
清明祭祖事項延至今日有半日假先至可以實行。
公司終於有四個新血加入（如果D新血頂得順的話....），
希望有助可進一步減輕工作量，
大家都可以有假放下啦！！
等放假.....。

〈投資〉
睇過Blog友火鳥兄近日佢老哥對股市既睇法下，
不約而同，最近身邊亦有幾位一向對投資無乜興趣既工友，
亦開始有興趣入市或已經入市。
我老Blue自年頭港股高位後，
已經再無貨及入市意慾。
因為自己膽細，感覺呢幾個月市況好唔穩定而產生「不安」，
保本為上；
唯有等機會再決定入市.....。

〈相機〉
自O記宣佈推出E-410/510之後，
一眾O記友如我都好期待E-1後繼機既任何消息，
初步睇到E-410既樣板相，
無錯計Noise控制方面係好左好多，
但係色調方面始終無柯達咁濃厚。
不過，唔等都等左咁耐，
唔㬹在等埋E-X出左個Spec先再評論....。

〈電腦〉
期待而久既CS3軟件終於上市，
同預期一樣，可順利於新既Intel-Mac上運行，
兼且好快Apple會公佈OS-X 10.5新系統推出，
我老Blue部Mac Mini G4終於有望up-grade囉，
不過，又係等Apple到時又有乜新攪作？

〈模型〉
前幾日返工，決定走去模型鋪買材料，
因為我老Blue個「M.S. Warehouse」實在拖得太耐，
至今為左呢個project，
攪到一盒MG都未砌過，
自己都覺得有點過份！
希望買左材料之後，
可以逼自己早日完成佢啦！！

今個月出MG版渣古Ver. 2.0添架，弊........。

Blueman

窮鬼尋寶

2007年4月9日
丁亥年二月廿二
早

〈音响〉
繼早前我老Blue執左部二手CD機後，
一星期前又從工友手上既「剩餘物資」接左條二手喇叭線，
亦係自己第一條喇叭線.....。

相對一個對Hi-Fi無乜研究既Low-End user來講，
換左條新喇叭線既效果好似換左部新機咁，
真係好大分別！！（可能自己對音响既要求易滿足卦！？）
聽番D舊CD聽多好多野咁，
乜野叮叮查查，好多細節出番黎咁,
仲有D配樂仲好鬼鼠咁走出黎。
（當然渣既錄音，點聽都係咁渣！）
有一種尋寶既感覺，好過癮！！
自己咁多年買落既CD都有成二、三百隻，
呢鑊有排尋寶囉......。

Blueman

好友拍攝的香港國際七人欖球賽

＊＊好友﹣恆仔的新作品＊＊

2007年4月6日
丁亥年二月十九
凌晨


〈攝影〉
雖然尋日係清明節共眾假期，
但係我老Blue呢份工無分時節照例開工也！
收工返到屋企巡例上網兼check下「猫」，
見到工友﹣恆仔彈左封「猫」話俾我老Blue知佢大哥又有新作品，
就係先個排去左香港大球場映左“香港國際七人欖球賽“！

自己一直都無去過呢類大型國際賽事，
都好想睇下或透過相片感受一下當時氣氛，
好友恆仔亦好努力咁映左唔少相，
其實，呢個賽事特式除左係打波之外，
聚居香港既外籍朋友亦當係喜年華咁玩，
好多觀眾會奇裝異服引人注目外，
氣氛亦好「鬼」熱鬧！！
有興趣想感受一下當日盛況既朋友們，
可到好友個人相簿瀏覽 HONG KONG SEVENS 2007花絮。

Blueman

07年平淡的第一季

2007年4月3日
丁亥年二月十六
早

〈時間〉
不經不覺踏入07年第四個月份。
我老Blue年頭定下甚麼甚麼計劃，
不論投資、學習、模型及攝影等等原地踏步咁，
都依家未有任何進展.....。
似乎近幾個月既工作完全佔據哂我所有時間吧？

計下計下，原來我老Blue由年頭到依家四月頭都係放左14日假（唔計通宵更個半日假）,
即係平均每個月得4.67日係放假，
不過，有D工友仲厲害，
幾乎每個禮拜都要返足工咁劑，超強！！
唔知幾時先至輪到我放大假呢？
期待......。

Blueman