平常道

2007年3月31日
丁亥年二月十三
凌晨

〈個人〉
呢幾日無寫Blog。
並唔係無話題，相反係太多事想寫但係唔知點解落唔到手，
或者係呆左起“芒“面前，大腦完全停左咁，好奇怪？
簡單D講係呢幾日大事、小事、好事及壞事一下子湧埋黎，
有點招架唔住.......。

有朋友話EQ比IQ更為重要，我相信！
因為起EQ低既人作出錯誤決定比IQ低既人作出決定後果會更差，
自己以前亦好多時犯上前者既錯誤，
不過，碰得釘多自然會吸取唔少教訓囉！
近呢兩年開始時刻提醒自己好多時候以平常心待之，
小小心理改變原來發覺對人對事睇法都好唔同？
不過知易行難，最初幾個月只係得三、幾個禮拜做到，
久而久之，每個月都可以keep住，
但係要時時刻刻都心境都可以保持就太難囉！！！

除左練習運用平常心之外，
呢幾日更發覺有樣比平常心更重要既係﹣「理解」！
用平常心看待一件事之後，
再理解事情因果，思路又會更加清𥇦。

“萬法皆空、因果不空“，慢慢開始睇會到........。
呢幾日原來全部都係平常事，何足掛齒呢？

Blueman

第一部CD-Player

2007年3月28日
丁亥年二月初十
下午

〈音响〉
我老Blue除左玩攝影及模型外，
亦都好喜愛聽歌，
尤其一邊砌模型或上網，一邊聽歌，
簡直係最高享受！！

不過，由於自己好多時候都匿起房砌模型或上網，
順理成章，套小型音响組合就擺左入房。
由於地方有限，加上自己唔算乜野音响發燒友，
聽歌都係用部DVD機黎play CD咋！
前排為家母買部DVD錄影機既時候都有望過下D CD-Player，
但係個排又無乜「筆直」起手，
又掉淡左呢件事。

適逢期會，月頭有工友問我老Blue有無興趣接佢部CD-Player喎，
一講個型號就係我老Blue有興趣個隻CAMBRIDGE AUDIO azur 640C Ver. 2.0，
仲要俾個友情二手價加送audioquest訊號線，
二話不說咁交易成功！！
就係咁買左生平第一部CD-Player返屋企，
聽左大半個月以來，
對我呢D低級音响用家來講，
配合部土砲膽機仔加書架喇叭後，
簡直超出預期水準，非常滿意及超值！
自己對音响認識有限，
但係音色上已經比之前明顯好好多囉！！

不過，亦有工友開始建議下一步開始要換喇叭線、訊號線及電源線呢D「高危」補品.....。
開始感覺到音响呢家野的確係「危險品」。


Blueman

追逐Heroes

2007年3月24日
丁亥年二月初六
夜

〈天氣〉
香港每逢踏入三、四月份，
天氣開始回暖兼帶點濕笠，
成個人又濕又重，
好無活力咁......。

不過，唔知各位攝影發燒友，
最近又濕又焗既天氣有無為各下心愛既器材做好除濕功夫呢？
我老Blue就上個月已經換哂全新既防潮珠囉！

〈影視〉
先個輪自己起呢個Blog都有提過一套家陣美國好hit既劇集﹣Heroes。
我老Blue睇左頭個幾集之後，
著迷程度不下於至愛劇集﹣24。
雖然劇情屬於玩超能力既故仔，
呢類戲種老實講並唔係新鮮，
但係故事及角式多樣化，
手法好港、日漫畫風格！！
令到公司好多同事都有追呢套戲，
亦有工友經同事間推介下，
力保同大家劇情同步，用左工餘時間四晚煲哂18集（暫時播到18集）......。
聽講香港明珠已經買左呢套劇，
會起七月播喎！
個買手觸角都幾敏銳。
家陣一班同事、工友們都好期待下個月播出既第19集，
因為劇情去到大家期待既高潮位﹣最強對最強（有點龍珠﹣悟空對菲利大王feel）！！

不過，最早推介呢套好野既工友，
反而到依家一集都未睇喎？
佢話要等齊一季先至睇，
希望到時佢唔怪其他工友泄露相關重要劇情就得囉.....

〈模型〉
先個幾日，買左今期「電擊Hobby」中文版四月號，
除左封面係介紹日本高手點樣砌隻MG-Ｈi Nu-2外，
亦有一樣令香港人驚喜既事報導喎。
就係有關“第8代電擊高達模型王2006“，
總冠軍得主竟然係年約32歲香港既代表Tomoon Lee，
參賽既模型仲要係用最平、最唔起眼既機種﹣RB-79K BALL (MG)，
做出一半機體用透視內部機件既切割形式展示狀態，
技驚四座！！
仲有原來呢位李生去年亦取下冠軍，
即係話今鋪佢係冧莊，相當厲害！！！

Blueman

M.S. Warehouse五分二完成

2007年3月23日
丁亥年二月初五
夜

〈倉庫〉
我老Blue呢壇曠日持久既「M.S.倉庫」工程，
今日終於完成左五分二既進度囉！！
自己組合左個地板，
加埋個地台之後，
都發覺好大下！
從DC仔拍攝後既效果都滿意個面積好夠用。

先前未諗到既三面牆壁亦都已經有解決方案，
家下係唔知仲要用幾多時間攪落去咁解！
自己都好期待呢個倉庫情景完成之後既效果會係點......。

〈模型〉
繼MG渣古下月會出2.0版本外，
有報導跟住係會出紅彗星MS-06S Ver. 2.0版，
實在對我老Blue黎講係好喜訊，
因為自己買左咁多隻MG，
其實一隻06S都未買過！！
而聽講七月居然出MS-14 Ver. 2.0......。

不過，現階段一定要儘快完成個倉庫先至可以再砌MG囉！！

〈相機〉
自O記宣佈左E-410/E-510呢兩部新機之後，
我老Blue都好期待睇佢既sample，
近日終於起O記官網見到E-410既官方Sample出左。
自己睇完覺得呢部E-410用左樂聲粒"Live CMOS"，
出來質感同自己部E-300好有分別，
起解像及夥粒方面的確比Kodak FFT CCD好有進步，
但係色彩方面就無左Kodak個份濃厚質感，
現階段官方軟體版本係Ver. 0.8，
希望都出街個日有正式既Ver. 1.0等其他用家報告先至再評論呢部機。

Blueman

香港花卉展覽2007

2007年3月21日
丁亥年二月初三（春分）
夜

〈攝影〉
自己一向好少以花做攝影題材，
不過，前幾日經電視新聞睇到今年花展除左有以往比較香港少見既花種外，
更加入比較大型機動盆景做出既昆蟲形態，
相當有趣，就係咁尋日同埋工友K一齊去左維園湊熱鬧！

唔知係咪我老Blue太耐無用個部E-300，
如常執左一機三鏡，同埋拎埋支G嫂1號腳上身，
準備出門口之際，
發覺點解好似重左咁多咁？
唉！似乎自己呢半年真係無郁過部機出街囉......。
但係最後尾都無減磅出門！

以為尋日係閒日應該無咁多人去睇花展，
結果同工友K去到都呆左！
一樣咁人山人海.....。
入到去大家原入場路線分頭獵影，
慶幸當日下午天色尚算唔錯，
有一半機會可以手持唔駛落腳映。
雖然入場人數多，但係好多位都唔駛同其他影友爭位算係咁囉！
不過可能太耐無拎過套機出街，
一邊映一邊有吃力既感覺。

就係咁用左三個鐘映完之後，
匆匆咁食過飯之後又要返通宵班，
放工之後有D想死既感覺........。

今日亦都整理左呢一輯花展既相，
各位網友有興趣可click入呢個網址﹣香港花卉展覽2007觀看。

Blueman

日本O記新代言人﹣宫崎葵

2007年3月16日
丁亥年正月廿七
夜

〈相機〉
自PMA2007完結後，
O記宣佈左好多好消息俾用家外，
各大有關O記消息既網站一下子再度活躍起黎。
不過，正如我老Blue起3月5日咁講，
有好既產品都要配合好既宣傳，
先至廣為用家認識。
起單反界最成功做推廣莫過於C記！

今日上O記用家網站，
見到有關日本O記話事人﹣大久保 雅治 起官網發表左O記將會有新一輪宣傳攻勢喎！
首先請左現今日本人氣女優﹣宮崎葵（宮﨑あおい Aoi Miyazaki ﹣電影Nana女主角）做E系新機既代言人，
除左會起日本雜誌、電視3月20日會出現呢個新廣告外，
更起網上攪左個叫「E GOES to WORLD 發現之旅」既宣傳網站。
我老Blue上過去望過，暫時只得張宫崎葵拎住E-410既硬照咁多，
淨係話coming soon喎！
聽講呢個網站主要內容係環繞女性用家用DSLR既拍攝經驗，
至於點解會揀宫崎葵，據聞呢位女優自幼已經好鐘意映相喎，
有網友仲貼左張有關佢細細個已經用單反機既相（從圖片觀察好似係Canon AE-1），
可能係有呢個原因，加上O記借勢開發新用戶群，
從宣傳戰略上希望借此吸引新一代年輕女性用戶卦！？
咁唔知香港O記會唔會有咁既宣傳策略呢？

Blueman

我看PMA2007

＊＊Sony其下新款DSLR模型**


＊＊Olympus最新鏡頭Road Map＊＊


＊＊Panasonic最新大光圈Leica定焦鏡＊＊


＊＊Pentax最新長鏡預覽＊＊


＊＊Sigma展示其下巨砲200-500mm F2.8 APO EX DG＊＊


2007年3月12日
丁亥年正月廿三
凌晨

〈相機〉
今年位於美國Las Vegas為期四日既PMA（Photo Marketing Association Annual Show）展覽，
終於正式完結。
相信好多攝影愛好者、相機發燒友都已經從網上各方渠道得知大概，
我老Blue就覺得今年PMA好熱鬧，
原因好多相機品牌互有好消息俾粉絲們，
亦都唔會過度集中哂响兩大龍頭（N記、C記）身上。

自己趁呢個時候來個各大牌子DSLR既觀感：
先講下C記，今年就把閉囉，
開Show前發放左旗艦EOS-1D MARK-III，
即刻惹來廻響，頭威頭勢，
C記呢隻單反大藍籌，相信仍然保持市場龍頭地位。
至於N記，C記幾廿年既單反界既宿敵，
今年可能會令粉絲們失望，PMA只公佈左D40x，
好明顯同C記部400D，起低階市場爭飯食！
至於好多N記朋友期望既D3仲未有消息。
不過，我老Blue相信N記無損單反界受追捧既大藍籌地位。
另外同系「富記」因早前推出左蛇五，
今年PMA未有驚喜之作！
兩者龍頭維持「增持」級別。

跟住講下D單反界既二線股及半新股：
O記今年真係睇到佢多年努力既成績出黎，
連推兩部DSLR及E-1後繼機既Prototype，
跟住公佈左一系列既新鏡頭，
引起O記一眾粉絲歡呼聲！！
連帶同系（4/3 system）樂聲呢隻單反界半新股都有新定焦“奶“鏡出，
以壯聲勢！！
希望今次會為4/3留住原有支持者外，
可能會吸引新既4/3用家都未定？
起碼唔似得去年有過一眾粉絲有25跡象，發起惡性拋售潮....
有貨者可「持有」，待公佈E-3後可考慮「增持」,
但有數據顯示已有好多O記用戶為其下舊鏡有拋售跡象，
因為眾多利好消息帶動，有沽舊鏡換新鏡既憧憬，
O記新用戶未打算換新鏡，可視為今次低價入貨機會。

至於P記呢隻單反機實力股，
自去年推出K100D及K10D，即刻吸引到好多支持者追捧，
當堂牌頭人氣急升，
今年亦公佈左好多P記粉絲們流哂口水即高階大光圈變焦鏡系列及其鏡頭路線圖，
攪到個勢好強下，後市都幾睇好。
有貨者可「持有」。

最後要提既係「索記」（前身為M記），
自收購左M記後，只係出過部A100之後無厘聲氣，
之前一眾前M家粉絲擔心索記淨係掛住攪PS3同埋Blue-ray，
俾人感覺佢對單反愛理不理既態度.....。
誰不知PMA開幕個日黎個突襲，宣佈重整DSLR陣線，
隊左兩部類似高階及專業級數既dummy機出黎，
引來索記用家驚喜及猜測其路向，
索記用戶一下子由淡友轉為好友，
似乎索記呢隻半新股正密謀大計矣！
從大市睇待新機公佈，等待「買入」訊號。

之於一眾比較冷門股如下：
「死馬」推出SD14未見口碑，有待跟各方面跟進；
上年一度染指DSLR既家電品牌「三叔」今年起DSLR度無哂反應（唔通知難而退？）；
但係最離奇既係少左個「三叔」，今年PMA多左個「通用」（General Imaging）出黎湊熱鬧，
隊左部Prosumer DC-X1試水深乎？
以上股份值搏率唔高兼有一定風險，後市睇淡。

最後，我老Blue覺得DSLR今年後市將會極度精彩！
老套D講句維持個別發展，市場生態平衡左，
唔駛偏埋某一、兩隻貨源。
因為由SLR到AF SLR時代，
單反界最高峰往往由頂級機帶動，
而頂級單反又往往代表左某個相機品牌某程度最高技術及成就。
今年PMA已經見唔到有關菲林既產品，
即表示DSLR已經完完全全佔據市場，
當然，菲林仍有佢既用家市場，不過我相信佔好少既比例囉！
亦因為DSLR不論技術及價格廣為用家接受之外，
各品牌除左兩大龍頭“定期“推出頂級機以保持業界領導地位，
其餘二線品牌亦努力趕上，
相信今年內其餘三大品牌亦會相繼推出自家開發既頂級機挽留支持或吸引其他支持者加入，
情況有點似十幾廿年前菲林、手動DSLR/AF DSLR一樣咁激烈！
C記：New F1>EOS 1>EOS 1Ds/1D Mark-III
N記：F2AS>F6>D2後繼機？
P記：LX>Z-1p>K-1D?
M/索記：XE/X-1motor>Dynax-9>Alpha-1?
O記：OM1>放棄AF市場>E-1後繼機？
奶記：R系＞放棄AF市場＞R+Digital Modul奮戰到底...
康記：RTS系＞N-1＞數碼無以為繼，最終摺埋收場.....

至於有關衍生工具，如圖記、騰記及死馬今年亦見有承接，
相信往後亦會相繼推出人有我平或人無我有既副廠鏡黎迎合市場。

免責聲明：本人現持有O記E-300雙鏡組合，
未打算對上述貨品作買入或溝貨意途，
朋友們唔好引我啦！
俾意見另計.........嘻嘻！

如果各位對今屆PMA有任何意見、睇法，不妨起度發表下。

Blueman

MG版ZAKU-II Ver 2.0初現

＊＊Gunpla模型展發表的最新MG Zaku II Ver 2.0＊＊





2007年3月10日
丁亥年正月廿一
凌晨

〈模型〉
雖然遠在美國舉行中既PMA2007有好多新野發表，
但係我老Blue仍然想等到最後一日，
先至談論今屆PMA。

今日要講既係日本靜岡Gunpla模型展，
當中令我老Blue興奮既係終於見到MG版渣古-II MS-06/J Ver 2.0既初版。
好正，實在太正！
呢隻渣古2.0應該係笨大起MG模型中最高水準一隻，
當然更加期待傳聞中既MG No.100究竟係邊隻？
講番呢隻渣古2.0以模型關節活動能力簡直係無懈可擊，
完全做到哂動畫既「高難度」動作！
兼且見到細緻度提昇左唔少，
最難得既係砌渣古最討厭既部份“串珠仔“改左，
部件已經幫你串埋，實在太感動啦！！！
而售價只不過$3675日元，
比想像平！
應該係近期MG模型黎講最吸引既型號！
預定四月發行。

Blueman

對E-1後繼機的期望

2007年3月7日
丁亥年正月十八
下午

〈相機〉
聽日就係好多相機發燒友留意既PMA2007開幕日子。
到今日為止已經有關最新DSLR公佈既品牌有Canon、Nikon、Olympus，
至於Pentax及Sony就仲未有任何DSLR既公佈。
會唔會留待開幕之後俾一眾粉絲驚喜，還是失望？
有待聽日揭繞！

去年係OM粉絲失望既一年，
今年係OM俾人驚喜既一年。
相信到今日為止，應該可以留住大部份OM粉絲，
唔駛大哎25囉！
祇少我老Blue可以睇多佢一年。

自從早幾日起日本OM發佈左最新E-1後繼機既prototype既樣之後，
我老Blue從照片睇到呢部prototype完成度都幾高下！
唔似得去年photokina咁擺舊木頭模型嚇親一眾OM粉絲嘛。
最有驚喜係呢部prototype見到部機背面個大型LCD係揭轉式，
如無意外應該係第一部DSLR行扭擰LCD玩Live View，
咪話唔突破！

雖然OM到今日為止，
仍未公佈有關呢部E-1後繼機任何細節，
連基本型號都未知？
傳聞呢部後繼機叫E-3喎！
點解唔會叫E-2呢？
因為E-2呢個名俾Nikon早年登記左，
邊部E-2？咪就係好早年Nikon同Fujifilm合作出既第一部DSLR囉！
至於係咪真係叫E-3，
還是會叫E-1x、E-1 Mark-II或者E-1 Pro呢？

我老Blue對呢部E-1後繼機有乜期望？
希望佢既Spec會係如下就正囉：
千五萬像素行14bit color；
連拍每秒可達5張；
RAW buffer可連續拍攝超過15張以上；
超過15點對焦點；
對焦點有D2X、1D Mk-III咁可以自由選擇對焦區；
對焦點可與測光同步；
有多重重點平均測光；
觀景器好似K10D咁採用放大式Prism；
對焦屏可顯示九宮格（據聞E-510既Live View已有此功能）；
機頂內閃可無線引發後繼新燈（希望真係有無線新閃燈啦）等等。
以上如果真係有既話，
唔知會賣到幾多錢囉？

Blueman

最快的後繼機-D40x

＊＊M.S.倉庫製作中＊＊


＊＊事隔四個多月，D40又出新版！＊＊


2007年3月6日
丁亥年正月十七（驚蟄）
夜

〈模型〉
我老Blue計劃既「M.S.Warehouse」，
由於早前草圖有修改，
加上又買唔到所需用既Lego底板，
攪到呢個倉庫製作進度唔上唔落，好弊吓！
又經過一輪修改，家陣仲未度掂兩邊牆壁點樣做好？
今日一於好少理，
做左可以做既工夫先，如果唔係淨掛住攪呢個倉庫，
其他MG睇怕今年都砌唔到一隻仲大件事！

於是，今日終於由地板著手，
開始度位劃線，
因為一共要做四塊約20X20cm既膠片，
每塊膠片又一模一樣加要分左右咁再細分廿六塊唔同大細既膠片，
淨係畫線都畫左我好幾個鐘囉，
真係畫到眼都花埋！！
透吓氣一陣先至再𠝹埋佢。

〈相機〉
趁呢段回氣時間，
上網睇吓有無有關PMA2007前夕既最新戰況？
有呀！Nikon終於有野發表啦！
估唔到，真係估唔估！？
今鋪N記居然宣佈新既DSLR-D40x，
喂？D40出左無耐至喎？咁快有後繼機！
睇翻資料部D40無錯係去年2006年11月16日宣佈，
距離呢部D40x只不過四個月到，
咁咪仲短命過O記部E-400（宣佈日期為2006年9月14日），
估唔到家陣連入門級DSLR亦開始成為一眾DC仔既宿命﹣週期勁短。

睇完我老Blue以為呢部D40會停產？
原來有網友繼後話官方網有提到D40/D40x會同時發賣，
話俾客仔多D選擇喎！
如果你打算買D40，
你會揀邊部呢？

〈股市〉
今日好多報章大大篇幅咁報導尋日大跌市既新聞，
尋日恆指一共跌左777點，為港股有史以來第五大單日跌幅。
自己好彩無貨在手，避過一劫。
雖然今日大市顯著反彈，
但係暫時都係靜觀其變，
等待上升軋形成先再入市都未遲！

〈電腦〉
絕對對我老Blue係一個好消息！
因為終於知道Adobe起3月27日會宣佈推出期待以久既CS3雙平台版本。
自從MAC機轉左新機行Intel-Mac之後，
我老Blue都係用緊部行G4既Mac Mini到依家，
原因用緊既主力軟件係CS2居多，
但係CS2如果起Intel-Mac到行，知道唔會快得去邊，
所以攪到我遲遲到唔敢up-grade部Mac，
家陣可以等CS3出左之後，等D有關報告先睇下有幾好，
配合埋夏季Mac推出OS-X 10.5，
先至決定出機！

Blueman

OLYMPUS新世代

2007年3月5日
丁亥年正月十六
下午

〈相機〉
今日Olympus終於宣佈左E-System既新消息。
除左尋日有提到既兩款新機（E-410、E-510）外，
至於我老Blue期待既E-1後繼機起公佈中只提及會今年會出，
一齊有關細節仍然欠奉，真係唔知佢想點？
不過，據發佈既圖片中睇到呢部E-1後繼機個樣無之前見到個舊「木頭模型」咁肉酸，
尤其個直度改左，成個Look「正常」左，
起碼呢個樣Pro好多。
另外有驚喜係呢篇發佈𥚃面提及將會推出多枝新鏡會有SWD（Supersoic Wave Drive）超聲波摩打，
雖然呢樣野已經唔係乜咁特別，
但係起O記友心目中，無呢樣未免有落後大市之嫌！
新鏡包括：
ZD ED12-60mm F2.8-4.0 SWD
ZD ED 50-200mm F2.8-3.5 SWD （新版本）
ZD ED 14-35mm F2.0 SWD
ZD 70-300mm F4.0-5.6
2X Teleconverter
其中最矚目莫過於講左年幾都無哂聲氣既14-35mm呢枝皇牌鏡頭。
經過今日呢個發佈，
突然間O記E-System已經齊備哂DSLR現今技術大成，
包括：機身除塵系統、機身防震系統、Live View技術、超聲波摩打對焦、過千萬像素
及一系列恆定大光圈Zoom鏡。
照咁睇O記呢個E-System終於有條件可以同其他品牌競賽，
不致於落後大市，
問題係今後等E-1後繼機順利出左及打後如何做好宣傳工夫？

至於我老Blue經過今日之後，
O記還可以繼續玩落去，
還看E-1後繼機來臨.......。

Blueman

OLYMPUS E-Series第二代

2007年3月4日
丁亥年正月十五（元宵）
夜

〈相機〉
近日上網睇有關相機最新資料，
除左大家都知道既C記1仔MK-III之外。
另外，對我老Blue又愛又恨既O記早排起官網出左個「燈謎」（如圖），
話聽日（3月5日）會公佈兩款新機喎。

今日上網終於有西班牙網站“偷步“發放左呢兩部新機既相片。
分別係叫﹣E-510及E-410兩部低階機種，
最大賣點係E-510集當今DSLR最多人談論既功能於一身；
過千萬像素、防塵、機身防震及Live View等等。
可能呢兩部屬於低階機種，
並唔係我期待既E-1後繼機，
所以興趣不大！

但係有網友好小心眼見到官圖明明有三部機既黑影，
咁點解得兩部機既資料呢？
此話一出，即時惹來唔少網友又起到估會唔會有E-1後繼機或者多一部中階機既新消息呀？
因為自己由買第一部DSLR E-300到而家未轉機都係等O記一部似樣既中、高階機種，
唔經唔覺咁就兩年囉！！
之前起呢個Blog到講個好幾次想轉系統，
但每次一諗到轉系統，一闊三大既問題就擱置左！
希望聽日O記會有D驚喜俾用家啦！
不過，又係個句，對O記已經唔敢抱太大期望.......。

Blueman

流言「四」散

＊＊今日以靚價入左呢盒R3＊＊




2007年3月3日
丁亥年正月十四
夜

〈投資〉
估唔到踏入三月份，
我老Blue覺得月頭就成為「流言之月」。
第一件事係呢個星期全球股市紛紛下挫，
本港恆指由星期一20520點開市到星期五收市19442點，
共跌左1078點，是次調整會否繼續向下，無人會知？
不過，已經好多財經專欄估大市仍會向下尋底喎？
大家又睇下如果係既話，支持位會去到邊？
自己就無貨，繼續睇戲.....。

〈相機〉
第二件事係：
自從Canon宣佈左第三代機王EOS-1D Mark-III之後，
一眾C記粉絲高興都黎唔切，
已經好期待咁諗EOS-5D後繼機會如何如何，
會唔會加入除塵、14bit color、有無Live View等等「新元素」落去？
而另一邊廂N記真係無哂動靜喎？
今年PMA2007唔通真係無任何有關DSLR既新野話俾人聽？
我諗唔會卦？
上網已經有好多N記粉絲好期望有D3既出現！
自從DSLR出現已來，
仲有好多人為全幅面機種（我指係sensor尺寸係1:1-24X36mm個隻）有爭議。
呢個爭議我老Blue唔識答，
不過，我認為有爭議即係有需求啦！
咁Canon呢方面真係好識做生意，
只要有市場就有貨賣，仲要係做Lead個個。
咁大家又睇下N記會唔會好似C記咁可以開咁多條戰線（1X-1.3X-1.6X）對打啦！

〈模型〉
第三件事就關於模型囉！
今日終於起避過頭水高位唔入，
等到二輪水靚價（低於三百）入左R3版重戰機﹣L.Gaim Mark-II模型！
另外網上有關模型既莫過於有人發表左日本笨大呢排好大力咁宣傳佢既MG模型No.100倒數。
呢個話題其實已經早起去年尾發表MG-Strike Freedom Gundam既時候，
已經有網友留意到會場有提示到呢樣野，
不過，今次有關呢隻100號會用特集形式宣傳，
先至再度引起大家關注，
當然，好多網友包括我老Blue估九成九都係會以RX-78-2推出，
雖然已經之前推出過好多版本，
甚至之前推出既MG-一年戰爭版廣受好評，
始終RX-78-2係笨大既靈魂、神主牌，
No.100應該會係佢做代表先至似樣卦？
不過問題今次呢隻100號會唔會個價高過Ni-Nu 7500日元呢？
No.100 MG賣過萬日元？
因為呢排笨大出D新野都幾高水下！！

〈工作〉
最後要提既係公司踏入三月，
工作量好快咁回復正常，
不過好多工友關心係傳公司將會有花紅分喎？
呢個傳言可信性有幾高？我老Blue就唔敢估囉！
因為希望遇大，失望遇大嘛！！
總之上述傳聞、流言，
相信經過三月就好快得到證實。

“股市無斬穫，
相機無著落，
模型未砌哂，
返工見頻撲！“

Blueman