模型存貨

2006年12月30日
丙戌年十一月十一
夜

〈網絡〉
台灣南部前幾日既大地震，
居然震斷左香港對外既六條光纖電纜，
據報道衹少要五至七日先至修理好喎！
就係咁家陣上網有D似回歸56K年代，
連呢篇Blog都係記錄後再後加。

〈股市〉
早兩日（28號），股市收市前終於衝破二萬點，
收報20001咁大把！
但係同日，我老Blue就已經將手頭上既餘貨，
全部沽清，
自問無咁既膽量陪其他朋友參加呢個Crazy Party囉！
不過，近兩日聽到身邊有無玩開股票既工友蠢蠢欲試......。
係咪一個「警告訊號」呢？

〈人事〉
同日28號，呢日亦係相識多年既工友﹣阿神起公司最後一日，
跟住邁向人生新既一頁，
勇闖異地開創事業既新天地！
在此我老Blue祝願呢位老友事業順景、馬到功成！！

〈模型〉
股票收手、網絡癱瘓。
咁除左返工，我老Blue仲有乜野攪作？
梗係留起屋企砌模型啦！！
呢幾日自己忙於砌緊隻RX-93 Nu GUNDAM，
家陣去到上色階段，
經過呢一年砌模型既經驗，
自己開始對用點樣用枝噴筆開始上手，
希望下一年2007會有更多好作品可以同大家分享下啦！

尋日，落去樓下玩具鋪，
驚見MG版﹣自護返貨，
仲係超靚價發售，
結果呢盒模型成為我老Blue2006最後一盒入貨既MG模型，
計計下原來自己買左37盒MG模型，
自己都覺得好離譜下，
最不幸係呢盒“自護“都幾大盒下，
間工作房已經真係再無空間擺得落........！
結果，終於要擺起睡房到。

睇來，2007年除左積極賺錢外，
清理未砌既MG模型亦係首要目標囉！！！

Blueman

攝影初心者

＊＊攝影習作＊＊




2006年12月26日
丙戌年十一月初七
下午

〈器材〉
近排我老Blue返工，
俾一位新同事知我有玩開攝影問我有關器材既小問題？
其實呢位新同事同好多網友問既問題都大同小異，
不外乎呢枝鏡買唔買得過或者邊枝鏡好定唔好之類既問題？
由於呢位同事都係屬於初接觸DSLR，
兼且影齡仲好green，
我老Blue建議呢位同事不如乜都唔好買住，
用手頭上既器材映番一年左右，
如果真係覺得器材唔夠用，
到時唔駛問人都知道會有乜野器材適合自己，
否則發覺自己原來唔係咁鐘意玩DSLR，
但又投資不少金錢落去，就有點浪費囉。
因為，我老Blue都經歷過呢D買器材既心路歷程，
將自己經驗講出來同大家分享一下咁。

家陣自己都享受用部DC仔映相既快感，
不過若然有M8更好啦！！（又發夢.......！＊＊）

Blueman

聖誕節下第14個MG完成

＊＊我老Blue第14個MG-ZETA plus C1＊＊





2006年12月25日
丙戌年十一月初六
凌晨

是日聖誕節，我老Blue祝各位看官聖誕快樂！！

〈模型〉
差不多用左成個月時間，
自己終於起呢個平安夜既晚上，
完成左最新既MG模型﹣ZETA plus C1，
今次呢隻模型上色方面有別原著，
原因係原著色太呆板，
配色用上比較深色，有點邪氣既感覺！
不過，我老Blue砌完之後，
對呢隻C1有點不滿，
不滿在於模型設計上，
完成後活動範圍好細，兼且好難企得穩！
都依家未玩變形.......。

Blueman

聖誕禮物

＊＊2006年最後一款新MG模型﹣Strike Freedom Gundam＊＊


2006年12月22日
丙戌年十一月初三（冬至）
夜

〈節日〉
今日做冬，
我老Blue返早，放工之後都返屋企食飯。

〈個人〉
距離聖誕25號仲有三日。
但係自己呢排公司就忙都飛起！
適逢前日收工見樓下玩具鋪返左我先排提過今年度最喜愛既MG模型﹣ZGMF-X20A STRIKE FREEDOM GUNDAM （特擊自由高達），
雖然入既係普通版，但係yen價都要去到4950日元，
真係仲貴過Nu-Gundam，
相熟鋪頭都要賣成三百有找！！
無計！呢隻SF除左造型實在好得，
包裝盒封面亦都好吸引（見圖）！
最後都入左，當做今年買俾自己既聖誕禮物囉。

〈模型〉
趁近排天氣乾燥，
最好梗係噴油啦，
雖然自己幾忙都好，
都好珍惜呢段時間去攪隻手頭上既MG-C1 plus。
今晚終於噴哂所有部件，
希望年底前可以完成埋佢，
成為今年2006最後一隻MG。

〈股市〉
近排市況大上大落，
眾多散戶爭相炒IPO，
公司亦有好多炒友炒都不亦樂乎！
至於我老Blue就靜觀其變，
嚴守止蝕位！
但係就聞到陣陣?味......。
今日有工友就同我老Blue講已經放哂手頭上既貨，
歡渡聖誕喎！

Blueman

年終收爐

＊＊收爐過後，開始另一條戰線﹣模型！＊＊


2006年12月17日
丙戌年十月廿七
夜

〈投資〉
雖然距離2007年仲有兩個禮拜。
但係我老Blue已經尋日為自己既投資埋數，
結果回報有24巴仙，比預期多，
當然隨06年度下半年市況旺盛，
可能好多朋友今年既利潤比我老Blue還要好。

不過，呢一年開始學習投資，
的確初期懷著戰戰競競既心情入市，
中間經歷過貪與懼既鬥爭，
亦嘗過睇錯市及出、入既失誤，
慶幸自己處於學習階段，
唔敢大注搏殺，
只在吸取經驗，
反正未來機會多的是嘛！
總括來講，今年既成積自己已經好滿意。

但係，自己見近排市況有點唔理智兼有點瘋狂。
開始將手上既貨續漸減持，
有待出現比較大幅度既調整才重新部署，
一齊留待2007年再打算囉！
阿久津老師話齋：未來係充滿無限既可能性！

依家收爐後，
積極砌模型好過！！

〈模型〉
今日，我老Blue開始為隻MG-C1 plus上色，
雖然天文台掛上寒冷警告，
但係呢D天氣最適合噴模型，
因為容易風乾嘛！！

高達模型座

＊＊晚霞餘輝＊＊

2006年12月16日
丙戌年十月廿六
夜

〈模型〉
今日我老Blue照例落樓下玩具鋪「巡鋪」。
發覺商場其中一間起二樓既玩具鋪因先前內部裝修後重開，
雖然鋪面係大左些少，但係D貨好似無乜點多到咁？
不過，好多模型都比之前平左，
以後又多左個買模型既“好地方“！

另外，自己經常去開既樓下熟鋪頭，
見佢返左笨大專為其下模型而出既模型座（ACTION BASE BLACK 1)，
其實此模型座據稱乃早前1/100模型附送既特別版既模型座改良而發售版本，
呢件模型座買點係幾乎笨大其下模型系列都合用，
兼且可以幾個模型座複數連結！！
包裝上說明：SD BB戰士、1/144、HG、1/100、MG及R3等系列。
只要各下好似我老Blue咁有以上系列模型，
而缺乏擺設裝備，相信都好難幸免囉！！
售三十大元左右，一盒BB模型既份量。
我老Blue頭水返貨而經買唔到，
今次返貨把握良機，入左三個咁大把！

不過，小心眼既老Blue望到個包裝上面有個問題？
點解呢包野叫：ACTION BASE BLACK "1"呢？
“1“字係代表跟住會有"2“呢？
唔通會出兵工廠系列咁大？
如果係既話，笨大呢鋪真係好毒囉......。

＊＊高達模型座＊＊



Blueman

我愛ER6耳膠

＊＊近一年起旺地多左好多呢種用玻璃做外牆的樓上鋪。＊＊



2006年12月13日
丙戌年十月廿三
夜

〈耳膠〉
我老Blue自從10月尾，
對UM-2耳機換左新既Etymotic ER6-14雙節耳膠後，
因為呢對耳膠隔音能力好高，出外聽歌效果不俗，
自己已經無左用原裝耳綿好耐囉！

不過，原來呢對耳機原來對工作都有好大好處。
點解？就好似尋晚我老Blue返通宵咁，
同時間亦有兩位一男一女出名吵耳非常既同事返工，
男同事有“大聲公“之外號，屬分貝無限兼低頻放大器；
而女同事有“女吱喳“之美譽，屬女高音兼每字略帶震音，有點似人型音叉。
兩者除左音域不同外，共通點係內容係有講等於無講個隻，
令人聽完有一種極度乏味既感覺！！

佢地尋晚分別起唔同既崗位處工作，
自己就夾起中間，
極度“享受“一左一右超高音及勁低頻既人間靚聲.....。
最後太過“投入“佢地既“音場“入面，
未能抽離面對眼前工作.....。
終於自己要出動私伙-iPod，
憑著轉左呢對新耳膠，
的確阻擋左唔少不必要既超高音及勁低頻，
再次專心投入工作去........。

Blueman

懶洋洋的十二月

＊＊踏入十二月，燈飾處處。＊＊



2006年12月12日
丙戌年十月廿二
夜

〈計劃〉
踏入十二月中，
我老Blue本應好好計劃一下新一年度。
但係唔知點解都依家仲未的起心肝去諗喎，
可能呢排天氣開始轉凍，
自己都變得有點懶散.....。

反而起公司，有好多結婚無耐有細佬或將有家室既工友，
人成熟左諗起唔會好似後生咁輕狂，
開始諗野會以家庭為優先，
言談間開始會為自己既工作前景及財務作打算。

雖然今年年頭自己計劃左好多野，
當中有d過份理想而未能達成，
但係整體上今年進度尚算理想，
睇來下一年度既計劃應再務實為主囉！！

Blueman

時間、天氣

2006年12月8日
丙戌年十月十八
傍晚

〈個人〉
放左兩個禮拜假期後，
返工幾日，唔知係自己過份「投入」還是工作繁重，
攪到頸梗膊痛......。

〈時間〉
前晚，我老Blue出街食飯，
途經之處才發覺小時候一所小學不再，
取而代之係一所現代化既專上學院。
感覺上呢橦建築物出現，好似從天而降咁！
時間如果自己唔為意，
的確流走得好快，
原來自己亦都走左人生既一半......。

＊＊一所新建成既專上學院＊＊


〈天氣〉
香港天氣一年?面都唔知有幾多日子係好天氣。
呢日行街抬頭見個天好藍，
係我老Blue最喜愛既藍色，
唔知點解突然感覺有種天意難測。
唔好高估自己既能力......。

＊＊我最愛的藍天＊＊


〈模型〉
呢幾日除左返工外，
亦都好積極咁砌緊隻MG-RX93，
家陣都砌左一大半，
初步覺得造型都唔錯！

可惡！！上網知道我下期我最like既MG-STRIKE FREEDOM GUNDAM X-20A，
笨大同時間居然出兩個版本，
一個為普通版，另一個為電鍍關節、全攻型展開模式既特別版（MG 1/100 Strike Freedom Gundam Full Burst Mode）。
而特別版仲賣到7000日元，比普通版貴一倍咁誇添。
上網見過兩個盒面包裝封面都超正！
尤其係特別版，
可以講話係我老Blue見咁多個MG封面設計中，
最靚既一個！！
不過，自己無理由為左個封面就去買架？

＊＊MG RX-93 Nu Gundam製作中＊＊

＊＊MG Strike Freedom Gundam特別版＊＊


Blueman

回歸第一天

＊＊破曉時份，又係新的一天！＊＊


2006年12月4日
丙戌年十月十四
傍晚

〈個人〉
今日我老Blue返早，
的確放左兩個禮拜假之後，
自己都好擔心可唔可應付到突如其來既工作量？
好慶幸一開工，自己就好快適應工作上既步伐。
但係有關公司有轉變，
呢D傳言就不斷起我耳邊傳來傳去，
故勿論是真是假？
我等小職員暫時都係好被動，
既然係咁，唔擔心得太多！

〈財經〉
除左返工外，
亦同D有投資既工友講下呢排既股市，
好多工友都起呢排分別減持手頭上既貨，
甚至乎已經沽貨準備過聖誕，
都係一件好事！
現階段採取觀望態度都好過入市玩探險......！

自己現階段無乜損失，
亦無乜策略，
睇怕都係留待07年打後再作打算囉！

Blueman

本年度長假最後之日

＊＊呢日路經旺角，見有年老表演者賣藝...。＊＊


2006年12月3日
丙戌年十月十三
夜

〈假期〉
話咁快我老Blue今日已經到左兩星期長假最後一日。
呢個長假自己覺得幾充實下，
每日都好似好多野做咁。
不過，點都好聽日就要回歸現實啦！
兼且聽D工友講，
呢排公司忙都不得了；
加上呢排股市波動非常，
經過兩個星期既充電，
希望自己兩方面都可以應付到啦！！

〈模型〉
今日，無打算為隻MG-Z plus C1上色，
反而好有興趣咁開左新MG模型﹣RX-93 Nu Gundam。
Nu Gundam係我老Blue最喜歡既三隻高達其中一款，
其餘兩款分別係：RX-78 原祖高達及Freedom Gundam/Strike Freedom Gundam。
呢款MG屬於2000年設計，體積應該係同比例MG中最大既高達類別，
暫時砌左兩手一腳，
組合唔算困難，
不過以我老Blue往績推算，
應該都要個零月先至可以完成.....。

〈攝影〉
雖然呢一年少用左部DSLR，
不過，自從上月入左部DC仔之後，
反而因為部DC機體積細，
好多時出街都會放落隨身袋，
映相方便左。
衹少個Blog都多左D相同大家分享下！

Blueman

木馬號EX版上市

＊＊新鮮出爐既EX模型﹣木馬號＊＊


2006年12月2日
丙戌年十月十二
下午

〈模型〉
自我老Blue由曼谷返香港幾日，
都無落樓下間玩具鋪行下。
於是趁得閒，落左去睇下有乜新貨啦！
由於今日星期六，玩具鋪比較多客，
但係門口已擺左好多新貨出來，
我老Blue入到去，鋪頭老細何生已經話今水返左好多貨，
門口好幾件新模型全部俾客留哂！
好彩俾我見到盒自己期待以久既EX模型﹣木馬號（SCV-70 WHITE BASE），
淨返兩盒，俾我同一時間入門口既另一個玩家掃埋，
真係行遲一步都要等下一水囉。

自己一向玩開MG版模型，
從未掂過EX版系列，
因為俾我老Blue感覺，
EX版比較適合高階玩家，
整體上以簡單組合，但零件精雕細琢，
做模精細為主，
有朋友玩過話質量近似手辦模型喎！
雖然係咁，但係呢隻木馬號實在太經典啦，
唔買唔甘心。

除左買左呢盒木馬號外，
亦都見MG版ZZ Gundam番左貨，
仲要係超靚價（兩舊水有找）！
當然我入埋貨。
返到屋企開盒數件，
就發覺MG版模型以量計抵過EX版好多好多！
點解咁講？
因為一盒曉變型兼砌出來大大隻既MG-ZZ，
淨係部件都有成廿一塊咁多，
都係賣兩舊水唔駛；
相反，隻1:1700既EX木馬號，
無乜點分色得過七塊部件，
就賣成二佰幾銀，
感覺上就貴左D囉！

依家就係咁諗，
等我老Blue砌完之後，
可能又另外一個睇法都未定？
至於另外一盒，
最期待出現既MG模型，
當然就係Strke Freedom Gundam啦！！

題外話：
其實身處香港地玩模型已經好幸福囉，
自去完泰國，見到D入口既MG模型賣到好X貴（因為要打入口稅嘛）！
所以今日都要掃下貨。

Blueman

計數機更生

＊＊我的新戰鬥工具＊＊


2006年12月1日
丙戌年十月十一
夜

〈工具〉
自上月頭我老Blue買左部計數機之後，
無疑理財方面的確係方便左，
但係硬係?慣左D大大粒既鍵盤掣，
都係覺得呢部計數機D掣唔夠順手兼唔夠快咁。
於是工欲善其事必先利其器，
忍唔到手感，出左去旺角一間專買計數機既專門店，
好順利買左個又大又好用既商用計數機，
買單都係佰幾蚊，唔貴。
D掣又大粒又好?，個樣仲幾Pro下！！

〈執相〉
除左買左新計數機之外，
有工友約左我老Blue茶記，
主要係問我有關執相少少竅門喎？
呢位工友出到來先知原來呢位老哥係想學點樣「退地」？
啊！基本上少問題，不過佢帶佢Notebook先至原來佢用既唔係Photoshop，
係一個free既軟件Gmip！
咁我老Blue就頭痛，因為小弟從未用過呢舊野。
於是用生平十二成功力儘快了解、消化之下，
再話俾我呢位工友聽點做點做，
慶幸呢位工友學野都算快手，
教左幾個步驟都用得番出來！
呢位工友以前都好抗拒高科技，
家陣為左?食，都順應潮流，都係一個好開始。
不過，可能自己一直以來都係用開Mac機關係，
用工友部PC Notebook硬係好唔就手咁.....。

〈投資〉
近幾日市況非常，經常大上大落。
我老Blue就如先前所講，小心行事，嚴守警戒線，
力保盈利、保本為上。
錢賺少左小問題，
一但蝕本就好難發力再戰江湖！
慶幸自己面對前幾日大跌市，
仍能以平常心待之，
未出現恐懼情緒，
不過，個日要猛?計數機做防守準備功夫......。

Anyway，希望年底結算可以為自己有個交待啦。

Blueman