買了第一副MG

2006年3月31日
丙戌年三月初三
夜

〈模型〉
呢幾日我老Blue除左執房之外，就係出街睇模型。
但係發覺原本好多間模型鋪買既MG模型都唔係咁齊貨！
好難怪，MG出左成十年，有好多款唔齊都唔出奇。
而我老Blue諗住玩MG，
第一副要買既點都會係RX-78 GUNDAM，話哂經典機種嘛！

而最新MG版本既RX-78就係PS色樣一年戰爭，
可惜，去過好多模型鋪都唔見返貨？

前日，返工同廖工友（一位不折不扣模型迷）講開呢樣野，
佢話深水?仲有貨！
於是，好幸運委託左廖工友幫我買左一盒。

今早，收通宵返屋企拆盒開來睇下，
份說明書相當精美！
了解呢盒MG可以完全唔駛用膠水兼落筆地，
好高興!

不過又多一盒模型「存貨」擺起櫃頂！
預算完成期200x年........

Blueman

執房作戰（一）

2006年3月30日
丙戌年三月初二
下午

〈個人〉
自決定為左玩模型，但又房間已經無乜位再擺模型。
去年底我老Blue起模型製作方面已經停哂手，無再開工！
直至今年初驚見高達MG版Ver. 2.0超細緻造型，
再到燃起我老Blue心裡一團火............！！！

3月27日，從IKEA定左幾塊層板返屋企。
今日，幾經努力，順利砌左兩塊大層板入架，
因為將已有「垃圾」搬出搬入，
再有限空間加裝兩塊大板入去，
攪到我老Blue身水身汗，辛苦過開工。
至今進度已經開始左三分一，
呢幾日相信可以完成哂所有工程啦。

期望四月可以開始砌我老Blue第一個MG模型！

＊＊（咁老Blue架頂個D未砌既BB版高達點先？）

........ ^_^!

Blueman

24第五季

2006年3月28日
丙戌年二月廿九
夜

〈劇集〉
今日我老Blue返工，同工友口中方知道無記英文台上週已開始播出
新一輯"24"。
驚訝之餘，點解無乜人講既？
跟住今日收夜晚八點，拿拿臨返屋企由第二集睇起，
慶幸自己錯失頭一集，都仲跟得到！

今輯一開始，已經死左兩個好重要角式，
真係有「驚喜」！跟住劇情會玩D乜？
真係估佢唔到！
不過，主角Jack依然好顛，查案好唔常規！
期待劇情發展....

Blueman

Keroro軍曹

2006年3月26日
丙戌年二月廿七
夜

〈動畫〉
繼「神魂合體」之後，
我老Blue前日又開始煲另一套動畫﹣Keroro 軍曹。
呢套動畫好Hit，每集單元形式，包裝有點像兒時的「叮噹」（依家叫「多啦A夢」）。
家陣睇左10集，覺得好攪笑，好過癮。
形式同「叮噹」不儘相同，
男主角一家三口，無提過有父親出現，母親因工作關係成日好夜先放工。
男主角比較文靜智慧型，相對其家姐屬於暴力火爆型；
其母親則屬於運動冒險型！
主人翁Keroro性格好寫實，雖然身為隊長，
但係好食懶飛，不求上進，又死要面又貪玩。
其他角式性格都好立體，個性好強，有性格分裂，有古肅呆板，?有古靈精怪等等。
故事每集好攪笑但又不失言外之音。

今日我老Blue放假，行過模型鋪見到Keroro一系列五個角式模型，
有個衝動又想買哂拎返屋企，
但係....諗起今日放假主要工作係儘快清理房間雜物！！！

又想睇Keroro、又要執房，點好呢？？？

Blueman

工友的SHURE E-4c

2006年3月25日
丙戌年二月廿六
早

〈耳聽〉
前幾日，我老Blue見到工友﹣Ｏ記，
得知佢終於忍唔住買左對新EIM-SHURE E-4c耳聽。
尋日（24號）返工親佢收工前，
捉左佢拎對E-4c比較下我對E-2c有乜分別？
當然用我部EPSON P-2000入面D歌做比較啦，
約莫試左幾隻歌片段，
發覺........一分價錢一分貨！

音場以至高、中、低音明顯4c好好多！
依家一路寫Blog一路聽2c，
梗係好似爭咁D咁.......
入門級始終係入門級。

但係，我對入門級入左唔夠兩個月咋！
老Blue係買都遲D先啦！
不過，唔係諗E-4c喎，而係Westone-UM2.....

奉勸各位朋友唔好貪得意亂試野，
免招損！（破財唔好話人呀！）
^_^

Blueman

一年戰爭的MG版模型

2006年3月24日
丙戌年二月廿五
早

〈模型〉
呢兩日我老Blue除左返工、食飯及訓教之外，
就係諗點樣清間房D雜物，
同埋諗可以用幾耐時間完成哂手頭上所有未砌既BB高達模型？

不過，之前提過好想砌高達MG版，
但係一來仲有驚自己技術未夠，玩住BB先，點知一買BB收唔到手；
二來又驚砌左無位擺先掉低左玩MG版！

下個禮拜，執點間房相信可以提早玩MG高達囉！
如果問我老Blue最想砌既係邊款MG，
我相信係一年戰爭個期既高達！
始終我係屬於個代年紀嘛。

尤其比較喜愛自護系，特別係MS-07B-3老虎特裝型。
相信會買好多自護系入面機種多過買聯邦個邊......!

Blueman

神魂合體Godannar

2006年3月22日
丙戌年二月廿三
夜

〈動畫〉
呢幾日我老Blue“單撈“左一套新動畫叫「神魂合體Godannar」，
之前都聽過呢套動畫幕後係由前作「勇者王」原班人馬制作。
由於呢輯係Part One，一共13集。
機械設定保留「勇者王」強烈風格，以超華麗兼複雜機件，
但又不合邏輯及現實。
故事開創由夫妻檔及新舊情人做駕駛員，
以日系大型機械人片種有點新鮮！
情節及進度算幾流暢，都幾緊湊，有追劇feel。
期待下一輯Part Two.....！

〈模型〉
好耐無掂過既模型，近日隨著新BB戰士No.288 Strike Freedom Gundam上市，
呢盒相信係我老Blue最想買亦可能最後一款既BB模型。
再度提醒我老Blue：喂！老友，好快D儘快清貨囉喂！！
今日卒之的起心肝，走左去IKEA定左幾塊層板。
希望送貨前，將書架上面D無謂野清理好哂，
如果唔係擺唔哂D砌左既BB模型，
因為，今年既心願係砌哂手頭上既BB模型之後，
可以，向MG/PG版進發！！

＊＊註：Blueman手頭上共有18盒BB高達模型未完成！！
^-^!

Blueman

16 Block-衝擊封鎖線

2006年3月17日
丙戌年二月十八
凌晨

〈電影〉
尋日（16日），我老Blue放假。
行過旺角戲院方知道電影"16 Block"（衝擊封鎖線）上畫，
自己走左入去睇！
點解會睇？因為自己都幾鍾意Bruce Wills呢位演員。
起好多年前，有電視英文台播過一套劇集叫“MOONLIGHTING"，
中文好似叫鬼“月滿俏佳人“咁上下。
個陣呢位仁兄仲未紅，我已經好欣賞佢帶有幽默感既演技。
跟住仲記得佢第一套擔正做主角就係"Die Hard"，
由輕鬆喜劇轉型成為動作英雄。

講返呢套"16 Block“，之前睇Trailer及介紹都大概知道係一套警匪片，
Bruce Wills今勻再拍Die Hard導演李察當納，
緊湊動作及劇情計算已經係我老Blue入場前期待之中。
結果.....比我預期仲要好睇！！
雖然無Die Hard誇張駁火場面，但俾我好實在既槍戰feel！
今次Bruce Wills為左演活角式，仲增肥扮演一個中年、有腳患兼且有酒癮既老察骨，入木三分。
點樣為公義孤身同成個紐約警察分局對抗，時限為118分鐘。
故事編排難度我覺得比Die Hard更高！

如果你喜歡有劇情既動作片，
呢套16 Block值得入場！

Blueman

驃叔金句

2006年3月15日
丙戌年二月十六
凌晨

〈金句〉
14日早上，睇生果日報方知道董驃13日晚出殯。
驃叔係我老Blue心目中其中兩位值得尊敬既老人家，
另外一位就係已故既霑叔﹣黃霑先生。
兩位都係以敢言、有才華見稱！

見生果日報附錄有關其家人製作的紀念冊收錄的金句，甚覺有意思，
現抄錄如下，籍此與大家分享。

【人生篇】
急事，要慢慢講。
大事，要清楚的講。
小事，可幽默的講。
無把握的事，要謹慎地講。
無發生的事，不要亂講。
做不到的事，別隨便講。
傷害人的事，不能講。
討厭的事，小心地講。
開心的事，睇場合講。
傷心的事，不要見人就講。
別人的事，最好唔講。
自己的事，聽聽自己的心怎樣講。
現在的事，做了再講。
未來的事，未來再講。
如果對我有不滿意的地方，請一定要對我講。
樂不可極，樂極生悲。
不勞而獲無道理，勞而不獲無天理。
交一友要千言萬語，失一友只三言兩語。
富貴如浮雲，得失不須記。

【賽馬篇】
我係董驃你唔係，我講馬，你一定要聽。
唔賭會病，賭就無命，惟有賭細D吊住條命。
無料既人無人扶得起，有料既人無人?得低。
馬重未必係肥，輕左亦未必係瘦，肥瘦輕重根本係四件事。
賭馬屬於偏門，偏門又使乜講道理。
馬房贏馬贏錢係天公地道，輸馬贏錢就天理不容。
買馬唔好信練馬師，要信緣份兩?字。

Blueman

更生電腦的考慮？

2006年3月13日
丙戌年二月十四
夜

〈電腦〉
今日，我老Blue放假，
出左去銅鑼灣睇最新既Mac機。
可惜，睇完之後現階段都係唔適宜咁快upgrade部腦住！
因為呢家Mac機正由PPC過渡去Intel蕊。

HD大畫面必定係大潮流，
係買不如等下先，
衹少等埋Power Mac出埋Intel蕊，
硬、軟件完全整合哂，
先決定需唔需upgrade部腦都未遲！

SANYO HD1遲D先接你返屋企啦！

Blueman

iMove HD 5體驗

2006年3月11日
丙戌年二月十二
夜

〈軟件〉
凌晨，正當我老Blue寫完個Blog之後，
諗住訓教啦。
心血來潮，開左個跟機送既iLife 05入面既iMove HD 05版本玩下啦！
其實自己一直都好有興趣玩Video，
源於十多年前，小弟當時已經有部Sony Hi8 handycam，
自己仲發燒到拍完之後，用筆記低需要既材料timecode做Edit。
仲要買左部N線既S-VHS三菱水貨錄影機玩video editing！！
結果百二分鐘既片剪成為九十分鐘既「大作」，
足足用左成個禮拜先攪掂，
依家諗起都覺得痛苦！！

但係玩iMovie俾我感覺係過癮、方便來形容！
若果唔係好友﹣小鮑講俾我老Blue聽，
依家iMove/Final Cut Pro可以直接Edit MP4，
唔駛好似玩DV咁過帶咁煩，
如果用SANYO HD1/C6咁拍左幾多片都可以即時落番部腦，
隨時剪得片，勁方便！
仲玩到天光七點幾見眼訓先肯收手咋。
不過，質素當然無DV咁理想啦，但係自己接受到。
正如DSLR同傳統菲林機一樣，我會以方便行頭。

不過弊就弊在，玩過iMove之後，
覺得好想入部SANYO HD-1.....
但係部腦仲係Mac Mini喎！！

Blueman

十五十六

2006年3月11日
丙戌年二月十二
凌晨

〈相機〉
自從我老Blue買左部PMP之後，
出街多左好多娛樂，行街聽下歌，上車、等人可以睇下MV，
不知幾過癮！

不過，自己出街硬係「掙」咁Ｄ野起個隨身袋。
就係一部輕便DC仔，睇過我老Blue個Blog都知道，
曾幾可時都有諗過買Sony S600呢部DC仔，
可惜，因為Memory Stick既問題而遲遲未出手買。

前排因為MP4轉檔，找好友﹣小鮑相助，
得知呢位大哥原來買左部DC仔﹣SANYO HD1，
三洋呢個品牌比較冷門兼非主流品牌，我問小鮑點解會揀HD1？

經佢一輪介紹之後，原來呢部機正確來講唔算係一部DC仔，
應該叫做"DIGITAL MEDIA CAMERA"（數位媒體攝錄機）。
我好奇之下，上網睇下呢部機有乜咁特別？
原來呢部HD1可以同時擷取Movie及Photo！
兼且movie格式係行720p HD 16:9 MP4；
即係可以用iMove或Final Cut Pro做剪接。
除左HD1之外，低一檔型號有C6。
論質素，MP4比起傳統DV當然有差異，但論方便，當然MP4格式取勝！
同埋兩部好輕巧，方便日常?帶。
跟住好有興趣咁上網「單撈」左唔少有關呢兩部機既MP4參考下。

結果，有悲有喜。
悲既係所謂HD格式MP4片段，小弟無福消受。
事緣自己部腦只不過行G4 PPC/512 Mb ram，不自量力！
行HD窒下窒下.....。
喜既係另一部C6因為行640X480解像，當然無問題，
兼且效果自己都接受到！況且呢部C6街價買緊$3680送咭送士啤電及差電座！
算幾合理。

至於好友小鮑極力推介既HD1，買六千幾就唔係我預算囉！
加上買左之後，極需要upgrade部腦，
有點一闊三大。

最大可能，諗下部C6玩住先；
但係HD係大趨勢，真係十五十六，
唔識揀！？

Blueman

VOB轉檔成功

2006年3月5日
丙戌年二月初六
夜

〈轉檔〉
我老Blue先幾日想過放棄部P2000睇movie檔。
原因自己用OpenShiva將VOB檔轉成MP4，
但聲畫唔夾，效果好唔理想。
畫面奀靚都無用！

呢幾日，我老Blue好唔甘心咁多番嘗試用唔同程式及設定，
都唔成功.....。
之前用過MEPG STREAMING，係可以轉任何影像檔，
當然包括MP4，但係由VOB轉檔就需要加入QuickTime MEPG 2 Player。
咁加左之後又話要update過QuickTime？
上網睇過一輪，邊到有乜鬼MPEG 2 Player update呀？
今日，一種死唔服輸既性格，試下再重裝過乜鬼MPEG 2 PLAYER，
一望之下，個packge入面原來有兩個檔案，
另外一個就係個乜鬼update檔！！！
原來自己大頭蝦，睇漏左。

最後，當然成功可以起MPEG STREAMING到轉出MP4，
拿拿聲過落去部P2000睇下，
超正，超爽，好鬼開心！
而且呢個程式仲有Batch功能，
可以一次過做批檔，慳番唔少時間轉檔！

點解我老Blue咁想轉MP4檔呢？
因為好友﹣阿溺，有大量珍藏好正既MV DVD，
如果我成功既話，
阿溺都話想買番部喎！？

Anyway，我淨想借佢珍藏DVD......。

Blueman

電視機

2006年3月4日
丙戌年二月初五
凌晨

〈個人〉
事緣家中的29"大電視經歷左十多年光景，
係時候退休。
由於我老Blue同好多朋友一樣，家中大電視控制權多數落入家母手中。
自己由於工作時間關係，已甚少坐起廳睇電視。
多數起房邊用電腦，一邊睇我部9“電視機仔，睇下新聞咁。

所以家母問及買新電視時候，二話不說：買番呢隻29" Sony CRT得啦！
如果部電視機淨係愛來睇無線節目已經好足夠。
尋日，終於部新電視機送左上來，
晚黑我老Blue收工返屋企，
開過覺得無問題，我諗呢部新電視機又可以用上十年囉！

但係，返入房望望自己個20"「芒」，
其實自己想換過30“「芒」多Ｄ...........heheheeee!

Blueman