唐十五寶藏的啟示

2007年9月28日
丁亥年八月十八
夜

〈投資〉
話咁快就過咗中秋。
呢一年環球股市十分波動，財富依然站起少數人手𥚃面。
家陣好多人都有「理財」習慣，
不過賺定蝕就個別發展囉！

講開理財個個朋友都因性格及認知唔同，成績亦不大相同。
我十分認同性格決定命運呢個理論。
剛巧睇到今期港產漫畫「四大名捕」，
話說超級大奸角唐十五因上一役與正派高手大決戰，
最後大敗，眾叛親離，落荒而逃。
正當人人為呢位奸角所留低嘅寶藏所在地你爭我奪之際，
刻意留有伏筆嘅最後根據地﹣大觀園。
故事發展後尾，唐十五負傷死都死返去已經夷為平地嘅總壇舊址而非大觀園。
原來一直所謂寶藏因為唐十五疑心重，
根本從來無將寶藏移走過，
仲要大膽到不設防就咁擺起遺址地牢入面，
同時亦留有一直隱藏嘅部眾作最後防線，
呢批寶藏及部眾成為佢東山再起嘅最後資本。

睇到呢到令我老Blue亦都好多時俾股市嘅波動迷失咗方向。
但係呢段故仔令我覺得要手上嘅有限嘅彈葯有重新分配嘅需要，
劃定死線將部份彈葯定為「最後防線」，
賺蝕局限於可規限嘅資金上面，
作戰嘅心態大大改變，可以輕鬆好多囉！

Blueman

心平氣和

2007年9月24日
丁亥年八月十四
夜

〈無題〉
雖然工作量不斷增加，
慶幸自己火爆脾氣續漸收斂。
呢一年到今日為止，關於工作上只喺5月中發過一次脾氣，
希望係今年底都係維持呢個數字就好囉！

心平氣和，諸事皆順。
事近中秋，小弟在此祝各位看官中秋節快樂！

Blueman

第一個FG-Gundam Exia完成

2007年9月19日
丁亥年八月初九
下午

〈模型〉
呢幾日無乜寫Blog原因係上個禮拜，
我老Blue手痕痕咁買咗盒一向唔會理會嘅FG(First Grade)高達模型砌。
事緣早排同工友﹣阿廖傾開砌模型，
見笨大出咗枝劃黑線用嘅鉛芯筆（賣成港銀四十幾蚊枝㗎！！），
跟住大家討論係咪用番同一類嘅鉛芯筆都可以做到同一個效果呢？
於是走去文具鋪買枝同一類型嘅Pental牌0.3mm鉛芯筆加一盒0.3mm 2B鉛芯，
都係廿幾蚊貨仔，跟住過隔離玩具鋪執盒廿幾蚊新出嘅FG-Gundam Exia。
就係咁呢幾日，
放棄原有噴模型嘅上色法，
大膽咁嘗試全隻手上油。
結果，由於呢隻FG係1/144上對MG 1/100細隻好多，
兼且FG係屬低階模型，好多無分色部件，
真係油到我老Blue成隻積咁，
有啲後悔點解揀FG嚟玩？
經過一輪「折磨」之後，噚晚終於油完，
終算鬆一口氣......。
跟住試枝0.3mm嘅鉛芯筆上線嘅效果，
嘩！真係好方便，就算畫出界用舊擦膠擦番再畫過，
不過，由於係鉛芯關係，
顏色及深淺就相對無得控制囉，有辣有唔辣。

經過今次玩FG，我老Blue會唔會再玩FG？
相信唔會囉！
唔係價錢問題，而係唔想再花時間砌啲低階模型，
寧願留番啲時間玩MG好過囉！！

＊＊其他FG-Gundam Exia已上載到個人相簿Exia，歡迎瀏覧。

Blueman

Gundam OO 人型景品DX

2007年9月15日
丁亥年八月初五
下午

〈模型〉
距離Gundam OO播放仲有半個月，
但係其下嘅有關商品已經密鑼緊鼓咁陸續推出，
兼且品種繁多。
除咗例牌機設模型外，
套戲未出街笨大已經連人設都玩埋，
其實好多關心高達動畫嘅朋友都應該睇過早前OO官網公佈咗最新人設，
𥚃面可以睇到由高河弓擔任人設嘅女角都唔少，
兼且每個女角身材「激突」，
說實話仲有點日本AV feel㖭！
不過，好啱我老Blue胃口，哈哈.........。
講返正題，今次睇嚟笨大好有信心咁連景品DX系都出埋，
而且忠於原著，兩個公仔都一樣咁「激突」，
唔知呢輯OO會唔會因為啲女角而大受歡迎呢？

Blueman

網友的E-510用後感

＊＊Olympus E-510用戶Little Dau拍攝作品＊＊



＊＊「謎」一般的Olympus E-1後繼機＊＊


2007年9月8日
丁亥年七月廿七（白露）
夜

〈攝影〉
自O記今年三月宣佈推出新一代E-410/510之後，
坊間講嘅人多過出相嘅人，其實呢個現象好普遍。
一直對E-system用咗「樂聲」新嘅LIVE mos sensor出嚟嘅質素存疑？
正所謂：耳聽為虛，眼見為實。

呢兩日我老Blue終於見到有高人用上O記嘅E-510出相，
從DChome.net網上見到網友Little Dau先生個輯* E-510 遊越南 *，
只用上kit lens 14~42mm加一枝50mm marco拍下嘅旅行相，
質素相當高，
當然Little先生嘅攝影功力亦不可抺殺。
其中驚見好多相片除咗色彩艷麗外，
好多低檔快門嘅作品亦好出色，
未知作者係咪全程啟動O記嘅機身防震系統拍攝？
如果係嘅話，咁O記嘅I.S.真係好掂囉！
不過，內𥚃亦都提及呢部E-510亦唔係無缺點，
用上50mm marco嘅時候，亦偶有發生迷焦情況出現。
睇完呢輯相令我老Blue對O記嚟緊個「謎」一般嘅E-1後繼機-E-1p帶來希望，
唔知傳聞呢部新機係咪有11點十字對焦位及HDR（High dynamic range）會唔會有驚喜嘞？
期待N記D-300及O記E-1p兩部機嘅實力比較，
從而作出選擇。

＊＊註：小弟未經Little Dau先生同意，引用各下大作圖片，敬請原諒。

Blueman

新iPod系列及SONY A700發佈

2007年9月7日
丁亥年七月廿六
下午

〈影音〉
喜歡潮物嘅朋友都已經知道Apple又有新攪作，
就係起噚日發佈新一代嘅iPod系列，
除左原有型號更新之外，
同傳聞一樣推出無電話功能嘅iPod-Touch。
新版iPod nano變咗Q版iPod咁，個人覺得功能強咗個樣肉酸咗；
原有嘅iPod Photo改名叫iPod classic，功能一樣但價錢平咗；
至於新嘅iPod touch雖然容量細咗，但係功能上係最吸引嘅一部！
無他嘅，我老Blue同身邊好多用開iPod嘅朋友都認為MP3機或叫音樂播放器，
容量超過10GB好多餘，
因為iPod經iTunes或其他途徑「過歌」存取其實好方便，
就算俾盡你部iPod有幾多容量都好，聽歌不外乎每日平均幾個鐘咁大把。
所以身邊朋友用iPod nano多過用iPod有其原因，
不過，點都好新一系iPod多元化，
應該吸引到唔少潮人或舊iPod用戶轉機都未定！？

至於我老Blue最高興並唔係有乜野新款iPod，
而係發佈當中，同時宣佈大熱產品﹣iPhone大減價，
由美金$599激減至$399咁多！！
之不過推出兩個多月就插水，
所以跟潮流係要付出代價嘅。
據報導中有美國分析員指Apple咁樣減價係為咗剌激聖誕旺季嘅銷量，
以提高市場競力喎！
同埋，預料為咗歐洲市場，將會推出3G版嘅新iPhone。
呢樣嘢最吸引我老Blue，
因為香港都依家iPhone都未知幾時會開賣？
其二香港版（亞洲區）嘅iPhone制式會唔會跟隨香港可以行3G呢？
如果以美國現價賣$399美金，
咁就好有吸引力囉！！

〈相機〉
九月的確係好多消費品發佈新產品消息嘅月份，
間間公司為咗起市場上擴大自己個份額外，
亦唔會放過聖誕呢個黃金檔期嘛！
繼C記、N記後，S記終於出手，
噚日起日本開記召宣佈推出其下Alpha系最新DSLR-A700，
我老Blue一向無乜研究S記前身MK嘅機種，
只係覺得呢部A700外觀延續舊底KM DSLR-D7D咁。
不過，個機身layout就有唔少變動，
尤其個直度真係設計得好正下！
再睇番個spec.就好一般下，
其實已經好過之前嘅D7D啦，
但係N記部D300實在太令人有驚喜，
珠肉在前難免比下去，
除非價格方面好似C記部40D咁有競爭力，
如果唔係好難起中級機呢個檔位突圍喎！
不過，以S記咁高傲嘅性格會唔會降價又成疑問？

至於我老Blue下一步DSLR更生計劃，
好大可能取決於N記及O記二揀一，
咁就要睇埋下個月17日O記係咪真係會發佈E-1p嘅資料先至有決定囉！

Blueman

連鏡烙鐵座

2007年9月4日
丁亥年七月廿三
下午

〈模型〉
雖然我老Blue呢排工作關係，
無乜時間繼續砌模型，
甚至乎攪咗好耐嘅M.S.G.格納庫都未完工。
但係對砌模型嘅熱情仲未冷卻。

前兩日，工友兼模型啟蒙師父﹣阿廖，
同我老Blue講話喺深水埗鴨寮街（香港著名賣買平價電子零件及五金工具地區）有件連鏡烙鐵座好好用，
至啱用嚟手油細件模型部件，
例如1:100高達模型人仔等等。
問價後佢話港銀$28有交易！
二話不說，叫佢幫我攪番件。

今日接過阿廖件烙鐵座，
雖然係土砲貨式，但係幾足料下，
全身為金屬製造，所以幾重酲下！
原本呢隻係為微細焊接線路板用，
放大鏡唔算大塊約兩寸半左右，
但係如之前咁講油啲1:100人仔好fit下（如圖）。
因為為咗個M.S.G.格納庫情景，
早前我老Blue都買咗唔少人仔做配襯。
希望遲啲完成咗個格納庫之後，
利用呢個鐵座油下啲人仔啦！

〈攝影〉
早排我老Blue去過Gunpla Expo，
映咗少少相，
噚日終於將啲相上載到自己嘅相簿GUNPLA EXPO 2007，
有興趣或者無去過嘅朋友可click入歡迎瀏覧。

Blueman