老Blue日記

星期三, 10月 31, 2007

同步樂趣



2007年10月31日
丁亥年九月廿一
下午

〈手電〉
近日見老旺大賣嘅iPhone破解V1.1.1版好吸引,
加上好多人玩iPhone都上「萬記網絡」$128上網無限任用組合,
我老Blue終於等唔切iPhone行貨到港,
好冒險咁買咗無保用嘅水貨iPhone!
隨即轉埋呢個「萬記」感受一下用iPhone上網嘅快感。

返到屋企第一件事就係開著部Mac,
稍為指定所需檔案,
即刻同部新iPhone同步啦!
嘩!!好正!一瞬間部Mac已經將電話資料、音樂、相片、上網bookmark等等過哂落去部手機到。
渴望已久嘅同步樂趣即刻顯現眼前......好感動!
我老Blue好反感電話同電腦資料唔同步有極大嘅唔方便,
因為家陣好多朋友唔淨止得一個電話號碼嘛,
仲有其他電郵或其他有關資料等等,
呢啲個人資訊通常會記錄哂部電腦到,
我老Blue覺得無理由每次轉電話都要重新記錄過?
所以一直堅持等「iPhone」呢類野面世!

仲有一樣想講嘅係呢部iPhone用EDGE上網速度出乎意料咁暢順!
家陣除咗用嚟打電話,行街聽歌之外,
仲可以隨時上網check吓股價好實用!!

Blueman

標籤:

星期四, 10月 25, 2007

股市.煲劇



2007年10月25日
丁亥年九月十五
凌晨

〈股市〉
呢一年我老Blue定下嘅投資目標,
憑著8月17日嘅升市,
到先個幾日終於達標。
眼見當下股市火熱,週遭好多朋友亦對股市有入市衝動.....。
連講開電腦嘅雜誌都有提睇股工具云云,
有見及此,自己亦開始進行減持行動,
鎖定利潤只留下三成資金運作罷了,
風險及壓力相對之下大大減低!

〈影視〉
隨著手上投資減持,
唔駛再花咁多時間日日留意住個市之後,
不過近排我老Blue亦唔得閒得去邊喎!
原因係除咗新一輯高達動畫「Double OO」上映外,
先個輪人氣美劇「Heroes」亦開始咗Season 2,
作為Heroes粉絲梗係唔會錯過啦!
加上無記半夜推番一套國內劇集﹣「走向共和」,
睇下睇下又覺得幾好睇咁喎,弊!!
結果呢排除咗返工之外,
煲劇成為咗我老Blue熱門節目囉!!

Blueman

標籤: , ,

星期三, 10月 17, 2007

Olympus E-3登場




2007年10月17日
丁亥年九月初七


〈相機〉
終於到咗10月17日,
我老Blue今朝就開定部腦上網留意O記今日發表E-3(E-1後繼機)嘅資料。
由今朝到依家,
網上唔同地區嘅O記官網及有關嘅路邊社,
都已經分別起唔同時段發放有關呢部新一代旗艦機嘅規格。
呢部真係講咗又傳咗好「幾」年嘅新機,
相信今日係好多O記友(包括我老Blue在內)最雀躍嘅日子!
從官方發佈呢部E-3嘅規格睇,
好多功能都已經起網上傳過,
大致上都係預期之內。
至於仲有無驚喜俾到我老Blue?
相信係佢內置防震可以達到5級快門,超厲害!
第二樣係佢配合新系列無線閃燈FL-50R,
可以去到FP高速閃燈模式達全速同步,
即係可以去到1/8000秒!!

至於其他防塵、防水滴機身、LiveView、多點對焦及連拍速度等等,
家陣呢部E-3面對其他品牌嘅新一代中級機就明顯無乜優勢咁噃!
呢個11月除咗O記部E-3、N記部D-300、S記部A700之外,
加埋C記早前搶先出閘嘅EOS-40D。
隨著11月多部新機出爐,
相信又會掀起一眾「機迷」換機熱潮囉!

至於我老Blue會唔會換機呢?
機會好大囉!
由E-300等呢部E-3出都等咗年幾兩年,
論規格就完全滿足自己定下嘅要求,
家陣最關鍵係睇埋另一部勁機D-300兩者實力及價錢比較,
尤其E-3用咗樂聲粒新Image Sensor,
起色彩方面能否超越上一代E-1嘅界限呢?

不過,為咗換機睇怕呢鑊又要過緊日子蓄銀兩先得囉.........。

Blueman

標籤:

星期六, 10月 13, 2007

期待的聖誕佳品





2007年10月13日
丁亥年九月初三
下午

〈模型〉
雖然距離十二月聖誕呢個購物旺季仲有成兩個月。
但係睇完TD(玩具日報)「第47回全日本Hobby模型展」嘅資料,
終於見到最新高達小說「機動戰士﹣高達UC」主角機RX-0 Unicorn Gundam(獨角獸)MG模型版亮相於會場,
同期望一樣真係可以做到變換至「Destory Mode」,
兼且骨架內嵌透明紅色部件展現原設效果。
以模型談模型,
今次笨大以機設角式一出就MG,
實屬罕見,
但係以圖片初睇完成度好高,
成品做模精緻,做型兇悍,難得之作。
呢隻野係我老Blue心目中有一出想買嘅衝動㖭!
呢個衝動查實唔多,前後只得X-20A Strike Freedom Gundam及RX-93-V2 Hi-Nu Gundam兩隻MG先至有,
今次呢隻MG制作水準,
個人覺得係MG界最高水準,如果時機合時應該做MG#100號最為恰當。
據資料呢隻「獨角獸」會起12月呢個黃金檔期發售,
我老Blue12月嘅購入項目點都預咗佢囉!!

Blueman

標籤:

星期二, 10月 09, 2007

我看新高達動畫﹣Double OO



2007年10月9日
丁亥年八月廿九(寒露)


〈動漫〉
我老Blue無寫Blog都有成個星期囉,
原因係太忙......(一笑)。

一眾高達動畫迷期待以久嘅新一輯高達動畫-機動戰士Gundam Double OO,
終於喺10月6日下午6時日本作出首播。
同日「國內版」亦於幾小時後出埋字幕版,真厲害!!
呢套新嘢由今年6月2日開始宣傳至今,
我老Blue當然唔會錯過啦!
自己對高達動畫無偏向UC派或CE派,
只要係新動畫就會睇。
睇完第一集覺得新一輯高達幾有新鮮感,
兼且覺得幾好睇添!
理由有三個:
第一,站喺機械人動畫立場,呢套新嘢做到打多過講,好!
第一集差唔多由頭打到尾,戰鬥場面比已往同類片種多,
場面明快及畫功出色。
尤以主角機Exia初登場兩秒之間K.O.對手,唔做作唔花巧,
表現壓倒性嘅威力,相當精彩!
第二,首集雖然登場角式眾多,但係難得每個角式對白精簡得嚟可以反映其角式性格及行為,好!!
因為睇機械人動畫最怕口水多兼且說教式對白,
我老Blue最頂唔順呢類形式,
上一套SD就係犯上呢個毛病,有幾集真係睇我瞓著咁嚌....。
暫時第一集登場人物中,
覺得Union聯合派系王牌機師﹣葛拉漢(著套老西,搶人望遠鏡個位老兄)⻆式設計最正,
對白及行為反映呢條友仔觀察力及分析力極強,
口吻尖酸刻薄,相當有趣。
其次係「天人組織」坐起母艦入面做戰略指揮個位,
開戰都要飲酒嘅皇小姐,
相信呢兩位角式日後起故事會有好多發揮空間。
第三,係片中出色嘅配樂,相當豐富及出入恰當,
好有電影感完全提高劇情推進,好!!!
不過,我老Blue就唔係咁滿意主題曲及尾場曲,
平淡無奇,希望嚟緊會有新曲有番Seed或SD嘅水準!
暫時睇完第一集Double-OO,
除咗覺得幾好睇之外,
感覺故事及風格都好破格,
一改以往高達模式,有點感動,
再唔係敵方又係搶人武器,
主角誤打誤撞咁駕駛高達作開端囉!

睇完之後,翻查手頭上有關呢套Double-OO嘅人、機設定,
及上網追查有關監督﹣水島精二及寫劇本嘅﹣黑田洋介嘅資料。
其間發現日本雜誌Animage及New Type訪問水島
先知道點解Sunrise會揾水島做新一輯高達嘅監督?
訪問大要係原來水島先生一直無參與過任何高達動畫,
加上佢成名作「鋼鍊」對戰爭嘅描寫手法,
搏佢可以為高達帶出新氣象咁喎!
其中訪問對今次標題﹣Double OO,
佢話呢個OO係故事嘅關鍵字咁緊要,要大家留意故事發展咁話!
另外,從NewType訪問中問及有關故事嘅愛情線,
水島先生話會叫黑田先生落好多感情線,
更透露16歲嘅男主角﹣剎那會同大佢10年26歲嘅女主角有發展,
大玩姐弟戀?
估唔到連感情線都咁破格,
希望唔會好似SD咁失控收場啦!
對於水島先生之前一套「鋼之鍊金術師」監督下成績有目共睹,
至於黑田先生,我老Blue比較深印像係佢早期嘅「無限之Ryvaius」,
呢套係自己當時覺得好驚喜嘅科幻動畫,
劇情玩得幾吊詭吓!
希望水島氏對戰爭嘅描寫及黑田氏寫故事嘅風格,
雙方首次合作會為新一輯高達擦出火花。

Blueman

標籤:

星期一, 10月 01, 2007

模型天敵




2007年10月1日
丁亥年八月廿一(十一國慶)


〈個人〉
是日國慶公眾假期,
我老Blue今日好難得公司編排到放假,
好好休息番下。

〈模型〉
先兩日我老Blue正想繼續「開發」個M.S.G.情景模型,
發現有兩個問題?
第一個係原本用「壽屋」嘅M.S.G.格納庫做模型攝影嘅情景,
計下計下買少一個,
幸好紅磡「其脆」仲有大量現貨供應,
補番一個,跟住可以跟據擬定嘅格納庫組合嘅尺寸加建簡陋嘅天花做情景囉!
另一個天大嘅問題係一直放起櫃入面嘅心血﹣MG模型,
正打算求其攞隻出嚟度尺寸嘅時候,
發覺開始積塵,
弊!呢件事可大可小,
再唔「整」走啲塵,莫講話擺post映相,
就連成隻模型外觀都破壞哂!
好彩之前有朋友教路,
話如果發現啲模型上面開始縭塵,
叫我去10蚊店買啲除塵紙加上噴筆試下吹走啲塵喎?
結果,跟住咁做真係好容易整走啲塵,
不過,過程要避免整花啲模型就要好小心至得。
為咗避免問題再惡化,
我老Blue隨即買咗張膠簾封住個模型櫃,
希望咁樣可以得到除塵效果啦!

Blueman

標籤: