老Blue日記

星期四, 6月 29, 2006

鬧鐘

2006年6月29日
丙戌年六月初四


〈鬧鐘〉
今日我老Blue放假。
起炎炎夏日,繼續匿起屋企砌模型啦!

傍晚時分,手頭上應該噴色既部件都七七八八。
跟住落樓下買左個新鬧鐘,
因為其中一個後備鬧鐘終於前幾日「倒斃」,死因不明個隻....!
講起鬧鐘,自己一直用開兩個鬧鐘鬧醒自己,
分別擺起屋企唔同位置,
夏天作用唔算大,不過起冬天尤其返早,
作用就好大囉!

呢件事早幾日同工友講開,
個位工友佢仲誇張,由於佢經常返早兼且夜訓,
佢同我老Blue講,話佢自己要用到四個鬧鐘先至安全喎!
但係亦有工友好掂下,
佢無任何鬧鐘,衹係見佢用自己既手提電話較響鬧就夠,
絕少見佢遲到!

Blueman

星期三, 6月 28, 2006

旺鋪招租

2006年6月28日
丙戌年六月初三
深夜

〈個人〉
估唔到!真係估唔到我老Blue呢亭夜鬼尋日朝可以早起身!
九點幾起身走落樓食過早餐,
跟住同隻MG陸戰高達噴灰,
仲有時間攪網上理財添,
自己一朝早可以攪咁多野真係有D驚.....!

〈街鋪〉
近呢個月行街,
除左睇野、食野呢D例牌節目外,
最近留意到好多街鋪「摺埋」,
門口掛住乜乜旺鋪招租之類既大大小小廣告版。
而且有越來越多既趨勢,
如果市道好左,又點解咁多鋪結業呢?
又還是某D「富貴」業主開天殺價加租呢?
自己經常去開既食店,突然結業,
呢間食店水準唔差,可惜無去幾個星期就已經唔存在。
只不過經營唔夠一年.....!

依家打工又難,創業仲難。
自求多福!

Blueman

星期一, 6月 26, 2006

MG陸戰型高達素組完成

2006年6月26日
丙戌年六月初一


〈模型〉
踏入夏天,除左天朗氣晴之外,更有酷熱警告。
今日我老Blue全日放假,
咁熱既天氣梗係匿起屋企砌模型啦!

經過左一日既戰鬥,終於起夜間新聞前完成左隻MG-RX-79[G] GUNDAM(陸戰型高達)既素組工序。
整體呢隻MG唔算複雜,
面部採取分割式制作,方便日後分開上色。
成件模型最攪野係個背囊設計,可以將枝180mm加農砲拆散裝入呢個背囊,
十分精緻兼外型有點似個雪櫃添,哈哈!
不過,素組完之後同埋其他自護系MG比較,
高度上明顯矮左D.....。
聽朝如果可以早D起床既話,應該會噴灰工序。

Blueman

星期六, 6月 24, 2006

首個MG高達始動

2006年6月24日
丙戌年五月廿九


〈模型〉
今日我老Blue夜晚返通宵班,
所以下晝有時間可以砌模型。

期待以久終於今日正式砌MG版既高達。
不過並唔係自己最喜歡既高達機種-RX-78-2,
而係出現起「0079-MS 08小隊」既前期主角機-RX-79[G]型號。
因為MG版﹣OYW Ver. RX-78-2到依家為止係MG版高達當中自己認為係最精美既模型,
所以自己唔會咁快開盒砌住。
不過食飯前,用左三幾個鐘時間都只係素組左兩手一腳,
希望呢兩三日可以完全素組完畢啦!

尋日上網,見到有關砌高達模型留言,
起初以為自己買買埋埋好多模型,但係仲未有時間砌好浪費。
誰不知同樣個案既網友都幾誇張,
有D網友話自己有D模型買左成七年都未郁過;
亦有D網友話幾乎所有MG系列買齊哂,不過只係完成左幾隻咁大把....。
好彩自己由年初開始玩MG,
統計過總共入左廿一盒MG,
都依家只係完成左七隻,
換句話說比例係一比三,成績不過不失啦!

因為當初開始玩番模型,無非係想映下相及消磨下時間,
並無諗過蓄模型嘛!

Blueman

星期五, 6月 23, 2006

MG武器完成

2006年6月23日
丙戌年五月廿八
凌晨

〈模型〉
我老Blue自完成左七隻MG模型之後,
遲遲都未肯攪MG跟身既武器,
原因係見過坊間及好多高手對武器上色各師各法,
小弟尚未心得要領?

但係再咁砌落去真係越積越多喎!
因為MG版平均一隻都有兩三枝槍砲做附件。
於是,把心一橫當真槍咁上色,
只因見過好多高手多數以原著設定加上高超噴色技巧!
自問未有咁既本事做到囉。

基本上機槍用上啞黑作基本色,
再用MIG既GUN METAL舊化粉塗裝,最後掃上少許MIG-COPPER RUST完成。
估唔到簡單快捷既程序換來意想不到咁好既效果!
至於較為長身既大砲則用上暗灰色作主色,
只不過暗位加上少許MIG-SMOKE BLACK舊化處理便算,
比較簡單易辦!
就係咁一口氣由試辦到完成都用左我兩、三個鐘,
先至攪掂哂十幾枝槍砲!
好彩之前買定個大膠盒,
先裝得哂咁多枝軍火咋!

跟住落來當然可以開盒砌模型,
下隻MG應該會係MS RX-79 [G] GUNDAM(陸戰型高達)。
終於係時候砌高達囉!
RX-79 [G]> Ez-8> RX-93
期待.....。

Blueman

星期四, 6月 22, 2006

靜岡的BANDAI HOBBY中心

2006年6月22日
丙戌年五月廿七
下午

〈個人〉
雖然經過一晚通宵工作,
今日下午起身,我老Blue既感冒已經復元番七七八八。
但係唔知點解手指同埋背脊收工時赤赤痛....!

〈雜誌〉
尋日買左今期中文版“電擊Hobby“。
內容主要介紹MG版強人模型,
不過令我老Blue最大興趣既內容係今期介紹左BANDAI起靜岡縣新工場。
基本上呢個工場由內到外都似主題公園多過一所工廠,
首先工場結構已經好「高達化」,入口既玻璃幕牆畫上UC聯邦標誌。
至於入面既近乎無人工場既「軍事設施」更厲害,
例如塗裝成白色基地顏色既啤機,可以一次過啤出四色既膠模,一日可生產4500件!
至於自動鏟車更塗飾為紅彗星及渣古色樣.....。
另外內文仲介紹左一部雷射加工機竟然可以刻出0.04mm咁細?
最令我意外係呢間工場入面既員工所著既制服係依聯邦軍色樣?唔係咁認真(有點瘋狂構思)!

睇完之後,除左覺得Bandai起模型處理方面好高技術之外,
更加覺得佢地對模型好高要求及野心好大。
因為睇到起間咁既工場目標唔單衹係想雄?模型界,
如果無估錯,目標係未來十年中國模型巿場及玩具業,
國內起玩具技術短期內好難跟得上囉!

Blueman

星期三, 6月 21, 2006

鄭健和的火龍

2006年6月21日
丙戌年五月廿六(夏至)


〈個人〉
食過醫生開既感冒葯,
一口氣訓左十幾鐘,出左一身汗。
感覺好好多!
下晝訓醒,今日陽光普照,呢個月未見好似今日咁好天氣囉!

〈漫畫〉
前幾日見到鄭健和(大多數叫佢做和仔)新書出左。
呢本叫“火龍“既漫畫,以日本漫畫黑白及包裝形式推出,
自離開肥良班底後自資既新書。

香港漫畫家主筆除左先前提過既邱瑞新及葉明發外,
和仔亦係我老Blue比較喜歡既本地主筆之一。
所以,佢既新書一出即刻買上手,
不過,好老實今次佢既新書﹣火龍封面就真係差左D喎。
自己買左都擺左三幾日先?上手睇,
睇完之後,覺得都唔錯。
一貫和仔流暢及講故事有條理分明既風格,
唯獨本漫畫頭段同中、後段畫風有點出入,
可能和仔仲未上手卦?

不過,今次和仔既漫畫暫時無令我老Blue失望,
當然期望佢會發揮更好既水準,
為本港漫畫界帶多點火花!

Blueman

星期二, 6月 20, 2006

病假

2006年6月20日
丙戌年五月廿五
下午

〈感冒〉
尋日,返到公司下半段我老Blue開始覺得唔妥。
一邊開工一邊頻頻打乞嚏,好Q辛苦!

今日,一早起身落左樓下睇醫生,
當然咁環境最好打返公司告病假,免得累己累人。
講開告病假,
好耐之前自己有個好錯誤既觀念,就係就算有病都死頂返工。
其實好唔應該,首先自己有病,工作能力必定下降,水準自然受影響。
其次,好多朋友及自己都係返寫字樓工作,D細菌根本散唔到,好容易傳染到其他同事!

不過,亦有同事好自私.....!
佢地告病假原因係因為有私事,
反而真係有病就返工,傳染俾附近工作既同事,
呢D同事心地好唔要得!!!

大家經歷過沙士一役,
香港唔可以再有大感冒,好傷元氣架!

Blueman

星期一, 6月 19, 2006

巴士按章工作

2006年6月19日
丙戌年五月廿四
中午

〈時事〉
今日好多媒體及報章都有報導四大巴士公司員工因薪金幅度同資方有所糾紛。
巴士員工會按章工作,
簡單D講即係慢駛!
咁我老Blue唯有早D出門返工囉。

本來今日諗住早D起身,
可以有D時間噴下模型,諗諗下都係博唔過!
其實自己都好同情班巴士司機既加薪幅度,
的確幾陰公。
不過,香港係一個商業社會,
永遠做打工仔好被動。
希望今次勞資糾紛盡早得到解決,
始終巴士係一個共公事業,
一有問題都好影響好多仲要工作既打工仔架!

Blueman

星期日, 6月 18, 2006

漫畫﹣黑礁

2006年6月18日
丙戌年五月廿三
傍晚

〈模型〉
經過長達個多月時間,我老Blue終於起尋日完成左第七隻MG-大魔(MS-09 DOM)。
由於顏色設定有點原著色彩﹣噴上紫紅色。
戙左起書架到隻大魔比起其他MG好搶眼!
不過,自己暫時唔會再開新模型砌囉,
因為砌左咁多盒MG,其實每一隻只係砌左Body就算,
任何有關武器及標記(Marking)都未完成....。
今晚睇下有無時間起埋貨先!

咁完成哂所有工序後,可以映下相俾街坊見下啦!

〈漫畫〉
自己追開既日本漫畫最近又多一本。
BLACK LAGOON 黑礁,作者﹣廣江禮威。
係一本現代黑幫槍戰題材,
其實自己好喜歡呢類型既漫畫,
因為覺得由於時代比較真實,畫呢類漫畫資料搜集要好充足。
另外,由於涉及眾多槍戰場面,槍械及人物比例起繪畫方面好高難度。
本港漫畫曾經出過呢類型既題材,可惜眼高手底。

今次呢本“黑礁“雖然故事有點“CITY HUNTER(城市獵人)“類似,
但係我喜歡故事入面既男、女主角,
男主角原本係日本一間大機構任職普通上班族。
因被公司出賣,偶然之下加入“黑市運輸“當見習水手!
呢個男主角設定好突破,完全迎合我老Blue呢類典型上班族心態。
之於女主角自幼起戰火中求存長大,有雙槍王稱號,野性好鬥,
剛好同男主角出身完全相反,做成故事好多衝突面及產生茅盾。
喜歡呢類題材既朋友,值得留意!

Blueman

星期五, 6月 16, 2006

不日放映

2006年6月16日
丙戌年五月廿一
凌晨

〈公司〉
今日返工又有同事宴客,請同事們食撻。
呢位同事就係﹣沙頭角,榮昇「帚把」級人馬,以佢年青有為,前途無可限量。

〈電影〉
自從對上個套X3之後,
近排無乜電影會吸引我老Blue入戲院囉。
不過,最近上網得知有三套戲會吸引我注意,
第一套將會2007年7月4日上畫既Transformers“變形金剛“,
監製史提芬史匹堡,導演係Micheal Bay,好強既組合。
第二套係Gundam Seed於上月5月7日宣佈映畫化,
官方網站仲強調係繼Gundam F91之後,一樣係重新製作既畫面喎,
我老Blue追開Seed系列,都好心急想知道劇場版劇情會跟住落還是重新編寫呢?
第三套就係網上流傳電視劇24會拍電影?
但係官方網只係講最新既Season 6會起07年1月播出,
咁唔知係咪真有其事,24係我老Blue睇咁耐唯一到依家都未厭既劇集。
咁當然望佢拍得成啦!

〈模型〉
唉!我隻MG大魔到今日為止都未完全攪好,
睇怕呢隻MG應該係我老Blue製作時間拖得最耐既一隻囉!
聽網友講Bandai九月會出MG-Hi New Gundam喎,
係咪架?咁我咪唔駛等RX-93改件,可以砌左隻RX-93先至再砌Hi-New Gundam!

〈相機〉
今日返工見到工友﹣恆仔,知道佢原來尋日終於買左部DC仔﹣富士F30。
聽日佢就可以帶埋呢部新機去北京玩,
期待佢既測試報告。

Blueman

星期四, 6月 15, 2006

大宴群臣

2006年6月15日
丙戌年五月二十
凌晨

〈公司〉
6月14日。
呢日我老Blue返下晝四點半,
所以起街食完個茶餐先返工。

誰不知返到公司,
先知道有位人緣唔係咁好既阿頭今日榮休,
新老細﹣蓮子蓉自掏腰包叫到會當Farewall呢位阿頭喎。
新人事新作風,大顯親民之餘,
加上呢一課羸盡一眾工友喝彩聲!

我老Blue入左呢個部門咁多年,
未試過老細自己?錢出來請靚仔食飯,舊老細請伙記食無情雞就有份!
今次叫到會仲分上下更都有得食,
仲係多到食唔哂個隻!
最衰係自己食乜鬼茶餐,
攪到飽到食唔落,聽D工友講水準都唔差喎!

不過,門面野都係其次,
現階段部門最缺乏係人手,
睇埋新老細過左三個月就見真章....。

〈模型〉
6月14日,朝早。
經過一輪苦鬥,隻MG大魔始終未能完工,
整體仲欠雙腳未能埋尾。
希望今日(6月15日)可以早D起身埋尾啦!
趕埋呢隻大魔之後,
相信砌模型既程序,我老Blue要改一改,
放棄「工廠式」流水作業,
因為工廠式好處係加快製作時間,
弊病係容易出錯,影響成品水準!
故此改為逐隻逐隻完成。

下隻MG係乜我仲未諗到,
因為自己已經太多存貨,
實在太多選擇啦......!
(究竟係好事定壞事呢?)

Blueman

星期二, 6月 13, 2006

平常心

2006年6月13日
丙戌年五月十八
下午

〈個人〉
今日收通宵,經過一日十八小時既工作。
收工起巴士累到訓著幾乎過左站唔識醒!
依家既工作量同埋年紀要捱十幾個鐘真係唔易鯁。

下晝訓醒家母俾左張佢身體檢查既報告我睇,
情況並唔理想,老人家去到呢D年紀身體及憂慮會特別多,
我叮囑佢多聽醫生指示,不用太緊張。
不過,自己呢排都會多D留起屋企....。

〈工作〉
自從公司有多位同事相繼離職,
但係現階段仲未有新人補充,人手顯得特別緊絀。
舊老細﹣大白鯊退休,新老細﹣蓮子蓉上場,
作風兩人好極端,新老細比較親民、多笑容,
明顯廣受民眾歡迎,我就比較平常心。
主管﹣大家姐話趁蓮子蓉新上場嘗試爭取多D人手落場喎,結果有待考驗?
不過最大問題係「帚把」位最唔夠人腳,
於是大家姐唯有欽點多位同事Acting,
當中人選實力及EQ將會面對考驗?
現今工作量加大左,有前Acting工友同我老Blue講多D人Acting係好事,
因為佢地都不約而同話寧願做散仔都唔想上位喎!?
真係有人歡喜有人愁囉。

〈模型〉
今日終於有時間落樓下買模型。
玩具鋪何老細已經準備左我老Blue要既貨﹣MG愛爾蘭魔蟹及紅蟹,
當然何老細梗係俾過靚價過我老Blue成交啦!
大發現!拎左新模型返屋企之後,
發覺自己間柴房原來仲有空間再擺模型存貨,哈哈!!
希望今晚可以有時間完成我攪左好耐既MG大魔....。

〈相機〉
前幾日,網上已經紛紛談論近日大熱既SONY DSLR初號機﹣A100既測試圖片。
我老Blue睇過之後覺得質素一般,有點似Nikon D70味道,
當中高iso質素仲幾駭人及汗顏,我諗SONY要加多D工夫起質素方面多過宣傳方面。
似乎我部E-300仲可以Keep落去!

〈世盃)
世界盃開鑼踏入第四天,
起公司除左公事外,就不斷起耳仔邊聽到乜乜球半一球、依家幾多比幾多等等有關對話....。
呢幾日亦有同事出「病假」(依家先至第四日,駛唔駛咁快出「皇牌」呀?)。
亦有同事瘋狂到放假行街都打電話返公司居然係問賽果,唔係嘛!?
家陣我地開緊工,你估真係好得閒到可以睇緊直播咩?吹漲!!

〈財經〉
今日港股終於跌過二百五十天平均線呢個重要牛熊分水嶺既心理關口,
終於由5月11日11740最高位跌到今日15234收市!
無貨者靜觀,有貨者心憂。
上帝要你滅亡,必先令你瘋狂....。

平常心,祝君好運!

Blueman

星期一, 6月 12, 2006

離職

2006年6月12日
丙戌年五月十七
凌晨

〈工作〉
尋日我老Blue返晏。
收到風繼同事﹣艦長不甘受辱下,勞氣劈炮後(不過仍未有正式通知離職日期),
女同事﹣仙奴咩因要俾多D時間湊BB,故辭工想轉份時間比較固定既工作。

返工其間去吸煙區,
剛巧撞到同事﹣球場雞。
同佢講開最近公司好多同事昇職、跳槽及辭工,
佢突然好認真咁話自己都唔細,(乜你依家先知咩?)
仲話公司及所屬部門越做越大,工作越做越多!(一直以來工作同勤力係兩件事!)
球場雞驚自己再過多年未必捱得住。(開始知道自己人工同能力不相稱。)
我老Blue只對著佢:哦!哦!!就算....。
因為起好耐之前我老Blue已經同好多同事講過呢個問題,
可惜,當時好多同年紀既中年同事無心裝載。

自己兩年多前仲係負債既環境已經了解中年打工一族既困局。
一日公司仲未「移動」到我,
一日都仲要靠呢份糧餉過活。

所以由今年開始,自己都開始學習理財之道。
身邊同事及好友亦開始參與,
共挽之。

Blueman

星期六, 6月 10, 2006

世盃開鑼與工作時間

2006年6月10日
丙戌年五月十五
下午

〈足球〉
四年一度既世界盃足球賽終於起今日凌晨揭開序幕。
我老Blue無乜運動細胞兼且對足球亳無認識,
不過,揭幕戰亞視有得睇,
就開電視感受一下氣氛而矣。

世界盃對我老Blue就無乜影響,
但起公司班同事、工友(故勿論真係熱愛足球還是熱衷賭博)就好大影響囉。
尤於工作屬輪班性質,好多同事為左睇波就好緊張個更表返乜野時間,
但係成個世盃有成64場賽事,
的確好難預計邊隊打邊日喎?
尤其係如果個日返通宵都幾頭痕唔知甩唔甩到更通宵嘛?

有計劃往住好過無計劃。
好似蘇工友就醒目,早起05底開始有得申請06大假既時候,
佢就料到有今日,
所以佢個陣起好多重要球賽日子已經Book左大假,
唔駛同其他同事咁為調更而頭痕。

〈模型〉
剛剛落旺角食飯既時候,
行過好多模型鋪見到好多斷市多時既舊版MG返左貨,
好似自己好鍾意既MG-愛爾蘭魔蟹、藍及紅魔蟹、吉姆陸戰型及自護呢D一年戰爭系既名機種都有貨返。
可惜屋企樓下話今日都未返到喎!
唯有等......。

雖然自己之前都講過屋企間工作房已經full booking,
再無空間入貨。
不過,自己仲有「最後殺著」就係最後根據地﹣睡房!
計過應該仲可以擺多三、四盒MG模型存貨......。

咁我就唔駛咁趕頭趕命咁「工廠式」起貨,
大大影響模型成品既質素,
尤其係D老茄角式既MG,好容易掉以輕心。

MG-大魔希望可以呢三、四日可以完工啦!

Blueman

星期五, 6月 09, 2006

風雨下第六個MG完成

2006年6月9日
丙戌年五月十四
下午

〈模型〉
今日接近凌晨時段,
天氣終於打破近幾日又焗又濕的困局,
落起大雨來。
我老Blue亦都起呢段時間完成左自己第六個MG模型﹣RGM-79N GM CUSTOM(吉姆特裝型)。
由於呢隻MG本身顏色設定全身單一色調,
自覺有點「寡」,起製作之前大膽咁重新配色。
呢隻野屬於早期99製品兼且係老茄角式,
設計及部件亦相當簡單個隻,
相對於同時砌緊個隻大魔差好遠!
(其實大魔仲早期,不過大魔起個陣時被喻為屬高水準設計咁解。)

唔知係咪因為MG模型關係,
原本一隻老茄角式戙左起個書架,都覺得好型咁!
可能呢D就係砌模型既過程中,
自己一手一腳經過多番時間及工序換來既滿足感卦。
總覺得依家好難再叫我買現成上色品囉!

由於砌模型砌到今日凌晨,但係今日我老Blue又要返早,
剛剛收工返屋企有D眼訓添.....
中午時段仲有黑雨警告。(落雨及潮濕係油模型既大忌,因為特別難乾!)
希望今晚可以完成埋手頭上個隻大魔啦!
點解咁趕?
因為再唔清咁D存貨咁就再無空間擺新買既MG模型囉!
樓下玩具鋪老細同我講,聽日終於有斷時多時既MG魔蟹返貨嘛。

唯有努力D趕貨.......(有點年少起工廠既感覺)

Blueman

星期四, 6月 08, 2006

SONY DSLR強勢出擊

2006年6月8日
丙戌年五月十三
下午

〈相機〉
前晚我老Blue上網睇到SONY終於對外公佈其下DSLR資料。
首部初號機DSLR型號叫Alpha 100,
初步睇到機款好明顯係改自KM前作D5D,
不過....裡面就別有洞天!

睇完DPREVIEW之後,覺得KM經SONY收購實屬好事。
呢部一號機既規格具備哂當今DSLR最夢幻既元素,
亦同時「挑釁」各大牌子,令好多DSLR品牌構成好大「壓力」....。
包括入門級擁有千萬像素(傳聞係用Nikon D200個粒CCD喎?),令加Advanced Dynamic Range調校(茅頭會否針對F記 S3Pro?);
機身內有名為超級防手震系統(建基於前KM防手震),配合iso1600防手震可達3.5級(Nikon個支全球首枝防手震微距地位好震下?)!!
跟住有埋內置Sensor除塵系統(呢鑊係O記強項,真係令人擔心O記前途!);
至於鏡頭方面就完全承襲上手KM所有鏡頭系統,名稱則改為SAL(Sony A mount Lenses?),除左原有既前KM鏡外,更令我老Blue驚喜係加入Carl Zeiss鏡種(明顯同死對頭樂聲既Leica鏡做賣點對著幹!);
最後機身定價為$899美金,Kit Set(18-70 lens)為$999美金(咁既規格配咁既售價,一向以入門級平價作賣點既P記點反抗?)。
仲有SONY一向以全方位大規模廣告攻略,會唔引發品牌效應呢?(衹少今年C記可能要預多「筆直」同SONY打廣告戰囉!)

今次SONY真係一鑊過同好多人結怨囉(N記、C記、O記、P記及樂聲)!
而我老Blue睇完心都涼埋,已經放棄出年跟進O記E-1後繼機既機會好大囉,
(詳情可見2005年11月2日內容)
但係目標並唔係呢部Alpha 100,
而係期待SONY版既D7D喎....heheheee!
^-^

〈音樂〉
尋日途經CD鋪有售賣國內歌手既CD,
買左一位女歌手名字叫王雅潔既情留感既專輯,
歌聲甜美,值得推介!

〈模型〉
行過旺角仁安大廈一間模型鋪,
驚見有MG版RX-93 New Gundam既改件相片,
我老Blue覺得改得好正,
因為RX-93係我最喜愛既高達機種之一,無奈呢隻MG屬2000年產品,
結構及造型有所不足;至於改件則稍後推出。
適逢自己亦有一盒RX-93存貨未砌及正計劃下一輪MG製作之一!
咁我就等呢Set套件返先至郁手囉!

Blueman

星期二, 6月 06, 2006

孖星與AV

2006年6月6日
丙戌年五月十一(芒種)
凌晨

〈模型〉
尋晚,寫完上一篇既Blog後。
我老Blue急不及待試下用光油黑加美國金屬油上MG部份骨架。
尤於沿用個隻AV model color黑光油無哂貨,
唯有侷住買孖星油性油。

用孖星油性要用專用開油水,有D唔慣。
一直用開AV model color就咁用水喉水就方便得多!
上完隻黑光油待乾之後,
好快咁噴上新買既美國金屬油落部件到!
用左光黑油後,質感果然自然及觀感好好多,
可惜呢隻美國金屬唔需要開,就咁可以噴上去。
耗油量相對大大提高,直係貴買貴用,唔可以亂用!

噴完收工執野,先發覺VJ model color水性油既好處。
平時清洗調色碟就咁起洗手盆開水喉衝幾下就可以,
之但係用油性油又要用番開油水洗工具,
費時失時兼且好浪費。
長期用油性油淨係買開油水成本仲貴過玩AV model color囉。

似乎旺角一見AV油返貨,
有理無理買左D常用顏色先得,
正所謂:有買錯無買貴!

Blueman

星期一, 6月 05, 2006

MG骨架

2006年6月5日
丙戌年五月初十


〈公司〉
今日公司有工友﹣邱隊長Last Day,
佢老哥得償所願終於跳槽成功,
過檔榮昇經理級人物,可喜!
呢排公司除左邱老兄上位外,
亦有唔少同事紮職或轉投其他部門。
佢地絕對唔係講運,當其他人去玩既同時,佢地之前做左唔少功夫,
有係個句:機會往往係俾做足準備既人。

年頭開始,自己評估過形勢及個人能力。
知道乜野可以做、乜野唔可以做,
希望亦都可以實現自己既「十年計劃」啦!

〈模型〉
今日我老Blue收工途經旺角,
發覺幾間模型鋪入面D高達模型高水左,
平均昇幅有成一成至兩成,
唔通同日元昇水真係有關係?
好彩我老Blue屋企D「存貨」好多都係低位入貨,
呢鋪真係有買錯無買貴囉。

尋晚,為兩隻MG噴色個陣除左內骨架未上好色之外,
其餘大致上好哂。
因為發覺MG版後期產品好多都以全骨架做內膽,
依家砌緊個D只係得部份骨架展示。
但係跟住砌個D MG高達都係用全內骨架設計....。
於是想令內骨架整體更具實感,
諗起有好多模型高手及展品,內骨架用上之前提過既美國金屬噴油。
但係好多展品大多以高光銀金屬上油,
自己參考過廖工友手上既軍事雜誌,
大多偏向暗黑及低光度金屬色彩。

但係自己手頭上既金屬油偏向高光,
於是落左模型鋪買左暗黑既黑鐵色及高光黑底油。
試下由未完成既大魔及吉姆特裝形著手,
希望會帶出理想效果啦!

Blueman

星期日, 6月 04, 2006

波鞋

(續﹣﹣6月4日)

〈波鞋〉
今日我老Blue放假,
中午出左去旺角食晏。
天氣仍然唔算穩定,不過行街個陣無落雨算係咁囉!
經過波鞋街,見自己著開個對波鞋鞋底開始見肉,
係時候要買個對新來替換。

講起波鞋,自己唔知點解著得好粗下,
以往買開個D牌子,著唔夠半年就收皮。
跟住有工友﹣恆仔介紹我試下NEW BALANCE,
就係咁買左對NEW BALANCE大大話話著左超過一年有多,真係好襟下。

於是,今次繼續揀呢個牌子,
自己買波鞋從來唔會追款,
基於經濟效益,只會揀過期特價款,因為大多數平成一半有多!
今日,自己就買左對NEW BALANCE跑鞋,好輕身。
諗住有機會追巴士都會快D嘛!
呢對鞋只不過$349,抵!

〈模型〉
食完飯趕住返屋企「開工」(砌模型)!
終於經過呢兩晚奮鬥,
完成左兩隻MG-大魔及吉姆特裝型噴色工序。
不過,隻大魔仲有好多裝甲位需要手上色作補充,
相信要再花多一至兩假日先至可以完成呢隻MG囉!

Blueman

十七年前的今天

2006年6月4日
丙戌年五月初九
凌晨

〈相機〉
Nikon前天公佈左D2Xs,
個人感覺只係小改進,未見有大突破。
一眾「泥坑」粉絲期待既D3似乎要再等多D時日。

〈個人〉
今日係「六四」十七年既日子。
回想十七年前既今日,
亦係我老Blue踏入攝影呢個興趣十七個年頭既日子。
想當日自己仲係「年輕」既時候,
兼職快餐廳工作。
受同事影響開始接觸攝影呢門玩意,
當時更託同事買左生平首部SLR-CANON T-90二手相機。

六月四日,就係用左呢部二手相機同一眾工友「上街」。
更第一次用上幻燈片(Fujichome RP100)拍攝。
十七年前的作品
到今日自己都仍然以攝影為第一興趣。
但係今年開始又多左砌模型及學習理財成為我老Blue新既興趣!

不過,當初一齊的影友已經各有各既生活、各有各忙碌....。

人每到一個階段,生活及心態亦都會轉變,不過好定壞自己先知?
自由高達、命運高達!?

Blueman

星期五, 6月 02, 2006

無睇過巴士阿叔的人

2006年6月2日
丙戌年五月初七
凌晨

〈模型〉
6月1日,我老Blue寫完上一篇Blog之後,
火速為隻MG MS-09 DOM(大魔)上色,
足足花左好幾個鐘既時間,完成左一大半噴色工序。

〈上網〉
呢排引起大眾談論既「巴士阿叔」事件,
我老Blue唔係想討論呢件事既內容,
而係有邊D人係無上網睇過?
答案應該係唔識用電腦或者係唔識上網既人。

呢類人我估大多數並非文化水平或教育程度偏低如否,
而係性格問題居多,大多比較保守、抗拒及學習新事物或新知識。
點解咁講?
因為我老Blue起公司裡面正正有好幾位呢類型既人物,
對學習新野往往諸多藉口俾自己,又唔係蠢仲要係精甩尾個隻!
但係佢地又唔明白時代巨輪唔會因為某D人而停左落來嘛!

但又好巧合呢類型既人物又有共通點:好賭,渴望天降橫財.....。
我就唔知兩者有無關係勒?

Blueman

星期四, 6月 01, 2006

十年

2006年6月1日
丙戌年五月初六
下午

〈個人〉
今日我老Blue放假。
天仍然落住雨....。

經歷左兩年半多既負債生涯,終於起呢2006頭正式結束。
經過幾個月整頓,個人財務開始重新納入正軋,
今朝去左銀行開左個新戶口,方便安排往後個人理財,
數目整整齊齊,唔好為自己增加不必要財務煩惱。

呢排睇番模型雜誌﹣電擊HOBBY 3月刊,
標題係:MG的10年來是如何發展?
內容介紹MG如何演進呢D起到唔講,想講既係簡單一件模型玩具可以點樣令產品再上一層樓。
開發人員點樣日以繼夜令每一件新模型製作上突破上一件模型,
個種苦心及堅持真係令我老Blue佩服及學習。
內容令我老Blue最深刻係訪問Bandai開發部副主管﹣岸山博文,
有提到開發MG Zeta Gundam Ver 2.0既時候,
點樣由舊版1.0變成穿波機型態後再減少整體厚度,
中間經歷過唔少次數既拆解、切割及再組合.....。
玩過MG既朋友都知道,咁樣做可以用惡夢來形容!
可見制作人員個份堅毅及執著既精神。

反觀自己負債前呢十年非常混悵生活,
經常風花雪月,做事得過且過。
呢兩年有賴還債,生活比過去過得既簡單但充實。

身邊有朋友們對風花雪月仍然樂此不疲....。
自己已無咁大興趣囉!
可能自己年紀大左,
又或者隱約見到明天....!?
(每個人行既路唔同,明天亦有所不同)

今天繼續砌我未完既MG模型,哈哈!!!

Blueman