老Blue日記

星期二, 1月 31, 2006

DChome.net

2006年1月31日
丙戌年正月初三


〈個人〉
新正頭我老Blue起呢度同各網友講聲“新春大吉“、“萬事勝意“!
可惜,我老Blue一開年就並唔夠運。
點解?一踏入年初一,自己個肚唔知發生乜野事?
絞肚痛兼一日嘔左三次!!!
經過兩日清茶淡飯之後,今日(初三)先至好番D!

〈論壇〉
我老Blue自從十七年前開始玩攝影、玩相機到依家。
由傳統全手動單鏡機到依家DSLR,
當中有舊影友淡出,亦有新影友加入,
好不精彩。
自從互聯網、數碼相機普及,衍生好多各式各樣既論壇。
自己亦起五年多前加入本地第一個有關數碼相機既論壇﹣DChome.net。
亦從中認識好多早期「老牌會員」,
不過,經歷左咁多年,早期會員起論壇「發表」次數越來越少....。
自己亦都少左參與「討論」。

理由我老Blue明天再講,
因小弟身體不適,唯恐詞不達意!

Blueman

星期六, 1月 28, 2006

Final Plus-命運高達補完結局

2006年1月28日
乙酉年十二月廿九


〈動畫〉
去年超人氣動畫﹣Gundam Seed Destiny命運高達,
結局Phase 50-最後之力,被外間言論為草草收場。
製作公司為回應fans,
終於重新製作長達40分鐘既最終回 Final Plus。
今日我老Blue看過之後,覺得好完整,一早咁樣咪幾好!!
兩套Seed+Destiny合共101集既高達,
起我心目中已經超越左過往咁多套高達既地位!!
不論故事、人物、機械各方面設定,
以至音樂部分都好高水準。
絕對近年稱得上經典之作!

〈CD〉
除左買左Final Plus之外,
尋日出左旺角亦見到Gundam Seed Destiny complete CD,
套戲好睇不得至,真係連歌都撈埋。
今日更買埋Gundam Seed complete best CD。
兩套Seed主題曲及插曲合共廿八首歌咁多!
當中亦有好多日本樂壇當紅歌手主唱,
包括中島美嘉、Chemistry、See-Saw等等!
原來動畫歌曲一樣可以好精彩!

〈電影〉
尋日返通宵斑前自己去左睇戲﹣NARNIA(魔幻王國),
迪士尼作品一向老少咸宜、娛樂性高!
今次特技更加驚人,
好多動物CG幾可亂真!

〈相機〉
前日,O記終於宣佈其下最新DSLR E-330,
史上首部DSLR配備機背LCD觀景設計!!
更重要E-330採用新Sensor ﹣Live MOS,
官方稱呢粒MOS集CCD及CMOS特性於一身。
暫時我老Blue都只係由官方網站所發出Sample略知效果,
雖然未見高ISO效果,
但係從ISO100圖片睇到呢粒MOS效果見到,
色彩仍然帶有強烈Kodak風格,
但微粒幼細比E-300/500更幼滑而不失細節,
有點驚喜!
令我老Blue對O記前景重獲信心,
更加期望E-1後繼機既來臨,
希望如江湖傳聞一樣,新高解像MOS sensor,
三防(防塵、防濕及防震),
超高速AF咁就正啦!!
下個月PMA2006有點期待....。

〈個人〉
今日係乙酉年最後一日年廿九,
聽日就係新既一年﹣丙戌年既開始。
昨日係因,
今日係業,
明日係果....。

Blueman

星期二, 1月 24, 2006

Tokyo DisneySea & Snap相簿上載

2006年1月24日
乙酉年十二月廿五
下午

〈相簿〉
天氣依然寒冷,我老Blue手指都有D僵硬,打呢個Blog有點吃力。

呢幾日,終於整理所有東京拍攝完個「巨大」14Gb檔案,
亦都剛剛分類好之後,上載到小弟既個人網上相簿?面。
歡迎各位朋友及網友瀏覽及留言,謝謝!
Tokyo Auto Salon 2006
Tokyo DisneySea
Tokyo snap

對於今次短短東京四日三夜拍攝,
今日來過小小總結!
由於我老Blue第一次全程依靠DSLR進行,
對比上一次拍攝比較成功土耳其之旅,
過程不可同日而語。
起碼因數碼相機進步,導致成功率及時間均有極大幫助,
呢點已經得到肯定。

期望自己下次拍攝可以有更好成績!

Blueman

星期五, 1月 20, 2006

東京車展相片上載中

2006年1月20日
乙酉年十二月廿一(大寒)


〈相簿〉
今日,下午微雨。
我老Blue無出外,只係留起屋企。
因為要開始整連日來起東京既相片檔案,
整整有成14GB,約有九百幾張相之多....。

由於自己用DSLR多數係以RAW+JPEG模式作儲存,
雖然E-300 RAW檔每個檔案有成13.6MB一個,相對其他機種「體積」大。
但亦基於RAW檔「體積」大,「資料」多,
便於後期製作,
拍攝後若有唔妥當既地方,
仍可以作出有限度「改善」空間。

就好似今次拍攝車展,基於時間、環境匆忙,
有好多相片需要後製之後,先敢見街坊。
是次拍攝成績尚算可以,
歡迎咁多位朋友、網友瀏覽小弟相簿,
俾D意見,謝謝。

東京改裝車展
^-^

Blueman

星期四, 1月 19, 2006

DC界大洗牌

2006年1月19日
乙酉年十二月二十


〈個人〉
自17日返香港之後,
呢兩日我老Blue忙於整理東京之旅既相。
計一計,原來自己起四日三夜既旅程中,
好兇狠咁映左14Gb相!!
效果尚算滿意。
之於今次去東京所選用既攝影器材,匹配合用。
ME-1接目鏡放大器,起車展發揮好大作用,映人像成功率高左好多!
FL-36閃燈,無左佢今次去車展肯定映唔到相。
閃燈柔光套,令今次車展人像效預期好。
Digital Wallet,令我起迪士尼幾乎唔可以繼續映相,有點失望。

〈相機〉
18日,我期待的日子,
因為Carl Zeiss終於宣佈其下最新戰線﹣ZF mount lens。
Zeiss鏡加上Nikon機身!!
雖然由Cosina接手炮製,加上並非內含CPU的AF鏡。
但相信以蔡司牌頭加上價格並非天價(Planar 50mm 1.4定價約3800港元,Planar 85mm 1.4定價約7600),
相信會得到一眾映友「實在」支持。
加上新品種陸續有來,的確為Nikon帶來一支強心針!

這邊廂Nikon挾著Zeiss鏡及D200搶貨潮,氣勢如虹。
今日,上網見到KM宣佈放棄相機市場,買左俾Sony,
卻有另一番景象。
數碼市場已經好無疑問變成活生生的殺戮戰場,
成王敗寇。

睇過今日網友Pcheung兄的Blog,
以目前情況的確對市場較弱既O記、P記甚至乎Lecia前景有D擔心!
因為我都係O記用家,
令我都唔夠膽呢一年再穋穋然再花錢落O記身上,
觀望呢一年,係咪再繼續玩O記或者另投其他品牌?
又或者豪D玩雙線發展?
(自己已經諗到?左....。)

2007年會變成得番Canon, Nikon, Sony, Panasoic, Samsung?

Blueman

星期二, 1月 17, 2006

東京四日行-Day4 (Ueno Park)

2006年1月17日
乙酉年十二月十八
東京

〈上野恩賜公園〉
東京時間早上八時許,陽光普照。

今日係我老Blue留起東京最後一日,
因為同伴649絞肚痛,身體嚴重不適,
由阿著陪同一齊提早搭早機,返香港就醫,
祝君安好。
而自己則同K5則會搭夜機返香港。

九點左右,到左上野京成線站內,
將行李擺起Locker之後去食早餐。
K5帶左我老Blue去左一間Cafe,感覺唔錯,
袛少地道一點,多一點人氣、聲音,少一點冷寞。

跟住同K5行下上野商鋪,
行左過圈,老實講無乜特別亦無乜野想買喎!
因為我覺得好多野香港都好易買到亦唔見得價錢平過香港。
輾轉兩條友行下行下行左去車站附近既﹣上野恩賜公園。
呢個公園原來都幾大下,有點九龍公園感覺。
自己反而起呢個公園找到好多攝影題材,仲映左好多相!

下午一點半左右,
同K5食飯,自己叫左地道咖哩豬扒飯,
味道還可以,勝在夠平嘛,九百日圓。
跟住四點半左右到左機場,
臨走前,同K5到「喫煙所」食煙,
買左罐咖啡飲,好幸運呢罐咖啡罐頂上有小封條,
封條係?品,一條電話繩?
Hahahaha...唔錯!

就係咁結束左我老Blue四日三夜既東京之旅。

總結:由於行程緊密,走馬看花。
但係,呢幾日唔知點解好掛住香港的熱鬧及自由空氣!!

(東京之旅﹣完。)

Blueman

星期一, 1月 16, 2006

東京四日行-Day3 (Tokyo DisneySea)

2006年1月16日
乙酉年十二月十七
東京

〈日本迪士尼海上樂園〉
東京時間早上七點,起身見到天色多雲。
今日原本係同伴649哎話去東京迪士尼海上樂園,
不過,今朝叫醒佢既時候,佢用一個失望既表情話我地知,
佢橫強既生命力終於到左極限,頂唔住!!!

就係咁,唯有留低649起酒店,
我地三個按佢意願去完成呢個「迪士尼」咁艱巨既任務....。
落到酒店Lobby,櫃檯職員遞左張紙仔俾我地睇,
係用英文寫既,內容話我地呢兩晚好嘈,騷擾到其他住客!
係咩?哦!唯有向對方示意明白。

跟住我地一行三人,先到上野食個早餐,
花左大半個鐘去到迪士尼,
因為K5、阿著先後去過哂全球咁多個迪士尼,
唯獨呢個海上樂國日本獨有,佢兩個都未去過!
我老Blue鄉下仔一名,任何地方既迪士尼都未去過,無乜所謂。

原本自己三十幾歲人對呢D童話世界唔係咁大興趣,諗住叫做見識下就算!
呀?!原來都唔係喎!
好多設定都好正,不論環境佈局或機動遊戲都好有心思,
令到我老Blue映相映到停唔到手!
但係入面個水世界設計,
唔知點解俾我感覺好有大友克洋個套Steamboy既影子?
同埋呢個迪士尼海上樂園有好多主題同迪士尼無乜關係咁!?

中段一場以海洋為主題既大型水上喜年華,
十分精彩悅目,可惜大家?唔到靚位,
位置唔多理想。
跟住三個麻甩佬睇住時間表,邊到有表演就去邊到。
中途我老Blue拍攝其間發生少許意外,
唔係部相機出問題,而係新買部Digital Wallet唔知點解過左兩次CF卡之後再過停鬼左?
唔係話?咁大整蠱!
依家先至晏晝兩點幾,部Wallet玩罷工點映落去?
當堂成個人茅Q哂!
好彩同伴﹣K5都有同款Wallet,可以分享到D空間俾我過相,
如果唔係都幾頭痕.....。

接近傍晚,重頭節目﹣水上放煙花開始!
今次我地醒啦,晨咁早?定靚位等睇戲。
不負眾望,機械八爪魚大戰米奇大火船!!
眼界大開。
不過乜咁似日本傳統「特攝片」,
又係好似同迪士尼無乜關係喎?
點到好啦,都十分精彩,映到不亦樂乎!

夜晚八點左右返到酒店,
個個唔識英語既日本職員,
又再做一個「咮」手勢,示意我地上房靜D喎,
我地唯有用返同一個手勢「咮」返佢!

呢晚,我地出出入入都好似做賊咁,
好細力咁?門,好輕既腳步咁去?所....。

(待續....)
Blueman

星期日, 1月 15, 2006

東京四日行-Day2(Tokyo Auto Salon 2006)

2006年1月15日
乙酉年十二月十六
東京

〈東京改裝車展〉
朝早東京時間七點,
尋晚橫風橫雨,今朝天朗氣清!
我老Blue一行四人出發去幕張呢個地方。
因為今次來東京主打節目都係為左睇呢個「東京改裝車展」。

幾經轉接,搭JR列車左轉右轉,大約十點半到達會場,
不過我地無諗過會有咁多人來睇show,
場館門口已經大排長龍,打哂蛇餅。
大約要排到中午十二點先至入到會場入面!

由於我老Blue未睇過日本車展,
一齊由領隊﹣K5介紹會場細節後,
大家分頭行事,各自找自己喜歡項目拍攝。
其中,同伴﹣阿著一向對攝影並不投入,
今次車展佢都帶埋部Nikon F50,649亦帶埋部DC仔同行,
因為大家知道日本車展好多Promotion Girl。

是次展覽場館共分為八個入口,
同伴K5則映由中路出發,
阿著已經不知去向?
自己同649選擇由右至左殺入去,
但中途649因肚痛發作,需要返回集合地點休息,我睇見佢都覺得辛苦。
老實講我老Blue車牌都無一個,當然以映女為主,車為副。
場館咁大,參展單位眾多,自然要去蕪存菁。
好努力咁起會場行左一個圈,
叫做有D「收獲」!

下午三點半,大家原定時間集合,
稍作休息,因為外邊凍場館熱,
好幸運咁俾阿著找到場內有一個租用Locker,
因為其他Locker老早已經爆哂,大家「拿拿林」擺哂D大褸入去,
方便再戰!
呢個時間,大家互交戰果,邊區多野睇,邊區多靚女等等!
因為當中都有好多五官唔合符比例既Promotion Girl混集其中,
無謂浪費大家時間嘛!
就係咁大家繼續涉獵,唯獨649肚痛留守休息區,
阿著人已去如黃鶴,不知所淙?
我老Blue今次同埋K5同行,
因為剛才頭一轉拍攝經驗話我知,
好多日本映友同香港一樣,見到好野爭先恐後,各不相讓。
兩個人一齊點都著數D。

下午五點會場播友誼萬歲,宣佈完結。
於是,大家決定去上野打邊爐!
食完「放題」式長腳蟹、至愛牛肉火鍋之後,
又夠時間返酒店享受熱騰騰既浴池!!!

沖完涼,大家堆埋一間房吹水嘻嘻哈哈咁一晚,
席間,同伴649可能肚痛聽日未必去玩喎!
咁大鑊!?

(待續.....)
Blueman

星期六, 1月 14, 2006

東京四日行-Day1

2006年1月14日
乙酉年十二月十五
香港>東京

〈旅遊〉
註:呢篇東京行係小弟返來香港再編寫的。

今朝八點我老Blue同工友﹣K5收通宵,一齊放工會合另外兩位工友﹣阿著、649起機場集合。
一行四人去東京玩四日。
起機場見到同伴649,烏哂口面講呢兩日肚痛,又諗過今次想唔來喎!
不過,佢話唔想爽約仲頂到喎。(649呢鋪夠哂「情義」!)

航機十點左右起飛,大約下晝三點半到達東京。
一出閘同伴649第一件事入左?所解決佢肚痛問題,大家都認為佢好身體好大問題,
希望佢捱到呢個旅程啦!

臨出發前已經上網睇過當地天氣,並不樂觀。
首日,已經風兩交加,?度大約七、八度左右,好凍!!!
我老blue幾廿歲人,第一次去東京,一切由同伴帶路。
不過,我淨係覺得東京鐵路網非常繁亂,
而且同香港好唔同既係當地人搭火車係無乜乘客講電話。
同埋相對傾計好好細聲。

由於間酒店經人介紹,無人去過,所以大家起又大雨又凍之下,
幾經辛苦先至找到,個陣已經晚上六點左右。
經觀察酒店位於叫南千住附近,入夜之後,
環境有點似香港既深水?或?魚涌,
街道旁商舖都已經關門,比較冷清、人車疏落。

是夜,同伴們本想去上野打發時間,
可惜649肚痛關係,又加上落大兩,大家決定就近食飯便算。
入左一間當地小店,價格相宜,飽食一頓大家打道回府。

沖涼時間約十一點左右,
澡堂裡熱氣騰騰,兼且有個浴池。
十分之舒服,大叫過癮!

12:00am
我老Blue已經有成三十個鐘頭無訓過!
Zzzzzzz...zz..z.

(待續...)
Blueman

星期五, 1月 13, 2006

菲林時代結束?

2006年1月13日
乙酉年十二月十六


〈相機〉
今晚我老Blue返通宵,準備等食飯之際。
無無聊聊上網,睇到Nikon宣佈開始停產菲林相機及手動鏡頭。
菲林龍頭Kodak、 Fuji老早已將業務推向數碼巿場,主力發展CCD。
今日,日本相機龍頭Canon、Nikon帶頭離開無乜盈利兼「雞肋」菲林市場無可厚非。

我老Blue年多前已認定數碼攝影成為主流,
不然,我老Blue唔會放棄多年喜愛既Contax啦!
呢兩年,身邊亦有唔少朋友開始涉足攝影,
一開始就投放資金落去DSLR,
可見新的攝影同好已確認左器材方向。
但係呢群新攝影同好,亦有唔少朋友起攝影方向迷失左!

數碼器材最大好處大家顯而易見。
不過,有D東西太易獲得,亦都好易意興欄柵。
希望各位同老Blue一樣,尋找自己合適的攝影之路。
今年大家攝影上更上一層樓!

【練武不練功,到老一場空】

Blueman

星期四, 1月 12, 2006

整裝待發

2006年1月12日
乙酉年十二月十四


〈個人〉
為左準備後日去日本,
今晚,我老Blue打點行李。
其實次次出門,我都覺得無乜野準備,
例牌執幾件衫行人。

不過,今次去日本主力映相,
尤於去年2005轉左用DSLR之後,
要?備既野多左!
例如,基本相機之外,RAM咭、相機電池、叉電座、儲存裝置等等。
因為萬一萬一掛漏,去到先發覺肯定好唔開心個隻。
點解?唔係好多地方好似香港咁好容易買到你想買既配件。
因為外國地方相機算係高消費品,
一來唔容易買,二來就算有都會好貴,一定貴過香港!

所以呢D野係以前玩菲林相機唔會遇到!
因為之前都有朋友初玩DC,
去到外地滿心高興試用新機,
誰不知呢位老友唔記得帶RAM咭!!

自己亦有過關於DC不快既經驗,
幾年前又係初玩DC,
出門懶老定以為部DC電力強勁,
乜都有帶齊,去到外地出去玩先至發覺部機開始唔夠電,
原因之前夜晚起酒店無再叉電。
結果個日出去映相就住就住,相當無癮!

今晚,開始叉電!

Blueman

星期三, 1月 11, 2006

Mac機Intel芯

2006年1月11日
乙酉年十二月十四


〈電腦〉
今日我老Blue返早,老實講有點唔慣,生理時鐘一時適應唔切,
尋晚訓得唔好,今日開工有D唔夠精神.........。

唯一令我老Blue眼前為之一亮既消息,
莫過於上網見到Apple起MacWorld及網站推出用Intel Core Duo CPU既新機種。
MacBook Pro 及 iMac!
效能有幾好?我就唔識判斷!留返俾乜乜雜誌、物物網站遲D做既測試報告。
我淨對個定價有D奇怪?
點解用左Intel既CPU的新Mac機無平到?還是,日後將會再有下調空間?

不過,今次蘋果重新起主機做工夫,
好明顯業務期望擺脫iPod既依賴,
鬼咩!一部iPod越賣越平,就算幾咁賣得產品利潤都會有盡頭!
始終一間公司利潤靠非核心業務提供盈利唔多健康咁。
又睇下今轉蘋果可以令幾多PC友轉??

不過,我老Blue淨係好關心Steve Jobs係咪完全放棄PDA呢?
我真係好想一部「純種」既Mac PDA/PMP多個iPod video或iMac。
因為我的Mac Mini及PowerBook已經好夠用嘛!

不過,今次蘋果新機最有趣既係最新廣告片,相當抵死既對白!
Intel TV Ads

Blueman

星期二, 1月 10, 2006

閃燈、觀景放大器、數碼相簿

2006年1月10日
乙酉年十二月十三


〈個人〉
今日我老Blue放假。
為左過多幾日同工友們去東京,出左去旺角破財!!
1)O記閃燈FL-36
2)E-300用既接目鏡放大器
3)HYUNDAI土砲digital wallet

(FL-36 Flash)
自從買左部E-300之後,一直都諗要買支燈用,
不過,一日過一日,好似無乜機會要用到。
適逢其會,今轉去東京主力映改裝車展,
就係咁揀左比較輕巧既FL-36。
希望夠用啦!

(ME-1 Magnifier Eyecup)
原本打算去到東京睇下有無機會買到呢個接目鏡ME-1。
點知今日買閃燈既時候,返左貸。
順便買埋!
返左屋企即刻裝落部E-300到,
正如網上評價超好用,放大率有1.2X,手動對焦清楚好多!

(Hyundai- DC Partener HYD-17)
除左買閃燈之外,今日一直心大心細,
唔知買多張2Gb CF咭好呀,
還是工友﹣K5介紹買digital wallet好?
最後尤於重量問題,加上唔想帶PowerBook去日本,
決定左買一個Digital Wallet(40G)。
呢舊wallet其實同其他品牌一模一樣,
屬於OEM大陸製作,只不過笠左Hyundai個名落去,
仲要一定用Window format FAT32格式,
Mac機先至認到!

起屋企試過「過」1G CF落部wallet到,
大約需要7分鐘左右,
再由wallet炒番落部Mac Mini,大概需要3分鐘左右。
時間都算幾快!
第日映相,除左有PowerBook之外,
仲可以有呢個Wallet作選擇。

最後,睇晚間新聞有講信報有可能俾李小超以個人名義收購?
咁若然事成,?咁信報仲有無林行止、曹仁超先?

Blueman

星期一, 1月 09, 2006

路線圖

2006年1月9日
乙酉年十二月十二
凌晨

〈個人〉
1月8日,下晝。
我老Blue呢日放假。
訓訓下教,公司Call我老Blue問我補水(O.T.)濟唔濟?
我話好呀!呢兩年確實少左補水好多囉。
無他!之前已經起Blog提過,想留返多D時間俾自己,?
二來體力大如前,唔想咁辛苦嘛!

不過,自己前幾日擬定左今年投資路線圖,
雖要多D資金做準備,以備不時之需。
所以可以OT就OT!

夜晚,同工友﹣柳公、七星俠同檯食飯。
大家不約而同認為我地呢亭老鬼人工太貴,
過多幾年部門再發大來攪既話,並唔落觀..........。

路線圖計劃,
事在必行,刻不容緩!

Blueman

星期六, 1月 07, 2006

火武耀揚

2006年1月7日
乙酉年十二月初八
凌晨

〈漫畫〉
今日天氣晚間跌到八、九度,一個凍字。

我老Blue老粗一名,無乜墨水。
由細到大,好鍾意睇漫畫,不論港產或日本都好大癮。
依家出左來打工,一樣咁大癮。
不過已經無先個幾年乜漫畫都買,因為一本港柴都要成十四銀架。
而家只係淨係追兩本就算,其他由同事代為「分擔」!
邊兩本?就係「火武耀揚」、「耀武揚威」呢兩本江湖漫畫。

以前自己未睇過,都幾抗拒下,印像中唔係拳頭就係忱頭,亳無劇情可言。
但自從三年多前,起公司見到一疊「無人認領」既火武及耀武,
「好奇心」「立」左幾期來睇,發覺有D改觀?
無錯!係拳頭加忱頭,
畫功不過不失,最正係D劇情編排及有好多精警、警世對白!
睇得我好過癮,有時仲幾感人。
尤其三年多前個期講食團年飯,
年多前個期,講耀揚趕返香港送殯。
都睇到我老Blue幾乎眼濕濕咁濟!
自我「引入」呢兩本奇書之後,各工友叫好叫座,欲罷不能。

今期又有精警對白,我都覺得幾有意思!
【莫因善小而不為,莫因惡小而為之】

唔好輕視一件事情既後果,
因為今日,所以明日,循環也。
呢兩年人和事,我老Blue有所體會!

Blueman

星期五, 1月 06, 2006

Sony Cyber-shot S600

2006年1月6日
乙酉年十二月初七
凌晨

〈相機〉
先個陣我老Blue都好想買部DC仔,
當隨身機咁用。
記得上年亦都起Blog提過想買部Sony DSC-S40,
後尾自己無左呢回事。

今日,上網見到Sony出左部同S40定位差唔多既超平入門機種-
SONY Cyber-shot DSC-S600
定價$200美金,同S40初出價格相約。
但今時今日,功能不可同日而語啦!
此機搭載六百萬像CCD,三倍光學Zeiss鏡頭(相等於31~93mm)咁Wide!
最驚喜ISO可達1000,配備2“LCD芒,
最開心係都係用兩粒AA電,官方話可以映四百幾張相咁慳電喎!
都係買千幾蚊港銀,
作為日常隨身機,
仲想點?

唔知香港幾時有得買呢?

Blueman

星期一, 1月 02, 2006

PDA與記事簿

2006年1月2日
乙酉年十二月初三


〈電腦〉
尋晚,我老Blue返通宵班。
由於連續幾日假期,工作量相對少少好多。

其間,同工友﹣老全請教有關上網睇財經資訊技術分析大小事項。
依家網上資訊,不論付費或免費都非常豐富,有點消化不良。
平時自己都有本筆記簿仔,方便自己不論上網或睇報紙,
發覺有用既資料會用筆抄低佢。

不過問題來了!
自從要學睇財經以來,要睇既資料越來越多。
不斷抄下抄下,亦越抄越手軟,有點罰抄既感覺?
都唔緊要,最弊係圖表點畫呀?
好似尋晚咁,閒閒地都打印左七、八十個圖表。
真係有成本書咁厚!
諗諗下,咁樣落去唔係辦法...........。

今日,諗起用PDA嘗試解決問題。
走去電腦商場睇下有乜新PDA?
結果,可惜無乜邊部PDA對應Mac機中文化!

唯有繼續用本手抄筆記簿啦。

Blueman

星期日, 1月 01, 2006

2005年12月相簿瀏覽數據

2005年12月份老Blue網上相簿瀏覽數據:
Dec 2005:
瀏覽人數平均70人次,比上月11月份上升75巴仙。
點擊圖片平均492次,比上月11月份下跌17巴仙。

多謝各位朋友、網友12月份支持老Blue呢個小小相簿。

Thanks!!
Blueman

Happy New Year ^_^

2006年1月1日
乙酉年十二月初二
凌晨

〈個人〉
元旦日
祝各位網友新年快樂!

尋晚大除夕,依然要開夜班。
好在工作唔算繁重,算係輕鬆過渡。

夜班,其中有一班同事之前提過話呢晚攪乜鬼交換新年禮物。
但係自己一直都無擺起心,唯有「科」水當現金獎交代。
就係咁嘻嘻哈哈又拆下禮物,又映下相咁啦!
講落我老Blue好耐都無玩過呢咁「老正」既節目囉!
最後自己抽到唔知邊鬼個買既鎖匙扣兼電話繩,
幾實用又係藍色。
特別多謝工友﹣恆仔用佢部D2h幫我地映相。

收工,時間凌晨00:15,
一個人途經旺角,同日頭一樣都係咁人山人海。
一齊迎接2006吧!

Blueman