2005Blog小總結

2005年12月30日
乙酉年十一月三十
夜

〈相機〉
尋日，上網見到Leica終於開發M系數碼化。
雖然消息來至Leica官方刊物LFI (Leica Fotografie International)發佈。
但可信性極高。
我老Blue點睇？
遲到好過無到！Leica起相機市場長期落後於大市。
希望Leica重新調節自己起巿場定位！

〈個人〉
不經不覺，我老Blue原來由2005二月開始寫呢個Blog。
差唔多寫左大半年囉！
原本呢個Blog只係想寫下有關自己及攝影上既大小事項。
寫下寫下，只要意興一到乜野題材都「打」落Blog！
慢慢寫Blog己經變成我老Blue既習慣。

前一排，回顧自己呢個Blog，
由於自己記性向唔係咁好，
睇返呢一年，原來有好多事已經唔記得左！
突然諗到，久而久之老左之後，仲駛鬼學人寫乜乜回憶錄呀、個人傳記呀！
只要上網，打印番哂出來咁咪攪掂啦，
夠哂原汁原味！
如果有咁既一日的話都幾過癮。

從今年Blog回顧，
我老Blue亦都來個小總結：
個人財務經過兩年努力終於減債成功，明年開始可以達收支平衡。
攝影方面終於過渡到數碼，由於數碼便利，題材多樣化左。
器材方面無以前追求度咁大，夠用就算。要數今年買既器材最實用莫過於部Mac Mini。
又平又實際，幾乎日日都用緊！
工作方面不過不失，慶幸今年自己工作能力得到公司認同。
但部門不斷擴充，唔代表部門一樣可以容納到咁多好似我呢亭老鬼！
公司透露，部門員工年齡約為39歲，職位大多同事不升不降；
究竟係危定有機呢？
呢一年開始覺自己個人學識大感不足，希望來年有所進步，不致落後於大市！
興趣方面，由於要寫Blog既關係，自己學識左打倉頡，呢樣可以話自己2005年最開心既事。
另外，自己亦多左樣興趣就係砌模型。
砌模型或者攝影最大樂趣俾我老Blue就係從中得到個人滿足感外，
更可以學習如何計畫一件事情，如何訓練自己有限既耐性？
感情方面仍然白紙，無期望；無失望。
總結2005年平均過渡。

展望2006年：
諗起漫畫「火武」一句說話，
“人可以唔發達，但唔可以窮！“
亦諗起今年最喜愛既動畫﹣Gundam Seed/Seed Destiny;
你想駕駛「命運高達」還是「自由高達」呢？

Freedom Gundam向不知的2006年進發！
Blueman

由零開始

2005年12月29日
乙酉年十一月廿九
凌晨

〈投資〉
今日係我老Blue一生中最重要既日子。
就係減債成功，可以重新做人！！
仲記得自己當初由於過於輕視咭數，雪球效應，越滾越大。
當時，覺得問題一旦出現左，唔可以由得佢繼續落去，
否則，後果不堪設想。
最後，債務重組，辛苦兩年先至有今日。
身邊亦有唔少朋友亦有財務上既問題，
唔肯面對現實，希望佢地儘早問題得到解決！

既然自己領略過還債滋味，終日惶恐，不安於日絕不過癮！
開始明白投資既重要,
一於由零開始............

一年前開始學習投資。亦都請教唔少朋友有乜野心得、意見？
答案不一，但係我開始懷疑佢地將投資同投機混為一談？
好多技術性問題、名詞，大多一知半解！

求人不如求己。
做學問點都要自己花Ｄ功夫、時間、心機先有成果，
更可況真金白銀投資？

今日，雖然對投資仍然無乜方向？
但係睇多左有關財經資料，開始識分乜野叫做投資？乜野叫做投機？
亦明白「財不入急門」。
財富我相信一點一滴累積返來。

我老Blue願做一隻樹熊，
好過做一隻羊！

Blueman

2005年最後一個相簿上傳

2005年12月27日
乙酉年十一月廿七
夜

〈攝影〉
今日終於整理左上個月去左泰國既相。
可以話係我老Blue2005年最後作品。
希望各位俾D意見小弟，謝謝！
Thai 2005

由於DSLR價格普及，
公司亦有同事﹣的Sir由Consumer DC上DSLR。
恭喜恭喜！
夜晚，同工友﹣恆仔食飯，
食完飯，恆仔無拿拿買左枝35mm F2，
事後佢都話都無厘頭？
Anyway，恭喜恭喜！！

自己就期待ZF mount出現，
都係個句，還看2006！

Blueman

南亞海潚一週年

2005年12月26日
乙酉年十二月廿六
夜

〈時事〉
今日係南亞海潚一週年紀念。
記得上年發生既時候，俾我老Blue好大震撼，
感覺世事無常，可以短短幾分鐘一個大浪摧毀、改變人的一生。
覺得自己已相當幸福，
雖然隅有不平、不快事，亦顯得微不足道。
一年之後，仍然無改變呢個諗法。

但係身邊仍有唔少人仍然為小恩小利十分計較？
可能未知道或未經歷過大風大浪！？

Blueman

一如以往的聖誕節

2005年12月25日
乙酉年十一月廿五
夜

〈個人〉
呢幾日雖然係聖誕假期，
但係我老Blue一如以往咁起公司開工。
仲要連續返三晚通宵班！
咁多年都係咁過，所以自己對香港過時過節無乜特別感覺。

不過今年我老Blue今年心情有Ｄ唔同。
因為呢幾年困難既財務問題隨著2005年即將結束！
有一種重生既感覺，好多野好想起2006做。
雖然呢個世界呢兩年，人和事有唔少改變，
但自己慶幸身處香港，
可以好自由做好多自己喜歡既事！

還看2006年！

Blueman

ZF mount的推論

2005年12月23日
乙酉年十一月廿三
夜

〈相機〉
今日我老Blue換左副新眼鏡，真係睇野清好多！
畢竟對上個副已經戴左三年多。

上網繼續睇有關ZF鏡既新聞。
俾我老Blue見到台灣網友傳左單新聞有關去年2004九月，
原來Nikon、SMT Carl Zeiss加上一間叫ASML公司簽左份諒解備忘錄，
內容有關互相合作lithograph equipment（平版印刷儀器）技術，
Zeiss仲俾左US$ 58millon、ASML亦俾左US$87millon Nikon。
ASML呢間係乜野公司？
AMSL係一間起荷蘭既科技公司，仲起美國NASQAU掛牌上市。
佢話自己係做silcon wafer晶圓模組領導者，
拍檔中有菲利蒲、蔡司等等。

令我聯想到三間公司合作，
極有可能會發展全新概念的DSLR模式，
最強既機身＋最強既鏡頭＋最強既感應元件。
事實又係咪咁呢？

大家同我老Blue等Zeiss起2006年1月18日宣佈吧！
期待！！

Blueman

Zeiss ZF 鏡頭的聯想

2005年12月22日
乙酉年十一月廿二
凌晨

〈相機〉
今日上網，睇下Zeiss有無公佈多Ｄ有關ZF既資料。
可惜，淨係出左ZF＋Top Secret既字樣咁大把！
講起上來，Zeiss好似末曾試過咁樣宣傳新產品？
唔同呢鋪真係大動作？

我老Blue對ZF當然有期望啦，話哂Zeiss鏡起我心目中有極高地位。
不過，依家轉左DSLR，無得揀返Zeiss鏡用！
咁次Zeiss出鏡俾Nikon機，理應高興。
問題係咪Nikon DSLR全部合用呢？
但係唔好唔記得早排Nikon宣傳部D200既時候，
放風話計劃會出Full Frame DSLR，
已經有人話咁仲應唔應該再投資落去Nikon DX format鏡到呢？
如果.........Zeiss ZF mount係AF/MF Full frame size 35mm鏡？
如果.........Nikon全力發展DX format而停產所有Ai手動鏡？
如果.........Nikon+Zeiss合作發展Full frame size DSLR；亦同時雙向發展DX format?
咁大家又點睇呢？

繼續期待明天有關ZF的發展！

Blueman

神秘的ZF鏡頭

2005年12月21日
乙酉年十一月廿一
凌晨

〈相機〉
我老Blue剛剛同朋友食完宵夜，
差唔多入緊門口之際，
手電響起，原來係工友﹣恆仔call我。
佢好急咁話，十幾分鐘前上網見到Dpreview講Zeiss會有新野出！
我問有乜有新野咁特別？
佢好凝重講：Zeiss會出一個鏡頭俾Nikon喎！
叫做ZF mount-Zeiss for Nikon F mount?
我話唔係話！？

緊住衫都唔換住，同佢邊講電話邊上網看個究竟？
睇完的確幾興奮。
不過，Zeiss官方網頁話一切要等聽日先揭曉喎！

隨即網上一斑N記朋友留言多多，好不熱鬧！
我老Blue就保留觀望態度。
一來未知規格，
二來未知價格，
三來唔知DSLR用唔用到？

明天，絕對期待的日子！

Blueman

書、報、雜誌

2005年12月19日
乙酉年十一月十九
夜

〈報章〉
今日，我老Blue放假，
諗住買份信報歎下午茶，
可惜我忘記今日係星期一，比平日更早買哂。
結果花左半粒鐘先至買到！

講起報紙，大若兩、三年前，
自己開始轉睇信報，
因為覺得好多報紙信唔過！
最初只睇社評、新聞為主。
後來，開始留意財經新聞，
但係呢份報紙經常提及比較專業、技術性用語。
令我呢Ｄ對財經一竅不通既讀者R哂頭，
好多時就咁skip左好多事後覺得寶貴既資訊。

〈書本〉
食完茶餐，決心想儘早了解多Ｄ報紙上提及既用語。
走左入去書局買左本關於呢類既參考書，
其實講開買書，
自己有個壞習慣就係鐘意買書，
但係，買買埋埋又唔睇，最後掉低左，
隔好耐好耐好耐............執屋先知道買本咁既書咩？
呢排執屋上述情況又再次發生左。

〈雜誌〉
除左買左本有關財經既參考書之外，
今日見到有追開既漫畫：【機動戰士GUNDAM THE ORIGIN】、【ALIVE】出左新一期。
跟住2006一月號【電擊HOBBY】中文版又出埋，自己今日真係大出血！！！
好在過多兩日出糧。

有漫畫，梗係睇左漫畫先啦！
本參考書就............遲D先。
:|

Blueman

灣仔亂了

2005年12月18日
乙酉年十一月十八
凌晨

〈時事〉
17日，我老Blue返夜。
接近傍晚，工友﹣大腳來電話灣仔示威區爆發大規模警農衝突。
保安局長呼籲市民儘快離開灣仔區，並暗示警方要「做野」！
未幾，電台報導警方出動催淚彈拒趕示威者。
雙方至今（凌晨兩點）仍膠著對峙當中。

其間，尤於衝突事件，灣仔交通陷於癱瘓。

我老Blue就對世貿無乜認識。
唔敢俾任何意見。
不過，我就覺得香港前線公職人員一直都堅守岡位。

希望呢個會議（MC6）今日閑幕，唔好再有人為呢個事受傷。
因為已經有七十多人因衝突而受傷.......。

Blueman

尋寶遊戲

2005年12月15日
乙酉年十一月十五
下午

〈個人〉
呢排天氣凍左好多，
我老Blue呢兩日都係匿起被竇，極之大懶蛇。
「清場」亦因為咁樣又壓後.......。

〈財經〉
隨著2005年快將結束，
我老Blue既財務狀況亦隨之得到改善。
開始要為自己既財務作出計劃。

呢兩年，其實自己都有留意開財經新聞。
身邊亦有唔少朋友對投資有唔少心得！
據我老Blue綜合D兩年來既觀察，
投資係一門大學問，
市場仿如一個大賭場！

基於上述原因，我老Blue從不輕言入市。
最近，自己從基本財經知識學起！
不過，不得不佩服科技帶來日常便利，
想知市場任何資訊或變化，
只要上網一Click便可。

不過，現今市況想從市場獲利，真的有點似拿住張地圖去尋寶一樣！
究竟贏粒糖定輸間廠？

Blueman

配眼鏡

2005年12月13日
乙酉年十一月十三
傍晚

〈時事〉
今日，MC6（世貿會議）開始，
從新聞報導睇到，時間接近下午四、五點，
南韓示威者同香港警察終於爆發衝突，
其間有放火，跳海呢Ｄ激烈行為。
全灣仔區只有三種人：示威者、警察及記者........。
第一日已經係咁，?
跟住幾日會演進乜野地步？

〈個人〉
晏晝，我老Blue去左配眼鏡，
因為自己呢副眼鏡已經唔記得戴左幾耐？
唔知自己近視有無深左？
去到上次配開既舖頭，
舖頭睇返我老Blue上次記錄，
原來我老Blue戴緊個副眼鏡已經有成三年多！
下！乜咁耐架啦？

咁耐無配個新眼鏡，舖頭擺左好多新款眼鏡起我老Blue面前。
真係睇到我老Blue花多眼亂，
睇左好耐都決定唔到？
揀左差唔多成粒鐘，
最後揀左一副藍架無框、鈦膠混合既德國制品，好輕又特別！
鏡片選用Nikon，本想揀Carl Zeiss，但報價太貴囉！

最後驗眼，
估唔到經過三年之後，
居然無深到！反而仲輕微咁淺左五十度？

Blueman

Rolex Datejust小改款

2005年12月12日
乙酉年十一月十二
早

〈個人〉
話咁快我老Blue為期一個星期既長假己經結束左。
今日又要回歸現實啦！

〈鐘錶〉
尋晚我老Blue又好無聊咁上網周圍click。
俾我見到Rolex Datejust有新版，?
其實我老Blue每隔一排就會上一上Rolex站睇睇止下咳。
自己對手錶呢科野一直好有興趣，
但係一直的唔起心肝蓄錢買。
另一個好重要既原因就係公司太多工友都有，
當中更有工友戴A貨，吹脹.........。

講返呢次Datejust改款，
其實只可話小小modify，對大體變動不大。
一直以來，「勞」俾我感覺相當傳統，
款式十年如一日，仲要年年加價。
不過今次新版宣傳明顯針對現今高消費年輕一族。

至於點解我老Blue會咁鐘情Rolex？
由機芯設計至外觀，一直都咁經典、傳統，
只有人地抄佢，無話佢抄人，由內到外都實而不華。
如果同十萬元以上的名錶相比，
Rolex級數又去唔到「世界名錶」級數。

係我心目中，Rolex可以稱為專業又可靠「準確時計機器」（Chorometer)。
以前細個個陣就好鍾意Oyster Professional，
依家人大左，喜歡傳統款既Oyster Datejust(ref.16200)。
因為Datejust錶面36mm較合我手腕。

Anyway，望下自己隻Casio G-SHOCK又夠鐘返工囉！

Blueman

阿豪婚宴

2005年12月11日
乙酉年十一月初十一
夜

〈個人〉
尋晚，
工友阿豪大婚之喜，
我老Blue祝賀一對新人百年好合，永結同心。

席間，我老Blue睇到依家D朋友去飲宴有個新趨勢，
一般飲宴入席前，朋友們例牌圍埋吹水、打牌或操「啤」諸如此類。
但今次有Ｄ唔同，
其中一班朋友唔係做上述事情，
佢地係圍理打PSP............!
呢班友加埋都百幾二百歲，
打機打得不亦樂乎！

時代不斷在轉變中,
呢兩年自己亦改變中。
（不過我老Blue到依家打機興趣仍然不大。）

清場行動仍然繼續當中，
垃圾己經清理左六成........。

〈攝影〉
呢排我老Blue除左先個排去左泰國映左Ｄ相之外，
真係少左映相，尤其係我老Blue喜愛既人像攝影。
下個月要度度期安排一下至得。

〈時事〉
後日（星期二），WTO部長級會議開始。
會議講Ｄ乜？我老Blue好老實講無乜興趣。
只係香港唔好因為呢單野無人命傷亡或經濟受到損失，
咁就謝天謝地！

Blueman

碎紙機

2005年12月6日
乙酉年十一月初六
夜

〈個人〉
今日繼續我老Blue「既」清理柴房行動。
估唔到執房會成為我老Blue今個長假主要節目！？

尋晚執執下房「 既」時候，
發覺有積積埋埋好多不必要；
但又唔可以隨便亂咁丟「既」垃圾。
呢Ｄ就係過期稅單、各式各樣「既」月結單、保用證及私人書信等等！

新聞太多關於盜用行騙個案，
由於以上棄存文件涉及太多個人資料，
所以一直都保存住，但係實在太多！

今朝出左去旺角某細書局，買左個好平既家用電動碎紙機！
誰不知買左返屋企用「既」時候，有問題？
點解用左十幾分鐘就停鬼左架？
心諗唔係咁神化呀？
正想打算拎返落間書局理論之際，
乍見份說明書原來話如使用太耐會自動停止運作，
直止降?先至重新運作。
下，咁都得？果然家用機！

如事者，玩十幾分鐘就停十幾分鐘。
停機既時候，我老Blue當然爭取時間，用人手撕住先！
就係咁，足足有成十年既垃圾文件，
用左我老Blue差唔多成四個鐘頭（因為仲要睇下分下邊Ｄ仲有用），
最後部碎紙機仲俾我攪到唔識碎紙，
淨係識空轉（嘰嘰.......嘰嘰............)!
咁算唔算壞左定部機同我老Blue投訴多野做先？
平野無好？定要求過高？(No answer!)

本來仲想講下D呢十年點解咁多文件、咁多信？
不過，由於時間關係，留返下次再有機會同大家講！

Blueman

丟垃圾

2005年12月7日
乙酉年十一月初七
夜

〈個人〉
今日我老Blue諗住入夜油埋個兩副BB高達，
坐低無耐覺得唔妥，
砌完真係無位擺囉喎？

停手唔好開工住，望一望自己間柴房（工作房），
睇下仲有冇得變？
答案係有！
只要丟左Ｄ舊野就好可再騰空Ｄ地方出來。

坐言起行，既然要做，
就要做得徹底！
只要來緊呢一年唔會再用既野，無得留低！
丟下丟下，發覺自己實在太多太多超過十年無用過既垃圾！
不過，經過一晚時間，
都係未完事！
睇怕一日未「清場」，
一日都唔駛旨意再開工砌模型....。

Blueman

荷里活股票交易所HSX

2005年12月6日
乙酉年十一月初六
傍晚

〈互聯網〉
今朝睇信報﹣子午線專欄報導一個有關荷里活電影的網站，
HSX.COM
呢個網站有別於一般專題網站，
佢係以模擬股票交易模式進行。
網友可以用設定「模擬貨幣」來進行買入、賣出自己喜愛既電影或明星。
取代傳統電影討論或投票心水電影！

之前，工友全都有推介呢個網站俾我老Blue玩，
今日，登入左之後Call佢，問佢點玩？
大概二十分鐘之後，開始掌握呢個網站既運作。
十分有趣，可玩性極高！

據報導，現階段用戶大約百四萬左右，
我老Blue相信用戶群會不斷增加。
大家如果好似我老Blue咁鐘意電影，
可以登入去玩下！

Blueman

2005年最後一個長假

2005年12月4日
乙酉年十一月初四
凌晨

無論你打算上街？唔打算上街？或者企起街？
天氣報告話今晚會氣溫急降，各位朋友小心身體！

〈個人〉
今日開始一個禮拜，係我老Blue放埋2005年度最後一個大假囉！
暫定留港但未必消費，剛剛去完泰國，真係識印銀紙都印唔切啦！

收工前，先知道今日可以開始Book明年度大假，
好多工友大為緊張，
無他既！一年52個星期，每個星期部門規定只有三個限額，
我工作既部門大大話有百零人，限額仲要按自己所屬工作單位分配。
計下咁多年，部門都養左我呢類好多年資有十年既「半中不老」，
淨係大假一年都有成十八日，
加上呢一兩年，部門加入左唔少新人.........

由於Book假採取先到先得制。
好多大日子，紅日假期更加搶手！
所以今年Book假情況比去年更加激烈。

結果，由凌晨12:00am開始，
我老Blue身處工作單位，Book假限額短短52分鐘已經Book爆哂！
（換句說話，每一分鐘無左一個星期既配額！）
比去年仲要厲害，其實都幾離譜！
其他同事如果呢日無返工，
又或者無委託相熟同事幫手都幾頭痕下！
因為，過左今日之後，
由於無哂位既關係，之後所Book既大假成為standby處理，
即係大假無得你揀，好大機會任由公司按排！

好彩自己臨放大假前返夜，
book到自己明年大假！
^_^!

Blueman

加人工

2005年12月3日
乙酉年十一月初三
凌晨

〈個人〉
今日返工，收到好消息全體員工有人工加兼有雙糧，
加幅有4巴仙，若來年通脹若仍維持兩個巴仙以下，
對我等低級職員來講以算不錯啊！

好多工友對於呢個消息都好高興，
因為早排傳言今年未必有雙糧！
好多工友（包括我老Blue)為左交稅問題而大傷腦筋，
依家總算鬆一口氣囉！

〈時事〉
今日睇報紙知道「四十五條關注組」終於組織政黨，
希望唔好好似班文主怪咁，齍哎口號又無野做到？
亦唔好好似班民賤聯咁乜都向政府say Yes!

香港人加油吧！
我老Blue信有明天！！

Blueman

紅事、白事

2005年12月1日
乙酉年十一月初一
凌晨

〈相機〉
是夜，上DPREVIEW網站，
Pentax發表新鏡頭﹣DA Fish-Eye 10-17mm魚眼變焦。
有點換湯不換藥既感覺！
希望Pentax積極及投放多Ｄ資源落去，
因為我老Blue覺得Pentax品質不差，
無奈形勢及技術落後大市，
DSLR級別俾我老Blue覺得無乜個人之處？

〈個人〉
今日返工收到工友豪喜帖，恭喜恭喜！！
講起紅事令我老Blue諗起我工作既部門。
唔知其他朋友、網友工作於外資公司有冇呢個習例？
公司雖為外資，但我老Blue工作部門既地方比較傳統，
有不成文規矩，但凡紅事、白事一律可申請事假。
紅事者，如有同事要其做兄弟或姊妹，當日可酌情安排放假。
白事者，工友會湊集「帛金」投入一個有當事人名稱的「雞皮紙袋」（俗稱‘開袋’），以表心意。

但好多時候，同事之間有幾好交情？
紅白二事或多或少可以反映出來！
有因必有果............

Blueman