PMA 2008 前奏2

2008年1月30日
丁亥年十二月廿三
夜

〈天氣〉
呢幾日香港持續寒冷，氣温持續十一、二度。
但係相比起國內華南地區嘅近五十年罕見嘅雪災，
從新聞見到廣州車站因雪災而有家歸不得嘅民工，
心情絕不好過.....。
感覺自己確實太幸運。

〈相機〉
仲有一日PMA就快揭幕，
今日我老Blue上Dpreview見到N記終於出手嘞！
一口氣推出一機三鏡，
分別係入門級D40後繼機﹣D60，
特點係像素打到一千萬像及加入除塵系統。
另外推出三枝新鏡，
分別係AF-S DX Nikkor 16-85mm f/3.5-5.6G ED VR、
AF-S Micro Nikkor 60mm f/2.8G ED、
PC-E Nikkor 24mm f/3.5D ED移軸鏡。
其中60mm Micro及24mm移軸鏡更用上N記引而自豪嘅Nano Crystal Coat（納米晶體塗層）技術，
凡係用上Nano身價非凡，
單係呢枝新移軸鏡24mm定價1642歐羅......。
仲有係呢枝係第一枝N記PC-E系移軸鏡，
跟住話會出埋45mm及90mm喎！！

講完N記，跟住講吓我老Blue比較關心嘅O記嘞，
到今日為止仲未見O記有乜新嘢出噃？
不過，就公佈咗有關E-3及E-510firmware update，
睇番網友講有關update解決咗好多之前有E-3用家出現嘅小問題，
如直度電池手柄認唔電等等，
另外提到除咗bug-fix之外，
更起firmware到加入非4/3鏡，
可自行輸入焦距資料，達至防手震功能，
咁神奇？係有真係好喜訊！！
呢個firmware令我對E-3嘅入貨指數大大提高，
等我解決咗部老爺電腦問題，
E-3入手嘅機會希望今年第一季達成啦！！

Blueman

當E300遇上Nikkor 85mm F1.4

2008年1月26日
丁亥年十二月十九
凌晨

〈相機〉
前兩日我老Blue向某工友借佢枝陳年Nikon Ai-S 85mm F1.4玩，
透過土砲4/3轉Nikon嘅mount搭呢枝鏡，
映咗啲相，
發覺呢個85mm呢個「度」嘅定焦鏡出嚟嘅嘢，
玩突寫淺景深效果都不俗！
唔知O記今年嘅Roadmap鏡頭群組，
話會出枝100mm嘅Macro會唔會出大光圈呢？
因為以ZD 50mm F2.0 Marco嘅水準，
如果出枝ZD 100mm F 2.0 Macro就正囉！

Blueman

PMA 2008前奏

2008年1月25日
丁亥年十二月十八
夜

〈股市〉
呢幾日不論天氣或股市都有一種令人無所適從嘅感覺.....。
天氣噚日急降至十一、二度；
股市令一眾散戶體會乜嘢叫做「過山車」，
整個一月市況比去年8月更加動盪飄忽，指數或股價一日之間「發」上「發」落，
我老Blue有幸「體會」及「欣賞」，
不枉過！

〈相機〉
仲有幾日（31/01~02/02）遠在美國Las Vegas舉行嘅PMA 2008（Photo Marketing Association Annual Show）開幕，
實為眾多相機迷期待新相機出爐嘅日子，
眾多相機品牌都會起每屆PMA或Photokina宣佈推出新產品亮相，
據dpreview最新報道DSLR方面，
首先出閘嘅居然係P記，
出招嘅係其下K10D及K100D嘅後繼機﹣K20D及K200D。
比較有睇頭嘅係呢部P記中階機種K20D，
主要特點及新加入嘅規格有：
配搭自家製14.6百萬像CMOS sensor，
除塵系統加入Dust alert，
感光度可擴展至ISO 6400，
LCD顯示屏擴展到2.7" TFT LCD，備有Tune色功能，
及跟隨潮流加入Live View功能等等新項目。

除咗P記外，C記亦出手，
宣佈推出低檔機種EOS 400D後繼機﹣EOS 450D！
雖然係低檔機種，
但係我老Blue睇完個spec就覺得今次C記落重葯咁，
450D主要加強以下功能如下：
Sensor 為12.2百萬像素 CMOS sensor，
千二萬頓然成為低階機入門級08年新基準？
RAW檔提升到14-bit處理，
處理器亦升級到最新嘅DIGIC III，
加入一個十字對焦為中間對焦點內，
C記入門級「終於」有重點測光嘞，
觀景器放大比為0.87倍及高視點為19mm，
觀景器亦加強咗唔少拍攝資料，
LCD顯示屏加大至3.0" TFT LCD，
不媲O記多讓，亦首次為入門級機種提供Live View功能，
同N記一樣，新入門機儲存改用SD卡，
及新嘅直度電池手柄同機身一樣有雙指令轉盤。

入門及中階機頭炮已經打得咁激烈，
唔知跟住其他廠會有乜嘢抗衡呢？
N記會唔出傳聞嘅D90打呢場「入門之戰」呢？
面對P記都出K20D中階機搶灘，
咁O記又會唔會如網上傳聞咁講出E-XX爭市場呢？
遺忘咗嘅S記，佢部Alpha 900係咪真係Full Frame規格呢？

十分期待嘅PMA 2008......。

Blueman

2061

2008年1月22日
丁亥年十二月十五
夜

〈股市〉
今日無論你有無投資起股市，
相信無不對今日港股受外圍連環急挫而勁跌2061點而驚訝！！
恆指今日收市21757點，
成為恆指近十年嚟最大單日跌幅。
收市不論大藍籌、細價股大部份慘淡收場，
其中3988中國銀行更跌到接近當初招股價3.08元，
而388港交所更差唔到回到去年港府入市時嘅價位，收報156元，
單日港股市值蒸發一萬五千億，
真係跌到好離譜.....！

慶幸自己勇於止蝕，
呢兩日仲算避過一劫，
但係會唔會好似上年817咁嚟一個大反彈？
咁就睇啱啱杜指開市前聯儲局急減聯邦基金利率四分三厘之後，
會唔會令投資者對後市投信心一票？

我老Blue短期抱觀望態度.....。

Blueman

08年MG始動

2008年1月21日
丁亥年十二月十四（大寒）
夜

〈模型〉
由於上年受MS倉庫制作困擾，
結果隨著壽屋推出SMG格納庫而擱置，
白白浪費咗好多時間去砌Gunpla（其實自己懶嘅藉口....）。

噚日，起Blog到都有提過Blog友﹣占兄嘅Gunpla新作，
大為感動！
激發起我老Blue決心完成嘅MG存貨，
今日趁假期抽咗盒MG動工，
由於打算砌盒買咗好鬼死耐嘅MG沙煞比，
但係諗起自己都有成半年都無開過工砌模型，
萬一錯手會白白浪費價值$8400日元嘅貴貨，
就係咁揀咗另外同期平好多嘅MG-RGM-79[G]陸戰型吉姆開工，
成為08年第一隻（總數完成過18隻MG）MG模型！

唔知係咪太耐無郁過手砌模型，
開盒個陣有一種莫名嘅興奮湧現.....。
花咗個幾鐘已經素組咗兩手一腳，
不過，可能太耐無砌過，
打磨水口令到手指有啲酸痛，
要分段唞唞。

希望呢隻組合唔算複雜嘅「吉姆」，
可以用兩個星期嘅時間完成哂佢啦！！

Blueman

壽屋SMG格納庫第3彈

2008年1月20日
丁亥年十二月十三
夜

〈模型〉
“股市無斬獲，相機無著落“。
不過，無損我老Blue其他娛樂，
好似最喜愛嘅攝影活動及Gunpla(高達模型)咁啦！
就好似呢兩日喜見Blog友﹣占兄最近亦有開工玩Gunpla，
攪到我老Blue好慚愧（因為多買少砌）.....。

不過除咗要計劃早啲開工砌模型外，
另一樣令我老Blue好雀躍嘅係先個幾日上網，
見到壽屋嘅SMG格納庫會出第三彈007及008，
可以將第一彈及下個月發售嘅第二彈組合(共8款)成為一個「倉庫情景」，
配合Gunpla簡直絕配嘅模型情景攝影！！
咁樣出法唔知會唔會出埋個倉門呢？
期待.....。

Blueman

止蝕

2008年1月18日
丁亥年十二月十一
夜

〈投資〉
近日港股及外圍因素欠佳，
連日大瀉。
自己亦難幸免，
手上有一、兩隻貨遭洗倉式股價下滑，
基於嚴守投資規條：「止蝕不止賺」下，
迫令自己行使止蝕，
避免虧損繼續擴大.....。
呢次止蝕都令我老Blue短期內唔可以諗E-3啦，
咪話唔甘！
希望保留資金等待機會再戰江湖.......！

E-3等下啦！！
（話唔定遲啲買會平好多....... ﹀＿﹀！發夢中）

Blueman

鷄皮紙袋裡的Mac

2008年1月16日
丁亥年十二月初九
下午

〈電腦〉
雖然今日港股受美股急跌拖累而大瀉近千點，
但無阻我老Blue關心遠在三藩市舉行MacWorld，
如各界預期今次Jobs教主出部MacBook Air俾大家睇！
呢部被形容為可以用鷄皮紙袋都入到嘅超薄notebook，
的確好薄好薄，可以做到只得2cm厚咁離譜......。

呢部標榜薄之外，查實規格一般，
行1.6GHz Intel Core 2 Duo，
內置2GB Ram。
港銀定價$14900，相對同級MacBook貴成倍咁嚌！
輕一倍重量，俾多一倍價錢，
大家點睇？

睇完今次MacWorld之後，
我老Blue嘅up-grade 電腦計劃，
覺得新款「鋼版iMac」功能最齊全，
價格比較「合理」。
因為現階段對我嚟講，
部腦比較緊要，
家陣俾我買咗部E-3，
依家部G4版嘅Mac Mini都無力執相，
因為CS3、Olympus Studio及Lightroom recommended要2GHz Core Duo及1GB ram先至行得順喎！
你話死唔死呀？

Blueman

111攝影聯誼日

＊＊是日拍攝分享＊＊








2008年1月12日
丁亥年十二月初五
夜

〈天氣〉
呢排天氣同個股市一樣咁飄忽，
好似今日咁，下晝有成25C咁高，
但係天氣報告話聽晚話會跌到11C咁誇.....。

〈攝影〉
踏入08年我老Blue先個排都講過近排公司多咗好多工友買咗DSLR，
成日講幾時攪番個「攝影聯誼日」咁話！
終於呢個禮拜公司無咁多OT，
一伙人趁噚日出咗去「九記」（九龍公園）外拍嘞。
一行六人（除咗自己外，K5、史潭、富強、老全、譚工友）高高興興咁飲咗午茶後，
殺入九記玩。
由於有啲工友以往揸開儍瓜機，
初嘗DSLR對自己部機及基本攝影概念都未完全了解，
藉著今次機會，大家互相研究攝影上技巧，
希望對拍攝上提高「成功率」。

今次外拍大家用咗過新嘅攝影流程，
大家同一個目的地，起同一個地點各自揾拍攝題材，
跟住指定嘅時間集合，
睇吓大家嘅映番嚟嘅相有乜唔同？
最後，集合時間到咗，
有幾位新手互相提出剛才遇到嘅攝影問題，
有經驗者作出解說。
就係咁嘅氣氛之下映相，
大家都好似開工咁，好努力爭取時間去映相，
居然起九記映咗幾個鐘咁長，
但係大家覺得時間好快過咁！！

映到五點幾，大家都覺得夠皮去咗Tea，
唔知係咪好耐未試過咁多朋友出嚟映相，
成班友都好雀躍，
跟住Tea完之後又話行相機鋪。
入到相機鋪居然唔係睇相機，
係揀相機袋......？
六條友起間尖咀好出名嘅相機鋪逗留咗成粒鐘咁濟！

最後大家仲未玩夠，
話要食埋晚飯，
去到間中餐館，大家一坐底有種講唔出嘅舒服，
因為行咗成日其實都幾攰吓.....。
可惜，我老Blue唔同大家，
食完餐飯仲要返通宵班呀!!!!
（收完工之後，感覺靈魂同肉體好似分離咗咁...............-_-! ）

希望好快有可以攪多次咁嘅聚會啦！

Blueman

完全收錄

2008年1月7日
丁亥年十一月廿九
早

〈音樂〉
今日天氣總算回暖咗唔少有21C，
無先個幾日咁凍囉！

我老Blue趁呢兩日，
用咗唔少時間終於將咁多年買落嘅CD全部轉哂Apple Loseless格式（iTunes其中一種少壓縮嘅AAC音樂格式），
做完經數據顯示居然有353張專輯，
歌曲數目總共達4200首，
檔案容量有成102GB咁多，
好彩新買嘅HD目的都為咗咁樣，
統計要用11.8日先至一次過play哂咁誇！！

起呢排為咗攪呢壇嘢真係花咗唔少時間轉檔，
轉檔嘅過程相當乏味，
乏味情度直逼scan菲林，
當中最痛苦係上網揾番好多好舊嘅CD Cover，
可一不可再.....。
家陣正囉，可以好輕鬆咁起iTunes揀歌入落部iPhone聽歌嘞！
講起iTunes聽過有用iPod用家話呢舊軟件好麻煩、好阻定，
唔可以好直接過歌入iPod（要經第三者軟件等等），
可能自己一直用開，
無乜特別麻唔麻煩。
但係呢排轉咗咁多歌之後，
就對iTunes另眼相看，
點解會咁講？
因為家陣有成四千幾隻歌，
如果想揾一、兩隻歌都幾頭痕吓！？
iTunes最大優點就係佢就係一個管理影音檔案嘅資料庫，
可以提供唔同種類嘅資料做管理及搜尋，
當然事前對每張專輯或歌曲輸入所要嘅資料先至做到啦！

亦同之前起Blog提過我老Blue最近先至發覺自己買咗咁多CD，
睇番資料若莫有成十幾廿年，
最耐個隻有成26年嘅王馨平CD(1982出品），
由舊歌手到新歌手嘅歌，
聽番好似去咗「時光機」咁，
每隻歌因為唔同年份，
會記起自己個年發生嘅事，
感覺好奇妙.......。

時間真係過得好快！

Blueman

電腦二合一

2008年1月6日
丁亥年十一月廿八（小寒）
凌晨

〈計畫〉
踏入08年第一個月份，
雖然我老Blue都提過自己去年定下嘅目標只係完成咗一半，
但係呢幾日都為自己出咗個好簡單嘅08計畫。
就係去年成日掛起口邊要upgrade兩樣嘢-電腦同埋相機，
另外一樣當然係投資啦，
好多財經評論都話今年股市將有好大波動，
自己不竟係散戶新丁，
自然策略上要比去年嚟得謹慎，
堅持「止蝕不止賺」為首要規條！

〈電腦〉
正當自己都諗住夠錢嘅話，
電腦應該會揀最新嘅「鋼之iMac」。
不過，呢兩日上老地方冰果室（著名中文Mac機資訊網站），
有「江湖傳聞」話嚟緊今個月14日嘅San Francisco MacWorld會有新嘢出，
其中吹得最「恆」嘅會係Mac會出部超薄新Notebook，
本來唔覺得一回事，
但係有外國網站傳到話呢部超薄Notebook，
會配搭一個叫做「Integrated Monitor and Docking Station」，
睇幻想模擬圖見到會係將成部Notebook「兜」嘢打側插入一個近似「iMac」嘅物體入面，
而呢個近似「iMac」只不過係一個有埋「芒」嘅Station，
但係當部Notebook插咗入去後，
佢就變身成為一部「iMac」！！！

我老Blue睇完之後，
覺得個「哎啲呀」好正！
完全附合我貪心嘅要求，
出街又可以係輕身嘅Notebook，
起屋企又可以係有大「芒」嘅desktop，
真係一舉兩得！
不過，呢啲都「江湖傳聞」，
信不信由你？
期待14號嘅MacWorld！！

Blueman

凍到震

2008年1月3日
丁亥年十一月廿五
夜

〈天氣〉
呢幾日天氣真係幾蝦人吓，
先個幾日我老Blue仲起blog到講天氣仲維持廿幾度，
話口未完呢幾日話凍就凍起上嚟，
得個十二、三度，
郊區仲低到九度、十度添！
撞啱自己呢幾日仲要返早班，
晨早未夠五點爬起身個種感覺有啲想死.....。

所以呢幾日最享受嘅係「厘」起被竇訓教...z.z.zzzz.....

Blueman

2008新年快樂

2008年1月1日
丁亥年十一月廿三
夜

〈個人〉
今日踏入08年第一日，
小弟起度同咁多位朋友、blog友講聲Happy New Year！！
新一年自己就無乜期望嘞，
最緊要身體健康，
開講都有話：健康就係財富！
希望各位大家一樣啦！

Blueman