調理身體

2005年10月31日
乙酉年九月廿九
凌晨

〈個人〉
近排天氣好始轉涼，
一早一晚可以相差成七八度。
可能天氣加上連續幾晚開夜有關係？
自己身子覺得好唔自在，腸胃唔係咁妥。
經工友?仔推介左起旺角一個中醫師，
呢兩日睇左兩次，執左兩劑苦茶。
感覺腸胃好左、開胃左！
苦口良藥！！

〈模型〉
今日我老Blue又完成左多兩件模型作品。
分別係：SD-Gundam Ez8、AMX-011S ZAKU III。
自己比今次作品八十分啦！

Blueman

傳聞中的Nikon D-200

2005年10月29日
乙酉年九月廿七
凌晨

〈相機〉
剛剛收工，一邊食宵夜，一邊上網。
終於睇到有關傳聞中的Nikon D-200「真身」（因為未有官方證實），
但可信性幾高，從幾張網上「流放」出來的圖片睇，
機身外型混合上一代D100+F6的影子，
其中一張更搭載最新“無線微距閃燈系統”，相當新穎設計。
至於個Spec，我老Blue等官方出左先至再講未遲！

〈模型〉
基本上我老Blue喜愛既SD-Gundam系列模型，
我已經買哂咁劑，未砌既都有成十幾廿盒，
睇怕唔砌都對唔住自己，
問題係完成日期係幾時？

數下數下，原來真係完成砌哂的話，
有成三十一件咁誇！！
擺哂出來映相你都咪話唔過癮！
不過，依家我老Blue先砌左三分一咋.....................:(

Blueman

大量入貨

2005年10月27日
乙酉年九月廿五
凌晨

〈相機〉
我老Blue自從迷上左玩模型之後，
好耐無起日誌講相機呢家野，
上網睇下最近有乜新聞？
我諗最哄動莫過於C記個枝新“24-105 L”鏡出問題，
須要回收咁大件事！
我老Blue點睇？希望呢件事之後，
各廠方唔好當我等消費者係「白老鼠」就好啦！
一間公司最值錢並唔係產品，係「信譽」！

〈模型〉
今日?返工前，
見糧頭，去樓下間玩具鋪入貨，
一口氣買左六盒SD Gundam，
雖然唔知自己有冇時間砌，
但係見屋村玩具鋪同旺角街鋪價錢上落有成20~30%。
見鍾意有貨唔買，
第日就呻笨................. :)

**註：筆者其實計埋今次，屋企模型存貨量已經達到17盒未砌！！

Blueman

第十一個SD-Gundam模型

2005年10月26日
乙酉年九月廿三
凌晨

〈模型〉
近排我老Blue沉迷砌模型。
就來呢個日記會變週記囉！

今日我老Blue完成左第11個SD-Gundam: GUNDAM BLUE DESTINY。
經過十個SD-Gundam模型既經驗，
自己開始對砌模型及噴色都可以掌握。
今次呢個GUNDAM BLUE DESTINY設定由藍色改為淺灰＋深灰的陸戰型。
自己對呢個作品幾滿意。
希望下一個模型會更理想！

Blueman

SD高達之GF系列

2005年10月24日
乙酉年九月廿二
凌晨

〈個人〉
剛剛收工，工作越來越繁忙，
真的有點吃不消。
但距離“財政獨立”仲有一段漫長的路...........

〈模型〉
我老Blue自從砌左十一隻SD高達之後。
尋晚，開始嘗試進軍砌SD高達﹣GF系列。
整體比例都比舊有SD高出一個碼。
組件亦比G Zero(No.200之前型號)多出一倍！
所以，終於砌我老Blue第一個RX-78-2元袓高達。
(其實為最後一個G-Zero No.200紀念型號）

不過，完成日期就.............好難講！？

Blueman

第六個模型

2005年10月18日
乙酉年九月十六
凌晨

〈模型〉
今日放假，call左5號工友茶記。
事後行模型鋪，俾我老Blue見到“雙星”隻“舊化粉﹣Ｂ號”，
對於砌模型新手既我最合適不過。

經過多日戰鬥，今日終於完成左第六個SD高達模型。
平均每個都用左十個鐘頭先攪掂！
但係計下計下間房已經買落有成廿一副SD-Gundam囉！
買模型真係會買上癮架！
如果砌好哂映相，相信都仲過癮！！

試過隻“雙星”2號“舊化粉”，
效果比用人手或噴色輕鬆得多，
兼且更容易控制。

Blueman

SD高達

2005年10月9日
乙酉年九月初七
凌晨

〈模型〉
10月8日
呢排買模型買上癮，尤於我老Blue對砌模型仲係初哥一名。
加上銀兩有限，唔敢放膽買咁貴既模型玩住。
所以現階段砌住最平既SD高達。
一來當練習，二來砌衰左都無咁心痛嘛！

雖然SD高達對我老Blue來講，價錢平、款色多。
但係相比起HG/MG系列，並非主流暢銷貨，尤於好多型號俾客買哂就未必再添貨。
偏偏我最想砌番最早期個Ｄ款式，例如早期既MS-06渣古、魔蟹、魔龜之類。
所以，今日下晝返工前去左一間位於佐敦老牌模型鋪。
試下睇下仲有無Ｄ舊貨？

最係都俾我揀到兩款心水型號：MS-14B J-RIDDEN'S GEIGOOG(紅勇士）、MS-18E KAMPEER(京?帆）。
雖然兩副模型都係屬1999年出品，
模型水準當然同今年出品有所距離。
亦都因為係早年貨式，
所以通常列為特價品出售,
都幾著數架！

不過，模型、玩具呢家野好奇怪，
鐘意無野好講！
唔經唔覺呢排都買左好多副SD Gundam，
數下數下，原來已經買左九副咁多！
諗落自己都幾過份！

因為至今為止，
我老Blue只係完成左一副Seed Destiny-Zaku Warrior咁大把！
^^!

Blueman

模型製作

2005年10月8日
乙酉年九月初十
凌晨

〈模型〉
10月7日，落街嘆下午茶，
經過玩具鋪，見到有幾副SD高達做特價，
手痕痕又買左三副拎返屋企。

經過上一次熱身之後，
開始對自己有Ｄ要求，
今次連夾位都“省”埋“筆地”。
心諗一次過砌幾副，最後先一次過開噴槍上油，
可以慳番Ｄ時間！

一口氣就係咁連續砌左四副SD高達！
砌埋、“省”埋“筆地”，都用左我老Blue差唔多三個鐘咁劑。
食過晚飯，諗住試下用樽裝水劑筆地，可以慳錢Ｄ，
開埋噴槍用啦，點知效果比罐裝噴劑筆地差好遠！
效果又粗又散又難控制。
可惜，枝罐裝已經俾我老Blue用得七七八八，
唯有今晚油住一副先。

就係咁，今晚就揀左副$18最平既RGM-79N 吉母﹣改。
可惜之前工序失誤，浪費左好多時間。
望下個鐘，係時候收檔,
已經係半夜兩點幾啦！
最終，只能噴左主色就算，
細節位唯有壓後再做吧！

估唔到連砌模型都好似返工咁，
趕頭趕命，唯有練習多Ｄ，
希望快Ｄ上手，
蓄夠可以映輯SD高達寫真集都幾過癮！

Blueman

事隔廿年再砌模型

2005年10月7日
乙酉年九月初五
早

〈相機〉
是日並無任何新機發表。

〈模型〉
我老Blue無寫幾日日誌，
原因並唔係無乜野寫，而係無乜時間寫就真！
點解？因為呢幾日掛住起屋企砌模型。

事?，尤於我老Blue自從手上油HCM PRO太核突。
於是問玩開模型既幾位工友取經！
異口同聲答曰：用噴筆好好多！
心大心細唔知買好唔買？
又驚買左玩一排唔玩會好浪費！
唔買上油效果又唔理想！
最後不顧一切，買左先算。

買完套「傢生」之後，
心諗要手頭上無野試刀喎！？
拿拿臨落去樓下間玩具執副平平地既試下無壞？
結果，揀左副SD高達玩，賣＄３４大元，
就算攪喎左都無咁肉痛嘛！

事隔廿幾年再砌番模型，
一副細細盒既模型仔，驚訝Bandai都可以做模做得好緻細！
同年幼時所玩不可同日而語。
用左八個鐘頭搏鬥，終於大功告成！
唔知係副模型做工幼細，還是噴筆加上靚油有關係。
感覺比之前用手上色好好多！
自己都覺得決定買噴筆係值得！

今日，再用SD高達再練習多Ｄ，
先決定再上Perfect Grade Gundam模型！

Blueman

模型攝影

2005年10月2日
乙酉年八月廿九
夜

〈相機〉
Fujifilm推出 FinePix F11 Zoom（F10後繼機）。
Leica推出 D-LUX 2，好明顯係Panasonic Lumix DMC-LX1既OEM。
不過，從Leica、Panasonic繼續合作，出年Panasonic出DSLR又會唔加上Leica AF鏡呢？

〈模型〉
經過兩晚努力上油，
終於油左我老Blue第二個HCM PRO作品，
表面上細節油得好豐富，
但係一映相，好多細節上鏡就變得過火。
下次，似乎為兼顧上鏡關係，
細節位要輕手Ｄ！

夜晚，經過樓下間玩具鋪，
見到有個細細既display箱仔，Size可以剛剛擺到隻HCM PRO。
只賣＄２３一個，仲可以玩層層畾，
方便又抵用！

Blueman