PMA2006初評

2006年2用27日
丙戌年正月三十
夜

〈個人〉
天氣忽冷忽熱，過兩日天文臺仲話會跌到十一、二度喎！？
呢幾日我老Blue好努力咁上網找工具起部Mac都由DVD檔轉MP4落去我部PMP。
雖然轉到，但發覺D音效比畫面有少少許Delay，算吧！

〈相機〉
各相機發燒友期待已久既PMA2006終於開幕！
雖然有好多大廠已經事前發佈左唔少「官方資料」，
但好多所謂新產品乏善足陳，好多影友及網友心中有數。
不過，臨開Show個日，估唔到有D驚喜！
先有Pentax「終於」有645Digital樣本俾大家，外型及規格幾吸引，兼且首次引用Kodak CCD！
繼而松下及Leica宣佈推出有關4/3產品，
包括DCM-L1，一部俾我老Blue覺得將部O記E-330重新包裝得更靚咁樣，
至於同E-330質素有無分別，要等報告啦！
另外，Leica亦同步推出首枝對應4/3既AF防震14-50mm變焦鏡，
呢樣令我有點意外，但係呢部L1及枝4/3 Leica AF zoom已經令一眾O記非常雀躍。

反觀今次PMA C記及N記無乜太大驚喜。
O記亦無任何有關E-1後繼機既消息，有點令我老Blue失望！
不過，自己仍對O記4/3器材維持保持評級。

期望今年4/3會有更多驚喜俾用家啦！

Blueman

下載電影預告片

2006年2月23日
丙戌年正月廿六
夜

〈預告片〉
呢排我老Blue除左日常出街或者返工收工起車聽歌外，
尋晚開工返通宵，仲將佢當外置硬碟咁插落公司部腦聽歌，
真係開工都醒神D！

不過，除左睇相、聽歌之外，呢部P-2000仲可以睇movie，
但係可惜自己缺乏有關對應檔及轉檔軟件。
終於呢兩日得到好友-阿包電郵「指引」，
「獲取」有關軟件令我老Blue可以上網將心愛既電影預告片(Movie Trailers)
作儲存及轉檔落去部P-2000！
效果起P-2000睇番都幾理想。

今日，自己好瘋狂咁上網download左五十幾套Trailers咁多!!!

越來越覺得呢部P-2000好超值！

Blueman

PMA2006前奏

2006年2月21日
丙戌年正月廿四
凌晨

〈相機〉
收夜同工友食完宵夜，返到屋企已經係凌晨三點幾。
因為今晚返通宵，所以唔駛咁早訓教可以上網消遣下先！

上網睇到原來PMA 2006仲有五日舉行，即2月26日美國時間。
一眾好此道者紛紛期待各喜愛既品牌估下有乜新動作？
我老Blue自從用左O記之後，自然大多偏向4/3系統。
當然有份簽4/3個五間公司中，
我最希望當然係龍頭O記會唔會起PMA公佈E-1後繼機（傳聞中的E-3）？
繼而Panasonic出部4/3 DSLR的話，佢會唔會找Leica幫佢出鏡呢？
因為我老Blue唔係話O記D鏡唔得！而係佢個D銀圈Pro鏡價錢真係太Pro啦！
郁下都萬幾萬幾銀上落，
如果Leica出枝4/3鏡又係萬幾？
二揀一？你話我會揀邊枝？
除非佢地一齊夾埋；大家出Ｄ唔同既鏡，
例如學Zeiss ZF mount咁一式全部手動定焦鏡，死未！？
等斑Fans無得揀！咁又另計？
係就我頭痕，唯有做器材奴隸，賣身求鏡.....。（一笑）
呢個星期網上各大小傳聞不斷，
又睇下大家估中幾多樣？

弊！寫寫下段Blog我老Blue間房盞燈燒燈膽，
突然黑哂！
唔通有乜野玄機？？？

Blueman

隔離的感受

2006年2月19日
丙戌年正月廿二（雨水）
夜

〈耳機〉
呢兩日放假，百無聊賴。
都係一個人出左旺角行街睇下潮流野。
當然唔少得一路行街、一邊聽歌啦！
唔知係咪個對耳塞E-2c俾我戴鬆左呀？定還是俾我習慣左？
開始戴得容易左、入耳左！

今日，我老Blue為左下次私影有更好效果，
到左九龍塘Page One書店睇有關攝影人像書，
希望「睇」多Ｄ靈感（抄橋）！
企左成粒鐘，有唔少「收穫」。
最正係戴住呢對E-2c，好似與世隔絕咁，
可以好自我既環境下，好專心之下咁企起書店咁睇書，一流！！

睇完書，跟住出左旺角行多陣。
星期日，我老Blue未試過咁「靜」咁樣起旺角行街，
戴住呢對E-2c真係完全聽唔到人地講野。
好靜，好靜.....靜到只有音樂聲！

其實，諗落都幾得危險！
希望，對E-2c煲多百零二百個鐘會更好聲。
下一對就諗Westone UM-2，哈哈！！

Blueman

迷上隨身聽

2006年2月17日
丙戌年正月二十
凌晨

〈音樂〉
自從我老Blue買左個P-2000流動相簿之後，
除左可以隨時隨地同朋友分享相片之外。
另外最大好處就係內置40GB，可以放肆咁俾我老Blue擺好多好多mp3入去。
由於時間關係，到今日為止都係轉左我全部正版CD七分一左右精選做mp3！
不過，已經好夠聽。
點解？因為呢幾日聽番好多以前D歌，越聽越好聽！
咁樣就唔駛咁急要轉哂做mp3囉，
得閒先轉幾隻CD玩下仲有新鮮感都未定？

By the way，自己先後買左earphone及headphone。
呢幾日，翻覆輪流用。
發覺初頭對earphone-Shure E-2c戴得好辛苦，
依家戴下戴下習慣左，無咁梗耳，
兼且越聽越好靚聲。（價錢都高過對headphone AKG K26P啦！）
原本因為戴得辛苦想讓俾朋友，可惜無朋友有興趣！好彩......！？
至於另外一隻headphone AKG K26P就音質明顯無E-2c咁好，
已經安排留作起屋企用，
最適合夜晚收工起屋企聽及玩電腦用，?一流享受！

不過，起公司聽過好多工友唔同既headphone之後，（唔知點解Ｄ工友咁捨得，絕大部份係高級型號即過千銀貨式！！）
佢地全部都係用iPod，可想而知iPod效應幾咁大！
聽過之後真係有好大分別，
了解左何謂普通動圈式單元及雙發聲壓電式單元，
自己心心思又想換個隻upgrade版earphone，
上網留意有關headphone介紹，
有隻牌子叫Westone出左隻叫UM2同Super. fi 5同級，
極之適合隨身聽播放而有出色音質！

攪到我得閒出去旺角金雞試下呢隻UM2係咪咁堅先？

Blueman

Momoko 相片上載

2006年2月16日
丙戌年正月十九
凌晨

〈相簿〉
前晚，我老Blue終於將私影人像-Momoko相片整理過後，
Upload到我網上相簿裡，
好高興，Model-Momoko睇完之後，
都post左唔少小弟十幾張作品落佢個人相簿到。

今日，工友﹣恆仔話我知佢亦都upload左Momoko Ｄ相落去佢相簿到。
叫我上去睇下！睇完感覺到恆仔揀相都好小心。
作品雖然唔多，只得二十張，不多不少。
依第一次拍攝人像來講算有唔錯既成積！
希望各位朋友及網友多多支持呢位朋友啦！

Momoko by Blueman
Momoko by Ben Hau

Blueman

P2000用後感

2006年2月14日
丙戌年正月十七
凌晨

〈個人〉
我老Blue呢幾日無寫Blog，
原因掛住玩新玩具-EPSON P-2000(Multimedia Storage Viewer)，
除左因為初頭個earphone E-2c戴唔慣，
攪到我要買個代替品-AKG K 26P 便?式headphone，
不過，講舒服就梗係K 26P；講音質梗係E-2c！
唯有用蘇工友話齍：冬天用headphone，夏天用earphone囉！
聽歌方面，MP3 only，
但係有成40GB咁大容量，
淨係睇相有D浪費，於是我老Blue呢幾晚張屋企好多珍藏CD,
轉為最高320Kpb質素mp3檔。
不過，計下計下原來自己咁多年買左百幾二百隻正版CD，
當每隻CD揀三、四首精選轉檔都幾大工程......*_*!

至於，個P-2000 睇相我老Blue覺得無得彈！勁靚！！
3.8"大畫面，可以俾我好無情「威迫」D朋友咁睇我Ｄ劣作，
當然好多朋友好鍾意個畫面多過我部機入面Ｄ相啦。（一笑）
不過，遺憾係部機過相、聽歌都唔算好食電，
但睇相就爭D勒，平均兩個鐘就Bye-bye.....。
睇怕要找時間出去買多粒「士埤」電先頂得住！

總結，我老Blue對呢部P-2000就好滿意。
遺憾部機比起同級機種大部同埋重左Ｄ，mp3檔出亂碼之外.....。

Blueman

小病、私影、玩具

2006年2月8日
丙戌年正月十一
夜

我老Blue自從初四病左之後，
已經有成個星期無寫Blog囉！
原因呢個禮拜好忙、好精彩、好辛苦形容！

〈事件一：小病〉
我老Blue唔知發生乜野事？
由年初一肚痛到年初五先至好番哂，
完全食唔安、訓唔樂，好慘。
今年願望：身體健康！

〈事件二：私影〉
小病其間，百無聊賴留起屋企上網！
上影會網站瀏覽，見到好多影會Model留言。
好奇之下，send左e-mail相約私影，
結果一、兩日，有唔少影會Model回覆。
打鐵趁熱，約左第一個回覆的Model-Momoko私影。
於是聯同工友 K5及恆仔去左尖沙咀開始左我第一次私影活動！
由於自己都係第一次攪私影人像，
好想拍多D自己有要求既作品。
所以事前兩晚上網睇左好多過往大師級作品作參考（抄橋），
自己仲畫埋好多素描，差唔多有成二、三十張咁多。

拍攝當日，時間、天色配合得相當好。
由於事前畫左好多素描，好有幫助，
會合之後同Model用左十幾分鐘介紹及講述自己今次拍攝構思。
呢樣野如果出會玩唔駛旨意可以咁樣俾你同Model咁溝通！
短短三個鐘頭，好順利咁完成呢次私影活動，
Model Momoko表現非常出色，
好多拍攝要求，小妮子應付自如，聰明女！

今次自己拍攝女像，大膽全程大玩黑白相。
映左大女約2.5GB CF，大約百七張相。
事後睇返D相，自己都好滿意今次既成積！

不過今次成積換來週身骨痛，
因為收完通宵班，返左屋企訓左三個鐘又話去映相，
映完相跟住又話返通宵，即係兩日差唔多無訓過覺咁劑！？
今朝訓醒成個人好似散哂咁！

〈事件三：玩具〉
有鑑於上次去東京映相，
有個Digital Wallet唔穩定既情況出現。
唔想今次私影不愉快事件再發生，
幾經掙扎，買左最近價格終於回落既PMP-Epson P-2000。
憑著極高96萬像極高解像LCD及專業級睇相功能（包括Exif檔及Histrogam），
若非有新款型號，都幾難落價！
所以今次私影用左佢，幫助好大。

呢個P-2000功能上由於兼容其他格式，
所以聽歌、睇片都得，好惜自己個兩對headphone已經壞左！
於是尋日返工見到蘇工友，問下有乜好介紹？
佢推介左SHURE呢個牌子既earphone 其中一款﹣E2c。
今日出街走左去買，
呢隻earphone原裝sleeves好鬼硬同大舊，好難戴好梗耳仔。
跟住換左附送既細號軟身sleeves先至好D。
我諗要花Ｄ時間適應，不過呢隻E2c效果十分不俗，
隔音效果一流，真係戴左聽歌，身邊死人?樓都聽唔到！

Blueman

Sony Cyber-shot S600到貨

2006年2月1日
丙戌年正月初四
夜

〈個人〉
今日由於我老Blue身體未完全好番哂，
唯有安坐家中休養。
但今晚可惜仍要返通宵班....。

〈相機〉
原本尋日Blog裡面係想講Sony Cyber-shot S600已經香港有得賣。
但係病到?左，講左論壇呢家野？
呢部S600街價約為千六大元包256Mb ram，
唔算貴，不過自己硬係形住新年之後價格尚有下調空間。
因為呢幾日行入相機鋪人頭湧湧，
有點會有靚價俾到你？
自己重有時間等！

Blueman