iPhone下的相片

2007年11月13日
丁亥年十月初四
下午

〈攝影〉
雖然我老Blue因為工作關係已經無乜時間映相，
不過，近日香港踏入十一月呢個全年天色最靚嘅月份，
每日返工收工出街抬頭都見到好靚嘅藍天！

自從用咗iPhone之後，
終日沉醉呢部手機入面聽歌及上網功能，
忘記咗佢都有手機拍攝功能，
因為自己一直用其他相機拍攝嘅習慣，
所以都幾「輕視」手機入面嘅攝影功能。
但係前幾日返工嘅時候見到個天色好靚，
隨手攞部iPhone出嚟映相，
發覺呢部手機映嘅相都唔差喎，
像素達200萬像，雖然係定焦鏡頭，
起部iPhone睇返都幾理想！
而且拍攝時一樣係用LCD版面控制，
由於iPhone個LCD係透過熱感應觸控，
感覺快門「時滯」相當短，
可以做到snapshot拍攝。

家陣部iPhone除咗一邊聽歌、一邊上網外，
仲可以隨時隨地大玩snapshot㖭，幾過癮吓！！
不過，起iPhone拍完嘅相片一定要經iPhoto作同步輸入先至可以存入部腦到，
睇嚟iPhone除咗iTunes外，連帶其iCal或iPhoto等等軟件嘅整合性都好高吓，
（至於PC方面係咪咁我就唔知嘞！？）
似乎我老Blue都要為下台Mac機計劃吓囉！！

Blueman

“哎瘋“初體驗

2007年11月3日
丁亥年九月廿四
夜

〈手電〉
自從先個幾日我老Blue入咗水貨解版“哎瘋“，
有咗新玩具緊係新屎坑三日香，
呢幾日機不離手㩒過不亦樂乎。

用咗呢部“哎瘋“幾日，
先來總結一下個人體驗。
先講下自己對呢部“哎瘋“值得一讚嘅地方，
首先最欣賞當然係佢嘅操作介面同touch screen觸感，
流暢度比想像好；
連接iTunes同步處理超簡易方便及快㨗，
可能自己用開iPod關係，自然得心應手！
如果各下亦一樣擁有“哎瘋“的話，
強烈建議選用坊間電訊商提供嘅無限上網通訊組合，
因為用過呢部手機上網非常暢快，
簡直絕對驚喜，
仲記得第一次帶俾朋友睇個陣，
個位朋友對呢部手機上網及其桌面上嘅上網工具著迷似的，
俾佢連續玩咗個幾鐘咁嚌.....！
另外，除咗通電話外，
用嚟聽歌音質及力水亦比上一代iPod Photo好，
配上坊間土砲有線handfree接駁器，
除咗用番各下心愛嘅耳機外，
亦可作通話及聲量控制之用，一舉兩得！！

不過，作為第一代"生果牌“手機，
個人亦覺得仲有好多改善空間。
例如絕對唔明白點解最簡單嘅記事簿功能唔可以同部腦作𣾀出及𣾀入？
只可以經部手機作業完成一定要經要e-mail作傳送，
有點令人費解？
第二，ringtone咁普通嘅功能竟然鎖咗仲要用嚟賣錢，
不過唔緊要，網路上高手滿佈家陣已有破解之法！
另外，雖然個“芒“係好大，亦可以做到放大縮細功能，
但係若然輸入文字嘅虛擬鍵盤仍然覺得字粒太細啦，
可能自己仲未習慣，
經常㩒錯字粒（尤其作中文輸入字碼時），我諗要時間適應囉！

總結呢部“哎瘋“ 唔好當佢一部PDA，
但係佢係一部相當好玩嘅Mobile Media Player,
亦可以話係我老Blue今年最好心嘅玩具！

Blueman

同步樂趣

2007年10月31日
丁亥年九月廿一
下午

〈手電〉
近日見老旺大賣嘅iPhone破解V1.1.1版好吸引，
加上好多人玩iPhone都上「萬記網絡」$128上網無限任用組合，
我老Blue終於等唔切iPhone行貨到港，
好冒險咁買咗無保用嘅水貨iPhone！
隨即轉埋呢個「萬記」感受一下用iPhone上網嘅快感。

返到屋企第一件事就係開著部Mac，
稍為指定所需檔案，
即刻同部新iPhone同步啦！
嘩！！好正！一瞬間部Mac已經將電話資料、音樂、相片、上網bookmark等等過哂落去部手機到。
渴望已久嘅同步樂趣即刻顯現眼前......好感動！
我老Blue好反感電話同電腦資料唔同步有極大嘅唔方便，
因為家陣好多朋友唔淨止得一個電話號碼嘛，
仲有其他電郵或其他有關資料等等，
呢啲個人資訊通常會記錄哂部電腦到，
我老Blue覺得無理由每次轉電話都要重新記錄過？
所以一直堅持等「iPhone」呢類野面世！

仲有一樣想講嘅係呢部iPhone用EDGE上網速度出乎意料咁暢順！
家陣除咗用嚟打電話，行街聽歌之外，
仲可以隨時上網check吓股價好實用！！

Blueman

苟延殘喘的手電

2007年8月12日
丁亥年六月三十
夜

〈手電〉
自從得知Apple推出iPhone到美國開賣後，
儘管最近有關於呢部人氣手電嘅負面新聞，
包括電池問題等等。
無損我老Blue渴望香港行貨出現嘅心情！
雖然知道亞洲區包括香港最快出年先至有，
不幸嘅係自己部手電開始發生「自行關機」 非經常性發脾氣，
儘管自己有「恆心」可以捱到iPhone行貨到港，
但係唔知用緊嘅手機SE K700i（呢部可能會俾香港潮人視為古董嘅手電款式）有無咁嘅脾性捱落去。
於是打算先買多舊Spare電傍身，
如果部「古董」真係出問題，
唯有侷住買部cheap cheap SE機算數。
誰不知呢兩日出旺地菜街行勻哂，
間間賣正貨嘅鋪頭都話無呢隻原裝電賣囉喎！
咁弊！咪算.....！
由於自己揀手電嘅要求係祇少要同部Mac機可以做iSync，
上Apple官網睇吓有乜時下平嘅SE機啱駛？
睇完之後今日收工再落旺地各大鋪，
發覺iSync用到嘅機款已經好多款唔再賣，
因為SE出咗好新款手電，
亦話者係香港人換新手電快過換季？
最弊嘅係個listing好幾個月無update到，
唔通同Apple出iPhone有關係？
所以好多新手電唔會再為iSync更新listing咁毒？
最後，我老Blue行過腦場，
見到我部「古董」嘅代電賣！
希望呢舊電可以捱到iPhone到港啦。
（查實部手電有問題同舊電池有無關係仲未知............?）

Blueman

iPhone登場、Ai計劃續談、音樂MV

＊＊戴佩妮專輯﹣iPenny＊＊


2007年1月11日
丙戌年十一月廿三
夜

〈手電〉
尋日，相信好多Mac友好似我老Blue會特別高興！
因為Apple終於宣佈推出iPhone。
呢部SmartPhone可以話係我老Blue最期待既蘋果產品，
自兩年前開始起Blog寫有關我老Blue已經對手提電話既期待：
08/05/2005“老鼠愛老虎“、
28/07/2005“手電功能“、
11/01/2006“Mac機與Intel芯“、
02/01/2006“PDA與記事簿“、
09/08/2006“手機與iPod“。
初步睇過呢部iPhone既功能自己就好滿意，
價格亦係我老Blue接受既範圍，
最重要因為佢既作業系統一樣係用OS-X嘛！
完全解決我老Blue由Mac機、手機同步既問題及資料往來既整合性。
呢個亦係自己點解咁耐唔輕易轉手機既原因。
不過，如果想買呢部iPhone，亞洲區祇少要等到2008年喎......！
唯有呢一年繼續我呢部用左兩年幾既SE K700i啦。

〈相機〉
早幾日提過自己可能會今年會upgrade套DSLR，
初步盤算呢個“Ai計劃“，
機身反而係次要，
因為上網亦見到唔少有關D200既二手市場，
同之前預計一樣，
一萬以下出機唔難，
始終現今DSLR一來更新率頻密，
二來新機售價下跌幅度都幾快下。
反而優質鏡頭因供求問題，
跌幅無相機咁大，價格維持高企。
加上由於部份原因要遷就兩個系統（Olympus+Nikon），
所以鏡頭選擇暫定全部有Ai光圈環既手動定焦鏡為主，
目標一機四鏡，
到今日為止，自己認為最理想及合符要求既組合如下：
Body Nikon D200（或到我蓄夠錢既時候出部D200S都唔出奇？）
Lenses-
1）Carl Zeiss ZF 25mm F2.8（主打紀實）（4/3=50mm/ 1.5X=37mm)、
2）Carl Zeiss ZF 85mm F1.4（主打人像）（4/3=170mm/1.5X=127mm）、
3）Voigtlander APO-Lanthar Marco 125mm F2.5L （主打微距及遠攝）（4/3=250mm/1.5X=187mm）
4）Nikon AF 14mm F2.8D（主打廣角及風景）（4/3=28mm/1.5X=21mm）。
不過，我老Blue訂左呢個組合之後，
知道係財政上面係一個大project！
保守估計分期執行都要用兩年時間先至可以達標囉，哈哈！

〈音樂〉
呢一年我老Blue都買左好多國內及台灣女歌手既CD，
除左有早前推介過國內超人氣女新星﹣張靚穎外，
一位久違左好耐既台灣女歌手蕭亞軒終於有新作﹣1087，
聽完自己好喜歡，感覺風格同以前有些少轉變.....。
另外，一張專輯係去年六月出品，台灣創作女歌手﹣戴佩妮專輯﹣iPenny。
聽完感覺好清新好特別，尤其一隻歌﹣單身潛逃，
係我老Blue近一年覺得其中一隻好正既作品。
跟住上網睇下有關作品既資料，
發覺呢隻“單身潛逃“除左係呢位小姐曲詞一手包辦外，
更亦係Mac友一名，報導講呢隻歌既MV初頭係佢用部MAC機砌左段概念短片俾製作公司睇，
結果，製作公司覺得好正，
建議佢試下做埋MV導演，就係咁戴小姐第一次為自己拍左呢個MV。
自編、自導、自演，閉門五日五夜用部MAC自己剪埋片而成，
效果都幾好！
唔知有無朋友聽過或睇過呢隻MV呢？
單身潛逃MV
MV製作花絮

Blueman