小病是福

2007年2月27日
丁亥年正月初十
夜

〈個人〉
突如其來的感冒，
令我老Blue告了一日病假。
好耐無試過一整日靜靜咁起屋企休息過囉，
睇番記錄上次患感冒已經係去年八月份.......。

係時候俾自己好好咁休息下......。

Blueman

MG-RX-93 Hi-Nu2 Gundam有貨

2007年2月26日
丁亥年正月初八
夜

〈模型〉
今日我老Blue落樓下玩具鋪，
終於見到早排提過既MG模型﹣RX-93 Hi-Nu2 Gundam。
呢盒定價7,500日元既高價MG，
自己之前內心掙扎左好內，好唔好出手？
但係見到個網上韓個網友﹣Dalong砌左隻素組之後，
素組效果已經好正（更出現評分達99分），更莫講再上色之後會點啦？
於是明知第一水行貨會比較高水；
明知屋企無位都忍唔住要左盒，
埋單俾左四張紅衫魚出黎，
好耐未試過買咁貴既MG模型囉，有D肉赤.......。
拎返屋企之後，拿拿聲巡例數件，嘩！足足有成廿二塊組件咁多，
至於個盒既Size比我現有既MG沙煞比仲要大D！
如果計現有未砌既MG高達系之中，呢隻熱愛度係最高，
順序係：RX-93 Hi-Nu-2>ZGMF-X-20A Strike Freedom Gundam>MSA-0011 Ex-S Gundam>RX-78-2 Gundam(O.Y.W. Ver.)。
不過，呢盒係我老Blue第38盒MG，
又係個句唔知幾時會完成.......（謎！？）

Blueman

1.3Kg的怪物﹣EOS 1D MK-III

＊＊Canon第三代頂級機﹣EOS 1D Mark III＊＊


＊＊倉庫情境其中最關鍵元素﹣Lego積木＊＊


2007年2月23日
丁亥年正月初六
夜

〈倉庫〉
呢日我老Blue又發揮無事忙既本色！
自己動手第一次做情境模型，
前晚終於完成左第一期工程﹣M.S.展示台既組件，
雖然仲有好多細節未修飾同埋未上色，
但係對於一手一腳由零開始，
到見到有實物，個份滿足感真係好大，
尤其相對番自己份工廠式工作生活，呢份感覺真係好過癮！！

不過，呢份組件起製作既過程亦都吸取左唔少經驗，
所以完成左之後，開始發覺呢個M.S.Warehouse原先既草圖有修正既必要！
就係咁我老Blue趁呢兩晚返通宵班無乜野做，
重新計劃倉庫草圖Ver 2.0，
除左上網抄下一D真實軍事倉庫圖片外，
更幻想如果一個倉庫真係有隻機動戰士係入面，
應該會有D乜野設施起入面呢？
當然有熟識軍事知識及熱愛高達既廖工友曾經提過，
現實軍備發展咁大型既武器既機會好微，
因為佢話成本高、效益低，咁大個目標好易俾攪掂喎，大和號就係一例子！！
但係佢又補充，如果站起科幻模型角度來講，
倉庫設計應該傾向製做潛艇既船庫最為接近喎。
經過思索下，今朝凌晨一邊開工、一邊著手畫呢個草圖Ver 2.0。

〈相機〉
凌晨七點左右，接近收工其間，
見到成個豬年第一次見面既工友﹣恆仔返工，
一見面並唔係講賀年既說話，
佢第一件事同我老Blue講：Canon公佈左出EOS 1D mk-III喎！！
吓咁突然，又真係DSLR界來講幾大件事。
二話不說，返到屋企即時上網睇下呢部Canon第三代DSLR頂級機乜料先？
主要特點如下：
一千萬像素APS-C CMOS sensor（基本要求啦！）；
超誇張每秒十張連拍可連續玩成110張咁多（記者哥哥既福音。）；
行雙影像處理器，官方話可運算14bit影像（繼P記K10D、富記蛇五後又多一部行14bit，趨勢！）；
新AF對焦系統，多左19個十字感應器（但係睇過AF區無闊到？）；
加入我老Blue認為最實用既除塵功能（聽講去香港CS俾佢地除塵，每次好似要成舊幾水抺一抺喎！！）；
ISO終於有DSLR去到6400啦（以前我老Blue菲林期就玩過3200已經好實用。）；
LCD屏擴展到3寸，但首次加入Live View功能（O記可以揸手既本錢越來越少......）；
仲有俾人成日話個觀景好暗既毛病，官方話有改善（呢樣真係聽住先，要眼見為實！）。
睇黎今次Canon起3月8日PMA2007之前公佈呢部機皇，
已經先聲奪人，兼且覺得想做好一部好機。

最後，講到幾強都無用，咁呢部重達1.3Kg既怪物賣幾多錢？
報稱賣$3,999美金，同上一代MK-II一樣！
我等平民雖然無「筆直」諗呢個級數既機種，
但係都好期望想睇下呢部新機皇既質素如何？
每逢相界大事﹣Photokina、PMA前後，
又係一眾機迷議論訜訜既時候，
因為好多朋友都會睇呢兩個展覽而決定會唔會轉機？
睇黎呢個禮拜好消息會不斷出現，
例如：O記講左好耐既E-1後繼機實樣？
傳聞N記會出FF既DSLR啦？
S記會唔會有高階機啦？
P記係咪得部K10D就算呢？
大家拭目以待！

〈影視〉
返到屋企除左急住上網睇呢個Mk-III之外，
亦好心急下載依家起美國好Hit既連續劇﹣Heroes，
有朋友睇過話好正，叫我睇！
除左呢套Heroes外，
其實自己亦追緊幾套劇，
包括第六季既「24」、動畫有超獸機身後繼篇「獸裝機攻﹣斷空我Nova」、橫山光輝名作新版「Giant Robo鐵甲人」好幾套。
等我睇完上述幾套先再講好唔好睇？

〈模型〉
上完網之後，拿拿訓教啦！
訓醒之後，又好急走左出去買模型材料，
點解我老Blue成日都話要走出去買料呢？
其實呢個M.S. Warehouse最關鍵元件並唔係模型部件！
而係Lego積木。
全靠公司廖工友提醒，一般情境用膠板或木材砌一個情境唔難（靚唔靚又係另一回事？），
難在屋企地方勁有限既時候，
攪到更大都無位收埋！
唯一可以做得又大又可以事後打散既組合就係用Lego積木來做地台、框架及骨架。
問題黎啦？自己一直無玩開Lego，
唔知道原來Lego莫講話套裝組合，
原來連散件都同模型一樣，價錢都幾海鮮下！
就係咁起完個草圖之後，
要成日落去賣Lego既鋪頭昅下有無合用既散件買？
今日咁買到D一直以為無出既Lego散件，
亦都買唔到以為實有貨既Lego地台，唔上唔落；
家陣為左呢個情境，材料買下買下都幾舊水，
而家騎虎難下，唯有幹到底，
希望完成之日唔好超出訂下既預算就好囉！！

Blueman

倉庫工程始動

2007年2月20日
丁亥年正月初三
夜

〈倉庫〉
是日年初三，我老Blue終於放假囉！
今日留起屋企食飯外，
亦都展開左自己計劃左一排既「M.S. Warehouse」既工程。
呢個倉庫大致上分開三部份構成，
第一部份為MS既展示台；
第二部份為之前買落既笨大ACTION BASE加以修飾作配合；
第三部份係最大工程既倉庫地板及四面牆壁。

今日我老Blue開始做第一部份﹣展示台既工作，
用左個幾鐘順利跟個草圖砌左個展示台既骨架，
呢部份唔算困難，
跟住落來到左𠝹膠片既工作，
再起已𠝹好左既膠片上面刻幼線........！
呢下真係難到我老Blue，
老眼昏花咁用刻線尺及刻線刀，
一刀一刀咁刻上去真係要命！！
又經左個幾鐘之下，終於起面積約(16X16）cm既膠片上刻哂所需既幼線。
已經發覺自己頸梗膊痛，
要停一停。
呢鋪自己都唔知幾時可以完成第一部份既工程囉？

Blueman

恭喜發財

2007年2月18日
丁亥年正月初一
下午

〈豬年〉
踏入丁亥豬年，
我老Blue起度祝各位blog友新一年心想事成、萬事勝意！！！
可惜，自己今日都要開工......。

Blueman

隔世追兇大結局

2007年2月17日
丙戌年十二月三十
凌晨

〈影視〉
我老Blue尋晚，收工返到屋企，
開電視睇到半夜無記二輪劇﹣隔世追兇，
第二十二集大結局。
自己一向好少睇無記D劇集，
亦都之前首輪既時候食飯望過下呢套劇，
個陣時覺得呢套戲左抄右抄，
大嘆不睇也罷！！
所以到最後連大結局都無理會過.....。

但係今次好偶然咁睇到呢集既大結局，
好有心機睇喎！！
因為，成套戲原來最後一集飾演父子既郭晉安、許詔雄先至有對手戲，
呢集對手戲好正，
睇到許詔雄演技真係無得頂，
尤其Ending個幕父子種樹，許詔雄一邊講對白，
雙眼由平淡到漸泛淚光而不落淚.....，好勁！！

另外呢集中場又彈左個秦煌做大師既角式講佛謁，
以往我一定睇到之後，
一定一邊噴飯、一邊笑！
（呢套乜唔係警匪偵探片咩？）
但係唔知點解？
佢呢集講D佛謁覺得有D野咁？
其中一句係：萬法皆空，因果不空......。
有D對應自己呢排既心境咁！？

（咚咚咚.....咚....咚......咚............！）

Blueman

蓄勢以待

＊＊MS倉庫所需的材料＊＊


＊＊最新MG-Hi-V Gundam封面及完成品＊＊




2007年2月15日
丙戌年十二月廿八
夜

〈倉庫〉
原本呢兩日打算砌個「M.S. Warehouse」地基，
早前買落既材料以為夠哂，
想開工既時候又發覺仲少咁D野未買，
結果，今日又騰左出去買埋其他材料，
始終我老Blue第一次做情境模型，
經驗極都貧乏，有待累積......。
唯有邊做邊學啦！

〈模型〉
前兩日韓國有關笨大既網站，
出左最新MG-RX93-V2 Hi-V Gundam既官方發佈圖片，
封面及做工都好吸引，
不過，唔係好明因乜解究要買到五千幾日元？
家陣仲諗緊好唔好出手？

〈相機〉
早排自己計劃既更新相機既念頭，
可能因為工作上呢一年會有不明朗既因素關係，
「Nikon+Carl Zeiss」呢個組合好大機會擱置囉，
下半年如果工作環境保持現狀，
最大可能都係今年繼續玩O記......。
明天實在有太多可能！

Blueman

裝飾佈置

2007年2月13日
丙戌年十二月廿六
夜

〈時節〉
今日晏晝我老Blue繼續為左個「M.S.倉庫」出去買D模型素材。
因為一D特別原因須要去海運一躺，
好耐無經過呢處地方，
見到好多農曆新年既佈置，
原來過多幾日就係大年初一。
自己自出來打工就已經要返D輪班工作，
好多時大時大節都要開工，
十幾廿年彷彿節日同我老Blue無乜關係咁？
有唔同既係今年公司罕有咁貼左好多揮春，
話俾D工友知農曆新年就到啦！！

〈倉庫〉
今日我老Blue走左好多地方買模型素材，
發覺除左地台及格骨材料比較易買到之外，
好多細節情景模型要合比例（1:100）就唔係咁易買到，
起旺角見到有間賣模型火車，
D情景組合好合用，但係呢D模型郁下都過百銀一set，
買盒MG都無咁貴！
好失望咁問完就走左，
唯有遲D攪好哂個地基先再打算需唔需要自己親手做啦！
基本地基材料已經買哂，
問題係自己可唔可以緊著草圖一步一步做到？
緊張.......。

Blueman

風塵三俠

2007年2月11日
丙戌年十二月廿四
夜

〈影視〉
尋晚無記翻播多年前一套電影﹣風塵三俠。
呢套戲大大話話都有成十三年囉，
計埋呢次我老Blue都睇左兩三次，
但係每次睇親都好投入？
仲係每次睇親都有唔同感想！
一套好既電影除左製作外，
劇本亦好緊要，
依家既電影最缺乏既就係有好大既製作但無好既內容......。

〈模型〉
不經不覺我老Blue計劃既「M.S.倉庫」草稿，
今日終於完成哂要準備用既草圖，
如果聽日有時間的話，
可以出去先買材料起左個倉庫骨格，
睇睇有無尺寸上修改既需要，
期待！！

Blueman

GUNDAM EVOLVE OVA

＊＊GUNDAM EVOLVE第二部Omega封面＊＊


＊＊GUNDAM EVOLVE第三部Alpha封面＊＊


＊＊官方網站發佈既內容片段＊＊



2007年2月9日
丙戌年十二月廿二
夜

〈動畫〉
呢幾日上網巡例睇下有乜新動畫既消息，
俾我老Blue睇到一套叫「GUNDAM EVOLVE..」既OVA。
共分三輯，每輯OVA共分5個單元，
上網翻查有關資料，原來呢套GUNDAM EVOLVE第一輯係“笨大“起2001~2003既實驗CG動畫，
而當初係以特定PG模型所付贈形式推出，
據資料報導及後因打出知名度而以OVA形式販賣！
去年已經追加到第15話RX-79。
動畫大多以笨大所出既Gunpla模型原設計上發展角式機體，
場面以MS戰鬥為主，少說話多動作；
每個單元風格各異，自己一口氣睇哂咁多套之後，
覺得雖然每個單元得六、七分鐘，極之吊癮，
當中自己覺得最正係EVOLVE../8 PG版既Strike Gundam大玩Matrix槍戰動作，
及EVOLVE../11 MG版既RB-79鐵球玩探險Feel。
從中亦到睇到“笨大“同Sunrise合作，
主導機械人動畫既潮流，
不過，笨大仲繼續玩高達既話，
前途並唔樂觀囉！！

Blueman

走訪鴨寮街

2007年2月8日
丙戌年十二月廿一
傍晚

〈倉庫〉
我老Blue計劃中既「M.S. Warehouse」，
草圖大綱已經起左七七八八，
尚欠細節仲未諗到點做？
例如，細節部件用乜野材料？D材料去邊到買到？
就係咁，尋日自己走左去深水埗鴨寮街睇下D水電材料有無合用？

自己一向對水電、五金材料無乜認識，
入到呢D鋪頭，只覺眼花瞭亂、目不睱及，
因為實在好多合適既材料價格實惠。
經過調查後，對自己個“倉庫“構思好大幫助！！

不過，唔知點解呢日出街好熱，睇天氣報告有成廿六、七度咁誇張！
彷彿天氣由冬天跳過春天，直接來到夏天一樣，
地球先生真的病了！

Blueman

CD包裝

＊＊堆積如山的CD＊＊


2007年2月6日
丙戌年十二月十九
夜

〈空間〉
我老Blue除左鐘意買模型外，亦都好鐘意買下CD聽。
雖然呢兩樣價錢都不外乎一百幾十，
呢兩樣野嗜好，如果比起其他朋友經常換相機、Hi-Fi來講，
真係蚊比同牛比。
但係香港寸金尺土，小弟住屋環境同大多數朋友，
擺放呢D雜物空間有限，
定時定候又係清理一下不必要既垃圾，
先至可以騰出空間，迎接更多雜物......。

模型係最頭痛既項目，
由於自己玩親都係MG版，件件都有咁上下大盒，
一日唔砌一日都好阻定，
唯有積極D儘快砌多D啦！
始終模型唔同上色完成品，
模型砌左先至有佢展示作用，如果唔砌就係雜物嘛！！

至於CD，唔好睇少一隻CD細細隻，
但係我老Blue自從買左好多國內正版CD之後（平均每隻三十大元），
去年好瘋狂咁買左好多，
結果日積月累之下，
原本只可以擺二、三十隻CD既地方，
結果擺唔哂，放到就圍都係。
今日終於唔可以當睇唔到，
抄翻個CD File套，
拆哂D包裝將D舊CD pack哂入去，
叫做勉強解決問題......。
不過起拆packing既時候，
發覺好多CD包裝都唔環保，
一隻CD經常攪到好大隻，用好多紙，個盒好多用DVD形式，
其實無咁必要姐係咪！？

Blueman

渣古MG Ver. 2.0

＊＊渣古 MG Ver. 2.0 初模＊＊


2007年2月5日
丙戌年十二月十八
下午

〈倉庫〉
今日我老Blue有時間，
繼續埋頭埋腦為左個“MS倉庫“咁出左去旺地睇有關應用材料，
做下D資料及價格調查，
自己起左草稿所要既材料，旺角好多模型舖及大型既美工舖頭都好齊貨，
兼且價格都起預算之內。
現階段係自己幾時可以起哂D草圖，
準備去買應用既材料開工咁解！

〈模型〉
可惡，好可惡！！
今日我老Blue上網見到來緊兩個月"笨大"會出既新模型。
其中一隻令好多MG愛好者最震撼係四月會出ZAKU MS-06J渣古地上型 Ver 2.0！！
睇初模已經好正，可以做到踎低見頭暈既“大“動作（見圖），
經過十二年（渣古 MG第一代1995十月），
2007終於出Ver. 2.0，
對我呢亭MG愛好者都唔知好事定壞事囉！？
但係好多網友都好肯定一樣野，
以笨大一模多用既“商品運作“，
呢隻渣古2.0一定會出乜乜物物版本去賺錢.......。
但亦有心水清既網友睇到之前玩具展宣傳既MG No.100仲未現身喎？
呢隻渣古2.0之不過係MG No.98，
如果資料屬實，咁No.99會唔係紅彗星﹣渣古馬沙專用機？
No. 100咁好大機會“再“出RX-78高達囉！！
畢竟最賺錢始終係「U.C.一年戰爭」系列嘛。
希望唔好俾我老Blue估中，
如果唔係呢個系列由Ver. 2.0重新玩起都幾大鑊下........！

〈相機〉
好耐無起呢個Blog講DSLR，
之前我老Blue到提過如果up-grade套DSLR，
大方向會玩Nikon系，
講左好耐既“蛇五“富士S5-Pro終於到貨，
不過我起街未見到真身，
但係網上已有朋友率先搶購，
暫時見有部份用家既“試機相“，
自己覺得呢部蛇五同部D-200比較，
唔見得效果好出，
希望係新機初試，等遲D有較多報告先肯定呢部蛇五是否物超所值？

不論相機或股市現階段都係採取觀望態度，
唔駛咁心急入市住，忍忍手先！！

Blueman

殺道行者

＊＊MS倉庫參考圖＊＊


2007年2月2日
丙戌年十二月十五
夜

〈漫畫〉
鄭健和繼“火龍“之外，終於睇到佢同阿架（鄧志輝）既新作﹣“殺道行者“！
睇完之後，覺得好勁。
呢本極富現代感既港式格鬥漫畫，
畫面充滿勁道、爆炸力，劇情進展流暢、有條理。
完全將兩位漫畫人（鄭健和﹣主筆、鄧志輝﹣繪畫）既優點發揮出來。
又係一本好漫畫！

〈模型〉
今日我老Blue放假，
無砌模型，不過做左同模型有關既工作。
就係開始企劃“MS倉庫“，
用左個多小時上網資料搜集有關科幻設定及起草圖，
初步起稿既“MS倉庫“可以容納MS一至兩個既倉庫尺寸約（20"X20"X20"），
由於體積都幾大座，
所以會以夾板式組合設計，以便開收。
至於其他細節尚在設計中，
希望下個星期可以完成所有草圖設計啦！

Blueman

重戰機L.Gaim MK-II初現

＊＊R3版L.Gaim MK-II＊＊




2007年2月1日
丙戌年十二月十四
凌晨

〈模型〉
剛剛上網見到笨大官方出左重戰機L.Gaim MK-II R3版既完成圖。
完成品比我老Blue想像還要好，
可能原著本身造形已經好吸引，
個人覺得祇少比前作蒼流星R3版好好多。
加上用上MG版既級數設計，
內骨架、裝甲鑲入式兼可變形，
但睇樣版已經無話可說！
如無意外初出會入貨囉。

〈倉庫〉
我老Blue上一個Blog都提過有概念想自己砌個MS倉庫，
用來做MG模型拍攝場景，
但係自己一直無乜呢方面經驗，
兼且野心大、心頭高，唯恐眼高手底，
最終無法完成。
返工個陣，見到廖工友呢位資深模型玩家，
自己將呢個諗頭話左俾佢聽，
問佢應該點攪好？
尤其係個地台及接口位最難入手？
因為返工前，
自己都出左去旺角D模型鋪走左轉，
睇有關模型素材，
結果都係解決唔到地台及接口位處理既問題！

高手即係高手，廖工友淨係講左一個英文字完全解哂我要面對既問題！
至於係乜野英文字，
恕我老Blue要起度賣個關子？
家陣腦入面已經有個倉庫既模樣，
有待成為實物，
諗起如果成事都幾過癮，哈哈！！

Blueman