第七日

2009年2月10日
己丑年正月十六
夜

〈攝影〉
噚日係農曆正月十五，即所謂“元宵佳節”。
我老Blue同埋班工友去咗映市政局攪嘅元宵花燈，
為期三日。
查實呢個花燈晚會有三個場地，
我老Blue因為返工緣故，
祇能去到荃灣沙咀道球場同埋噚晚位於土瓜灣嘅高山劇場，
另外位於大埔海濱公園就去唔到囉！！

由於噚晚係「正日」嘅關係，
人潮比預期仲要多，
我老Blue同其他朋友映得一、兩位之後，
好無癮咁就完成呢個攝影項目，
好彩之前去呢個荃灣因為係球場關係兼且係第一日，
映得比較暢快。
呢兩次映花燈自己最大目的係繼續玩HDR攝影，
原來夜間玩HDR係好高難度，
夜間光度配合花燈顯得光差好大，
好惡攪.....。

〈影視〉
最近自己除咗忙於攝影、油下模型外，
亦會抽時間「煲劇」，
當然係我老Blue至愛「Gundam OO」啦！
呢套以現實AD年代為背景嘅高達，
越睇越有味道，
編劇「黑田洋介」真係有啲料到，
劇力越推越緊，掂！！
另外，除咗動畫外終於等到Fox皇牌美劇「24」第七季，
呢季唔再有CTU，發生地點亦唔再係L.A.而係起華盛頓，
感覺比較新鮮，
主角Jack Bauer一樣咁燥狂咁做嘢，
繼續咁癲，好正！！
雖然呢套戲劇情其實每季都係發生一日廿四小時，
一日𥚃面點可以發生咁多事呀？
但係自己唔知點解一日廿四小時都唔係好夠用咁？

Blueman

「朋友」降臨！！

2008年9月27日
戊子年八月廿八
夜

〈動畫〉
Macross Froniter終於起前日隨著第25話正式完結。
我老Blue睇完之後覺得呢套動畫投入嘅資源都好大吓！
有CG嘅空戰、華麗嘅角式造型、精密嘅機械設定及超多嘅原創歌曲，
理應好滿足到我呢亭動畫迷。
但係唔知點解睇完成套動畫其實唔係太欣賞，
可能係故事去到中後期，
發展到兩個女主角大玩「紅白歌唱」比拼，
自己有啲投入唔到....。
不過點到好啦，一齣完咗又到下一齣，
跟住落嚟我老Blue要追嘅動畫就係「Gundam OO」第二季啦！！
超期待......！！

〈電影〉
前日我老Blue同朋友去咗睇「20世紀少年」電影版第一集-「降臨」。
由於自己的確好喜歡呢本原著漫畫，
所以上畫第一日就去睇！
以往好多由漫畫改編成電影嘅例子，
太多數同原著某程度有若干出入，
所以今次入場自己唔會抱好大期望，
只係因為我係呢本漫畫「粉絲」關係罷了！！
日本電影公司「東寶」諭為55週年紀念作，
呢套話係日本電影史上最大投資、演員超過三百位咁誇張嘅宣傳，
更分三集上映！
令我未入場更加驚呢套嘢會拍得唔好....。

結果，雖然套戲有成兩個幾鐘咁長，
但係出乎意料套戲不論故事、人物造型、對白、場口百分百跟足原著，
係我老Blue睇咁多漫畫改編電影當中，
唯一一套係跟原著拍攝嘅電影，
其中最欣賞係人物造型，
除咗演員同原著漫畫神似外，
最難得係咁多個⻆式連童年版及中年版選角都同原著極之接近，
呢樣嘢係唔係電影公司或導演可以隨意用錢或特技做出嚟！
而係用心去挑選演員個份執著。
不過，由於電影時間所限，
會令到故事人物個性表達唔夠，
只能夠盡力跟原著交待劇情，
感覺有點單薄，
呢樣係改編漫畫唯一的失色嘅地方。
如果問我老Blue對呢套滿唔滿意？
對睇過原著嘅我嚟講就好滿意，
但係如果未睇過原著嘅朋友入場就恐怕對複雜嘅劇情難以消化。
我就好期待呢套戲出年上映嘅第二、三集，
仲有有興趣入場嘅朋友，
記得要睇到尾！
因為除咗有「健次之歌」外，
更有下一集精彩預告！！

Blueman

我看Indiana Jones 4（水晶骷髏國）

2008年5月23日
戊子年四月十九
下午

〈電影〉
噚晚，我老Blue去咗睇Indian Jones and the Kingdom of the Crystal Skull（港譯：奪寶奇兵之水晶骷髏國），
繼上次睇「Iron Man」今次又一班朋友去睇戲後，
不過今次一行十一人比上次仲誇張，
有啲似小學去旅行咁熱鬧。
呢次入戲院有朋友建議去位於西九龍嘅「圓方戲院」，
話想試下呢間新戲院音效如何喎？

講番套戲查實之前三集自己都有入戲院捧場，
不過事隔十幾年之後出第四集，
都好想睇下有乜新嘢玩？
故事年份為1954年，
開場劇情穿插咗好多嗰個年份美國當時政治環境，
都玩得幾有趣，
跟住交待哂人物關係之後開始入主題﹣探險尋寶！
唔知係咪情意結，
硬係史匹堡拍呢類「尋寶戲」先至係專家，
雖然係第四集玩來玩去都係古代機關、片車、蛇蟲鼠蟻等等元素，
但係佢拍出嚟就特別過癮，
兼且配合佐治魯卡斯，
玩特技都出神入化。
成套戲百二分鐘亳無冷場，
極高娛樂性！！
配合「圓方戲院」每張座椅下面都玩埋音效，
啲重低音配合劇情推動，
例如劇中大型機關開動個下感覺好強烈，正！！
所以有興趣睇呢套戲嘅朋友，
建議揀間音效好嘅戲院入場。

Blueman

我看IRON MAN

2008年5月3日
戊子年三月廿八
凌晨

〈電影〉
噚晚我老Blue同一眾工友相約去咗睇期待咗好耐嘅電影﹣IRON MAN（鐵甲奇俠）。
耐唔耐我老Blue遇到一啲覺好高娛樂性嘅電影都會約埋幾個朋友一齊入戲院睇，
始終起戲院睇氣氛好好多！

就好似對上幾次睇Transformer（變形金剛）一樣，
如果一個人睇同一班人一齊睇，
感受會無咁過癮！
呢齣IRON MAN全長126分鐘亳無冷場，
娛樂性極之豐富，
兼且有啲笑位都幾抵死，
例如測試腳底噴射器及叫佢條女幫佢「徒手」換心呢兩場。
至於動作及特技好超班，
簡直目不暇及，好精彩！
尤其機設一流，
單係IRON MAN套戰甲已經分Mark-I、II、III咁多，
最後Mark-III出場真型都爆，
至於Ending奸角個件戰甲Project 16機設俾我感覺仲好日本「蘋果核戰記」feel；
據聞呢套IRON MAN係Marvel其下嘅Marvel Studio電影創業作，
首部自資開拍，版權無批俾其他電影公司，
鬼咩！眼見之前Spider-man及X-Men大收旺場，
今鋪一於肥水不留別人田。
完場嘅時候見字幕叫觀眾唔好咁快離場，
原來已經有第二集嘅小小預告，
仲有新人物登場！！
上網睇番嚟緊個套The Incredible Hulk（變形俠醫2），
IRON MAN（同一個男演員及角式）會有份客串㖭！
不過成套戲雖然好好睇，
但係好多演員都好陌生下，
唯獨女主角居然揾金像影后﹣Gwyneth Paltrow（桂莉芙柏德露 ），
有點意外.....！
因為個角式都幾花瓶下？
點都好啦！
我老Blue就好期待下一集嘞。

Blueman

二十年後的暴力-Rambo

2008年3月25日
戊子年二月十八
夜

〈電影〉
由去年有消息話史泰龍會再拍“Rambo”，
起初以為講笑，龍哥話哂成六十歲人，
咁大年紀唔係仲要揸刀揸槍揾食呀？

今日終於睇到史泰龍親自操刀嘅第一滴血第四集，
正名唔再叫乜鬼First Blood，
跟Rocky一樣叫番主角名-「JOHN RAMBO」，
距離上一集足足有成廿年咁耐！
早幾日有工友阿達睇咗話套戲好血腥好暴力，
一面冷峻嘅面容略帶冷血嘅語氣推介俾我老Blue睇呢套戲，
跟住仲自言自語咁話好耐無落廣華街睇氣槍......。

套戲個半鐘頭，
睇完之後，感覺非常暴力，血肉橫飛，
效果有啲似港產江湖漫畫，
但係唔知點解自己一路睇一路好興奮喎，
都好懷疑自己係咪變態？
成套戲無乜劇情可言，
大概係講Rambo救人同埋殺人，
唔知係咪好耐無睇過呢類「Rambo」式動作片，
史泰龍式少說話多殺人，
以動作片嚟講好過癮，
或者之前太多動作片為咗豐富劇情，
加入太多政治、懸疑、科技元素，
睇番Rambo好有一種簡單直接嘅港產式動作劇情，
一氣呵成講求「打」嘅簡單元素。
不過，好老實講如果唔係史泰龍掛住Rambo呢個名，
第二個拍完全係爛片一套，
但係史泰龍拍番，見佢成六十歲人起個山跑來跑去，
好多場面親身落場比起好多動作片用鏡頭借位嚟得實在。
可能由First Blood第一集1982年到依家第四集Rambo 2008，
有成26年咁耐歷史，
好多好似我老Blue呢亭中年男人，
求學時期都係睇史泰龍長大，
Rocky及Rambo好多經典場面入哂腦，
最記得自己中四個陣，
正值上映咗First Blood 2，
有個同學成日扮Rambo，
有意無意起同學面前苦埋口面戙高隻腳綁鞋帶；
有啲同學就鐘意條「幼」頸扮Rambo纜個玉繞都實一實等等模枋動作。
有啲同學由膠尺轉用鐵尺，成日塊面懶陰沉咁拿住把12寸鐵尺當「虎牙刀」扮Rambo，
起學校張木台到起勢咁𠝹等等不尋常嘅連鎖反應.....。
因為呢啲情意結，
家陣睇番第四集都好應該由史泰龍有生之年將佢寫個完結篇！

套戲最正居然係ending拍番第一集opening嘅情境，
完全同第一集有首尾呼應，
效果好正。
睇到呢到知道覺得Rambo應該係最後一集,
亦都係Rambo粉絲集體回憶嘅終結.....。

Blueman

股市．煲劇

2007年10月25日
丁亥年九月十五
凌晨

〈股市〉
呢一年我老Blue定下嘅投資目標，
憑著8月17日嘅升市，
到先個幾日終於達標。
眼見當下股市火熱，週遭好多朋友亦對股市有入市衝動.....。
連講開電腦嘅雜誌都有提睇股工具云云，
有見及此，自己亦開始進行減持行動，
鎖定利潤只留下三成資金運作罷了，
風險及壓力相對之下大大減低！

〈影視〉
隨著手上投資減持，
唔駛再花咁多時間日日留意住個市之後，
不過近排我老Blue亦唔得閒得去邊喎！
原因係除咗新一輯高達動畫「Double OO」上映外，
先個輪人氣美劇「Heroes」亦開始咗Season 2，
作為Heroes粉絲梗係唔會錯過啦！
加上無記半夜推番一套國內劇集﹣「走向共和」，
睇下睇下又覺得幾好睇咁喎，弊！！
結果呢排除咗返工之外，
煲劇成為咗我老Blue熱門節目囉！！

Blueman

0118+E1承繼者

2007年8月11日
丁亥年六月廿九
夜

〈電影〉
早前上Apple.com見到一套新預告片，
奇怪嘅係呢套片只有公映日期﹣01-18-2008，
從預告片內容估計應該係科幻動作片，
好奇上網睇吓原來已經好多網友講緊呢套咁奇嘅電影。
只係知道導演係J.J. Abrams，
拍過電視劇「Lost」，
估唔到連宣傳都攪到「迷」一樣......？

〈相機〉
一眾O記粉絲（包括我老Blue在內）引頸待嘅E-1後繼機，
至今仍未有公佈推出日期、價格及規格資料，
不過起官方宣傳網站Pure Digital DNA入面，
內容更生到第5~8集-Flatship Qaility，
講解咗最新E-1後繼機嘅設計概念，
亦都見到O記其下產品設計戰略分組Seinor Supervisor-Yasuo Funakoshi攞起張去年年尾嘅平面設計圖，
外型同公開嘅Mock-up差唔多，
感覺好實在又傳統。
但係部機講到點勁都無用，
因為最核心嘅影像系統現階段官網仲未公佈，
呢個部份能否吸引O記粉絲去留將會成為最重要關鍵。
新機嘅Sensor可唔以可超越上一代E-1Kodak芯呢？
希望會好似傳聞講下個月會揭撓！

Blueman

我看變形金剛

2007年7月31日
丁亥年六月十八
凌晨

〈電影〉
噚日我老Blue放假，
亦都係我呢一年好期待嘅一日。
因為呢日約咗五個工友一齊去睇大家期待而久嘅電影﹣TRANSFORMERS（變形金剛）！
由於香港上映日子比其他地區遲，
所以有Blog友及其他朋友起海外「優先」睇咗，
口碑一致讚好！
雖然有打算會係好睇，但係經過144分鐘之後，
感覺係「超級」好睇！！
無他嘅，小弟由細到大都係睇卡通片大，
尤其係由「鐵甲萬能俠」、「三一萬能俠」開始浸大，
當知道「變形金剛」話會開拍真人版，
開始半信半疑，
跟住知道係堅之後，傳出係史提芬史匹堡拍之後又有啲驚，
因為佢對上攪個套The world of War（強戰世界）好令小弟失望.....。
最後得知原來史匹堡係監制，導演係米高比爾，
當堂成個人醒哂，相當之期望！！
米高比爾亦係我老Blue最喜愛嘅荷利活大導演之一，
由佢早期期嘅BAD BOYS、代表作「石破天驚」到跟住嘅「絕世天刧」、「珍珠港」及「謊島叛變」，
我老Blue一直都有捧場。
今次「變形金剛」應該係美國佬罕有嘅大型機械人格鬥科幻片種，
但係溶入米大導強烈風格，
就係佢嘅戲以緊湊誇張、動感凌厲八個字形容！
加上機械人嘅CG特技幾可亂真，
不論近鏡玩變身效果，甚至乎連機械人身上嘅舊化殘漬都做得好正；
兼且機械人角式好人性化，一啲都唔呆板，
當中以「大黃蜂」最搶鏡。
當然高潮位梗係Ending博派、狂派城市對決及
戈柏文隻揪麥加登簡直打得好激！
不過，片中不乏好正嘅搞笑位，
就係國派成team「人」家訪男主角阿Sam屋企，
個場戲十分抵死，
諗落有幾分似「強戰世界」一場「捉迷藏」個段戲，
唔多似米導演咁，反而似史匹堡多啲，
唔知同佢做監制有無關係囉？
總括而言，
呢套「變形金剛」對任何一個喜愛機械人動畫嘅朋友嚟講，
絕對唔可以錯過，一定會睇得好高興！

Blueman

DIE HARD 4.0+傳統keyboard

2007年7月4日
丁亥年五月二十
夜

〈電影〉
今日我老Blue趁有時間，
去咗睇一套新上映嘅電影「Die Hard 4.0」。
咁多套動作片之中，
Die Hard可以話係我至愛！
由廿年前1988年開始，
估唔到廿年後會有第四集！
本來諗住睇開唔盞在嘅心態去入場，
因為第三集雖然Bruce Wills拍住Samuel J.Jason，
場面係玩得好大，
但係效果及感覺係俾我老Blue最差嘅一套.....。

不過，今次Die Hard 4.0片長129分鐘，
Bruce Wills拍𠴱𡃁仔Kelvin Smith，
一老一嫩，一個守舊一個潮爆，
幾有火花，效果唔錯喎！
兩個零鐘頭亳無冷場，娛樂性勁豐富，
槍戰連場及大堆頭飛車爆破，
簡直目不睱給！
最令我老Blue高興係呢套野有番第一集𠴱種感覺，
命硬加硬頸而不失自我幽默嘅性格誓要撐到底！
雖然講到主⻆嘅身手有點神化，
但係俾起007或M.I.系仲係嚟得有血有肉。
呢套4.0真係俾到我有點意外驚喜，好！！

〈硬件〉
自從年多前買咗藍芽Apple keyboard以來，
成日俾佢個藍芽玩死，
時得時唔得，
未後索性用番多年前G3年代嘅藍白有線keyboard。
但係唔知係咪職業有關係，
起公司用開啲商業用嘅大size keyboard，
日日打成七、八個鐘，
返到屋企用番個民用keyboard，
硬係手感及速度都好似掙咁啲，無咁爽癮。
於是，周不時落腦場望吓有無公司用緊嘅傳統商用keyboard。
皇天不負有心人，
噚日行過腦場終於俾我老Blue見到同公司一模一樣嘅keyboard，
只係賣五十零蚊，仲要係USB版本，
因為傳統商用都係PS/2 port，
真係十分罕見，二話不說俾錢拎返屋企。
呢隻傳統商用keyboard最大優點係反應快、耐用，
字粒大又唔輕易跣手，
公司近年亦都有入過坊間新款又薄又輕嘅keyboard，
日日廿四小時俾同事係咁打，
通常打咗一零兩年已經打到有啲字粒甩Q埋㖭，
反而呢種舊keyboard仍相當「健在」！

不過，好神奇我買呢隻keyboard唔知點解無牌子喎？
據店鋪老闆話係network佬supplier賣剩出嚟喎，
所以先咁平咋！？
點都好啦，以咁嘅價錢買返嚟仲想點呀？
今日試過的確比市面賣成百幾二百蚊𠴱啲大牌子手感好打好多。
超爽！！

Blueman

Transformer+John Rambo預告片

2007年5月29日
丁亥年四月十三
凌晨

〈影視〉
噚日返工見到工友Ｏ，
劈頭第一件事唔係講公事而係講閒謁，
佢話上網睇咗兩套電影嘅Trailer，
叫我老Blue快啲上網睇咁話喎！
一套係全新長版本Transformer（港譯：變形金剛）電影版及另一套係Rambo第4集John Rambo。
首先講最令我老Blue期待係呢套Transformer，
睇完個官網最新HD Trailer之後，
真係呆X咗，邊有咁正呀！！
直頭係細個睇日系卡通片先有嘅巨大機械人格鬥場面，
依家嘅荷利活特技真係做番出嚟，好感動！！
尤其有幾幕好有「Marcoss」及「Z Gundam」入面重高達起鬧市決戰Gundam Mk-II影子。
機設方面好有日本“河森正治“及“出裕淵“風格添。
超期待！！

另一套"第一滴血"Rambo事隔咁多年，
居然揾返史泰龍拍第四集，
邊有可能㗎.....。
睇完個Trailer之後，
又係呆X咗，血腥暴力場面完全可以同港產漫畫邱瑞新筆下嘅江湖漫畫有得揮，
乜野「批頭」、「擋肚」、「肉醬意粉」都有齊，
見個Trailer龍爺著哂衫唔曬肌肉，
大玩血腥，唔知會唔吸引舊有Rambo粉絲捧場就唔知嘞？
不過，咁樣玩變奏我老Blue就好有興趣，
因為佢老哥對上一套Rocky第五集都好口碑，
都好想睇佢咁老點做Rambo喎？

Blueman

24第六季＋Heroes Vol. 1完結

2007年5月25日
丁亥年四月初九
下午

〈影視〉
呢排天氣非常悶熱，
唔係出猛太陽就係落大雨，好難適應，
所以除咗返工外，少咗出街。

起屋企如果多時間就會砌吓模型外，
夜深最佳節目就係煲劇，
不過，我老Blue近排嘅至愛美劇﹣24 Season 6及Heroes Vol. 1亦已去到結尾。
先談今輯「24」，
雖然呢套劇已經去到第6季，
除咗情意結令我追落去外，
的確每一季故事都令我有驚喜，
但係睇到今季最後一集，
覺得有點江郎才盡，
最後一個鏡頭主角Jack起海邊望住個海，
無哂方向好茫然......。
真係唔知會唔會仲有第7季？

至於新竉「Heroes」就唔同囉，
呢套劇第一輯開始依經吸引到我，
久違咗好耐嘅追劇感覺返咗嚟！！
雖然第一輯結尾有點草率兼無驚喜。
但係起最後一、兩分鐘話俾觀眾知，
呢個結尾之不過係呢個故事開始，
出現咗Volume 2頭兩分鐘嘅片頭，
以新劇集來講都算幾新穎。
傳聞新一輯「Heroes」會分拆為「Heroes Vol.2」及「Heroes-Origins」推出。
「Origins」為6集前傳形式，
講番20年前班超能人點樣決裂喎；
而Vol.2為緊接上集嘅全新24集故事。
但係傳聞最正係NBC已經準備拍Vol.3，
但係主要角式話會播完Vol.2等觀眾投票決定咁攪嘢？
係真唔係呀？
因為NBC繼「Friends」（老友記）多年後，
好耐無一套劇集好似「Heroes」咁旺場，
所以想像到將會幾落本制作Vol. 2。

咁就更加期待出年嘅Vol.2囉！！

Blueman

2007年第一個長假＋蜘蛛俠3

2007年5月10日
丁亥年三月廿四
凌晨

〈個人〉
我老Blue起呢個Blog潛咗水幾日，
原因係呢個禮拜自己終於放今年第一個長假期，
先個幾日同友人C去咗曼谷探朋友兼順道起嗰度「嘆呌」，
無特別話決定去邊度玩，
反而寄居朋友家行行企企、食飯吹水，
感覺幾好喎！
其間，自己破記錄咁可以睇咗兩本書㖭，
有啲似去泰國旅行啲鬼佬鬼婆拿住本書可以磨一日咁不可思議......！
至於去咗泰國工作嗰位朋友，
言談間生活尚算可以，
不過，一齊由頭開始難免有點吃力，
但係我相信人往往起惡劣環境先至可以將自己嘅潛力發揮出嚟。

〈電影〉
尋日，終於睇咗自己期待以久嘅電影﹣Spider-man 3，
百三分鐘裡面娛樂性及特技、動作不下於頭兩集，
不過，覺得條感情線無上兩集咁細緻，
至於對敵喜歡佢個種以弱勝強、智力取勝嘅場面，
比起好多超人片種以壓倒性力量就係一切好好多！
所以今次描寫紅蛛俠力量變化及以一敵三就好過癮！
整體上三集有一氣可成，無令我老Blue失望。

Blueman

追逐Heroes

2007年3月24日
丁亥年二月初六
夜

〈天氣〉
香港每逢踏入三、四月份，
天氣開始回暖兼帶點濕笠，
成個人又濕又重，
好無活力咁......。

不過，唔知各位攝影發燒友，
最近又濕又焗既天氣有無為各下心愛既器材做好除濕功夫呢？
我老Blue就上個月已經換哂全新既防潮珠囉！

〈影視〉
先個輪自己起呢個Blog都有提過一套家陣美國好hit既劇集﹣Heroes。
我老Blue睇左頭個幾集之後，
著迷程度不下於至愛劇集﹣24。
雖然劇情屬於玩超能力既故仔，
呢類戲種老實講並唔係新鮮，
但係故事及角式多樣化，
手法好港、日漫畫風格！！
令到公司好多同事都有追呢套戲，
亦有工友經同事間推介下，
力保同大家劇情同步，用左工餘時間四晚煲哂18集（暫時播到18集）......。
聽講香港明珠已經買左呢套劇，
會起七月播喎！
個買手觸角都幾敏銳。
家陣一班同事、工友們都好期待下個月播出既第19集，
因為劇情去到大家期待既高潮位﹣最強對最強（有點龍珠﹣悟空對菲利大王feel）！！

不過，最早推介呢套好野既工友，
反而到依家一集都未睇喎？
佢話要等齊一季先至睇，
希望到時佢唔怪其他工友泄露相關重要劇情就得囉.....

〈模型〉
先個幾日，買左今期「電擊Hobby」中文版四月號，
除左封面係介紹日本高手點樣砌隻MG-Ｈi Nu-2外，
亦有一樣令香港人驚喜既事報導喎。
就係有關“第8代電擊高達模型王2006“，
總冠軍得主竟然係年約32歲香港既代表Tomoon Lee，
參賽既模型仲要係用最平、最唔起眼既機種﹣RB-79K BALL (MG)，
做出一半機體用透視內部機件既切割形式展示狀態，
技驚四座！！
仲有原來呢位李生去年亦取下冠軍，
即係話今鋪佢係冧莊，相當厲害！！！

Blueman

1.3Kg的怪物﹣EOS 1D MK-III

＊＊Canon第三代頂級機﹣EOS 1D Mark III＊＊


＊＊倉庫情境其中最關鍵元素﹣Lego積木＊＊


2007年2月23日
丁亥年正月初六
夜

〈倉庫〉
呢日我老Blue又發揮無事忙既本色！
自己動手第一次做情境模型，
前晚終於完成左第一期工程﹣M.S.展示台既組件，
雖然仲有好多細節未修飾同埋未上色，
但係對於一手一腳由零開始，
到見到有實物，個份滿足感真係好大，
尤其相對番自己份工廠式工作生活，呢份感覺真係好過癮！！

不過，呢份組件起製作既過程亦都吸取左唔少經驗，
所以完成左之後，開始發覺呢個M.S.Warehouse原先既草圖有修正既必要！
就係咁我老Blue趁呢兩晚返通宵班無乜野做，
重新計劃倉庫草圖Ver 2.0，
除左上網抄下一D真實軍事倉庫圖片外，
更幻想如果一個倉庫真係有隻機動戰士係入面，
應該會有D乜野設施起入面呢？
當然有熟識軍事知識及熱愛高達既廖工友曾經提過，
現實軍備發展咁大型既武器既機會好微，
因為佢話成本高、效益低，咁大個目標好易俾攪掂喎，大和號就係一例子！！
但係佢又補充，如果站起科幻模型角度來講，
倉庫設計應該傾向製做潛艇既船庫最為接近喎。
經過思索下，今朝凌晨一邊開工、一邊著手畫呢個草圖Ver 2.0。

〈相機〉
凌晨七點左右，接近收工其間，
見到成個豬年第一次見面既工友﹣恆仔返工，
一見面並唔係講賀年既說話，
佢第一件事同我老Blue講：Canon公佈左出EOS 1D mk-III喎！！
吓咁突然，又真係DSLR界來講幾大件事。
二話不說，返到屋企即時上網睇下呢部Canon第三代DSLR頂級機乜料先？
主要特點如下：
一千萬像素APS-C CMOS sensor（基本要求啦！）；
超誇張每秒十張連拍可連續玩成110張咁多（記者哥哥既福音。）；
行雙影像處理器，官方話可運算14bit影像（繼P記K10D、富記蛇五後又多一部行14bit，趨勢！）；
新AF對焦系統，多左19個十字感應器（但係睇過AF區無闊到？）；
加入我老Blue認為最實用既除塵功能（聽講去香港CS俾佢地除塵，每次好似要成舊幾水抺一抺喎！！）；
ISO終於有DSLR去到6400啦（以前我老Blue菲林期就玩過3200已經好實用。）；
LCD屏擴展到3寸，但首次加入Live View功能（O記可以揸手既本錢越來越少......）；
仲有俾人成日話個觀景好暗既毛病，官方話有改善（呢樣真係聽住先，要眼見為實！）。
睇黎今次Canon起3月8日PMA2007之前公佈呢部機皇，
已經先聲奪人，兼且覺得想做好一部好機。

最後，講到幾強都無用，咁呢部重達1.3Kg既怪物賣幾多錢？
報稱賣$3,999美金，同上一代MK-II一樣！
我等平民雖然無「筆直」諗呢個級數既機種，
但係都好期望想睇下呢部新機皇既質素如何？
每逢相界大事﹣Photokina、PMA前後，
又係一眾機迷議論訜訜既時候，
因為好多朋友都會睇呢兩個展覽而決定會唔會轉機？
睇黎呢個禮拜好消息會不斷出現，
例如：O記講左好耐既E-1後繼機實樣？
傳聞N記會出FF既DSLR啦？
S記會唔會有高階機啦？
P記係咪得部K10D就算呢？
大家拭目以待！

〈影視〉
返到屋企除左急住上網睇呢個Mk-III之外，
亦好心急下載依家起美國好Hit既連續劇﹣Heroes，
有朋友睇過話好正，叫我睇！
除左呢套Heroes外，
其實自己亦追緊幾套劇，
包括第六季既「24」、動畫有超獸機身後繼篇「獸裝機攻﹣斷空我Nova」、橫山光輝名作新版「Giant Robo鐵甲人」好幾套。
等我睇完上述幾套先再講好唔好睇？

〈模型〉
上完網之後，拿拿訓教啦！
訓醒之後，又好急走左出去買模型材料，
點解我老Blue成日都話要走出去買料呢？
其實呢個M.S. Warehouse最關鍵元件並唔係模型部件！
而係Lego積木。
全靠公司廖工友提醒，一般情境用膠板或木材砌一個情境唔難（靚唔靚又係另一回事？），
難在屋企地方勁有限既時候，
攪到更大都無位收埋！
唯一可以做得又大又可以事後打散既組合就係用Lego積木來做地台、框架及骨架。
問題黎啦？自己一直無玩開Lego，
唔知道原來Lego莫講話套裝組合，
原來連散件都同模型一樣，價錢都幾海鮮下！
就係咁起完個草圖之後，
要成日落去賣Lego既鋪頭昅下有無合用既散件買？
今日咁買到D一直以為無出既Lego散件，
亦都買唔到以為實有貨既Lego地台，唔上唔落；
家陣為左呢個情境，材料買下買下都幾舊水，
而家騎虎難下，唯有幹到底，
希望完成之日唔好超出訂下既預算就好囉！！

Blueman

風塵三俠

2007年2月11日
丙戌年十二月廿四
夜

〈影視〉
尋晚無記翻播多年前一套電影﹣風塵三俠。
呢套戲大大話話都有成十三年囉，
計埋呢次我老Blue都睇左兩三次，
但係每次睇親都好投入？
仲係每次睇親都有唔同感想！
一套好既電影除左製作外，
劇本亦好緊要，
依家既電影最缺乏既就係有好大既製作但無好既內容......。

〈模型〉
不經不覺我老Blue計劃既「M.S.倉庫」草稿，
今日終於完成哂要準備用既草圖，
如果聽日有時間的話，
可以出去先買材料起左個倉庫骨格，
睇睇有無尺寸上修改既需要，
期待！！

Blueman

倉庫情景、24第六季

＊＊最近住緊既屋村外牆翻新，唔知會攪幾耐呢？＊＊


2007年1月30日
丙戌年十二月十二
夜

〈感想〉
如果唔係自己開始有寫Blog既習慣，
如果唔係自己上年開始有砌模型既習慣，
如果唔係自己買左部CG-6機仔，有記錄既習慣....。
都唔知時間原來真係唔等人，
眨下眼差不多又一個月囉！！

〈模型〉
不經不覺，我老Blue完成左隻MG-Nu Gundam，
已經砌左十五隻MG咁多囉！
砌模型除左享受由無變有既過程及樂趣外，
當見到自己完成品或多或少有一種工作之外得唔到既滿足感！
不過，完成左咁多件“作品“，
未有時間認真拍一輯模型相，
因為我老Blue又唔想咁齍咁棟件模型就咁映喎！
呢幾日諗如果自己砌個MS倉庫做背景都幾過癮.......。
但係個倉庫點做、要幾大？
都依家得個概念.........。

〈影視〉
終於睇左24第六季頭三集！
兩個字形容：好勁！！
估唔到呢套連續劇去到Season 6都仲有橋行，
兼且製作明顯加大碼，
希望唔好衰收尾啦！

Blueman