己丑年開年第一篇

2009年1月27日
己丑年正月初二
夜

首先我老Blue同咁多位blog友及網友講聲恭喜發財及身體健康！！

〈模型〉
踏入己丑牛年，我老Blue有幸初一、初二放假。
除咗同親友拜下年之外，
天寒地凍最好起屋企砌模型，
不過，我老Blue並唔係開盒砌新模型，
而係延續去年計劃，
繼續為「MS倉庫」上色，
花咗大半日時間都係上咗三分一部件，
可能太耐無砌模型或者油模型嘞，
油都咁上下已經腰酸背痛.....。
不過，呢個始終係今年2009年大project，
一日未完成都唔駛旨意再起個「迷你倉」搬啲新模型出嚟砌囉！！

＊＊註：我老Blue見最新MG模型「新安州」實在太吸引，又搬咗返屋企......。

MS倉庫施工進度（二）

2008年10月28日
戊子年九月三十
夜

〈假期〉
今個禮拜我老Blue放大假，
不過無諗住出門喎。
家陣咁嘅時勢，留返個錢旁身好啲！
雖然放假留返起香港，
但係唔等於我老Blue會得閒。
難得有七日假期，
老早諗定砌模型同埋映相嘞，
可惜....呢兩個計畫遇到挫折。

〈模型〉
講咗好耐嘅MS倉庫，
我老Blue親呢幾日假期係時候攪埋佢嘞！
之前呢set MS倉庫只係上灰，
呢幾日拿拿冧開始上色，
雖然每塊部件四四方方，
但係大大話話都有廿幾三十塊，
噴噴下又要洗噴槍，
噴噴下又發覺啲「孖星」原來可以去得好快，
又走落街買過，
跟住到今日晏晝終於噴到一隻色最後一塊部件嘅時候，
又發覺聽到「吱」、「吱」聲，
唔係咁黑呀？玩漏氣！！
結果發現兩條接駁喉真係漏氣，
死死地氣又走出去買過條！
就係咁到今日為止，
呢set MS倉庫只係上咗一半色....。

〈攝影〉
本來擬定好今個假期，
除咗砌模型之外，
另外Book咗兩日去映女像攝影活動，
雖不知臨時臨急兩個影會活動都取消，
知道之後當堂無X哂Mood！！
唯有Book咗緊住個幾日啦。
希望唔好再Cancel就好囉！！

〈股市〉
雖然我老Blue起股市一早清貨觀戰，
但係見啲兩日個市發上發落，
恆指郁下都千幾點，
破哂單日升、跌幅，
呢場「金融海潚」咪話唔嚇人！
自問就無咁嘅膽量落海玩啦，
因為股市走在經濟之前，
對未來下年度企業盈利及就業反而擔心過個市.....。

Blueman

MS倉庫施工進度（一）

2008年9月2日
戊子年八月初三
夜

〈模型〉
今日我老Blue放假，
順利展開「MS倉庫」工程。
一口氣拎哂之前瘋狂咁買落十八盒「壽屋MSG格納庫」出嚟，
先揀選不同型號嘅「格納庫」組合一次，
睇下規格及型態有否合乎心目中嘅組合數目（其實係預多咗）？
由地台、牆壁及天花完全再「假組」一次後，
加上每盒「格納庫」附加小道具，
擺埋其中一個己完成嘅MG模型度下尺寸啱唔啱？
結果成個「假組」模樣效果異常匹配！！

跟住拿拿冧開工，
拆哂咁多盒嘅包裝袋一口氣上灰，
今次上灰嘅噴劑棄用咗以往用開嘅「孖星」嘅SUPFACE PRIMER噴罐「筆地」，
改用咗MR.Hobby嘅Mr.Base White1000號噴罐「筆地」，
原因係上次砌1/60 Exia嘅時候發覺呢隻「筆地」更易上色，
效果幾理想。
噴咗廿幾三十塊部件之後，
隻手指攰到有啲唔聽駛.....！
家陣等咁多個部件完全乾透後，
咁就可以跟「試辦」咁上色嘞！！

Blueman

MS倉庫試辦（二）

2008年8月31日
戊子年八月初一
下午

〈模型〉
今日我老Blue見有時間，
繼續我呢個MS倉庫試辦最後功序，
經過上黑線、細節上色及舊化一輪功夫後，
終於完成咗呢個試辦，
感覺同理想嘅模式頗為接近，
總算收貨。
因為呢壇嘢始終攪咗好耐，
心感唔可以一拖再拖，
需要加緊時間儘快完成，
如果唔係堆積如山嘅模型睇怕今年都砌唔到幾多副囉.....？

試品完成後，
往後十多副「壽屋﹣MSG格納庫」就會根據呢個色彩設定做落去，
希望預算嚟緊呢個九月可以完成成個組合啦！！

Blueman

MS倉庫試辦（一）

＊＊初期倉庫色彩設定＊＊


＊＊最後倉庫色彩設定＊＊

2008年8月24日
戊子年七月廿四
夜

〈模型〉
自月初我老Blue轉咗新嘅工作崗位後，
經過一輪地獄式訓練後，
近日總算將心情平復落嚟，
可以抽時間攪下持續咗好耐嘅「MS倉庫」嘞！

噚日開始為試辦上色，
今次我老Blue棄用咗沿用開嘅西班牙模型油「VJ Color」，
而改用日本「孖星﹣TAMIYA」模型油，
因為成組倉庫差唔多十幾個咁多，
如果用VJ Color都幾重皮下！！

上色方面自己都諗咗好耐，
究竟呢個倉庫用乜嘢色調好呢？
之前亦都參考過好多有關軍事雜誌，
發覺好多現代真實軍事倉庫大多偏向淺色調，
於是牆壁選用咗XF-54 Dark Sea Grey，
而地台就用XF-69 NATO Black。
不過，上色之後發覺色調比想像中深咗....，
於是今日繼續上過色，
今次就用淺色少少嘅XF-19 Sky Grey代替咗，
而地台就轉用XF-24 Dark Grey。
完成之後發覺效果唔錯，
好接近心目中嘅色調！

不過上完色之後，
跟住落嚟係做埋後期上高色調警示線及一啲上黑線、舊化工序先叫完全完成，
又一番工夫等住做，
希望自己會抽到時間啦！！

Blueman

壽屋格納庫動工

2008年8月10日
戊子年七月初十
夜

〈模型〉
自兩年多前我老Blue無啦啦挑起條根，
開多瓣興趣，臨老學人砌模型（見本Blog買了第一副MG），
跟住起06年4月頭砌咗第一副高達模型MG版後（見本Blog首個MG始動），
自覺不能自拔，興趣排行榜中直逼第一位嘅「攝影」...！
隨著砌咗一個又一個模型之後，
於07年4月，心想攪個模型情景﹣MS倉庫，
結合攝影同各同好分享（見本Blog重戰機L.Gaim MK-II初現，
可惜自己眼高手底，屢試不果，
灰心之際赫然上網見到模型品牌「壽屋Kotobukiya」推出「MSG格納庫」，
直頭係我老Blue心目中嘅模樣（見本BlogMSG格納庫），
跟住嚟近嘅日子，壽屋嘅格納庫推陳出新，
出完一款又一款不同格式嘅格納庫，
至今已經出咗10款咁多，
兼且推出配合格納庫嘅配件﹣工程車等等。
唔需要花太多力量自己攪，
實屬好消息！！

先個排我老Blue終於買咗個「鴨記牌」嘅商品攝影燈set嚟玩模型攝影後，
亦開始為呢set壽屋格納庫動工嘞！
其實呢set格納庫自己都買咗好多合盒下，
今日抽起幾款唔同嘅格納庫嚟睇，
發覺原來可以好多變化（上下左右嘅組合模式），
加上每款格納庫搭載唔同嘅配件，
將會令呢個「模型情景攝影」增添好多元素及效果，
之前託工友﹣阿廖買咗個「老翻」壽屋格納庫，
發覺呢set「老翻」表面上睇同「正版」差唔多，
但係一夾埋就發覺組合唔同，
尺寸差少少就係差少少....！
如今唯有用呢個「老翻」做「試版」，
作為跟住嘅色彩參考。
不過，原本打算用比較「真實」嘅白色做塗裝色彩，
可惜用呢個老翻做「試版」後，
發覺攝影時會好反光下，
同埋出嚟效果比較「黐地」，
可能要轉用較深嘅深灰色彩作塗裝！
希望呢個月會順利完成啦。

Blueman

壽屋格納庫第四彈

2008年2月8日
戊子年正月初二
凌晨

〈模型〉
估唔到踏入戊子年，
大年初一我老Blue開工居然仲忙過平時，離譜！！

不過，並唔係無好消息嘅！
就好似啱啱先上網見到「壽屋」繼早前宣佈其下M.S.G.格納庫5月推出第三彈007~008後，
跟住就話出第四彈009~010，
睇完之後自己無後悔上年「止蝕」繼續落手落攪埋個MS倉庫咋，
因為睇到壽屋出到009~010實在太正啦！
尤其個隻機械臂，太感動.......。

預期自己計埋過年前買咗004~006四盒，
都入咗十幾盒咁，
如果加埋嚟緊008~010，
砌埋都幾大陣扙吓，超正！！
但係壽屋咁出法，
唔淨之出格納庫，
砌下砌下隨時攪到成個堡壘都得喎！！

Blueman

辦年貨﹣壽屋格納庫第2彈

2008年2月6日
丁亥年十二月三十
下午

〈模型〉
時日年三十，可惜我老Blue仍然要開工，
仲要係返夜班.....。

今日中午除咗慣性上網睇下個股市外，
亦睇到TD（玩具日報）有網友講「壽屋」格納庫第二彈004~006見街，
的確係豬年最後一日嘅好消息！
有睇我個blog都知呢part嘢我等咗好耐囉，
跟住打電話問有關商鋪有無貨？答曰：有現貨！
於是趁今日返夜，計過仲有時間，
即刻飛落去紅磡「其脆」辦年貨啦。
好好彩仲有好多貨上架，
拿拿淋「蠟」咗四盒俾錢。
點解我老Blue咁心急呢sets第二彈呢？
因為呢sets第二彈可以同對上第一彈左右合併，
形成一個倉庫情景，
對於拍攝模型情景有莫大幫助！！
不過，呢啲都係我老Blue拍攝高達模型嘅第一步......。

Blueman

壽屋SMG格納庫第3彈

2008年1月20日
丁亥年十二月十三
夜

〈模型〉
“股市無斬獲，相機無著落“。
不過，無損我老Blue其他娛樂，
好似最喜愛嘅攝影活動及Gunpla(高達模型)咁啦！
就好似呢兩日喜見Blog友﹣占兄最近亦有開工玩Gunpla，
攪到我老Blue好慚愧（因為多買少砌）.....。

不過除咗要計劃早啲開工砌模型外，
另一樣令我老Blue好雀躍嘅係先個幾日上網，
見到壽屋嘅SMG格納庫會出第三彈007及008，
可以將第一彈及下個月發售嘅第二彈組合(共8款)成為一個「倉庫情景」，
配合Gunpla簡直絕配嘅模型情景攝影！！
咁樣出法唔知會唔會出埋個倉門呢？
期待.....。

Blueman

壽屋M.S.G.格納庫第二彈

2007年11月19日
丁亥年十月初十
夜

〈模型〉
早排我老Blue都有提過公司嚟咗好多新人，
起呢段過渡期，工作真係有點吃不消，
好多工友同自己一樣無可避免都要經常性開O.T.。
所以莫講話玩，
有時連瞓都唔夠瞓，
近日試過收工搭巴士因為起車都瞓過龍，
自己過咗站都唔知嘅恐佈經歷.....。

不過，雖然年底前預見自己都無乜時間去玩、砌模型等等，
但係仍不忘上網update各樣資訊，
好似原來模型品牌「壽屋-KOTOBUKIYA」早排推出咗M.S.G.格納庫之後，
事隔半年多發表將會08年二月推出格納庫第二彈004~006三款。
從官圖睇到今次三款格納庫設計及佈局同第一代都好唔同，
最大賣點令我老Blue非常有興趣係呢SET第二代可以同第一代夾埋，
做成一個「倉庫」模樣，
簡直係我老Blue夢想嘅MS模型情景，
唔駛再花工夫點樣整，
兼且原身設計簡單，裝拆都好容易！
計下計下，呢款第二彈格納庫只係添置4sets就可以起好成個「倉庫」模樣，
配合自己一堆MG映相，
簡直perfect！！
超期待！

Blueman

M.S.倉庫初成

2007年8月7日
丁亥年六月廿五
下午

〈倉庫〉
我老Blue自年頭講咗好耐嘅「M.S.倉庫」，
隨著「壽屋」出咗「M.S.G.格納庫」之後，
計劃亦有所改變....。
由「自行創建」改為「原身擴建」，
完成時間加快咗好多好多。
用咗個幾禮拜，終於完成呢個倉庫嘅外形，
依家見圖係總面積三分一，
如果砌埋估計可以放三至四個MG落去。
現階段除咗跟埋啲手尾外，
仲諗緊好唔好做埋另外一面牆同埋個倉頂......。

Blueman

M.S.Warehouse Ver.3.0始動

2007年7月24日
丁亥年六月十一
早

〈倉庫〉
我老Blue自年頭計劃起個MS倉庫嘅情景組合，
因為「壽屋」出咗個現成嘅「M.S.G.格納庫」，
成個計劃即刻hold住。
等下又等，終於近日買咗四套「格納庫」，
雖然呢套「格納車」成品質素已經好高，
不過，呢set模型淨係得底板同埋一面牆，
如果要合乎模型攝影嘅要求（包括廣角、低抄、俯視等等角度），
咁就要再加工，起埋個天花板及加多面牆。
由於現成品尺寸唔同咗，
加上重新計劃過天花及加牆，
原本嘅設計草圖已經唔啱用囉！
嚟緊幾日焗住再起過新嘅草圖Ver.3.0。
希望今次係我老Blue最後一個草圖啦！！

〈模型〉
終於見到笨大MG#99「紅勇」價格稍為回落，
我老Blue都入咗貨。
上網見到新MG#101係乜啦！
就係SD系嘅ZGMF-X42S DESTINY GUNDAM命運高達，
呢隻嘢自己都好有興趣，
不過據報導呢盒繼「突擊自由」之後又出兩個版本，
一個普通版賣5040日元（定價有啲貴...），
另一個係「光之翼」特別版，賣7350日元（感覺仲X貴）。
不過如果呢個特別版真係做到「光」之翼效果，
到時唔知買唔買好囉？

〈股市〉
自己先個排重新調整個投資組合及策略，
希望往後日子會付合預期啦！
不過，今日見美元對日元高見120，
打後又唔知會唔會對日元利差交易有平倉效應？
密切留意.....。

Blueman

望穿秋水的「壽屋」格納庫

2007年7月15日
丁亥年六月初二
夜

〈模型〉
今日我老Blue放完大假之後，
即刻有好消息。
一直期望嘅「壽屋」KOTOBUKIYA品牌嘅M.S.G. Mechanical Chain Base（格納庫）終於到貨，
好彩今日返早，
一收工第一時間落去紅磡「其脆」攞貨。
去到見到貨架已經唔係好多貨，
大約剩番五Sets（每sets三盒），
二話不說擸住兩sets，
跟住企起後面個位哥哥仔又擸咗一sets。
唔知過咗今日「其脆」仲有無貨賣囉？
呢sets格納庫起網上好多人講，
無奈品牌「壽屋」香港代理唔係咁積極，
又遲返貨，又少貨，
好似呢sets格納庫，
好多fans好似我老Blue咁等咗好耐先有等到......。

而家最主力𠴱件Parts有，
可以繼續返之前停咗幾個月嘅「M.S. Warehouse」！
不過，家陣考慮緊唔知兩sets夠唔夠呢？

Blueman

壽屋模型﹣MSG格納庫

2007年4月28日
丁亥年三月十二
凌晨

〈模型〉
請容許我用悲憤又沉重嘅心情寫呢篇Blog，
都唔知好事定壞事囉！？
真係無語問蒼天，點解要俾我老Blue上網睇到呢單新聞呢？
自己亦都一再上網求證，係千真萬確！！
乜嘢料令我老Blue有咁大打擊？
就係出開機戰模型個間「壽屋Kotobukiya」，
將會6月會出MSG格納庫，
即係近似我老Blue喺1月30日提過既「M.S. Warehouse」計劃，
壽屋居然出呢SET情景模型，仲要係同我計劃差唔多，
一樣係組合式可作無限擴充嗰隻，
不過，人地又平又正過自己做個吓抵死嘛！！！
一共三SET，每SET只不過賣900日元，
睇完之後，白痴先會有興趣自己做咋！
咁，白白浪費咗好幾個月工餘時間都砌唔成嘅「倉庫」.....。
天呀！！

希望呢SET快啲到貨，
我實買番十個八個，做大佢！！

Blueman

電腦要求

＊＊老Blue的Cheap Cheap膽機特寫＊＊


2007年4月15日
丁亥年二月廿八
早

〈電腦〉
先個幾日我老Blue都提過CS3已經推出，
其中PS（Photoshop）更係自己一直好常用既軟件，
推出新版固然歡喜，
不過，以我部Mini想行得暢順就唔係咁易囉！！
除左CS3之外，另外Apple有個叫Aperture既玩RAW既軟件，
要求比CS3仲要高，祇少要G5 or Intel Core Duo CPU、1GB Ram、Intel GMA 950 graphic card。
舊款Mini G4想玩無可能！
似乎真係要等Apple出左OS-X 10.5，
睇下有無新款Mini up-grade先至用到囉！！
因為我老Blue覺得電腦今時今日，
唔駛咁落本，過多一、兩年又過時，
夠用就算，唔夠用先至更新都未遲！！

〈倉庫〉
自己計劃既「M.S. Warehouse」，
一拖再拖之下，今朝早起身繼續展開，
經過一輪思索，
倉庫兩邊牆壁既設定及細節亦都順利完成，
至於所需既模型素材亦準備得七七八八，
希望月底前可以完成一面牆就理想囉！

〈音响〉
早排房入面套Cheap雞音响組合，
加左部CD機及換左條新喇叭線，
經過一段時間煲後，
音色亦已穩定落黎，
聽返好多舊CD感覺好唔同，好多細節野出番黎，
尤其我老Blue好多年前買落好多舊既泰文CD。

現階段套組合只欠一對分析力比較好既訊號線及一組電源線，
咁就「功德完滿」，基本組合完成！
（因為上屬兩野到依家都係用緊原裝野，好弱雞下....）
不過， 音响呢家野急唔黎，
加上「筆直」有限；
慢慢加上去，
慢慢有體會先至過癮嘛！
（希望年底前可以完成......）

Blueman

M.S. Warehouse五分二完成

2007年3月23日
丁亥年二月初五
夜

〈倉庫〉
我老Blue呢壇曠日持久既「M.S.倉庫」工程，
今日終於完成左五分二既進度囉！！
自己組合左個地板，
加埋個地台之後，
都發覺好大下！
從DC仔拍攝後既效果都滿意個面積好夠用。

先前未諗到既三面牆壁亦都已經有解決方案，
家下係唔知仲要用幾多時間攪落去咁解！
自己都好期待呢個倉庫情景完成之後既效果會係點......。

〈模型〉
繼MG渣古下月會出2.0版本外，
有報導跟住係會出紅彗星MS-06S Ver. 2.0版，
實在對我老Blue黎講係好喜訊，
因為自己買左咁多隻MG，
其實一隻06S都未買過！！
而聽講七月居然出MS-14 Ver. 2.0......。

不過，現階段一定要儘快完成個倉庫先至可以再砌MG囉！！

〈相機〉
自O記宣佈左E-410/E-510呢兩部新機之後，
我老Blue都好期待睇佢既sample，
近日終於起O記官網見到E-410既官方Sample出左。
自己睇完覺得呢部E-410用左樂聲粒"Live CMOS"，
出來質感同自己部E-300好有分別，
起解像及夥粒方面的確比Kodak FFT CCD好有進步，
但係色彩方面就無左Kodak個份濃厚質感，
現階段官方軟體版本係Ver. 0.8，
希望都出街個日有正式既Ver. 1.0等其他用家報告先至再評論呢部機。

Blueman

最快的後繼機-D40x

＊＊M.S.倉庫製作中＊＊


＊＊事隔四個多月，D40又出新版！＊＊


2007年3月6日
丁亥年正月十七（驚蟄）
夜

〈模型〉
我老Blue計劃既「M.S.Warehouse」，
由於早前草圖有修改，
加上又買唔到所需用既Lego底板，
攪到呢個倉庫製作進度唔上唔落，好弊吓！
又經過一輪修改，家陣仲未度掂兩邊牆壁點樣做好？
今日一於好少理，
做左可以做既工夫先，如果唔係淨掛住攪呢個倉庫，
其他MG睇怕今年都砌唔到一隻仲大件事！

於是，今日終於由地板著手，
開始度位劃線，
因為一共要做四塊約20X20cm既膠片，
每塊膠片又一模一樣加要分左右咁再細分廿六塊唔同大細既膠片，
淨係畫線都畫左我好幾個鐘囉，
真係畫到眼都花埋！！
透吓氣一陣先至再𠝹埋佢。

〈相機〉
趁呢段回氣時間，
上網睇吓有無有關PMA2007前夕既最新戰況？
有呀！Nikon終於有野發表啦！
估唔到，真係估唔估！？
今鋪N記居然宣佈新既DSLR-D40x，
喂？D40出左無耐至喎？咁快有後繼機！
睇翻資料部D40無錯係去年2006年11月16日宣佈，
距離呢部D40x只不過四個月到，
咁咪仲短命過O記部E-400（宣佈日期為2006年9月14日），
估唔到家陣連入門級DSLR亦開始成為一眾DC仔既宿命﹣週期勁短。

睇完我老Blue以為呢部D40會停產？
原來有網友繼後話官方網有提到D40/D40x會同時發賣，
話俾客仔多D選擇喎！
如果你打算買D40，
你會揀邊部呢？

〈股市〉
今日好多報章大大篇幅咁報導尋日大跌市既新聞，
尋日恆指一共跌左777點，為港股有史以來第五大單日跌幅。
自己好彩無貨在手，避過一劫。
雖然今日大市顯著反彈，
但係暫時都係靜觀其變，
等待上升軋形成先再入市都未遲！

〈電腦〉
絕對對我老Blue係一個好消息！
因為終於知道Adobe起3月27日會宣佈推出期待以久既CS3雙平台版本。
自從MAC機轉左新機行Intel-Mac之後，
我老Blue都係用緊部行G4既Mac Mini到依家，
原因用緊既主力軟件係CS2居多，
但係CS2如果起Intel-Mac到行，知道唔會快得去邊，
所以攪到我遲遲到唔敢up-grade部Mac，
家陣可以等CS3出左之後，等D有關報告先睇下有幾好，
配合埋夏季Mac推出OS-X 10.5，
先至決定出機！

Blueman

1.3Kg的怪物﹣EOS 1D MK-III

＊＊Canon第三代頂級機﹣EOS 1D Mark III＊＊


＊＊倉庫情境其中最關鍵元素﹣Lego積木＊＊


2007年2月23日
丁亥年正月初六
夜

〈倉庫〉
呢日我老Blue又發揮無事忙既本色！
自己動手第一次做情境模型，
前晚終於完成左第一期工程﹣M.S.展示台既組件，
雖然仲有好多細節未修飾同埋未上色，
但係對於一手一腳由零開始，
到見到有實物，個份滿足感真係好大，
尤其相對番自己份工廠式工作生活，呢份感覺真係好過癮！！

不過，呢份組件起製作既過程亦都吸取左唔少經驗，
所以完成左之後，開始發覺呢個M.S.Warehouse原先既草圖有修正既必要！
就係咁我老Blue趁呢兩晚返通宵班無乜野做，
重新計劃倉庫草圖Ver 2.0，
除左上網抄下一D真實軍事倉庫圖片外，
更幻想如果一個倉庫真係有隻機動戰士係入面，
應該會有D乜野設施起入面呢？
當然有熟識軍事知識及熱愛高達既廖工友曾經提過，
現實軍備發展咁大型既武器既機會好微，
因為佢話成本高、效益低，咁大個目標好易俾攪掂喎，大和號就係一例子！！
但係佢又補充，如果站起科幻模型角度來講，
倉庫設計應該傾向製做潛艇既船庫最為接近喎。
經過思索下，今朝凌晨一邊開工、一邊著手畫呢個草圖Ver 2.0。

〈相機〉
凌晨七點左右，接近收工其間，
見到成個豬年第一次見面既工友﹣恆仔返工，
一見面並唔係講賀年既說話，
佢第一件事同我老Blue講：Canon公佈左出EOS 1D mk-III喎！！
吓咁突然，又真係DSLR界來講幾大件事。
二話不說，返到屋企即時上網睇下呢部Canon第三代DSLR頂級機乜料先？
主要特點如下：
一千萬像素APS-C CMOS sensor（基本要求啦！）；
超誇張每秒十張連拍可連續玩成110張咁多（記者哥哥既福音。）；
行雙影像處理器，官方話可運算14bit影像（繼P記K10D、富記蛇五後又多一部行14bit，趨勢！）；
新AF對焦系統，多左19個十字感應器（但係睇過AF區無闊到？）；
加入我老Blue認為最實用既除塵功能（聽講去香港CS俾佢地除塵，每次好似要成舊幾水抺一抺喎！！）；
ISO終於有DSLR去到6400啦（以前我老Blue菲林期就玩過3200已經好實用。）；
LCD屏擴展到3寸，但首次加入Live View功能（O記可以揸手既本錢越來越少......）；
仲有俾人成日話個觀景好暗既毛病，官方話有改善（呢樣真係聽住先，要眼見為實！）。
睇黎今次Canon起3月8日PMA2007之前公佈呢部機皇，
已經先聲奪人，兼且覺得想做好一部好機。

最後，講到幾強都無用，咁呢部重達1.3Kg既怪物賣幾多錢？
報稱賣$3,999美金，同上一代MK-II一樣！
我等平民雖然無「筆直」諗呢個級數既機種，
但係都好期望想睇下呢部新機皇既質素如何？
每逢相界大事﹣Photokina、PMA前後，
又係一眾機迷議論訜訜既時候，
因為好多朋友都會睇呢兩個展覽而決定會唔會轉機？
睇黎呢個禮拜好消息會不斷出現，
例如：O記講左好耐既E-1後繼機實樣？
傳聞N記會出FF既DSLR啦？
S記會唔會有高階機啦？
P記係咪得部K10D就算呢？
大家拭目以待！

〈影視〉
返到屋企除左急住上網睇呢個Mk-III之外，
亦好心急下載依家起美國好Hit既連續劇﹣Heroes，
有朋友睇過話好正，叫我睇！
除左呢套Heroes外，
其實自己亦追緊幾套劇，
包括第六季既「24」、動畫有超獸機身後繼篇「獸裝機攻﹣斷空我Nova」、橫山光輝名作新版「Giant Robo鐵甲人」好幾套。
等我睇完上述幾套先再講好唔好睇？

〈模型〉
上完網之後，拿拿訓教啦！
訓醒之後，又好急走左出去買模型材料，
點解我老Blue成日都話要走出去買料呢？
其實呢個M.S. Warehouse最關鍵元件並唔係模型部件！
而係Lego積木。
全靠公司廖工友提醒，一般情境用膠板或木材砌一個情境唔難（靚唔靚又係另一回事？），
難在屋企地方勁有限既時候，
攪到更大都無位收埋！
唯一可以做得又大又可以事後打散既組合就係用Lego積木來做地台、框架及骨架。
問題黎啦？自己一直無玩開Lego，
唔知道原來Lego莫講話套裝組合，
原來連散件都同模型一樣，價錢都幾海鮮下！
就係咁起完個草圖之後，
要成日落去賣Lego既鋪頭昅下有無合用既散件買？
今日咁買到D一直以為無出既Lego散件，
亦都買唔到以為實有貨既Lego地台，唔上唔落；
家陣為左呢個情境，材料買下買下都幾舊水，
而家騎虎難下，唯有幹到底，
希望完成之日唔好超出訂下既預算就好囉！！

Blueman

倉庫工程始動

2007年2月20日
丁亥年正月初三
夜

〈倉庫〉
是日年初三，我老Blue終於放假囉！
今日留起屋企食飯外，
亦都展開左自己計劃左一排既「M.S. Warehouse」既工程。
呢個倉庫大致上分開三部份構成，
第一部份為MS既展示台；
第二部份為之前買落既笨大ACTION BASE加以修飾作配合；
第三部份係最大工程既倉庫地板及四面牆壁。

今日我老Blue開始做第一部份﹣展示台既工作，
用左個幾鐘順利跟個草圖砌左個展示台既骨架，
呢部份唔算困難，
跟住落來到左𠝹膠片既工作，
再起已𠝹好左既膠片上面刻幼線........！
呢下真係難到我老Blue，
老眼昏花咁用刻線尺及刻線刀，
一刀一刀咁刻上去真係要命！！
又經左個幾鐘之下，終於起面積約(16X16）cm既膠片上刻哂所需既幼線。
已經發覺自己頸梗膊痛，
要停一停。
呢鋪自己都唔知幾時可以完成第一部份既工程囉？

Blueman

蓄勢以待

＊＊MS倉庫所需的材料＊＊


＊＊最新MG-Hi-V Gundam封面及完成品＊＊




2007年2月15日
丙戌年十二月廿八
夜

〈倉庫〉
原本呢兩日打算砌個「M.S. Warehouse」地基，
早前買落既材料以為夠哂，
想開工既時候又發覺仲少咁D野未買，
結果，今日又騰左出去買埋其他材料，
始終我老Blue第一次做情境模型，
經驗極都貧乏，有待累積......。
唯有邊做邊學啦！

〈模型〉
前兩日韓國有關笨大既網站，
出左最新MG-RX93-V2 Hi-V Gundam既官方發佈圖片，
封面及做工都好吸引，
不過，唔係好明因乜解究要買到五千幾日元？
家陣仲諗緊好唔好出手？

〈相機〉
早排自己計劃既更新相機既念頭，
可能因為工作上呢一年會有不明朗既因素關係，
「Nikon+Carl Zeiss」呢個組合好大機會擱置囉，
下半年如果工作環境保持現狀，
最大可能都係今年繼續玩O記......。
明天實在有太多可能！

Blueman