Etymotic ER6-14兩節耳膠

2006年10月31日
丙戌年九月初十
夜

〈耳機〉
自八月中我老Blue購入左對心儀既耳機Westone UM-2後。
聽左都好幾個月，
音質當然滿意，
但係有少少問題！
問題就係跟機配送既原廠長短耳綿耳塞，
好用就好用，
不過由於柔軟發泡膠質地問題，自己通常出街先用，
好多時帶下除下，攪到平均一個月用爛一對，
另外買既話就平均一對$30，
（一般耳塞既海綿耳套只係$10唔駛有交易！）
長遠落去，其實好唔化算！

今日，趁有時間諗住又要花錢買定對「士啤」防身啦。
入到常去既鋪頭，見到有隻Etymotic牌子既兩節膠耳塞可以俾對UM-2用，
同耳綿價錢一樣買$30一對。
問個sales兩者有乜分別？
佢就話音質梗係耳綿好D，
而耳膠就隔音好D又耐用D........。
就係咁每樣買左一對。
返到屋企試過新個對耳膠，
好處係容易戴、隔音又好左咁；
弊處係高音比起耳綿有少少「聞」。
希望用耐左會適應啦！

〈假期〉
雖然放大假自己無出埠，
但係一樣咁無事忙咁！
例如，趁有時間執下自己間柴房（非常細小既工作房），
清理下D堆積左好耐既銀行、保險單據之類既野。
又例如自己執下間房先發覺自己有好多之前去旅行駛剩既散銀亂咁放，
於是買左個盒仔裝起哂。
行街無啦啦為左遲D玩War Game，
?到買左幾本關於戰術技巧既叢書，
依家睇緊，發覺幾過癮下喎！
就係咁無無為為咁過時間，
幾乎連模型都無時間砌！！

Blueman

第四項興趣﹣War Game

2006年10月30日
丙戌年九月初九
傍晚

〈興趣〉
尋日，起Blog到自己提過玩War Game。
我老Blue開始想玩番，點解？
其實，自己以前都有唔少興趣及嗜好，
隨著年紀步入中年，朋友們亦開始各有各忙，
加上自己工作唔定時，
呢幾年既興趣逐漸由群體轉而個人化。

計計下自己現階段保持有三樣興趣：
第一項係攝影，呢樣興趣係我老Blue保持得最耐，
由89年第一次接觸到依家，差唔多有成十七個年頭。
呢個興趣俾我最大得著係可以訓練自己思考力，
不論風景、人像或記實，唔同人因思維模式有所不同，
映同一樣野都會有所不同。

第二項係模型，自從年多前開始無無聊聊買左盒模型之後，
砌下砌下，不經不覺都玩左成年囉。
初頭自己都好驚自己三分鐘熱度，
但係砌下砌下又發現到箇中樂趣，
理由係自己以前性格最大缺點係急燥。
但係透過砌模型，由開盒至完成，
往住需要好幾個工作天先完成，
而且過程好須要明確既先後次序，
從中可以訓練耐性。
另外，模型價格唔算昴貴，平均一盒二百大元，
算係低消費！

第三項係投資，
自己經歷過無無謂謂既消費模式，
兼且捱過負債經驗，
由年頭開始組織理財計劃，
至今生活開支得到好大既改善。
不過，投資涉及風險，
得與失要講求步署，決定亦好多時一瞬間！
投資除左講求明顯既利益回報外，
亦好講求自身既情緒、分析訓練，
極富挑戰性！！

至於家陣自己仲諗緊好唔好加入第四項興趣﹣War Game！
以前玩War Game同友人們因為大班人柴柴娃貪過癮，
當時（八年前左右）玩War Game大多數朋友已經玩改槍，
又加上好多無良鋪頭出現，浪費左唔少金錢起改槍到，
落場既時候發覺好多槍友越改越走火入魔，想殺人多過想玩Game既不良現像，
亦都係呢個原因，兩年多前開始淡出War Game.....。
呢幾日，俾朋友又再次「了」番起條根想玩番，
但係自己就唔想好以前咁樣玩法，
反而係想透過War Game呢類群體活動，
從中重新學習人與人之間溝通技巧，
亦希望可以當一種體能訓練，
因為我老Blue一向無乜運動，
而War Game反而係我最有興趣既活動，
兼且需要好大既運動量。
踏入中年開始要注重一下自己既健康，
唔知再玩番War Game，
自己可唔可應付到呢？
當然梗係玩原裝槍好啦！
年紀大左開始驚死兼怕痛嘛！！

Blueman

第二個長假

2006年10月29日
丙戌年九月初八
夜

〈個人〉
由今日一連七日，
我老Blue終於放本年度第二個長假，
自己無特別話有乜地方出門，
算係俾自己留起香港抖下就夠囉！
計下計下，除左一月頭放過大假，真係開工到依家先至有機會抖下咋。

〈槍械〉
都是電影﹣“槍火“、“放逐“惹的禍.....。
先個幾日，當眾工友及自己睇完“放逐“之後，
某幾位工友慶起話玩番War Game喎！
其實，講開玩War Game，我地呢班工友起大約七、八年前已經玩呢科野。
當中，自己及唔少工友起玩具槍方面花左或被人掠左唔少錢，
到後期我同工友K都覺得唔應該玩改槍，
（一般原裝槍大約0.9焦耳，有D Game友為求「火力」改到1.7~1.9焦耳咁誇張！）
轉左用原裝槍（SIG 552）。
因為殺傷力大兼且有D失去左玩War Game既意義及樂趣！
但可惜個陣認同既工友唔多，
梗係啦！駛左咁多錢玩改槍又點會同我地玩原裝呢？

時至今日，馬記（Tokyo Marui）既玩具電動汽槍專利完結，
多左好多其他玩具槍廠商出呢類電動汽槍，
咁質素及價錢都比以前馬記獨大時期都有大幅度調整啦！
咁前幾日，同三位槍迷工友出街食晚飯，
食飯前，有陳工友話落廣華街睇槍。
唔知係咪我地太耐無接觸過D新槍，
覺得好多新牌子及新槍款都唔識。
一伙人入左一間叫CA既槍鋪睇槍及試槍，
幾條友好似第一次睇槍咁，有點興奮，
因為一來槍既質素比當好左，
二來價錢亦俾馬記吸引：
一樣價錢，日本貨槍身用塑膠，
港貨CA出品大多用上金屬槍身喎！
就係咁攪到大家心痕痕又想玩番War Game.......。

〈動畫〉
先個排我老Blue睇完套ZEGAPAIN之後，
跟住尋晚開始睇套新野﹣甲賀忍法帖。
睇左頭三集，覺得劇情好緊湊，絕無拖戲，
畫功細緻、動作凌厲，好過癮！！

〈投資〉
工行1398終於27日上市，
恆指及交投都破哂記錄！
可惜呢D野都唔關我老Blue事，
因為我一手都抽唔到，
但自己又唔喜歡起市場到追貨。
結果，乜到無做睇戲算數，
但係，現水平係咪高處不勝寒呢？

Blueman

ZEGAPAIN完結

2006年10月25日
丙戌年九月初四
夜

〈動畫〉
前晚我老Blue終於睇哂廿幾集既新動畫﹣ZEGAPAIN。
睇完感覺呢套以機械人主打既動畫，
反而吊詭既劇情仲吸引過機械人戰鬥場面，
其實呢套野機械設定及場面都幾單調下，
除左主角機造型上幾特別之外，
其他機種都千篇一律，
兼且戰鬥場面好多有重複出現，幾呃錢下。
不過，劇情就脫離以往傳統正邪機械人片種，
如之前提過劇情大玩電影﹣Matrix格局，
故事最後帶出主角們渴望成為人類，珍惜生命既主題，
唔知係咪作者們覺得日本太多青少年有自殺新聞而有感而發呢？

跟住自己會追睇既就係無記熱播既“甲賀忍法帖“.......。

〈模型〉
今朝我老Blue收通宵，
晏晝起身之後馬上開工﹣砌模型。
開始為隻新MG-京普梵上色，
不過，自己無乜心機配色，
求其揀左隻比原色略淡小小既Medium Blue做主色！

〈投資〉
隨著工行27日上市，
市況起伏不定，戰情於呢幾日我老Blue相信都幾會反覆下，
究竟大市隨著工行上市後會係向上定向下，
還是維持個別發展、上落居多呢？
自己就會覺得傾向個別發展上落居多。
點都好，等睇戲.....。

Blueman

電影﹣放逐

2006年10月24日
丙戌年九月初三
下午

〈電影〉
尋日我老Blue放假。
有工友話呢日去睇戲﹣放逐，
於是下午自己辦完私務後。
晚上一行六人去睇戲，
可能起奧海城睇六點場既關係，唔係咁多人入場，
所以好易劃到靚位，仲有點包場感覺添......。

套戲聽講係繼承杜Sir前作“槍火“風格，
但係故事同“槍火“完全無關係。
班底由“黑社會“完全過渡，如果唔睇片名仲以為係“黑社會“第三集添！？
好佩服導演可以將一個好簡單既故事玩得咁出色，
當中有好多轉接位及對白玩得好抵死下！
眾多演員可能經多次合作，
戲來戲往好有味道。
由於好多場係群戲，無話邊個好突出，個個演員都好平均。
不過，張兆輝既演出最出位，
之於吳震宇今次演出比較內斂左。
槍戰場面多場困獸鬥，睇得好過癮，
尤其末段任賢齊咬住煙玩萊福槍好型！
我老Blue對呢套"放逐"就好滿意，
可能呢套戲比較剛陽味，一眾工友都係大男人，睇得好開心！！

睇完戲大伙兒去左一間大家經常聚腳既小菜館進?，
亦有一位工友無去睇戲事後加入，
七條友食下小菜、飲下啤、吹下水，
一樂也！！

Blueman

日本Plamodel Radicon Show 2006

2006年10月22日
丙戌年九月初一
傍晚

〈模型〉
今日我老Blue上網，
見到東京起本月19~22日有個Plamodel Radicon Show模型新品展?。
睇到Bandai呢期好搏命，
推出多款新款模型「益」街坊！
當中最吸引我老Blue梗係終於出MG版﹣X20A Strike Freedom Gundam（突擊自由高達）啦，
比例及精細度從初模睇到完成度好高，
呢隻野係我老Blue 07年最期待既模型之一。
另外從網上睇到原來BANDAI出MG模型編號已經接近100號囉！
從網上照片睇到會場，
Bandai起會場各新品MG介紹中，
高調宣揚MG No.100 Count Down，
但係大玩神秘唔講邊隻會第100款MG喎？

另外，BANDAI機械人模型新系列R3(Real Robot Reveolution)，
繼第一彈蒼流星﹣雷茲納之後，
起會場宣佈推出第二彈﹣重戰機L.GAIM MK-II。
我老Blue好喜歡重戰機入面既機械設定多過蒼流星啦，
所以呢款L.GAIM MK-II應該走唔甩囉！！

今日，自己終於素組完成手頭上既MG-京普梵。
呢隻野加埋一推武器上身，
的確好有型，呢隻MG設計好高水準，
期待完成日期！

Blueman

動畫ZEGAPAIN

2006年10月21日
丙戌年八月三十
下午

〈動畫〉
先個輪我老Blue起個Blog到有提到最近睇緊套新動畫﹣ZEGAPAIN。
家陣自己睇左一半，
頭個幾集，覺得幾悶下，
幾乎想過放棄。
正當諗住唔再追之際，劇情有所突破（因為頭個幾集全部為左鋪排伏線），
仲一集比一隻過癮。
返而主打既機械人格鬥場面已經唔再重要，
因為呢套動畫劇情都幾吊詭下，
有D似"Matrix"，
但因為集數比較長，內容比Matrix玩得仲大。
等我老Blue追哂，
到時唔知感受又係咪一樣？

〈投資〉
正當恆指上到萬八、杜指升到萬二既水平。
工商招股及集資破左好多記錄......。
咁現況代表係睇好定睇淡呢？
我老Blue只不過投資初哥，亦係一名小小散戶罷了，唔識睇？
公司亦有不少散戶及「抄家」，
佢地各師各法，當中有睇淡者呢幾日趁好出貨；
而睇好者呢幾日大手買貨；
亦有同事出入頻密無話好淡之談。
而自己平常心，無話睇好睇淡，
手上有限既貨升跌輕微，只係將止蝕位略為收窄，
靜觀其變，待工行上市後，
才作對應。

本月廿七號工行上市前，
呢排都係砌下模型好D囉！

Blueman

高達模型軍事化

2006年10月20日
丙戌年八月廿九
中午

〈模型〉
今朝我老Blue早左起身，
趕住砌埋隻MG京普梵，
基本上已經素組完成，只餘下少許武器未攪。
整體上呢隻MG唔算太過花工夫，
算係易砌個隻。

尋日，買左新一期既電擊Hobby中文版，
標題係：GUNDAM MILITARY。
內容主力推介Bandai最新高達模型系列﹣U.C. HARD GRAPH，
好明顯主打高達模型軍事化，
繼之前R3（懷舊機械人模型化）系列外，
又一次向成年模型友開刀之作；
睇落Bandai起開發成年人市場好努力。
唔知會唔會吸引到一眾軍事模型發燒友加入呢？
我老Blue就興趣不大，
始終對MG系列興趣大D。
不過，見到預告呢個U.C. HARD GRAPH，
將會出1/35 渣古頭模型，設計有D似先前既MG版鐵球，
採用多重複合式骨架型式，
呢件我老Blue就好有少少興趣囉！
定價三千日元。

Blueman

MG MS-18E KAMPFER開盒

2006年10月18日
丙戌年八月廿七
夜

〈模型〉
呢幾日我老Blue都要繼續返工，無假放。
不過，繼完成左隻MG卡碧尼後，
自己前幾日開左盒新MG，
不過並唔係之前講既RX-93New Gundam，
而係MS-18E KAMPFER（京普梵）。
呢隻野從外型都感覺到一D都唔易砌，
部件都幾多下兼且都幾細緻下。
至今都係砌左三分一左右，
其中都有好幾部份要打磨夾口，
真係磨到手指頭都「骨」哂！

〈攝影〉
呢排工友﹣恆仔對映人像好積極，
頻頻上網找Model資料俾我老Blue參考。
我老Blue都好耐無映過人像，
都俾佢了起條癮，
睇下幾時攪得成？
期待！！

Blueman

Olympus的堅持

2006年10月17日
丙戌年八月廿六
凌晨

〈相機〉
前個輪我老Blue起Blog到有提過自己之前對Pentax K10D有興趣。
可惜自上網見過官方樣本後，
對呢部未上市既新機有所保留。
因為自己都係對柯達既sensor鐘情多D！

工友馬田知我老Blue早前因K10D而想放手頭上O記E-300，
佢老哥亦熱心咁好快幫我找到買家（註：馬田亦係O記E-300用家）。
可惜，我亦因K10D樣本而hold住放機意願，
唯有起到再次同佢講聲唔好意思。

前個幾日，
呢位工友馬田因家人有喜事，
負責做攝影工作事宜。
佢因為呢單野仲問左佢D朋友借左部O記E-1映相，
尋日開工見到佢，我老好奇問佢個日映成點呀？
佢就好高興咁同我講，
部E-1好正呀，如何如何好用！
聽佢咁講似乎對O記好滿意兼支持添。

但係自己對O記又愛又恨！
愛佢呢個品牌品質無懷疑，
恨佢呢個品牌發展跑輸大市。
攪到自己成日想加碼買D好D既鏡頭，
但礙於O記前景唔明朗，
遲遲唔敢郁手.......！
不過自己唔等到等左咁耐，
唯有睇埋出年年頭，
O記既E-1後繼機出唔出到？
另外，富士新旗艦“蛇5“（Fujifilm S5 Pro）樣本及定價如何，
先至決定需唔需要轉會吧！

Blueman

張靚穎首張個人音樂專輯

2006年10月13日
丙戌年八月廿二
夜

〈音樂〉
我老Blue期待以久既國內歌手﹣張靚穎，
前日（10月11日）佢既首張個人音樂專輯“The One"正式發售。
唔知邊位係張靚穎？
就係自去年憑超級女聲節目得到季軍，
短短一年未出個人專輯已經可以唱國內版神鵰俠侶主題曲及電影夜宴尾場曲。
更簽左國內大牌唱片公司華誼兄弟，
呢隻CD更找來有美國R&B芝加哥樂壇教父之稱﹣Reid Hyams（Celine Dion鑒製）、
李偉菘、李偲菘（孫燕姿監製）及新加坡、國內多位音樂人參與制作。
當中更有三隻英文歌要飛去美國製作咁把閉（起國內實屬罕見。）！

自己覺得呢位原籍四川既小妺妺（出碟當日亦係佢生日，23歲。）
把聲好聽之外，聽佢呢隻第一隻個人專輯全完唔似初出道既新進歌手，
成隻CD十隻歌都好有水準。
有報導話呢位妹妹已經籌備緊佢第二張既CD喎，有無咁厲害呀？（前日先至出碟之喎？）
唱片公司似乎對佢好有信心咁！

各位投資留意國企外，
喜愛流行音樂既朋友，
可以留意下呢位國內明日之星，
佢個名叫﹣張靚穎。

Blueman

第十二隻MG-Qubeley 卡碧尼完成

2006年10月12日
丙戌年八月廿一
夜

〈模型〉
我老Blue經過成個禮拜潛水，無寫過Blog。
今日趁自己終於完成第十二隻MG-Qubeley（卡碧尼），
可以寫下Blog啦！
呢隻MG已經破左我老Blue製作MG最長時間，
由今年7月10日到今日為止，差唔多用左三個月先至攪掂！！
主要原因之前起Blog到提過，
為左增加砌MG既樂趣，
儘早完成手頭上2000年及之前早期設計相對比較差劣MG產品，
就係咁砌砌下卡碧尼hold到今日先至完成！
不過，今次呢隻卡碧尼可以講話係自己至今最滿意既MG作品。
擺起成堆MG當中，由於體積係最大兼且特別上左啞白色既機身，
所以係咁多隻MG之中最為搶眼既一隻。
下一隻跟年份既MG應該會係RX-93 New Gundam！

〈影視〉
呢排除左攪埋手頭上既卡碧尼之外，
除左因為呢個星期返工只係得半日放假，
起屋企亦忙於煲劇。
無記播完“女王的教室“之後，
上個星期六、日分別推出女王前傳特別篇兩集。
我老Blue當然唔會放過！
睇完之後更加覺得呢套女王更加完整，
亦都同公司好多同事一樣，
好欣賞無記出色既配音，俾人感覺好自然好實在既感覺，
值得一讚！
當中有兩幕好吸引係，
第一次同學生講：唔該你清醒下啦！
第二係最後真矢“入魔“既鏡頭，
好鬼“星戰前傳第三集“黑武士feel！
好欣賞前傳真矢對教育既執著，好感動。
自己唔應該遇到挫折就輕言放棄，
唔應該找籍口去逃避，
方向正確好應該堅持落去！！

Blueman

Pentax K10D 官方樣版

2006年10月6日
丙戌年中秋
夜

〈相機〉
今日我老Blue返早，
可惜尋晚訓得唔好，
今日開工好唔夠精神....。

返到屋企上網，
終於見到賓記上載左K10D官方Samples。
睇完D相，感覺真係好賓記風格，
反差適中，成像偏柔略帶粉。
唔知係咪Sony Sensor關係，
還是賓記自家調色原因，
色彩總係比我老Blue覺得灰灰粉粉咁？
可能自己由菲林到最近既O記E-300?壞左？
梗係可似無柯達出來既色彩咁濃艷咁！？
咁呢輯samples睇完唔係代表呢部K10D唔得，
而係自己可能睇慣左柯記D色彩，
呢部K10D我諗要考慮多D先至有決定可唔可以跟得過囉！！

反而富士部S5Pro挾著新既SuperCCD Pro配D200機身來得仲吸引！
不過，呢部機仲未知會高到咩野水位就真？
不過，祇少部S5Pro可以配蔡斯鏡喎！！

Blueman

準備轉會

2006年10月5日
丙戌年八月十四
迎月夜

〈模型〉
今日我老Blue放假。
日頭起左身百無聊賴，
夜晚，繼續砌埋開左盒既MG﹣卡碧尼模型，
呢盒由7月開盒都依家都未砌完，
原因之前都講過，想砌埋D早期MG模型先（eg. GP01/GP02A....），
不過，自己因為感染少許傷風，
只係做左滲黑線功夫就收工囉。

〈相機〉
我老Blue自賓記宣佈推出K10D之後，
亦感O記後勁不繼，
已經著手部署放手頭上既O記器材，
部份已有朋友接手。
而家最重要係等K10D既官方樣版及其他有關網站既試機報告，
如果效果滿意，
自己應該會轉會囉！

〈動畫〉
尋晚自己終於睇到日本先一輪既機械人動畫﹣ZEGAPLAIN。
呢套動畫睇左三集，
覺得故事及機械設定都好似前一排既「創聖Aquarian」，
雖然未有正式上網睇有關資料係咪同“創聖“同一班底？
不過，希望唔好好似“創聖“咁衰收尾啦！

Blueman

MG GUNDAM GP01完成

2006年10月4日
丙戌年八月十三
夜

〈模型〉
今朝我老Blue收通宵，
起身無耐，即刻趕工完成埋手頭上hold左好耐既MG模型。

計一計今次呢隻MG-Gundam GP01，
大大話都拖左我老Blue成三十幾日先至砌好。
砌好之後，效果自己都好滿意，
雖然呢隻GP01設計上都接近十年（初版為97年七月），
但係模型製作上一D都唔馬乎，
淨係隻核戰機可以變形後同隻高達合體既設計，
已經值回票價！（比起同價既MG）

〈投資〉
我老Blue同另一好友K，
自年中開始學習投資，
至今雖然好幾個月，
成績不過不失。
方向及策略暫時仍以穩健及漸進為首，
當然有呢方面投資經驗既朋友會覺得我老Blue策略上比較保守，
甚至唔夠進取。
但係呢個方式現階段唔駛下下?住個市，
擔心股價上上落落。
因為有個老工友先個排就係過份投入資金玩高風險項目，
結果輸掉成副積蓄，
咁又可必呢！

Blueman

女王的教室

2006年10月2日
丙戌年八月十一（國慶補假）
下午

〈影視〉
今日我老Blue返通宵。
下晝有時間返睇之前預錄既「女王的教室」大結局。

自己一向好少睇日劇或韓劇，
但係呢套“女王“真係令我既驚且喜，
點解我老Blue鐘意睇，
由於呢套戲主題講教育及師生關係，已經好特別兼題材冷門（大多數劇集來來去去都係警匪、愛情....。）。
由第一集睇已經好吸引，
比起個套“我Miss係大佬“高下立見，後者可睇可唔睇！
自己一直有關呢套劇既任何資訊都「自我封鎖」，
希望有追劇既味道！

睇到最後一集，
自己因為劇情行畢業禮個段戲被受感動.......！
好耐無睇過一套咁有意義兼製作認真既日劇，
女主角天海佑希既演出無話可說！！
當中廿多位小學生個個都好好戲，
而呢套戲當中所講既意思，現實又幾多人做到呢？
“自己既一生應該自己付責！“﹣自己遇到挫折有無抱怨或賴自己無運！
“要有勇氣承認自己既錯誤“﹣自己做錯野有無堆?賴人、投資失理就賴大戶做市？

我老Blue最喜歡女主角“真矢“講個句經典對白：
“唔該大家清醒下！！“。
真係好正。

Blueman