第11個MG-GP02A完成

2006年8月31日
丙戌年閏七月初八
傍晚

〈模型〉
尋日，我老Blue見身體開始恢復。
第一件事就係動工完成手頭上既MG-GP02A，
經過一晚最後舊化工序、重組後，
終於完成自己第十一個MG囉。
呢隻野大大話自己都用左超過一個月時間先至攪掂，
不過都仲未破記錄，因為手頭上仲有隻MG卡碧尼未完成.....！

講返呢隻GP02A，
未砌之前自己都好有期望，
但係砌完之後又另一回事！
點解？
因為呢隻MG之前起Blog都有提過設計屬於1998年時期。
係我老Blue咁多MG存貨之中，
買左之後最想砌既一盒模型，原因早期設計好多組件都唔理想！
例如Body夾口唔齊、兩肩因組件重量問題唔可以如常昇起等等。
不過，唔計上述問題，
齍計外型及分量，完成後感覺手頭上咁多隻MG當中，
GP02A係最具?氣既一台MG！

〈工作〉
公司將會重新安排人手工作分配，
自己亦會係其中一個，
工作將會係自己重未接觸過既「客戶服務」。
好幾位身邊同事問過我老Blue有無問題或有無壓力？
我老Blue只係好淡然：無！
的確，既來至則安至。
不過，當中有D同事問既時候語帶相關，
帶有負面意味，我都見怪不怪。
反正，有自知之明，明白自己既強弱，
正視問題才係生存之道。
自從04年開始，
自己打從每一件事都會有備而戰.......。

Blueman

病假

2006年8月28日
丙戌年閏七月初五
傍晚

〈個人〉
呢兩日唔駛返工，因為我老Blue好不幸咁惹上腸胃炎。
向公事申請病假.....。
患病期間任何事都做唔到，
因為食過葯後，整個人會無厘精神，
週身無力。
只能呆在電腦“芒“前上網.....

希望過埋今日，
身體會恢復體力啦！

Blueman

好友加入DSLR行列

2006年8月26日
丙戌年閏七月初三
深夜

〈相機〉
尋晚，我老Blue匆匆忙忙咁完成半隻GP02A既舊化就出街。
事緣早兩日有位工友“阿溺“約我老Blue呢日（8月25日晚）出來陪佢大哥買DSLR。

由於佢老哥「筆直」有限，之前好友恆仔大力推介最平既DSLR-Pentax DL，
行機套裝只不過買緊$3999，
如果要求唔高，呢部機真係不二之選。
因為我老Blue之前有位朋友“老馮“早幾個月，又係銀兩關係結果都揀左呢部DL，
映完返來不知幾咁歡喜兼好滿意！

不過，我作為朋友已經同呢位好友「單」聲，
來近呢個月會有好多新機出喎，
包括Nikon D80及Canon EOS 400D。
但一講個價之後，新款機個價同佢既「筆直」有好大出入。
結果，最後當然「扑鎚」呢部Pentax DL啦！

說實話，我呢個朋友好彩佢唔崇拜名牌，
最緊要經濟行頭。
咁就好多野到好易滿足到佢。

呢位老友起攝影方面，
雖未算得上攝影發燒友，
幾年前，借用我既發了霉既菲林機去學映人像，
映得有板有眼。
希望佢都好似好友恆仔，
一樣起攝影方面有好成積。

Blueman

Lossless 音樂檔

2006年8月25日
丙戌年閏七月初二
傍晚

〈檔案〉
連續返左八個工作天，
終於今日可以放番日假囉！
呢幾日除左煲耳機外，
開始聽取網友意見，嘗試將某D音樂檔起iTunes到轉做Apple Lossless File（MP4A）。
用新耳機聽番，發覺有好多細節出番來，
不過，一D舊既CD或者製作比較差既歌曲就相形見拙，
唯有選取較好質素既CD轉檔。

〈模型〉
由於今日先至有時間，
手頭上既MG-GP02A終於可以繼續開工。
雖然呢隻MG只餘舊化工序，
但礙於本身體積比其化MG大，
到今日為止只完成一半舊化.....。

〈意見〉
近日，開始發覺小弟既Blog多左好多無謂既「垃圾意見」（如同垃圾電郵既宣傳單張）。
完全無益及無建設性，
唯有加上驗證字句，
希望對小弟既Blog提供意見既網友及朋友唔會做成不便。
多謝各位繼續支持。

Blueman

耳機的好處

2006年8月21日
丙戌年七月廿八
深夜

〈耳機〉
新買番來的新耳機UM2，
我老Blue經過連日來用「文火」煲機，每晚開著電腦播歌好幾小時，
至今已經開始累積大約五十小時，
開始音質穩定兼偏軟，到左接受既水平。
根據經驗及網友評論，一般耳機大概需要run-in二百個鐘，
先至進入穩定水平，
換句說話，下個月十六號就煲夠二百小時，
到時應該公德完滿囉。

點解我老Blue對耳機有要求？
無他既，日常生活用品中，
使用率最高除左手提電話之外，
其次莫過於耳機。
因為日常返工都需要搭長程巴士由市區往返機場，
上車之後，就係聽歌同埋睇報紙，
的確係消閒既方法。
加上耳機隔音水平都好重要，
因為如果巴士上既乘客，唔係起機場工作之外，
大多數人上巴士出入機場多數係外遊，
佢地通常懷著興奮既心情上機或落機，
會同身邊既友人談天說地，
或有乘客用手提同朋友「哭波喪」、「哭馬喪」.....。
但係佢地無錯喎（哭喪者另計），
只不過唔同既係自己係去開工或收工咁解，
心情大有不同。

唯一可以得到平靜既方法，
就係選擇一對隔音力強既入耳式耳機，
咁就可以起坐巴士或地鐵途中，
享受片刻既寧靜..........zzzzzzzzz（落車啦！！唔好訓呀！！）

Blueman

網上訂製攝影集

2006年8月19日
丙戊年七廿六
下午

〈相集〉
尋晚，我老Blue如常咁上網遊盪。
透過網站「老地方冰果室」得知台灣有心人開發網上訂製攝影集。
仲要回應香港區網友訴求，可以提供郵購服務。
實為一大喜訊，呢樣野我老Blue渴望左好耐，
早起Apple CEO史提夫介紹OS-X及iPhoto 5既時候，
已經有示範左呢?功能，
深深吸引我老Blue。
可惜事後先知呢樣透過iPhoto自訂相集只限於北美及歐洲用戶，
其後日本本土亦有類似服務提供給當地人。
我老Blue好努力起網上尋找香港或國內有無類似服務，
最終不果。

今次台灣網站hypo推出呢個網上訂製影集服務，
同樣係透過iPhoto自己編輯想要既一堆相片，然後Click入攝影集（當然預先裝上既Hypo Plug-in），
咁就可以好簡單編輯，跟住用信用卡過數交易。
至於價錢一本平裝版二十頁計，香港區連郵費大約590台幣（相當於港銀$130左右）。
價錢同北美及日本成本價相約，可算合理。
如果有朋友係用Mac機既，
而又有呢方面興趣可以諗諗。

我老Blue興趣就好大，
第一時間就諗住同堆MG模型做番本「高達MG模型攝影集」。
不過，現階段由於完成MG作品有限，
等砌多幾個MG，映埋相試下整本都唔錯。

Blueman

邁阿密風暴Miami Vice

2006年8月18日
丙戌年七月廿五
夜

〈電影〉
今日收通宵後，晏晝訓醒之後，走左去睇戲。
Miami Vice（港譯：邁阿密風暴），
呢套戲係翻拍好多年前既同名電視劇，當時明珠台改左好老套既名﹣神探勇闖罪惡城。
當年好似亦係由米高曼監制，不過，今次由自己親自落場執導。

米高曼既戲，由早幾年既「?火線 Heat」、「致命煙幕 Insider」及上一套既「同行殺機 Colletrial」，
我老Blue都有捧場。
今次呢套Miami Vice，片長有成132分鐘，
但係劇情及佈局緊密，對白一貫精簡有力，
我就唔覺悶，不過要俾少少耐性睇對白。
又係睇漏一、兩場，完全唔知佢講乜個隻。
呢套戲有兩點意外，
第一，用足132分鐘，因為連畫頭都無，一開波就做到未。
第二，估唔到女角鞏俐真係女主角，佔戲幾重，唔係花樽角式，
不過，唔係咁慣佢講英文，有點生硬。
故事精彩、人物刻劃無前作Heat咁細膩。
至於槍戰場面我估係繼同行殺機一樣，
好多發生起夜晚，採用數碼攝錄機拍攝，大玩現場光，
好有真實感，有D新聞報導feel。
但係睇戲個陣，身旁有對年輕愛?，
可能缺乏耐性，不時互相傾閒計，有點影響我睇戲既心情。

題外話，終於有戲係用SIG 552 Combat Rifle突擊用步槍啦！
仲要係男主角歌連法路既配槍。
因為我老Blue都係用呢枝槍玩War Game架，
比較冷門既槍種。

Blueman

鄭健和的火龍2

2006年8月17日
丙戌年七月廿四
夜

〈個人〉
呢幾日我老Blue無寫日記，
原因工作關係，呢個星期因加班多左，有兩日仲要每更返十二個鐘頭添。
隨左公事外，加上買左部iPod，有時間就會整理一下自己HD入面D音樂檔外，
大大話話都有成8.5GB左右，都幾驚人架。
不過整理左之後，聽歌或過揀歌係方便左好多！
當然模型方面呢個禮拜可謂完全停哂手，
希望跟住?緊既星期可以有時間完成手頭上既MG-GP02A及卡碧尼啦。
不過，今日又忍唔住入左盒MG京普梵呢........！！

〈漫畫〉
香港漫畫界之中，數漫畫主筆我老Blue比較喜歡利志達、邱瑞新及葉明發之外，
另外仲有新晉主筆﹣鄭建和（俗稱﹣和仔），
自己自資出版既新作﹣“火龍“第2期前幾日已見街，
今日先有時間欣賞。
睇完呢期火龍，故事及畫工覺得比上一期好，
而且節奏好明快好吸引，兼且故事大鋼分佈好細密，
近年香港漫畫少有既好質素漫畫。

Blueman

Westone UM2 earphone

2006年8月13日
丙戌年七月二十日
夜

〈耳機〉
今日我老Blue放假。
但係無砌模型，因為走左去買自己心儀已久既耳機-Westone UM2。
先以舊既耳機-Shure E2c聽番幾隻自己喜愛既歌一陣，
跟住急不及待咁換上新既UM2上去，
結果，UM2雖然新機，
但係音質明顯已經比聽左好耐既E2c好好多！！
尤其高、中音明顯好左。
假若循序漸進咁煲番呢對UM2 200~300幾鐘，
效果應該會好理想！
暫時等一個月後，對耳機穩定之後先再作更詳細既報告。

Blueman

Nikon D80蒲頭

2006年8月12日
丙戌年七月十九
深夜

〈相機〉
我老Blue好耐無起呢個Blog到講下相機囉。
呢兩日傳聞已久既Nikon D80宣佈登場！
據老友恆仔今日返工好心急將呢個「喜訊」話俾我知，
皆因恆仔已晉身攝影發燒友，
相對自己近來對攝影熱情有點冷卻....。（慚愧。）

講番呢部D80，剛剛睇番個Spec.以入門機種來講，
的確唔錯幾吸引兼且有誠意，
因為睇完之後，大致功能同D200差唔多。
不過我相信論機身紮實、快門耐用程度及快門時滯，
應該D200佔優。
換句話說，呢部D80可算係一部「輕便版」既D200入門機種。

至於我老Blue期待既O記E-1後繼機仲係無厘聲氣.......。

〈投資〉
呢幾個月，巿場風高浪急、起伏不定。
自己乃初哥一名，無損手爛腳算係萬幸！
好彩記得好多老人家講過：
財不入急門；
誠信可聚財。

Blueman

買了iPod

2006年8月10日
丙戌年七月十七
夜

〈音樂〉
今日我老Blue終於決定買iPod。
起iPod 30G/iPod nano之間取捨，
結果揀左部iPod 30G版本，
因為自己好怕D檔案過來過去，好煩！
埋單二千幾做分期，
感覺無一次過俾咁肉痛嘛！

返到屋企拿拿試機，幸好自己一直用開iTunes管理D音樂檔案，
好快咁將原本7「激」幾既file全部過哂落部iPod到。
聽過之後，音質當然好過原本用電子相簿出來既效果啦！
不過，又心思思咁想買個個earphone......！
就係咁今日放假就係攪過部iPod咁就過左，
唔得閒砌模型囉！！

Blueman

手機與iPod

2006年8月9日
丙戌年七月十六
深夜

〈音樂〉
呢排我老Blue有兩件隨身外出既物件有少許毛病。
就係手提電話同埋數位相簿。
先講手電，好多時開機之後無緣無故同我開左個鬧鐘，
但係唔可以即時刪左佢，要求其輸入個時間先至可以刪除，
好煩！
至於舊數位相簿，本來好地地，平時除左裝相之外，
最大用途就係聽歌，呢排聽歌好多時出現大細聲，
當然亦係唔知原因啦！
一個電話、一個聽歌，對我來講雖然唔係去到好重要既地步，
但硬係有小小問題好似有條刺咁樣....。

今日，問過好多同事（有關呢方面既玩家）既意見，
究竟二合為一手電好還是邊樣緊要換邊樣呢？
( Mobile-SE K810i or iPod/iPod neno）
結果意見不一，
唔知大家有無呢方面既意見幫到小弟呢？

**註：其實我呢個Blog查實會有幾多人會有興趣睇成問題？（一笑）

Blueman

24尾聲，女王接力

2006年8月8日
丙戌年七月十五
下午

〈模型〉
呢幾日我老Blue無寫Blog，
原因自己公私兩忙。
先個幾日打大風，公司運作都依家未回復正常，好亂下。
至於模型方面，好努力咁終於為隻MG-GP02A上哂色，
跟住既時間會組合埋隻MG卡碧尼。
完成埋手頭上個兩隻MG，
下一隻會係新買既MG模型-Gundam GP01。

〈劇集〉
好幸運，24呢套電視劇已經進入倒數階段；
好不幸，無記新播既“女王的教室“好好睇！
攪到我依家有多套電視劇追看。
好彩呢套劇得個十集，
不會阻我好多時間。

Blueman

曉之車

2006年8月5日
丙戌年七月十二
下午

〈模型〉
早排經過旺角一間有售美國模型油既鋪頭，
見到有樽噴筆用既筆地底灰。
剛巧GP02A假組完成，就地取材，
用噴筆跟說明一樣，氣泵壓力調至10~15psi，
噴出來好幼細，有點半透明，質感有點「鞋」，
相對用開既孖星普通底灰無咁滑。
不過比起孖星成本慳好多，以往砌一隻MG噴灰大概用左我大半樽gas地灰，
家陣都係用左四分一左右。
尋晚為隻已經噴左灰既GP02A上主色，效果幾好喎！
可能，今次用噴筆一樣將氣壓調至以往既一半出力。
好上油兼好均勻。

〈音樂〉
噴完模型，例牌等乾。
跟住自己上網消閑下，
一直以來，我老Blue都幾喜歡高達Seed系列既音樂，
當中以Seed入面既一首插曲﹣曉之車，最為欣賞！
好奇心之下，上網尋找有關Seed歌曲大小事項，
居然發現網上有好多有關Seed既音樂短片，
原來早兩年國內亦有唔少Seed既粉絲，
其中國內更有網友將「曉之車」翻唱普通話及廣東話版本，
最後只係找到最早期既普通話版本，幾特別幾有原著感覺！
以下係有關呢隻「曉之車」音樂短片：
40話樂曲名場面
曉之歌錄音MV
Seed Concert片段
由國內網友M.i.L.K.翻唱普通話版本

Blueman

Master Grade in my room

續2006年8月4日
下午

〈模型〉
我老Blue前日上網知道Bandai最新既MG模型-GUNDAM F91到左貨。
但係因為工作及颱風影響，
遲至今日先至落樓下買到。
正如網友所講，今次呢隻F91首次放棄關節ABS軟膠部件，
呢樣野曾經令我打算唔入貨既原因，
因為砌開MG無左軟膠關節，感覺會好容易鬆軟....。
最後，見宣傳品設計好細緻，
令我有入貨衝動！

〈MG〉
近日上網除左睇到日本模型師岩田製作模型既短片之外，
另外偶然睇到Bandai模型官方網頁，
多左一個column介紹有關日本模型發燒友既屋企。
砌左D乜野MG擺左起屋企？
將模型提升作家居擺設手法宣傳，比較特別，
暫時介紹左6位模型家，當中好多作品以素組為主。
但最令我老Blue驚訝有一位不願出鏡既30歲女性模型家“問號小姐“，
佢既「珍藏」最厲害，總共用左兩個大衣櫃咁上下size既玻璃櫃，
全部裝滿砌好既MG、PG，
大大話話以每層擺十件MG保守估計大約擺左超過80隻！
最誇張係眼見MG卡碧尼都砌左十隻，隻隻都唔同顏色。
明顯係一個不折不扣既卡碧尼粉絲！
反觀自己買多過砌.....。
不值一哂。
大家有興趣可以去睇下：
MG Style

〈涼鞋〉
自己著開三年幾既德國B牌既涼鞋已經爛哂，
結果買模型之前，走左落旺角買左對美國最潮既Cross涼鞋。
強調防臭、防滑及抗菌喎！
又試試佢。

Blueman

強橫的三號風球

2006年8月4日
丙戌年七月十一
深夜

〈天氣〉
天有不測之風雲。
8月3日，天文台掛起3號烈風訊號，
但係全港好多市民，包括我老Blue在內都覺得風力有8號風球咁強喎。
淨係呢兩日，我自己先後掛掉左兩把遮囉！
剛剛收工，起公司樓下幾乎企到企唔穩。

〈工作〉由於打風關係，好多?頭既工作都停哂。
但係唔代表無野做架，真係唔明有D同事，係要將D工作推落下一更既同事身上？
明明今日有時間可以做咁D，咁下更咪唔駛咁踢腳囉！
到個D同事同樣又可以話上更點解做淨咁多野？
?！呢D說話人講架？
無計！自己唯有做自己野，但係眼見有D同事咋咋娣娣左閃右避，
真係有D火滾！！！
事後，收工覺得自己修為未夠，可必為呢D人勞氣。
不如，將心力集中處理自己早前提過既「十年計劃」還好！

〈電腦〉
返工前，諗住上網睇下天氣。
誰不知開左機之後，個藍芽無線鍵盤無反應？
唔係嘛！！點用部腦呀？
收工後，返屋企拿拿林?番個陳年keyboard出來，
真係塵年個塵。
好彩有呢個塵年keyboard總算起番個藍芽出來。
每一樣東西都有價值既地方，
問題係自己識唔識利用。

〈模型〉
前幾日，起網上見到有日本模型師既製作模型既短片。
非常實用兼生動，
對製作模型既朋友不妨一看！
MG版製作：PART1, Part2, Part3
HG版製作：Part1, Part2, Part3, Part4, Part5

Blueman