2007年10月9日
丁亥年八月廿九（寒露）
夜
〈動漫〉
我老Blue無寫Blog都有成個星期囉，
原因係太忙......（一笑）。
一眾高達動畫迷期待以久嘅新一輯高達動畫-機動戰士Gundam Double OO，
終於喺10月6日下午6時日本作出首播。
同日「國內版」亦於幾小時後出埋字幕版，真厲害！！
呢套新嘢由今年6月2日開始宣傳至今，
我老Blue當然唔會錯過啦！
自己對高達動畫無偏向UC派或CE派，
只要係新動畫就會睇。
睇完第一集覺得新一輯高達幾有新鮮感，
兼且覺得幾好睇添！
理由有三個：
第一，站喺機械人動畫立場，呢套新嘢做到打多過講，好！
第一集差唔多由頭打到尾，戰鬥場面比已往同類片種多，
場面明快及畫功出色。
尤以主角機Exia初登場兩秒之間K.O.對手，唔做作唔花巧，
表現壓倒性嘅威力，相當精彩！
第二，首集雖然登場角式眾多，但係難得每個角式對白精簡得嚟可以反映其角式性格及行為，好！！
因為睇機械人動畫最怕口水多兼且說教式對白，
我老Blue最頂唔順呢類形式，
上一套SD就係犯上呢個毛病，有幾集真係睇我瞓著咁嚌....。
暫時第一集登場人物中，
覺得Union聯合派系王牌機師﹣葛拉漢（著套老西，搶人望遠鏡個位老兄）⻆式設計最正，
對白及行為反映呢條友仔觀察力及分析力極強，
口吻尖酸刻薄，相當有趣。
其次係「天人組織」坐起母艦入面做戰略指揮個位，
開戰都要飲酒嘅皇小姐，
相信呢兩位角式日後起故事會有好多發揮空間。
第三，係片中出色嘅配樂，相當豐富及出入恰當，
好有電影感完全提高劇情推進，好！！！
不過，我老Blue就唔係咁滿意主題曲及尾場曲，
平淡無奇，希望嚟緊會有新曲有番Seed或SD嘅水準！
暫時睇完第一集Double-OO，
除咗覺得幾好睇之外，
感覺故事及風格都好破格，
一改以往高達模式，有點感動，
再唔係敵方又係搶人武器，
主角誤打誤撞咁駕駛高達作開端囉！
睇完之後，翻查手頭上有關呢套Double-OO嘅人、機設定，
及上網追查有關監督﹣水島精二及寫劇本嘅﹣黑田洋介嘅資料。
其間發現日本雜誌Animage及New Type
訪問水島，
先知道點解Sunrise會揾水島做新一輯高達嘅監督？
訪問大要係原來水島先生一直無參與過任何高達動畫，
加上佢成名作「鋼鍊」對戰爭嘅描寫手法，
搏佢可以為高達帶出新氣象咁喎！
其中訪問對今次標題﹣Double OO，
佢話呢個OO係故事嘅關鍵字咁緊要，要大家留意故事發展咁話！
另外，從NewType訪問中問及有關故事嘅愛情線，
水島先生話會叫黑田先生落好多感情線，
更透露16歲嘅男主角﹣剎那會同大佢10年26歲嘅女主角有發展，
大玩姐弟戀？
估唔到連感情線都咁破格，
希望唔會好似SD咁失控收場啦！
對於水島先生之前一套「鋼之鍊金術師」監督下成績有目共睹，
至於黑田先生，我老Blue比較深印像係佢早期嘅「無限之Ryvaius」，
呢套係自己當時覺得好驚喜嘅科幻動畫，
劇情玩得幾吊詭吓！
希望水島氏對戰爭嘅描寫及黑田氏寫故事嘅風格，
雙方首次合作會為新一輯高達擦出火花。
Blueman
標籤： 動漫
