C.E.73 STARGAZER

2006年7月30日
丙戌年七月初六
中午

〈動畫〉
繼GUNDAM SEED DESTINY後，
最新既SEED系列﹣GUNDAM SEED C.E.73 STARGAZER今個月推出。
故事背景設定於Seed及Destiny之間，
仲係高達系列中首個網上動畫形式推出，
網上亦有有心人放左「種子」供同好下載。
尋晚，我老Blue先睹為快，
Stage 1短短15分鐘，雖為網上動畫，但製作好認真。
感覺仲靚過TV版，
風格好實在，有點似MS 08小隊。
官方話每月一個stage發放，
換句話說，最快都要等到8月中先有中文字幕既BT版囉！

〈模型〉
今朝我老Blue好早起身，
目的都係為左早D完成手頭上既MG-GP02A既假組。
返工前（是日返晏）終於砌好哂！
98"年既產品如我之前提過，省夾口既地方好多，
除左花唔少時間之餘，雙手都好軟哂，真係慘過返工勁打字。
不過，假組完發覺呢隻GP02A都好大隻下，
唔講其他，單係個冷氣盾牌高度都有成隻RX-79[G]咁高！
如無意外，應該係我老Blue手頭上咁多隻完成左既MG之中最大隻、最具份量既模型囉。
之於幾時完成？
咁就好難講，只少攪掂左隻掉低左好耐既卡碧尼先！

Blueman

24-GUNDAM ORIGIN-龍虎門﹣沙煞比

2006年7月29日
丙戌年七月初五
下午

〈劇集〉
7月25日星期二，原本追開既電視劇﹣24。
因個日返夜班，居然自己無左呢回事？
唔記得做預錄，仲要係星期三先醒起，好弊個隻！！
好彩公司有工友﹣檬記幫手，
燒左隻網上BT版俾我跟得番D劇情。
不過BT版質素唔係咁暢順，
跟住過幾集，都係留返電視廣播好D！

〈漫畫〉
久違左好耐既漫畫-機動戰士GUNDAM THE ORIGIN issue 12終於出左。
今期延續一年戰爭開戰前一段故事，
其實睇到依家，我老Blue覺得THE ORIGIN故事補充左好多原有高達故事不足及填補左好多失去既時空。
（尤其係全部故事幾乎由馬沙為中心發展。）
總係有一種感覺起安彥良和筆下故事咁完整，
會唔會有重拍0079既可能呢？

〈電影〉
經過一輪火熱宣傳下，尋日電影龍虎門終於上畫。
我老Blue聯同一眾好友去左睇呢戲，
片長95分鐘，悶足一半。
可以咁講，武打部份十分精彩，但係文場戲好弱好悶。
套戲製作認真，但係有D失手。
唔睇無損失。

〈模型〉
數呢個禮拜最高人氣既玩具商品莫過於新上市既HCM Pro SAZABI（沙煞比）。
雖然，我老Blue由去年尾轉玩MG模型之後，已經戒左玩HCM Pro，
不過，有工友﹣阿達好有興趣，
由於呢位老友居於國內、工作香港，
要send短訊俾我幫佢買番盒，留言話急玩！

講開模型，話口未完，
先排有工友話好想砌番模型，
真係開口中，三分鐘熱度。
家陣呢位工友同我講第一個完成品都未有，
因為煲緊套「神雕」喎.......！

〈工作〉
近排公司某D老鬼﹣攪事怪、麻煩西、防撞欄及食錢獸等人。
人如其名起部門裡面互相為自己政綱「爭取選票」，
好煩。
呢班人成X日為D小事好勞嘈，
但係佢地有個共通點就係無乜點睇新聞，
仲要報紙入面既REcuit，
又係個句，咁多不滿有本事咪唔好撈囉！
硬係唔記得出來撈野係求財唔係求氣。
係鍾意玩埋哂D辦工室小政治，無無謂謂！

Blueman

Epson P4500出場

2006年7月27日
丙戌年七月初三
下午

〈器材〉
呢幾日忙於工作，
尋日最後都無時間繼續我既模型GP02A啦！

近排熱得交關，今朝終於悶出雨來，感覺都清爽左好多！

尋日打開份信報，
有樣野吸引到我，唔係國美收購永樂，
而係Epson落廣告，流動相簿-P4500。
呢部話係上代P2000加強版，
除左體積一樣咁大舊，個“芒“又係3.8"，
其他加大左個HardDisc到80Gb，
兼容多左其他格式既檔案外，無乜特別。
唯一唔同既係今次終於對應中文檔名！
自己年頭買左部P2000，
無理由為左呢個中文檔名而upgrade......！

不過，另一邊廂微軟VS蘋果，
年底微軟會推出iPod殺手-Zune硬撼iPod。
但係好多MAC友話有“小道消息“，
蘋果會推出iPod新版迎戰喎，
更傳到話會有手電功能喎？
係又唔錯?！
我就保持觀望態度。

Blueman

Squadron綠筆地

2006年7月26日
丙戌年七月初二
凌晨

〈模型〉
真係套用財經術語咁講，低處未算低。
雖然過左兩日，但係我老Blue到依家都未砌完隻MG-GP02A，
因為實在太多地方需要用做無縫處理。
以為先前個隻MG-卡碧尼會破我製作最耐MG紀錄，
睇怕呢隻GP02A可能追過卡碧尼，
話哂隻卡碧尼雖未完成，只待重新組合及滲線、舊化呢D後期工夫。

但係呢隻GP02A就唔同囉，
現階段都只係砌左三份二，
就算砌完，由於呢隻之前我都提過屬98年產品，
設計上有好多地方好難作分件上色，尤其係兩個肩位個舊推進器.....！
預計用好多時間包模型膠紙做遮蓋功夫。

不過，亦因為呢隻GP02A咁Q麻煩（相對其他98年後期既MG大魔來講），
自己試用左一隻美國牌子Squadron既綠筆地，
真係如包裝上面話齍：快乾又硬，
相對起以往孖星個隻灰筆地，快乾好多，若莫30分鐘乾硬化！
亦因為咁大大縮短製作時間，
如果仲用緊孖星筆地，
我諗依家砌緊三份一左右啦！

希望今日可以完全砌好呢隻GP02A啦！

Blueman

工作、投資、娛樂

2006年7月23日
丙戌年六月廿八（大暑）
夜

〈個人〉
尋晚，我老Blue返通宵班。
經歷左一個繁重工作既通宵，
其間同“掃把“﹣爛命到公司樓下食煙吹水，
話題離唔開講公司野，
大家都認同部門不斷擴大，但係唔代表會用番現有人手....。
緊住衍生要應該早點投資為自己日後生計做好準備，
爛命頭腦靈活，作風穩健，
我當然向佢有關投資心得。
自從解決左有關債務問題之後，
依家生活尚算穩定，
開始遵從「工作第一、投資第二、娛樂第三」呢個戒條生活。

〈模型〉
剛剛完成左隻MG-卡碧尼全部噴色部件。
跟住落來如尋日所講，
開始展開MG-GP02A高達既工夫。
剛巧上幾日經過模型鋪，
見到有隻美國牌子Squadron既綠筆地，
強調快乾易用，
稍後引證！

Blueman

買模型、砌模型、賣模型

2006年7月21日
丙戌年六月廿六
夜

〈模型〉
今晚我老Blue返通宵班，所以下晝有時間。
原本打算出街行下，但係一起身日頭好猛烈，
結果起屋企樓下食個茶餐算數。

﹣買模型 ﹣
返屋企個陣行過玩具鋪，
老細話隻MG-GUNDAM GP02A返左貨，問我係咪要？
我之前叫得留貨，無理由有貨唔要咁衰仔架，更可況係靚價添！

返到屋企，照例檢查下D部件齊唔齊，無問題。
跟住睇下份說明書咁，睇完真係好想快D砌左佢，
並唔係因為呢盒GP02A精美，而係剛剛相反，
因為呢款MG-GP02A屬於98"早期模型，大大話都己經八年前既設計，
設計上唔好話同最新06"年既產品比較，同2000年出產既型號比較部件夾口位都多好多；
變相省筆地既地方及時間多左。
呢盒真係有可能係我Blue第一次買左一盒MG番來最想「了結」既模型。

﹣砌模型 ﹣
睇完盒GP02A後，跟住爭取時間去為隻MG-卡碧尼上色。
到依家為止，今日都係得三分二噴左色，
其餘三分一要自己有時間先至可以繼續囉。
由開盒到依家已經十日，
呢隻卡碧尼都拖左好耐，
可能會破我製作MG最耐紀錄囉！

﹣賣模型 ﹣
今日去買模型既時候，
同老細吹開水，佢同我講之前有上色模型作品寄賣，
問我有無興趣？
我呆左一陣，自己砌模型純綷時間有D寄託，
無諗過由寄託變成寄賣？
不過，自己都好想知道砌左模型咁耐，
想抨下自己既實力，因為市場最現實。
等我考慮下先！

Blueman

卡碧尼的啞白色

2006年7月19日
丙戌年六月廿四
凌晨

〈模型〉
我老Blue前日以為繼MG-Ez8之後，
製作模型既時間會相對加快，
誰不知遇上MG卡碧尼又另一回事。

前日放假諗住為隻MG卡碧尼上色，
主色當然係白色，原設定其實係珍珠反光白，
自己喜好高達模型上色比較暗啞加些少舊化，
出來效果會比較實在D。
所以今次呢隻卡碧尼都唔會例外，
採用暗啞白色作主色！

就係呢隻啞白色累事。
由於呢隻MG卡碧尼比例上比較大隻，
好多部件都好大塊下，
有D似噴緊模型車咁，
結果平時上主色大多數噴一兩浸油已經好夠，
今次噴呢隻純啞白，
要攪到我噴左四至五浸油，要好薄好薄咁噴上去先至上得好，
仲要分兩日先至噴好隻白色。
真係破哂紀錄，不過係最慢上色紀錄......！

〈電影〉
由於噴隻MG卡碧尼白色，
要等時間乾透關係，
其間，前晚同朋友去左睇Superman Return。
全長155分鐘，導演可以將大家熟到爛既人物重新編排，
另到呢155分鐘故事唔算悶，兼且特技出神入化，歎為觀止。
一套娛樂性相當豐富既電影，
值得一看。

Blueman

財政自由

2006年7月17日
丙戌年六月廿二
下午

〈財政〉
尋日，我老Blue返晏。
剛巧又碰到公司電腦系統Down左。
我地做資料輸入員最怕就係呢科野！
公司當然四圍找人加班啦。

一年前，我就渴望加班，因為個陣我仲負債緊，好需要錢銀週轉。
偏偏公司舊老細行緊縮政策，唔放加班費！
求人不如求己，唯有學公司咁行緊縮政策啦......。
2006年開始，自己財政得到改善，
反而想多D時間俾自己！
唔想一世做人牛馬嘛。
加上開始學會開源節流，自己亦開始為日後生活打算，
每月將閒餘消費蓄起作投資之用。
雖然金額數目唔多，總算按步就班，
始終投資同投機唔同，自己投資作中、長線發展，
短期波動對自己影響唔大。

雖然，現階段仲屬起步階段，
但係已經比其他同事及工友幸運，
祇少自己有盈餘作投資，
佢地仲好依賴公司俾O.T.出來作生活或娛樂上既補貼。
開始感覺到財政自由既好處，
就係多左時間俾自己做自己喜歡既事！

不過，當然生活上簡單Ｄ、知足D，
應付到日常開支已經好夠，量入而出。
如果好似有D朋友咁下下要大魚大肉、夜夜笙歌又話衣著入時，
咁就多多人工都唔夠駛啦，老友！

原來，砌模型真係慳到錢架！
自從上年年尾開始砌模型咁，
一副模型想要砌得好，工具好緊要，但祇屬一次性開支，
其餘就靠心機及時間，
結果，往往為左攪好一盒模型，
閒閒地攪你十日、八日，
加上一副模型連油雜項加埋只不過佰零二佰左右。
無事出街少破財嘛！
我相信一個成功既投資者，首先要學習耐性及面對孤獨.....。

〈模型〉
今日我老Blue放假，聽日返夜。
有足夠時間學習耐性及面對孤獨咁去砌模型囉，
如無意外應該會為隻MG卡碧尼上色，
再有時間會盒新MG砌下既！
最近公司譚工友話完左世界杯會砌番模型喎，
早排亦好有熱誠咁去左模型鋪買左D砌模型既工具準備開工，
希望佢唔會三分鐘熱度啦！

砌模型﹣可以訓練耐性及面對孤獨。
玩攝影﹣可以培養視野及觀察力。
不過，兩者都要長時間先至有成果.....。

Blueman

旺角白頭浪

2006年7月16日
丙戌年六月廿一
深夜

〈黑雨〉
今日凌晨，我老Blue收工。
適逢落起黑雨兼風勢疾勁，
直係有遮等於無遮；
加上我得把七截縮骨遮......！

幾經辛苦終於起巴士站趕上車。
由機場出返市區﹣旺角，
沿途多處發生水浸，
去到太子方向更驚見白頭浪般的大水浸，
起巴士入面都聽到沙....沙....既“浪“聲！

返到屋企個陣已經係半夜三點半。
今晚唔知點解覺得呢晚食個杯麵都好味D咁！

Blueman

防潮珠

2006年7月15日
丙戌年六月二十
下午

〈相機〉
自從買左套O記DSLR之後，
呢一、兩年不經不覺已經有成一機三鏡一閃燈。
一直以來都係擺哂入去個小巧既抽真空防潮膠箱。
不過，箱入面既濕度指示平均約六、七十度左近，
呢排少用左套相機，總覺得唔夠穩陣咁，
剛巧，前幾日同工友恆仔行旺角相機鋪，
順道買包工業packing咁大既防潮珠，廿蚊有交易！

呢幾日一直留意個防潮箱濕度指示，
加左防潮珠之後，已經由已往六、七十度降至三、四十度，
效果相當理想。
呢排又熱又濕既天氣，
如果唔適當咁保護下自己既相機器材，
尤其電子器材遇到近日咁既天氣好容易中招架！

〈模型〉
今日我老Blue返夜，
本想早D起身砌模型，
奈何天氣偶左兩三日，終於落出兩，
天氣咁清爽，梗係訓多一兩個鐘啦。
反正都未決定開邊盒MG？
ZETA plus C1還是老虎特裝型好呢？

Blueman

第九個MG-Ez8高達完成

2006年7月14日
丙戌年六月十九
凌晨

〈模型〉
7月13日，天文台發出酷熱天氣警告，
室外氣?高達35度。

我老Blue今朝收通宵，訓醒梗係匿起屋企繼續砌模型啦！
經過一晚努力，
終於完成左我第九個MG模型﹣Ez-8 Gundam。
除左係第二款高達型號外，
更突破左自己既製作時間，
頭搭尾衹不過用左8日時間就完成。
似乎自己既製作流程大有改善。

今次成積不過不失，
可能無乜期望兼且呢款Ez-8造型一般。
相對起上一隻RX-93[G]比較，
我老Blue覺得RX-93[G]討好D！

下一隻快將完成既會係MG卡碧尼。

Blueman

2006年7月MG存貨量

（續7月12日）

〈存貨〉
今晚我老Blue返通宵，返工前落左去樓下間玩具鋪。
因為今日見到MG-MSN-004 SAZABI（沙煞比）返左貨，
當然老細開左個靚價俾我老Blue，
就係咁又拎左盒極有份量既MG返屋企。

頭痛！MG沙煞比算係MG系列裡面繼“有腳自護“及“Ex-S 高達“外，
第三隻體積及包裝盒最大既MG。
結果就係呢個原因，要起我間“柴房“再找空間擺呢盒大野有D難度，
最後左度右度，將現有既MG存貨再執過位，
又俾我老Blue砌得掂喎！

不過，經點算下結果如下：
自3月尾開始買第一盒MG到依家共合計27盒；
完成左既MG現有8盒；
砌緊既MG有2盒。
（如果呢27盒MG係27手?豐就好囉！！）

粗略統計平均每個月完成兩至三隻，
換句話說，衹少要六個月先至完成哂囉！
似乎來緊呢半年都會好Q忙......！

希望年尾可以拍攝第一輯MG-13（模型攝影）啦！

Blueman

MG卡碧尼

2006年7月12日
丙戌年六月十七
深夜

〈模型〉
尋日，我老Blue雖然仲係放緊假，
但係身體同意志完全分離，
本想早D起床，結果訓到晏晝四點鐘先捨得起身.....！

白白浪費左大半個下晝，
於是急急忙追番D時間，
即刻處理每日睇下金融市況及收下電郵呢D例牌野之後，
開始為隻MG卡碧尼趕工。

初頭以為呢隻卡碧尼無乜武器，
諗住一味大件就應該好易砌！
點不知原來組合過程都唔兒戲，
每一個關節及組合都幾細緻。
單係腳掌已經有成12個組件咁多！
不過，尋日已經砌左一大半，
應該今日（12號）可以假組完成。

其實自己買左咁多MG模型，
至於點樣分先後來定完成次序？
除左以本身模型製作難度外，
另一條件係出廠年期，
自從完成左8個MG之後，
發覺越早期MG同越後期MG起水準方面真係有好大距離，
尤其起夾口位、內骨架以及關節接駁位都有好大改進。
自己一路砌唔同MG好似睇緊BANDAI MG模型進化史咁，
相當有趣既經歷，
由砌MG從中亦開始學會及磨練點樣計畫一件事及用幾多時間或最好方法得到成果！

現階段自己只係由最早期既95“年既MG渣古砌到最新既01"年卡碧尼，
模型存貨仲有好多盒，
希望今年尾可以追到06"年既MG模型啦！
等我感受下最新MG去到乜野水準！

其實模型同攝影一樣，成果係一點一滴累積返來。
我老Blue覺得呢種係樂趣！

Blueman

牛一

2006年7月10日
丙戌年六月十五
夜

〈生日〉
今日小弟牛一，
因世界杯決賽幾乎申請唔到大假，好彩最後都批到，
生日自己就唔係咁想開工囉！

今晚自己好低調咁Call左一眾好友出來食餐便飯就算。
當中無同朋友講自己呢日生日，
好友們出席飯局夠哂俾面！
自己已經唔係十八廿二，同年紀既各有各忙，
好難話可以一次過出來同?食飯。
能夠生日有班朋友一齊食餐飯已經好滿足，
我提議食韓國燒烤，可以一邊食野一邊吹水，
席中大家談笑風生，一樂也！

〈模型〉
今日見有時間，決定開盒MG-AMX-004 QUBELEY（卡碧尼）。
點解會開盒卡碧尼？
因為連續砌左兩副高達，
起咁多盒「存貨」入面，揀盒非聯邦系既MG來玩而兼且個盒最阻定，
結果就揀左呢盒！
但係發覺部件都幾多下，
睇怕無一、兩日假期都砌唔起假組合。

Blueman

Alclad II黑光底油

2006年7月9日
丙戌年十四
夜

〈模型〉
今朝我老Blue收通宵，撞正返屋企途中落雨兼無帶遮，
幾狼狽下....！
夏天最怕呢亭失魂雨。
晏晝訓醒之後，拿拿聲開工噴模型，
用左一晚既時間，居然破哂以往既紀錄，
一口氣全部部件噴哂！
除左製作流程改善左之外，更重要既係尋日，
自己有提過出左去買左D金屬油，
其中包括一樽專為美國Alclad II金屬油既原廠黑光底油。
質感極強兼易上色，效果唔錯！

我諗過多兩三日所有部件乾透後，應該可以做後期工夫。
不過，聽日開始放兩日假，
無理由無野做架？

諗下開邊盒MG好呢？
連續砌左兩盒高達，係時候揀自護系玩下！
沙漠渣古還是卡碧尼呢？

〈世盃〉
經過個多月既激戰，
今日世界盃終於到左終極爭?﹣法國對意大利。
我老Blue開波咁耐影響對我好輕微，
反而公司一眾工友就辛苦好多！
好多工友連月來，捱更扺夜，日日好似返兩更，
好似工友﹣檬記咁，平時少返通宵，
尤於多晚通宵睇波，一雙熊?眼咁開工。
又好似工友﹣恆仔咁，呢個月身形暴漲左唔少！！
希望過左今Day，大家可以過返Ｄ正常生活，
不過，我地工作輪班制，其實都唔常得好多.....！

Blueman

模型耗材

2006年7月8日
丙戌年六月十三
夜

〈模型〉
今晚我老Blue返通宵班，晏晝出街覺得條街又熱又焗，
攪到好多人包括自己都竄入有冷氣既地方避暑！！

點解咁熱我都仲要出街？
無他既，因為需要買D製作模型上既耗材，
例如模型用既砂紙、罐裝灰筆地及常用關節上色既金屬油。
呢D耗材其實同Printer Ｄ噴墨及相紙一樣損耗好大！
所以砌模型有唔少得既經常性金錢支出。

另外，最近好多舊版MG返左貨，
自己今日都入左兩副做存貨，
包括MG版陸戰型吉姆及MG版雷姆!

Blueman

陸戰型高達改裝型始動

2006年7月7日
丙戌年六月十二（小暑）
夜

〈模型〉
如上次日誌咁講，前日開左盒MG-Ez-8（陸戰型高達改裝型）。
尤於好多部件同上一隻MG-RX-79[G]基於同一設計，
所以砌起上來駕輕就熟，
不過，最大分別在於其裝甲多左好多活動部件，有點驚喜。
其間亦發生過D驚險鏡頭，
就係起製作最關鍵既頭部，我老Blue如常為左後期上色容易，
需要將面部零件切割，中途一唔留心竟大力割開另一半零件彈開，
仲唔鬼知彈Q左去邊？
個塊仲係安裝起頭頂入面半透明零件，
大小同鍵盤上面個“８“字差唔多.....！
點?呀？

跟住心諗唔係用人手做塊上去頂住檔都要啦！
不過自己死心不息，好努力咁“回憶“剛才個塊零件意外咁撞中附近銅做既煙灰缸既聲音方向再搜索，
結果皇天不負有心人，
望下望下，原來就跌正自己?底下面！
我諗如果自己放棄既話，今日一定俾家母掃地個陣唔覺意掃走埋。

依家我老Blue隻Ez-8仲係假組階段，不過基本大祇上已經砌好哂，
只係剩番D配件未埋尾，
希望唔好再有D不必要既意外發生啦！

Blueman

第八個MG陸戰型高達完成

2006年7月5日
丙戌年六月初十
傍晚

〈模型〉
今日我老Blue返早，出奇地好精神，開工無閤眼訓！
收工之後，返屋企好快趣咁完成埋隻MG-陸戰型高達最後工序。
呢次係我砌咁多隻MG中為期最短既模型，
大約用左11日咁多！
可能砌左咁多隻MG，開始掌握左MG製作流程，
包括磨研、噴色及舊化呢D最化時間既工序。

呢隻MG除左破左自己最快製作時間外，
亦係我老Blue砌既第一隻以高達為名既MG，
今次完成呢隻MG自己都幾滿意，
尤其當初諗住成隻MG靈魂既「高達頭」上色最麻煩，
結果都應付自如。

今晚如無意外，
繼續高達，應該開盒MG-Ez-8 Gundam（陸戰型高達改裝型），
一樣可以?個大雪櫃，唔同既係今次裝配既係枝超級迫擊砲，
基本上大部份組件同隻RX-79[G]同一個模出咁解！

Blueman

口罩

2006年7月4日
丙戌年六月初九
下午

〈口罩〉
今日我老Blue放假。
沿用開既3M 8812口罩爛左，
原本諗住買強勁比較專業D既有Filter既工業用口罩噴模型。
見到買$88一個，
諗左一陣，結果買左$16一個類似3M 8812既新款9312頂住先。

不過，為病安全及健康著想，
計下自己都仲有十幾廿副MG都會完成落去，
其實係應該買個好D既口罩用來噴模型。
第日，再去五金鋪買過先得！
暫時用住呢個9312頂住檔。

〈電影〉
尋晚我老Blue上網，終於起Apple.com發放左Sprider-man 3既Trailer。
一個字：勁！
今次連造型同轉埋，玩黑色外衣，型都爆！
明年七月，絕對期待！！

〈模型〉
今日希望可以完成隻MG陸戰型高達﹣滲線及舊化工序啦！

Blueman

斷線驚魂

2006年7月2日
丙戌年六月初七
凌晨

〈電腦〉
尋日返工因有同事告病假，
我老Blue結果逼住加班，直落十八小時工作。

放工之後，照舊臨訓前上下網咁，
誰不知一上網見到個Browser提我更改上網密碼？
我無理會，點不知Click極到Click唔走，好煩！
心諗會唔係D黑客攪鬼呢？
重新開機，見無事，繼續上網啦！
正當諗住攪網上理財，Log-in唔到，試過幾次都唔得，好邪！
心知不妙，連忙打電話去銀行睇下問下個戶口有無問題？
問左銀行電腦支援，答我話無問題？
咁我試下唔用Safari（MAC機內置瀏覽器）改用最無安全感既IE上網，
又得喎！不過，唔係咁暢順咁，唔理訓醒先算！

訓醒之後，繼續無理到部腦，
改左出街買模型油，
跟住為隻MG陸戰型高達噴埋D手尾，
總算上色完成哂，可以擺佢三幾日完全乾透哂先再砌埋佢。

清埋?面，開機上網....。
大鑊！真係唔能夠on-line！
兼且同一是時間個無線keyboard出現無電訊號，
喂！唔係咁黑！！
於是，連隨走落樓下買電芯兼打電話問ISP究竟邊到出問題呢？
經過一輪對答，
結果，原來只不過modem條連接線鬆Q左！
而家當然無事啦，兼且幾暢順添！

突然諗到幾樣野，
如果身為都市人，一下子習慣左上網無得上會點？
如果身為都市人，有一日唔可以用電話會點？
如果身為都市人，落街無左便利店會點？

無野既，到時終會有代替品嘛！

Blueman