曼谷行

＊＊曼谷新機場＊＊


2006年11月30日
丙戌年十月初十
中午

〈機場〉
我老Blue過去幾日同兩位工友走左去曼谷一轉，
尋晚返香港。
由於曼谷唔係我老Blue第一次去既地方，
所以唔講得有乜野新鮮感，
唯一有既係今次第一次出入曼谷新機場咁解，
感覺設計及格局好似香港機場咁，
可能大抵現代新機場設計上走呢個方向卦？

〈書籍〉
今次去曼谷都係以歎透既心情為主，
無諗過有乜野目的地要去，
兼且今次入住友人當地新居，
而地區屬於舊區，環境相當於香港既深水?或紅磡左近。
大有體會當地人生活既感覺。
由於其中一位友人當地有工作，
我老Blue都唔想阻友人時間，
於是有見及此帶左本書去打發時間，
呢本書係張五常教授既“經濟解釋 卷一 科學說需求“。
自己自接觸投資，
明白好需要吸收多方面既材料作備戰之用，
但係呢類有關理論既書本，
我老Blue要好專心及清靜既環境先至可以用心去睇。
今次好意外咁呢幾日起曼谷，
居然睇左一半！
成績算唔錯，
不過，返到香港之後幾時可以睇完就唔知啦！？

〈模型〉
除左睇書之外，亦有同另一位同行既工友一齊，
不過呢位工友並無工作在身，比較清閒。
呢位工友以東到主既身份帶左我老Blue行下居所附近既大型商場消磨下時間咁！
居然起呢個商場發現有間玩具鋪喎，
呢間玩具鋪格局及裝修唔算新，
估計應該有好幾年時間。
但係所買既有貨品應有盡有，
不論香港流行既扭蛋、像魂、合金魂及模型都好齊下，
例如最新既合金魂Gunbuster、MG模型骷髏高達都有貨！
最正係呢間鋪連相關既動畫DVD、VCD都有得買，
兼且係有泰文字幕添，
可見日本相關動畫起當地應該好受落！
不過，最驚訝係售價非常高昂。
以MG沙煞比賣到港銀九佰大元，
差唔多貴香港一倍，
最勁係有一盒香港都要訂既HG模型﹣GP03Ｄ，
香港都要千幾銀先有交易，
呢間鋪頭都有現貨起手，買港銀三四千幾銀好誇張！

行完呢間鋪頭之後，
我老Blue心?有疑問，
呢D日本正貨既入口模型玩具，
當地真係有消費群？
因為據我老Blue所了解曼谷當地人都幾貧富懸殊下，
一般打工仔人工有限，
大約七、八千泰銖左右（換算港銀大約二、三千大元左右）。
一副普通MG模型大約等於佢地十分一人工，
都唔敢講PG版模型.....。
嘩！真係好想知會係乜野人買呢D玩具囉？

Blueman

我的記事簿

＊＊呢一晚，我老Blue收拾行裝，進行中＊＊


2006年11月25日
丙戌年十月初五
夜

〈外遊〉
前兩日同工友們食飯既時候，
工友﹣阿著終於調到放假，
可以同我老Blue去曼谷幾日行開下！
好好享受下本年度最後一個長假嘛。

所以今日收拾行裝，
雖然係去三幾日，
但係我老Blue唔知係咪好耐都無出門既關係？
梗係好想乜都帶過去咁！
結果，除左幾日用既衫褲替換外，
淨係帶左部E-300一機一鏡加多部DC仔算數。

〈記事〉
自年多前開始，
我老Blue為自己嘗試計劃下理財及生活模式，
平時就係將諗到既計劃就會寫落去一本活頁式記事簿，
好多年前PDA或Palm大行其道既時候，
自己都買左部，
但係果陣因為貪新鮮，
其實無乜野真係值得用部PDA做記錄。
今day我老Blue就有好多有關理財或預算需要記低，
反而唔想用PDA喎！
理由好簡單，
自己用得太多電子野，
心理上好似會容易壞咁？奇怪！
而且用支筆及白紙可以隨時寫。
同埋唔知自己係咪有些少病態？
依家用緊既記事簿仔買左成年幾，
日日咁用，開始又殘又舊，
反而好有感情，頂多加新既活頁落去，
但係未有打算買過本新替換喎！

最可笑係自己年來訂下既計劃，
例如要學D乜乜物物，睇書要睇幾多本之類既計劃，
最近睇返，結果係得少數實現.......。
反而最感動係，
到今日為止自己06年既投資計劃有少許眉目及進展添！
證明呢本價值數十大元既記事簿好有作用。
亦有可能自己訂既目標比較其他朋友投資目標低有關係卦？

雖然本記事簿又殘又舊，
但總算幾襟用，牌子係日本paisible，
選用既材料係牛仔布料及人造皮邊；
活頁尺寸係(126X76)mm，方便攜帶，
值得推廌俾大家！

接近12月，亦好好趁呢個假期係時候檢討及計劃下一年度囉，
不過，自己經過年多既試驗，
訂既計劃唔好太高，
如果唔係好似今年咁完成度好有限！

Blueman

電影﹣墨攻

＊＊歸家途中拍下，諗起公司呢一年公司都有唔少同事成為媽咪喎！＊＊


2006年11月24日
丙戌年十月初四
夜

〈電影〉
尋日（11月23日），
自己走左去睇新上畫既電影﹣墨攻。
呢套由張之亮導演、徐小明?製、劉德華主演，
改編至日本同名漫畫既戰爭電影。
睇完之後，感覺好大制作，
好耐無睇過一套唔係拍俾老外既中國式古裝電影，
兼且題材及手法都比較認真、嚴肅，
唔好以為有劉德華就係一套商業片，
D對白都要有耐性咁去消化，
或者係我老Blue唔係好了解墨家學說啦。
呢套戲除左用中國歷史咁講戰爭既定義及殘酷外，
亦好講當權者對權力既慾望！
幾有意思。

〈模型〉
今日，我老Blue終於用左四日時間，
素組左手上最新既MG模型-ZETA plus C1。
呢隻野砌下砌下完來都唔輕鬆，
D部件好多部份都又多又細緻，
一個唔留神，好容易按錯位。
最意外係支掛手式長距離大砲，
砌完用把尺度下先知道有成27cm咁長！！
應該係我老Blue砌左咁多隻MG以來最大碌既武器囉！
希望呢個假期可以完成埋佢。

Blueman

食蛋唔食蛋？

＊＊砌左大半既MG模型﹣ZETA plus C1＊＊

＊＊起香港大家生活??忙忙，係咪有時候坐低透一透呢？＊＊


續2006年11月22日

〈時事〉
唔知點解香港耐唔耐就會出現D食物安全既新聞。
呢期當然係蛋及活魚又話有蘇旦紅、孔雀石綠呢D致癌成份既化學物質！
問我老Blue驚唔驚？
無得好驚喎，
又係個句，該死唔得病！
不過，呢類國內有問題既食品，
俾我感覺係國內一部份不良商販，
可以為左蠅頭小利，
加D讀書都未必會讀到既化學品落去食品做加工。
我老Blue真係好佩服呢D人，
如果此等概念用於正途，我國科研技術豈止如此呢？

〈模型〉
今日，除左上網了解下股市外，
主要節目當然係砌模型，
尋日開左盒﹣MG C1，
砌左成晚，只係砌左一大半，
砌到手指頭都「掘」哂先收手！

另外，網上終於有消息關於MG第100款已經公佈左，
結果係好多人期待既Hi Nu-Gundam，
不過，初見草稿外型同原著有D出入，
眾網友有讚有彈啦！
我老Blue就好有興趣呢隻MG，
但係，自己既MG存貨中，
隻MG-Nu Gundam仲未動工喎！？

Blueman

十一月下的黃色暴雨

＊＊意外地可以買番Keroro鎖匙扣＊＊

＊＊下午餐時間，在餐廳拍攝。＊＊

＊＊今日罕有地掛起黃色暴雨！＊＊



2006年11月22日
丙戌年十月初二（小雪）
凌晨

〈天氣〉
11月21日，
下午開始天文台突然掛起黃色暴雨警告，
的確有點意外，
兼且入夜之後，氣?有點寒.....。
呢D天氣令我老Blue以前經歷過起咁既天氣下，
外出工作，又濕又凍，怕怕！
所以今日留起屋企到砌模型......。

〈模型〉
如期一樣，股市出現大漲小回格局。
但係小弟都未有意慾加碼！
結果今日起屋企開左盒新MG-ZETA Plus C1，
呢隻係我老Blue第一隻既完全變形既MG高達模型，
開頭睇份說明書以為呢隻會幾複雜下，
但係今日砌下砌下已經砌左兩手一腳，
幾順利兼且組合簡單。

〈音樂〉
11月21日，晚。
外出食飯，經過CD鋪終於見到衛蘭隻新CD-Do U Know出左。
買左返屋企聽，
同上一隻“My Love"風格差唔多，
暫時聽落，不過不失，未算有驚喜。

Blueman

大市調整

**我老Blue第13隻MG-京普梵**

2006年11月21日
丙戌年十月初一
凌晨

〈財經〉
尋日，11月20日，早。
食過早餐後，上網睇下個市？
開市已經裂口低開百幾點！
收市跌勢加劇，
最終18954收市，跌左228點，萬九點捱唔住。
幾乎大部份藍籌無好收場！
好多散戶期待既調整終於出現，
問題係跌到乜野位先至夠皮呢？
我相信好多朋友等位入市......。
我老Blue新仔一名，
無乜經驗，只知現階段嚴守止蝕位，有乜依郁走人！！

〈模型〉
睇完股市，計一計數，
自己今日賬面只不過少左0.5巴仙，算係執身彩。
繼續開工完成埋手頭上淨低既MG京普梵武器。
由於呢隻京普梵武器眾多，
都攪左我老Blue好幾個鐘先至完成哂,
計下計下呢隻京普梵都攪左五個半星期囉！！
拿拿林上埋刮紙呢D手尾，
跟住襯“新鮮“映左幾幅相，
儘快可以同大家分享！！

今日，如無意外起身之後，
應該可以開新MG砌勒，
不過，我老Blue仲未揀到砌邊隻喎？
訓醒先算！

Blueman

2006年最後一個長假

﹣﹣放工歸途中，迎接兩個星期大假。﹣﹣


2006年11月19日
丙戌年九月廿九
下午

〈個人〉
今日開始係我老Blue本年度申請既最後一個大假，
仲係連續兩兩個星期。
自己呢一年既假期差唔多谷哂落今年尾，
有點似農夫生活咁。
至於有乜安排？
未有特別打算喎！
可能又係砌下模型、睇下書咁啦。
因為呢一年都買左唔少模型同埋唔少書都未有時間去清理嘛！

〈漫畫〉
最近呢個星期，
一口氣出左兩本自己既心頭好漫畫﹣Gundam Origin #12及銃夢Last Order #9。
先講Gundam Origin，
安彥良和執筆重新編繪既「新著﹣高達」，
十分之精彩，尤其呢兩期既「前傳」部份，
描寫馬沙動畫版無提到既成長部份好原整，
俾我覺得成本漫畫馬沙先至係主角，
相對阿寶好似二打六咁？
至於另一本Last Order，
唔知點解呢兩期風格由科幻轉左去武俠橋段？
自己睇睇下唔知以為睇緊港柴龍虎門添！！
但係講開龍虎門，
呢排新著龍虎門真係轉左風格咁，
由實牙實齒既技擊打鬥轉左勾心鬥角、權力鬥爭既課長島耕作feel？
主角由龍虎三皇變左由火雲邪神、白蓮聖上及文殊天尊擔網演出。
大玩CEO哲學！
時空及地點由日本、南韓及泰國四圍打，
估唔到全球貿易化外，
龍虎門都與時並進！

Blueman

Blueman-Daily

--我的新DC-CG6試機相。--

--踏入秋天第一場雨。--

--返工時在巴士上拍下的。--

2006年11月18日
丙戌年九月廿八
深夜

〈網誌〉
今日係我老Blue呢個Blog改hyper-link既第一日。
其實點解改名？
好簡單，一直都覺得中文名“老Blue日記“同連結用既英文“bluemanphotolife“硬係有D唔協調咁。
如果兩者意思揀其一，
都係覺得“老Blue日記“意思直接D，
最後連結都用上同一意思，
感覺幾統一。

至於風格上亦有些少改變，
就係加入相片，
自有左部新DC，
見到D有趣既人和事都可以好方便咁映低，
希望往後既日子可以同網路上既朋友分享自己一事一物。

Blueman

兩手準備

2006年11月17日
丙戊年九月廿七
下午

〈鎖匙〉
11月15日，深夜。
收工同朋友去食宵夜，
事後半夜三更返屋企，
起門口先發覺自己唔見左抽鎖匙，
最後當然驚熟睡中既家母開門先返到屋企......。
自己好少唔見鎖匙或銀包之類既野，
但係，唔知點解會意會到有呢一日，
所有鎖匙都會配定一set看門口或交俾熟人做後備。
不過，我最愛既Keroro鎖匙扣唔知買唔買得返囉！

〈投資〉
呢幾日，股市急升，
但係個別股份有如過山車咁上上落落。
自己都有兩隻貨都有此經歷，
玩左好幾個月，
終於要出動止賺/止蝕盤作防護，
最後，有一隻到左自己心目中既警戒線而沽貨保持利潤。
由於呢隻貨跌勢急速，
若唔係早前交左廿蚊財經資訊，
恐怕出左事！
亦正好俾機會自己「換馬」。

經此兩件事更令我老Blue做每件事情諗多兩步無壞！

Blueman

第13個MG-京普梵

﹣﹣京普梵製作中 ﹣﹣


2006年11月13日
丙戌年九月廿三
夜

〈攝影〉
今日我老Blue又放假，
中午，趁出去食晏飯既時候，
當然拎部新DC仔去試機！
映左幾廿張相同十零段短片。
因為尋晚試左用部新機拍D短片，
喪玩iMove剪片，幾過癮。
雖然短片質素當然唔可以同DV比較，
但係勝在方便嘛！

〈模型〉
下午，掉低左好耐既MG模型﹣京普梵終要有時間去埋尾囉！
經過一晚趕工，
攪到十點幾總算完成，
不過，其他武器就唔夠時間攪囉，
唯有第日先啦！
至於今次呢隻京普梵上色有D特別，
除左主色係啞色外，
其餘部份油上金屬油，
不過，用上三隻唔同色澤既金屬油，
組合左之後，遠睇三隻金屬油好似差唔多咁，
下次要留意。

〈日誌〉
雖然我老Blue呢個Blog叫BluemanPhotoLife，
原本自有圖片上傳呢個功能，
可以圖文並茂咁出Blog。
但係一直懶整相，
所以無再攪到，
依家多左部新DC，
希望日後可以今日咁出埋相俾大家睇啦！

Blueman

新玩具﹣CG6

2006年11月12日
丙戌年九月廿二
晚

〈相機〉
今日我老Blue放假！
終於見到SANYO部VPC-CG6到貨。
標價$2680，包兩電一激SD卡！
俾預期仲要低，無野講，成交。

記得自己一共買過兩部DC仔，
第一部係SONY S-70，
第二部係SONY U-20，
計埋今次呢部CG6係我老Blue第三部。

返到屋企，見其中一舊電仲有剩，
梗係試玩先！
連卡連電都只不過168g，好輕手。
玩左一陣，好過癮！！
簡單易用，幾乎唔駛睇說明書都已經了解基本操作。
跟住拎左最近砌好既MG模型出來映，
求其擺左起檯面，落盞檯頭燈拍左幾個shot，
發覺呢部機個芒由於係290度旋轉式，
拍模型好方便。
映左幾個shot，拿拿臨download落部腦睇！

雖然自己對呢部DC仔目的係當隨身機。
質素唔係太過苛求，
因為如果要揀質素一定係Fujifilm機仔。
但係從個芒睇番D相，又唔錯喎！
究竟係部機有水準定依家D DC機仔已經達到好好既水平，
或者咁講依家一部DC仔往往已經超出左大家基本要求。

Anyway，暫時對呢CG6就好滿意，
唯一係呢機體積比較細，
舊電亦都相對細左，每舊電有720 mAh。
用來拍短片就真係唔係好夠！

頂頭個兩幅模型相，
就係用呢CG6拍攝，
大家覺得如何呢？

Blueman

Leica M8

2006年11月11日
丙戌年九月廿一
中午

〈個人〉
尋晚我老Blue食過藥後，
大訓一場，足足訓左成十個鐘。
的確精神左好多！

〈相機〉
自九月Photokina，Leica公佈左其下第一部M系數碼版﹣M8之後，
坊間除左有人討論呢部機既售價只會天價，
當時有傳M8售價達五千歐元咁誇！
其餘絕少見有關消息傳出；
相反賓記部K10D就好多人講！

尋日，我老Blue上網睇到原來M8已經到貨。
報稱售價比傳聞低，
但係都要收港銀三萬五左右！
三萬五係咪天價？
我覺得唔係，點解？
見網上好多影友心目中既Dream Camera，
不外乎兩部﹣C記1Ds或D2X之類既“宏願“。
雖然SLR(Single lens reflex)及RF(Range Finder)係兩樣野，
不過，殊途同歸兩者都係影像記錄機器。

我老Blue點睇呢部M8？
答案係好有興趣！！
理由好簡單，佢同E-300都係用Kodak CCD......。
兼且自己由菲林年代，
最滿意既裝備配搭係：
Contax N1 一機兩鏡加Contax G2 一機三鏡。
以我老blue個人經驗，
兩者各有各優缺點。
SLR好處用於精細作業，及長距離拍攝，
缺點係如果擁有大光圈鏡會做成攜帶不便；
至於RF好處係機身輕巧，及廣角鏡比較有利。
但係計自己邊個用得最多，
答案係Contax G2！
原因係機身體積相對N1細好多，
一機三鏡重量不外乎大約1kg左右，
成為去旅行不二之選，
出外拍攝好多時外人誤為?瓜機，
由其係人文或紀實攝影，
大多不以為意，無咁矚目，出來效果比較自然。
當然自己隔離唔好有朋友?住部1仔或D2啦.....！

不過，以價論價，
呢部M8並未去到我老Blue好有衝動就去買。
但係想攝影數碼化下玩高質既奶鏡或菜鏡（無錯！Zeiss有一系列叫 Zeiss Ikon ZM Lenses），
甚至現役既Voigtlander福倫達鏡系都有提供Voigtlaner VM Lenses鏡選擇！
M8係不二之選。
問題係部機既入場費咁解！？

M8對我老Blue只屬於可以up-grade相機之中，
可以考慮類別而已，
O記E-300配奶記M8係一個不錯既組合，
有待相關報告.......。

Blueman

感冒的農夫

2006年11月10日
丙戌年九月二十
夜

〈個人〉
呢兩日雖然係返早，
本應夜晚有時間可以開工砌模型，
可惜呢兩日我老Blue有小小感冒，
自己不敢大意，
已經走左去睇醫生。

食過葯後，成個人藕下藕下，
雖然隻MG-京普梵上色完成，
只餘下滲黑線及舊化最後工序，
但依家狀態，都係hold住先，
萬一滲滲下黑線，咳一咳就好大鑊！
到時就衰收尾囉！

〈投資〉
自己近日某D股票隨著早輪升市，
開始由高位慢慢回落，
雖然唔識睇後市，但已經按比例咁做左止蝕盤。
踏入十一月中，
開始為早前耕作準備收割，
亦為明年物色下一輪“農作物“準備“種籽“。
吸取呢半年投資經驗，
發覺呢種春天播種（其實正確自己係由夏天開始），
秋天等收割既投資增值方法，
幾適合我呢亭懶惰既農夫喎！

細水長流.......。
適當既時候就要放手，
如果唔係就好似感冒咁，
突然咳一咳，衰收尾！

Blueman

渣古頭像

2006年11月9日
丙戌年九月十九
夜

〈模型〉
尋日，因為幫工友﹣阿達買隻HCM-Pro RX-93，
落左去樓下間玩具鋪一躺。
除左買隻HCM-Pro外，
見到盒1/35渣古頭及EX模型﹣大天使號（Gundam Seed主角艦）。
結果，渣古頭（U.C. HARD GRAPH系列 No.2-RAMA RAL COMMANDO SET）比較吸引D，
二來EX模型比較高階技術先至砌得掂，
有D郤步，
遲D先至郁手（因為年頭會出木馬號EX版）！

返到屋企，
拿拿聲開盒U.C.渣古頭數件及睇說明書。
咦！呢盒野都唔少部件喎，
都有成十一塊部件，
再睇下說明書點樣砌隻渣古頭？
原來組合程序有D似MG版鐵球或魔龜，
一樣係結構式組合，
但係唔算複雜，
都幾精細及有趣味！

不過，我老Blue應該唔會咁快砌呢隻住，
起碼真係要清一清屋企D MG模型先！
唔知“笨大"幾時會出埋高達頭像呢？
一對高達及渣古頭擺起電腦檯都幾有趣下喎！

〈個人〉
呢排檢討過自己既投資回報，
因為成績唔錯，
難免沾沾自喜。
有時起朋友言談間，開始有點得意忘形，
事後，覺得好幼稚兼唔夠修養。
投資涉及風險，
自己應該時時刻刻保持清醒，
唔好俾短期既勝利就沖昏頭腦，
所謂“驕兵必敗“。
謹記呀老Blue！！

Blueman

理財工具

2006年11月8日
丙戌年九月十八
夜

〈理財〉
我老Blue自開始個人理財及投資股票已經好幾個月，
成績比預期20%回報還要理想。
但係隨著個人持股及揀股數目開始增多，
好多時對多隻股價升跌既波幅比例都要計數，
但係自己發覺自己有兩個問題要解決！
第一，由於自己工作唔定時，唔可以成日跟追蹤到咁多隻價位；
第二，用來計數既計數機只不過係一架記事簿型小計算機仔，
仲係得八個數字位個隻，對於計百份比既數好唔足夠。
之前部計算機好唔方便，
攪到連止蝕位都計錯哂！

呢兩日經工友﹣老全介紹可以用電訊供應商申請有關財經頻道獲取有關資訊，
聽落好似幾好咁喎！
於是，去左C記電訊申請左一條財經頻道，
只不過每月俾多廿蚊就有200個股價及報價提示功能，
價錢都算抵用，
尤其極之適合我老Blue用於止蝕提示！
另外，今日落街買左部有12個數字位既大字粒計數機，
用來計百份比既數非常方便。

希望呢兩樣野會方便我老Blue投資上帶來實際得益啦！

Blueman

回歸工作

2006年11月5日
丙戌年九月十五
夜

〈個人〉
言猶在耳，前日突然「復活」既藍芽無線鍵盤，
今晚又再次無哂反應，
唯有用番個陳年藍白有線鍵盤......。

〈工作〉
放左成個禮拜大假，
今日返早，工作如舊咁繁忙；
人事及是非依然起我老Blue耳邊傳來傳去。
即係公司基本上無乜改變.......。

不過，不約而同有三個工友同我老Blue講呢排股市升勢凌厲，
大家交換左唔少意見，
但係直覺上越多人講，
後市更加有D不詳既感覺！

〈模型〉
今晚食過晚飯之後，
立刻為隻MG京普梵噴埋其他部件。
呢隻京普梵除左主色係藍色啞油之外，
突破性其餘部件一律噴上唔同顏色既美國金屬油，
未知出來效果同原本色彩設定會有咩野分別？

〈天氣〉
踏入11月天氣明顯涼左好多，
尋晚開始覺得有些少傷風，
即刻唔咁怠慢，啪粒傷風葯先訓覺，
今日覺得好好多。
但係返到公司見到有位工友，
放假前已經傷風，今日病情未見好轉？
大家呢排小心身體，
多多保重！

Blueman

Sanyo DSC DMX-CG6

2006年11月4日
丙戌年九月十四
夜

〈模型〉
話咁快我老Blue七日大假已經到左最後一日，
呢個假期好似無無謂謂咁又過左。
估唔到起最後一日假期?面先至郁手砌模型！
今日的起心肝噴埋手頭上既MG京普梵其餘部件，
不過，到依刻為止都仲未噴哂.....。

今日，我老Blue經過樓下間玩具鋪，
因知道高達軍事系列-Hard Graphic第二號1/35既渣古頭出左，
諗住入貨啦！
雖不知入到去，玩具鋪老細何生話入左十幾盒兩日俾人掃哂囉！！
唔係咁搶手呀？
好難怪既！Bandai第一次出呢個系列嘛，
唯有等下一水貨啦！！

〈相機〉
有留意我老Blue呢個Blog既朋友，
自己一直都好想買返架DC仔，
不過成日睇唔?。
唯獨對SANYO既DSC仔（係拍片、映相兩用機仔）有興趣！
見三月十一“十五十六“內文。
已經對部C6好有興趣，可惜當時呢部機仔欠缺高ISO拍攝及只可以兼容2GB SD卡等等因素，
所以掉低左一排無諗到囉。
今日我老Blue出左去旺地買模型油既時候，
途經菜街，驚見一大幅廣告牌上面shows左SANYO C6後繼機DMX-CG6既廣告！！
下！乜出左新款咩？咁點解無其他雜誌介紹或腦場唔見既？
於是，剛剛噴完模型，
拿拿聲上網睇佢個spec，
仲要起日本網先見到佢既?影咋！

不過由於呢個specDMX-CG6係日文關係，
我老Blue都係斷估咁睇，
呢部僅重149g，像素依舊係五倍光學變焦、六佰萬映相、640X480/30fps MP4影片模式，
加入左我老Blue最喜愛既16:9影片拍攝模式及防手震模式可達快門速度為1/15s，
改進功能有映相提高上代限制達ISO 1600，
可以用上最新4GB SDHC卡，
，display由2"增大到2.5" 180度顯示，
及可用USB叉電。
我就對呢部機仔就好有興趣，
希望行貨到港既時候唔會過三千啦！！
期待......。

Blueman

投資檢討

2006年11月3日
丙戌年九月十三
夜

〈電腦〉
我老Blue先前用緊既藍芽無線鍵盤，
早排因為操作不明之下用唔到？
仲打算呢排有時間帶去維修，
但係呢兩日好奇?返出來，奇跡地復活！？

〈理財〉
呢幾日放假自己無砌過任何模型。
原因係呢幾日夜晚用左好多時間作一個投資檢討。
自己作為一個小小散戶，資金亦都有限，
因為自己由入市開始明白投資涉及風險，
唔應該動用開飯錢去搏命！
亦因為咁自己一直用平常心去玩呢個遊戲，
可以用摸石頭過河既模式形容。
尋晚用左D時間總結左呢幾個月既成績，
到十月底為止，脹面係本金升幅有14巴仙，
自己作為一個散戶初哥已經好滿意囉！
不過，股海無涯，週不時要做定著定救生衣既心理準備。

暫時，我老Blue投資策略都係跟信報曹Sir提供既心得：
「抄股唔抄市」、「止蝕不止賺」。
至於近日大市升勢凌厲，
多項心水股紛紛破頂或高位，
靜待大市調整後，
留待步署入市。
等.............！
（呢個月希望唔駛著救生衣啦！）

Blueman

提款卡

2006年11月2日
丙戌年九月十二
夜

〈銀行〉
今日係我老Blue假期既第五日。

假期前一日，到銀行提款機提款既時候，
部櫃員機鬧我老Blue張提款卡有問題，
由於當時係夜晚，
唯有打電話去銀行了解下。
銀行查過我戶口無問題，
相信係卡上既磁帶有問題，
建議我做補發新卡手續，
不過，要等祗少四個工作天先到分行領取新卡，
?！咁我老Blue咪直係呢幾日要提款既話，
就要拿住本紅簿仔同一大班阿公阿婆排隊?錢駛......？
自從有左提款卡及網上理財之後，
我老Blue已經好少入銀行排隊囉！

對上個次都係今年夏天同家母攪佢個戶口先至排隊，
仲要足足排左九個字先到櫃位，
排隊期間發覺好多都係剛才所講以上左年紀既長者居多，
理由大家都明白！

亦因為咁樣，我今日去銀行補發張新卡先至有錢用！
好彩之前抽唔到工行，可以起投資戶口抽番Ｄ錢用下，
如果唔係下下都要去銀行排隊都幾頭痕下。

Blueman

第四日假期﹣攝影

2006年11月1日
丙戌年九月十一
夜

〈攝影〉
前晚，同屋企人出街食飯。
家妹知道我老Blue呢個禮拜放大假，
捉住我老Blue要同佢間新公司映product。

結果，今日成個下晝上左佢兩公婆間新公司映野，
由於佢地公司主力係代理木製傢俬，
件件都有番咁上下size，
移位、度位都幾花氣力下，
一口氣咁映左十幾件。
映完都覺得幾係野........。

〈動畫〉
亦都係因為自己放大假，
自己可以好放肆咁用左幾晚通宵咁煲劇。
而最新既係先前提過既新動畫﹣甲賀忍法帖。
全套共24集，節奏超明快，格鬥及忍法起過癮！
加上有血有慾，絕對成人適宜。
好耐未睇過咁成人既動畫囉！hehehehe.....

〈財經〉
今日中午恆指一度逼近萬五點高位！
究竟位高勢危定越上越有呢？
我已經無哂放向感囉。
但係自油價跌穿60美元之後，
中長線開始睇好航空及石化股。
至於自己好少玩短線，唔識玩？
呢排都多做多錯，少做唔會錯，
嚴守止蝕，見步行步吧了！

Blueman