E-System 隱藏大佬？

2007年6月30日
丁亥年五月十六
凌晨

〈相機〉
呢幾日上網見到O記最多人講嘅莫過於一份「意外」流出嘅E-1後繼機規格文件。
由於仍未得到官方證實，
加上文件源頭已經被删除，
攪到呢份Spec.疑幻疑真？
究竟係官方嘅宣傳技倆，還是有心人惡攪呢？

不過，我老Blue有幸睇到呢份文件內容，
全文有成28頁咁多，
兼且內容工整有序，又唔似係惡作劇喎？
因為28頁內容都花工夫同時間吓！
講返正題，文件所提到嘅E-1後繼機叫「EP-1」，
同傳聞「E-3」有出入？
至於自己最關心部機嘅Spec，
大至於下：
內置5級防震系統、
一千萬像Live MOS感應器，可達每秒五張速度、
多⻆度Live View LCD、
O記招牌菜﹣SSWF除塵系統、
防水滴機身、
內置無閃燈控制、
可使用SWD鏡頭、
11個全十字式對焦點、
AF可於-2EV@ISO100下操作、
機身快門可達1/8000，X=1/250、
觀景器除提供100%視野外，放大比更達至X1.15倍！
以上咁嘅Spec.睇嚟好實際，
絕對滿足我老Blue嘅要求！
不過，最奇怪嘅係呢份「文件」所提到呢部「EP-1」主要競爭對手竟然係N記D200及C記30D？
單係呢點，已經有網友質疑呢部「EP-1」並非傳說中嘅E-1後繼機，
而係O記一直講緊嘅中階機呢？
至於真正「大佬」應該會係E-3喎！
如果係又唔錯喎！
因為「文件」講主要對手係D200及30D，
換言之呢部EP-1即係同D200咁上下價錢而俾到咁嘅Spec，
咁就真係諗得過啦！

不過......點都好啦，
一切都等O記官方進一步發放最可靠嘅消息先再算？

Blueman

必先利其器

2007年6月25日
丁亥年五月十一
夜

〈工具〉
我老Blue斷斷續續用咗11日嘅時間，
終於將自己第17隻嘅MG模型-MSZ-010 ZZ GUNDAM素組完成，
呢隻MG對比我上隻MG老虎特裝型，
時間及心力上對用咗好多！！
原因係呢隻MG話哂係1999年出品（編號為MG No.24），
兼且呢隻係合體及可變型機種，
最可怕係呢亭早期MG夾口特別多，
砌起上嚟非常吃力。
其間為咗夾口問題，
買咗把專為模型套件而設嘅「水口剪鉗」，
可以輕易咁剪出平滑嘅「水口」；
另外，之於寬濶嘅夾口問題，
又買咗模型雜誌介紹嘅海綿沙磚，
專磨滑比較平濶夾口。
有咗呢樣新工具，
工序真係比平時快咗好多！！

Blueman

GUNDAM OO商品做勢

2007年6月24日
丁亥年五月初十
下午

〈玩具〉
先個輪我老Blue都有提過自GSD三年多之後，
今年十月終於有最新高達動畫-Gundam OO。
笨大為咗呢套新作，
連帶玩具亦優先推出，
務求好似Gundam Seed個陣先聲奪人，
引人談論煲起個市。

今次呢鋪Gundam OO推出嘅有關商品有：
FG 1/144、HCM Pro、Gundam Collection、HG、食玩及EMIA等多個系列。
其中以HCM Pro系列令我老Blue比較意外？
因為呢個系列一般會動畫行先，
如果角式受歡迎先至出商品。
今次笨大似乎對呢套OO好有信心咁，
動畫未出街，8月就出HCM Pro！

呢套Gundam OO掛得高達牌頭，
我老Blue點都會睇吓今次又乜野「花臣」可以玩？
初步從官方發佈出嚟嘅機體及設定，
覺得今次呢輯新高達OO系列，
外型及線條都幾現代化，
大河原嘅影子好似少咗好多，
尤其主角機GN-001個頭造型幾新穎，
可以話幾另類，
舊UC迷buy唔buy就見仁見智囉！
但係我就幾喜歡今次OO系嘅高達機設，
祇少擺脫咗有成廿幾年嘅大河原嘅風格，
Sunrise係時候俾啲新人上位啦！
暫時出咗四款GN系嘅高達設定，
唔知其他派系嘅機設會係點呢？
希望好快會睇到！

Blueman

都是渣古2.0惹的禍

2007年6月21日
丁亥年五月初七
凌晨

〈模型〉
自從MG模型MS-06F/S Zaku II Ver. 2.0推出後，
公司除咗我老Blue同資深模型迷﹣阿廖及工友S著迷之外，
世估唔到呢隻「紅渣2.0」引到另外兩位絕跡江湖嘅工友阿鬼及阿蟹復出模型界！
佢地不約而同咁買咗紅渣之後，
拿拿臨好快素組咗！
跟住好興奮咁不斷買唔同嘅高達模型，
而且越買越貴㖭。
好似阿鬼咁，最初叫我老Blue幫佢買盒模型俾佢仔玩，
誰不知自己買咗盒紅渣陪個仔一齊砌，砌完之後，
反而自己停唔到手？
跟住砌埋隻RX-78-2 Ka版，
再叫我幫佢刮下有無MG版沙煞比喎！
而家為咗盒沙煞比，
仲打算開始玩上色㖭.......！
至於阿蟹仲誇張，
砌完隻紅渣之後，
跟住就買咗盒價值18900日元嘅HY2M GS版1/60嘅大魔，
仲上網睇吓其他模型高手點樣改裝喎！！
投入程度比我初期玩返模型更加厲害.......。
呢兩位工友其實年紀都唔細，
同我老Blue一樣踏入中年，可以用「大叔」嚟稱呼囉！
但係見佢對砌模型嘅一番熱誠，
不下於年青人，
當講到砌模型嘅樂趣，個份起勁及熱熾嘅眼神，
同平時開工嘅神態截然不同，
有點不可思議？
各位喜愛模型嘅大叔，加油吧！

我都要努力快啲完成最新嘅MG模型-MSZ-010 ZZ GUNDAM囉.......。

Blueman

柯記新「腥耍」

2007年6月20日
丁亥年五月初六
早

〈相機〉
我老Blue一向都好喜歡睇「信得過報」，
其中有關科技嘅專欄內容亦好吸引。
就好似噚日「解碼」作者﹣狄高就介紹咗柯記研究緊一隻新概念嘅感光晶片CCD/CMOS，
聲稱可有效提昇晶片嘅感光度，
即係可大幅減低雜訊。
方法原來好簡單，就係一般傳統晶片通常用三原色（RGB）做濾波器，
每四枚pixel入面有一枚係紅色，一枚係藍色，另外兩枚係綠色。
但係柯記諗到四枚入面其中一枚唔落濾鏡，
即係等如一間房有四度窗，
其中三度落咗三原色嘅窗簾，
另一度無落窗簾令到多啲光入咗！
問題係技術點樣將四組訊號有效咁還原返出嚟咁解？
呢樣野似乎柯記已經做到！
詳情可到Kodak Delivers New CMOS Image Sensor 或瀏覧dpreview有關細節。
我老Blue從dpreview所提到呢粒「腥耍」的確可以做到高ISO、低雜訊而保留細節。
自己揀O記E-300主要原因都係佢用咗柯記「腥耍」，
唔知呢粒新「腥耍」O記會唔會用呢？
值得留意！

Blueman

好友、港股

2007年6月19日
丁亥年五月初五
夜

〈個人〉
是日端午節，我老Blue慶幸今日唔駛返工，
可以起同屋企人做節！

6月16日，相識多年嘅好友兼同事K5呢日係佢老哥起呢個部門最後一日，
跟住佢會轉投另一個部門，
展開佢工作新一頁，
在此祝願佢老哥事業順境、步步高昇！

〈港股〉
如果大家有留意新聞，都知道噚日香港股市創下多項新記錄，
包括恒指、國企、紅籌、港股市值、單日總成交及窩輪交易均創新高等等！
表面風光明湄，公司無玩股票嘅工友單睇新聞以為抄股票好易發達，
並唔了解家陣股市玩緊上落市，
資金流向可以做成一隻股票做成好大波動！！
唔做吓功課，莫講話賺唔到錢，
分分鐘死咗都唔知點解？
就如今日「生果日報」港聞所講，
雖然創下好多港股記錄，
但係另一邊廂，先個排抄到㷫烚烚嘅「蠔股」、「細價股」噚日情況剛好相反，
1306隻上市港股中，
居然有689隻（53%）係下跌，
真係有升到嘅只有426隻，
如果有朋友仲揸住一堆細嘢過節的話，
希望過咗今日，佢地聽日可以收復失地唔駛坐龍舟啦！
自己就噚日朝開市，
好努力咁花一輪功夫先平穩過度，執身彩贏少少，
如果後市趨勢繼續向上，希望再溝番少少入倉。

Blueman

初試「水轉印式」高達貼紙

2007年6月16日
丁亥年五月初二
夜

〈模型〉
今日我老Blue起屋企唔係砌模型，
而係玩模型貼紙。
因為跟模型嘅光面貼紙自己唔係咁喜歡，
另一款刮紙貼效果本來係最理想，
之但係我老Blue功力唔夠，
好多時刮到一岩一弗，
真係刮到無哂心機囉！

於是今日試下用笨大出嘅高達水印紙，
效果唔錯兼且好易用，
越貼越過癮！
雖然效果無刮紙咁完美，
但係勝在簡單易用，模型本身幾刁轉嘅位都可以好輕易貼上，
比起黏性極高又難控制嘅刮紙，
可以用「爽」字嚟形容！
唯一美中係想要更理想效果，
一定要用水印字膠水（Mr.Color Mark Setter）做定位，
待乾後再掃／噴上消光劑，
水印紙邊位無咁顯眼比較自然。
貼完之後模型本身加強咗好多資訊性，
提高咗唔少「真實感」！
似乎玩MG又多樣駛費囉..........。 :(


Blueman

第16個MG-老虎特裝型完成

2007年6月15日
丁亥年五月初一
夜

〈模型〉
今日我老Blue放假，
匿起屋企砌模型。
終於完成咗第16隻MG﹣MS-07B-3 Gouf Custom「老虎特裝型」，
呢隻MG都差唔多用咗我成個月時間攪掂，
由於模型屬於2001年設計，
製作上仲有少部份夾口須要打磨。
完成之後覺得隻左手掛咗機關槍盾牌，
有啲唔平衡咁....。

不過，有成半年無砌模型，
砌完之後滿足感好大！
跟住自己亦會順著出產年份，
下一隻會砌嘅MG係MSZ-010 ZZ Gundam。

Blueman

Leopard 10.5+iPhone

2007年6月15日
丁亥年五月初一
凌晨

〈電腦〉
前幾日美國一年一度嘅WWDC蘋果全球開發商大會結束。
我老Blue上官網睇到版面亦都革新咗、簡潔咗！
當中大力咁宣傳十月將會面世嘅OS-X 10.5Leopard嘅重點功能，
睇完佢嘅DEMO覺得係比10.4嘅介面有好大轉變，
尤其係全新嘅Finder介面及Desktop大更新，
俾我感覺呢個OS-X將原有嘅優點混合咗其下iTunes加iPhone嘅操作，
共冶一爐，好Cool！！
不過，咁型嘅介面我相信要付出更新硬件上嘅代價啊！
唔知iPhone香港幾時會有得賣呢？
新嘅OS-X配新Mac機加上iPhone，
呢個組合係我老Blue今年最期待嘅玩具啊！

至於DSLR.....，
O記嘅頂級機E-X我已經唔會太期望囉，
出到至算啦！

Blueman

初嘗GSI超級金屬油

＊＊天氣時晴時雨，除了返工放工不方便外，模型上色亦要花點耐性啊＊＊


＊＊美國ALC金屬油及Mr.Color超級金屬油＊＊


＊＊日系Mr.Color金屬油效果＊＊


2007年6月10日
丁亥年四月廿五
夜

〈模型〉
正當噚日我老Blue準備為隻MG「老虎特裝型」上金屬色嘅時候，
發覺自己嘅「顔料庫」入面用開嘅美國ALC金屬油，
某隻黑鐵色將近沽清，
於是諗住跑落「旺地」買啦！
誰不知去開嗰兩間模型鋪都話呢隻ALC好耐無嚟貨啦，
亦都唔知幾時會再返貨囉......。

就係咁退而求其次，
今日買咗GSI-Mr.Color（前稱「郡氏」）一隻號稱超強金屬質感嘅「SUPER METALLIC」，
至於價錢就比用開美國ALC平一半。
試過之後覺得粒子無ALC咁幼細，
金屬質感亦無ALC咁強，
但係相對之下已經好接近我老Blue嘅要求，
更何況價錢比ALC平一半，
兼且Mr.Color長期有大貨供應，
不愁無「油」用。
唯獨是呢隻Mr.Color金屬油一定要用番佢嘅專用開油水，
無ALC搖勻之後，就咁倒入噴筆即用咁方便，
唯有多啲時間習慣吓。

Blueman

出出入入

2007年6月8日
丁亥年四月廿三
下午

〈模型〉
呢排我老Blue有時間除咗砌返模型外，
由於自己開咗個「迷利倉」，
又買多咗模型嘞！
不過，就要走入倉嘅時間就會頻密咗囉，
入咗啲新模型，出返啲舊模型拎返一、兩盒舊模型返屋砌。
好彩個倉離屋企唔算太遠，幾方便吖！

〈工作〉
近排公司有好多相識多年嘅同事相繼離開，
但同時亦有好多新同事加入，
呢班新同事有一個共同點，
就係年青力壯。
腐水不流，新舊交替為公司帶來一番新氣象。

〈股市〉
呢排天氣陰晴不定，
一時曬死狗，一時落水狗，出街都好唔暢快。
股市亦一樣，自年頭恆指由高位回落到今日，
長期維持上落市格局，股價個別發展，
好多朋友呢半年，經常起股海出出入入；
成績上上落落。
自己就揸咗少量貨，賬面算叫做有少少升幅，
但係對後市就無乜期望喎？

呢半年自己覺得生活各方面都好平穩吓，
都唔知好事定壞事囉？

Blueman

2007年再度開氣泵

2007年6月5日
丁亥年四月二十
下午

〈模型〉
今日返晏，
我老Blue見有時間，
先個幾日隻MG版「老虎特裝型」噴完「地灰」都乾得七七八八，
所以好早起咗身開始呢一年第一次噴模型。
雖然好似太耐無開過氣泵噴模型，
但係操控好彩無生疏到。

睇返個Blog，原來自己應該起05年底十月左右開始玩模型，
仲記得當時同朋友講開始玩模型買噴筆、氣泵呢啲架生嘅時候，
有朋友用驚訝嘅表情同我老Blue講：「老Blue，依家先學人玩模型，
駛唔駛咁重本咁快買咁多家生呀？
因住玩兩玩又丟埋一二邊喎！」
當時聽完都幾驚自己三分鐘熱度.....。
但係唔知點解？
自己越玩越投入，
呢一兩年都未斷過呢個興趣，
自己都有啲驚......。

另外，上網終於見到MG no.99嘅「紅勇士」Ver. 2.0嘅官圖嘞！
的確比第一代細緻及完成度高好多，
又一必入嘅MG模型。

Blueman

新一輯高達動畫Double O

2007年6月4日
丁亥年四月十九
凌晨

〈動畫〉
上網好奇咁睇到有網友講今年10月將會有新一輯以高達牌頭嘅動畫。
叫做「Mobile Suite Gundam OO」，
亦睇到有心人放上網嘅宣傳片，
個O字係英文，官方讀法為"Double O“喎！

我老Blue睇完之後，
除咗知道係掛住Gundam個牌頭之外，
報稱同以往嘅高達無任何關係喎！
故事空間設定為現實時空AD2037，
換句話說一定唔係乜乜UC系或CE係啦！
至於幕後班底，
未經官方證實會有首次為高達系列做監督嘅水島精二，
邊個係水島？之唔係動畫「鋼之煉金術師」做監督個位仁兄囉，
至於劇本傳會由黑田洋介編寫，
呢位黑田先生我老Blue就唔係好識佢，
睇番資料淨係識佢寫過「無限之rivaya」。
就咁睇呢個組合都會幾特別，
如果係真的話，
意味著早輪個套Seed系監督福田氏夫婦唔得Sunrise重用，
咁又難怪嘅，本來Seed好好地，
去到續篇GSD劇情好似失控咁，
其實都幾驚開第三集㗎.....。
話哂高達都叫名牌機械人連續劇，
每套都閒閒地有成四、五十集，
屬重本制作嘛！
SEED之前都唔少瀨過嘢㗎啦.....。
希望呢套新高達會俾我有小小驚喜啦！

不過，現階段得個名，
要等遲啲官方多啲資料再作評論。

Blueman

P記變天

＊＊Asahi Pentax 50th anniversary DSLR＊＊


2007年6月3日
丁亥年四月十八
下午

〈相機〉
一眾O記粉絲期待以久嘅新DSLR E-510終於出街。
之前有網友講本港O記同「瘋宅」攪「鋪霉」，
Kit Sets一機一鏡買七千有找，
相信細鋪會出價比佢低。

上網亦見都好多心急人買咗，
初步見該機成像及質素同E-410相近，
最大賣點係加入「防手震系統」，
成為入門機種首部擁有「除塵」、「Live View」及「防手震」集一身。
但係有網友對「樂聲」粒「腥耍」有微言，
亦對機背LCD比上一代差喎？
見仁見智囉！

講完O記，之前我老Blue亦都起個Blog到提過有關P記嘅新聞，
因P記同Hoya攪合拼而鬧不和，
終於有咗定案，就係Hoya最後用105萬億日元收購P記，
同時派出專員﹣谷島信彰做代表取締役社長入主P記，
而P記原有嘅社長﹣綿貫宜司會起平成年6月27日走人。
H記仲話接咗P記之後，
集中發展中、下檔位嘅數碼產品，
咁乜乜645D或頂級DSLR咪即係無行？
唔怪得有一眾P記友唱淡P記無前途囉！
不過，奇就奇在前個幾日dpreview.com出咗相係P記最新概念機，
叫「AP 50th 紀念版」（查實係K10D嘅尖頂改版），
唔知同P記俾人收購有無關係呢？
據稱呢部機係出比人睇，唔會賣喎？

照牌面家陣DSLR市場又少咗個競爭對手嘞，
唔怪得早排5月9日，
日本O記記招上面，社長大保久豪情壯語咁講話O記計劃要打入DSLR市場三甲之內，
當時睇到呢段料覺得大保久會唔會講大咗呀？
而家睇番形勢又唔係無可能喎？
陰謀論估唔通大保久一早收到風知道H記會出手？
點到好，O記如繼續保持研發及做好推廣的話，
入三甲真係唔難,
睇嚟N記及C記唔好睇少呢個黑馬囉！

Blueman

掃貨

＊＊近日進行中的MG版「老虎特裝型」＊＊


＊＊一口氣入咗三盒「紅渣」＊＊


2007年6月2日
丁亥年四月十七
下午

〈模型〉
呢排我老Blue仍然砌緊隻MG版「老虎特裝型」，
家陣素組完成，只欠武器未攪掂。
希望呢個月可以完成哂，
影俾大家睇吓啦！

雖然自己砌模型嘅時間呢排因工作關係，
完成進度大幅下降，
不過，模型購買度則大幅上升喎，弊！
無他嘅自從開咗個迷利倉之後，
入貨有肆無恐咁買模型嘛，哈哈！
除咗自己入貨之外，
亦同好多工友「辦貨」㖭。
因為一直以來自己有間相熟玩具鋪嘅關係，
可以入到好多「靚價」模型。
就好似最近好Hit嘅MG版「紅彗星」MS-06S VER 2.0，
行過樓下玩具鋪，見到老細返貨，
返到公司即刻問有無工友入唔入貨？
由於知道呢隻「紅渣」風頭好勁，
罕有咁要打電話問價留貨，
好彩有打電話留咗三盒貨，
最後落到鋪頭老細話散剩四盒咋。
佢又話呢水已經係第二水，
仲話頭水唔駛一日去哂貨咁誇喎（自己則半信半疑....）。
不過，唔知真係多人玩返模型還是呢隻「紅渣」太勁？
攪到連買玩具都要搶貨咁厲害！！

跟住第二日，好高興咁拎啲模型分俾兩位工友阿廖及阿S，
居然同場有位識咗好耐，
但係唔知佢原來有玩開模型嘅工友蟹，
佢都有入貨，不過佢起其他模型鋪比我入嘅價位高咗10個巴仙咁多！！
難怪相熟老細個價關係可以去貨去得咁快囉。

亦因為呢個原因，呢幾日陸續幫工友刮其他貨，
一來可以幫工友，二來入貨多咗，老細自然開到個「靚價」俾我嘛！
可樂而不為。
不過，從中睇到唔同年紀有唔同喜好嘅「高達」？
工友阿廖年紀比較大，獨沽一味鐘情「一年戰爭 0079」個期，
最近同佢老哥入咗盒1/60著燈「老虎」，不知幾咁高興！！
工友阿S，年紀同我老Blue相近，
但口味就幾濫吓，除咗元組高達個期之外，
居然叫我幫佢刮隻Gundam Seed Destiny入面嘅1/100 「曉．高達」！
工友阿鬼就廿四孝老豆，話佢仔鐘意Gundam Seed個期，
好明顯新一代好接受Seed系列；
至於工友T則淨玩高達完成品﹣HCM Pro系列，
佢比我年輕少少，
比較喜歡後期UC嘅「馬莎之反擊」及「MS08小隊」設計。
但係最近呢位老友，
見我老Blue玩MG咁過癮，
成日問幾時幫佢砌番隻MG喎，
仲話素組齍上墨線就夠，
呢個要求對我來講反而有啲難度....。
因為，自己都唔得閒砌嘛！

至於自己就站起模型玩家立場，
無限制邊一期高達，齍玩MG版，
只要件模型型出得正就會買，
其實都幾濫吓......hehehe。

今日放假，又俾我老Blue執到件MG-Gundam GP03S！

Blueman