K66 MK-II 大合體

2007年8月28日
丁亥年七月十六
上午

〈模型〉
我老Blue呢排攪緊嘅“格納庫擴展計劃“因時間問題，
仍然停滯不前，
手上一盒MG都未郁過......。
不過，仍不忘戒砌唔戒買嘅壞習慣，
最近除咗留意有乜新MG出之外，
另一個比較特別嘅系列-Keroro模型系列，
我老Blue都好留意。
原因係今次K66最新嘅K66 Robo Mk-II的確出得好過癮，
比上次Mk-I更精緻更多嘢玩，
除咗原有設計可「載人」活動外，
更加入獨立變形元素。
起初單出Keroro Mk-II個陣，
自己幾乎有入貨嘅衝動，
及後攞上手見到個盒附圖寫住“Secret Mode“咁攪嘢？
心諗唔通五隻可以玩大合體，
隨即放返底無入到！
跟住上網睇到有網友亦都有講到呢系列係可以玩大合體！
直到近日，得到官方證實出咗張大合體設計圖，
嘩！好過癮吓喎，
除咗各自可以變形之外，
五機合體之後，K66小隊成員仲可以坐番落去，
好盞鬼吓姐！
呢排上網好多玩家同我一樣都好期待K66 Robo Mk-II快啲出Boxset，
根據上次Mk-I Boxset有跟到紙皮式樣嘅格納庫，
唔知今水Mk-II會唔會俾玩家一個驚喜，
出膠版K66格納庫呢？

Blueman

Nikon強勢反擊

2007年8月23日
丁亥年七月十一（處暑）
夜

〈相機〉
相信今日好多相機迷「聞」到相機界又將會有一場腥風血雨。
因為繼8月20日，
CANON宣佈推出兩款新機-EOS 1Ds Mark-III及EOS 40D後，
今日NIKON終於向多年宿敵作出反擊，
推出傳聞已久嘅「全片幅」D3及規格大幅提升嘅D300，
雙方由SLR年代步入DSLR年代，
今次可謂第三回合決戰，
以我作為O記人，覺得以機論機，技術上一向都係C記一直佔優，
尤其C記1系更係DSLR技術指標，
但係N記亦唔省油的燈，
痛定思痛終於有突破，
除咗破格推出N記粉絲可以同C記平起平坐嘅「全片幅」DSLR外，
更要將D3打做成起價格及規格上完全擊倒對手嘅「殺手級機種」，
而D300更將規格提升到現有D2級水平，
但價格比D200初出仲要平（一線級數二線價錢）！
相信大家從dpreview略知四部新機規格如何？
我老Blue睇完之後，
真係好替O記汗顏，
佢部攪咗好X耐嘅E-1p會唔會因為N記及C記嘅新機出現，
遲遲未能向外公佈？
如果E-1P真係傳聞咁嘅Spec.嘅話，
真係唔知要賣幾多錢囉？
或者悲觀咁諗仲有幾多O記粉絲留底呢？
E-1p嘅對手係同級嘅N記D300（預計萬三、四）及C記40D（預計會平賣八、九千），
再加上O記強調嘅強項：除塵、LiveView及機身防震，
N記及C記陸續會成為日後新機標準，
兼且人地仲加埋唔同DOF(crop factor)陣線，
14bit color運算，
幾廿點AF對焦點，
甚至乎N記已經玩到iso23000，
我玩相機咁耐從來無諗過推iso可以過萬咁誇！
O記相信今後出機更大難度，
其他如P記、S記及富記今後會以「全片幅」為頂級機目標至得，
可見嚟緊一年，
勢必掀起一眾相機迷換機熱潮囉！
至於我老Blue都會因為N記咁出機法，
開始有25之心..........。

Blueman

鑽石山Gundam Expo一遊

2007年8月22日
丁亥年七月初十
夜

〈模型〉
相信好多GUNPLA 迷（高達模型簡稱）都知道呢排有個Gunpla Expo 2007首次喺香港展出，
地點係鑽石山荷里活廣場，
我老Blue當然唔會錯過啦！
噚日趁有時間，走咗過去行咗轉。
其實之前類似咁嘅場展，
以往主辨單位都攪過無數次，除咗力銷模型外，
場內展品平平無奇，無乜吸引.....。
不過，今次令我好有興趣去嘅原因係今次以Gunpla Expo為主題，
場內設計跟足日本攪嘅差唔多，
有好多展品更由日本運過嚟擺，
成個場展分為攝影作品區、新品區、MG區、產品制作區及Gunpla歷史區五個主題，
起初以為閒日會無咁多人啦，
誰不知晏晝三點幾依然人頭湧湧，
可能仲係暑假關係，好多都係一家大細嚟入場啩？
當中最吸引我嘅係關於靜岡工場嘅介紹，
有員工制服及古今工模展示，相當罕見！
另外高達模型歷史展示，
由1981到今年2007展示咗唔同年代嘅高達模型嘅演進，
令我感覺笨大起模型開發技術成功並唔簡單。
不過，最令場內觀眾吸引嘅都算係MG1~100號砌哂出嚟，
擺哂入一幅有燈箱嘅牆入面，
相當壯觀，吸引到好多粉絲縭埋去睇同埋映相，
我老Blue見到呢幅牆，
心諗如果可以咁擺就太好囉！！！
行咗個幾鐘，感覺呢次Gunpla Expo攪得唔錯，
不過，若然請到本地或日本嘅模型高手展出更多模型作品，
我諗可觀性可以再提高，
希望主辦單位，下年可以諗諗。
同埋自己亦都映咗啲相，
不過暫時仲未有時間上載上我嘅相簿入面，
希望過多兩日可以俾大家睇啦！

Blueman

一鳴驚人之後

2007年8月20日
丁亥年七月初八
早上

〈音樂〉
自去年一首國內劇「神鵰俠侶」主題曲「天下無雙」，
認識國內新星﹣張靚穎，
跟住期待呢位新星首張個人CD-THE ONE，
聽過之後相當有驚喜！

一年之後，佢第二張個人專輯-UPDATE* JANE張靚穎面市。
呢幾日我老Blue聽咗好幾次，
感覺佢嘅歌藝比上一次更成熟更圓渾，
今次全隻CD全部為中文新曲，
上次英文歌佔咗三分一。
新CD主打歌我們說好的亦係國內新劇“新上海灘“主題曲，有興趣嘅朋友可Click入聽聽！
除咗張靚穎之外，
其實國內最近亦因為新星比賽冒起咗唔少優質女聲，
值得留意國內樂壇嘅流行音樂。

Blueman

8．17大時代日

2007年8月19日
丁亥年七月初七
夜

〈股市〉
相信好多香港股民好似我老Blue咁，
「有幸」經歷上個星期五香港股市嘅「大時代」日子。
開市由20761暴跌到下午開市40分鐘後最低位19386，
足足有成千二點咁離譜，
跟住又可以短短一個鐘頭之內急升返千一點，
收市報20387，
全日下跌285點，但時日波幅有成千三點，
完全係電視劇「大時代」嘅劇情，現實出現咗！
呢次美國次按加上日圓利差交易效應下，
唔知有幾多股民損手或坐艇？
我老Blue此等小股民亦唔例外，
賬面亦蒸發咗唔少！
不過，可能早前訂下嘅項目好多係中、長線發展，
未因呢次跌市而改變策略，
除非後市有比現況更差嘅消息或基本因素轉變另計。
其實個市由七月尾高位二萬三跌落現水平二萬邊，
足足有成三千點咁多，
身邊有好多朋友對後市意見不一，
有好有淡，而觀望亦佔唔少。
相信唔少朋友經歷過呢期大時代日子，
喺投資策略上面可能會有另一番體會。

Blueman

苟延殘喘的手電

2007年8月12日
丁亥年六月三十
夜

〈手電〉
自從得知Apple推出iPhone到美國開賣後，
儘管最近有關於呢部人氣手電嘅負面新聞，
包括電池問題等等。
無損我老Blue渴望香港行貨出現嘅心情！
雖然知道亞洲區包括香港最快出年先至有，
不幸嘅係自己部手電開始發生「自行關機」 非經常性發脾氣，
儘管自己有「恆心」可以捱到iPhone行貨到港，
但係唔知用緊嘅手機SE K700i（呢部可能會俾香港潮人視為古董嘅手電款式）有無咁嘅脾性捱落去。
於是打算先買多舊Spare電傍身，
如果部「古董」真係出問題，
唯有侷住買部cheap cheap SE機算數。
誰不知呢兩日出旺地菜街行勻哂，
間間賣正貨嘅鋪頭都話無呢隻原裝電賣囉喎！
咁弊！咪算.....！
由於自己揀手電嘅要求係祇少要同部Mac機可以做iSync，
上Apple官網睇吓有乜時下平嘅SE機啱駛？
睇完之後今日收工再落旺地各大鋪，
發覺iSync用到嘅機款已經好多款唔再賣，
因為SE出咗好新款手電，
亦話者係香港人換新手電快過換季？
最弊嘅係個listing好幾個月無update到，
唔通同Apple出iPhone有關係？
所以好多新手電唔會再為iSync更新listing咁毒？
最後，我老Blue行過腦場，
見到我部「古董」嘅代電賣！
希望呢舊電可以捱到iPhone到港啦。
（查實部手電有問題同舊電池有無關係仲未知............?）

Blueman

0118+E1承繼者

2007年8月11日
丁亥年六月廿九
夜

〈電影〉
早前上Apple.com見到一套新預告片，
奇怪嘅係呢套片只有公映日期﹣01-18-2008，
從預告片內容估計應該係科幻動作片，
好奇上網睇吓原來已經好多網友講緊呢套咁奇嘅電影。
只係知道導演係J.J. Abrams，
拍過電視劇「Lost」，
估唔到連宣傳都攪到「迷」一樣......？

〈相機〉
一眾O記粉絲（包括我老Blue在內）引頸待嘅E-1後繼機，
至今仍未有公佈推出日期、價格及規格資料，
不過起官方宣傳網站Pure Digital DNA入面，
內容更生到第5~8集-Flatship Qaility，
講解咗最新E-1後繼機嘅設計概念，
亦都見到O記其下產品設計戰略分組Seinor Supervisor-Yasuo Funakoshi攞起張去年年尾嘅平面設計圖，
外型同公開嘅Mock-up差唔多，
感覺好實在又傳統。
但係部機講到點勁都無用，
因為最核心嘅影像系統現階段官網仲未公佈，
呢個部份能否吸引O記粉絲去留將會成為最重要關鍵。
新機嘅Sensor可唔以可超越上一代E-1Kodak芯呢？
希望會好似傳聞講下個月會揭撓！

Blueman

新款iMac極薄登場

2007年8月8日
丁亥年六月廿六（立秋）
下午

〈電腦〉
早前從網上知道今日Mac將會發表新產品，
於是今朝一起身開機上官網睇吓有乜發表？
正如傳言今次Mac終於推出新一代iMac及為Mac Mini改款。
睇完新iMac之後，覺得好X型、好Q薄，
幾乎對比番屋企個20" Apple cinema display厚度差唔多，
但係成部腦真係得個「芒」咁大咋，
兼且物料亦由塑膠轉做鋁合金機身，
成部腦感覺高級咗好多咁！
至於型式同上一代一樣，
其他底板及硬件就收哂響下面3~4寸位左近。
呢部新薄iMac最吸引除咗外型之外，
用上ATi Radeon HD 2000系顯示卡，
及新加入光面螢幕，官方稱有效提高色彩濃度及深度喎，
呢樣嘢要眼見為實先可以作準。
新款iMac提供20"及24"兩種規格，
規格為20" Intel Core 2 Duo 2.0GHz、2.4GHz及24" 2.4GHz、2.8GHz四款，
如果屋企有位兼有「筆直」梗係首選24"啦！

同時除咗iMac有改樣之外，
Keyboard都有大革新，
出咗個一樣超薄鋁合金keyboard，
打唔打得就唔知？
但係一定型爆過市面咁多款大牌子嘅keyboard嘞！
不過呢款超薄Keyborad分有線及無線，
無線個款唔知係咪為做得更細嘅關係，
反而Cut咗傳統右手面嘅數字鍵？
加上我老Blue用過佢嘅上一代嘅「藍芽」無線Keyboard，
感覺麻麻地，有少少戒心興趣一般。

原本我老Blue打算今年upgrade部Mac mini就算，
加上新版Mini除咗提高咗粒CPU外，display無乜提昇，
家陣睇完新iMac對比過之後，
對薄iMac開始都有啲心動......。
等佢第三季出埋10.5跟機諗諗佢先！

Blueman

M.S.倉庫初成

2007年8月7日
丁亥年六月廿五
下午

〈倉庫〉
我老Blue自年頭講咗好耐嘅「M.S.倉庫」，
隨著「壽屋」出咗「M.S.G.格納庫」之後，
計劃亦有所改變....。
由「自行創建」改為「原身擴建」，
完成時間加快咗好多好多。
用咗個幾禮拜，終於完成呢個倉庫嘅外形，
依家見圖係總面積三分一，
如果砌埋估計可以放三至四個MG落去。
現階段除咗跟埋啲手尾外，
仲諗緊好唔好做埋另外一面牆同埋個倉頂......。

Blueman

綠色惡夢來臨

2007年8月3日
丁亥年六月廿一
下午

〈稅務〉
前晚，我老Blue收工返屋企，
赫然發現檯面擺咗自己最唔想見嘅綠信封起面前.....。
稅務局可以講話香港政府最高效率嘅部門，
前後個幾月，報完稅無耐咁快就出信俾人，如果其他部門都好似稅局咁，
咁就係香港市民之福囉！
經過今年稅制有「限度」調整之後，
計埋所謂「下年度預繳」，
今年我老Blue仍要交一個月入息嘅三成幾俾政府。
幅度上並未構成壓力，仲有半年時間準備，
萬幸！
不過，公司有啲工友上年度都幾搏命O.T.，
睇怕今個年度要有準備迎接呢個「綠色惡夢」囉！！

Blueman