MG 骷髏高達X-1

2006年9月30日
丙戌年八月初九
傍晚

〈模型〉
今日我老Blue放假。
當然又係訓到黃朝八晏啦！
由午餐轉做茶餐，順道去下模型鋪兼買D模型油，
亦見到有新MG﹣骷髏高達出左！
去開「三星」問有無美國貨既金屬油？
佢就介紹我老Blue去「肥蛙蛙」間新鋪睇下喎！
肥蛙蛙間新鋪起旺角中旅社對面上二樓，
不過，上到去見到肥蛙佢老人家起到set-up緊，
佢仲話要過多兩禮拜先至攪掂喎，唯有過多一排先至再去囉！

緊住返屋企附近間玩具鋪行下，
見到玩具鋪老細何生好忙，
原來剛巧有貨返兼禮拜六，特別多客。
佢見我就劈頭第一句話係咪要盒骷髏高達？
係！不過唔駛咁急下？
佢話唔急架啦！仲話我咁遲先買貨。
?！剛剛先見老細你返貨仲話遲？佢話我見到呢水已經係第二水貨啦！
第一水先個兩日已經俾客掃埋。
下！！佢仲話呢水仲要留幾盒俾呢熟客留哂咁誇張。
咁有心買無理由唔要貨架？

其實呢類玩具大致上分上色（合金魂或上色Figure）及不同比例既未上色模型兩種。
前者因質料及已上色關係，
一向都好受玩家歡迎，但係價錢比較貴。
後者模型雖然平，
但係同一盒模型經唔同人砌，砌出來效果可以相差好遠。
可以話係講求技術及心機，
所以好多朋友砌模型，砌砌下就無乜心機，
唔再繼續玩落去.....。（我老Blue之前亦有提過有兩位朋友咁樣quit左）
砌模型往往比人感覺係少眾玩意！

所以今次繼上次MG-Z高達及強人搶貨熱潮後，
今次MG骷髏高達亦有搶貨效應，
我老Blue諗唔通砌模型有復興跡像？
有待觀察。

〈影視〉
我老Blue好欣賞既日劇「女王的教室」，
無記播放已經接近尾聲，
聽晚就係大結局。
呢套戲除左俾D細佬睇之外，
其實當中意思亦都好適合成年人。

Blueman

新噴筆

2006年9月27日
丙戌年八月初六
夜

〈模型〉
踏入農曆八月，日頭日晚天氣明顯涼左。
前幾日我老Blue為隻MG-GP01噴油，
發覺「窄窄地」，點解枝筆出氣弱左咁多？
心知不妙，應該係上次用完，洗筆唔夠徹底，結果塞塞地，
最後，落左旺角買過枝新既0.3mm既國貨噴筆。
都只不過三舊水唔駛！

其實除左呢個原因之外，
上一枝0.2mm國貨噴筆其實個咀太幼，
噴一D比較大既部件好多範圍唔夠?，噴得好吃力。
用左枝新噴筆，加上口徑大左，
爽快左好多，時間上慳左唔少！
呢兩晚用左三幾個鐘已經噴哂隻GP01所有部件，
成績唔錯！
希望呢次呢枝新噴筆唔好咁快打柴啦。

有工友﹣嘉良從我相簿得知我老Blue有砌開高達模型，
而呢位工友亦都係高達粉絲，
但係呢位大佬已經無砌模型好耐，
無乜心機再砌，但係同好多朋友一樣，
都好想擺番一、兩件模型起屋企做擺設。
起公司見親我都問我老Blue幾時有時間幫佢老哥砌番隻，
就算收錢都值得喎！
聽完乜咁抬舉我呀！！
我都好想幫佢砌隻，
不過無奈砌一隻MG大大話話都花我老Blue好幾工作天。
只能勸佢自己試下砌一隻玩下先，
再唔得先至找我老Blue啦！！

＊＊註：（自己其實都仲有成十幾廿盒MG都未砌啊........。）

Blueman

Photokina 2006開幕

2006年9月26日
丙戌年八月初五
夜

〈相機〉
Photokina 2006今日正式開幕。
近呢個月各大小相機品牌都會趁呢個展覽公佈其下新產品，
基本上好多相機發燒友（包括自己在內）都密切注視。
自從數碼相機普及以來，
的確多左好多朋友玩番相機或重抱投攝影。

講番今屆Photokina，
各品牌宣佈左好多部DSLR，
包括：Canon EOS 400D、
Fujifilm FinePix S5 Pro、
Leica M8 （嚴格上來講呢部算係Digital Rangerfinder）、
Nikon D80、
Olympus E-400、
Pentax K10D、
Samsung GX-10（即係賓記K10D既韓國版）、
Sigma SD14。
部份機種如Nikon D80及Canon 400D亦以「偷步」上市，
對我老Blue來講有驚喜有失望，
先講失望係O記得部E-400，傳聞中既E-1後繼機無任何消息，
驚喜係賓記部K10D及富士既S5 Pro都好吸引。
當中以賓記部K10D我睇完個Spec.都好有興趣出手，
不過留待相機測試及稍後既用家報告先再決定！

Blueman

創業、開業、守業

2006年9月22日
丙戌年八月初一
夜

〈創業〉
每個人對自己既前途及事業有唔同既心態及觀點。
前日起個Blog到提過工友﹣阿神計劃年底會離開香港去泰國發展，
尋晚，有機會拍佢老哥返通宵，
好奇問佢泰國政變有無影響佢原有計劃？
佢答話：無！
跟住佢大概咁講左佢去泰國既發展路線圖俾我老Blue聽。
我聽完無表示任何意見，
只係作為朋友精神上支持！
因為創業係需要好大勇氣，
自己自問未有呢份勇氣豁出去。
Anyway，真心希望佢老哥創業成功！

〈開業〉
今晚，我老Blue家妺兩公婆返屋企食飯。
佢地派左佢地既新咭片俾我老Blue，
原來佢地自組新公司，
仲打算擇日開張。
但係家母屬傳統、保守婦女個隻，
聽到反而不喜反憂。
我老Blue從來唔擔心我細妹既能力，
一向膽大心細既佢，相信問題不大。

〈守業〉
自己好耐無買過模型，
今日走左落去樓下間玩具鋪，
買左盒MG-MS06F-2 ZAKU II。
其間，同玩具鋪老細何生吹水，
由於何生間玩具鋪係子承父業，
（細細個已經同佢老豆買玩具，今日又同佢買玩具﹣宿命？）
之前佢原來都係打工，
仲係好多年前起我老Blue同一間公司工作。
屋村入面由多年前四間玩具鋪，到今日只剩底兩間，
由於何生交際手腕比較圓滑，鐘意同客人蘇蘇，
所以keep到好多我呢亭熟客，
除左同佢講下玩具外，
有時話題都離唔開講下女人、時事或者講下生意經咁！

我住緊既屋村屬老屋村，
大大話都有成三幾十年村齡，
今日佢就同我老Blue講今個年頭做玩具零售好鬼惡做。
佢仲話家陣個市好多鋪頂爛市，
又擔心舊租約到期，
唔知新租約幾時會加幾多喎？
講下講下仲話早知唔鬼離開舊公司，
打工穩穩定定，祇少每個禮拜有兩日假放下，
好過家陣每日都要睇住間鋪唔敢休息咁話喎！！

我老Blue自問無闖業精神，
因為的確要有無比勇氣及堅忍毅力先決條件。
反而自己今年開始將每個月既一部份薪金作投資比較適合自己，
祇少若然投資失利都有仲份工保住生活。
每個人生活都有唔同態度及原則。

不過，最令我老Blue反感係有D人既無膽又妒忌身邊朋友成功，
呢D人通常有個通病：工作唔積極，成日埋怨公司唔公平；
性格保守兼怕死，但又貪小便宜；
往往見到身邊朋友進取，先而潑冷水，繼而學是非；
而且佢地對投資無慨念，經常將投機（賭搏）、投資混合一談，膚淺得要命！！
以前我老Blue都係上述呢種人，
不過，自己開始明白咁樣係唔通，續漸戒左以上呢D壞習慣！
開始爬出井口....。
但係上述呢亭人梗有一、兩個起每間公司存在。
佢地仍然留起個井入面，
日日埋怨自己無運.......。

Blueman

Pentax公佈2007鏡頭路線圖

2006年9月21日
丙戌年閏七月廿九
夜

〈財經〉
尋晚我老Blue返通宵，
今日傍晚先至訓醒，
一起身上網睇到兩個好消息，
其一係今日本港恆指創六年來新高，全日收17619，
但係大市仍然個別發展，恆指成份股18隻升、14隻跌、1隻無升跌。
好彩自己投資項目賬面亦見少許進賬，
不過，唔知踏入十月份會唔會見頂回落，唔敢抱咁大期望。
見步行步。

〈相機〉
另一個好消息係今日Pentax賓記公佈左2007鏡頭發展路線圖。
預定出年會一口氣推出9枝鏡頭，
當中最令我老Blue高興係推出DA*系列（16~50mm F2.8、50~135mm F2.8及80~250mm F4），
相信係取代菲林時代既FA*系列。
不過自己對佢個3枝Pencake鏡（21mm/40mm/70mm）興趣最大！
觀乎網友態度，賓記形勢一片大好，
出年就睇下賓記曉?石曉把握時機。
繼K100D、K10D，
會唔推出頂級機K1D及超低檔機K1000D加強機種整合性呢？
但係我老Blue對Pentax前景非常樂觀。
期待K10D快D到貨。

Blueman

台灣開花、泰國政變

2006年9月20日
丙戌年閏七月廿八
夜

〈時事〉
今日起身見電視報導有關泰國突然發動軍事政變。
暫時未有人命損失。
呢次泰國事件局勢會發展成點？我老Blue真係無頭緒。
不過，呢件事就唔多唔少會影響台灣局勢！
希望兩個地方既事件唔會演變嚴重既流血衝突啦。
公司有工友﹣阿神，渴望另創新天地，
有提過會今年底會離開香港，
勇闖泰國發展新事業，
但係經過今日既事，希望阿神會作出更佳既步署計劃啦！

〈模型〉
今晚我老Blue返通宵，
晏晝有時間完成左隻MG-GP01既噴灰程序。
希望月底前可以完成呢隻MG啦！

〈軟件〉
今日上網更新左iTunes 7。
裝左之後，發覺個界面有少少改變，
最正係可以依CD封面揀歌（當然事先自己做左D封面相入去啦！），
好似起CD鋪咁揭CD咁，好過癮！

Blueman

車牌﹣GUNDAM

2006年9月17日
丙戌年閏七月廿五
夜

〈車牌〉
前日，運輸署公開競投自選車牌。
最後當然大熱門﹣１love u以高達百二萬成交，
至於自己最有興趣知道既車牌﹣GUNDAM，
以成交額第二十位十一萬成交。
至於GUNDAM車牌「原創人」司徒劍橋因投唔到，
報章話佢相當不滿，
其實起香港喜歡GUNDAM既朋友又豈止司徒先生一人呢？

〈攝影〉
今日天氣非常之好！
所以我老Blue趁今日放假，
帶左部E-300上左枝50mm Marco鏡出左去映左一轉。
由於一機一鏡關係，相當輕便，
題材好隨意，
自在操下部機唔好俾自己生疏咁解。

〈模型〉
今晚邊睇電視邊砌模型，
終於素組完成左隻MG-GP01囉！
雖然呢隻MG屬於1997年設計，
但係砌完發覺呢隻野其實都幾精密兼幾花工夫下。
尤其係隻收藏起胸部兼會變形既核戰機，
相當複雜。
希望聽日有時間上灰啦！

Blueman

UM2耳機run-in完功

2006年9月16日
丙戌年閏七月廿四
深夜

〈耳機〉
我老Blue自上月中買左心儀好耐既Westone UM2耳機。
每晚用文火（用電腦每晚播歌6小時）煲左200個小時，
今日終於大功告成，
對耳機相信進入穩定狀態，
可以好放心咁享受呢對耳機既音質！！
的確煲左咁耐，
每日都留意佢細微既音質變化，
雖然無完全聽哂同級咁多隻耳機既表現，
但我相信無買錯，除非係Triple Driver In-earphone啦！！

〈相機〉
一日Photokina 2006未到或未完，
總係係有令一眾相機發燒友既驚喜或失望既消息。
好似今日咁，繼賓記宣佈K10D、O記宣佈E-400後，
輪到老牌社團Leica一口氣公佈多部新機，
不過，盲既都睇得出好多機種取至老拍檔﹣“蟲下“現役機種。
唯一吸引人既係終於自家開發第一部M系數碼機M8。
一部不折不扣既Digital Rangerfinder Camera，
無疑為Leica打開歷史既新一頁，
亦為M系打破售價記錄，定價好似要5000歐羅。
我真係想問仲會有邊個“奶系“fans會花咁既價錢買呢部M8呢？
以前一部Leica就話可以保值，因為全機械嘛。
但係隨著菲林市場萎縮，數碼時代抬頭，
今日一萬買既DSLR，出年有機會六千未必有人接貨？
Leica既前途睇怕唔好得過O記好多囉.....。

到今日為止，?
我老Blue認為咁多新產品當中，
仍然睇好賓記部K10D。
希望唔好令我老Blue失望啦！

〈模型〉
由今月10號開左盒MG-GP01以來，
到今日為止，由於時間關係都係素組左一半。
希望過多幾日會完成素組階段，
趕快完成呢批早期既模型啦！

〈個人〉
雖然自己唔係乜野大人物，
總係覺得自己無事忙。
有要開工，有話映相，有話砌模型，有話睇住個市，跟住又寫Blog。
有朋友問我點解有咁多時間做咁多野？
我都唔知點解？性格問題卦？唔鍾意停落來既人，唔抗拒新事物、新觀念。
不過，身邊有D中年朋友剛剛相反，
佢地反而開始將自己封閉，
思想及視野越縮越細，仲停留起二、三十?階段既思維。
成日話D電腦更新得太快？銀行分行越來越少？點解好多野要網上登記？
太多佢認知以外既事唔知道....。
唔知個世界依家比以前行得快過以前好多.....。

Blueman

K10D+iMac+Aperture

（續9月14日）夜

〈電腦〉
同日深夜睇過賓記部新機K10D既資料之後，
發覺上網官方資料跟機既新軟件-Pentax Photo Browser 3，
起Mac機部份列出D規格都幾高下！
最好要G5 or Intel Core行Rosetta，
部腦祇少要1GB Ram先至行得順喎！
咁又係家陣乜鬼DSLR閒閒地都去到過千萬像數，
相對地RAW檔大左，
如果部腦好似我老Blue用緊Mac Mini 梗係「窄窄地」啦，
其實自己當時買部Mac Mini都係頂住先......。

今日，晏晝上左去腦場睇下新Mac機，
其實對我來講都無乜選擇，
要合乎可以玩相要求及「筆直」得新iMac 20"。
因為為左呢個問題，
問過好友﹣阿包買邊隻Mac機好？
結果佢老哥推介左呢款新iMac俾小弟參考。
自己上網睇過呢款iMac都幾「口岩」我老Blue，
最實用呢款iMac規格可以做到我玩相要求之餘，
剛好玩Apple Aperture推介規格；
仲可以行Dual Mon.，
即係加埋自己原有既20“ 16:9 Apple Mon咁咪有成40"實用畫面！？
咁唔錯既選擇喎！！

〈相機〉
只不過事隔一日，
dpreview.com已經出左有關賓記部K10D既hands-on preview囉。
睇過之後覺得呢部機設計都好實用，
亦顯得賓記今次好用心記設計呢部機，
好似RAW檔可選擇PEF或DNG（Adobe提倡既標準數碼檔案，哈仔都係用呢隻檔做RAW。）；
測光可以選擇性跟對焦點；
睇景深除左光學外，更可以用LCD預觀；
更實用既更有連WB都可以預觀，唔駛再花時間映左save後揀WB setting。
呢幾樣野睇到賓記做野好實在，
正確為用家加入實用既功能。
不過，雖然我老Blue對呢部機好有興趣，
但係都要睇過實版出來既表現先至有決定，
例如，22bit影像處理係咪咁巴閉？
機身除塵有無問題？
防震系統得唔得呢幾個核心問題！

11月到貨，我老Blue相信會有好多用家報告出籠，
期待！

Blueman

Pentax K10D 破壞登場

2006年9月14日
丙戊年閏七月廿二
深夜

〈相機〉
先個幾日我老Blue仲講緊依家DSLR既趨勢。
估唔到尋日（9月13日）返工前睇到Pentax終於出手。
宣佈推出最新DSLR-K10D。
一部集眾多功能於一身，
包括過千萬像數sensor（唔知係SONY個粒還是Kodak?)，
機身內置提供2.5~4級防震，
全新22bit Image Engine，
繼O記及C記後，第三家提供除塵系統，
機身設計防塵及防濕處理，
重現菲林名機Pentax Z-1操作模式-Hyper Program/Manual，
超大光學觀景菱鏡（96%視野及0.95倍放大率），
每秒三張連拍12張RAW檔，
11個對焦點，
及加有直度電池手柄。
以上咁既功能完全屬於半專業級水平，
亦係我老Blue一直要求既DSLR。
但係最離譜既係淨機身只不過賣US$899.95，
Kit Set w/DA 18-55mm鏡只不過賣US$999.95，
電池手柄單售US$190。
完全係對整個相機界投下原子彈！！
同級無K10D咁全面既N記D200或C記30D都要過萬埋單，
佢就話定價港銀六千幾就攪掂，
兼且仲話今年11月出貨咁趕！！

同期更會推出DA 70mm F2.4 Limited。
而網上更流傳佢個份Lenses Roadmap入面有兩枝勁Zoom，
DA16-50 F2.8及DA50~135 F2.8更會係行USM添，
唔係咁吸引呀！！

睇完呢部機咁勁既Spec.及咁既定價之後，
始乎我老Blue係時候回歸Pentax囉。
因為人地出到咁殘，
莫講話O記部E-1後繼機出唔出到成問題？
就連N記及C記都有壓力，
至於Sorry問佢下一部機點出呢？

講完超值機之後，
Leica亦終於推出M系數碼機-M8，
詳細Spec暫時唔多清楚，
不過睇過圖片就係好細部，
兼且好Q貴，
聽講要成eur ?5000歐羅喎！

的確睇完呢部K10D既資料，
我老Blue的確好似放下心頭大石。
因為轉機方向好明顯！

K10D，我等緊你！！

Blueman

MG GP-01始動

2006年9月10日
丙戌年閏七月十八
下午

〈相機〉
今日我老Blue放假，
趁有時間出左去旺角走左轉。
可能自從工友﹣阿溺買左DSLR及工友﹣恆仔佢地兩個都好想去映人像，
剌激我攝影癮服發，走左入相機鋪打左個白鴿轉。
不過，由於O記遲遲無消息供佈E-1後繼機，
攪到呢個系統唔上唔落，有靚鏡現貨（ZD 7~14mm & ZD 35-100mm）都唔敢出手呢！
次次行入相機鋪得個望字。
雖然，映相同有無頂級器材無絕對關係，
但係好器材有“工欲善其事必先利其器“既好處。
起碼如果部DSLR RAW buffer高D，
咁可以?多幾張，成功率高D；
如果枝鏡光圈大D。
咁就可以光圈及快門用多幾級，景深及穩定度多左。

〈網站〉
工友﹣恆仔最近瀏覽一個有關攝影既forum，
極力推介俾我老Blue上去，
原因呢個forum無老牌網站無咁火爆，
氣氛比較輕鬆喎。
我上去瀏覽過，的確係。
不過，暫時覺得好多網友多數出「拍手」、「笑哈哈」icon多過發表個人或攝影意見。
仲係停留起討論買器材既話題居多！
相反國內好多有關網站出相及論相既氣氛好好多，
唔通呢D就係香港既業餘攝影圈既文化？
還是多人開始玩DSLR、普及左有關係呢？

〈音樂〉
今日出旺角自己發左癲咁，
一口氣買左幾隻CD，
其中包括近期好紅既新人﹣泳兒Vincy。
一直對唱片公司﹣金蛋出新人有D抗拒，
但係今次呢位新人真係識唱歌喎，
有D驚喜！
不過，自己就唔係咁喜歡隻CD既包裝，
左摺右摺拎隻CD都好唔放便。

〈模型〉
今日，終於有時間砌模型。
但係唔係要完成埋隻MG卡碧尼，
而係要開始開盒新MG-Gundam GP01，
因為之前起個Blog到都提過，
自己手頭上既MG存貨都相當多下，
但係礙於模型設計問題，
所以選擇以出產年份為砌模型先後次序吧！
不過，唔知呢隻GP01又要砌幾耐呢？

〈馬季〉
今日，原來係馬季開纙。
我老Blue唔係馬迷，
但係身邊有好多工友及同事都係馬迷，
好似同事﹣防撞欄咁，先個輪馬季完左之後，
成個人好似無哂寄託咁，諗野好偏激，
希望馬季開始，個人會正常返啦！
但係至於其他馬迷及球迷既同事唔好過份投入啦，
如果唔係會累己累人嘛！

Blueman

相機年鑑

2006年9月6日
丙戌年閏七月十四
夜

〈相機〉
一連三日既公司Course終捱過左，
不過成績唔敢樂觀，希望唔駛重考啦！

放學（收工）之後，
原本打算買番C記及O記既香港出版既相機年鑑睇，
但係唔知點解拎左上手無耐就放番底。
可能，已經無左以前買機既慾望，
可能，好多新機將會出，唔想睇D舊野止渴，
更可能自己都唔知係咪想轉機？
太多可能之下，都係停一停、等一等！
貿貿然Up-grade或轉系統對我等經濟能力有限既打工仔可大可小啊。

到今日為止，
部E-300無病無痛算係咁囉。
因為上網睇過其他牌子既用家，有好有唔好，
自己部機用左超過一年，
以旅行機來講已經無乜要求，
唯一美中不足係自己一直唔敢投資好D既鏡頭咁解！

Blueman

期待Photokina 2006

2006年9月5日
丙戌年閏七月十三
夜

〈相機〉
尋日我老Blue起呢個Blog到提過有關Canon相機既憧憬。
今日，收工（放學）之後有個衝動想去Canon Show Room?Catalogue，
但係因為有D累收工返左屋企。

上網見到網友Cheung兄留言亦都提到轉機。
本想回覆好想轉Canon既意向，
但係佢留言中有話O記將會出E-3。
令我對轉系統意念即刻dup住！

跟住上網轉戰O記資訊，
當然，綜合各非官方渠道知道，有好消息亦有壞消息。
好消息係傳聞O記今年會出兩部DSLR，
一部係E-1後繼機暫稱E-3既東西，
另一部會主攻女性市場既E-400喎！
壞消息係Photokina只會得個Mook-up模型睇，
無實物欣賞，即係有機會又係得個?字！

如果問我老Blue仲對有乜期望？
無！
唔係對呢品牌死心，而係自己等得太耐......。
到時出左先至睇下有無驚喜俾我老Blue。

例如：仲係咪沿用Kodak CCD？（大像數Sensor）
連拍及RAW file有無加大？（Buffer鬥多）
出唔出機身內置防震？（防震）
會唔會加入Live-View模式？（LCD）
AF對焦有無突破？（Fast AF）
配件方面，有無無線閃燈？（Non-Core Flash)
支ZD14~35mm F2銀圈鏡出唔出先？（鎮山之寶）

如果依家O記咁既市場佔有率，
新機做唔到依上要求，（以上規格相信好多網友揀DSLR基本參考指標！）
都幾難再起相機界立足囉！
亦都係呢個原因，
導致我遲遲唔敢再買鏡，
因怕太多死貨起手，驚好難轉手嘛！
到時坐哂艇。

9月26日，Photokina再講。

Blueman

對CANON產生好感

2006年9月4日
丙戌年閏七月十二
夜

〈工作〉
今日我老Blue開始連續三日唔駛開工，
但係要上公司course，又係悶到發呆個隻！！
呢次全班12人，香港員工佔五個，其餘來至日本、澳洲、美國及德國同事。
仲要全部職級高過我，散仔得我一個.....。

〈投資〉
經過半年試練，初步見到成績，
自己都有少少興奮，但係唔敢大意，
現階段只係起步，
往後仲有好多考驗，
所以呢兩晚好努力咁檢討及修改部署。

〈相機〉
除左上網睇財經市況外，
忽然，好留意CANON既相機資料。
因為自從公佈左最新既DSLR EOS 400D之後，
終於係繼O記咁引入「超聲波除塵系統」。
令我老Blue對CANON信心大左！
因為以往見過好多CANON用家都對sensor沾塵好懊惱，
就係呢樣野導致我揀左部O記E-300，
不過，當時DSLR sensor亦佔好大因素。

科技係不斷進步既，
連CANON都起最低階既DSLR設有呢個“除塵系統“，
睇怕DSLR三大要素：高像素24x36mm sensor、防震及除塵，
CANON都已經具備哂。
所以，我估計CANON好快會將400D以上高階及頂級機種大更新！
個人推測，唔排除好快有5D或以上新版出場。

如果真係會引到我老Blue會轉投CANON陣營喎！
因為CANON的確有好幾枝定焦L鏡幾吸引我架。
除非短期內，其他牌子會有重大突破啦！

Blueman

Wandy婚筵

2006年9月3日
丙戌年閏七月十一
夜

〈公司〉
9月1日，
公司女同事“毛“獲晉升「掃把」，
呢日正式換新制服上任。
以佢性格及往積，我老Blue好希望呢位新掃把會盡忠職守啦！

〈喜筵〉
9月2日，
公司前女工友Wandy，由美國回港擺結婚酒。
婚筵以基督教形式進行。
主人家大部份親友基本係同屬教友，
被獲邀請既工友當中好多為非教徒。
氣氛當然好難投入啦，
當中更有幾位工友如常咁席上大玩「十三張」！
吹漲！

〈攝影〉
9月3日，
由於，近日工友阿溺已榮升DSLR用家。
工友恆仔不知幾咁雀躍，
高興過自己買機。
因為，除左多個fd講下相機之外，
更可以相約去映女喎。
不過講開映人像，我老Blue的確好耐無映過囉，
又睇下佢地幾時攪得成？

〈相機〉
唔知點解今日收工之後，
好心急咁上網睇下相機新資料。
System唔易轉，更加唔易揀！
雖然手上?住O記少量貨（一機三鏡一閃燈），
質素算係入門級裝備。
但係如果upgrade或轉系統，
現階段可能自己比較閹尖，
仲未有乜心水？
都係過埋9月尾Photokina先算囉！

Blueman