Transformer+John Rambo預告片

2007年5月29日
丁亥年四月十三
凌晨

〈影視〉
噚日返工見到工友Ｏ，
劈頭第一件事唔係講公事而係講閒謁，
佢話上網睇咗兩套電影嘅Trailer，
叫我老Blue快啲上網睇咁話喎！
一套係全新長版本Transformer（港譯：變形金剛）電影版及另一套係Rambo第4集John Rambo。
首先講最令我老Blue期待係呢套Transformer，
睇完個官網最新HD Trailer之後，
真係呆X咗，邊有咁正呀！！
直頭係細個睇日系卡通片先有嘅巨大機械人格鬥場面，
依家嘅荷利活特技真係做番出嚟，好感動！！
尤其有幾幕好有「Marcoss」及「Z Gundam」入面重高達起鬧市決戰Gundam Mk-II影子。
機設方面好有日本“河森正治“及“出裕淵“風格添。
超期待！！

另一套"第一滴血"Rambo事隔咁多年，
居然揾返史泰龍拍第四集，
邊有可能㗎.....。
睇完個Trailer之後，
又係呆X咗，血腥暴力場面完全可以同港產漫畫邱瑞新筆下嘅江湖漫畫有得揮，
乜野「批頭」、「擋肚」、「肉醬意粉」都有齊，
見個Trailer龍爺著哂衫唔曬肌肉，
大玩血腥，唔知會唔吸引舊有Rambo粉絲捧場就唔知嘞？
不過，咁樣玩變奏我老Blue就好有興趣，
因為佢老哥對上一套Rocky第五集都好口碑，
都好想睇佢咁老點做Rambo喎？

Blueman

24第六季＋Heroes Vol. 1完結

2007年5月25日
丁亥年四月初九
下午

〈影視〉
呢排天氣非常悶熱，
唔係出猛太陽就係落大雨，好難適應，
所以除咗返工外，少咗出街。

起屋企如果多時間就會砌吓模型外，
夜深最佳節目就係煲劇，
不過，我老Blue近排嘅至愛美劇﹣24 Season 6及Heroes Vol. 1亦已去到結尾。
先談今輯「24」，
雖然呢套劇已經去到第6季，
除咗情意結令我追落去外，
的確每一季故事都令我有驚喜，
但係睇到今季最後一集，
覺得有點江郎才盡，
最後一個鏡頭主角Jack起海邊望住個海，
無哂方向好茫然......。
真係唔知會唔會仲有第7季？

至於新竉「Heroes」就唔同囉，
呢套劇第一輯開始依經吸引到我，
久違咗好耐嘅追劇感覺返咗嚟！！
雖然第一輯結尾有點草率兼無驚喜。
但係起最後一、兩分鐘話俾觀眾知，
呢個結尾之不過係呢個故事開始，
出現咗Volume 2頭兩分鐘嘅片頭，
以新劇集來講都算幾新穎。
傳聞新一輯「Heroes」會分拆為「Heroes Vol.2」及「Heroes-Origins」推出。
「Origins」為6集前傳形式，
講番20年前班超能人點樣決裂喎；
而Vol.2為緊接上集嘅全新24集故事。
但係傳聞最正係NBC已經準備拍Vol.3，
但係主要角式話會播完Vol.2等觀眾投票決定咁攪嘢？
係真唔係呀？
因為NBC繼「Friends」（老友記）多年後，
好耐無一套劇集好似「Heroes」咁旺場，
所以想像到將會幾落本制作Vol. 2。

咁就更加期待出年嘅Vol.2囉！！

Blueman

我是大叔？

2007年5月22日
丁亥年四月初六
深夜

〈工作〉
今日「邊荒集」話事人首次舉行「鐘樓演講」。
大概講下最近公司發展近況，
俾「荒人」們一個了解下，
唔駛估估下喎！
各人有各人環境及諗法，
但我老Blue身為「荒人」心裡早已有盤算，
一日「邊荒集」環境未過自己警戒線，
都無乜好擔心亦唔到自己話事，
現階段無乜意見！

〈模型〉
由於先個幾日，執清咗自己間柴房嘅雜物，
今日再度砌番自己喜愛嘅MG模型，
好順利咁素組咗副“MG老虎特裝型“兩手兩腳。
有種講唔出嘅樂趣！

先個幾日睇咗最新一期6月號「電擊Hobby」中文版，
今期除咗例牌推廣最新嘅MG版綠渣2.0外，
亦有篇文章叫“第12年的座談會“，
文章收錄咗四位講者對12年嚟有關MG嘅感覺，
四位講者包括：笨大營業部經理﹣川口克己、MAX Factory模型師﹣MAX渡邊、笨大企業開發組組長﹣岸山博文及「電擊Hobby」前編輯長﹣佐藤忠博等人。
除咗講解MG渣古第一代型到現今第二代嘅開發故事外，
文章最令我老Blue心刻係講者之一嘅佐藤，
站起模型業界嘅觀點講因為依家娛樂多咗，
玩模型嘅人雖然仲有，
但係新玩家明顯少咗！
而新玩家仲係新加入嘅「大叔」玩家，
唔講都唔知原來我老Blue係其中之一。
就係呢個原因，
文章內容講笨大要點樣諗計吸納新玩家，
綠渣2.0係一個開始，
點樣調低模型製作新玩家門檻，
但又可以經過簡單過程而效果美觀！
就係咁文章講到呢隻綠渣2.0笨大話用咗兩年時間開發咁誇張喎！！

睇完之後，雖然當中有滲水成份。
不過，有一點無錯係家陣玩MG的確好多我亭「大叔」們囉！！！
加油吧！各位玩MG的「大叔」，
迎接人生不完的挑戰！！！

Blueman

MG NO.100揭盅

2007年5月21日
丁亥年四月初五（小滿）
早

〈工作〉
我老Blue無寫Blog成個禮拜原因係除咗要搬哂啲模型入倉外，
更重要係放假之後，
不停咁開工........。
最近，公司有關改組變動嘅傳言言之不絕，
形勢有啲似黃易筆下嘅「邊荒傳說」入面嘅「邊荒集」咁，
孰好孰壞，見仁見智，
自己只作好最壞打算迎接改公司改動，
但梗係覺得今次可能「危中有機」咁.....（未諗到！？）

〈模型〉
模型迷萬眾期待嘅MG No.100終於今個月17日起日本第42屆靜岡模型展揭盅！
答案係WD-M01 Turn A Gundam.........。
真係令好多MG迷跌哂眼鏡，
仲要係通街都係𠴱隻！
呢個MG 100 countdown宣傳由去年尾到今個月17號，
攪咗都有半年咁多，
答案咁出人意表，真係有啲「反高潮」，
起好多本地有關嘅討論區亦惹嚟好多激烈嘅「聲音」。
故勿論呢隻Turn A MG版點解要用咁多時間鋪排，
真係等笨大遲啲起有關雜誌作解說囉！
至於我老Blue點睇呢隻Turn A？
好老實講，Turn A連動畫好耐好耐之前睇過幾集之後，
無乜興趣再追落去，
某程度係因為隻高達多撇鬚唔知想點咁？睇唔慣！！

好啦！模型鐵定100號係呢隻Turn A嘞，
咁呢鋪係咪又唔跟先？
咁我老Blue又好難講喎！
因為計造型的確唔係我杯茶，
不過，笨大為咗呢隻Turn A攪咁多嘢，
我老Blue反而好有興趣想知呢隻MG會有乜嘢咁特別「分唇」喎？
因為呢隻Turn A MG網上傳到索價八千幾日元，
係咪咁誇呀？
睇吓點......。

Blueman

QDII阿爺排洪

2007年5月14日
丁亥年三月廿八
下午

〈股市〉
星期五晚，阿爺宣佈推出QDII細則，
可以俾國內同胞買下港股，
希望舒緩一下國內熾熱嘅投資氣氛。

今日，港股亦因為QDII消息恆指咁就升咗511.03點，
全日總成交亦創新高達950億，咪話唔誇張！
我老Blue今日搬模型入倉嘅途中，
亦見到好多阿公阿「蟬」起有證劵賣買嘅銀行「𠵱𠵱嘩嘩」......。

不過，查實呢個QDII提到每年只不過每年批1150億出嚟玩港股，
相對家陣港股每日成交量閒閒地都五、六百億真係濕濕碎咋！
更可況依家大陸A股咁刺激，
乜春股份都可以狂升，
相對港股咁「理智」，
有幾多同胞有興趣成疑問囉？
呢排如果無心水嘅話，
都係當睇吓戲好囉！

Blueman

迷利倉

＊＊存倉的地點，附近居然有座好有特色嘅懷舊建築物。＊＊


2007年5月12日
丁亥年三月廿六
夜

〈存倉〉
今日係我老Blue第一個長假最後一日，
但係自己覺得無浪費到咁「寶貴」嘅假期。
自己都經常起個Blog到提過自己間房既空間已經嚴重過咗「警戒線」，
最弊係近啲幾個月工作超忙，
已經無時間可以好「積極」咁享受砌模型嘅樂趣，
但眼見啲MG越出越吸引，
又忍唔到手，結果唔買又買......。

經朋友R推介下揾啲「迷利倉」租位擺下嘢，
噚晚上網發現香港有好多呢類型嘅服務提供，
「抄」咗一輪俾我發現屋企𠴱頭都有呢類型嘅「迷利倉」，
隨即撥個輪問個詳情如何如何？
今日下晝「貢」咗上去開倉，
查實好聽啲就叫倉，難聽啲只不過儲物櫃一大個，
由於好多呢類型服務大多數起啲工廠大廈，
所以收費尚算可以，長短租都可以，
最啱我呢亭模型玩家，又無時間砌死要買，
但屋企又無位擺；
最後揀咗中亭size嘅儲物櫃。

就係咁拿拿啉返屋企，
用個大Size嘅紅白藍袋pack起啲未砌嘅模型，
跟住來回兩轉入倉，
即係前前後後自己走咗三轉，
雖然個倉起屋企附近，
腳程需要半粒鐘左右，
但係又Pack袋又要遇著今日星期六，
條街鬼死咁多人。
走到最後一轉返到屋企又啲想死嘅感覺......。

可惜嘅係今日只係搬咗15盒模型入倉咋，
可想而知啲MG模型個packing幾咁大盒！！
應該仲要走多一轉先至入哂倉囉。

Blueman

長假期例牌事務

2007年5月11日
丁亥年三月廿五
夜

〈雜物〉
每逢長假期我老Blue如果唔係出門的話，
留起屋企有一樣嘢必定會做，
就係執房。
我諗香港地好多朋友都好似自己一樣，
平日因為工作問題，
未必會每日咁有規律咁每日清理屋企多餘嘅雜物，
就自己而言屋企已經唔係大唔再講，
但係「定時定候」啲雜物就好似細菌咁掃之不盡，
當然同自己生活習慣好有關係啦！
平時得閒無無謂謂買吓嘢，
加上近年學人玩埋模型，
情況每況愈下，
久而久之就堆積如山，
自己都好驚好似香港先排有單新聞咁有個賣衫嘅老小販因為整理房間啲貨，
俾啲舊衫責死好幾日先有人發現！
家陣自己間房啲未砌嘅模型已經冧到上天花板，
都仲未計其他無謂嘢㖭！
我老Blue就唔想因為俾一堆未砌嘅模型責死而見報咁肉酸囉......。

今日，同朋友R通電話嘅時候，
言談間佢老哥都有過咁嘅情況，
最後佢話起出面租咗個迷利倉，
就係咁為佢解決咗好多又阻定又唔捨得丟嘅雜物。
聽落服務及價錢都幾公道，
似乎自己都可以考慮租番個倉擺下啲模型存貨及漫畫書刋之類唔等駛嘅雜物都好喎！
咁樣今日計下計下原來可以騰出好多空間擺模型，
一舉兩得，有得諗！！

Blueman

高達模型製作過程

2007年5月10日
丁亥年三月廿四
夜

〈影像〉
今日，我老Blue上網睇到有關「笨大」日本電視節目嘅短片Gundam Plastic Models，
呢段短片係介紹「笨大」起日本靜岡縣嘅大本營，
內容係拍攝有關呢個生產工場，
例如：模型設計、做模過程、初模製作等等，
最正係呢個工場入面所有員工嘅制服真係著到好似聯邦軍一樣，
亦因職級唔同，制服顏色亦有所唔同，
呢段片都幾有趣，值得上去睇下！

〈模型〉
繼「綠渣2.0」之後，
預期推出嘅「紅彗星2.0」亦有實版睇到，
今次除咗同「綠渣」顏色唔同外，
有關身上嘅推進器亦因「三倍速」而強化咗，
次外亦附加升降台。
至於封面美術亦比十多前嘅第一代正好多！！

〈個人〉
由於早排我老Blue都提過，
「壽屋」將會起下個月推出倉庫情景，
自己亦唔打算再花時間去攪落去，
於是趁今日有時間，
開始砌番堆咗好耐嘅MG模型，
揀咗早期2000年出品嘅MS-07B-3「老虎特裝型」，
唔知係咪有好幾個月自己無砌過模型，
加上套音響組合經過「調教」後，
一邊砌模型一邊聽歌，
實在好過癮！！

Blueman

2007年第一個長假＋蜘蛛俠3

2007年5月10日
丁亥年三月廿四
凌晨

〈個人〉
我老Blue起呢個Blog潛咗水幾日，
原因係呢個禮拜自己終於放今年第一個長假期，
先個幾日同友人C去咗曼谷探朋友兼順道起嗰度「嘆呌」，
無特別話決定去邊度玩，
反而寄居朋友家行行企企、食飯吹水，
感覺幾好喎！
其間，自己破記錄咁可以睇咗兩本書㖭，
有啲似去泰國旅行啲鬼佬鬼婆拿住本書可以磨一日咁不可思議......！
至於去咗泰國工作嗰位朋友，
言談間生活尚算可以，
不過，一齊由頭開始難免有點吃力，
但係我相信人往往起惡劣環境先至可以將自己嘅潛力發揮出嚟。

〈電影〉
尋日，終於睇咗自己期待以久嘅電影﹣Spider-man 3，
百三分鐘裡面娛樂性及特技、動作不下於頭兩集，
不過，覺得條感情線無上兩集咁細緻，
至於對敵喜歡佢個種以弱勝強、智力取勝嘅場面，
比起好多超人片種以壓倒性力量就係一切好好多！
所以今次描寫紅蛛俠力量變化及以一敵三就好過癮！
整體上三集有一氣可成，無令我老Blue失望。

Blueman

Mozy 網上備份服務

2007年5月4日
丁亥年三月十八
夜

〈電腦〉
無可否認電腦及網絡已經成為大家生活嘅一部份，
例如娛樂、資訊、理財及工作等等。
最近公司有幾位對電腦一直抗拒嘅工友都買咗佢地生平第一部電腦，恭喜！！
不過，另一邊廂亦有朋友近日因為部腦唔知乜野緣故不幸地感染咗電腦病毒；
呢位朋友亦因同佢太座無電腦用而發生小爭執.......。

自己對電腦認識唔深亦唔想花太多時間去認識維護部腦，
只求部腦穩定，時刻可以應用唔好俾相關難題去花時間救機就得囉，
所以多年前已經轉用咗最易用最穩定嘅MAC機。
至於檔案方面一直都「隔離」方式，
即係儲存係另一個外置式HD到，
到時到候就會燒碟做備份，
好處係第日換部新機或不幸死機（到依家換機多過死機），
只要裝番相關軟件就即刻對應之前既檔案。

不過，對於一啲經常更生嘅檔案就未必夠全面保障到嘞！
例如：行程表、上網嘅Bookmark及記載電話、電郵嘅通訊錄咁呢日常資料，
因為呢啲資料通常記錄起部腦個主HD，
萬一遺漏都幾頭痕吓！！
前日，睇「信得過報」，其中科技專欄「解碼」，
筆者﹣狄高介紹咗一個網站Mozy.com幾啱我老Blue用喎！
呢個網站提供咗免費有限量嘅網上備份，
雖然用量有限只限2Gb，
但係操作容易，提供128bit加密網上傳送，
亦可作揀選項目中，一旦有改動或更生可自動上傳作備份，
過程自動化，最適合我老Blue呢亭怕麻煩嘅電腦用家。
最緊要係除咗免費外，
更提供Mac PPC／Universal版！

自己剛剛試用過，
的確好方便，不過，如果閣下檔案太大就可能第一次作備份嘅時候需要多D時間囉！！
有興趣或者同老Blue有咁嘅需要嘅朋友可以試吓。

Blueman

MS-06J ZAKU II MG版上市

2007年5月3日
丁亥年三月十七
夜

〈模型〉
今日，我老Blue終於有時間落樓下間玩具鋪行吓。
亦都見到好多模型友期待既綠渣MG 2.0（MS-06J陸戰型）上架，
但係自己近排實在工作太忙，
加上屋企暫時再無位存放多餘未砌嘅模型囉（已經到達存倉警戒線......）。
另外，呢件「綠渣2.0」唔愁無貨，必定長賣長有，唔急。
不過，記起話同廖工友見到有貨幫佢老哥買頭水貨，
俾佢過吓癮咁！

就係咁幫工友買左盒返屋企，
定價三千五百日圓，
runner有成13塊，定價尚算合理。
睇番份說明書，咦？唔睇都無為意原來由RX-178 Gundam Mk-II 2.0開始，
份說明書都改左版面，落埋模型盒封面，
其實都合理嘅，MG到咗依家除咗模型進步咗之外，
連帶封面美術都好吸引，
好似睇早輪既「電擊Hobby」都有提過製作MG過程中，
有時封面會做幾個先至決定用邊個咁認真！
其實我老Blue砌完啲MG之後，
亦會Cut低啲模型封面作收藏。

講番呢隻「綠渣2.0」其實早排韓國仔Dalong MG review亦率先有玩家報告，
佢嘅玩家報告不嬲都係一眾高達模型「買家」嘅入貨指標，
而每次素組完，都會有個評分（不過，基於全部係韓文關係，其他相關評分就睇唔明囉？），
由於呢隻綠渣用咗全新2.0內骨架及新關節結構，
比起上一代甚至近代MG都可做「擬人」動作，
笨大嘅R&D唔講得笑啊！

今次Dailong對呢隻「綠渣2.0」罕有地出現最高評分，
達108分超高分數（一般高質MG平均會給予90~99呢個分數），
對上一代綠渣評分為60分咋。
亦加上今次亦係呢個網頁有史以來最多相關圖片嘅一次！！
連帶今日「生果日報」副刋都有大片幅介紹呢隻綠渣，
可見人氣度非常厲害！！

Blueman