MG GYAN強人到貨

2006年5月31日
丙戌年五月初五
下午

〈模型〉
是日端午節。
雖然係法定公眾假期，但係我老Blue工作關係，都係要返工....。

由於返夜班，唔駛訓醒趕返工。
早兩日收到風，知道呢幾日MG版強人會到貨，
尋日出開旺角好多大場未見有，
心諗係無貨定賣哂呢？

今日，趁有時間落去樓下玩具鋪巡下，
行到鋪頭門口已經見成盒強人擺左出來。
入到鋪頭已經到有熟客開盒來睇！
老細見到我就問我要唔要？我話：要！不過食完飯先?貨。

食完飯兜返去玩具鋪?貨，
老細見無客之下，又俾個靚價過我老Blue成交！
返到屋企例牌開盒數件齊唔齊，雖然未試過有漏件，不過以防萬一咁解。
今次呢盒MG強人應該係繼MG版魔龜之後，
第二個非高達系以外既自護系MG以全內骨架構成，完成度及結構相當高！
尤其係個封面插圖，自己勁鍾意，好有油畫feel，勁配合強人呢個中古武士造型，
又一次要讚Bandai起MG各方面都好有心思！
有見及此，亦見有網友預言，MG版後繼會唔會再由一年戰爭系由MG Ver 2.0咁出過哂呢？
咁就要睇Seed系列有無能力撐到場，
夠唔夠支持者出到MG版啦！
（據知日本Bandai本土係有定期作巿場調查邊隻MS受歡迎先決定出MG！）

如果香港都有呢做MG民調的話，
我老Blue一定支持出CE系（Gundam Seed/Destiney）既MG版啦！

**註：好彩老Blue趕得及完成左一盒MG，否則再無空間擺多一盒MG模型囉！
詳情見5月25日〈模型〉內文....。

Blueman

銀包

2006年5月30日
丙戌年五月初四
早

〈個人〉
尋日，我老Blue放假。

原本打算留起屋企砌模型，但係中午起左身之後Call左工友K5食飯。
跟住兩條友起旺角週圍遊，
諗起自己個個銀包同埋個散銀包都用左好耐兼好殘下，
於是覺得係時候買左個新既替換。
睇左好耐，好多有牌子要上成千銀以上，
自己仲覺得銀包係要來裝錢既！
如果買左個貴銀包反而無錢裝有點本末倒置，
不過，身邊的確認識唔少人係咁樣喎！
結果，自己買左個二百幾蚊覺得會幾實用既牛皮銀包。

夜晚，工友阿著出來吃飯。
飯後，佢話隻錶壞左，要買個隻，
結果，陪佢去睇表，最後買左隻精工石英行針表，
簡單實用！

唔知係咪人大左定老左，
好多時買野唔會俾自己好高要求，
可能用得既錢唔多，要買既野及要用既夠用就算囉！

呢幾日仲係落住毛毛細雨，心情都有點納悶....。

Blueman

第五個MG完成﹣GELGOOG

2006年5月27日
丙戌年五月初一
夜

〈模型〉
今日，我老Blue放假。
通常假期我會好遲先至起身，今日都唔例外，
訓醒已經下晝兩點幾。

出左去旺角食個茶餐，順道去模型鋪行下。
打算買定D VJ模型油，可惜旺角兩間有得買既鋪頭依舊大量缺貨！
同時，旺角亦有一間模型鋪相繼結業，
呢間就係“火鳥模型“，其實呢間鋪頭結業係遲早既事。
因為呢間鋪手法採取奇貨可居、平入貴賣。
呢D手法若果大鋪無可口非，但小小鋪仔咁樣做好難留到熟客！
因為呢間鋪前後左右都有模型鋪，我點解要幫襯你先？

我依家買模型，通常都係幫襯屋企樓下個兩間玩具鋪。
去開去熟，好多時有新貨都仲會有折頭俾我老Blue添！

五點左右，正式為隻MG-MS-14A 亞魯古古埋尾。
經過兩三個鐘咁耐，最後補漏滲線及舊化程序，
終於完成第五個MG模型囉！

不過，今次完成呢隻MG時間多左好幾個鐘，有點失預算。

下一隻完成品應該亦係自護名機種﹣MS-09 DOM 大魔！！

Blueman

電影﹣X-MEN III

2006年5月25日
丙戌年四月廿八
夜

〈電影〉
今日我老Blue返早，好耐無返咁早，要成四點鐘爬起身，
有Ｄ唔慣....。

下晝三點收工，知道電影X-MEN III（兩極爭?）今日上畫。
走左去睇。
咁多套荷利活改編漫畫既電影中，自己最喜歡就係X-Men及Sprider-man。
前者喜歡有一大堆異變人互片，
後者喜歡拍得好人性化及抵死幽默感！

今次，X-Men聽講係系列最後一集大結局。
睇完覺得無先兩集咁好，呢集除左多左好多異變人大群揪及勁多新特技外。
好似缺少左上兩集角式細緻描寫，
就算連「狼人」、「暴風女神」及「靈鳥」咁主線人物好成日行行企企咁背對白！
整齣戲節奏好快，好高娛樂性。
但係睇完感覺過眼雲煙咁，無先兩集咁深印象....。

希望「蜘蛛俠」第三集仲可以俾到D驚喜我老Blue啦！

〈模型〉
今日接過廖工友幫我買既MG-魔龜，
睇過說明書，呢副MG的確好精緻。
不過，當塞埋呢盒未砌既MG之後，已經發覺間房再無任何地方再擺新模型。
換言之，間房已經無情咁響起「模型警號」，仲係紅色高危個隻。
真係未清D存貨都唔駛旨意再買新模型囉！！

本來今晚預算可以為隻MG-亞魯古古埋尾。心諗又可以清一大盒吉位！
但係今日返早，實在太?，
有心無力。

唯有明天請早！

Blueman

Pentax新機K100D

2006年5月24日
丙戌年四月廿七
夜

〈相機〉
前晚，工友﹣飛機婚宴上好多同事及工友都有帶DC去映相。
當中以工友﹣恆仔最巴閉，出埋部D2h去玩。
其中工友﹣阿達部富士Z2個人覺得最討好，原因飲宴呢類場合，
DC機仔閃燈威力有限，邊部有高ISO邊部著數D！
不過，我老Blue個晚就無帶任何相機去玩喎，
可能已經無左映婚宴呢類興趣卦？

5月22日，Pentax公佈左最新既DSLR-K100D/K110D兩部機。
兩部機分別K100D有防手震及K110D無咁解。
雖然規格上除左防手震外，幾乎所有規格同以往機種無乜大分別？
不過，據稱K100D售價就相當有叫座力﹣$700USD。
四、五千銀一部防手震兼相當輕巧既DSLR，
絕對係出外及旅行最佳機種。

〈模型〉
剛剛為隻MG﹣MS14A亞魯古古上色埋尾。
首次用左美國金屬噴油﹣ALCLAD II LACQUER，
質感非常理想，效果顯著，著色容易！
難怪售價非常，最平見$75，最貴見$100....。
所以我只限於用落機件噴射口、排氣口及槍械部件咁大把！

下晝時間我老Blue落左去樓下歎下午茶。
事後經過玩具鋪，見到HCM Pro新品﹣老虎，
造型及手工唔錯，
可惜，自從玩左MG模型之後，而經對HCM Pro再無乜興趣囉，
更可況自己已經砌左隻MG老虎呢！！
1:100同1:200感覺有好大分別呢。
但係記得工友-K5之前提過對呢隻HCM Pro都好有興趣，
於是Call佢問佢有無興趣入貨，
結果，佢答案同我老Blue一樣，覺得HCM Pro好唔抵。
因為，佢依家都開始玩返模型嘛！

HCM Pro呢款唔係唔正，
只不過適合一D唔會再砌模型及屋企無咁多位再擺大比例既高達機種既朋友玩！
HCM Pro初出個陣，
我都係呢個原因先玩呢個系列咋。
依家當然.....係MG行先啦！

Blueman

MG-自由高達

2006年5月23日
丙戌年四月廿六
夜

〈模型〉
今日天氣依然灰灰暗暗，整日落住毛毛雨。
攪到我老Blue成個人都無厘精神咁。

因為今朝收通宵，今晚又返通宵。
所以今日起身都已經傍晚六點幾，可能天氣關係好似訓極都唔夠咁！
由於返工關係，今日無乜時間砌模型，
改左落樓下玩具鋪睇下有乜模型！

終於樓下兩間玩具鋪有新貨返，
其中一款就係我最鍾意既高達機種MG-ZGMF X-10A Freedom Gundam（自由高達）。
仲要係屋村靚價，比出面旺鋪平成兩成左右，
對上個次諗死無咁快買哂，諗住出糧先入貨。誰不知個次出糧前就俾人買哂！！
就係咁屋企既存貨又多一盒.....！
基本出左既高達MG，我老Blue都買齊哂，
（順序老Blue最喜歡既高達係：X-20A Strike Freedom>X-10A Freedom>RX-93 New Gundam>RX-78-2 Gundam）
（至於非高達系MS係：MS-07B-3老虎特裝型>MSN-04沙煞比>MS-18E京寶梵）
問題係有無時間完成咁解！

不過，起身個陣部手機有廖工友留言，
話幫我買左盒超靚價既MG-魔龜喎....弊！

Blueman

七節縮骨遮

2006年5月22日
丙戌年四月廿五
夜

〈雨遮〉
今晚我老Blue返通宵班。
所以下晝出左去旺角行左陣，
不過，天氣依然唔係唔好，成個晏晝雨粉飛飛，
出街少不免?住把遮旁下身。

正好尋日收工個陣，見用開把縮骨遮D骨節位已經離左位。
於是，順便買過把新。
自從有次起公司見到有個工友﹣柯華田有把七節式既縮骨遮，
剛巧俾我起旺角見到有得買！
呢把七節遮有好多隻色擺左出來，
收埋之後只係得五寸長左右，
賣一百二十蚊一把，唔算平。
最後都係買左把深藍色。

今日出街好自然帶埋出街，袋左落個袋好方便。
以後出街前見到天暗暗唔駛因為唔方便而唔?遮，
結果最後真係落兩而後悔！

Blueman

工友﹣飛機婚筵

2006年5月22日
丙戌年四月廿五
凌晨

〈個人〉
5月21日。
工友﹣飛機呢日結婚，宴請親朋。
各方好友齊到賀，場面十分熱鬧。
我老Blue在此祝願一對新人百年好合，永結同心。
開始邁往人生新既階段！

不過，今次有工友擺喜酒感覺同以往有點分別。
原因係由於至去年開始，
公司請左一批新人，當中好多仲係年輕少女、青春少艾。
經過一年混熟，好多新女同事今晚亦有應邀出席。
平時出席同事喜筵，大多相熟同事都係牛記笠記上陣，
今次多左呢班新同事，位位女同事都勁裝上陣。
同我地呢班老鬼裝束形成極端對比！

另外，起往時不論埋席及散席，
一班工友都煙酒不離、大呼小叫，非常平民。
今次唔知係好多同事年紀漸長，（公司呢排好多同事相繼誕下Baby）
還是多左好多女同事，大家都靜左同埋斯文左！

席後，一眾工友相約女同事去唱K直落。
我老Blue無跟隊，只係同兩個工友落左去茶餐廳吹水，
傾下公司前景、講下前途及未來。
結論係我地呢D中年打工仔並不樂觀....。

我的「十年計劃」亦要作出最壞打算！

Blueman

漫畫﹣邊荒傳說

2006年5月20日
丙戌年四月廿三
夜

〈漫畫〉
今日我老Blue返早，見到收通宵更既工友﹣K5，
除左交更之外，佢亦都交左本最新既漫畫﹣邊荒傳說。
令我有興趣睇及期待呢本新既港產漫畫既原因：
並唔係改編黃易小說，亦唔係個故事是否吸引；
而係呢本漫畫既主筆﹣葉明發。

自己欣賞既本地主筆唔多，一個係邱瑞新，另一個就係葉明發。
欣賞葉氏編寫畫面及處理對白既表達能力，
始於早期續寫黑豹列傳處理對白已經好正，
跟住到「說英雄誰是英雄」及最新近作「霹靂狂龍」都有追捧！

看過第一期「邊荒傳奇」之後，
葉氏依然無令我老Blue失望，
希望質素會保持落去！

〈鍵盤〉
尋日，自己打完篇Blog之後，
發覺沿用左成年幾既白色無線鍵盤一直因為容忍問題，
買左頭個幾月只係?左一次咁大把，依家已經由純白色逐漸變到灰黃色，
有好幾鍵亦都成塊漬漬左起面，
好唔得！要做野！
用左?鍵盤專用清潔劑，但係捽左好耐都仲有層漬起面。
真係捽到手軟都唔乾淨，正想放棄之際。
諗起上次砌MG吉姆既時候，試過用水性模型油稀釋劑洗油，
於是，就用左呢隻模型用既稀釋劑?鍵盤....。

結果，神奇真神奇！
用左些少倒落塊布來捽，好輕易咁去左浸漬。
唔駛十分鐘由灰黃色變番白色！
而家打得好爽！

Blueman

電擊Hobby雜誌

2006年5月19日
丙戌年四月廿二
傍晚

〈雜誌〉
尋日，風球“珍珠“略過香港後，
今日已經天朗氣清兼有D曬。

自從去年我老Blue開始玩番模型後，
除左買模型之外，亦都會買有關高達模型既書刊，
其中有每月追捧既“電擊Hobby“中文版。
好耐之前未玩模型個陣，都從同事﹣艦長手上睇過佢買既日文版，
覺得日本人介紹模型製作相當詳盡及有心思。

玩番模型之後，當然連隨買“電擊中文版“參考及進補啦！
其中今年3月號標題以“MG10年如何介紹？“，內文相當吸引，
當中介紹Bandai開發者如何苦心發展高達模型，可見日本人對模型或外人俗稱玩具既執著。
另外，今期6月號就介紹如何“無塗裝擬專業枝巧“，
亦都連少買日本雜誌既工友﹣K5都買番本做參考，
可見內文有相當吸引力。

不過，我老Blue對公司同事﹣艦長買“電擊“獨愛日文原版有D奇怪？
香港中文版只不過出版及翻譯問題稍為遲過日文原版半個月，
而且港版除左有詳盡既翻譯外，價錢仲係平過日文水貨版一半咁滯！
都仲要堅持買日文水貨版，
有點費解？
香港地乜人都有。

〈時事〉
近日，中國中銀派招股書，我老Blue只係識買模型，唔識買股票？
但係見到官塘排哂長龍?招股書，有D擔心市況係咪過熱呢？

尋日，曾特首起立法局發發表“親疏有別“言論，
被外間大造文章。
我就覺得邊個政權、?邊間公司甚至邊個家族無“親疏有別“呢？
好似先幾日公司大Hang機咁，高層揀佢既謫系作補水作救亡行動，
引至某非謫系同事恨補水補唔到而表不滿等事。
無他，之怪呢位同事平時做反對派 、又無人緣成日無水洗面咁款兼唔擦鞋，
做唔到呢位高層既謫系成員！

好彩自己係中立派，派系呢科野唔係我杯茶。

Blueman

器材退燒

2006年5月18日
丙戌年四月廿一
凌晨

〈個人〉
我老Blue放完大假，回歸工作。
忙忙碌碌咁一日又一日。

〈相機〉
近排大家有睇開我呢個Blog都知道我老Blue對模型瘋狂，
只要個日有時間就會留起屋企砌模型。

不過並唔係對攝影無哂興趣，
而係對攝影器材無咁熱衷咁解。
可能覺得自己手上既器材足夠應付好多攝影上既要求，
唔需要再花多餘既銀兩落去器材到。

好耐都無上有關攝影既網站。
近日唔知點解真係無乜有關新器材既新消息喎？
究竟係個DSLR市場成熟還是技術仲未有突破呢？

〈模型〉
近日，除左工友-K5開始玩番模型外（故勿論佢有無時間問題），
今日收工又見到前工友﹣阿寒，
一齊搭車途中，好自然又講開模型。
原來聽佢講，買買埋埋咁多模型，
都準備開始砌啦！
因為佢有成三年幾無再砌模型囉，
不過，我其實都好想問佢點解會玩返模型?？
下次，見到佢問下佢先！

今日，訓醒應該開工動手為隻MG大魔及吉姆特裝型上底灰囉。
如果再加油，個MG13模型攝影就變左空談攝影....！

Blueman

策畫者、開發者、使用者

2006年5月15日
丙戌年四月十八
夜

〈系統〉
5月14日，是日母親節。
我老Blue呢日都係要返工，所以早一日同屋企人一齊慶祝。

放左成過禮拜假期，今日返夜即刻出事！
不過並唔係我老Blue，而係公司個電腦系統。
我未見過咁多大袋（部門高層）企左起我工作既Section，
跟住毛工友細語道曰：部門今日開始行新系統，但係由今朝六點幾hang到依家（當時為傍晚六點鐘）....！
平時呢個Section處理一份貨單時限唔超過一小時，
咁....今日由朝hang到晚，咪....好大鑊！

到我夠鐘收工當然仍然未攪掂啦！
好友﹣5工友接更個刻，最新指示係有機會還原用返舊系統。
乜依家先諗？唔係掛！

我老Blue唔識乜野電腦系統編寫，
但係覺得工作系統平台上有乜大更改，都應該多番測試先推行！
及如果推行期間有乜意外，有無Plan B？
可惜，今日乜Plan B、Plan C都無，未經詳細測試話行就行，
咁就似乎太冒險囉！
究竟係策畫者過份信任系統開發者，還是開發者過份自信呢？
但係只知道今鑊累到我地呢班使用者.....!

〈模型〉
5月15日，下午。
今日我老Blue放假到旺角下午茶，
剛巧撞到前工友﹣阿寒起模型鋪走出來，
二話不說，帶左佢去飲茶。
原來最近阿寒都玩理模型，乜呢排真係興玩模型咩？
不過，佢買買埋埋都未動工！
茶後，我繼續起旺角行街。
無耐，阿寒來電話我屋企個頭間玩具鋪見到MG-Ex-S GUNDAM，
開價極之抵買，比市面平兩成咁多。
無理由唔買，兼且仲幫好友﹣5工友買多盒！
就係咁，今日又買多盒MG模型「存倉」囉，
不過，相信呢盒應該會無咁快砌，
因為呢盒MG被譽為史上最Q複雜既MG模型.....。
單係計部件有成三十多塊咁多！（一般MG若為十三、四塊左右）

〈音樂〉
除左買左盒MG外，
今日途經旺角CD鋪，聽到有隻歌唔錯，入去問呢位女聲係乜水？
原來呢位係國內女聲叫“施艾敏“，
把聲真係好吸引，
於是買左佢第一隻CD返屋企慢慢品嘗。

晚上，九點幾，天文台話聽日會橫風橫雨喎！
據聞，公司個系統都依家未攪掂，一樣橫風橫雨。
天有不測之風雲....。

Blueman

第四個MG完成

2006年5月13日
丙戌年四月十六
下午

〈模型〉
凌晨三點幾，
我老Blue終於起呢長假完成左自己第四個MG模型-MS-07B GOUF（老虎）。
前日為呢隻老虎噴完色之後，
本有期望會有好效果。
可惜，滲線及內結構上色之後再重新組合，
有D失望！

事緣製作呢隻老虎由於其裝甲可拆件，
噴色好自然分件上色，就起呢到出事！
分件噴色最容易出錯係有Ｄ邊位會有機會噴漏左或者上色噴薄左而自己唔察覺？
結果，最後組合時候先發現有Ｄ位出現陰陽色，
唔係咁協調。
不過好彩係D細位，唔算好影響整體格局。

總括來講輸經驗，
亦得到一次經驗，下次同一色調既組件應該假組一次過上色，
咁樣會比較保險。

好彩，點解我老Blue到依家都係砌D老茄角式就係輸得起！
RX-78-2/MS-07B-3等我夠經驗值先郁手。

〈個人〉
講下講下，今日係我老Blue呢個長假最後一日。
自己從來未試過咁樣過一個長假起屋企砌模型，
幾乎晚晚砌通頂，
感覺辛苦過開工....！（一笑）
令我諗起英國女歌手-JEM一首歌-24。

Blueman

期待的MG老虎特裝形

2006年5月12日
丙戌年四月十五
夜

〈個人〉
今日趁有時間，
我老Blue走左去睇中醫。
其實，自己身子並唔係有出左乜野問題，
只不過借中醫把把脈，開劑苦茶，調理身體咁。

〈模型〉
由於個中醫師有煎藥服務，需時一個鐘頭。
地點好近旺角廣華街，所以趁未有苦茶飲走左去睇模型。
有間模型工作室起廣華街，由於呢間鋪頭主要代人砌模型、上色服務；
亦有教授砌高達上色技巧咁。
我亦都間唔中去觀摩、偷師！

尋日經過見到呢間鋪頭搬左出內街，間鋪大左，
個年青老闆就間左間透明玻璃房俾自己噴模型俾人睇，
好似D餐廳廚師咁俾D食客睇佢點煮?咁！
呢間鋪除左地方大左之外，仲賣埋高達模型，
居然俾我發現通街都無貨既MG版﹣MS-07B-3老虎特裝形！！
呢款可以講係我老Blue自護系中最愛既機種，
地位僅次於元祖高達（RX-78-2）。
而且呢間鋪賣既價錢都算合理，無抄味！

就係咁，今日又買左盒MG返屋企囉！

Blueman

電影﹣M.i.3

2006年5月11日
丙戌年四月十四
夜

〈電影〉
今朝好奇怪，我老Blue九點幾鐘起?醒左！
既然醒左，砌左一陣模型走左去睇戲﹣M-i-3（職業特工隊3）。
諗住睇開一、二集，追埋落去既心態入場。
雖然大橋都係個幾味，不過120分鐘居然無悶場，
有頭緊張到尾，超大型花錢大動作。
不過，唔知點解今次湯佬扮成龍，好多場做喊包.....。
反而港女Maggie Q估唔到有咁多戲分兼多對白！
同埋今次幾欣賞做奸角既性格，做得好冷靜好辣。
我覺得今集係三集之中最好睇既一集！

〈模型〉
睇完戲返到屋企終於素組埋隻MG大魔。
感覺好大隻，更加覺得HCM Pro好唔值！
原本諗住同隻MG老虎埋尾（滲線及舊化），
但係發覺雙手好酸軟，可能一口氣砌素組左兩隻MG，
淨係銼D水口位都銼到手軟囉！

〈攝影〉
既然今晚唔繼續砌模型，都無理由咁浪費時間。
於是，拎部DSLR出來，同五隻MG映下相，
無乜特別燈光Setting。
只係開著枝光管，戙枝腳架，擺個似樣Ｄ既Post就算！
純粹為自己既模型完成品留念。
有興趣既朋友可以Click入以下位址：
我的MG Part1

Blueman

清理模型盒之二（MG封面）

2006年5月11日
丙戊年四月十四
凌晨

〈模型〉
5月10日，下午。
今日我老Blue落去旺角除左順手買兩盒MG之外，
其實主要目的係買File夾。

事緣呢排砌左幾副MG之後，個D模型盒無用兼阻訂。
去年11月1日（清理模型盒）都提過點樣處理D無用既模型盒，
之但係今次有D唔同。
由於呢批係MG版，話哂都1:100個盒都大過BB高達好多，
好似依家砌緊既大魔或亞魯古古個盒面差唔多有成A3咁大。
所以唯有落去旺角中南呢亭大文具鋪先買到A3 Size既File夾；
之於份說明書就用A4 Size既File夾分開裝起佢。

返到屋企，拿拿聲將個File夾同盒MG大魔個盒作比較，
個Size好Fit喎！（咁樣又可以騰出多D空間買新模型有位擺！）
點解要咁好心機攪D盒面？
無他既，自己本身除左好鍾意每一隻模型外，
其實都好欣賞Bandai佢為每一款MG個封面設計。
D插圖真係畫得好出色，最正係每一副MG封面係跟足模型可動性、本身結構及原著設計，
好有水準及好有心思。
砌完副模型就咁丟左個盒太浪費設計者既心血囉。

自己咁樣做可能同以前做平面設計有關係，
唔好睇少一個包裝盒，
背後設計者實在付出好多時間及心機架！

Blueman

等待CS3

2006年5月10日
丙戌年四月十三
凌晨

〈電腦〉
前日收到鮑工友消息，
佢話已經成功咁砌左部四千幾蚊既Intel 4激既PC，
裝左個MAC OS 10.6落去喎！
可喜可賀。
佢問我有無興趣？我老Blue梗有興趣！
祇但係我問鮑工友，CS2行唔行到先？
佢答話由於CS2 MAC版並未支援Intel蕊即Universal Version。
所以我老Blue一定等埋CS2有新版本全面支援先出手未遲！
期待.....。

〈模型〉
5月9日凌晨，
經過一晚通宵，
終於完成左隻MG版吉姆改。
雖然某部份因為枝噴筆問題導致顏色有少許唔暈巡，
大致上出來效果，自己都算收貨！
由於隻吉姆改兩隻腳可隨意拆除外面裝甲，
展示出腳部內部結構。
因此，自己特別起雙腳內骨架花左好多時間上色，
淨係滲黑線、內骨架上色及做舊化，
足足花左我五、六個鐘頭咁厲害。
家陣隻吉姆改半邊腳無裝甲懶型咁擺左起個櫃架到「展覽」緊！

今日，用左我大半日組合左隻新MG:MS-14A GELGOOG，
時間及組合都比想像中容易，
姿勢及造形都好細緻。
不過，我仲未諗到點配色？

Blueman

電影﹣以和為貴

2006年5月9日
丙戌年四月十二
凌晨

〈模型〉
5月8日，下午。
由於我老Blue用開個隻VJ模型油，
唔係咁多地方可以買到，上個禮拜六諗住就到時間去個間淨係開一日既模型鋪買油。
雖不知門口掛住“東主有事，休息一天“！
唔通香港真係咁好景？唔憂做！？
咁今日焗住過左去灣仔個頭買，
無錯，用焗住呢個字眼。
因為呢間鋪頭買得貴過人，所以好齊貨！
結果，揀左三支夠應付就算，都唔敢再買多囉。

〈電影〉
5月8日，夜。
陳工友來電話去睇戲“以和為貴“。
上集已經好滿意，好耐未睇過一套港產片言中有物。
下集“以和為貴“，言外之音更加明顯、更出位。
古天樂越來越有戲味。
不過，我覺得套戲好就好咯，好似有某D位剪左咁，有Ｄ斷斷續續咁。
唔知遲Ｄ會唔會有加長版Director Cut呢？

5月9日，凌晨。
我老Blue繼續為隻吉姆改埋尾先訓。

Blueman

第二個MG-ZAKU II完成

2006年5月8日
丙戌年四月十一
凌晨

〈模型〉
經過尋日（5月7日）苦幹，
剛剛四點左右，我老Blue終於完成生平第二個MG-ZAKU II。
好老實講，自己對件作品並唔係咁滿意，?
原因係呢件MG由於屬最早期MG產品，
有好多弊病，好似夾位唔靚，
關節幅度窄，導致姿勢好難擺得穩等等。
加上當時用枝新噴筆，並未掌握得好，D色噴得唔係咁平均，
賣相唔係咁討好！
反而對比番第一隻ZAKU I舊渣，隻舊渣仲企理好多,
奇怪....？

不過，跟住落來既MG吉姆改及老虎應該好好多。
尤其隻老虎，我老Blue好有期望會砌得滿意！

自己買落唔少早期MG產品（2000年前出產），
好似大魔、亞魯古古咁，希望品質相對渣古會有所改善啦！
應該呢兩日會開盒砌囉。

Blueman

工作流程

2006年5月6日
丙戌年四月初九
夜

〈模型〉
今日開始我老Blue今年第二個大假，
為期七日。
咁有乜節目？今次大假無打算出外旅行，
反而留港消費，匿起屋企砌模型。

由於買模型容易；砌模型花時間。
房間屯積未砌既MG模型已經累積到12盒咁多！
砌緊而未完成既只有三盒咁大把....。
為左抓緊時間希望儘快完成「MG13」計畫（模型攝影），
於是今日走左落旺角買多左個“孖星“牌既噴油轉臺。
事緣計過砌模型過程中，最花時間就起噴油上色呢部份，
因為我老Blue用既係西班牙水性油，揮發性比油性模型油低，
相對乾透度時間亦耐左。
而好多時同一個部件需要噴上三次油，
但係噴油轉臺只得十二個插位。
曾經試過用發泡膠架設支架插臺，
但存取唔易，兼且插得唔穩容易跌番落來，效果唔大。
所以一個工作天都唔係噴到幾多部件囉！

希望買多個噴臺可以加快上油時間啦！

Blueman

MS-07B的藍

2006年5月5日
丙戌年四月初八（立夏）
夜

〈模型〉
是日佛誕公眾假期。
但我老Blue繼續返工，仲要連續返兩晚通宵。

呢兩日起我老Blue開始為隻MS-07B老虎上色，
由於隻老虎本身部件好多下，
自己亦打算跟原裝設定咁上色，主色深藍及灰藍。
咁多隻MG當中，老虎亦係我既至愛之一，
當然因為一身藍色造型嘛！！

但係呢隻深藍色（VJ Model Color-899 DARK PRUSSIAN BLUE），
好鬼死蝦人上色，每個部件都需要上三「浸」油先起到，
所以到依家只係上得一半，
唯有聽日再有時間繼續噴埋落去！

工友K5最近都加入砌模型行列，
不約而同佢又係砌老虎，
不過初玩階段，佢係砌1/144 HG 老虎特裝型。
期待佢既作品面世。

Blueman

老Blue日記一週年

2006年5月4日
丙戌年四月初七
凌晨

〈個人〉
今日係我老Blue日記寫左一週年既日子。

不經不覺原來寫呢個Blog可以維持左咁耐，
自己都有D驚訝點解可以？
由最初係個人網上相簿紀錄自己有關每次攝影事項，
到依家個人大大小小生活事項都一一寫左落呢個Blog入面。
感覺都幾過癮！
亦都漸漸咁成為一種習慣。
最後，亦都多謝茫茫網海裡面，
有緣同咁多位留言既網友講聲多謝。
希望咁多位網友繼續支持我老Blue！

有關自己曾經提過既「十年計劃」進展十分緩慢，
但仍會繼續及堅持。
至於新既興趣﹣模型攝影（MG13）就如火如荼！

唔知咁多位朋友心中有無計劃，
或者計劃實行左未呢？
時間唔等人架！

Blueman

非常勞動

2006年5月2日
丙戌年四月初五
凌晨

〈工作〉
5月1日，是日為勞動節公眾假期。
可惜我老Blue份工係輪班工作，今日都係要繼續返工啊！
返早，同預期之內，由於假期前好多工作一鑊過推埋來，
檯面上既文件山咁高，
好彩得工友恆仔大力幫手先慬僅攪掂！

收工，見有時間屋企仲未開飯，
途經旺角睇下有無D心水模型買？
結果係無！問過原來五月中、六月頭MG會大量返貨，
好多之前買斷既型號會返番，真係！？

夜晚，繼續噴我既MG模型，
今晚，終於噴哂隻MS-06 渣古及隻吉姆改亦噴左一半色啦！
由於唔多識打理支新噴筆，攪到尋日用完積左好多油無洗到，
噴到好now教，有D組件更需要洗過浸油，
重新上過油，好煩！

今日，勞動節，
我老Blue不論工事或私事都好勞動下囉！

Blueman