倉庫情景、24第六季

＊＊最近住緊既屋村外牆翻新，唔知會攪幾耐呢？＊＊


2007年1月30日
丙戌年十二月十二
夜

〈感想〉
如果唔係自己開始有寫Blog既習慣，
如果唔係自己上年開始有砌模型既習慣，
如果唔係自己買左部CG-6機仔，有記錄既習慣....。
都唔知時間原來真係唔等人，
眨下眼差不多又一個月囉！！

〈模型〉
不經不覺，我老Blue完成左隻MG-Nu Gundam，
已經砌左十五隻MG咁多囉！
砌模型除左享受由無變有既過程及樂趣外，
當見到自己完成品或多或少有一種工作之外得唔到既滿足感！
不過，完成左咁多件“作品“，
未有時間認真拍一輯模型相，
因為我老Blue又唔想咁齍咁棟件模型就咁映喎！
呢幾日諗如果自己砌個MS倉庫做背景都幾過癮.......。
但係個倉庫點做、要幾大？
都依家得個概念.........。

〈影視〉
終於睇左24第六季頭三集！
兩個字形容：好勁！！
估唔到呢套連續劇去到Season 6都仲有橋行，
兼且製作明顯加大碼，
希望唔好衰收尾啦！

Blueman

第15個MG-Nu Gundam完成

2007年1月28日
丙戌年十二月初十
夜

〈模型〉
今日我老Blue終於完成左自己第15個MG-RX-93 Nu Gundam。
不經不覺，呢隻MG都攪左我接近兩個月咁濟，
應該係我老Blue砌MG以來最耐既一隻，
無他，呢個月天氣凍及工作關係，真係無乜時間砌模型囉！
不過，雖然花左咁多時間整呢隻野，
結果自己都幾滿意！
至於下一隻MG係砌邊隻？
我仲未諗到喎，因為實在買左太多MG模型，
一時間唔知砌邊隻好囉！？

〈婚宴〉
先個幾日（1月23日）工友﹣恆仔大婚之喜，
我老Blue都有幫手執頭執尾做兄弟，
自己亦都有用部DC仔-Sanyo CG6拍下野咁，
拍左成日錄左粒幾鐘，覺得呢部CG6真係好方便又好玩。
BTW，在此我老Blue祝願一對新人白頭到老、永結同心！
恭喜恭喜！！

Blueman

創新高

2007年1月22日
丙戌年十二月初四
夜

〈股市〉
港股連升四日，
今日終於創歷史新高，收報20772.22勁升四百幾點，
非常巴閉！
但係我老Blue無貨起手，睇戲罷了。

〈模型〉
呢排笨大好癲下，
出親D新產品有趨勢係越賣越貴。
繼MG版“突擊自由高達“分普通及豪華版之後，
下一隻好多玩家都期待既MG版"Hi-Nu Gundam“，
傳聞去到七千幾日元！
都未算，二月中發售既1/350既“宇宙戰艦﹣大和號“賣四萬幾日元，
都幾誇張！！
原來除左港股創新高之外，
估唔到連模型價格都創新高？
唔通模型真係多人玩返？

除左隻Hi-Nu我老Blue有興趣之外，
緊住會出既重戰機﹣L.Gaim MK II及U.C. Hard Graph No.3-08小隊既氣墊車，
呢兩款自己興趣多過Hi-Nu！！

自己連續個多月砌緊既MG-Nu Gundam，
終於接近完成階段，
家陣只欠武器未攪掂，
但係重組後，整體感覺都唔錯！

Blueman

沒有葉明發的邊荒傳說

＊＊近日攝影隨拍＊＊



2007年1月20日
丙戌年十二月初二（大寒）
傍晚

〈漫畫〉
尋日睇到今期漫畫﹣邊荒傳說。
友人K話今期已經無左主筆﹣葉明發個名！
睇過之後除左無提葉明發去向外，
更覺得D公仔兒戲左，仲突然間攪到主角燕飛cute左好多咁，
心問攪乜野呀！？
本地漫畫主筆，我老Blue最喜愛既係：邱瑞新、葉明發及鄭健和呢三位比較有個人風格及突出。
唔知發哥係咪有新作攪緊呢？

〈公司〉
尋日，部門又有工友轉部門，
呢位女工友入左公司唔夠兩年就轉職，
認識唔算深，
但係依我老Blue觀察，
覺得云云新同事當中，佢係第二個公司明日之星，
年輕、進取、淡定，言談有序，
前途無可限量！
另一個同期既新同事，比她更早俾人挖走！
有實力點襟都襟唔住；
無實力點托都托唔起！

Blueman

公平的24小時

＊＊最愛藍天白雲＊＊


＊＊晚宴＊＊



2007年1月17日
丙戌年十一月廿九
中午

〈晚宴〉
前晚，一班工友為前工友﹣阿神攪歡送晚宴，
有三十多位工友出席。
席間氣氛熾熱，不時大玩敬酒、映相，
我老Blue首次帶部新DC仔﹣CG6去玩，
又映相又拍短片，覺得呢部機仔出席呢D場合好方便好好玩，
尤其酒樓用高ISO 800~1600用現場光、個“芒“180度角度取景好實用！
最後自己都唔知點解可以映左百幾二百多張相咁誇？
又或者一班同事除左返工見面外，
好耐無試過咁多人出來玩卦？

〈網絡〉
當晚，食完飯返屋企過相落腦到，
減埋減埋都有成百幾張咁多，
整埋完滿以為先排網絡速度回復正常，
誰不知上傳速度極度唔理想，
大約二百零MB,
upload D相去自己既相簿居然用左成粒鐘，
比平時用多一倍時間。
返公司問平時有打開on-line game既工友，
佢話無打game囉，原因lag成四秒咁誇喎，無得打！！
佢仲話聽講修復光纖工程要今個月底先至完成第一條光纖，
咁即係仲有五條仲有排整？

〈時間〉
至踏入2007之後，
計劃既內容相對比去年少左，
但係今日已經過左半個月，
我老Blue好似乜到無做過野咁，
原本打算一個月裡面砌兩副MG，
睇怕好難成事囉；
一堆原本要睇既書依然擺左響書架到；
股市無貨?手，原本要做功課亦都未開始。
時間對我來講好似過得特別快咁，
還是自己太貪心呢？

成日聽好多人講世界點樣唔公平，
點解有D人咁有錢、亦有D人好窮？
點解有D人身體好好，亦有D人天生體弱多病？
點解有D人想飲乾淨水都好難，但係聽過有人叫碟鮑魚，話D汁唔得叫?房換過？
呢D我老Blue唔識答？
不過，有一樣好肯定咁講，
每人每日都享有24小時，不多不少，呢樣係絕對公平！
問題係大家點樣利用呢24小時？

Blueman

模型鋪老細

＊＊自己所選用既歐美模型油＊＊


2007年1月14日
丙戌年十一月廿六
下午

〈個人〉
買左部DVR（數碼錄影機）之後，
最大用家係家母，幾經我老Blue鼓勵下，
家母開始對部新機用上手。
其實要老人家學習新事物的確有難度，
慶幸現今家電操作模式簡單易用，
令好多上年紀既長者方便不少。

〈網絡〉
呢幾日發覺網路暢順左，
去番斷纜之前既正常速度，
希望同類事件唔會再發生啦！

〈模型〉
今日，我老Blue返通宵，
所以下晝可以有時間繼續噴模型油，
終於經過十多日斷斷續續既日子，
呢隻MG﹣Nu Gundam上色完成！
聽日希望可以做埋尾既功夫啦。

其實，之前都提過自己砌模型，
所用既模型油選用比較冷門既品牌﹣西班牙出品既AV model color及美國出品既超級金屬油﹣Alclad II Lacquer。
但係呢兩個品牌既模型油無日本出品既Tamiya及Mr.Hobby咁流行，
香港而有售賣呢類模型油既地方亦唔多，
兼且來貨日期唔穩定，真係要買襯手個隻。

數模型鋪其中一間真係好巴閉，
點樣巴閉法？呢間鋪頭位於旺角上樓鋪，
一個禮拜只開一日，
兼且個日只開幾個鐘，
老細係一個上左年紀既老人家，語氣和善。
而每次上到去，呢位老細好專心咁砌模型，
唔理客人有無幫襯，
間唔中見佢會同D熟客或朋友吹水。
雖然係咁，但係佢賣既模型油價錢合理。
起現今香港街鋪租金高企既營商環境下，
好明顯係過著退休生活而開鋪！

最近由於自己所用既專用洗模型油既噴筆水就快用完，
急須補貨，如果唔用佢既話，枝噴筆好易塞槍。
就係咁尋日我老Blue終於夾到時間走去買油，
見到老細又起鋪頭到砌模型，
由於呢隻洗筆水都好常用，
跟住見個模型油架十室九空，
問老細幾時會再翻貨？
佢話佢老人家唔得閒落貨喎！？
（但係有時間起鋪頭砌模型......？）
於是二話不說咁一口氣掃左三樽以備不時之需。

買完油起到諗，
如果有朝一日，我老Blue可以有能力退休的話，
好似呢位老人家咁可以做自己喜歡既工作，
娛己娛人，無憾也！！

Blueman

宵夜

＊＊又愛又恨的炸墨魚丸＊＊


2007年1月13日
丙戌年十一月廿五
凌晨

〈宵夜〉
我老Blue返夜班工作個日，
通常收工既時間已經係凌晨時份。
有時會夾埋D工友一齊去光顧茶餐廳食完宵夜先至返屋企，
如果夾唔到D工友既話，
自己就會收工途中路經既地方買宵夜返去開餐算數！
至於我老Blue宵夜會食乜？
由於宵夜唔係正餐，
同好多朋友一樣，不外乎煮個即食麵或者買個麥記飽充饑就係咁簡單。

不過，今晚一樣收夜途經旺角夜市，
除左買左麥記飽之外，
見到開到好夜既熟食檔，
其中一檔賣炸墨魚丸，
賣相幾得下兼十蚊盒，好似幾抵食咁買左盒。

後悔！！
唔係唔好食，相反仲幾好味添，
可惜，自己買左個麥記飽，
食埋個飽之後，發覺呢盒炸墨魚丸原來都幾夠份量下，
但係實在炸得好好味，
攪到我老Blue同呢盒墨魚丸陷於苦戰！！
最後都被我食清光。
不過，今晚要比平時多D時間消化下先至訓得囉.......。

Blueman

紅白二事、新人舊人

＊＊新舊交替、循環不息＊＊


2007年1月12日
丙戌年十一月廿四
早

〈個人〉
近日，我老Blue身邊有工友們有紅事（喜事）及白事（喪事）。
有喜亦有悲，人生也！
至於公司方面，因為人手緊絀，
最近加入左幾位外援，不過年齡幼嫩，
工作能否應付現今部門工作量成疑？
相對有D朋友，踏入年頭去意萌生，
周而復始，循環也！

自己踏入中年，
對此體會有所感而行文。

〈模型〉
今朝早起，
目的就係實行一月砌兩副MG既計劃，
趕快起好攪左好耐都未砌完既MG﹣Nu Gundam。
世事無常，
能夠每日做自己喜歡既事，
已經好開心！

Blueman

iPhone登場、Ai計劃續談、音樂MV

＊＊戴佩妮專輯﹣iPenny＊＊


2007年1月11日
丙戌年十一月廿三
夜

〈手電〉
尋日，相信好多Mac友好似我老Blue會特別高興！
因為Apple終於宣佈推出iPhone。
呢部SmartPhone可以話係我老Blue最期待既蘋果產品，
自兩年前開始起Blog寫有關我老Blue已經對手提電話既期待：
08/05/2005“老鼠愛老虎“、
28/07/2005“手電功能“、
11/01/2006“Mac機與Intel芯“、
02/01/2006“PDA與記事簿“、
09/08/2006“手機與iPod“。
初步睇過呢部iPhone既功能自己就好滿意，
價格亦係我老Blue接受既範圍，
最重要因為佢既作業系統一樣係用OS-X嘛！
完全解決我老Blue由Mac機、手機同步既問題及資料往來既整合性。
呢個亦係自己點解咁耐唔輕易轉手機既原因。
不過，如果想買呢部iPhone，亞洲區祇少要等到2008年喎......！
唯有呢一年繼續我呢部用左兩年幾既SE K700i啦。

〈相機〉
早幾日提過自己可能會今年會upgrade套DSLR，
初步盤算呢個“Ai計劃“，
機身反而係次要，
因為上網亦見到唔少有關D200既二手市場，
同之前預計一樣，
一萬以下出機唔難，
始終現今DSLR一來更新率頻密，
二來新機售價下跌幅度都幾快下。
反而優質鏡頭因供求問題，
跌幅無相機咁大，價格維持高企。
加上由於部份原因要遷就兩個系統（Olympus+Nikon），
所以鏡頭選擇暫定全部有Ai光圈環既手動定焦鏡為主，
目標一機四鏡，
到今日為止，自己認為最理想及合符要求既組合如下：
Body Nikon D200（或到我蓄夠錢既時候出部D200S都唔出奇？）
Lenses-
1）Carl Zeiss ZF 25mm F2.8（主打紀實）（4/3=50mm/ 1.5X=37mm)、
2）Carl Zeiss ZF 85mm F1.4（主打人像）（4/3=170mm/1.5X=127mm）、
3）Voigtlander APO-Lanthar Marco 125mm F2.5L （主打微距及遠攝）（4/3=250mm/1.5X=187mm）
4）Nikon AF 14mm F2.8D（主打廣角及風景）（4/3=28mm/1.5X=21mm）。
不過，我老Blue訂左呢個組合之後，
知道係財政上面係一個大project！
保守估計分期執行都要用兩年時間先至可以達標囉，哈哈！

〈音樂〉
呢一年我老Blue都買左好多國內及台灣女歌手既CD，
除左有早前推介過國內超人氣女新星﹣張靚穎外，
一位久違左好耐既台灣女歌手蕭亞軒終於有新作﹣1087，
聽完自己好喜歡，感覺風格同以前有些少轉變.....。
另外，一張專輯係去年六月出品，台灣創作女歌手﹣戴佩妮專輯﹣iPenny。
聽完感覺好清新好特別，尤其一隻歌﹣單身潛逃，
係我老Blue近一年覺得其中一隻好正既作品。
跟住上網睇下有關作品既資料，
發覺呢隻“單身潛逃“除左係呢位小姐曲詞一手包辦外，
更亦係Mac友一名，報導講呢隻歌既MV初頭係佢用部MAC機砌左段概念短片俾製作公司睇，
結果，製作公司覺得好正，
建議佢試下做埋MV導演，就係咁戴小姐第一次為自己拍左呢個MV。
自編、自導、自演，閉門五日五夜用部MAC自己剪埋片而成，
效果都幾好！
唔知有無朋友聽過或睇過呢隻MV呢？
單身潛逃MV
MV製作花絮

Blueman

Ai計劃始動

2007年1月7日
丙戌年十一月十九
夜

〈網絡〉
今日放假，原本打算匿起屋企到噴模型油，
可惜天文台出左個寒冷驚告，得個十零度左右，
結果凍到雙手梗哂，放棄左。
轉為上網寫下Blog，
不過，網絡上傳既情況似乎仲未得改善......。
但係之前有問題既藍芽鍵盤，好奇地拎番出來用，
又奇跡地無事咁用得番喎！？
世事既野真係好奇妙！

〈個人〉
踏入2007年，
我老Blue亦有小小計劃俾自己，
大方向以學習、投資及娛樂三樣為主。
學習方面，自己檢討過最差既係語言，
希望今年會起英語及國語呢D基本技能有所提升啦！
投資方面，根據上年所得既成績及回報，
方向及目標維持不變，
不過，仍然以少做少錯、止蝕不止賺為基礎進行，
做一個懶惰既散戶。
娛樂方面，去年入左咁多模型，
睇怕今年唔會點樣係模型方面入貨，
係時候清倉砌番多幾盒模型，
希望一個月可以完成袛少兩盒MG啦！
至於攝影方面，除左會努力影模型外，
亦好希望下半年映多D人像，
因為去年時間及器材方面唔係咁配合，
成績唔係咁理想。
（其實係俾藉口自己去買傢生就真，hehehe....）

亦都係咁樣，我老Blue去年經常有提及過既攝影器材可能會更新（見下文），
今年既消費預算可能要削減來預備買新既攝影器材囉！

〈相機〉
有經常睇我老Blue呢個Blog既網友及工友都知道除左講模型之外，
最有興趣講既係攝影及相機呢瓣野！
自兩年前左右，
我老Blue開始入左第一部DSLR當時其中係入門級既O記E-300 kit之後，
不經不覺用到依家囉！
自己對呢部入門機都好滿意，
但係想再up-grade多一部中階或高階DSLR，
亦因為O記呢個品牌令我又愛又恨，
遲遲作唔出決定去選擇其他品牌作up-grade？

經常上網見到有O記用家大玩轉接環上C/Y鏡、Leica鏡或Nikon鏡等等，
玩其他品牌既鏡頭，
效果都唔差。
雖然身邊都有唔少O記用家，
但係無一個試過用個呢個轉接環，
攪到我老Blue無勇氣做白老鼠.......。

直至近日上網，
終於睇到一D舊文講用N記D-200及O記大玩Zeiss新系列ZF mount！
效果都不俗。
攪到自己心思思想試下呢個轉接環，
於是前幾日走左上去信和蘇聯佬問下有無貨？
O記4/3＞N記Ai鏡轉接環賣百四銀，
其他轉接環都係咁上下價，
經老細講解點用後，
膽粗粗咁買左個玩。
即晚經友人借左枝N記AF 50mm F1.8試玩，
由於呢個轉環接雖然用起O記E-300到可保留手動、光圈先決模式，
及可用上偏重心、重點測光，
但係缺點當然係全手動對焦及無Exif資料。

慶幸我老Blue叫做“上一代“攝影玩家，
手動對焦對我老Blue唔算陌生，
相反仲有種“親切感“添！
由於自己部E-300早前已加上ME-1放大接目鏡，
兼且借用既50mm有1.8大光圈，
手動對焦還算明亮，屬可接受範圍。
日間出外映左幾張，
急看效果發覺都幾滿意！（見附圖）

心裡一直對Zeiss蔡司鏡情有獨鐘，
家陣自己可以未必死守O記等新機發表或其他上級機如何如何？
只要能夠用上ZF mount既蔡司鏡就可以！
心目中下一部中階機而又可以彈性咁用得Zeiss鏡有兩部，
就係N記既D-200或新發表既富士蛇五（S5 Pro）。
但係以C/P值計，以D-200為首選！
初步起相機鋪拎過部D-200上手，
覺得個觀景器又大又光，手動對焦幾理想，
但D-200行機現價萬一左右，
自己出機目標價希望低於一萬先至考慮入手，
至於部蛇五因為仲未有貨兼且價錢會比同一款機身（D-200）貴上一大截，
同自己訂下既目標價相對有好大距離，可能性唔高！
咁現有部E-300經此計算，
當然會保留作為上佳既後備機看待啦！

反而最難決定係鏡頭，
因為如果揀Ai鏡，選擇比O記多好多！
除左Zeiss既ZF mount之外，
亦有原廠N記及福倫達Ai鏡可供選擇，
價格比O記高級鏡吸引好多！！
一枝鏡頭，兩個系統都適用，
唔錯既組合及幾化算，
當然要對手動對焦呢家野唔抗拒啦。

之於呢個“Ai計劃“，
就好視乎自己今年可動用既財政預算有幾多？
同埋自己又要求最常用既鏡頭焦段要幾多啦？
等我老Blue計一計數先再決定！
如果有呢方面既攝影玩家見到呢篇Blog，
不妨俾D意見我老Blue，
一齊分享下心得呀！

Blueman

＊＊E-300+Ai AF 50mm 近攝＊＊


＊＊E-300+Ai AF 50mm 無限遠拍攝＊＊


＊＊土砲Emily鏡頭轉接環＊＊


＊＊Olympus E300+Nikon AF 50mm＊＊

家母新玩具

2006年1月5日
丙戌年十一月十七
凌晨

〈影音〉
我老Blue家母其中一項好緊要既娛幾就係睇電視。
好多時動用錄影機來錄影佢認為好重要配音劇集，
黃金時段，電視及錄影機既遙控權就係咁永遠落起佢地手上，
我地做細係不容反抗！
相信好多朋友都會好似我老Blue有咁既情況。

幾日前，屋企部塵年錄影機終於頂唔住，
已經做唔到錄影既工作，正式宣告退役。
家母當堂好無癮，情況同我老Blue好鐘意映相，
忽然想映相個日話壞相機一樣。
多番急令我老Blue要儘快解決呢件事，
等佢老人家安心下喎！！

結果，經有關經驗既工友們指引，
建議我老Blue趁呢個時候，
可不選擇用DVR數碼錄影機呢？
了解過有關DVR之後，
自己心大心細，雖然DVR價錢已經去到好合理既水平，
價錢平到千零蚊都有交易，
大牌子有信心既都係二、三千左右！
問題係呢部機主要服務對像係家母，
唯恐佢老人家接受唔到呢D新玩具！！

今日（04/01）走左出去MK睇下家陣呢D DVR點運作？
睇完之後，發覺操作並唔係想像中咁困難，
同以往傳統錄影機咁上下，
至不過用既唔係錄影帶而係用上DVD及HardDisk咁解。
最後經好幾個工友推介，
買左比較有口碑既Pionner DVR返屋企！

果然，由開盒到試機，
過程唔駛半粒鐘，
Pionner既操作介面及按扭的確簡單易用，
跟住用張紙寫低點樣用最簡單方法教家母點用呢部新玩具，
起初佢老人家都好抗拒呢D“新科技“，
後未經我老Blue簡單示範後，
開始明白新玩具既好處！

希望佢老人家會用得開心啦。

Blueman

新一年的藍天白雲

2007年1月1日
丙戌年十一月十三
夜

〈網絡〉
自斷電纜後第六日，
我老Blue終於起Blogger.com上到Blog啦。
雖然係慢D，但好過上唔到啊！！
不過，睇新聞紙講由於連派出海整電纜既維修船，
途中都壞埋，
報稱維修工程修復唔係短期可以做到喎！
咁弊！？

〈天氣〉
今日自己好慶幸元旦日放假，
大大話我老Blue都有成好多年元旦無放假囉。
所以今日好早起左身，
噴左一陣模型油之後，
出左去買D模型油，
出到街驚見天朗氣清，仲有我最喜愛既藍天白雲添，好正！！
有一種新一年新氣像既感覺。

〈影視〉
前兩晚開工個陣，
有工友同我講連續劇“24“，
今個月起美國會播出新一季，
睇過Trailer覺得好精彩兼好落本，
唔知香港幾時會有得睇呢？

〈模型〉
今日元旦日，
我老Blue都係好積極咁砌緊隻MG RX-93 Nu GUNDAM。
雖然天氣乾燥，
極之適合噴模型油。
不過，呢隻RX-93都幾大隻下，
兼且白色、黃色既地方都幾多下，
要花好時間上好多層至好睇。
希望呢個禮拜可以完成哂啦！

Blueman

告別2006

2006年12月31日
丙戌年十一月十二
夜

〈網絡〉
今日呢篇Blog依舊係之前寫落既，
無他既，因為網絡仲好慢，繼續回歸56K既感覺！
十年前係電腦興起既時代；
今時今日係網絡既時代囉！
原來個六條光纖真係好重要，
睇報紙講好多中小企因為網絡問題好影響佢地做生意喎！
呢幾日突然間俾我老Blue感覺好“Matrix“，
唔係人類控制網絡，
而係俾網絡控制咁。
如果有日全世界突然網絡停頓一日，
真係唔知會發生乜野事囉！？
有關網絡供應商及當局經過今次事件，
希望諗諗計預防再有同類型事件發生。

〈扭蛋〉
我老Blue落玩具鋪通常只係留意下有乜模型之外，
其他玩具好少睇，
除非係幫朋友問下野例外。
但係今日落去玩具鋪老細就好衰衰咁介紹左件新野俾我老Blue。
原來只不過“扭蛋公仔“，
但係呢D扭蛋唔可以擺出門面display喎，
因為呢D公仔全部係好Sexy既三級公仔扭蛋嘛！！
但係上色及造型都好精細、鬼馬下，
攪到我老Blue都買左set......hahahaha！
死啦！以後除左模型外，
又開多瓣系列駛錢囉。

〈時事〉
今日有老友過左去曼谷玩大除夕倒數，
但係剛剛睇新聞見到當地夜晚時份發生多宗連環炸彈時件，
希望對呢位老友唔會有太大影響啦！

〈個人〉
今晚大除夕，
我老Blue已經少去人多既地方過節。
明天亦係踏入新既一年2007！
初步對自己既前境審慎樂觀來形容，
新既一年計劃亦已經有左初期既步署，
大方向集中：學習、投資及玩樂為主。
不過，吸受左去年既經驗，
計劃無訂得咁高囉，
希望新既一年能夠按計劃完成就好成功。

再此我老Blue祝各位看官新年快樂！！

Blueman